Гази Рʹуспийа кьн

1. Йаһоԝа ча дайә кʹьфше, ԝәки хьзмәткʹаред хԝә ԛимәт дькә?

ЙАҺОԜА хьзмәткʹаред хԝә ԛимәт дькә. Әԝи бь сайа хуна Иса әԝ кʹьрʹинә у рʹуспи кʹьфш кьрьнә, ԝәки мьԛати ԝан бьн (Кʹаред Шандийа 20:28). Хԝәде дьхԝазә кӧ рʹуспи һьндава хьзмәткʹаред ԝи рʹәʹм у дьлован бьн. Бьн рʹебәрийа Исада, рʹуспи хьзмәткʹаред Хԝәде дьбьнә хԝәйи у жь тьштед кӧ дькарьн зьраре бьдьнә достийа ԝанә тʹәви Хԝәде, дьпʹарезьн (Ишайа 32:1, 2).

2. Йаһоԝа илаһи дькʹәвә һʹәйра кʹе? (Һәзәԛел 34:15, 16)

² Йаһоԝа һәмьки һʹәму хьзмәткʹаред хԝә һʹәз дькә, ле әԝ илаһи дькʹәвә һʹәйра ԝан кәса, йед кӧ тәнгасийада ньн. Бь сайа рʹуспийа, әԝ али ԝан кәса дькә, йед кӧ рʹуйе шашийед хԝәда дьчәрчьрьн (Бьхунә Һәзәԛел 34:15, 16). Ле гава әм һʹәԝщә нә, әԝ дьхԝазә ԝәки әм рʹастә-рʹаст аликʹарийе бьхԝазьн. Хенщи ве йәке кӧ әм бь сайа дӧа жь Хԝәде аликʹарийе бьхԝазьн, әм гәрәке жь ‹шьван у дәрсдаред› щьвате жи аликʹарийе бьхԝазьн (Әфәси 4:11, 12).

3. Ве готареда әме чь шеԝьр кьн?

³ Ве готареда әме бьвиньн, кӧ ча Хԝәде бь сайа рʹуспийа аликʹарийе дьдә ԝан хьзмәткʹаред хԝә, достийа кʹижана тʹәви ԝи сьст буйә. Әме ӧса жи щабед ван пьрса бьстиньн: Кʹәнге әм гәрәке жь рʹуспийа аликʹарийе бьхԝазьн? Чьма лазьм ә кӧ әм ве йәке бькьн? Әԝана ча али мә дькьн? Достийа мә тʹәви Йаһоԝа чьԛас ԛәԝи бә жи, әм гәрәке бьзаньбьн кӧ әԝ ча бь сайа рʹуспийа али мә дькә. Ӧса жи занәбуна ве йәке ԝе рʹазибуна мә бона хәмкьрьна Йаһоԝа зедә кә, у һәрге рʹожәке әм жи һʹәԝще аликʹарийа ԝан бьн, әме бьзаньбьн кӧ чь бькьн, ԝәки әве аликʹарийе бьстиньн.

КʹӘНГЕ ЛАЗЬМ Ә ГАЗИ РʹУСПИЙА КЬН?

4. Әм жь кʹӧ заньн ԝәки Аԛуб 5:14-16, 19, 20 бәʹса нәхԝәшийа рʹӧһʹани дькә? (Бьньһерʹә ӧса жи шькьл.)

