Али Ԝан Мәрьва Бькьн, Йед кӧ Гӧһ Дьдьнә Рʹастийе

1. Гава әм бәʹса мьзгинийе дькьн, дьбәкә мәрьв хԝә ча бьдьнә кʹьфше? (Кʹаред Шандийа 13:47, 48; 16:14, 15)

ԚЬРʹНА йәкеда, гәләк мәрьва гава мьзгини бьһистьн, дәрберʹа ԛәбул кьрьн (Бьхунә Кʹаред Шандийа 13:47, 48; 16:14, 15). Иро жи мәрьвед ӧса һәнә, йед кӧ гава щара пешьн мьзгинийе дьбьһен, дәрберʹа бь шабуне ԛәбул дькьн. Ле һьнә кәсед кӧ серида гӧһ надьнә мьзгинийе, ԝәхт шунда ԛәбул дькьн. Чахе әм хьзмәтийеда рʹасти ԝан мәрьва тен, дьле кʹижана ‹бона жийина һʹәта-һʹәтайе һазьр ә›, әм гәрәке чь бькьн?

2. Бәлакьрьна мьзгинийе ча бәрамбәри шьхӧле бахчәвана дьбә?

² Бәлакьрьна мьзгинийе һьнә алийава мина шьхӧле бахчәвана йә. Һьнә сәбзә зу дьгьһижьн у бахчәван гәрәке ԝан тʹоп кә. Ле ӧса жи әԝ гәрәке сәбзәйед дьн ав дә у йед тʹәзә жи бьчинә. Мина ве йәке, гава кәсәк һазьр ә мьзгинийе ԛәбул кә, әм гәрәке али ԝи бькьн кӧ әԝ зу пешда һәрʹә у бьбә шагьрте Иса. Ле ӧса жи әм гәрәке бәрдәԝам кьн али ԝан мәрьва бькьн, кʹижанарʹа дьһа зедә ԝәʹдә лазьм ә, сәва кӧ ԛимәта рʹастийа Кʹьтеба Пироз фәʹм кьн (Йуһʹәнна 4:35, 36). Сәрԝахти ԝе али мә бькә тедәрхьн, һәла мәрьв дьхԝазә рʹастийе ԛәбул кә йан на, у сәр һʹиме ве йәке әме бьзаньбьн кӧ ча али ԝи бькьн. Ԝәрә әм бьньһерʹьн кӧ ԝәʹде хәбәрдана пешьн, әм ча дькарьн али кәсед ӧса бькьн, йед кӧ һазьр ьн гӧһ бьдьнә рʹастийе. Ӧса жи әме бьвиньн кӧ әм ча дькарьн али ԝан мәрьва бькьн пешда һәрʹьн.

КӘСЕД КӦ ҺАЗЬР ЬН ГӦҺ БЬДЬН

3. Гава әм хьзмәтийеда рʹасти ԝан мәрьва тен, йед кӧ гӧһ дьдьнә рʹастийе, әм гәрәке чь бькьн? (1 Корьнтʹи 9:26)

³ Гава әм хьзмәтийеда рʹасти ԝан мәрьва тен, йед кӧ гӧһ дьдьнә рʹастийе, әм гәрәке али ԝан бькьн кӧ әԝана хԝә ль рʹийа жийине бьгьрьн. Ԝәʹде хәбәрдана пешьн әм дькарьн мәрьва һелан кьн, кӧ һинбуна Кʹьтеба Пироз дәстпекьн, у ԝана тʹәглифи сәр щьвате кьн (Бьхунә 1 Корьнтʹи 9:26).

4. Бәʹса сәрһатийа кәсәки ӧса бькә, йе кӧ дәрберʹа һазьр бу һинбуна Кʹьтеба Пироз дәстпекә.

