Жь Йаһоԝа Рʹази бьн у Кʹәрәме Бьстиньн

1. Чьрʹа Йаһоԝа һежа йә ԝәки әм жь ԝи рʹази бьн?

ЙАҺОԜА һәйә Пʹешкʹешдаре «һәр дайина ԛәнщ у һәр пʹешкʹеша кʹамьл», у әԝ һежа йә ԝәки әм жь ԝи рʹази бьн (Аԛуб 1:17). Чаԝа Шьване мәйи һʹьзкьри, әԝ бь назькайи хәм дькә дәрһәԛа һʹәԝщед мәйи физики у рʹӧһʹани (Зәбур 23:1-3). Әԝ дькарә бьбә «старгәһ у һеза [ԛәԝата] мә» илаһи ԝәʹде чәтьнайада (Зәбур 46:1). Ләма жи гәләк мәʹнийед мә һәнә, сәва кӧ ԛайил бьн тʹәви зәбурбеж, кʹижани кӧ гот: «Жь Йаһоԝа рʹази бьн, чьмки әԝ ԛәнщ ә; һʹьзкрьна ԝийә амьн һʹәта-һʹәтайе йә» (Зәбур 106:1, ДТʹ).

2, 3. а) Чьрʹа нәбаш ә дьшьрмиш бьн кӧ кʹәрәмед мә мәрʹа дькʹәвьн? б) Дь ве тʹемайеда кʹижан пьрс ԝе бенә шьровәкьрьне?

² Ле чьрʹа әм гәрәке жь Йаһоԝа рʹази бьн? Чаԝа кӧ һатьбу пʹехәмбәртикьрьне, иро дь ԝан рʹожед ахьрийеда мәрьв гәләк бешекьр ьн (2 Тимотʹейо 3:2). Гәләк мәрьв һʹәсаб дькьн кӧ кʹәрәмед ԝан ԝанрʹа дькʹәвьн. Бь милйона мәрьв дькʹәвьнә бьн һʹӧкӧме ве дьнйа бь комерси у реклама. Ләма жи дәԝса кӧ рʹази бьн ԝе йәкерʹа чь кӧ бал ԝана һәйә, әԝана һе зедә у зедә дьхԝазьн. Әԝ рʹӧһʹе бешекьртийе, дькарә ль сәр мә жи һʹӧкӧм бә. Әм жи дькарьн бешекьр бьн мина щьмәʹта Исраелейә бәре, у нәшекьриньн һәләԛәтийа хԝәйә ԛимәт тʹәви Йаһоԝа, у ԝан кʹәрәмед кӧ мә жь ԝи стандийә (Зәбур 106:7, 11-13).

³ Чахе әм рʹасти чәтьнайед гьран тен, әм һеса дькарьн сьст бьн у кʹәрәмед хԝә нәвиньн (Зәбур 116:3). Ләма жи пьрс пешда тен, әм ча дькарьн рʹазибуне дьле хԝәда зедә кьн у хԝәй кьн? У чь дькарә али мә бькә ԝәки әм ньһерʹандьна баш хԝәй кьн ԝәʹде тәнгасийе гьранда? Ньһа әме пебьһʹәсьн.

«ЙА ХӦДАН ХԜӘДАЙЕ МЬН, . . . РАМАНЕН [ԚӘНЩИЙЕД] ТӘ ЧЬԚАС ЗЕДӘ НӘ»

4. Ча әм дькарьн дьле хԝәда рʹазибуне хԝәй кьн?

⁴ Һәрге әм дьхԝазьн рʹазибуне дьле хԝәда зедә кьн у хԝәй кьн, әм гәрәке бь рʹазибуне бьфькьрьн ль сәр кʹәрәмед хԝәйә жь Йаһоԝа, у ӧса жи дьшьрмиш бьн дәрһәԛа кьред ԝийи бь һʹьзкьрьна амьн. Чахе зәбурбеж һәма ӧса кьр, әԝ зәндәгьрти ма сәр гәләк ԛәнщи у кьред Йаһоԝа. (Бьхунә Зәбур 40:5; 107:43.)

5. Ча мәсәла Паԝлос дькарә али мә бькә, ԝәки әм рʹазибуна хԝә зедә кьн?