⁴ Аԛуб бь ван гьлийа нишан кьр, кӧ әм ча дькарьн аликʹарийа рʹӧһʹани бьстиньн: «Һәгәр йәк жь ԝә нәхԝәш ә, бьра гази бәрпьрсийаред щьвине кә» (Бьхунә Аԛуб 5:14-16, 19, 20). Ви сәрида жь рʹезед дьн те кʹьфше, ԝәки Аԛуб бәʹса нәхԝәшийа физики нәдькьр. Мәсәлә, әԝи нәгот кӧ бьра кәсед нәхԝәш гази һʹәкима бькьн, ле әԝи гот кӧ бьра әԝ гази рʹуспийед щьвате бькьн. Ӧса жи әʹйан ә, кӧ әв рʹез бәʹса нәхԝәшийа рʹӧһʹани дькә, чьмки мәрьв бь сайа бахшандьна гӧна жь ве нәхԝәшийе ԛәнщ дьбә. Һьнә тьштада ԛәнщкьрьна нәхԝәшийа рʹӧһʹани мина ԛәнщкьрьна нәхԝәшийа физики йә. Гава кәсәк алийе физикида нәхԝәш дькʹәвә, әԝ гәрәке һәрʹә бал һʹәким, жерʹа бәʹса еш у дәрдед хԝә бькә у гӧрʹа рʹебәрийа ԝи бькә, ԝәки ԛәнщ бә. Мина ве йәке, гава достийа мә тʹәви Йаһоԝа сьст дьбә, әм гәрәке һәрʹьн бал рʹуспийа, бәʹса һʹале хԝә бькьн у гӧһ бьдьнә ширәтед кӧ сәр һʹиме Кʹьтеба Пироз мәрʹа тенә дайине.

5. Әм ча дькарьн тедәрхьн кӧ достийа мә тʹәви Йаһоԝа сьст буйә?

⁵ Гава әм дьвиньн ԝәки достийа мә тʹәви Йаһоԝа һеди-һеди сьст дьбә, әм гәрәке ль гора нәʹма Аԛуб сәре 5, һәрʹьн бал рʹуспийа. Гәләк фәрз ә ԝәки әм аликʹарийе бьстиньн, һʹәта кӧ мә ԛәбулкьрьна Хԝәде ӧнда нәкьрийә! Әм гәрәке һьндава хԝәда һʹәлал бьн у биньн сәр хԝә, кӧ проблемед мәйә рʹӧһʹани һәнә. Кʹьтеба Пироз дьдә кʹьфше, кӧ һәрге әм мьԛати хԝә нибьн, әм дькарьн тедәрнәхьн жи кӧ ча ԛәбулкьрьна Хԝәде ӧнда дькьн (Аԛуб 1:22). Һьнә Мәсиһийед ԛьрʹна йәке жь шәһәре Сәрдәйсе кʹәтьнә ве тʹәльке, у Иса ԝанрʹа гот кӧ һʹале ԝан хьраб ә (Әʹйанти 3:1, 2). Сәва кӧ әм тедәрхьн һәла һәләԛәтийа мә тʹәви Хԝәде баш ә йан на, ԝәрә әм бьфькьрьн һәла әм мина бәре бь дьл у щан Йаһоԝарʹа хьзмәт дькьн йан на (Әʹйанти 2:4, 5). Мәсәлә, әм дькарьн жь хԝә бьпьрсьн: «Гәло хԝәстьна мьн кӧ Кʹьтеба Пироз бьхуньм у кʹур сәр бьфькьрьм мина бәре ԛәԝи йә? Гәло әз дьчьмә һʹәму щьвина? Гәло әз мина бәре бона щьвина рʹьнд һазьр дьбьм? Гәло әз диса жи бь хирәт хьзмәт дькьм, йан әз ида дьһа зедә дина хԝә дьдьмә һәбук у ԝәʹдәдәрбазкьрьна?» Бь сайа ван пьрса әм дькарьн фәʹм кьн, кӧ рʹӧһʹанийа мә чь һʹалида йә. Һәрге ԝан алийада проблемәкә мә һәбә, гәрәке әм һьнә гава бавежьн сәва кӧ һʹале мә дьһа хьраб нәбә. У һәрге әм нькарьн проблема хԝә хԝәха сафи кьн, йан һәрге мә ида тьштәки нәбаш кьрийә, гәрәке әм жь рʹуспийа аликʹарийе бьхԝазьн.

6. Кәсед кӧ гӧне гьран кьрьнә, гәрәке чь бькьн?

