Әм Чь Дькарьн Һин бьн жь Мәтʹәлока Дәрһәԛа Тәланта?
«Пенщ тәлант данә йәки, дӧ тәлант данә йәки у тәлантәк жи да йәки» (МӘТТА 25:15).
1, 2. Чьрʹа Иса гьли кьр мәтʹәлока дәрһәԛа тәланта?
ИСА мәтʹәлока дәрһәԛа тәланта гот, ԝәки рʹункьрийе хԝәрʹа әʹйан кә, кӧ щабдарийа ԝана чь йә. Ле әԝ мәтʹәлок сәр һʹәму шагьртед ԝи һʹӧкӧм дьбә. Демәк, фьрԛи тʹӧнә гӧмана мә йа әʹзмана йә йан йа әʹрде йә, мәрʹа лазьм ә фәʹм бькьн кӧ әв мәтʹәлок чь те һʹәсабе.
2 Ле Иса кʹәнге әв мәтʹәлок гьли кьр? Әԝ һьнге бу, чахе әԝи шагьртед хԝәрʹа гьли кьр дәрһәԛа ԝе нишане, кʹижан кӧ гәрәке кʹьфш кьра ԝәки Иса бу Пʹадша у рʹожед ахьрийе дәстпебу (Мәтта 24:3). Демәк әԝ мәтʹәлок һәйә пʹара жь ве нишане у әв гәрәке ԝәʹде мәда бе сери.
3. Әм чь һин дьбьн жь ԝан мәтʹәлока, кʹижан кӧ ньвисар ьн дь Мәтта сәре 24 у 25-да?
3 Чахе Иса гьли кьр мәтʹәлока дәрһәԛа тәланта, әԝи се мәтʹәлокед дьн жи гьли кьр, у әԝ мәтʹәлок жи пʹарәкә нишана рʹожед ахьрийе йә. Әԝ һʹәму мәтʹәлок кʹьфш дькьн һʹӧнӧред мәхсус, йе кӧ щәм рʹункьрийа гәрәке һәбуйа. Әм дькарьн әԝан мәтʹәлока бьхуньн дь Мәтта 24:45 һʹәта 25:46-да. Мәтʹәлока пешийе дәрһәԛа хӧламе амьн ә, демәк кʹомәкә бьчʹукә рʹункьрийа, йед кӧ щабдар ьн ԝәки щьмәʹта Йаһоԝа һин кьн. Әԝана гәрәке амьн у сәрԝахт бьн.a (Бьньһерʹә спартьн.) Мәтʹәлока дӧда әԝ һәйә дәрһәԛа дәһ ԛизед бькʹьр. Дь ве мәтʹәлокеда Иса пешда ширәт да рʹункьрийарʹа, кӧ әԝана гәрәке һазьр бьн у һʹьшйар бьминьн, чьмки әԝана ньзаньн нә рʹож нә жи сьһʹәта һатьна ԝи.b (Бьньһерʹә спартьн.) Мәтʹәлока сьсйа дәрһәԛа тәланта йә, у һʹәму рʹункьрийа һин дькә кӧ ԝанрʹа лазьмә гәләк гьран бьхәбьтьн ԝәки щабдарийа хԝә бәрдәԝан кьн бьԛәдиньн. Паше Иса гьли кьр мәтʹәлока дәрһәԛа пез у бьзьна, әв мәтʹәлок дәрһәԛа ԝан мәрийа йә, кʹижана кӧ гӧман ьн бьжин сәр әʹрде. Әԝи кʹьфш кьр кӧ әԝана гәрәке амьн бьн у һʹәму тьшти бькьн чь кӧ дькарьн, сәва кӧ али рʹункьрийа бькьн.c (Бьньһерʹә спартьн.) Дь ве тʹемайеда әме пебьһʹәсьн, мәтʹәлока дәрһәԛа тәланта чь те һʹәсабе.
АХА ГӘЛӘК ПʹӘРӘ ДЬДӘ ХӦЛАМЕД ХԜӘ
4, 5. Әԝ мере дь мәтʹәлокеда кʹе те һʹәсабе у чь те һʹәсабе дәһ тәлант?
