Чьрʹа Әм Евара Биранина Мьрьна Иса Дәрбаз дькьн

1, 2. Иса чь кьр 14 Нисане, 33 Д.М.? (Бьньһерʹә шькьле әʹԝльн.)

ТӘʹРИ кʹәтә әʹрде, ле жь һива тʹәзә рʹонайи кʹәтә Оршәлиме. Евара 14 Нисане 33 Д.М.. Иса у шагьртед ԝи Щәжьна Дәрбазбуне дәрбаз кьрьн, әԝе биранине дьани бира щьмәʹте хьлазбуна щьмәʹта Исраеле, жь дилтийа дь Мьсьреда, 15 ԛьрʹнә пешда. Иса тʹәви 11 шагьртед хԝәйә амьн, һʹимли дькә шива мәхсус сәва биранина мьрьна хԝә, у хьлазийа ве рʹоже щәфе ве мьрьне гәрәке бькʹьшинә (Мәтта 26:1, 2).

² Иса дӧа кьр у нане шкәва да шагьртед хԝә у гот: «Һан һьлдьн бьхԝьн». Паше әԝ кʹаса шәраве һьлдьдә, диса дӧа дькә, у дьбежә: «Һун һʹәму жи жь ве вәхԝьн» (Мәтта 26:26, 27). Ле әԝи хԝарьна дьне дәрбаз нәкьр, ве евара мәхсус гәләк тьшт һәбу ԝәки шагьртед хԝәйи амьнрʹа бьгота.

3. Дь ве тʹемайеда дәрһәԛа кʹижан пьрса әме шеԝьр кьн?

³ Иса дьхԝаст ԝәки шагьртед ԝи һәр сал мьрьна ԝи биньнә бира хԝә. Әԝ ԛәԝьмандьн паше һатә навкьрьне ча «Шива Хӧдан» йан жи Биранин (1 Корьнтʹи 11:20). Ле пьрс пешда тен: «Чьрʹа гәрәке әм Биранина мьрьна Иса дәрбаз кьн? Чь те һʹәсабе нан у шәрав? Ча әм дькарьн хԝә һазьр кьн бона ве Биранине? Әԝ симбол нан у шәрав кʹерʹа дькʹәвә? У ча Мәсиһи дьньһерʹьн ль сәр гӧмана хԝә жь Кʹьтеба Пироз?»

ЧЬРʹА ӘМ БИРАНИНА МЬРЬНА ИСА ДӘРБАЗ ДЬКЬН

4. Чь һатә стандьне бь сайа мьрьна Иса?

⁴ Чаԝа ньсьла Адәм, мә гӧнә у мьрьн сьтанд (Рʹомайи 5:12). Мәрьве гӧнәкʹар нькарә кʹьрʹине бьдә бона хԝә у мәрьвед майин (Зәбур 49:6-9). Тʹәне Иса карьбу у һәԛе кʹьрʹине да, демәк бь бәдәна хԝәйә ԛәданди у хунрʹетьне. Иса кӧ бәр Хԝәде һәԛе кʹьрʹине да, бь ԝе йәке әм дькарьн жь гӧнә у мьрьне хьлаз бьн у ӧса жи бьстиньн пʹешкʹеша әʹмьре һʹәта-һʹәтайе (Рʹомайи 6:23; 1 Корьнтʹи 15:21, 22).

5. а) Әм жь кʹӧ заньн кӧ Йаһоԝа у Иса мәрийа һʹьз дькьн? б) Чьрʹа әм гәрәке бен ль сәр рʹожа Биранина Мьрьна Иса?

⁵ Әв кʹьрʹин дьдә кʹьфше ԝәки Хԝәде мәрийа һʹьз дькә (Йуһʹәнна 3:16). Ԛӧрбанбуна Иса избат дькә, кӧ әԝ жи мә һʹьз дькә. Пешийа һатьна ль сәр әʹрде әԝ бал Хԝәде «һостә» бу, у әԝи дьгот: «Мьровен ԝи кʹефхԝәшийа мьн бун» (Мәтʹәлок 8:30, 31). Рʹазибуна мә һьндава Хԝәде у Кӧрʹе ԝи гәрәке мә һелан кә кӧ бен ль сәр Евара биранина мьрьна Иса, у пе ве йәке әме тʹәмийа ԝи бьԛәдиньн: «Ве йәке бона биранина мьн бькьн» (1 Корьнтʹи 11:23-25).

ЧЬ ТЕНӘ ҺʹӘСАБЕ СИМБОЛ

6. Әм чь фәʹм дькьн дәрһәԛа нан у шәраве?