⁴ Мәрьв һелан кә кӧ һинбуна Кʹьтеба Пироз дәстпекә. Һьнә кәс, рʹасти кʹижана кӧ әм хьзмәтийеда тен, дәрберʹа һинбуна Кʹьтеба Пироз ԛәбул дькьн. Ԝәрә әм дина хԝә бьдьне Канадайеда чь ԛәԝьми. Рʹожа Пешәме жьнькәкә щаһьл незики стенде бу у брошура Ша бә Жийинерʹа Һʹәта-Һʹәтайе! һьлда. Хушка кӧ бәр стенде сәкьни бу, жерʹа гот, кӧ әԝ дькарә бе пʹәрә һинбуна Кʹьтеба Пироз дәрбаз бә. Жьньке ԛәбул кьр у ԝана һәжмара тʹелед хԝә һәвдӧрʹа һиштьн. Һәма ве рʹоже жьньке хушка мәрʹа смс лекьр у пьрси, һәла әԝ кʹәнге дькарә һинбуна Кʹьтеба Пироз тʹәви ԝе дәрбаз кә. Хушка мә гот, кӧ хьлазийа һʹәфтийе дькарә, ле жьньке гот: «Ле сьбе набә? Сьбе әз вала мә». Рʹожа Инийе, хушка мә тʹәви ԝе һинбун дәстпекьр. Хьлазийа һʹәфтийе жьньк щара пешьн чу сәр щьвате, у паши ве йәке әԝ зу рʹӧһʹанида пешда чу.

5. Әм чаԝа дькарьн тедәрхьн һәла ԝәʹдә йә, кӧ мәрьв һелан кьн һинбуна Кʹьтеба Пироз дәстпекә? (Бьньһерʹә ӧса жи шькьл.)

⁵ Һәмьки һәр кәс мина ве жьнька щаһьл һазьр нинә дәрберʹа һинбуна Кʹьтеба Пироз дәстпекә. Һьнә мәрьварʹа һе зедә ԝәхт лазьм ә. Серида дьбәкә лазьм бә, ԝәки әм дәрһәԛа тʹемәкә ӧса хәбәр дьн, кʹижан кӧ ԝи мәрьвирʹа ԝе һʹәԝас бә. Ле диса жи бь сайа ньһерʹандьна позитив у ве йәке кӧ әм дькʹәвьнә һʹәйра мәрьва, дьбәкә ԝәхтәкә кьнда мәрьв һелан бә һинбуна Кʹьтеба Пироз дәстпекә. Сәва кӧ әм һинбуна Кʹьтеба Пироз дәстпекьн, гәло әм чь дькарьн бежьне? Ԝәрә әм бьвиньн ԝәки чәнд хушк-бьред кӧ һеса һинбунед Кʹьтеба Пироз дәстпедькьн, дәрһәԛа ве йәке чь дьбежьн.

6. Әм чь дькарьн бежьн, ԝәки мәрьв һелан бә һинбуна Кʹьтеба Пироз дәстпекә?

⁶ Әв хушк-бьра, жь кʹижана мә пьрси кӧ чь метода әԝана дьдьнә хәбате, сәва кӧ һинбуна Кʹьтеба Пироз дәстпекьн, готьн ԝәки һьнә територийада ԝе баш бә хәбәред ӧса ча «дәрс», «һинбуна Кʹьтеба Пироз» йан жи «әзе ԝә һин кьм», нәдьнә хәбате. Әԝана дьбежьн, кӧ хәбәред ӧса ча «хәбәрдан» йан жи «шеԝьркьрьна Кʹьтеба Пироз», дьһа баш ьн. Мәсәлә, сәва кӧ мәрьв бьхԝазә щарәкә дьн жи хәбәрдане тʹәви тә бәрдәԝам кә, тӧ дькари ӧса бежи: «Әме бьньһерʹьн кӧ Кʹьтеба Пироз ча щаба һьнә пьрсед фәрз дьдә». Йан жи тӧ дькари бежи: «Кʹьтеба Пироз нә кӧ тʹәне щаба пьрсед религи дьдә, ле әԝ әʹмьре мәйи һәррʹожида жи али мә дькә». Паше тӧ дькари ӧса бежи: «Әв йәк гәләк ԝәʹдә настинә, 10-15 дәԛә бәс ә, сәва кӧ әм жь Кʹьтеба Пироз тьштәки керһати пебьһʹәсьн». Ӧса жи, нәлазьм ә кӧ әм хәбәред ӧса ча «програма һинбуне» йан «һәр һʹәфте» бьдьнә хәбате, чьмки һьнә мәрьв дькарьн бьфькьрьн кӧ ԝе борщдар бьн һинбуне бәрдәԝам кьн.