4 Бьхунә Мәтта 25:14-30. Дь мәтʹәлока дәрһәԛа тәлантада Иса гьли кьр дәрһәԛа мерәки йе кӧ дәркʹәтә рʹеԝитийе. Щарәкә дьн Иса дь мәтʹәлокәкә дьнда жи гьли кьр дәрһәԛа мерәки йе кӧ дәркʹәтә рʹеԝитийе ԝәки бьбә пʹадша.d (Бьньһерʹә спартьн.) (Луԛа 19:12) Нава гәләк салада дь әʹдәбйәтед мәда дьһатә готьне, кӧ әԝ һәр дӧ мер тенә һʹәсабе Иса, йе кӧ сала 33 чу ль әʹзмана. Ле чахе Иса чу ль әʹзмана әԝ перʹа-перʹа нәбу пʹадша. Әԝ һивийе бу һʹәта сала 1914, ԝәки дьжмьнед ԝи «бьн пʹийед ԝида бенә данине» (Ибрани 10:12, 13).
5 Иса гот ԝәки һʹәйшт тәлантед ԝи мерьки һәбун. Әԝ гәләк пʹәрә бу.e (Бьньһерʹә спартьн.) Пешийа кӧ әԝ мер рʹекʹәта, әԝи әԝ пʹәрә да хӧламед хԝә. Әԝи гот ԝәки әԝана ԝирʹа жь ԝан пʹәра һе зедә пʹәра чекьн. Чаԝа кӧ әԝ пʹәрә гәләк ԛимәт бун бона ԝи мерьки, диса ӧса тьштәк һәбу кӧ гәләк ԛимәт бу бона Иса. Гәло әԝ чь бу? Әԝ һәбу әԝ шьхӧле кӧ әԝи ль сәр әʹрде кьрьбу.
«Чʹәʹвед хԝә вәкьн у дина хԝә бьдьнә зәвийа, әԝ чаԝа зәр бунә, дьрутьнерʹа һазьр ьн!»
6, 7. Тәлант бь симболик чь тенә һʹәсабе?
6 Шьхӧле даннасинкьрьне гәләк фәрз бу бона Иса. Бь сайа даннасинкьрьна ԝи гәләк мәри бунә шагьртед ԝи. (Бьхунә Луԛа 4:43.) Ле әԝи заньбу ԝәки һе зедә шьхӧл гәрәке бе кьрьне у һе зедә мәри гәрәке мьзгинийа хере ԛәбул кьн. Ләма әԝи готә шагьртед хԝә: «Чʹәʹвед хԝә вәкьн у дина хԝә бьдьнә зәвийа, әԝ чаԝа зәр бунә, дьрутьнерʹа һазьр ьн!» (Йуһʹәнна 4:35-38) Хԝәйе зәвийе тʹӧ щар зәвийа хԝә наһелә чахе гәньм ида гьһиштийә. Ньһерʹандьна Иса жи ӧса бу. Иса чахе кӧ вәгәрʹийа сәр әʹзмана перʹа-перʹа фәрман да шагьртед хԝә: «Һәрʹьн у һʹәму мьләта бькьн шагьртед мьн» (Мәтта 28:18-20, ИМ). Бь ве йәке Иса Мәсиһ һәбунәкә ԛимәт да ԝан, демәк щабдарийа фәрз бона даннасинкьрьне (2 Корьнтʹи 4:7).
7 Чаԝа кӧ аха пʹәрә да хӧламед хԝә, ӧса жи Иса шьхӧле даннасинкьрьне дайә шагьртед хԝә (Мәтта 25:15). Демәк, тәлант тенә һʹәсабе шьхӧле даннасинкьрьне у һазьркьрьна шагьрта.
8. Рʹаст ә һәр хӧламәки пʹәрә ԝәкә һәв нәстандьн, ле аха жь ԝана һивийа чь бу?
8 Иса гот ԝәки аха пенщ тәлант да хӧламе пешьн, дӧ тәлант да йе дӧда, у тәлантәк да йе сьсийа (Мәтта 25:15). Аха хӧламарʹа тәлант ԝәкә һәв нәда, ле әԝ һивийе бу кӧ чьԛас ԛәԝата ԝан дьгьһиже бьхәбьтьн сәва кӧ һе зедә пʹәра ԝирʹа чекьн. Ӧса жи Иса жь рʹункьрийа һивийе йә кӧ чьԛас ԛәԝата ԝан дьгьһиже бьхәбьтьн сәва шьхӧле даннасинкьрьне (Мәтта 22:37; Колоси 3:23). Пенщийә Һʹәсаб сала 33-да, шагьртед Иса дәстпекьрьн һазьр кьн шагьрта жь һʹәму мьләта. Чахе әм дьхуньн кʹьтеба Кʹаред Шандийа, әм дьвиньн кӧ әԝана бь рʹастийе жи гәләк дьхәбьтин бона даннасинкьрьне.f (Бьньһерʹә спартьн.) (Кʹаред Шандийа 6:7; 12:24; 19:20)
ХӦЛАМ ТӘЛАНТА ДЬДЬНӘ ХӘБАТЕ ԜӘʹДЕ РʹОЖЕД АХЬРИЙЕ
9. а) Дӧ хӧлам пʹәрә ча данә хәбате у әм жь ве йәке чь һин дьбьн? б) Әԝед кӧ гӧмана ԝан жийина сәр әʹрде йә чь гәрәке бькьн?
