Йаһоԝа Канийа Бәрдьлийе йә

1. Һʹале Щьһуйед аксоркьри чаԝа бу?

ҺӘЛА бьдә бәр чʹәʹве хԝә Щьһуйа, ԝәлате кʹижана һатьбу ԝеранкьрьне у дилти бьрьбунә Бабилоне. Әԝана жь бо гӧнед хԝә у гӧнед кал-бавед хԝә жь малед хԝә һатьбун дәрхьстьне у аксоркьрьне (2 Дирок 36:15, 16, 20, 21). Бабилонеда һьнә тьштада дил аза бун, мәсәлә шьхӧлед һәррʹожида (Йерәмйа 29:4-7). Диса жи жийина ԝан һеса нибу у нә ль гора дьле ԝан бу. Гәло ԝана ча ль сәр һʹале хԝә дьньһерʹин? Жь ԝана йәки ӧса гот: «Ль бәр чʹәмед Бабилоне әм рʹудьньштьн, мә Сийон дькьрә бира хԝә у дьгьрʹийан» (Зәбур 137:1). Бәле, кәсед аксоркьри һʹәԝще бәрдьлийе бун. Ле кʹе дькарьбу бәр дьле ԝанда бьһата?

2-3. а) Йаһоԝа бона Щьһуйед аксоркьри чь кьр? б) Ве готареда әме чь шеԝьр кьн?

² Йаһоԝа «Хԝәдейе һʹәму бәрдьлийе» йә (2 Корьнтʹи 1:3). Әԝ мәрьва һʹәз дькә, у һазьр ә бәрдьлийе у дьлбинийе бьдә ԝан һʹәму мәрийа, йед кӧ незики ԝи дьбьн. Йаһоԝа заньбу кӧ һьнә кәсед аксоркьри ԝе тʹәми у ширәтед ԝи ԛәбул кьн у вәгәрʹьнә бал ԝи (Ишайа 59:20). Ләма жи 100 сали зедәтьр пешийа аксоркьрьне, әԝи Ишайа пʹехәмбәр кʹьтебәк да ньвисаре. Гәло чьма? Жь кʹьтеба Ишайа әм педьһʹәсьн, кӧ Хԝәде дьбежә, ԝәки бәрдьлийе бьдьнә щьмәʹта ԝи (Ишайа 40:1). Бь сайа ньвисаред Ишайа пʹехәмбәр, Йаһоԝа бәрдьли дьда Щьһуйед кӧ паше һатьнә аксоркьрьне.

³ Мина ԝан Щьһуйед аксоркьри, әм жи щарна һʹәԝще бәрдьлийе нә. Ве готареда, әме бьвиньн кӧ Йаһоԝа ча бь се метода бәрдьлийе дьдә кәсед аксоркьри: 1) Әԝи соз дайә ԝәки ԝе бьбахшинә кәсед кӧ тʹобә дькьн, 2) һеви дайә хьзмәткʹаред хԝә у 3) али ԝан кьрийә ԝәки әԝана нәтьрсьн. Гава әм ԝан се тьшта шеԝьр кьн, дина хԝә бьдьне кӧ әм ча дькарьн жь гьлийед Йаһоԝа бәрдьлийе бьстиньн.

ЙАҺОԜА БЬ РʹӘʹМА ХԜӘЙӘ МӘЗЬН ДЬБАХШИНӘ МӘ

4. Йаһоԝа ча рʹәʹма хԝә нишан кьр? (Ишайа 55:7)

⁴ Йаһоԝа Хԝәде Баве бәрдьлийе йә (2 Корьнтʹи 1:3). Бь Ишайа пʹехәмбәр Йаһоԝа соз да Щьһуйа, кӧ ԝе бьбахшинә ԝан (Бьхунә Ишайа 55:7). Әԝи гот: «Әзе бь дьлованийа һәрһәйи ль тә ԝәрьм рʹәʹме» (Ишайа 54:8, ИМ). Гәло Йаһоԝа рʹәʹма хԝә ча нишан кьр? Һәмьки ча мьләт, Щьһу нькарьбун жь ахьрийа кьред хԝә бьрʹәвьн. Диса жи Йаһоԝа соз да, ԝәки әԝана ԝе һʹәта-һʹәтайе Бабилонеда нәминьн. Бь Ишайа пʹехәмбәр, әԝи әшкәрә кьр, кӧ әԝана ԝе тʹәне дәмәке ԝедәре бьминьн (Ишайа 40:2). Кәсед кӧ тʹобә дькьрьн, бе шьк жь ван гьлийа бәрдьли дьстандьн!

