Чь йә Ԛәйде Зерʹин?

Щаба Кʹьтеба Пироз

Гьли-готьна «Ԛәйде Зерʹин» Кʹьтеба Пирозда тʹӧнә, ле гәләк мәрьв әв гьли-готьн дьдьнә хәбате сәва кӧ бьдьнә кʹьфше ве принсипа рʹабун-рʹуньштьне, кʹижан кӧ Иса Мәсиһ дайә. Ԝәʹде Хьзмәткьрьна сәр Чʹийе Иса гот: «Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʹа бькьн» (Мәтта 7:12; Луԛа 6:31).

• Нета Ԛәйде Зерʹин чь йә?

• Чьда Ԛәйде Зерʹин керһати йә?

• Гәло нета Ԛәйде Зерʹин әԝ ә кӧ кʹаре жь йед дьн бьстиньн?

• Тӧ ча дькари Ԛәйде Зерʹин бьди хәбате?

Нета Ԛәйде Зерʹин чь йә?

Ԛәйде Зерʹин мә һелан дькә һьндава мәрьвада ӧса бьн, чаԝа кӧ әм дьхԝазьн ԝәки һьндава мәда бьн. Мәсәлә гәләк мәрьв дьхԝазьн, ԝәки һьндава ԝанда бь ԛәдьр бьн, ԛәнщ бьн у һʹьзкьрьне бьдьнә кʹьфше. Ләма жи фәʹмдари йә, ԝәки әм жи гәрәке һьндава мәрьвада ӧса бьн (Луԛа 6:31).

Чьда Ԛәйде Зерʹин керһати йә?

Ԛәйде Зерʹин ӧса баш ә кӧ әм дькарьн һʹәму дәрәщада бьдьнә хәбате. Мәсәлә, әв али дькә ԝәки . . .

• Зәԝаща хԝә ԛәԝи кьн (Әфәси 5:28, 33).

• Де-бав зарʹед хԝә ширәт кьн (Әфәси 6:4).

• Һәләԛәтийа баш тʹәви һәвала, щинара у һәвалхәбатчийа хԝәй кьн (Мәтʹәлок 3:27, 28; Колоси 3:13).

Ԛәйде Зерʹин әв һәма әв принсип ә, кʹижан кӧ әм һʹәчʹи зәʹф Пәймана Кәвьнда дьхуньн. Чаԝа Иса гот, әв те һʹәсабе «һинкьрьна Ԛануне [пенщ кʹьтебед пешьн жь Кʹьтеба Пироз] у пʹехәмбәра [кʹьтебед пʹехәмбәртийе]» (Мәтта 7:12). Бь гьлийе майин бежьн, Ԛәйде Зерʹин әв һәйә рʹастийа сәрәкә жь Пәймана Кәвьн: һәвале хԝә ԝәкә хԝә һʹьз бькьн (Рʹомайи 13:8-10).

Гәло нета Ԛәйде Зерʹин әԝ ә кӧ кʹаре жь йед дьн бьстиньн?

На. Нета Ԛәйде Зерʹин дәрһәԛа дайине йә. Иса чь чах әв ԛанун дабу? Иса пешийа кӧ әв гьли бьгота, шьровәкьр ԝәки әм гәрәке нә кӧ тʹәне һьнә мәрьварʹа ԛәнщийе бькьн, ле һәла һе дьжмьнед хԝәрʹа жи (Луԛа 6:27-31, 35). Демәк Ԛәйде Зерʹин мә һелан дькә, ԝәки һәр кәсирʹа ԛәнщийе бькьн.

Тӧ ча дькари Ԛәйде Зерʹин бьди хәбате?

1. Дина хԝә бьдә мәрьва, демәк тедәрхә һәла кʹи һʹәԝще аликʹарийе йә. Мәсәлә, чахе һун дьвиньн ԝәки кәсәк жь дькʹане те у чәнтʹед ԝи гьран ьн, һун дькарьн али ԝи бькьн, йан жи дьбәкә ԝә бьһист ԝәки щинарәки ԝә кʹәтийә нәхԝәшхане, йан жи ԝә дина хԝә дайе ԝәки һәвалхәбатчики ԝә мәʹдәкьри йә. Кʹьтеба Пироз мә һелан дькә: «Бьра һәр кәс ль кʹара һәвале хԝә жи бьгәрʹә» (Филипи 2:4). Демәк һәрге әм әве принсипе бьдьнә хәбате, әме гәләк мәщала бьвиньн, сәва кӧ тьштәки ԛәнщ бежьн йан бькьн.

2. Сәрԝахт бә. Хԝә дәԝса мәрьва дайнә у бьфькьрә кӧ һәрге тӧ һʹале ԝанда буйайи, тәйе чь бькьра? (Рʹомайи 12:15) Чахе әм һәстед мәрьва фәʹм дькьн, әм һелан дьбьн али ԝан бькьн.

3. Мәрьва фәʹм бькьн. Бир нәкә ԝәки мәрьв жь һәв щӧдә дьбьн. Әв йәк чь кӧ тӧ сәва хԝә дьхԝази, дькарә щӧдә бә жь хԝәстьна мәрьвед дьн. Ләма жи пешийа кӧ тьштәки сафи ки, ԝе баш бә бьсәкьни у бьфькьри, һәла әв йәк бь рʹасти ԝи мәрьвирʹа лазьм ә йан на (1 Корьнтʹи 10:24).