9 Дӧ хӧламед пешьн йед кӧ пʹәре ахайе хԝә рʹьнд данә хәбате, бь симболик тенә һʹәсабе хушк бьред рʹункьри ԝәʹде рʹожед ахьрийе. Илаһи жь сала 1919 әԝана чьԛас ԛәԝата ԝан дьгьһиже дьхәбьтьн сәва шьхӧле даннасинкьрьне. Дь мәтʹәлокеда һатә готьне ԝәки ԝана пʹәрә нә ԝәкә һәв стандьн, ле әԝ найе һʹәсабе кӧ дӧ щурʹә кʹомед рʹункьрийа һәнә. Һәр дӧ хӧлам гәләк хәбьтин у пʹәрә дӧщар кьрьн. Ле әԝ йәк те һʹәсабе кӧ тʹәне рʹункьри гәрәке бьхәбьтьн бона шьхӧле даннасинкьрьне у һинкьрьне? На. Мәтʹәлока Иса дәрһәԛа пез у бьзьна мә һин дькә, кӧ әԝед гӧмана ԝан жийина сәр әʹрде йә гәрәке али рʹункьрийа бькьн шьхӧле даннасинкьрьнеда у һьндава ԝана амьн бьн. Әԝана һʹәсаб дькьн кӧ али рʹункьрийа бькьн, әԝ ԛәдьрәки мәзьн ә. Бәле, щьмәʹта Йаһоԝа «кәрик» ә, у әԝана гәләк гьран дьхәбьтьн ԝәки даннасин кьн у шагьрта һазьр кьн (Йуһʹәнна 10:16).
10. Кʹижан пʹарәкә жь нишана Иса избат дькә ԝәки әм дьжин дь рʹожед ахьрийеда?
10 Иса һивийе йә ԝәки һʹәму пәйчуйед ԝи гәләки бьхәбьтьн, сәва кӧ гәләк шагьрта һазьр кьн. Шагьртед ԝи дь ԛьрʹна йәкеда һәма ӧса жи дькьрьн. Дь ԝан рʹожед ахьрийеда, мәтʹәлока Исайә дәрһәԛа тәланта те сери. Ле гәло пәйчуйед ԝи әԝи шьхӧли дькьн? Бәле, тʹӧ щар һаԛас гәләк мәрьва нәбьһистийә мьзгинийа хере у нәбунә шагьрт! Жь бо ве йәке кӧ пәйчуйед Иса гәләк дьхәбьтьн, һәр сал бь сәда һʹәзар мәрьв тенә ньхӧмандьне. У әԝана жи тʹәви шьхӧле даннасинкьрьне дьбьн. Әԝ һʹәму шьхӧл у пешдачуйин әʹйан нишан дькә, кӧ шьхӧле даннасинкьрьне әԝ һәйә пʹарәкә жь нишана Иса дәрһәԛа рʹожед ахьрийе. Бешьк, Иса ԛәбул дькә шьхӧле пәйчуйед хԝә!
Иса һәбуна ԛимәт дайә рʹункьрийед хԝә, әв һәйә щабдарийа фәрзә даннасинкьрьне (Бьньһерʹә абзаса 10)
АХА ԜЕ КʹӘНГЕ БЕ?
11. Әм жь кʹӧ заньн ԝәки Иса ԝе ԝәʹде тәнгасийа мәзьн бе?