7. Һьнә мәрьва ԛимәта рʹастийа Кʹьтеба Пироз щара пешьн кʹәнге фәʹм кьрьн? (1 Корьнтʹи 14:23-25)

⁷ Ԝана тʹәглифи щьвате кә. Ча те кʹьфше, рʹожед Паԝлосе шандида, һьнә мәрьвед кӧ һатьнә щьвате, ԛимәта рʹастийе щара пешьн ԝедәре фәʹм кьрьн (Бьхунә 1 Корьнтʹи 14:23-25). Иро жи гәләк щара ӧса дьбә. Һʹәчʹи зәʹф мәрьв дьһа зу рʹӧһʹанида пешда дьчьн, чахе дәстпедькьн бенә щьвата. Гәло кʹәнге тӧ гәрәке ԝана тʹәглифи щьвате ки? Кʹьтеба Ша бә Жийинерʹа Һʹәта-Һʹәтайе! дәрса 10, хԝәндәкʹара һелан дькә һәрʹьнә щьвата. Ле нәлазьм ә һивийе би һʹәта кӧ һун әве дәрсе дәрбаз бьн. Ԝәʹде хәбәрдана ԝәйә пешьн тӧ дькари мәрьв тʹәглифи щьвате ки, кʹижан кӧ Шәми йан Ләʹде дәрбаз дьбә. Тӧ дькари ԝи мәрьвирʹа наве готаре бежи, кʹижан кӧ щьватеда ԝе бе хԝәндьне. Ӧса жи тӧ дькари дәрһәԛа фькьрәкә һʹәԝас жь готара Бьрща Ԛәрәԝьлийе бежи, кʹижан кӧ һуне ве һʹәфтийе щьватеда дәрбаз бьн.

8. Гава әм кәсәки тʹәглифи щьвате дькьн, әм чь дькарьн жерʹа гьли кьн? (Ишайа 54:13)

⁸ Гава тӧ кәсәки тʹәглифи щьвате дьки, жерʹа шьровәкә кӧ щьвинед мә ча жь щьвинед религийед дьн щӧдә дьбьн. Хԝәндәкʹарәк кӧ щара пешьн һатьбу щьвате, ԝәʹде һинбуна Бьрща Ԛәрәԝьлийе, әԝе жь хушка кӧ тʹәви ԝе һинбун дәрбаз дькьр, пьрси: «Гәло бьра наве һәр кәси занә?» Хушка мә готе, кӧ чаԝа әм навед нәфәред хԝә заньн, щьватеда жи әм гьшк хирәт дькьн, ԝәки навед һәвдӧ бьзаньбьн. Әве кʹӧлфәте гот, кӧ дера ԝеда ӧса нибу. Хенщи ве йәке, щьвинед мә гәләк алийед дьнва жи щӧдә нә (Бьхунә Ишайа 54:13). Әм тʹәвайи тʹоп дьбьн, ԝәки Йаһоԝарʹа хьзмәт кьн, жь ԝи һин бьн у дьле һәвдӧ ԛәԝи кьн (Ибрани 2:12; 10:24, 25). Щьватед мә бь тʹәрбәти дәрбаз дьбьн, ԝедәре әм занәбуна керһати дьстиньн у тʹӧ ритуала дәрбаз накьн (1 Корьнтʹи 14:40). Рʹонайа һьндӧрʹе Ода Щьвате рʹьнд ә, чьмки әм тенә ԝедәре ԝәки һин бьн. Ӧса жи ԝәʹде щьвата әм тʹӧ партийәкә политики бьльнд накьн, чьмки әм тʹәв политикайе набьн, хенщи ве йәке әм дәрһәԛа ньһерʹандьнед шәхси накʹәвьнә дәʹԝа. Дьбәкә ԝе баш бә, ԝәки әм видеойа бь наве Чь Дьԛәԝьмә Ода Щьватеда? нишани хԝәндәкʹар бькьн, кӧ әԝ бьвинә ԝәки щьватед мә ча дәрбаз дьбьн.