⁶ Һәмьки лазьм ә, ԝәки кәсе кӧ гӧне гьран кьрийә һәрʹә бал рʹуспийа, чьмки жь бо гӧне хԝә әԝ дькарә ида пʹара щьвате нибә (1 Корьнтʹи 5:11-13). Кәсед кӧ гӧне гьран кьрьнә, ида нькарьн бе аликʹари диса һәләԛәтийа хԝә тʹәви Йаһоԝа баш кьн. Сәва кӧ Йаһоԝа сәр һʹиме кʹьрʹине бьбахшинә кәсед ӧса, әԝана гәрәке «пе кьред хԝә нишан кьн кӧ ԝана тʹобә кьрийә» (Кʹаред Шандийа 26:20). Йәк жь тьштед кӧ әԝана гәрәке бькьн әв ә, кӧ рʹуспийарʹа бәʹса гӧне хԝә бькьн.

7. Аликʹарийа рʹуспийа диса кʹерʹа лазьм ә?

⁷ Хенщи кәсед кӧ гӧне гьран кьрьнә, рʹуспи һазьр ьн аликʹарийе бьдьнә кәсед кӧ тʹәви хԝәстьнед нәрʹаст шәрʹ дькьн (Кʹаред Шандийа 20:35). Һьнә хушк-бьра пешийа кӧ һатьнә сәр рʹийа рʹастийе, наркотик дьданә хәбате, порнографийа дьньһерʹин, йан жи бенамуси дькьрьн. Дьбәкә бона ԝан чәтьн ә хԝәстьнед хԝә бь тʹәмами жь дьле хԝә дәрхьн. Һәрге бал тә проблемәкә ӧса һәйә, бьзаньбә кӧ ве шәрʹе рʹӧһʹанида тӧ тʹәне нини, ләма жи нәтьрсә жь рʹуспики аликʹарийе бьхԝази. Әԝе гӧһ бьдә хәмед тә, һьнә ширәта бьдә тә у бинә бира тә, кӧ һәрге тӧ шәрʹе хԝә бәрдәԝам ки, Йаһоԝа ԝе жь тә рʹази бә (Ԝаиз 4:12). Һәрге тә ԛәԝата хԝә ӧнда кьрийә, чьмки хԝәстьнед тәйә нәрʹаст дәрбаз набьн, рʹуспи дькарьн али тә бькьн. Әԝана ԝе биньн бира тә кӧ Йаһоԝа ша дьбә кӧ тӧ аликʹарийе дьхԝази, чьмки әв йәк нишан дькә ԝәки тӧ достийа хԝә тʹәви ԝи ԛимәт дьки у бь зедәйи хԝәда баԝәр нини (1 Корьнтʹи 10:12).

8. Жь бо кʹижан гӧна нәлазьм ә кӧ әм һәрʹьн бал рʹуспийа?

⁸ Нәлазьм ә кӧ әм рʹуспийарʹа дәрһәԛа һәр шашийа хԝәйә бьчʹук бежьн. Мәсәлә, дьбәкә тә дьле хушк йан бьраки пе гьлийа ешандийә, йан жи һәла һе һерса хԝә сәр ԝида рʹетийә. Дәԝса кӧ һәрʹи бал рʹуспийа, тӧ дькари ль гора ширәта Иса һәрәкʹәт бьки у тʹәви ԝи кәси ль һәв бейи (Мәтта 5:23, 24). Ӧса жи тӧ дькари дәрһәԛа нәрми, сәбьре у хԝәгьртьне лекʹолине бьки у ван һʹӧнӧред баш һе зедә нав хԝәда пешда бини. Ле һәрге диса жи найе стандьне кӧ проблема хԝә сафи ки, тӧ дькари жь рʹуспики аликʹарийе бьхԝази. Мәсәлә, нәʹмәкә хԝәда, Паԝлос бьракирʹа гот, кӧ али Әйодийа у Синтихайе бькә, ԝәки проблема ортʹа хԝәда сафи кьн. Мина ве йәке, рʹуспики жь щьвата тә дькарә али тә жи бькә (Филипи 4:2, 3).

ӘМ ЧЬРʹА ГӘРӘКЕ ГАЗИ РʹУСПИЙА БЬКЬН?

