Дәсте Йаһоԝа Тʹӧ Щар Кьн Нинә

1. Гава Муса мьләте Исраел жь ԝәлате Мьсьре дәрхьст, әԝи хԝә ча спартә Йаһоԝа?

КʹЬТЕБА Ибрани бәʹса чәнд мәрьва дькә, баԝәрийа кʹижана кӧ гәләк ԛәԝи бу. Йәк жь ԝан Муса пʹехәмбәр бу (Ибрани 3:2-5; 11:23-25). Гава Муса мьләте Исраел жь ԝәлате Мьсьре дәрхьст, әԝи баԝәрийа мәзьн да кʹьфше. Муса дәԝса кӧ жь Фьрәԝьн у ордийа ԝи бьтьрсә, әԝи хԝә спартә Йаһоԝа, щьмәʹт бәʹра Соррʹа дәрбаз кьр у бьрә бәрʹийе (Ибрани 11:27-29). Ԝедәре һʹәчʹи зәʹф Исраели дӧдьли бун, кӧ Йаһоԝа дькарә бона ԝан хәм бькә, ле Муса тʹьме Хԝәдеда баԝәр бу. Баԝәрийа Муса пʹучʹ дәрнәкʹәт. Хԝәде бәрʹийеда бь кʹәрәмәти ав у хԝарьн дьда щьмәʹта хԝәa (Дәркʹәтьн 15:22-25; Зәбур 78:23-25).

2. Хԝәде чьма жь Муса пьрси: «Чьма жь дәсте Хӧдан найе?» (Жьмар 11:21-23)

² Рʹаст ә баԝәрийа Муса гәләк ԛәԝи бу, ле гава Йаһоԝа ԝирʹа гот ԝәки ԝе гошт бьдә мьләте Исраеле, Муса дӧдьли бу кӧ әв йәк ԝе ча бьԛәԝьмә. Бәрʹийеда бь милйона мәрьв гәрәке бьһатана тʹеркьрьне, ле гәләк чәтьн бу хԝарьне дәстхьн. Һьнге Йаһоԝа жь Муса пьрси: «Чьма жь дәсте Хӧдан найе?» (Бьхунә Жьмар 11:21-23). Ве рʹезеда «дәсте Хӧдан» те һʹәсабе рʹӧһʹе пироз, демәк ԛәԝата Йаһоԝа. Әм дькарьн бежьн, ԝәки вьра Йаһоԝа жь Муса ӧса пьрси, ‹Тӧ дьфькьри ԝәки әз нькарьм созе хԝә биньм сери?›

3. Чьрʹа әм гәрәке дәрһәԛа сәрһатийа Муса у Исраелийа бьфькьрьн?

³ Гәло тӧ ԛә фькьрийи, һәла Йаһоԝа ԝе алийе материйалида бона һʹәԝщед тә у малбәта тә хәм бькә йан на? Ве готареда әме дина хԝә бьдьнә сәрһатийа Муса у Исраелийа, йед кӧ баԝәр нәкьрьн, ԝәки Хԝәде дькарә бона һʹәԝщед ԝан хәм бькә. Бь сайа принсипед Кʹьтеба Пироз, йед кӧ әме шеԝьр кьн, баԝәрийа мә ԝе дьһа ԛәԝи бә, ԝәки дәсте Йаһоԝа тʹӧ щар кьн нинә.

ЖЬ МӘСӘЛА МУСА У ИСРЕИЛИЙА ДӘРСА ҺИН БӘ

4. Чьма гәләк мәрьва баԝәр нәдькьрьн, ԝәки Йаһоԝа дькарә һʹәԝщед ԝан рʹази кә?

⁴ Гәләк Исраелийа чьма баԝәр нәдькьрьн, ԝәки Йаһоԝа дькарә һʹәԝщед ԝан рʹази кә? Паши ве йәке кӧ мьләте Исраел у гәләк кәсед дьн жь Мьсьре дәркʹәтьн, әԝана пешийа кӧ бькʹәтана Әʹрде Создайи, ԝәхтәке бәрʹийеда ман (Дәркʹәтьн 12:38; Ԛануна Дӧщари 8:15). Ԝәʹдә шунда, һьм гәләк Исраели һьм жи кәсед дьн жь хԝарьна Маннайе әʹщьз бун у ләма газьнед хԝә дькьрьн (Жьмар 11:4-6). Щьмәʹте бира хԝарьна Мьсьре дькьр. Жь бо газьнед щьмәʹте, Муса хԝә борщдар тʹәхмин дькьр, ԝәки һʹәԝщед ԝан рʹази кә (Жьмар 11:13, 14).

