Гава Рʹасти Нәһәԛийе Тен, Әм Гәрәке Чь Бькьн?

1-2. Гәләк мәрьв гава рʹасти нәһәԛийе тен, ча хԝә дьдьнә кʹьфше у кʹижан пьрс дьԛәԝьмә щәм мә пешда тен?

ДЬНЙА бь нәһәԛийе тʹьжә йә. Гәләк мәрьв жь бо мьләт, бәрәк, рʹәнг-рʹуйе хԝә йан жь бо кʹәсибийе рʹасти нәһәԛийе тен. Гәләк мәрьв жи дьчәрчьрьн жь бо ве йәке, кӧ сәрԝеред дәԝләте у бизнесмен тʹәне пәй пʹәра кʹәтьне у зийане дьдьнә тʹәбийәте бь ве йәке, кӧ ресурсед ве хәрщ дькьн. Дьбәкә әм жи йан мәрьвед мәйи һʹәзкьри рʹасти тьштед ӧса һатьнә.

² Әм гьшк һʹьзрәта һәԛийе нә. Ләма жи һьнә мәрьвед кӧ һерс дькʹәвьн һәр тьшти дькьн, сәва кӧ нәһәԛийе бьдьнә һьлдане. Әԝана дькʹәвьнә нава шьхӧлед политике, пе протеста дәрдькʹәвьн у бь щурʹед дьн һьмбәри нәһәԛийе шәрʹ дькьн. Ле чаԝа шагьртед Иса, әм гәрәке хԝә жь тьштед ӧса дур бьгьрьн, чьмки әм «пʹара ве дьнйайе ниньн» у һивийа Пʹадшатийа Хԝәде нә, йа кӧ ԝе нәһәԛийе бь тʹәмами бьдә һьлдане (Йуһʹәнна 17:16). Диса жи, гава әм дьвиньн кӧ кәсәк рʹасти нәһәԛийе те, әм жи әʹщьз дьбьн. Ве дәрәщеда әм гәрәке чь бькьн? Гәло әм дькарьн ида ньһа тьштәки бькьн, ԝәки нәһәԛийе бьдьнә һьлдане? Сәва кӧ әм щабед ван пьрса бьстиньн, ԝәрә әм дина хԝә бьдьнә ве йәке, кӧ Йаһоԝа у Иса ча сәр нәһәԛийе дьньһерʹьн.

ЙАҺОԜА У ИСА НӘҺӘԚИЙЕ НӘФРʹӘТ ДЬКЬН

3. Чьма нормал ә кӧ әм жь бо нәһәԛийе әʹщьз дьбьн? (Ишайа 5:7)

³ Чьма әм жь бо нәһәԛийе һаԛас әʹщьз дьбьн? Кʹьтеба Пироз нишан дькә кӧ Йаһоԝа Хԝәде, йе кӧ «рʹастийе у һәԛийе һʹьз дькә», әм дьлԛе хԝәда әʹфьрандьнә (Зәбур 33:5; Дәстпебун 1:26). Йаһоԝа тʹӧ щара нәһәԛийе у нәрʹастийе накә, у әԝ нахԝазә кӧ кәсед дьн нәһәԛийе бькьн (Ԛануна Дӧщари 32:3, 4; Миха 6:8; Зәкәрйа 7:9). Мәсәлә, рʹожед Ишайа пʹехәмбәрда, Йаһоԝа дьбьһист һәԝар-газийа кәсед кӧ жь алийе Исраелийед дьн рʹасти нәһәԛийе дьһатьн (Бьхунә Ишайа 5:7). Йаһоԝа ԝан мәрьва щәза дькьр, йед кӧ Ԛануна ԝи пʹепәс дькьрьн у нәһәԛи ль кәсед дьн дькьрьн (Ишайа 5:5, 13).

4. Сәрһатикә жь Кʹьтеба Пироз, ньһерʹандьна Иса һьндава нәһәԛийе ча дьдә кʹьфше? (Бьньһерʹә ӧса жи шькьл.)

⁴ Иса жи мина Йаһоԝа, һәԛийе һʹәз дькә у нәһәԛийе нәфрʹәт дькә. Щарәке әԝи мерәк дит, дәсте кʹижани кӧ кʹьшийайи бу у ле ԛәнщ кьр. Ле сәрԝеред религи һерс кʹәтьн у готьн, ԝәки Иса ԛануна дәрһәԛа рʹожа Шәмийе пʹепәс дькә. Ԛә хәма ԝан нибу, кӧ әԝ мер жь еша хԝә хьлаз бьбу. Гәло Иса сәр ԝан мәрьвед дьлсар ча дьньһерʹи? Кʹьтеба Пироз дьбежә кӧ әԝ «жь бо дьлкәвьрийа ԝан гәләк хәмгин бу» (Маркос 3:1-6).