5. Иро чьма мәʹнийед мә жь Щьһуйед кӧ дилтийа Бабилонеда бун, дьһа зедә һәнә ԝәки баԝәр кьн, кӧ Йаһоԝа гӧнед мә дьбахшинә?

⁵ Әм жь ве йәке чь һин дьбьн? Йаһоԝа һазьр ә бь тʹәмами бьбахшинә хьзмәткʹаред хԝә. Иро мәʹнийед мә жь Щьһуйед кӧ дилтийа Бабилонеда бун, дьһа зедә һәнә ԝәки баԝәр кьн, кӧ Йаһоԝа гӧнед мә дьбахшинә. Гәло чьрʹа? Чьмки әм заньн Йаһоԝа чь кьрийә сәва кӧ гӧнед мә бьбахшинә. Бь сәда сала паши пʹехәмбәртийа Ишайа, Йаһоԝа Кӧрʹе хԝәйи дәлал шандә сәр әʹрде, ԝәки әԝ бона һʹәму гӧнәкʹаред тʹобәдар әʹмьре хԝә бәрва бьдә. Әв ԛӧрбан бу һʹиме ве йәке кӧ гӧнед мә «бенә паԛьжкьрьне», демәк бь тʹәмами бенә тʹәмьзкьрьне (Кʹаред Шандийа 3:19; Ишайа 1:18; Әфәси 1:7). Бәле, Йаһоԝа бь рʹасти жи Хԝәдеки дьлован ә у бь рʹәʹма хԝәйә мәзьн дьбахшинә!

6. Гава әм дәрһәԛа бахшандьна Йаһоԝа дьфькьрьн, чьма әм бәрдьлийе дьстиньн? (Бьньһерʹә ӧса жи шькьл.)

⁶ Һәрге исафа мә жь бо гӧнед мәйә бәре һе нәрʹьһʹәт ә, гьлийед Йаһоԝа, йед кӧ Ишайа 55:7-да ньвисар ьн, дькарьн бәрдьлийе бьдьнә мә. Һьнә мәрьв паши тʹобәкьрьне диса жи хԝә сущдар дькьн, илаһи һәрге ахьрийа хьраб йед шашийед ԝан, һе диса һәнә. Ле бәле, һәрге мә гӧнед хԝә тʹобә кьрийә у хԝә рʹаст кьрийә, әм дькарьн баԝәр бьн кӧ Йаһоԝа ԝе бьбахшинә мә. Гава Йаһоԝа дьбахшинә, әԝ гӧнед мә ида найнә бира хԝә (Бәрамбәр кә Йерәмйа 31:34). Һәрге Йаһоԝа гӧнед мәйә бәре бир дькә, әм жи гәрәке бир бькьн. Йаһоԝа дина хԝә надә шашийед мәйә бәре, ле бона ԝи тьште фәрз әв ә кӧ әм ньһа чь дькьн (Һәзәԛел 33:14-16). Зутьрәке Баве мәйи бәрдьлийе ԝе бь тʹәмами мә жь ахьрийа шашийед мә хьлаз кә.

7. Чь дькарә али мә бькә кӧ әм аликʹарийе бьхԝазьн, һәрге мә гӧне хԝә вәшартийә?