9-10. Гава әм кәсәки тʹәглифи щьвате дькьн, әм чь дькарьн бькьн, ԝәки әԝ нәтьрсә бе? (Бьньһерʹә ӧса жи шькьл.)

⁹ Һьнә мәрьв нахԝазьн бенә щьвата, чьмки дьтьрсьн кӧ әме ԝанрʹа бежьн ԝәки әԝана гәрәке бьбьнә Шәʹдед Йаһоԝа. Ләма жи мәрьварʹа бежә, кӧ әм мевана һʹәз дькьн у зоре тʹӧ кәси накьн кӧ әԝ бьбә Шәʹде Йаһоԝа. Дәре мә бона һәр кәси вәкьри йә, у малбәт дькарьн тʹәви зарʹед хԝә бен. Сәр щьватед мә, зарʹа башԛә һин накьн, әԝана жи тʹәви де-бавед хԝә рʹудьнен. Ләма жи зарʹ тʹьме бәр чʹәʹве де-бавед хԝә нә (Ԛануна Дӧщари 31:12). Әм пʹәра тʹоп накьн у ԛӧтʹийед бона тʹопкьрьна пʹәра дәрбази һәв накьн, чьмки әм гӧһ дьдьнә ве тʹәмийа Иса: «Ԝә беһәԛ стандийә, беһәԛ жи бьдьн» (Мәтта 10:8). Ӧса жи, тӧ дькари ԝи мәрьвирʹа, кʹижани кӧ тʹәглиф дьки, бежи кӧ нәлазьм ә кʹьнщед бьһа ль хԝә кьн. Хԝәде нә кӧ рʹуйе мәрьва дьньһерʹә, ле дьле ԝан (1 Самуйел 16:7).

¹⁰ Һәрге мәрьв бе, али ԝи бькә ԝәки әԝ щьватеда хԝә баш тʹәхмин кә. Насийа ԝи бьдә рʹуспийа у мьзгинванед дьн. Һәрге әԝ бьвинә кӧ мәрьв һьндава ԝида һәвалһʹәз ьн у ша нә ле бьвиньн, дьбәкә әԝ бьхԝазә диса бе. Ԝәʹде щьвате, һәрге щәм ԝи Кʹьтеба Пироз тʹӧнә бә, тӧ рʹеза нишани ԝи кә.

ГАВА ҺИНБУНА КʹЬТЕБА ПИРОЗ ДӘСТПЕДЬКИ

11. Тӧ ча дькари нишан ки, ԝәки тӧ ԛәдьре хԝәндәкʹаре хԝә дьгьри?

¹¹ Гава тӧ тʹәви кәсәки һинбуна Кʹьтеба Пироз дәрбаз дьки, бир нәкә ԝәки шьхӧлед ԝийә дьн жи һәнә. Ләма жи гава тӧ дьбежи те кʹәнге бейи щәм ԝи, ԝәʹдәда һәрʹә. Һәрге ви щийи кʹидәре кӧ тӧ дьмини, нормал ә дәрәнги кʹәвьн, диса жи тӧ ӧса нәкә. Ӧса жи ԝе баш бә, ԝәки тӧ дәрса пешьн гәләк дьреж нәки. Һьнә мьзгинванед щерʹьбанди дьбежьн, кӧ һәрге хԝәндәкʹар дьхԝазә дьһа зедә пебьһʹәсә, диса жи ԝе баш бә кӧ дәрс дьреж нәкʹьшинә. Бь зедәйи хәбәр нәдә, ле мәщале бьдә кӧ хԝәндәкʹаре тә фькьред хԝә бежә (Мәтʹәлок 10:19).

12. Чахе тӧ һинбуна Кʹьтеба Пироз тʹәви кәсәки дәстпедьки, нета тә гәрәке чь бә?