⁶ Һьнә дер дьбежьн, кӧ Иса перʹа-перʹа гот: «Әва бәдәна мьн ә» у «Әва хуна мьн ә», у баԝәр дькьн кӧ рʹасти нан бу бәдәна ԝи у шәрав жи бу хуна ԝи. Ле бь рʹастийе әв йәк мьԛабьли факта дьчә. Чьмки Иса бь бәдәна хԝә у хуна хԝә бәр чʹәʹве шагьрта бу, ӧса жи нан у шәрав бәр чʹәʹве ван бу. Демәк фәʹмдари йә кӧ Иса чаԝа гәләк щар ӧса жи ньһаһьнге бь симболик хәбәрдьда (Йуһʹәнна 2:19-21; 4:13, 14; 10:7; 15:1).

7. Чь те һʹәсабе нане шкәва?

⁷ Ль сәр ве евара фәрз, Иса нане шкәва да хәбате, кʹижан кӧ мабу жь шива Щәжьна Дәрбазбуне (Дәркʹәтьн 12:8). Дь Кʹьтеба Пирозда һәвиртьрʹшк щар щара те һʹәсабе нә тʹәмьз йан бь гӧнә (Мәтта 16:6, 11, 12; Луԛа 12:1). Ләма жи Иса да хәбате нане шкәва, чьмки әԝи перʹа-перʹа дьда кʹьфше бәдәна хԝәйә бе гӧнә (Ибрани 7:26). Ләма жи Рʹожа Биранине нане ԝи щурʹәйи те хәбате.

8. Чь те һʹәсабе шәрав?

⁸ Шәрав кӧ Иса да хәбате 14 Нисане, дьһатә һʹәсабе хуна Иса, у ль сәр Рʹожа Биранине жи дьдьнә хәбате. Ль сәр чʹийайе Голготайе, кʹижан пьшт Оршәлиме бу, Иса мьр у хуна ԝи «бона бахшандьна гӧнед гәләка» һатә рʹетьне (Мәтта 26:28; 27:33). Һәрге әм әве пʹешкʹеша ԛимәт дьшекьриньн, әме һәр сал һазьр бьн бона ве рʹожа мәхсус. Ле ча әм дькарьн хԝә һазьр кьн?

ЧАԜА ХԜӘ ҺАЗЬР КЬН

9. а) Чьрʹа фәрз ә ԝәки бьхуньн бәрнама хԝәндьна Кʹьтеба Пироз йа бона Биранине? б) Тӧ ча дьньһерʹи ль сәр кʹьрʹине?

⁹ Һәрге әм бьхуньн бәрнама хԝәндьна Кʹьтеба Пироз йа бона Биранине, кʹижан кӧ дь ве кʹьтебеда нә «Һәр Рʹож Ньвисаред Пироз Леколин бькьн». Бь ве йәке әме бькарьбьн бьфькьрьн ль сәр кьред Иса йе, кӧ әԝи пешийа мьрьна хԝә кьр. Ӧса әме хԝә һазьр кьн бона Рʹожа Биранине.a (Бьньһерʹә спартьн.) «Әм гәләк һивийа Рʹожа Биранине нә», хушкәке ньвиси. «Әԝ рʹож һәр сал һе фәрз у мәхсус дьбә бона мә. Те бира мьн чахе баве мьн чʹәʹл дькьрьн әз ԝе дәре сәкьни бум . . . , бал мьн һе зедә бу һәста рʹазибуне бона кʹьрʹине . . . Мьн заньбу һʹәму рʹезед жь Кʹьтеба Пироз у заньбу чаԝа шьровәкьм! Ле чахе мьн тʹәхмин кьр әԝ дәрде мьрьне, дьле мьн бь рʹазибуне тʹьжә бу сәва кӧ ԝе чь бьбә бь сайа кʹьрʹине». Бәле, дьшьрмишбуна дәрһәԛа кʹара мә жь ԛӧрбанбуна Иса, әԝа тьштәки фәрз ә бона һазьрбуна Рʹожа Биранине.

10. Диса ча әм дькарьн хԝә һазьр кьн бона Рʹожа Биранине?

¹⁰ Дькарә бькʹәвә нава һазьрбуна бона рʹожа биранине ӧса жи һе зедә ԛӧльхкьрьн, мәсәлә ԛӧльх кьн ча пешәнге кʹомәкдар ԝәʹде незикайа Рʹожа Биранине. Чахе әм хәбәрдьдьн тʹәви мәрийа дәрһәԛа Хԝәде у Кӧрʹе ԝи, у дәрһәԛа гӧмана жийина һʹәта-һʹәтайе, әм дьлрʹьһʹәтийе тʹәхмин дькьн, чьмки әм әԝе йәке дькьн, чь кӧ Хԝәде жь мә дьхԝазә (Зәбур 148:12, 13).

