Кʹьтеба Пирозда Дәрһәԛа Һәвалтийе Чь Те Готьне?
Щаба Кʹьтеба Пироз
Һәвалед баш дькарьн жийина мә бәхтәԝар у ша кьн. Бь сайа һәвалтийе мәрьв дьһа бәхтәԝар у ԛәԝат дьбә (Мәтʹәлок 27:17).
Кʹьтеба Пироз дьбежә ԝәки бьжартьна һәвалада әм гәрәке фәсал бьн, чьмки бьжартьна нәрʹаст дькарә ахьрийа хьраб пәй хԝә бинә (Мәтʹәлок 13:20; 1 Корьнтʹи 15:33). Һәвалед нәбаш дькарьн тә һелан кьн, ԝәки сафикьрьнед нәрʹаст бьки, йан жи бь щурʹәки дьн хәйсәтед баш нав тәда бьтәмьриньн.
Ве готареда
Һәвале баш чь щурʹәйи йә?
Кʹьтеба Пирозда те готьне, ԝәки һәвалтийа баш нә тʹәне әԝ ә, кӧ һәв һʹьз бькьн у мина һәв ԝәʹдә дәрбаз кьн. Мәсәлә, Зәбур 119:63-да те готьне: «Әз һогьре хофкʹешед Тәa мә, кӧ хԝәй дькьн ԛанунед Тә». Дина хԝә бьде, ԝәки ньвискʹаре ве Зәбуре һәвалед ӧса хԝәрʹа бьжартийә, кʹижан кӧ хԝәдехоф ьн, нахԝазьн дьле Хԝәде бешиньн, ле дьхԝазьн ль гора принсипед Ԝи бьжин.
Кʹьтеба Пирозда те готьне кӧ чь хәйсәт-һʹӧнӧред һәвале баш гәрәке һәбьн. Мәсәлә:
«Һәвал һәр гав һʹьз дькә, бьра буйә бона рʹожа охьрме гьран» (Мәтʹәлок 17:17).
«Мәрьве хԝәйе гәләк һәвал, бәла сәре ԝи йә, ле һәвал жи һәнә жь бьраки четьр ьн» (Мәтʹәлок 18:24).
Жь ԝан рʹеза әм дьвиньн, ԝәки һәвале баш бь итʹбар ә, бь һʹьзкьрьн ә, һʹәйф ә у мәрʹд ә. Әм дькарьн тʹьме, демәк чәтьнайада жи у шайада жи, итʹбарийа хԝә ԝи биньн. Һәвале баш ӧса жи ԝе мерхас бә кӧ мә бьдә сәкьнандьне гава әм шаш дьбьн йан жи сафикьрьна нәрʹаст дькьн (Мәтʹәлок 27:6, 9).
Дәрһәԛа кʹижан һәвалтийед баш Кʹьтеба Пирозда те готьне?
Кʹьтеба Пироз гьли дькә дәрһәԛа чәнд һәвалтийед баш ортʹа мәрьвед жь щурʹә-щурʹә мьләта, салед әʹмьр, култура у ԛӧльхийа. Ԝәрә әм дина хԝә бьдьнә се мәсәла.
Рʹутʹ у Наһоми. Рʹутʹ бука Наһомийе бу, у Наһоми гәләк жь ԝе мәстьр бу. Хенщи ԝе йәке әԝана жь щурʹә-щурʹә мьләта у култура бун. Рʹаст ә фьрԛийа мәзьн һәбу ортʹа ԝанда, ле диса жи ԝана һәвалтикә незик у ԛәԝи саз кьрьбун (Рʹутʹ 1:16).
Даԝьд у Йонатʹан. Рʹаст ә Йонатʹан ԝәкә 30 сала жь Даԝьд мәстьр бу, Кʹьтеба Пироз дьбежә, ԝәки «Йонатʹан . . . Даԝьдва һат гьредан» (1 Самуйел 18:1, ИМ).
Иса у шагьртед ԝи. Иса һьмбәри шагьртед хԝә щийе дьһа бьльнд дьгьрт, әԝ бона ԝан дәрсдар у хӧдан бу (Йуһʹәнна 13:13). Ле диса жи Иса нәдьфькьри, кӧ әԝана һежа ниньн тʹәви ԝи һәвалтийе бькьн. Дәԝсе һәләԛәтийа незик ортʹа Иса у ԝан мәрьвада һәбу, йед кӧ пәй ԝи дьчун у һинкьрьнед ԝи дьанин сери. Щарәке Иса гот: «Мьн һун дост һʹәсаб кьрьн, чьмки һәр тьштед кӧ мьн жь Баве хԝә бьһистьн ԝәва данә әʹйанкьрьне» (Йуһʹәнна 15:14, 15).
Гәло мәрьв дькарә бьбә досте Хԝәде?
Әре, мәрьв дькарә бьбә досте Хԝәде. Кʹьтеба Пирозда те готьне: «Әԝ һәвале сьтԛе дьле рʹаст ә» (Мәтʹәлок 3:32). Щурʹәки дьн бежьн, Хԝәде ԝан мәрьва дьжберә кӧ бьбьнә достед ԝи, кʹижан кӧ мәʹрифәт ьн, һʹәлал ьн, хԝәйиԛәдьр ьн, у ль гора нормед ԝи дьжин. Мәрьвәки ӧса Бьраһим бу. Кʹьтеба Пироз сәр ԝи рʹастә- рʹаст дьбежә, ԝәки әԝ досте Хԝәде бу (2 Дирок 20:7; Ишайа 41:8; Аԛуб 2:23).
a Текста ве рʹезеда хәбәра «Тә» сәр Хԝәде те готьне.