⁵ Әм дькарьн жь мәсәла Паԝлосе шанди һин бьн, кӧ ча рʹазибуна хԝә зедә кьн. Кʹьфш ә, әԝ дьшьрмиш дьбу ль сәр кʹәрәмед хԝә, ләма жи әԝи тʹьме рʹазибуна хԝә бь дьл әʹйан дькьр. Паԝлос дьгот: «Әз жи бәре ль ԝи дькʹьфьрим, әԝ дьзеранд у нәйарти ль ԝи дькьр». Әԝ гәлә рʹази бу сәва ԝе йәке, кӧ рʹаст ә бәре әԝи гәләк гӧнә дькьр, ле Йаһоԝа у Иса рʹәʹмти һьндава ԝида дьданә кʹьфше, у амьнийа хԝә ԝи анин кӧ бьбә даннасинкʹар. (Бьхунә 1 Тимотʹейо 1:12-14.) Паԝлос ӧса жи гәләк ԛимәт дькьр һәвалԛӧльхкʹаред хԝә, у әԝ һәргав жь Йаһоԝа рʹази бу сәва хәйсәт-һʹӧнӧред ԝанә баш у ԛӧльхкьрьна ԝанә бь амьни (Филипи 1:3-5, 7; 1 Тʹесалоники 1:2, 3). Чахе Паԝлос рʹасти дәрәщед чәтьн дьһат жи, әԝ диса жь Йаһоԝа рʹази бу бона аликʹарийа ԝәʹдада, кʹижан кӧ әԝи дьстанд жь бьред рʹӧһʹани (Кʹаред Шандийа 28:15; 2 Корьнтʹи 7:5-7). Ләма жи Мәсиһийед иройин һелан дьбьн бь ньвисаред Паԝлос: «Шекьрдар бьн . . . , зәбура у һәр щурʹә стьранед рʹӧһʹани бь шькьрдари дьле хԝәда бона Хԝәде бьстьрен» (Колоси 3:15-17).

ДЬШЬРМИШБУН У ДӦАКЬРЬН РʹАЗИБУНЕ ЗЕДӘ ДЬКЬН

6. Тӧ дьһа зәʹф бона чь жь Йаһоԝа рʹази йи?

⁶ Ча әм дькарьн чʹәʹв бьдьнә мәсәлед Паԝлос? Мина Паԝлос, мәрʹа лазьм ә ԝәки әм дьшьрмиш бьн ль сәр ԝан тьшта чь кӧ Йаһоԝа мәрʹа кьрийә (Зәбур 116:12). Һәгәр жь тә бьпьрсьн: «Тӧ бона кʹижан кʹәрәма жь Йаһоԝа рʹази йи?» Тӧйе ча щаба хԝә бьди? Тӧйе бона һәләԛәтийа хԝәйә ԛимәт тʹәви Йаһоԝа бежи? Йан жи бона бахшандьне кʹижан кӧ тә сьтанд, чьмки тӧ баԝәр дьки ԛӧрбанбуйина Иса? Йан жи дәрһәԛа ԝан хушк у бьра, йед кӧ ԝәʹде чәтьнайа кʹеләка тә бун? Һьлбәт тӧйе бир нәки рази би бона малбәта хԝә. Фәʹмдари йә кӧ диса гәләк тьшт һәнә жь бо чь жи гәрәке рʹази би. Чахе тӧ дьфькьри сәр ԝан кʹәрәмед баш жь Баве мәйи һʹьзкьри Йаһоԝа, әԝ йәк дьле тә бь рʹазибуне тʹьжә дькә у ԝе тә һелан кә, кӧ тӧ һәр рʹож Йаһоԝарʹа бежи: «Зәʹф рʹази мә». (Бьхунә Зәбур 92:1, 2.)

7. а) Чьрʹа лазьм ә дӧакьрьнеда рʹазибуна хԝә Йаһоԝарʹа бьдьнә кʹьфше? б) Те чь кʹаре бьстини чахе дӧада рʹазибуна хԝә бьди кʹьфше?

⁷ Чахе әм дьфькьрьн дәрһәԛа кʹәрәмед хԝә, әм һелан дьбьн кӧ дь дӧакьрьнеда рʹазибуна хԝә бьдьнә кʹьфше (Зәбур 95:2; 100:4, 5). Дӧакьрьн бона һьнәка тʹәне мәщал ә ԝәки жь Хԝәде тьштәки бьхԝазьн. Ле бь рʹастийе Йаһоԝа хԝәш те чахе әм жь ԝи рʹази нә, сәва ԝе йәке чь кӧ бал мә һәйә. Дь Кʹьтеба Пирозда һәнә гәләк дӧа у рʹазибун кʹижан кӧ бь дьл һатьнә готьне, мәсәлә дӧайед Һаннайе у Һьзԛийа (1 Самуйел 2:1-10; Ишайа 38:9-20). Чʹәʹв бьдьнә ԝан мәрийа дь рʹазибунеда. Дӧайед хԝәда жь Йаһоԝа рʹази бьн, бона ԝан кʹәрәма кʹижан бал ԝә һәнә (1 Тʹесалоники 5:17, 18). Һәгәр әм ӧса бькьн, әме гәләк кʹаре бьстиньн. Әме шабуне бьстиньн, һʹьзкьрьна мә һьндава Йаһоԝа ԝе зедә бә, у әԝ ԝе бьбә досте мә (Аԛуб 4:8).