11. Ча һьнә Мәсиһийа симбол нә бь лайиԛи данә хәбате?

¹¹ Чахе тӧ хԝә һазьр дьки бона Рʹожа Биранине, бьфькьрә сәр ԝан гьлийед Паԝлосе шанди, кʹижан кӧ әԝи ньвиси бона щьвата Мәсиһийа дь Корьнтʹийеда. (Бьхунә 1 Корьнтʹи 11:27-34.) Паԝлос кʹьфш кьр, ԝәки кʹи бь нәлайиԛи у нә бь ԛәдьр нане Хӧдан бьхԝә йан кʹаса ԝи вәхԝә, «ԝе дәйндаре бәдән у хуна ԝи бә». Демәк, һәрге йе рʹункьри хԝә нәрʹаст дьдә кʹьфше у йәкә симбола дьдә хәбате, ԝи чахи әԝ «диԝана хԝә дьхԝә у вәдьхԝә». Ԝәʹде Паԝлос гәләк жь корьнтʹийа хԝә нәрʹаст дьданә кʹьфше. Һьнәк жь ԝан гәләк дьхԝарьн у вәдьхԝәрьн пешйа йан ԝәʹде Евара Биранине. Жь бо ԝе йәке әԝана хәԝрʹа дьчун. Ԝана бь ве йәке беԛәдьрйа мәзьн дьданә кʹьфше һьндава ԝе евара мәхсус. Ләма жи чахе йе ӧса жь симбола дьхԝарьн у вәдьхԝарьн, Хԝәде ԛәбул нәдькьр.

12. а) Паԝлос Биранин тʹәви чь бәрамбәр кьр, у әԝи пешда чь готә ԝан, йед кӧ әԝ рʹож дәрбаз дькьрьн? б) Кʹи кӧ гӧне мәзьн кьрийә, чь гәрәке бькә?

¹² Паԝлос Биранин бәрамбәр кьр тʹәви нанхԝарьне, у әԝи пешда готә ԝан, кʹи кӧ ԝе дәре бун: «Һун нькарьн һьн кʹаса Хӧдан вәхԝьн, һьн жи кʹаса щьна. Һун нькарьн һьн жь сьфра Хӧдан бьхԝьн, һьн жи жь сьфра щьна» (1 Корьнтʹи 10:16-21). Һәрге йәк жь ԝан йед кӧ жь симбола дьхԝьн, гӧнәки гьран бькә, әԝ гәрәке һәрʹә щәм рʹуспийа у аликʹарийе бьхԝазә. (Бьхунә Аԛуб 5:14-16.) Һәрге әԝ рʹункьри жь гӧнәкьрьне вәнагәрʹә, у дьдә хәбате әԝан симбола, әԝ надә кʹьфше ԛәдьр һьндава ԛӧрбанбуна Иса (Луԛа 3:8).

13. Чьрʹа әм гәрәке дӧа бькьн дәрһәԛа гӧмана хԝә жь Хԝәде?

¹³ Әм ӧса жи дькарьн бона ве рʹоже хԝә һазьр кьн, бь дӧакьрьне у бь дьшьрмишбуна сәр гӧмана хԝә жь Хԝәде. Тʹӧ кәс жь мә нәхԝазә ԝәки беԛәдьрийе нишан кә һьндава ԛӧрбанбуна Иса. Демәк әме нәдьн хәбате симбола, һәрге әм сәд сәләфи баԝәр ниньн кӧ әм рʹункьри нә. Ле гәло кʹе гәрәке әԝан симбола бьдә хәбате?

ӘԜ СИМБОЛ КʹЕРʹА ДЬКʹӘВЬН?

14. Чаԝа пәймана ну гьредайи йә тʹәви ԝан кʹижанарʹа симбол дькʹәвьн?