5-6. Жь ве йәке кӧ ньһерʹандьна мәрьвед жь мьләтед хәриб сәр Исраелийа чаԝа һʹӧкӧм кьр, әм чь дәрса һин дьбьн?

⁵ Те кʹьфше ԝәки бешекьрийа мәрьвед жь мьләтед хәриб сәр Исраелийа һʹӧкӧм дькьр. Дьбәкә әм жи бькʹәвьнә бәр байе бешекьрийа мәрьвед дьн у ида бона тьштед кӧ Йаһоԝа дьдә мә, рʹази нибьн. Мәсәлә, һәрге әм һʹьзрәта ԝан тьшта бьн, чь кӧ бәре бал мә һәбу, йан жи чʹәʹвнәбарийе кәсед дьн бькьн, әм жи дьбәкә бьбьнә мәрьвнә бешекьр. Фьрԛи тʹӧнә әм чь һʹалида ньн, һәрге әм һин бьн, ԝәки бона ван тьшта чь кӧ ньһа щәм мә һәйә, рʹази бьн, әме дьһа бәхтәԝар бьн.

⁶ Исраелийа гәрәке бирнәкьрана ԝәки Хԝәде соз дабу, кӧ гава әԝана бьгьһижьнә малед хԝәйә тʹәзә, щәм ԝан һәр тьшт ԝе тʹер-тʹьжә һәбә. Әв соз нә кӧ бәрʹийеда, ле Әʹрде Создайида гәрәке бьһата сери. Мина ве йәке, дәԝса кӧ әм дина хԝә бьдьнә тьштед кӧ иро дәсте мәда тʹӧнә нә, ԝәрә әм биньн бира хԝә ԝәки Йаһоԝа дьнйа тʹәзәда ԝе чь бьдә мә. Ӧса жи әм дькарьн кʹур бьфькьрьн сәр рʹезед кӧ баԝәрийа мә һьндава Йаһоԝа дьһа ԛәԝи дькьн.

7. Әм чьма дькарьн баԝәр бьн, ԝәки дәсте Йаһоԝа кьн нинә?

⁷ Диса жи дьбәкә бал тә пьрс пешда бе кӧ чьрʹа Хԝәде жь Муса пьрси: «Чьма жь дәсте Хӧдан найе?» Дьбәкә Йаһоԝа дьхԝәст, ԝәки Муса нә тʹәне дәрһәԛа ве йәке бьфькьрә кӧ дәсте ԝи чьԛас ԛәԝи йә, ле ӧса жи кӧ дәсте ԝи дьгьһижә һʹәта кʹидәре. Һәла һе бәрʹийеда жи Хԝәде дькарьбу тʹер-тʹьжә гошт бьда Исраелийа. Хԝәде ԛәԝата хԝә «бь дәсте зор у зәнда дьрежкьри» нишани ԝан кьр (Зәбур 136:11, 12). Ләма жи гава әм дькʹәвьнә тәнгасийа, әм дькарьн баԝәр бьн ԝәки дәсте Йаһоԝа ԝе бьгьһижә мә жи (Зәбур 138:6, 7).

8. Сәва кӧ әм мина Исраелийа шашийа нәкьн, әм гәрәке чь бькьн? (Бьньһерʹә ӧса жи шькьл.)

⁸ Гәләк ԝәхт дәрбаз нәбу гава Йаһоԝа бь милйона ԛаритк шандьн сәр Исраелийа. Ле ԝана шькьри нәда Хԝәде. Ԝана жь тьмайе хԝәрʹа гәләк ԛаритк тʹоп кьрьн. Бона хԝәһʹәзийа ԝан, Йаһоԝа әԝана щәза кьрьн (Жьмар 11:31-34). Жь ве сәрһатийе әм дькарьн дәрсе бьстиньн. Әм гәрәке һаж хԝә һәбьн, ԝәки чʹәʹвбьрʹчи у тьма нибьн. Фьрԛи тʹӧнә әм дәԝләти йан кʹәсиб ьн, әм гәрәке һе зедә дина хԝә бьдьнә достийа хԝәйә тʹәви Йаһоԝа у Иса, у бь ви щурʹәйи «хԝәрʹа ль әʹзмен хьзне тʹоп кьн» (Мәтта 6:19, 20; Луԛа 16:9). Әм дькарьн баԝәр бьн, кӧ һәрге әм ӧса бькьн, Йаһоԝа ԝе бона һʹәԝщед мә хәм бькә.