11 Иса гот: «Пәй гәләк ԝәхтрʹа ахайе ԝан хӧлама һат у хԝәст һәԛһʹәсабе хԝә тʹәви ԝан рʹаст кә» (Мәтта 25:19). Аха, демәк Иса ԝе әԝе йәке бькә пешийа хьлазийа тәнгасийа мәзьн. Әм жь кʹӧ заньн? Дь пʹехәмбәртийа Исайә Мәтта сәре 24 у 25-да, Иса гәләк щар гот ԝәки әԝ те. Мәсәлә, әԝи гот кӧ мәрьв «бьбиньн Кӧрʹе Инсан ль сәр әʹԝред әʹзмен . . . те». Әԝ һәйә ԝәʹде тәнгасийа мәзьн чахе Иса диԝана мәрийа бькә. Әԝи ӧса жи пешда пәйчуйед хԝәрʹа йед кӧ дь рʹожед ахьрийеда дьжин, гот ԝәки һʹьшйар бьминьн. Әԝи гот: «Һун ньзаньн Хӧдане ԝәйе кʹижан рʹоже бе» у ӧса жи гот кӧ «Кӧрʹе Инсан ԝе сьһʹәтәкә ӧсада бе, кӧ һун нә чʹәʹвньһерʹи нә» (Мәтта 24:30, 42, 44). Демәк дь ве мәтʹәлокеда, Иса диса дәрһәԛа ԝи ԝәʹдәйи гот, чахе кӧ әԝ бе, диԝана мәрийа бькә у ԛьрʹа дьнйа Шәйтʹан бинә.g (Бьньһерʹә спартьн.)
12, 13. а) Аха чь готә дӧ хӧламед хԝә у чьрʹа? б) Рʹункьри кʹәнге ԝе мора хԝәйә хьлазийе бьстиньн? (Бьньһерʹә ӧса жи чаргошә «Рʹасткьрьна Һәԛһʹәсаб Ԝәʹде Мьрьне») в) Әԝед кӧ али рʹункьрийа дькьн, ԝе чь хәлате бьстиньн?
12 Чахе аха жь рʹеԝитийа хԝә һат, әԝи дит кӧ әв хӧламе пенщ тәлант дайе дӧщар зедә кьрийә, у әԝе кӧ дӧ тәлант дайе әԝи жи дӧщар зедә кьрийә. Аха готә ԝан: «Әʹфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта» (Мәтта 25:21, 23). Ле Аха, демәк Иса, ԝе чь бькә дь ахьрийеда чахе әԝ бе?
13 Пешийа тәнгасийа мәзьн, Хԝәде ԝе ԝан рʹункьрийарʹа йед кӧ гәләк дьхәбьтьн, у ньһа сәр әʹрде нә, ԛәбулкьрьна хԝәйә хьлазийе бьдә кʹьфше. Демәк әԝана ԝе мора хьлазийе бьстиньн (Әʹйанти 7:1-3). Паше, пешийа Һармәгәдоне, Иса ԝе ԝана сах кә бона жийина сәр әʹзмана, у бь ве йәке ԝана хәлат кә. Ле чь әм дькарьн бежьн дәрһәԛа ԝан, йед кӧ али рʹункьрийа дькьн дь шьхӧле даннасинкьрьнеда, ле гӧмана ԝан жийина сәр әʹрде йә? Әԝана ԝе бенә һʹәсабкьрьне ча пәз. У хәлата ԝан әԝ бә, кӧ бьжин сәр әʹрде бьн һʹӧкӧмтийа Пʹадшатийа Хԝәде (Мәтта 25:34).
ХӦЛАМЕ ХЬРАБ У ТʹӘМБӘЛ
14, 15. Гәло Иса гот кӧ гәләк жь рʹункьрийа ԝе бьбьнә хьраб у тʹәмбәл? Шьровәкә.
14 Дь мәтʹәлокеда ӧса жи те готьне дәрһәԛа хӧламе кӧ тʹәне тәлантәк станд. Әԝи тәлант нәда хәбате, у зедә нәкьр. Дәԝсе әԝи әԝ пʹәрә вәшарт. Аха готә хӧламе хԝә, кӧ әԝ хӧлам хьраб у тʹәмбәл ә. Әԝи әԝ тәлант жь хӧламе хьраб станд у да хӧламе пешьн. Паше аха әв хӧламе хьраб авитә «тәʹрийа дәрва», у әԝ хӧлам бәрхԝәкʹәт у дьгьрийа (Мәтта 25:24-30; Луԛа 19:22, 23).
