Бәрдәԝам кьн Һивийе бьн!
«Һәгәр дәрәнги бькʹәвә, һивийа ԝе бә!» (ҺӘБАԚУԚ 2:3, ДТʹ).
1, 2. Ԛӧльхкʹаред Йаһоԝа ча хԝә кʹьфш дькьн һьндава пʹехәмбәртийед Йаһоԝа?
ԚӦЛЬХКʹАРЕД Йаһоԝайи бәре бь сәбьр һивийе бун кӧ пʹехәмбәрти бенә сери. Мәсәлә Йерәмйа һивийе бу кӧ Бабилон ԝе Щьһудайе кʹӧта кә, у әԝ йәк ԛәԝьми сала 607 Б.Д.М. (Йерәмйа 25:8-11). Ишайа пʹехәмбәрти кьр кӧ Йаһоԝа ԝе Щьһуйа жь дилтийе вәгәрʹинә ль Щьһудайе у гот: «Хԝәзи ль һʹәмуйед кӧ ль бәнда [һивийа] ԝи нә» (Ишайа 30:18). Ӧса жи Миха һивийа созед Йаһоԝа бу кӧ бенә сери у гот: «Әзе ль Хӧдан бьнерʹьм» (Миха 7:7). У бь сәда сала ԛӧльхкʹаред Хԝәде һивийе бун у баԝәр бун кӧ Мәсиһ демәк Иса ԝе бе (Луԛа 3:15; 1 Пәтрус 1:10-12).a (Бьньһерʹә спартьн.)
2 Иро әм жи һивийе нә кӧ пʹехәмбәртийед дәрһәԛа Пʹадшатийа Йаһоԝа бенә сәри. Иса чаԝа Пʹадшайе ве Пʹадшатийе, ԝе зутьрәке ԛӧльхкʹаред Хԝәде хьлаз кә жь ве дьнйа хьраб. Иса ԝе мәрьвед зӧлм кʹӧта кә у һʹәму кӧл-дәрда бьдә һьлдане (1 Йуһʹәнна 5:19). Ләма жи әм гәрәке бәрдәԝам кьн һивийа һатьна рʹожа Йаһоԝа бьн у һʹәму тьшти бькьн чь кӧ дькарьн, сәва кӧ һазьр бьн бона ԝе рʹоже.
3. Әм чь дькарьн бьфькьрьн һәрге әм гәләк ԝәхт һивийа хьлазийе нә?
3 Әм гәләк һивийа ԝе рʹоже нә, чахе ԛьрара Хԝәде бә сәр әʹрде (Мәтта 6:10). Ле һәрге әм гәләк сал һивийа ԝе рʹожа хьлазийе нә, әм дькарьн бьфькьрьн: «Чьрʹа әм гәрәке бәрдәԝам кьн һивийе бьн кӧ зутьрәке хьлази ԝе бе?»
ЧЬРʹА ӘМ ГӘРӘКЕ ҺИВИЙЕ БЬН?
4. Чьрʹа фәрз ә кӧ әм «һʹьшйар бьминьн»?
4 Иса тʹәми да шагьртед хԝә кӧ «һʹьшйар бьминьн». Ләма мәрʹа жи фәрз ә кӧ бәрдәԝам кьн һивийа рʹожа хьлазийе бьн (Мәтта 24:42; Луԛа 21:34-36). Ӧса жи тʹәшкиләта Йаһоԝа тʹьме тинә бира мә кӧ әм «һивийа Рʹожа Хԝәде бьн у һатьна ԝи ләз хьн», у һʹьш-аԛьле хԝә бьдьнә сәр созе Йаһоԝа дәрһәԛа дьнйа тʹәзә. (Бьхунә 2 Пәтрус 3:11-13.)
5. Кʹижан мәʹнийед мәйә дьн һәнә кӧ бәрдәԝам кьн һивийа рʹожа Йаһоԝа бьн?
5 Ԝәки пәйчуйед Исарʹа ԛьрʹна йәкеда лазьм бу кӧ бәрдәԝам кьн һивийа рʹожа Йаһоԝа бьн, ле иро илаһи мәрʹа һе фәрз ә бәрдәԝам кьн һивийе бьн. Чьрʹа? Чьмки нишана кӧ Иса гот, избат дькә кӧ жь сала 1914 әԝ бу Пʹадша дь Пʹадшатийа Хԝәдеда у кӧ әм дьжин рʹожед хьлазийеда, демәк «ахьрийа ве дьнйайе». Мәсәлә, чаԝа кӧ Иса пʹехәмбәрти кьр, һʹале ве дьнйайе һе хьраб дьбә у мьзгинийа хере дәрһәԛа Пʹадшатийе нава тʹәмамийа дьнйайе те даннасинкьрьне (Мәтта 24:3, 7-14). Иса нә гот кӧ әԝ рʹожед ахьрийе ԝе чьԛас бькʹьшиньн, у ләма жи әм гәрәке һазьр бьн бона хьлазийе, кʹижан кӧ ԝе ньшкева бе.