5. Гава әм жь бо нәһәԛийе һерс дькʹәвьн, әм гәрәке чь бир нәкьн?

⁵ Йаһоԝа у Иса жь бо нәһәԛийе һерс дькʹәвьн, ләма жи нормал ә кӧ әм жи һерс дькʹәвьн (Әфәси 4:26). Диса жи әм гәрәке бир нәкьн, ԝәки һерса мә нәһәԛийе ԝе нәдә һьлдане. Хенщи ве йәке, һәрге әм һерса хԝә алт нәкьн, дьԛәԝьмә әм нәхԝәш кʹәвьн йан бькʹәвьнә депресийайе (Зәбур 37:1, 8; Аԛуб 1:20). Ләма жи гава әм рʹасти нәһәԛийе тен, әм гәрәке чь бькьн? Ԝәрә әм дина хԝә бьдьне, кӧ Иса чь дькьр.

ИСА ҺЬМБӘРИ НӘҺӘԚИЙЕ ЧЬ ДЬКЬР?

6. Гава Иса сәр әʹрде бу, мәрьв рʹасти чь щурʹә нәһәԛийе дьһатьн? (Бьньһерʹә ӧса жи шькьл.)

⁶ Гава Иса сәр әʹрде бу, әԝи дьдит кӧ гәләк мәрьв рʹасти нәһәԛийе тен. Мәсәлә, әԝи дьдит кӧ сәрԝеред религи ча нәһәԛийе ль щьмәʹте дькьн у баре ԝан гьран дькьн (Мәтта 23:2-4). Ӧса жи әԝи дьдит кӧ дәԝләта Рʹоме һьндава щьмәʹта Исраел гәләк сәрт бу. Ләма жи, гәләк Щьһуйа дьхԝәст жь бьндәстийа Рʹоме хьлаз бьн у хԝәсәрихԝә бьн. Һьнә кәса һәла һе мьԛабьли Рʹомайа шәрʹ дькьрьн жи. Ле Иса пьштгьрийа ԝан кʹома нәдькьр, йед кӧ мьԛабьли дәԝләте дәрдькʹәтьн. Гава Иса пеһʹәсийа, ԝәки щьмәʹт дьхԝазә ԝи бькә пʹадша, әԝ жь ԝедәре чу (Йуһʹәнна 6:15).

7-8. Гава Иса сәр әʹрде бу, әԝи чь нәдькьр? (Йуһʹәнна 18:36)

⁷ Иса тʹәви политике нәдьбу сәва кӧ нәһәԛийе бьдә һьлдане, чьмки заньбу ԝәки мәрьварʹа изьн нәһатийә дайине, кӧ сәрԝертийа инсанәте бькьн, у нә жи ԛәԝата ԝан һәйә ве йәке бькьн (Зәбур 146:3; Йерәмйа 10:23). Әԝана нькарьн нәһәԛийе бьдьнә һьлдане, чьмки дьнйа бьн дәсте Мире-щьнада йә, рʹуйе кʹижанида һаԛас нәһәԛи те кьрьне (Йуһʹәнна 8:44; Әфәси 2:2). Ӧса жи һәрге нета һьнә мәрьва баш бә жи, йәкә әԝана нькарьн тʹьме һәԛийе бькьн, чьмки хԝәха жи ԛьсурдар ьн (Ԝаиз 7:20).

⁸ Иса рʹьнд заньбу кӧ тʹәне Пʹадшатийа Хԝәде дькарә һʹәму сәбәбед нәһәԛийе бь тʹәмами бьдә һьлдане. Ләма жи әԝи бь хирәт «мьзгинийа Пʹадшатийа Хԝәде бәла дькьр» (Луԛа 8:1). Әԝи дьле «кәсед кӧ тʹи у бьрʹчийе рʹастийе» бун, рʹьһʹәт дькьр у ԝанрʹа дьгот, кӧ нәһәԛи ԝе бь тʹәмами бе һьлдане (Мәтта 5:6 әʹламәти бона һинбуне; Луԛа 18:7, 8). Ле әв йәк нә кӧ пе ԛәԝата мәрьва ԝе бе кьрьне, ле бь сайа Пʹадшатийа Хԝәде, йа кӧ «нә жь ве дьнйайе йә» (Бьхунә Йуһʹәнна 18:36).

ЧʹӘʹВ БЬДЬНӘ ИСА

9. Тӧ чьма баԝәр и, кӧ тʹәне Пʹадшатийа Хԝәде дькарә нәһәԛийе бьдә һьлдане?