¹² Чахе тӧ һинбуна Кʹьтеба Пироз тʹәви кәсәки дәстпедьки, нета тә гәрәке әв бә, кӧ хԝәндәкʹаре тә Йаһоԝа у Иса нас кә у ԝана һʹәз бькә. Бона ве йәке, дина хԝәндәкʹар бькʹьшинә сәр Кʹьтеба Пироз, нә кӧ сәр хԝә йан сәр занәбуна хԝә дәрһәԛа Кʹьтеба Пироз (Кʹаред Шандийа 10:25, 26). Ве йәкеда Паԝлосе шанди мәсәләкә баш ә бона мә. Гава әԝи мәрьв һин дькьрьн, әԝи гәләк щар дина мәрьва дькʹьшандә сәр Иса Мәсиһ, йе кӧ жь Йаһоԝа һатьбу шандьне кӧ али мә бькә, ԝәки әм ԝи нас кьн у һʹәз бькьн (1 Корьнтʹи 2:1, 2). Ӧса жи Паԝлос нишан кьр, кӧ әм гәрәке али шагьртед тʹәзә бькьн, ԝәки әԝана хәйсәт-һʹӧнӧред баш нав хԝәда пешда биньн, йед кӧ бәрамбәри зерʹ, зив у кәвьред бьһа дьбьн (1 Корьнтʹи 3:11-15). Мәсәлә, әԝана гәрәке баԝәри, билани у тьрса бәр Йаһоԝа нав хԝәда пешда биньн (Зәбур 19:9, 10; Мәтʹәлок 3:13-15; 1 Пәтрус 1:7). Мина Паԝлосе шанди, али хԝәндәкʹаре хԝә бькә, ԝәки баԝәрийа ԝи дьһа ԛәԝи бә у әԝ бьбә досте Йаһоԝа (2 Корьнтʹи 1:24).

13. Тӧ ча дькари бькʹәви һʹәйра ԝан мәрьва, йед кӧ гӧһ дьдьнә рʹастийе, у һьндава ԝанда бь сәбьр би? (2 Корьнтʹи 10:4, 5) (Бьньһерʹә ӧса жи шькьл.)

¹³ Чахе тӧ мәрьва һин дьки, мина Иса һьндава ԝанда бь сәбьр бә у бькʹәвә һʹәйра ԝан. Хԝәндәкʹаре хԝә бь пьрсед зедә әʹщьз нәкә. Һәрге ԝәʹде һинбуне жерʹа чәтьн ә фькьрәке фәʹм кә, һинбуне бәрдәԝам кьн у паше дина хԝә бьдьнә ве фькьра чәтьн. Тʹӧ щара зоре ԝи нәкә кӧ әԝ тьштәки ԛәбул кә, ле сәбьр кә һʹәта кӧ рʹастийа Кʹьтеба Пироз дьле ԝида кʹок бәрдә (Йуһʹәнна 16:12; Колоси 2:6, 7). Кʹьтеба Пироз һинкьрьнед ԛәлп бәрамбәри «бьрщед ԛәԝи» дькә, йед кӧ әм гәрәке һьлшиньн (Бьхунә 2 Корьнтʹи 10:4, 5). Ле дәԝса кӧ тӧ ве йәке дәсте зоре бьки, али хԝәндәкʹаре хԝә бькә, ԝәки әԝ итʹбарийа хԝә Йаһоԝа бинә у ԝи бькә бьрщ у сьтʹара хԝә (Зәбур 91:9).

ГАВА КӘСЕД ТʹӘЗӘ ТЕНӘ ЩЬВАТЕ

14. Гава кәсед тʹәзә тенә щьвата, әм гәрәке һьндава ԝанда чаԝа бьн?

¹⁴ Йаһоԝа дьхԝазә кӧ әм һьндава һʹәму мәрьвада дьлован бьн у ԛәдьре ԝан бьгьрьн, фьрԛи тʹӧнә әԝана жь кʹижан мьләт у култура нә, у дәԝләти нә йан на (Аԛуб 2:1-4, 9). Гава кәсәк те щьвате, гәло әм ча дькарьн һʹәзкьрьне һьндава ԝанда бьдьнә кʹьфше?

15-16. Әм ча дькарьн али кәсед тʹәзә бькьн, кӧ әԝана хԝә щьватеда рʹьһʹәт тʹәхмин кьн?