6. Әм жь кʹӧ заньн кӧ хьлазийа дьнйайе чьԛас незики бә, һʹале дьнйайе ԝе һе хьраб бә?
6 Ле гәло «ахьрийа ве дьнйайе» әԝ ԝәʹдә йә, кӧ дьнйа ԝе һе зедә хьраб у зӧлм бә, нә кӧ ньһа? Кʹьтеба Пироз дьбежә кӧ мәрьв «рʹожед ахьрийеда» ԝе һе зӧлм у хьраб бьн (2 Тимотʹейо 3:1, 13; Мәтта 24:21; Әʹйанти 12:12). Бәле ньһа һʹале дьнйайе хьраб ә, ле әм заньн кӧ әԝ ԝе бәрдәԝам бә һе хьраб бә.
7. Мәтта 24:37-39 мәрʹа чь әʹйан дькә дәрһәԛа һʹале дьнйайе, ԝәʹде рʹожед ахьрийе?
7 Дьбәк һьнәк дьфькьрьн кӧ пешийа «тәнгасийа мәзьн», һʹәму ԝәлатада ԝе шәрʹ һәбьн у гәләк мәрьв ԝе нәхԝәш бьн, у жь бьрчибуне бьмьрьн (Әʹйанти 7:14). Ле һәрге рʹаст ӧса бә, ԝи чахи һәр кәсирʹа ԝе әʹйан бә, кӧ пʹехәмбәртийа жь Кʹьтеба Пироз те сери. У һәла һе ԝан мәрьварʹа жи ԝе әʹйан бә, йед кӧ нәдьхԝәстьн бьзаньбьн кӧ Кʹьтеба Пироз чь дьбежә. Биньн бира хԝә кӧ Иса гот ԝәки рʹожед ахьрийеда, ԝе гәләк мәрьв гӧһ нәдьнә ԝан нишана. Әԝана ԝе бь жийина һәр рʹожи бьжин у чахе рʹожа Йаһоԝа бе, әԝана ԝе гәләк әʹщебмайи бьминьн. (Бьхунә Мәтта 24:37-39.) Әʹйан ә, әм гәрәке һивийе нибьн кӧ пешийа «тәнгасийа мәзьн» һʹале дьнйайе ԝе ӧса хьраб бә, кӧ мәрьв баԝәр кьн ԝәки хьлази незик ә (Луԛа 17:20; 2 Пәтрус 3:3, 4).
Әм баԝәр ьн, ԝәки әм «ахьрийа ве дьнйайе» дьжин
8. Әм чьда баԝәр ьн, жь бо ԝе йәке кӧ әм пешда заньн дәрһәԛа нишана Иса?
8 Иса гот кӧ ԝе чь нишан һәбә, сәва кӧ пәйчуйед ԝи бьзаньбьн, кӧ әԝана ԝе чь ԝәʹдәйида бьжин. Ләма пәйчуйед Иса ида пешда һаш жь хԝә һәбун (Мәтта 24:27, 42). Жь сала 1914 щурʹә-щурʹә пʹаред нишана Иса тенә сери. Ләма жи әм баԝәр ьн, кӧ әм дьжин рʹожед ахьрийеда, демәк «ахьрийа ве дьнйайе». Йаһоԝа ида сафи кьрийә кӧ кʹәнге дьнйа Шәйтʹанә зӧлм кʹӧта кә.
9. Чьрʹа әм гәрәке бәрдәԝам кьн һивийа хьлазийе бьн?
9 Ле гәло чьрʹа әм гәрәке бәрдәԝам кьн һивийа хьлазийе бьн? Чьмки әм гӧрʹа Иса Мәсиһ дькьн. Ӧса жи, әм әʹйан дьвиньн кӧ нишана рʹожед ахьрийе кʹижан кӧ Иса дабу, те сери. Әм баԝәр ьн кӧ хьлази незик ә, нә жь бо ԝе йәке кӧ әм һәма чь дьбьһен һʹәму тьшти баԝәр дькьн, ле әм баԝәр ьн чьмки пʹехәмбәрти жь Кʹьтеба Пироз те сери. Әм гәрәке һаш жь хԝә һәбьн, у һазьр бьн чахе хьлази бе.