⁹ Рʹаст ә ԝәʹде Исада нәһәԛи гәләк бу, ле рʹожед мәда дьһа зедә буйә. Мина бәре, нәһәԛийа кӧ ван рʹожед хьлазийеда һәйә, диса жи жь Мире-щьна йә у жь кәсед кӧ бьн һʹӧкӧме ԝида ньн (2 Тимотʹейо 3:1-5, 13; Әʹйанти 12:12). Мина Иса, әм жи заньн кӧ тʹәне Пʹадшатийа Хԝәде дькарә сәбәбе нәһәԛийе, демәк Мире-щьна кʹӧта кә. Әм жь дьл пьштгьрийа Пʹадшатийа Хԝәде дькьн, ләма жи тʹәви протестед ве дьнйайе набьн, йед кӧ һьмбәри нәһәԛийе шәрʹ дькьн. Ԝәрә әм дина хԝә бьдьнә сәрһатийа хушка мә бь наве Стейси.a Пешийа кӧ әԝе дәстпекьр Кʹьтеба Пироз һин бә, әԝ тʹьме һьмбәри нәһәԛийе дьчу протеста. Ле паше әԝ дӧдьли бу, кӧ әв протест бь рʹасти дькарьн һәԛийе пешда биньн. Әԝ дьбежә: «Гава әз дьчумә протеста, мьн жь хԝә дьпьрси кӧ кʹара ве йәке һәйә, йан на. Ле ньһа әз пьштгьрийа Пʹадшатийа Хԝәде дькьм у заньм кӧ рʹийа рʹаст әв ә. Йаһоԝа ԝе нәһәԛийе бь тʹәмами бьдә һьлдане, чь кӧ мьне тʹӧ щар нькарьбуйа бькьра» (Зәбур 72:1, 4).

10. Ль гора Мәтта 5:43-48, әм чьма тʹәви кʹомед политики набьн, йед кӧ дьхԝазьн һәԛийе пешда биньн? (Бьньһерʹә ӧса жи шькьл.)

¹⁰ Иро гәләк мәрьв пьштгьрийа ван кʹома дькьн, йед кӧ дьхԝазьн бь дәсте зоре сәрԝера жь тʹәхте ԝан бавежьн. Әԝана ӧса һерс дькʹәвьн, кӧ ԛануна дьтʹәрʹьбиньн у зийане дьдьнә кәсед дьн. Әв кьред ԝан мьԛабьли ве йәке нә, чь кӧ Иса мәрьв һин дькьрьн (Әфәси 4:31). Бьраки бь наве Щефри ӧса дьбежә: «Ԝәʹде протестед кӧ бь әʹдьлайи дәстпедьбьн, мәрьв щарна ньшкева ӧса һерс дькʹәвьн кӧ дәстпедькьн тьшта бьшкеньн, дьзийе бькьн у зийане бьдьнә һәвдӧ». Иса готьбу кӧ әм гәрәке һьндава һәр кәсида дьлован бьн, һәла һе һьндава ԝан мәрьвада жи, йед кӧ мә һʹәз накьн йан жи пәй мә дькʹәвьн (Бьхунә Мәтта 5:43-48). Әм шагьртед Иса нә, ләма жи чь жь дәсте мә те әм дькьн, ԝәки чʹәʹв бьдьнә ԝи.

11. Щарна дьбәкә чьма һеса нинә чʹәʹв бьдьнә Иса?

¹¹ Рʹаст ә әм заньн кӧ Пʹадшатийа Хԝәде ԝе нәһәԛийе бь тʹәмами бьдә һьлдане, диса жи дьбәкә щарна мәрʹа һеса нинә кӧ чʹәʹв бьдьнә Иса. Хушка мә Жанийа, йа кӧ жь бо рʹәнге чʹәрме хԝә дьһатә ньмьз кьрьне, ӧса дьбежә: «Мәрьва бь гьлийед хԝә гәләк дьле мьн дешандьн. Әз гәләк һерс дькʹәтьм у мьн дьхԝәст, ԝәки мәрьвед кӧ нәһәԛийе дькьн, бенә щәзакьрьне. Ләма жи әз бумә әндәма ве кʹоме, йа кӧ мьԛабьли расизме дәрдькʹәт. Әз дьфькьрим кӧ бь ԝи щурʹәйи дәрәщә ԝе бе гӧһастьне у әзе хԝә дьһа баш тʹәхмин кьм». Ле ԝәʹдә шунда, Жанийайе фәʹм кьр кӧ әԝ гәрәке ньһерʹандьна хԝә бьгӧһезә. Әԝ дьбежә: «Мьн тедәрхьст ԝәки әз изьне дьдьмә кәсед дьн сәр фькьред мьн ӧса һʹӧкӧм кьн, ԝәки әз баԝәрийа хԝә нә кӧ Йаһоԝа, ле мәрьва биньм. Һьнге мьн сафи кьр жь ве кʹоме бь тʹәмами дәркʹәвьм». Әм гәрәке һаж хԝә һәбьн, ԝәки һерса мә нәбә сәбәб, кӧ әм бькʹәвьнә нава шьхӧлед политикайе (Йуһʹәнна 15:19).