9. Чьма гәрәке шәрм нәкьн кӧ жь рʹуспийа аликʹарийе бьхԝазьн? (Мәтʹәлок 28:13)

⁹ Һәрге мә гӧнәки гьран кьрийә, йан гава мәрʹа чәтьн ә һьмбәри хԝәстьнед нәрʹаст шәрʹ кьн, мәрʹа баԝәри у мерхаси лазьм ә сәва кӧ әм аликʹарийе бьхԝазьн. Әм гәрәке шәрм нәкьн гази рʹуспийед щьвате бькьн. Гәло чьма? Чьмки Йаһоԝа бона ве нете рʹуспи кʹьфш кьрьнә. Гава әм жь ԝан аликʹарийе дьхԝазьн, әм дьдьнә кʹьфше, кӧ әм баԝәрийа хԝә Йаһоԝа тиньн у һазьр ьн гӧһ бьдьнә ԝи. Әм гәрәке бир нәкьн, ԝәки сәва кӧ тьштәки нәрʹаст нәкьн, әм һʹәԝще аликʹарийа ԝи нә (Зәбур 94:18). Һәрге мә гӧнә кьрийә, ле әм тʹобә дькьн, Хԝәде һазьр ә рʹәʹма хԝә һьндава мәда бьдә кʹьфше (Бьхунә Мәтʹәлок 28:13).

10. Һәрге әм гӧнед хԝә вәшерьн, чь дькарә бьԛәԝьмә?

¹⁰ Һәрге әм гӧнед хԝә вәшерьн у жь рʹуспийа аликʹарийе нәхԝазьн, һʹале мә ԝе һе хьраб бә. Гава Даԝьд Пʹадша дьхԝәст гӧнед хԝә вәшерә, әве йәке сәр ԝи ӧса хьраб һʹӧкӧм кьр, кӧ әԝ алийе рʹӧһʹани, емосийали у физикида нәхԝәш кʹәт (Зәбур 32:3-5). Һәрге нәхԝәшикә физики нәйе ԛәнщкьрьне, әԝ чьԛас һәрʹә ԝе һе хьраб бә. Мина ве йәке, һәрге мә гӧнә кьрийә у әм аликʹарийе нәхԝазьн, һʹале мә дькарә һе хьраб бә. Ләма жи Йаһоԝа дьхԝазә ԝәки әм дьле хԝә рʹуспийарʹа вәкьн у ча бежи тʹәви Ԝи ль һәв бен (Ишайа 1:5, 6, 18).

11. Һәрге әм гӧнед гьран вәшерьн, әв йәк ча дькарә сәр кәсед дьн һʹӧкӧм кә?

¹¹ Һәрге әм гӧнед хԝәйә гьран вәшерьн, әв йәк дькарә сәр кәсед дьн жи хьраб һʹӧкӧм кә. Мәсәлә, гӧне мә дькарә бьбә сәбәб кӧ Хԝәде рʹӧһʹе пироз нәдә щьвате у әʹдьлайа щьвате дькарә хьраб бә (Әфәси 4:30). Мина ве йәке, һәрге әм пебьһʹәсьн кӧ хушк йан бьраки гӧне гьран кьрийә, әм гәрәке жерʹа бежьн ԝәки әԝ дәрһәԛа ве йәке рʹуспийарʹа бежә.a Һәрге әм гӧне кәсәки вәшерьн, гӧне ԝи ԝе бькʹәвә стийе мә жи (Ԛануна Кʹаһинтийе 5:1). Һʹәзкьрьна мә һьндава Йаһоԝа гәрәке мә һелан кә рʹуспийарʹа бежьн, кӧ чь ԛәԝьми йә. Бь ви щурʹәйи әм дькарьн тʹәмьзайа щьвате бьпʹарезьн у али кәсе гӧнәкʹар бькьн, ԝәки әԝ диса бьбә досте Йаһоԝа.

РʹУСПИ ЧА АЛИ МӘ ДЬКЬН?

12. Рʹуспи ча аликʹарийе дьдьнә ԝан хушк-бьра, достийа кʹижана тʹәви Йаһоԝа сьст буйә?