ӘМ ГӘРӘКЕ ЧЬԚАС ԜӘʹДӘ ҺИВИЙЕ БЬН?
10, 11. а) Чьрʹа Иса готә шагьртед хԝә кӧ «һʹьшйар бьминьн»? б) Иса чь готә пәйчуйед хԝә кӧ бькьн, һәрге хьлази ӧса зу найе чаԝа кӧ әԝана дьфькьрин? (Бьньһерʹә шькьле әʹԝльн.)
10 Гәләк жь мә бь амьни ԛӧльх дькьн Йаһоԝарʹа у гәләк сала һивийа рʹожа Йаһоԝа нә. Фьрԛи тʹӧнә чьԛас ԝәʹдә әм һивийе нә, әм гәрәке бәрдәԝам кьн һивийе бьн чьмки зутьрәке әԝ рʹож ԝе бе. Әм гәрәке һазьр бьн, чахе Иса бе сәва кӧ дьнйа Шәйтʹан кʹӧта кә. Биньн бира хԝә кӧ Иса чь готә пәйчуйед хԝә кӧ әԝана бькьн: «Һаш жь хԝә һәбьн! Һʹьшйар бьминьн! Чьмки һун ньзаньн кʹәнге ԝәхте перʹа бьгьһижә. Әв йәк мина мәрьвәки йә, кӧ мала хԝә дьһелә у дәрдькʹәвә рʹеԝитийе. Бәри чуйине тʹәмийа мала хԝә дьдә хӧламед хԝә, шьхӧле ԝан һәр кәси дьде у әʹмьри сәр дәргәһван дькә, кӧ һʹьшйар бьминә. Бона ве йәке һʹьшйар бьминьн, чьмки һун ньзаньн малхе мале ԝе кʹәнге бе, еваре йан ниве шәве, йан ԝәхте бангдана дика, йан сәре сьбәһе. Нәбә кӧ ньшкева әԝ бе у ԝә хәԝеда бьгьрә. У әз чь ԝәрʹа дьбежьм, һʹәмуйарʹа дьбежьм: Һʹьшйар бьминьн!» (Марԛос 13:33-37).
Һʹьщумкьрьна сәр религийа ԛәлп ве ньшкева дәстпебә
11 Чахе пәйчуйед Иса фәʹм кьрьн кӧ сала 1914 Иса дәстпекьр сәрԝертийе бькә, ԝана фәʹм кьр кӧ хьлази дькарә ньшкева бе. Ләма жи ԝана дәстпекьр һазьр бьн бь ԝе йәке, кӧ шьхӧле даннасинкьрьнеда һе зедә бькьн. Иса гот кӧ дьԛәԝьмә әԝ дәрәнг бе, «ниве шәве . . . йан сәре сьбәһе». Ԝәки ӧса нә, пәйчуйед Иса гәрәке чь бькьрана? Иса гот: «Һʹьшйар бьминьн». Демәк һәрге әм дьфькьрьн кӧ әм гәләк ԝәхт һивийе нә, әԝ йәк найе һʹәсабе кӧ хьлази һе дур ә, йан жи ԝе жийина мәда нәбә.
12. Һәбаԛуԛ чь пьрс да Йаһоԝа, у Йаһоԝа чь щаба ԝи да?
12 Һәбаԛуԛ пʹехәмбәр бь сәбьр һивийе бу, кӧ әԝ пʹехәмбәрти кʹижан әԝи дәрһәԛа һьлшандьна Оршәлиме дьгот, бе сери. Пʹехәмбәред дьн жи әв әʹламәти гәләк сала даннасин дькьрьн. Һәбаԛуԛ дьдит кӧ зӧлми у нәһәԛи һе зедә буйә нә кӧ бәре. Әԝи лавайа жь Йаһоԝа дькьр сәва кӧ али ԝи бькә, у пьрс да Йаһоԝа: «Йа Хӧдан, һʹәта чь ԝәхти әзе банги тә бькьм?» Рʹаст ә Йаһоԝа ԝирʹа нәгот, кӧ кʹәнге әԝ пʹехәмбәрти ԝе бе сери, ле әԝи соз да Һәбаԛуԛ: «Әԝ дәрәнг наминә». Йаһоԝа ӧса жи готә ԝи кӧ әԝ бәрдәԝам кә һивийе бә. (Бьхунә Һәбаԛуԛ 1:1-4; 2:3.)