9. Әм дькарьн чьда баԝәр бьн?

⁹ Йаһоԝа иро жи дәсте хԝә дьрежи хьзмәткʹаред хԝә дькә, ԝәки али ԝан бькә. Әв йәк һәмьки найе һʹәсабе ԝәки әме тʹӧ щар тьштед материйали ӧнда нәкьн у бьрʹчи нәминьн.b Ле Йаһоԝа ԝе тʹӧ щар мә тʹәне нәһелә. Фьрԛи тʹӧнә әм рʹасти чь чәтьнайа жи бен, әԝе али мә бькә. Ԝәрә әм дина хԝә бьдьнә дӧ дәрәща, йед кӧ нишан дькьн, ԝәки Йаһоԝа ԝе дәсте хԝә дьреж кә сәва кӧ һʹәԝщед мә рʹази кә: (1) гава әм рʹасти чәтьнайед материйали тен у (2) чахе бәр хԝә дькʹәвьн, кӧ ча әме әʹбура хԝә бькьн, гава әʹмьрда мәзьн бьн.

ГАВА ӘМ АЛИЙЕ МАТЕРИАЛИДА РʹАСТИ ЧӘТЬНАЙА ТЕН

10. Әм дьбәкә рʹасти чь чәтьнайа бен?

¹⁰ Чьԛас әм незики хьлазийа ве дьнйайе дьбьн, дьбәкә һʹале економики дьһа хьраб бә. Жь бо тʹәвльһәвбуна политики, шәрʹа, тʹәшԛәлед тʹәбийәте йан пандемийайе, дьбәкә әм хәбата хԝә йан һәбука хԝә ӧнда кьн у һәла һе нькарьбьн бона һʹәԝщед хԝәйә һәррʹожи жи хәм бькьн. Сәва кӧ әм әʹбура малбәта хԝә бькьн, дьԛәԝьмә лазьм бә әм хԝәрʹа хәбатәкә тʹәзә бьвиньн, йан жи мала хԝә бар кьн у дәрбази щики дьн бьн. Ле чь дькарә али мә бькә сафикьрьнед ӧса бькьн, йед кӧ ԝе бьдьнә кʹьфше, ԝәки әм итʹбарийа хԝә Йаһоԝа тиньн?

11. Гава әм рʹасти проблемед материали тен, чь дькарә али мә бькә? (Луԛа 12:29-31)

¹¹ Йа лапә фәрз әв ә, кӧ әм дәрдед дьле хԝә Йаһоԝарʹа бежьн (Мәтʹәлок 16:3). Жь ԝи биланийе у дьлрʹьһʹәтийе бьхԝазә, ԝәки тӧ бькарьби сафикьрьнед баш бьки у бь зедәйи бәр хԝә нәкʹәви (Бьхунә Луԛа 12:29-31). Аликʹарийе жь Йаһоԝа бьхԝазә, ԝәки тӧ рʹази би сәва ԝан тьшта, чь кӧ бона әʹмьре һәррʹожи лазьм ә (1 Тимотʹейо 6:7, 8). Әʹдәбйәтед мә лекʹолин кә, ԝәки пебьһʹәси кӧ чь бьки, гава рʹасти проблемед економики тейи. Гәләк мәрьв жь видеойа у готаред дәрһәԛа проблемед материали, йед кӧ сәр jw.org һәнә, кʹарәкә мәзьн стандьнә.

12. Сәва кӧ әм сафикьрьнед баш бькьн, йед кӧ бона малбәта мә керһати нә, әм дькарьн чь жь хԝә бьпьрсьн?