¹² Кʹьтеба Пироз дьбежә кӧ рʹуспи гәрәке али кәсед сьст бькьн (1 Тʹесалоники 5:14). Һәрге мә гӧнә кьрийә, дьбәкә рʹуспи һьнә пьрса бьдьнә мә, ԝәки һәст у фькьред мә фәʹм кьн (Мәтʹәлок 20:5). Дьбәкә жь бо култура мә, хәйсәте мә, йан жи дьбәкә әм шәрмокә нә, мәрʹа чәтьн бә дьле хԝә ԝанрʹа вәкьн. Әм гәрәке нәтьрсьн кӧ әԝана ԝе чь бьфькьрьн, гава әм дьле хԝә ԝанрʹа вәкьн (Ибо 6:3). Рʹуспи ԝе дәрберʹа сафикьрьне нәкьн, ле дәԝсе ԝе рʹьнд гӧһ бьдьнә мә, ԝәки дәрәща мә рʹьнд фәʹм кьн у бькарьбьн ширәте бьдьнә мә (Мәтʹәлок 18:13). Әԝана заньн ԝәки сәва кӧ аликʹарийе бьдьнә хьзмәткʹаред Хԝәде, ԝәхт лазьм ә, ләма жи әԝана фәʹм дькьн кӧ бәс нинә тʹәне щарәке тʹәви мә хәбәр дьн.

13. Бь сайа дӧа у рʹебәрийа сәр һʹиме Кʹьтеба Пироз, рʹуспи ча дькарьн али мә бькьн? (Бьньһерʹә ӧса жи шькьл.)

¹³ Чахе әм гази рʹуспийа кьн, әԝана ԝе бона мә дӧа кьн у һәр тьшти бькьн, ԝәки баре мә сьвьк кьн. Тӧйе әʹщебмайи бьмини кӧ ԛәԝата дӧайед ԝан чьԛас мәзьн ә. Ӧса жи әԝана бь наве Йаһоԝа ԝе ча бежи мә «рʹун кьн» (Аԛуб 5:14-16). Әв «рʹун» рʹастийа Кʹьтеба Пироз те һʹәсабе. Бь сайа Кʹьтеба Пироз рʹуспи дькарьн һелане у бәрдьлийе бьдьнә мә у али мә бькьн, кӧ әм диса бьбьнә достед Йаһоԝа (Ишайа 57:18). Ширәтед кӧ әԝана сәр һʹиме Кʹьтеба Пироз дьдьнә мә, дькарьн мә һелан кьн, кӧ әм гӧһ бьдьнә Йаһоԝа. Бь аликʹарийа ԝан әм дькарьн дәнге Йаһоԝа бьбьһен, кӧ ӧса дьбежә мә: «Рʹе әв ә, ве рʹерʹа һәрʹьн!» (Ишайа 30:21, ИМ).

14. Ль гора Галати 6:1, рʹуспи ча аликʹарийе дьдьнә кәсед кӧ «гавәкә шаш» авитьнә? (Бьньһерʹә ӧса жи шькьл.)

¹⁴ Бьхунә Галати 6:1. Чахе кәсәк «гавәкә шаш» давежә, әв те һʹәсабе кӧ әԝ ль гора ԛьрара Хԝәде нажи. Мәсәлә, дьбәкә әԝи сафикьрьнәкә беаԛьлайи йан жи гӧнәки гьран кьрийә. Рʹуспи ԝе бь һʹәзкьрьне «хирәт кьн ԝәки ԝи бь нәрми вәгәрʹиньн сәр рʹийа рʹаст». Хәбәра Йунани, йа кӧ ве рʹезеда ча «вәгәрʹиньн» һатийә ԝәлгәрʹандьне, дькарьн ӧса жи бьдьнә хәбате бона һәстийе кӧ жь щи дәркʹәтийә. Чаԝа кӧ һʹәкимәки һостә хирәт дькә ԝәки һәсту ӧса бькә щи, кӧ кәсе бьриндар бь зедәйи еше нәкʹьшинә, рʹуспи жи хирәт дькьн ԝәки бь нәрми ширәте бьдьнә мә. Ӧса жи Кʹьтеба Пироз дьбежә, кӧ рʹуспи гәрәке «һаж хԝә һәбьн». Гава әԝана али мә дькьн ԝәки әм хԝә рʹаст кьн, әԝана бир накьн кӧ хԝәха жи ԛьсурдар ьн у дькарьн гавед шаш бавежьн. Ләма жи әԝана мьлук у дьлован ьн у нафькьрьн, ԝәки әԝана жь ԝан хушк-бьра четьр ьн, али кʹижана дькьн (1 Пәтрус 3:8).