13. Һәбаԛуԛ чь дькарьбу бьфькьрийа, у чьрʹа әԝ йәк ԝе хоф буйа?
13 Бьдә бәр чʹәʹве хԝә, һәрге Һәбаԛуԛ бьԝәстийа, чьмки һивийа хьлазийе бу, у ӧса бьгота: «Әз бь сала һивийа һьлшандьна Оршәлиме мә. Ԝе гәләк ԝәʹдә бькʹьшинә, һʹәта хьлази бе. Мьнрʹа нәлазьм ә кӧ бәрдәԝам кьм даннасин кьм. Йед дьн дькарьн әви шьхӧли бькьн». Ле чь дькарьбу бьԛәԝьмийа һәрге әԝ ӧса бьфькьрийа? Әԝи ԝе ԛәбулкьрьна Йаһоԝа ӧнда кьра. У һәрге әԝ һазьр нибуйа бона һатьна хьлазийе, әԝи дькарьбу әʹмьре хԝә ӧнда кьра.
14. Чьрʹа әме жь Йаһоԝа рʹази бьн, жь бо ԝе йәке кӧ әԝи мәрʹа пешда готийә кӧ әм бәрдәԝам кьн һивийа хьлазийе бьн?
14 Бьдә бәр чʹәʹве хԝә кӧ тӧ дьнйа тʹәзәда йи. Һʹәму тьшт чь кӧ дәрһәԛа рʹожед ахьрийе һатьбу пʹехәмбәртикьрьне һатә сери, чаԝа кӧ Йаһоԝа готьбу. У тӧ һе зедә итʹбарийа хԝә Йаһоԝа тини, у ӧса жи тӧ һе зедә баԝәр и кӧ әԝ ԝе һʹәму созед хԝәйи дьн жи бинә сери. (Бьхунә Йешу 23:14.) Тӧ ӧса гәләк жь Йаһоԝа рʹази йи кӧ әԝи хьлази ԝәʹдәда ани, у кӧ әԝи щьмәʹта хԝәрʹа пешда гот, кӧ әԝана бәрдәԝам кьн һивийе бьн (Кʹаред Шандийа 1:7; 1 Пәтрус 4:7).
ԜӘʹДЕ ҺИВИЙЕБУНЕ ӘМ БӘРДӘԜАМ ДЬКЬН ДАННАСИН ДЬКЬН
Тӧ бь хирәт даннасин дьки мьзгинийа хере? (Бьньһерʹә абзаса 15)
15, 16. Чьрʹа әм гәрәке ԝәʹде ԝан рʹожед пашьн, чьԛас кӧ дькарьн, һʹәму тьшти бькьн дь шьхӧле даннасинкьрьнеда?
15 Тʹәшкиләта Йаһоԝа ԝе бәрдәԝам кә бинә бира мә, кӧ әʹмьре мәда ԛӧльхкьрьн Йаһоԝарʹа гәләк фәрз ә. Әԝ йәк али мә дькә кӧ әм нә кӧ тʹәне нава шьхӧле даннасинкьрьнеда бьн, ле ӧса жи бьвиньн кӧ чьԛас фәрз ә әʹламәтийа кӧ әм даннасин дькьн. Әм баԝәр ьн, кӧ әԝ нишан дәрһәԛа кʹижани Иса гот, ньһа те сери у кӧ хьлази ԝе зутьрәке бе. Ләма әм шьхӧле Йаһоԝа әʹмьре хԝәда датиньн щийе пешьн, у бәрдәԝам дькьн даннасин кьн мьзгинийа хере дәрһәԛа Пʹадшатийе (Мәтта 6:33; Марԛос 13:10).