12. Чьрʹа әм гәрәке фәсал бьн кӧ әм чь дьхуньн у чь дьньһерʹьн?

¹² Гәло чь дькарә али мә бькә рʹьһʹәт бьминьн, гава әм нәһәԛийе дьвиньн? Әм гәрәке мьԛати хԝә бьн, кӧ әм чь дьхуньн у чь дьньһерʹьн. Һьнә малпәред сосйали дина мәрьва дькʹьшиньн сәр нучәйед дәрһәԛа нәһәԛийе у ԝан кʹома пеш дьхьн, йед кӧ дьхԝазьн гӧһастьнед политики бькьн. Һьнә нучә жи дина мәрьва дькʹьшиньнә нә кӧ сәр ве йәке чь ԛәԝьми йә, ле сәр ньһерʹандьна хԝә. Һәрге нучәйәкә дәрһәԛа нәһәԛийе рʹаст бә жи, гәло әме кʹаре бьстиньн һәрге тʹьме дәрһәԛа ԝан тьшта бьфькьрьн? Һәрге әм тʹьме тьштед ӧса бьньһерʹьн, дьбәкә әм гәләк әʹщьз бьн, дьлтәнг бьн у һерс кʹәвьн (Мәтʹәлок 24:10). Һьм жи дьбәкә әм бир кьн, кӧ тʹәне Пʹадшатийа Хԝәде дькарә нәһәԛийе бь тʹәмами кʹӧта кә.

13. Чьрʹа фәрз ә кӧ әм Кʹьтеба Пироз һәр рʹож бьхуньн?

¹³ Һәрге әм Кʹьтеба Пироз һәр рʹож бьхуньн у кʹур сәр бьфькьрьн, әме бьзаньбьн кӧ гәрәке чь бькьн, гава нәһәԛийе дьвиньн. Хушкәкә бь наве Алийа гәләк әʹщьз дьбу, чьмки һьнә мәрьвед дәр-дора ԝе рʹасти нәһәԛийе дьһатьн. Ӧса дьһатә кʹьфше, те бежи кәсед кӧ зӧлми ль хәлԛе дькьрьн, нәдьһатьнә щәзакьрьне. Әԝ дьбежә: «Мьн гәрәке ԝәʹдә вәԛәтанда сәва кӧ дьле хԝә лекʹолин кьра у жь хԝә бьпьрсийа, һәла әз бь рʹасти баԝәр ьм ԝәки Йаһоԝа ԝе ван проблема сафи кә. Һьнге мьн Ибо 34:22-29 хԝәнд. Әван рʹеза анинә бира мьн, ԝәки тʹӧ кәс нькарә хԝә жь Йаһоԝа вәшерә. Һәԛийа Йаһоԝа беԛьсур ә у тʹәне әԝ дькарә һʹәму проблемед инсанәте сафи кә». Ле һʹәта кӧ Пʹадшатийа Хԝәде һәԛийа рʹаст бинә, гәло әм чь дькарьн бькьн?

НЬҺА ӘМ ЧЬ ДЬКАРЬН БЬКЬН?

14. Әм гәрәке чь бькьн сәва кӧ хԝәха жи нәһәԛийе нәкьн? (Колоси 3:10, 11)

¹⁴ Рʹаст ә әм нькарьн кьред ван мәрьва контрол кьн, йед кӧ нәһәԛийе дькьн, ле әм дькарьн кьред хԝә контрол кьн. Чаԝа мә ида шеԝьр кьр, әм гәрәке мина Иса һьндава һәр кәсида рʹәʹм у дьлован бьн, һәла һе һьндава ван мәрьва жи, йед кӧ нәһәԛийе дькьн (Мәтта 7:12; Рʹомайи 12:17). Һәрге әм һьндава һәр кәсида һәԛ у дьлован бьн, Йаһоԝа ԝе жь мә рʹази бә (Бьхунә Колоси 3:10, 11).

15. Чьма фәрз ә кӧ әм мәрьварʹа дәрһәԛа Кʹьтеба Пироз бежьн?