15. Һәрге проблемәкә мә һәбә, әм дькарьн чь бькьн?

¹⁵ Әм дькарьн итʹбарийа хԝә рʹуспийа биньн. Әԝана һатьнә һинкьрьне, кӧ тьштед шәхси бәла нәкьн, сәр һʹиме Кʹьтеба Пироз ширәта бьдьн, нә кӧ ль гора ньһерʹандьна хԝә, у али мә бькьн ԝәки әм баре хԝә һьлгьрьн (Мәтʹәлок 11:13; Галати 6:2). Рʹаст ә хәйсәт-һʹӧнӧред рʹуспийа щӧдә нә у дьԛәԝьмә йәк жь йе дьн зедәтьр щерʹьбанди йә, ле диса жи һәр кәс жь ԝан һазьр ә гӧһ бьдә мә. Һәмьки әм гәрәке нәчьн бал һәр рʹуспики, һʹәта кӧ йәк жь ԝан ль гора дьле мә хәбәр дә. Һәрге мә ӧса бькьра, әме бьбуна мина кәсед кӧ гӧһ надьнә «һинкьрьна сахләм», ле тʹәне дьхԝазьн «тьштед ль гӧһе ԝан хԝәш те» бьбьһен (2 Тимотʹейо 4:3). Һәрге әм рʹуспикирʹа бәʹса проблема хԝә бькьн, дьбәкә әԝ бьпьрсә һәла мә рʹуспийед дьнрʹа жи готийә у ԝана чь ширәт дайә. Мьлукти дькарә ԝи рʹуспи һелан кә, ԝәки ширәте жь рʹуспики дьн жи бьхԝазә (Мәтʹәлок 13:10).

ЩАБДАРИЙА МӘЙӘ ШӘХСИ

16. Щабдарийа мәйә шәхси чь йә?

¹⁶ Рʹаст ә әм хьзмәткʹаред Хԝәде нә у рʹуспи мә дьбьнә хԝәйи, ле диса жи әԝана мәрʹа набежьн кӧ әм гәрәке чь бькьн у чь нәкьн. Щабдарийа мәйә шәхси йә, кӧ ль гора ԛанунед Хԝәде бьжин. Бона гьли у кьред хԝә әм бәр Хԝәде хԝәха щабдар ьн у бь аликʹарийа ԝи, әм дькарьн ԝирʹа амьн бьминьн (Рʹомайи 14:12). Ләма жи дәԝса кӧ рʹастә-рʹаст мәрʹа бежьн ԝәки әм гәрәке чь бькьн, рʹуспи дина мә дькʹьшиньнә сәр ньһерʹандьна Хԝәде, кӧ Кʹьтеба Пирозда ньвисар ә. Бь сайа ширәтед ԝанә сәр һʹиме Кʹьтеба Пироз, әм дькарьн һин бьн кӧ сафикьрьнед баш бькьн (Ибрани 5:14).

17. Йаһоԝа дьхԝазә кӧ әм чь бькьн?

¹⁷ Әм гәләк рʹази нә кӧ әм хьзмәткʹаред Йаһоԝа нә! Әԝи «шьване ԛәнщ», Иса Мәсиһ, шандийә кӧ әԝ әʹмьре хԝә бәрва бьдә у әм бькарьбьн һʹәта-һʹәтайе бьжин (Йуһʹәнна 10:11). Бь сайа рʹуспийед щьвате, Йаһоԝа әв созе хԝә анийә сери: «Әзе шьванед ль гора дьле хԝә бьдьм ԝә кӧ бь занин у фәʹмдарийе шьвантийа ԝә бькьн» (Йерәмйа 3:15, ИМ). Гава һәләԛәтийа мә тʹәви Йаһоԝа сьст дьбә, әм гәрәке шәрм нәкьн аликʹарийе жь рʹуспийа бьхԝазьн. Ӧса әме кʹарәкә мәзьн бьстиньн, чьмки Йаһоԝа хут бона ве йәке щьватада рʹуспи кʹьфш кьрьнә.