¹⁴ Кʹижанарʹа кӧ симбол дькʹәвьн, сәд сәләфи баԝәр ьн, кӧ әԝана тʹәви пәймана ну дьбьн. Дәрһәԛа шәраве Иса гот: «Әва кʹаса пәймана ну йә, пе хуна мьн гьредайи» (1 Корьнтʹи 11:25). Бь Йерәмйа пʹехәмбәр, Йаһоԝа пʹехәмбәрти кьр кӧ Әԝ дьхԝазә пәймана ну гьредә, кʹижан кӧ щӧда дьбу жь пәймана Ԛануне йа кӧ тʹәви Исраелийа гьредабу. (Бьхунә Йерәмйа 31:31-34.) Хԝәде пәймана ну гьреда тʹәви Исраела рʹӧһʹани (Галати 6:15, 16). Әԝ пәйман кʹәтә ԛәԝате бь сайа хунрʹетьна Иса (Луԛа 22:20). Иса навчетийе демәк ортʹәчийе пәймана ну йә, у йед рʹункьри жи дькʹәвьнә нава ве пәймане, ԝәки ԝаре әʹзмана бьстиньн (Ибрани 8:6; 9:15).

15. Кʹе дькʹәвә нава пәймана Пʹадшатийе, у һәрге әԝана амьн бьминьн чь ԛәдьр һивийа ԝан ә?

¹⁵ Әԝед кӧ симбол ԝанрʹа дькʹәвьн, заньн кӧ ԝе бькʹәвьнә нава пәймана Пʹадшатийе. (Бьхунә Луԛа 12:32.) Әԝ пәйман һатийә гьредан орʹта Иса у рʹункьрийед ԝийә амьнда, кʹижан кӧ һәвалпʹаре «щәфайед ԝи» нә (Филипи 3:10). Жь бо ве йәке кӧ әԝана дь пәймана Пʹадшатийеда ньн, әԝ рʹункьрийед амьн ча пʹадшед әʹзмана ԝе тʹәви Иса һʹәта-һʹәтайе пʹадшатийе бькьн (Әʹйанти 22:5). Тʹәне ԝәʹде Биранине изьна ԝан һәйә кӧ симбола бьхԝьн у вәхԝьн.

16. Кьн шьровәкә чь тенә һʹәсабе рʹезед жь Рʹомайи 8:15-17.

¹⁶ Тʹәне әԝана, кʹижанарʹа кӧ рʹӧһʹ шәʹдәтийе дьдә, ԝәки әԝана зарʹед Хԝәде нә, гәрәке жь симбола бьхԝьн у вәхԝьн. (Бьхунә Рʹомайи 8:15-17.) Паԝлос гот кӧ ԝана ӧса дькьрә гази: «Абба, Баво!» «Абба» хәбәра Арамайи йә. Әԝ һьн те һʹәсабе бь нәрми «папа» һьн жи бь ԛәдьр «баво». Бь ве хәбәре те кʹьфше кӧ чь һәләԛәти һәйә ортʹа Йаһоԝа у әԝед кӧ рʹӧһʹ стандьнә у тенә һʹәсабе зарʹед Хԝәде. Рʹӧһʹе Хԝәде ԝанрʹа шәʹдәтийе дьдә, у ләма әԝана сәд сәләфи заньн кӧ зарʹед Йаһоԝайи рʹункьри нә. Әԝ найе һʹәсабе кӧ һʹәԝаса ԝана тʹӧнә кӧ ль сәр әʹрде бьжин. Ԝана жь Йаһоԝа «рʹӧһʹ пʹешкʹеш стандийә» у әԝана сәд сәләфи баԝәр ьн кӧ ԝе тʹәви Иса бьн дь Пʹадшатийа әʹзманада, һәрге һʹәта мьрьне амьн бьминьн. Рʹожа иройин жь 144 000 мәсиһийед рʹункьри, демәк зарʹед Хԝәде, һьнәк сәр әʹрде манә (1 Йуһʹәнна 2:20; Әʹйанти 14:1). Әԝана хԝә ӧса незики Хԝәде тʹәхмин дькьн, кӧ дькарьн бь рʹастийе жи бежьн «Абба, Баво!»

ГӦМАНЕД ЛЬ СӘР ҺʹИМЕ КʹЬТЕБА ПИРОЗ

17. Чь гӧман һәйә бал рʹункьрийа, у әԝана кʹӧрʹа заньн кӧ рʹункьри нә?