8. Чь дькарә бьбә мәʹни кӧ әм бешекьр бьн?

⁸ Чьрʹа әм гәрәке фәсал бьн кӧ бир нәкьн жь Йаһоԝа рʹази бьн бона ԛәнщийед ԝи? Чьмки мә жь Адәм у Һеԝайе һʹӧнӧре бешекьрбуне стандийә. Ԝәрә әм биньнә бира хԝә чахе әԝана щьнәтеда бун. Хԝәде хәм кьр бона һʹәму һʹәԝщед ԝан, у гӧмана ԝан һәбу, кӧ сәр әʹрде бьжин һʹәта-һʹәтайе (Дәстпебун 1:28). Ле ԝана ԛимәт нәкьрьн кʹәрәмед хԝә, у жь тьмайа хԝә һе зедә дьхԝәстьн. Ахьрийеда ԝана һʹәму тьшт ӧнда кьрьн (Дәстпебун 3:6, 7, 17-19). Әм нава дьнйа бешекьрда ньн, ләма жи әм жи дькарьн бир бькьн ԝан кʹәрәма, йе кӧ жь Йаһоԝа дьстиньн. У әм дькарьн һәвалтийа хԝә тʹәви Йаһоԝа ԛимәт нәкьн. Ӧса жи әм дькарьн ԛимәт нәкьн ԝе йәке кӧ мә ԛәдьрәки ӧса стандийә, ԝәки әм нава бьратийа һʹәмдьнйайеда ньн. Әм дькарьн тьштед ве дьнйайева бенә гьредане, кʹижан кӧ ԝе зутьрәке кʹӧта бьн (1 Йуһʹәнна 2:15-17). Сәва кӧ нәкʹәвьнә ԝе тʹәльке, мәрʹа лазьм ә кӧ бьфькьрьн дәрһәԛа кʹәрәмед хԝә жь Йаһоԝа, у тʹьме рʹази бьн сәва ԝи ԛәдьри кӧ әм нава щьмәʹта ԝида ньн. (Бьхунә Зәбур 27:4.)

ԜӘʹДЕ ЧӘТЬНАЙЕД ГЬРАН

9. Чахе әм рʹасти чәтьнайед гьран тен, чьрʹа гәрәке әм бьфькьрьн дәрһәԛа кʹәрәмед хԝә?

⁹ Чахе дьл тʹьжә йә бь рʹазибуне, әԝ йәк али мә дькә ԝәки әм чәтьнайада тәйах кьн. Әм дькарьн рʹӧһʹанида ԝи чахи бькʹәвьн, һәрге әм рʹасти дәрәщед ӧса бен кӧ ньшкева әʹмьре мә бе гӧһастьн. Мәсәлә, һәгәр мер йан жьна мә нәрʹастийе мәрʹа бькә, йан жи нәхԝәшийа гьран, мьрьна мәрьвед мәйә незик, йан жи тʹәшԛәлед дьнйайе. Ԝан дәрәщада әме ԛәԝи бьсәкьньн, һәрге әм дьшьрмиш бьн дәрһәԛа кʹәрәмед хԝә. Ԝәрә әм пебьһʹәсьн дәрһәԛа һьнә ԛәԝьмандьнед ӧса.

10. Ирина кӧ дьфькьри дәрһәԛа кʹәрәмед хԝә, чь кʹар сьтанд?

¹⁰ Ирина, пешәнга һәртʹьм жь Америкайа Башуре, жьна рʹуспи бу.a (Бьньһерʹә спартьн.) Мәре ԝе, нәһәԛи кьр һьндава жьн зарʹед хԝәда, у әԝана һишт ьн. Чь али Иринайе кьр, кӧ әԝ диса бь амьни Хԝәдерʹа ԛӧльх кә? Әԝ дьбежә: «Әз гәләк жь Йаһоԝа рʹази мә, ԝәки әԝ хут бона мьн хәм дькә. Чахе әз һәр рʹож дьфькьрьм у дьбиньм ԛәнщийед Йаһоԝа, әз фәʹм дькьм ԛәдрәки чьԛас мәзьн ә кӧ Баве әʹзмана бона мьн занә, мьн һʹьз дькә, у хԝәй дькә. Әз сәд сәләфи баԝәр ьм кӧ әԝ мьн тʹӧ щар наһелә». Рʹаст ә Ирина әʹмьре хԝәда рʹасти чәтьнайед гьран һат, ле әԝе шабуна хԝә ӧнда нәкьр у әԝ бь мәсәла хԝә хушк у бьрайед дьн ԛәԝи дькә.