16 Чахе әм мьзгинийа хере мәрийарʹа даннасин дькьн, әм али ԝан дькьн кӧ әԝана хьлаз бьн жь кʹӧтакьрьна дьнйа Шәйтʹан, кʹижан кӧ ԝе зутьрәке бьԛәԝьмә. Тʹәшԛәлед кӧ дь бәʹреда һәбун йәк жь ԝан ԛәԝьми сала 1945, чахе гәмийа «Ԝилһелм Густлоф» кʹәтә бьн аве. Бь һʹәзара мәрьв мьрьн. Хушкәкә мә у малхе ԝе жь ве тʹәшԛәле хьлаз бун. Әԝ хушк тинә бира хԝә кӧ чахе гәми дькʹәтә бьн аве, жьнькәке дькьрә ԛарʹини: «Чәнтʹе мьн! Чәнтʹе мьн! Зер-зиве мьн! Зерʹ-зиве мьн гьшк отʹахеда ман. Мьн һʹәму тьштед хԝә ӧнда кьр!» Ле мәрьвед дьн кӧ гәмийеда бун фәʹм дькьрьн кӧ чь һе фәрз ә, у һʹәму тьшт дькьрьн сәва кӧ әʹмьре мәрьва хьлаз кьн. Иро әʹмьре мәрьва бьн хофеда нә. Әм жи дьхԝазьн мина ԝан мәрьвед дьлсах бьн, йед кӧ гәмийеда мәрьв хьлаз дькьрьн, у әм дьхԝазьн дина хԝә бьдьнә сәр шьхӧле даннасинкьрьне кʹижан кӧ гәләк фәрз ә. Әм гәрәке чьԛас дькарьн һʹәму тьшти бькьн, сәва кӧ али мәрьва бькьн, кӧ әԝана хьлаз бьн жь кʹӧтакьрьна ԝе дьнйайе.
Сафикьрьнед билан бькә у һʹьш-аԛьле хԝә бьдә сәр ве йәке кӧ чьԛас фәрз ә шьхӧле даннасинкьрьне (Бьньһерʹә абзаса 17)
17. Чьрʹа әм гәрәке баԝәр бьн кӧ хьлази дькарә ньшкева бе?
17 Әм дькарьн зәлал бьвиньн кӧ пʹехәмбәртийа жь Кʹьтеба Пироз те сери у кӧ хьлазийа ԝе дьнйа зӧлм гәләк незик ә. Әм һивийе нә кӧ «дәһә стьруйед» у «щәʹнәԝьр» мьԛабьли религийа ԛәлп демәк, Бабилона мәзьн дәрен (Әʹйанти 17:16). Әм гәрәке нәфькьрьн кӧ әԝ йәк һе дур ә. Бир нәкьн кӧ Хԝәде ԝе бькә «дьле ԝан» кӧ мьԛабьли религийа ԛәлп дәрен, у әԝ йәк дькарә зу у ньшкева бьԛәԝьмә! (Әʹйанти 17:17). Хьлазийа дьнйа Шәйтʹанә зӧлм зутьрәке ԝе бе. Ләма әм гәрәке гӧһ бьдьнә гьлийе Иса: «Мьԛати хԝә бьн, нәбә кӧ дьле ԝә хԝарьн, вәхԝарьне у хәмед ве дьнйайева гьредайи бә, ньшкева әԝ Рʹож сәр ԝәда бе . . . мина тʹәле» (Луԛа 21:34, 35; Әʹйанти 16:15). Дә ԝәрьн әм һʹьшйар бьминьн у бь хирәт Йаһоԝарʹа ԛӧльх кьн, у баԝәр бьн кӧ Йаһоԝа «бона йе ль бәнда [һивийа] ԝи нә, дьхәбьтә» (Ишайа 64:4).
18. Дь тʹемайа дьнда әме щаба кʹижан пьрсе пебьһʹәсьн?
18 Һʹәта кӧ әм һивийа хьлазийа ве дьнйа зӧлм ьн, әм гәрәке гӧһ бьдьнә ширәта Щьһудайе шагьрт: «Ле һун дәлално, хԝә бьдьнә сәр авакьрьна баԝәрийа хԝәйә пироз, бь Рʹӧһʹе Пироз дӧа бькьн, хԝә нава ԝе һʹьзкьрьна Хԝәдейә һьндава хԝәда хԝәй кьн, һивийа рʹәʹма Хӧдане мә Иса Мәсиһ бьн, кӧ жийина һʹәта-һʹәтайе бьдә ԝә» (Щьһуда 20, 21). Ле чаԝа әм дькарьн бьдьнә кʹьфше кӧ һивийа дьнйа тʹәзәйә Хԝәде нә? Әме дәрһәԛа ԝә йәке шеԝьр кьн дь тʹемайа дьнда.
a Сәва кӧ бьвини рʹезкьрьна пʹехәмбәртийед жь Кʹьтеба Пироз дәрһәԛа Мәсиһ у ча әԝана һатьнә сери, бьньһерʹә кʹьтеба «Чь Һин Дькә Кʹьтеба Пироз?», рʹупʹела 200.