¹⁵ Сәва кӧ әм али мәрьва бькьн, метода һәрә баш әв ә, кӧ әм ԝанрʹа дәрһәԛа Кʹьтеба Пироз бежьн. Гәло чьрʹа? Чьмки занәбуна дәрһәԛа Хԝәде дькарә кәсед зӧльм жи бькә мәрьвед нәрм у әʹдьлайиһʹәз (Ишайа 11:6, 7, 9). Мерәки бь наве Щәмал, пешийа кӧ бу Шәʹде Йаһоԝа, тʹәви кʹомәке һәвкʹари дькьр, йа кӧ мьԛабьли сәрԝеред дәԝләте дәрдькʹәт, чьмки әндәмед ве кʹоме дьфькьрин, ԝәки сәрԝер нәһәԛийе дькьн. Әԝ дәрһәԛа хԝә ӧса дьбежә: «Тʹӧ кәс дәсте зоре найе гӧһастьне. Әз жи нә кӧ бь дәсте зоре, ле бь сайа рʹастийа Кʹьтеба Пироз һатьмә гӧһастьне». Бәле, Щәмал бь сайа тьштед кӧ әԝ жь Кʹьтеба Пироз һин дьбу, фәʹм кьр кӧ нәлазьм ә мьԛабьли сәрԝеред дәԝләте дәре. Мәрьвед кӧ бь сайа Кʹьтеба Пироз тенә гӧһастьне чьԛас зедә бьн, һаԛас мәрьвед кӧ нәһәԛийе дькьн, ԝе кем бьн.

16. Тӧ чьма дьхԝази мьзгинийа Пʹадшатийа Хԝәде бәла ки?

¹⁶ Мина Иса әм жи дьхԝазьн мәрьварʹа бежьн, кӧ тʹәне Пʹадшатийа Хԝәде дькарә нәһәԛийе бь тʹәмами бьдә һьлдане. Әв йәк дькарә бәрдьлийе бьдә ԝан кәса, йед кӧ рʹасти нәһәԛийе һатьнә (Йерәмйа 29:11). Стейси, йа кӧ мә жоре бәʹса ԝе кьрьбу, ӧса дьбежә: «Әз заньм кӧ Хԝәде ԝе һʹәму кӧл-дәрда бьдә һьлдане, ләма жи гава нәһәԛи те кьрьне, әз дькарьм дьлрʹьһʹәтийе хԝәй кьм. Бь сайа Кʹьтеба Пироз Йаһоԝа дьле мьн рʹьһʹәт дькә». Сәва кӧ әм мәрьварʹа бежьн, ԝәки Кʹьтеба Пироз дәрһәԛа кʹӧтакьрьна нәһәԛийе чь дьбежә, әм гәрәке хԝә пешда һазьр кьн. Чьԛас баш тӧ һинкьрьнед Кʹьтеба Пироз дәрһәԛа кӧл-дәрда фәʹм бьки, һаԛас баш те бькарьби сәр хәбате йан жи мәкʹтәбеда мәрьварʹа шьровәки, кӧ чьрʹа һаԛас нәһәԛи у кӧл-дәрд һәнә, у чаԝа Йаһоԝа ԝе ван кӧл-дәрда бьдә һьлдане.b

17. Йаһоԝа ча али мә дькә, кӧ әм һьмбәри нәһәԛийе сәбьр кьн?

¹⁷ Әм заньн ԝәки һʹәта кӧ Мире-щьна сәрԝертийа ве дьнйайе дькә, әме рʹасти нәһәԛийе бен. Ле әм ша нә кӧ зутьрәке Мире-щьна, демәк «сәрԝере дьнйайе ԝе бе авитьне дәрва» (Йуһʹәнна 12:31). Бь сайа Кʹьтеба Пироз, Йаһоԝа һьм әшкәрә дькә кӧ чьма һаԛас нәһәԛи һәйә, һьм жи нишани мә дькә, кӧ дьле ԝи сәр мә дьшәԝьтә (Зәбур 34:17-19). Жь мәсәла Иса әм һин дьбьн, кӧ гәрәке һьмбәри нәһәԛийе чь бькьн, у дәмәкә незикда Пʹадшатийа ԝи ԝе нәһәԛийе бь тʹәмами кʹӧта кә (2 Пәтрус 3:13). Ԝәрә әм мьзгинийа Пʹадшатийа Хԝәде бь дьл у щан бәла кьн у һивийа ԝе рʹоже бьн, гава дьнйа бь һәԛи у әʹдьлайе тʹьжә бә (Ишайа 9:7).