11. Чь али Кйӧнг-сӧке кьр ԝәки әԝе бәр нәхԝәшийа гьран тәйах кьр?

¹¹ Кйӧнг-сӧк, жь Асйайе йә, әԝе тʹәви мере хԝә 20 сала зедәтьр ԛӧльх дькьр чаԝа пешәнге һәр тʹьм. Рʹаст ә әԝана рʹасти гәләк чәтьнайа һатьн, ле алийе сьһʹәт-ԛәԝатеда проблемед ԝан тʹӧнә бун. Ньшкева әԝ пеһʹәсийа ԝәки нәхԝәшийа ԝейә гьран һәйә, у әԝ ԝе тʹәне 3-6 мәһа бьжи. Әԝ дьбежә: «Чахе әз кӧла хԝә пеһʹәсийам, әз дьлтәнг бум, мьн тʹьре кӧ мьн һʹәму тьшт ӧнда кьр, у тьрс кʹәтә дьле мьн». Ле ве чәтьнайа гьранда, чь али Кйӧнг-сӧке кьр? Әԝ дьбежә: «Һәр шәв пешийа рʹазана хԝә әз һьлдькʹьшийамә сәр бане мала хԝә, у бь дәнге бьльнд дӧа дькьр бона ԝан пенщ тьшта кӧ әз ве рʹоже рʹази бум. Паше дьле мьн бь гӧман һеса дьбу, у әз һелан дьбум ԝәки һʹьзкьрьна хԝә Йаһоԝарʹа бьдьмә кʹьфше». Дӧайед ԝейи һәр шәв чь кʹар ԝерʹа анин? Әԝ дьбежә: «Мьн фәʹм кьр, кӧ ча Йаһоԝа тәнгасийада али мә дькә у ԝәки әʹмьре мәда дьһа зәʹф кʹәрәм һәнә нә кӧ тәнгаси».

12. Щейсон паши мьрьна жьна хԝә ча дьлбини станд?

¹² Щейсон, кӧ ԛӧльх дькә дь филиала Африкайеда, 30 сали зедәтьр ә кӧ ча ԛӧльхкʹаре һәртʹьм, ԛӧльх дькә. Әԝ гьли дькә: «Һʹәфт сал пешда мьн кʹӧлфәта хԝә ӧнда кьр, у әԝ йәк дәрдәки гәләк гьран бу бона мьн. Чахе дькʹәтә бира мьн кӧ әԝ ча дьчәрчьри жь бо нәхԝәшийа хԝәйә гьран, дьле мьн гәләк дьешийа». Ле чь али Щейсон кьр? Щейсон гьли дькә: «Мьн кьрә бира хԝә кӧ ԝәʹдәки чьԛас баш мьн тʹәви кʹӧлфәта хԝә дәрбаз кьрийә, у бона ԝе биранине мьн дӧайе хԝәда рʹазибуна хԝә да кʹьфше. Дьле мьн рʹьһʹәт бу, у паши ԝе йәке мьн дәстпекьр һәр гав рʹазибуна хԝә Йаһоԝарʹа әʹйан кьм, бона ԝан рʹожед хԝәш. Рʹазибуне ньһерʹандьна мьн ԛайим гӧһаст. Һʹәта иро еш дьле мьнда нә, ле рʹазибун бона зәԝаща баш у бона ԝи ԛәдьри кӧ әз тʹәви ԝан ԛӧльх дькьм, йед кӧ Йаһоԝа һʹьз дькьн, ньһерʹандьна мьн алийе башда гӧһаст».

13. Шерйил кӧ малбәта хԝә ӧнда кьр, чь али ԝе кьр кӧ әԝ нәбу йәкә зӧлм?