¹⁷ Һәрге тӧ Мәсиһийе рʹункьри йи, демәк тӧ дәрһәԛа гӧмана хԝәйә әʹзмана тʹьме дӧа дьки. Һьн жи һьнә тьштед кӧ дь Кʹьтеба Пирозда ньвисар ьн, бона тә һе мәхсус ьн. Мәсәлә, чахе Кʹьтеба Пироз дьбежә дәрһәԛа нишанкьрьна тʹәви Зәʹве әʹзмана демәк Иса Мәсиһ, тӧ әԝе йәке һьлдьди сәр хԝә, у тӧ һивийе йи кӧ бьби пʹарәк жь «бука» Мәсиһ (Йуһʹәнна 3:27-29; 2 Корьнтʹи 11:2; Әʹйанти 21:2, 9-14). Чахе Хԝәде дь Хәбәра хԝәда кʹьфш дькә һʹьзкьрьна хԝә һьндава зарʹед хԝәйә рʹӧһʹани, тӧ фәʹм дьки кӧ әва бона тә һатийә готьне. У чахе Йаһоԝа дь Хәбәра хԝәда ширәта дьдә рʹункьрийе хԝә, рʹӧһʹе пироз тә һелан дькә ԝәки гӧһ бьди ԝан ширәта. Рʹӧһʹе Хԝәде шәʹдәтийе дьдә тә, кӧ бал тә һәйә гӧмана әʹзмана.

18. Чь гӧмана «пәзед дьн» һәйә, у тӧ чь тʹәхмин дьки дәрһәԛа ԝе йәке?

¹⁸ Һәрге тӧ пʹарәкә жь «әʹлаләтәкә мәзьн» и, демәк жь «пәзед . . . дьн», Хԝәде гӧмана жийина ль сәр әʹрде дайә тә (Әʹйанти 7:9; Йуһʹәнна 10:16). У хԝәстьна тә һәйә кӧ бьжи йи дь щьнәтеда һʹәта-һʹәтайе, ләма жи тӧ шабуне дьстини чахе дьфькьри дәрһәԛа созед жь Кʹьтеба Пироз бона жийина ль сәр әʹрде. Тӧ гәләк һивийе йи кӧ нава малбәта хԝә у мәрийед рʹастда дь әʹдьлайеда би. Тӧ ӧса жи һивийа ԝи ԝәʹдә йи, чахе кемасийа хԝарьне, кʹәсивбун, кӧл-дәрд, нәхԝәши, у мьрьн ида ԝе мәрийа нәчәрчьриньн (Зәбур 37:10, 11, 29; 67:6; 72:7, 16; Ишайа 33:24). Тӧ ӧса жи дьхԝази ԝәки бьбини ԝан мәрийа, йе кӧ ԝе жь мьрьне рʹабьн у гӧмана ԝан ԝе һәбә бьжин ль сәр әʹрде һʹәта-һʹәтайе (Йуһʹәнна 5:28, 29). Тӧ чьԛас рʹази йи жь Йаһоԝа ԝәки әԝи тӧ кʹәрәм кьри бь гӧмана ль сәр әʹрде! Рʹаст ә тӧ симбола нахԝи, ле тӧ тейи ль сәр Биранине, ԝәки нишан ки рʹазибуна хԝә һьндава ԛӧрбанбуна Иса Мәсиһ.

ТӦЙЕ БЕЙИ?

19, 20. а) Чьчах гӧмана тә жь Хԝәде дькарә реали бә? б) Чьрʹа тӧ дьхԝази бейи ль сәр Евара Биранине?

¹⁹ Фьрԛи тʹӧнә гӧмана тә йа әʹзмана йә йан йа әʹрде, әв гӧман дькарә реали бә тʹәне ԝи чахи, һәрге әм баԝәрийа хԝә һьндава Йаһоԝа Хԝәде, Иса Мәсиһ, у кʹьрʹине нишан дькьн. Чахе тӧ бейи ль сәр Биранине, ԝе мәщала тә һәбә, ԝәки бьфькьри ль сәр гӧмана хԝә, у ль сәр фәрзбуна мьрьна Иса. Нете бьдә пешийа хԝә, ԝәки тӧ жи йәк жь милйона мәрьва би, йед кӧ ԝе бенә ль сәр Евара Биранине. Әԝ ԝе дәрбаз бә дь Одед Щьватеда йан жи дь щийед майин ль сәр тʹәмамийа дьнйайе, сала 2015, 3 Нисане рʹожа Инийе, паши рʹо чуйина ава.

²⁰ Һатьна ль сәр Биранине дькарә рʹазибуна тә һе кʹур бькә һьндава ԛӧрбанбуна Иса. Чахе тӧ рʹьнд гӧһ бьди тʹемайе, әв йәк ԝе тә һелан кә, кӧ һʹьзкьрьна хԝә һьндава мәрьва нишан ки бь ԝе йәке, кӧ гьли ки чь тӧ пеһʹәсийайи дәрһәԛа һʹьзкьрьна Йаһоԝа у ԛьрара ԝийә мәзьн бона инсанәте (Мәтта 22:34-40). Әʹсәйи ԝәрә ль сәр Евара Биранина Мьрьна Иса.