⁷ Һәрге исафа мә нәрʹьһʹәт ә жь бо ве йәке кӧ мә гӧнәки гьран вәшартийә, әм гәрәке чь бькьн? Кʹьтеба Пироз дьбежә кӧ әм жь рʹуспийа аликʹарийе бьхԝазьн (Аԛуб 5:14, 15). Дьбәкә мәрʹа һеса нинә, кӧ әм гӧнед хԝә биньн рʹуйе хԝә. Ле әм гәрәке бир нәкьн, ԝәки Йаһоԝа бь сайа рʹуспийед кӧ мина ԝи дьлован ьн, али мә дькә. Һәрге мә бь рʹасти тʹобә кьрийә, әме бьхԝазьн һәрʹьн бал ԝан. Ԝәрә әм бьньһерʹьн кӧ дьлованийа Йаһоԝа чаԝа бәрдьли да бьраки бь наве Артурa, исафа кʹижани нәрʹьһʹәт бу. Артур ӧса дьбежә: «Ԝәкә саләке, мьн порнографийайе дьньһерʹи. Ле чахе мьн готарәк дәрһәԛа исафе бьһист, мьн жьна хԝәрʹа у рʹуспийарʹа бәʹса ве йәке кьр. Паше әз һʹәвәки дьлрʹьһʹәт бум, ле әз диса жи бьн баре кьред хԝәда дьчәрчьрим. Рʹуспийа ани бира мьн, кӧ Йаһоԝа әз инкʹар нәкьрьмә. Йаһоԝа мә ширәт дькә, чьмки әԝ мә һʹәз дькә. Гьлийед ԝани бь дьлгәрми дьле мьн гьртьн у али мьн кьрьн ԝәки фәʹм кьм, кӧ Йаһоԝа бь рʹасти жи бахшандийә мьн». Иро Артур ча пешәнг у аликʹарчийе щьвате хьзмәт дькә. Бәле, һәрге әм бь рʹасти тʹобә кьн, Йаһоԝа ԝе ль мә бе рʹәʹме. Гәло әв фькьр бәрдьлийе надә мә?

ЙАҺОԜА ҺЕВИЙЕ ДЬДӘ МӘ

8. а) Йаһоԝа чь һеви да щьмәʹта хԝәйә аксоркьри? б) Ль гора Ишайа 40:29-31, һеви ча сәр Щьһуйед кӧ тʹобә кьрьбун һʹӧкӧм кьр?

⁸ Һʹале Щьһуйед аксоркьри бь рʹасти жи бечʹарә дьһатә кʹьфше, чьмки Бабилонийа дилед хԝә тʹӧ щар аза нәдькьрьн (Ишайа 14:17). Ле бәле, Йаһоԝа һеви да хьзмәткʹаред хԝә. Әԝи соз да ԝәки ԝе ԝан аза кә, у тʹӧ тьшти нькарьбу рʹийа ԝи бьгьрта (Ишайа 44:26; 55:12). Ль бәр чʹәʹве Йаһоԝа, Бабилон мина тʹозе бу (Ишайа 40:15). Әве һевийе бәрдьли дьда мәрьвед аксоркьри. Ишайа пʹехәмбәр ӧса жи ньвиси: «Кәсед ль бәнда Хӧдан ьн һеза [ԛәԝата] хԝә тʹәзә дькьн» (Бьхунә Ишайа 40:29-31, ИМ). Бәле, һевийе ԛәԝат дьда ԝан, ԝәки мина тәйра баскед хԝә вәкьн у бьфьрʹьн.

9. Чь мәʹни һәбун, кӧ Щьһуйед аксоркьри баԝәрийа хԝә созед Йаһоԝа биньн?