15 Чахе Иса гот кӧ йәк жь ԝан се хӧлама ԝе хьраб у тʹәмбәл бә, готьна ԝи әԝ нибу кӧ жь се рʹункьрийа йәк, ԝе хӧламәки ӧса бә. Әм әве йәке заньн жь бәрамбәрикьрьна дӧ мәтʹәлокед дьн. Дь мәтʹәлока хӧламе амьн у сәрԝахтда, дәрһәԛа хӧламе зӧлм Иса гот, йе кӧ пәй хӧламед дьн дькʹәт. Ле готьна Иса әԝ нибу, ԝәки йед кӧ пʹарәкә жь хӧламе амьн у сәрԝахт ьн, ԝе бьбьнә зӧлм. Дәԝсе, әԝи рʹункьри ширәт кьрьн, ԝәки нәбьбнә мина ԝи хӧламе зӧлм. Паше дь мәтʹәлока дәһ ԛизед бькʹьрда Иса кʹьфш кьр пенщ ԛизед бькʹьрә бефәʹм. Әԝи нә гот кӧ ниве рʹункьрийа ԝе бьбьнә бефәʹм. Дәԝсе, Иса пешда готә ԝан ԝәки ԝе чь бьԛәԝьмә һәгәр әԝана һазьр у һʹьшйар нибьн.h (Бьньһерʹә спартьн.) Ӧса жи дь мәтʹәлока дәрһәԛа тәланта, Иса нәдьхԝәст бьгота кӧ гәләк жь рʹункьрийа ԝәʹде рʹожед ахьрийе ԝе бьбьнә хьраб у тʹәмбәл. Иса пешда готә рʹункьрийа ԝәки әԝана нәбьнә мина хӧламе хьраб, ле бәрдәԝан кьн гәләк бьхәбьтьн дь шьхӧле даннасинкьрьнеда (Мәтта 25:16).
Иса һʹәму шагьртед хԝә, йед кӧ гәләк дьхәбьтьн дь шьхӧле даннасинкьрьнеда ԝе хәлат кә
16. а) Әм чь дӧ дәрса һин дьбьн жь мәтʹәлока дәрһәԛа тәланта? б) Әԝе тʹемайе ча али мә кьр, ԝәки фәʹм кьн мәтʹәлока дәрһәԛа тәланта? (Бьньһерʹә ӧса жи чаргошә «Әм Гәрәке Ча Фәʹм Бькьн Мәтʹәлока Дәрһәԛа Тәланта?»)
16 Әм чь дӧ дәрса һин дьбьн жь мәтʹәлока дәрһәԛа тәланта? Йа әʹԝльн, Иса һәбука ԛимәт дайә рʹункьрийед хԝә, әв һәйә щабдарийа фәрзә даннасинкьрьне у һазьркьрьна шагьрта. Йа дӧда, Иса жь мә һʹәмуйа һивийе йә, ԝәки гәләки бьхәбьтьн дь шьхӧле даннасинкьрьнеда. Һәрге әм бь дьл у щан әви шьхӧли дькьн, һьндава Исада гӧһдар у амьн дьминьн, әм дькарьн сәд сәләфи баԝәр бьн кӧ әԝ ԝе әʹсәйи мә хәлат кә! (Мәтта 25:21, 23, 34).
a Дь журнала «Бьрща Ԛәрәԝьлийе» йа 15 Тирмәһе, сала 2013, рʹупʹела 21-22, абзаса 8-10-да, те шьровәкьрьне кӧ кʹе йә хӧламе амьн у сәрԝахт.
b Дь готара дӧдада жь ве журнале, һатьбу шьровәкьрьне кӧ кʹе нә ԛизед бькʹьр.
c Мәтʹәлока дәрһәԛа пез у бьзьна һатьбу шьровәкьрьне дь «Бьрща Ԛәрәԝьлийеда» йа 15 Щотмәһе, сала 1995, рʹупʹела 23-28, у дь тʹема дьнда жи жь ве журнале.
d Бьньһерʹә чаргошә «Чь Щурʹәйи Мәтʹәлока Дәрһәԛа Тәланта Ԝәк Мәтʹәлока Дәрһәԛа Мина йә»?
e Ԝәʹде Иса тәлантәк гәлә пʹәре бу, лазьм бу хәбатчи 20 сала бьхәбьтийа сәва тәлантәк бьстанда.
f Паши мьрьна шандийа, дь щьватада мьԛабьлибун бәла бу. Нава гәләк ԛьрʹнада, шьхӧле даннасинкьрьне һьндьк дьһатә кьрьне. Ле ԝәʹде «дьрутьне», демәк ԝәʹде рʹожед ахьрийе, шьхӧле даннасинкьрьне гәрәке диса дәстпебуйа (Мәтта 13:24-30, 36-43). Бьньһерʹә журнала «Бьрща Ԛәрәԝьлийе» йа 15 Тирмәһе, сала 2013, рʹупʹела 9-12.