¹² Һьнә мәрьва сафи кьрьбун хәбатәкә ӧса ԛәбул кьн, жь бо кʹижани әԝана мәщбур бун жь малбәта хԝә дур бьхәбьтьн, ле паше гәләка фәʹм кьр, кӧ әв сафикьрьнәкә билан нибу. Пешийа кӧ тӧ хәбатәкә тʹәзә ԛәбул ки, нә тʹәне сәр ве йәке бьфькьрә кӧ тӧйе чьԛас пʹәрә ԛазанщ ки, ле ӧса жи бьфькьрә кӧ рʹуйе ве йәкеда тӧ чь дькари ӧнда ки (Луԛа 14:28). Пьрсед ӧса бьдә хԝә: «Һәрге әз жь малбәта хԝә дур бьм, әв йәк ԝе сәр зәԝаща мьн ча һʹӧкӧм кә? Гәло әзе бькарьбьм хьзмәт кьм, тʹьме һәрʹьм щьвата у тʹәви хушк-бьра ԝәʹдә дәрбаз кьм?» Ле һәрге зарʹед тә һәнә, әве пьрсе бьдә хԝә: Һәрге әз жь зарʹед хԝә дур бьм, әзе ча ԝана «бь ширәт у һинкьрьна Хӧдан мәзьн» кьм? (Әфәси 6:4) Чахе сафикьрьна дьки, нә кӧ гӧһ бьдә ширәтед һәвал у мәрьвед хԝә, йед кӧ ль гора Кʹьтеба Пироз нажин, ле ль гора ньһерʹандьна Йаһоԝа сафикьрьна бькә.c Бьре мә Тони, йе кӧ ль Асйа рʹоавайе дьжи, чәнд мәщал жерʹа һатә дайине, ԝәки һәрʹә ԝәлатәки дьн бьхәбьтә. Ле чахе әԝи дәрһәԛа ве йәке дӧа кьр у тʹәви кʹӧлфәта хԝә хәбәр да, әԝи сафи кьр нәчә ԝәлатәки дьн. Дәԝса ве йәке, әԝ фькьри кӧ чь щурʹәйи хәрщед малбәте кем бькә. Тони дьбежә: «Бь сайа ве сафикьрьне, мәщал мьнрʹа һатә дайине, ԝәки али чәнд мәрьва бькьм кӧ Йаһоԝа нас кьн, у зарʹед мә жи Йаһоԝа гәләк һʹәз дькьн. Малбәта мә һин буйә кӧ һәрге әм ль гора гьлийед Мәтта 6:33 бьжин, Йаһоԝа ԝе бона мә хәм бькә».

БОНА ҺʹӘԜЩЕД ХԜӘЙӘ МАТЕРИАЛИ ХӘМ БЬКӘ

13. Әм ча дькарьн ньһада хԝә бона ахьрийе һазьр кьн?

¹³ Әм дькарьн бьдьнә кʹьфше, ԝәки әм итʹбарийа хԝә Йаһоԝа тиньн, гава пешда дьфькьрьн, кӧ чахе әм әʹмьрда мәзьн бьн, әме ча әʹбура хԝә бькьн. Кʹьтеба Пирозда те готьне, кӧ әм гәрәке сәрԝахт бьн у хԝә бона ахьрийе һазьр кьн (Мәтʹәлок 6:6-11). Һәрге те стандьне, ԝе баш бә кӧ әм бона ахьрийе һьнә пʹәрә паш хьн, чьмки һьнә дәрәщада пʹәрә дькарә мә бьпʹарезә (Ԝаиз 7:12). Ле диса жи әм гәрәке әʹмьре хԝәда һʹәчʹи зәʹф дина хԝә нәдьнә сәр ԛазанщкьрьна һәбуке.

14. Гава әм хԝә бона һʹәԝщед ахьрийе һазьр дькьн, чьрʹа фәрз ә кӧ әм гьлийед жь Ибрани 13:5 һьлдьн һʹәсаб?