⁹ Мәʹнийед баш һәбун кӧ мәрьвед аксоркьри баԝәрийа хԝә созед Йаһоԝа биньн. Һәла бьфькьрьн дәрһәԛа ԝан пʹехәмбәртийа, кʹижан кӧ ида һатьбунә сери. Мәсәлә, ԝана заньбу кӧ ордийа Асуре пʹадшатийа Исраелейә бакӧре бьндәст кьрийә, у мьләт дилти бьрийә (Ишайа 8:4). Ԝана дитьбу, кӧ чаԝа Бабилонийа бажаре Оршәлиме ԝеран кьрьбун у щьмәʹта Оршәлиме бьрьбун дилтийе (Ишайа 39:5-7). Ԝана заньбу кӧ Бабилонийа пʹадше ԝан кор кьрьбу у бьрьбунә Бабилоне (Йерәмйа 39:7; Һәзәԛел 12:12, 13). Бәле, һʹәму тьштед кӧ Йаһоԝа пешда готьбу, һатьнә сери (Ишайа 42:9; 46:10). Ԝан тьшта бе шьк баԝәрийа ԝан дьһа ԛәԝи дькьр, кӧ созе Йаһоԝа дәрһәԛа азайа ԝан, ԝе бе сери!

10. Чь дькарә али мә бькә, кӧ әм ван рʹожед пашьнда гӧмана хԝә ӧнда нәкьн?

¹⁰ Әм жь ве йәке чь һин дьбьн? Гава тʹаԛәта мә наминә, һеви дькарә бәрдьлийе у ԛәԝате бьдә мә. Әм рʹожед хьрабда дьжин у дьжмьнед мә гәләк ԛәԝи нә. Диса жи нәлазьм ә, кӧ әм хԝә бечʹарә тʹәхмин кьн. Йаһоԝа соз дьдә кӧ әме ль щьнәте нава әʹдьлайи у бехофийеда һʹәта-һʹәтайе бьжин. Әм гәрәке ве гӧмане һәртʹьм биньн бира хԝә. Һәрге әм ве йәке нәкьн, һевийа мә дькарә ԛәԝата хԝә ӧнда кә, чаԝа кӧ мәрьвәк жь пʹәнщәрәкә ԛьреж дьньһерʹә у нькарә бәдәԝийа тʹәбийәте зәлал бьвинә. Гәло әм чаԝа дькарьн аԝа готи пʹәнщәра хԝә тʹәмьз кьн, ԝәки гӧмана мә ԛәԝат у зәлалийа хԝә ӧнда нәкә? Мәсәлә, әм дькарьн тʹьме әʹмьре дьнйа тʹәзәда бьдьн бәр чʹәʹве хԝә. Әм дькарьн готара бьхуньн, видеойа бьньһерʹьн у кʹьламед мә бьбьһен, йед кӧ гӧмана мә дьһа ԛәԝи дькьн. Ӧса жи дӧакьрьнеда әм дькарьн Йаһоԝарʹа бәʹса созед ԝи бькьн, кʹижан кӧ әм һʹьзрәт ьн бьвиньн.

11. Хушкәк ча ԛәԝат у бәрдьли дьстинә?

¹¹ Һәла бьньһерʹә кӧ һевийе чаԝа бәрдьли у ԛәԝат дайә хушкәкә бь наве Щой, йа кӧ гьран нәхԝәш ә. Әԝ дьбежә: «Гава әз хԝә бечʹарә тʹәхмин дькьм, әз дьле хԝә Йаһоԝарʹа вәдькьм, чьмки әз заньм кӧ әԝ мьн фәʹм дькә. Йаһоԝа жи ‹зорайийа ԛәԝате› дьдә мьн» (2 Корьнтʹи 4:7). Щой ӧса жи жийина дьнйа тʹәзәда дьдә бәр чʹәʹве хԝә у әв созе жь Кʹьтеба Пироз тинә бира хԝә: «Йе кӧ ль ԝьр рʹудьнә [дьжи], ԝе нәбежә: Әз нәхԝәш ьм» (Ишайа 33:24). Сәва кӧ әм бькарьбьн бәр тәнгасийа сәбьр кьн, әм жи гәрәке дьле хԝә Йаһоԝарʹа вәкьн у дина хԝә бьдьнә һевийа хԝә.

12. Чь мәʹни һәнә кӧ әм баԝәрийа хԝә созед Йаһоԝа биньн? (Бьньһерʹә ӧса жи шькьл.)