¹³ Чахе сала 2013-да дь Филипина Навәндда Тайфун (Фьртонә) рʹабу, Шерйил һәла һе 13 сали бу. Дькарьн бежьн кӧ әԝе һʹәму тьшт ӧнда кьр. Әԝ дьбежә: «Мьн мала хԝә у малбәта хԝә ӧнда кьр». Де-баве ԝе у ӧса жи хушк бьред ԝе жь фьртонә мьрьн. Ле чь али Шерйиле кьр кӧ әԝ дь ве тәʹли-тәнгасийеда нәбу йәкә зӧлм? «Мьн дьдит ча хушк бьред мә бәрдьли у дьлбини дьданә ԝан кʹерʹа кӧ лазьм бу. Мьн заньбу, ԝәки ль сәр тʹәмамийа дьнйайе бьратийа мә бона мьн дӧа дькьн». Әԝ зедә дькә: «Әз гәләк рʹази мә кӧ Йаһоԝа Хԝәдайе мьн ә. Әԝ тʹьме дьдә мә ве йәке чь кӧ мәрʹа лазьм ә». Чахе әм кʹәрәмед хԝә бир накьн, әԝ йәк дьбә дәрман бона дәрде мә. Һәрге әм рʹасти тәнгаси у чәтьнайа бен жи, дьле бь рʹазибун ԝе али мә бькә ԝәки әм нәкʹәвьн у пешда һәрʹьн. (Әфәси 5:20; Бьхунә Филипи 4:6, 7.)

«ЛЕ ӘЗЕ ДИСА БЬ ХӦДАНВА КʹЕФХԜӘШ [ША] БЬБЬМ»

14. Чь ахьрийа баш һивийа мә йә? (Бьньһерʹә шькьле әʹԝльн.)

¹⁴ Нава тʹәрихийеда, щьмәʹта Йаһоԝа жь бо кʹәрәмед хԝә жь ԝи рʹази бунә. Мәсәлә, чахе Исраели жь Фьрәԝьн у ордийа ԝи хьлаз бун у Бәʹра Соррʹа дәрбаз бун, ԝана шабуна хԝә да кʹьфше бь кʹьламед шькьрдайине у рʹазибуне (Дәркʹәтьн 15:1-21). Рʹожа иройин бона мә кʹәрәмәкә мәзьн әԝ ә, ԝәки гӧмана мә һәйә, кӧ ида ԝе тʹӧнә бьн әԝ мәʹни жь бо чь әм дькʹәвьнә тәʹли-тәнгасийа (Зәбур 37:9-11; Ишайа 25:8; 33:24). Бьдә һʹәсабе хԝә әме чь тʹәхмин кьн, чахе Йаһоԝа дьжмьне хԝә ԛьрʹ кә у мә тʹәглифи дьнйа тʹәзә кә, кʹижан кӧ бь һәԛи у әʹдьлайе бә. Әԝ рʹож ԝе чь рʹожәкә рʹазибуне бә! (Әʹйанти 20:1-3; 21:3, 4)

15. Тә чь сафи кьрийә кӧ нава сала 2015-да бьки?

¹⁵ Әм һивийе нә кӧ нава сала 2015-да, әме жь Йаһоԝа кʹәрәмед рʹӧһʹанийә бь һʹәԝас бьстиньн. Һьлбәт, әме рʹасти щурʹә-щурʹә щерʹьбандьна жи бен. Чь жи бьԛәԝьмә, әм сәд сәләфи заньн кӧ Йаһоԝа ԝе тʹӧ щар мә нәһелә (Ԛануна Дӧщари 31:8; Зәбур 9:9, 10). Әԝе бәрдәԝан кә диса ве йәке бьдә мә, чь кӧ мәрʹа лазьм ә ԝәки бь амьни ԛӧльх кьн. Ләма дьбәк әм жи ньһерʹандьна ӧса хԝәй дькьн чаԝа кӧ бал Һәбаԛуԛ һәбу, кʹижан кӧ гот: «Жь бәр кӧ дара һежире чʹичʹәк нәдә у шьтьлан феки тʹӧнәбә жи у кʹәда зәйтʹуне бь әʹрдеда вала дәркʹәвә у әʹрд хԝарьне нәдьн жи; гәр һәвшен пәз вала бьбьн у дь ахӧранда га нәмабьн жи. Әзе . . . бь Хԝәдайе хԝәйи хьлазкʹарва бьщош у кʹефхԝәш [ша] бьбьм» (Һәбаԛуԛ 3:17, 18). Нава ве саледа әм дькарьн бьдьнә кʹьфше шабуна хԝә бона кʹәрәмед хԝә у пәй рʹеза сала 2015-да һәрʹьн: «Жь Йаһоԝа рʹази бьн, чьмки әԝ ԛәнщ ә» (Зәбур 106:1, ДТʹ).