¹⁵ Һьнә мәрьв тенә щьвате, чьмки ԝанрʹа һʹәԝас ә пебьһʹәсьн кӧ ԝедәре чь дьԛәԝьмә. Һьнә мәрьв жи тен, чьмки кәсәки ԝана һелан кьрийә, кӧ һәрʹьнә щьватед Шәʹдед Йаһоԝа. Гава тӧ сәр щьвате кәсәки тʹәзә дьвини, незики ԝи бә у тʹәв бьбә нас, ле ӧса бькә ԝәки ԝи әʹщьз нәки. Жерʹа бежә кӧ әԝ дькарә кʹеләка тә рʹуне. Ԝәʹде шеԝьркьрьна готаре бьра әԝ Кʹьтеба Пироз у әʹдәбйәта тә бьньһерʹә, йан жи Кʹьтеба Пироз у әʹдәбйәта кӧ ԝе рʹоже дәрбаз дькьн, бьдә ԝи. Ӧса жи һәр тьшти бькә, ԝәки әԝ хԝә рʹьһʹәт тʹәхмин кә. Рʹожәке мерәки кӧ щара пешьн һатә Ода Щьвате, ви бьрайирʹа, кӧ ле сьлав кьр гот кӧ әԝ жь бо кʹьнщед хԝә шәрм дькә. Бьре мә жерʹа гот кӧ нә лазьм ә әԝ шәрм кә, чьмки Шәʹдед Йаһоԝа дина хԝә надьнә тьштед ӧса. Әԝи гьлийед бьре мә тʹӧ щар бир нәдькьр у ԝәхт шунда һатә ньхӧмандьне. Гава тӧ пешийа йан паши щьвина тʹәви мәрьва хәбәр дьди, бькʹәвә һʹәйра ԝан, ле нәкʹәвә нава шьхӧлед ԝанә шәхси (1 Пәтрус 4:15).

¹⁶ Ӧса жи чахе әм ԝәʹде хәбәрдана хԝә, щаба хԝә, йан жи чахе пе дәрса дәрдькʹәвьн, бәʹса ԝан мәрьва дькьн, йед кӧ Шәʹдед Йаһоԝа ниньн у дәрһәԛа баԝәрийа ԝан хәбәр дьдьн, әм гәрәке фәсал бьн кӧ тьштед негатив дәрһәԛа ԝан нәбежьн. Ӧса әме меванед хԝә әʹщьз нәкьн, ле нишан кьн кӧ әм ԛәдьре ԝан дьгьрьн (Тито 2:8; 3:2). Мәсәлә, әм гәрәке баԝәрийед кәсед кӧ Шәʹдед Йаһоԝа ниньн, беһӧрмәт нәкьн (2 Корьнтʹи 6:3). Илаһи бьред кӧ пе готара дәртен гәрәке мьԛати хәбәрдана хԝә бьн. Әԝана гәрәке ԝан мәрьва һьлдьн һʹәсаб, йед кӧ щара пешьн һатьнә щьвате у гьли йан терминед кӧ бона ԝан ԝе фәʹмдари нибьн, ӧса шьровәкьн, ԝәки һәр кәсирʹа фәʹмдари бә.

17. Гава әм рʹасти ԝан мәрьва тен, йед кӧ ‹дьле ԝан бона жийина һʹәта-һʹәтайе һазьр ә›, әм гәрәке чь бькьн?

¹⁷ Бәлакьрьна мьзгинийе рʹож бь рʹож дьһа фәрз дьбә, у әм гәләк щар рʹасти кәсед ӧса тен, йед кӧ ‹дьле ԝан бона жийина һʹәта-һʹәтайе һазьр ә› (Кʹаред Шандийа 13:48). Чахе әм рʹасти ԝан тен, ԝәрә әм ԝана һелан кьн кӧ һинбуна Кʹьтеба Пироз дәстпекьн у тʹәглифи сәр щьвате кьн. Ӧса әм дькарьн али ԝан бькьн, кӧ хԝә ль рʹийа жийине бьгьрьн (Мәтта 7:14).