¹² Чаԝа кӧ Йаһоԝа гәләк мәʹни дабу Щьһуйед аксоркьри, ԝәки итʹбарийа хԝә созед ԝи биньн, әԝ бона мә жи иро ԝе йәке дькә. Бьфькьрә дәрһәԛа ԝан пʹехәмбәртийа, кʹижан кӧ бәр чʹәʹве мә тенә сери. Мәсәлә, әм дьвиньн империйа һʹәмдьнйайе, пʹарәкә кʹижане кӧ ԛәԝи йә, ле пʹара дьн сьст ә (Данийел 2:42, 43). Әм ӧса жи дьбьһен кӧ гәләк щийа әʹрдһʹәж дьԛәԝьмьн, у әм мьзгинийе «сәр тʹәмамийа дьнйайе» бәла дькьн (Мәтта 24:7, 14). Созед Йаһоԝа, йед кӧ һатьнә сери, баԝәрийа мә дьһа ԛәԝи дькьн һьндава ԝе йәкеда, кӧ созед ԝийә дьн жи ԝе бенә сери.

ЙАҺОԜА АЛИ МӘ ДЬКӘ КӦ ӘМ НӘТЬРСЬН

13. а) Чахе Щьһу һатьн азакьрьне, әԝана рʹасти чь тәнгасийа һатьн? б) Ль гора Ишайа 41:10-13, Йаһоԝа чаԝа бәрдьли да Щьһуйед аксоркьри?

¹³ Йаһоԝа бь һевикә хԝәш бәрдьли дьда мәрьвед аксоркьри. Диса жи әԝи заньбу кӧ гава әԝана бенә азакьрьне, ԝе рʹасти һьнә тәнгасийа бен. Йаһоԝа пешда готьбу, кӧ незики хьлазийа дилтийа щьмәʹта ԝи, пʹадшәк ԝе мьләтед дәр-дор бьндәст бькә у мьԛабьли Бабилоне шәрʹ бькә (Ишайа 41:2-5). Гәло лазьм бу, кӧ Щьһу бьтьрсьн? На. Йаһоԝа пешда бь ԝан гьлийа бәрдьли да хьзмәткʹаред хԝә: «Нәтьрсә, чьмки әз тʹәви тә мә. Бәрхԝә нәкʹәвә, чьмки әз ьм Хԝәдайе тә, ДТʹ» (Бьхунә Ишайа 41:10-13). Гәло Йаһоԝа чьма гот «Әз ьм Хԝәдайе тә»? Нета ве готьне әԝ нибу, ԝәки бинә бира ԝан, кӧ гәрәке әԝана ԝи бьһʹәбиньн. Ԝана заньбу, кӧ әв йәк чьԛас фәрз ә. Бәле, Йаһоԝа дьхԝәст бинә бира ԝан, кӧ әԝ диса жи һазьр ә али ԝан бькә (Зәбур 118:6).

14. Йаһоԝа Щьһуйед аксоркьрирʹа чь гот, ԝәки әԝ нәтьрсьн?

¹⁴ Ӧса жи Йаһоԝа ани бира Щьһуйед аксоркьри, кӧ ԛәԝат у занәбуна ԝи чьԛас мәзьн ә. Әԝи ԝанрʹа гот, кӧ әԝана ль стәйрка бьньһерʹьн. Әԝи ани бира ԝан, кӧ һәр тьшт алийе ԝива һатийә әʹфьрандьне, у ԝәки әԝ наве һәр йәки жь ԝан занә (Ишайа 40:25-28). Һәрге Йаһоԝа наве һәр стәйркәке занә, һәмьки әԝ наве һәр хьзмәткʹарәки хԝә жи занә. У һәрге ԛәԝата Йаһоԝа һәбу стәйрка бьәʹфьринә, һәмьки ԛәԝата ԝи һәйә ԝәки али хьзмәткʹаред хԝә жи бькә. Бәле, ԛә нә лазьм бу, кӧ Щьһуйед аксоркьри бьтьрсьн.