¹⁴ Бь сайа мәтʹәлокәке, Иса нишан кьр, ԝәки мәрьве кӧ хԝәрʹа һәбуке тʹоп дькә, «ле чʹәʹве Хԝәдеда дәԝләти нинә», беаԛьл ә (Луԛа 12:16-21). Тʹӧ кәс ньзанә кӧ сьбе чь ԝе бьԛәԝьмә (Мәтʹәлок 23:4, 5; Аԛуб 4:13-15). Әм шагьртед Иса нә, ләма жи әм дьһа зедә рʹасти чәтьнайа тен. Иса гот, кӧ ча шагьртед ԝи, әм гәрәке һазьр бьн ԝәки «дәсте хԝә жь тʹәмамийа һәбуна хԝә» бькʹьшиньн (Луԛа 14:33). Ԛьрʹна йәкеда хушк-бьред ль Щьһустане бь дьл у щан һазьр бун ве ширәте ԛәбул кьн у һәрге лазьм бә жи, һәбука хԝә ӧнда кьн (Ибрани 10:34). Иро жи гәләк хушк-бьред мә хәбата хԝә ӧнда кьрьнә жь бо ве йәке, кӧ пьштгьрийа партийед политике накьн (Әʹйанти 13:16, 17). Гәло чь али ԝан кьр кӧ әве сафикьрьне бькьн? Әԝана жь дьл итʹбарийа хԝә Йаһоԝа тиньн, йе кӧ соз дайә: «Әзе тʹӧ щар жь тә нәчьм у тʹӧ щар тә бәрʹнадьм» (Бьхунә Ибрани 13:5). Ләма жи әм чь жь дәсте мә те дькьн, ԝәки бона һʹәԝщед хԝәйә ахьрийе хәм бькьн, у гава ньшкева тьштәк бьԛәԝьмә, әм дӧдьли набьн кӧ Йаһоԝа ԝе али мә бькә.

15. Нета де-бава һьндава зарʹа гәрәке чь бә? (Бьньһерʹә ӧса жи шькьл.)

¹⁵ Һьнә културада мәʹнийа сәрәкә кӧ чьрʹа жьн-мер дьхԝазьн зарʹед ԝан һәбьн әв ә, ԝәки зарʹ алийе материалида бона ԝан хәм бькьн, чахе әԝана әʹмьрда мәзьн бьн. Ле Кʹьтеба Пирозда те готьне кӧ де-бав гәрәке бона һʹәԝщед зарʹед хԝә хәм бькьн (2 Корьнтʹи 12:14). Гава де-бав мәзьн дьбьн, һәмьки дьбәкә ԝанрʹа аликʹари лазьм бә, у гәләк зарʹ һазьр ьн али де-баве хԝә бькьн (1 Тимотʹейо 5:4). Ле де-бавед баԝәрмәнд фәʹм дькьн, ԝәки шабуна лапә мәзьн әв нинә кӧ ахьрийеда зарʹ ԝан бьбьнә хԝәйи у алийе материалида кʹомәке бьдьнә ԝан, ле әв ә, ԝәки зарʹед ԝан бьбьнә хьзмәткʹаред Йаһоԝа (3 Йуһʹәнна 4).

16. Де-бав ча дькарьн али зарʹед хԝә бькьн, ԝәки әԝана паше бькарьбьн әʹбура хԝә бькьн? (Әфәси 4:28)

¹⁶ Де-бавно, бь мәсәла хԝә зарʹед хԝә һин кьн, кӧ чахе әԝана мәзьн бьн, бькарьбьн һьм әʹбура хԝә бькьн, һьм жи итʹбарийа хԝә Йаһоԝа биньн. Жь бьчʹуктайеда нишани ԝан кьн, кӧ чьԛас фәрз ә, ԝәки әԝана шьхӧлда хирәт бьн (Мәтʹәлок 29:21; бьхунә Әфәси 4:28). Али ԝан бькьн, ԝәки әԝана мәкʹтәбеда рʹьнд һин бьн. Ӧса жи принсипед Кʹьтеба Пироз бьгәрʹьн, йед кӧ ԝе али ԝан бькьн, ԝәки әԝана алийе һинбунеда сафикьрьнед рʹаст бькьн. Ӧса әԝана ԝе бькарьбьн һьм әʹбура хԝә бькьн, һьм жи һе зедә Йаһоԝарʹа хьзмәт кьн.

17. Әм дькарьн чьда баԝәр бьн?

¹⁷ Баԝәр бә кӧ Йаһоԝа һьм дькарә һьм жи дьхԝазә алийе материалида бона хьзмәткʹаред хԝә хәм бькә. Әм чьԛас незики хьлазийа ве дьнйайе дьбьн, һаԛас һе зедә фәрз ә, кӧ әм итʹбарийа хԝә Йаһоԝа биньн. У чь жи бьԛәԝьмә, әм баԝәр ьн кӧ Йаһоԝа ԝе пе ԛәԝата хԝәйә мәзьн бона һʹәԝщед мә хәм бькә. Бәле, әм дӧдьли набьн кӧ дәсте Йаһоԝа ԝе тʹӧ щар кьн нәбә, ԝәки али мә бькә!