15. Хԝәде ча Щьһуйед аксоркьри һазьр кьр, бона ԛәԝьмандьнед кӧ һивийа ԝан бу?

¹⁵ Хенщи ԝе йәке, Йаһоԝа хьзмәткʹаред хԝә һазьр кьр, бона ԛәԝьмандьнед кӧ һивийа ԝан бун. Әԝи ԝанрʹа гот: «Бькʹәвә одәйед хԝә йед һьндӧрʹ у ль пьшт хԝә дәрийа бьгьрә. Дәмәкә кӧрт [кьн] хԝә вәшерә, һʹәта кӧ хәзәб дәрбаз бу» (Ишайа 26:20, ИМ). Гава Корәш Пʹадша бажаре Бабилоне бьндәст кьр, дьбәкә гьлийед ве рʹезе щара пешьн һатьнә сери. Тʹәрихзанәки Йунаньстана бәре дьбежә, кӧ гава Корәш Пʹадша кʹәтә Бабилоне, «әԝи фәрман да [әскәред хԝә] ԝәки һʹәмуйед жь мале дәр, бькӧжьн». Һәла бьдьнә бәр чʹәʹве хԝә кӧ бьнәлийед Бабилоне бьн тьрсәкә чада бун! Ле ча те кʹьфше, Щьһуйед аксоркьри хьлаз бун, чьмки ԝана гӧрʹа рʹебәрийа Йаһоԝа кьр.

16. Чьма нәлазьм ә әм жь тьштед кӧ ԝе зутьрәке бьԛәԝьмьн, бьтьрсьн? (Бьньһерʹә ӧса жи шькьл.)

¹⁶ Әм жь ве йәке чь һин дьбьн? Зутьрәке, тәнгасийа һәрʹә мәзьн ԝе дәстпебә. Һʹәчʹи зәʹф жь мәрьва ԝе зьравԛәти бьн. Ле һʹале хьзмәткʹаред Йаһоԝа ԝе щӧдә бә. Әм заньн кӧ Йаһоԝа Хԝәдайе мә йә. Әме «сәре хԝә бьльнд кьн», чьмки әме бьзаньбьн кӧ «хьлазбуна [мә] незик ә» (Луԛа 21:28). Һәла һе ԝи чахи жи, гава коалисйа мьләта һʹьщуми сәр мә бькә, әме хԝә бьсперьн Йаһоԝа. Йаһоԝа ԝе мә бь сайа мәләка бьпʹарезә у ӧса жи рʹебәрийе бьдә мә, ԝәки әм хьлаз бьн. Гәло әв рʹебәри ԝе ча бенә дайине? Әм һе ньзаньн. Ле ча те кʹьфше, әв рʹебәри ԝе бь сайа щьватед мә бенә дайине. Дьбәкә щьват мәрʹа бьбьн ча ‹одәйед һьндӧрʹ›, кʹижанада әме бехофийеда бьн. Гәло әм ча дькарьн хԝә бона ахьрийе һазьр кьн? Әм гәрәке тʹәви хушк-бьра незик бьн, жь дьл гӧрʹа рʹебәрийа тʹәшкиләта Йаһоԝа бькьн у баԝәр бьн ԝәки Йаһоԝа рʹебәрийе тʹәшкиләта мә дькә (Ибрани 10:24, 25; 13:17).

17. Әм ча дькарьн жь Йаһоԝа бәрдьлийе бьстиньн?

¹⁷ Һʹале Щьһуйед аксоркьри һеса нибу, ле Йаһоԝа бәрдьли дьда ԝан. Әԝ ԝе бәрдьлийе бьдә мә жи. Ләма, әм рʹасти чь чәтьнайа жи бен, бир нәкьн кӧ канийа бәрдьлийе Йаһоԝа йә. Итʹбарийа хԝә рʹәʹма ԝийә мәзьн биньн. Гӧмана хԝә ӧнда нәкьн у бир нәкьн кӧ Йаһоԝа Хԝәдайе мә йә, ләма жи нәлазьм ә кӧ әм бьтьрсьн.