ПЬРСЕД ЩАҺЬЛА
Ча Тәйах кьм бәр Дәрде Мьрьне?
Һәрге ԝан пашԝәхтийа тә һәвал йан жи нәфәрәкә мала хԝә ӧнда кьрийә, әв готар ԝе али тә бькә, кӧ бәр дәрде мьрьне тәйах ки.
Ве готареда
Дьбә кӧ зәʹф зедә шине дькьм?
Гәләк мәрьв шина гьран дькьн гава мәрьве ԝани һʹьзкьри дьмьрә, у әв йәк дьреж дькʹьшинә.
«Рʹаст ә ида дӧ сал ә кӧ кальке мьн мьрийә, ле диса жи һәр рʹож әз ԝи тиньм бира хԝә. Һәр щар чахе әз дәрһәԛа ԝи хәбәр дьдьм, әз нькарьм һесьред хԝә бьгьрьм».—Оливийа.
«Пирька мьн тʹьме әз һелан дькьрьм, кӧ бьгьһижьмә нетед хԝә. Ле йазьх әԝе перʹа нәгиһанд бьвинә кӧ чаԝа әз һеди-һеди дьгьһижьмә нетед хԝә. Һәр щар чахе әз дьгьһижьмә нетәкә хԝә, әз дьлтәнг дьбьм, кӧ әԝ навинә.—Елисон.
Чахе мәрьв шинеда нә, щурʹә-щурʹә емосийа щәм ԝи пешда тен. Мәсәлә:
«Чахе мере мәтʹа мьн мьр, әз кʹәтьмә шоке, у әз гәләк ԝәхт нькарьбум жь ԝи һʹали дәркʹәтама. Жийина мьнда әв щара пешьн бу, кӧ мьн мәрьве хԝәйи незик ӧнда кьр. Мьн хԝә ӧса тʹәхмин дькьр, те бежи тʹред сәр мьнрʹа дәрбаз буйә».—Надин.
«Чахе кальке мьн мьр, әз гәләк һерс дькʹәтьм, чьмки мә гәләк щар ԝирʹа дьгот, ԝәки мьԛати хԝә бә, ле әԝи бона сьһʹәт-ԛәԝата хԝә хәм нәдькьр».—Карлос.
«Чахе кальке мьн мьр, жь малбәта мә тʹәне әз у хушка мьн кʹеләка ԝи нибун. Паши ԝе йәке мьн тʹьме хԝә нәһәԛ дькьр, кӧ дәма пашьн бал ԝи нибум.—Адрийана.
«Жьн-мерәк йед кӧ тʹәви малбәта мә һәвалти дькьрьн, бь әʹрәбе кʹәтьнә ԛәзийе у мьрьн. Паши ԝе йәке, һәр щар гава кәсәк жь малбәта мьн жь мал дәрдькʹәт, тьрсе мьн дьгьрт, кӧ дьбәкә әԝ жи бьмьрә».—Щаред.
«Пирька мьн се сал пешда мьрийә. Әз гәләк пʹошман дьбум кӧ мьн епʹещә ԝәʹдә тʹәви ԝе дәрбаз нәдькьр, һʹәта кӧ әԝ сах бу».—Щулийана.
Щәм мә дькарә шок, һерс, хԝәнәһәԛкьрьн, тьрс у пʹошманбун пешда бе, гава әм мәрьве хԝәйи һʹьзкьри ӧнда дькьн. Әв тьштәки тʹәбийәти йә. Чь жи һәбә, баԝәр бә кӧ ԝәʹдә шунда һәстед тәйә ӧса ԝе сьвьк бьн. Ле ньһа чь дькарә али тә бькә, кӧ бәр ве еше тәйах ки?
Чаԝа һʹале хԝәда тәйах кьм?
Дьле хԝә һәвале хԝәрʹа вәкә. Кʹьтеба Пироз дьбежә, ԝәки һәвале рʹаст «бона рʹожа охьрме гьран» һәйә (Мәтʹәлок 17:17). Гава әм дьле хԝә кәсәкирʹа вәдькьн, әм дькарьн аликʹарийа керһати бьстиньн.
«Тʹәбийәти йә кӧ мәрьв шине дькә. Дьбәкә тӧ бьхԝазби тʹәне тʹәви фькьред хԝә бьмини, ле паше ԝе гәләк фькьред нәбаш бькʹәвьнә һʹьше тә. Ләма жи ԝе баш бә, ԝәки дәрде дьле хԝә кәсәкирʹа вәки».—Ивет.
Мәрьве хԝәйи һʹьзкьри бинә бира хԝә. Кʹьтеба Пироз дьбежә, ԝәки «мәрьве ԛәнщ, жь хьзна дьле хԝәйи ԛәнщ, ԛәнщийе дәртинә» (Луԛа 6:45). Хԝәрʹа дәрһәԛа дәрәщед һʹәԝас бьньвисә, кʹижан кӧ ԝива гьредайи нә, йан жи шькьле ԝи тʹоп кә у албомәкә биранине чекә.
«Мьн сафи кьр ԝан һʹәму тьшта бьньвисьм, чь кӧ һәвале мьн әз һин кьрьм пешийа кӧ бьмьра. Әв йәк али мьн кьр, ԝәки бәр дәрде мьрьне тәйах кьм».—Щефри.
Мьԛати сьһʹәт-ԛәԝата хԝә бә. Кʹьтеба Пироз дьбежә, ԝәки гава әм спортева мьжул дьбьн, әм кʹаре дьстиньн (1 Тимотʹейо 4:8). Хԝарьна керһати бьхԝә, спортева мьжул бә у һеса бә.
«Чахе дьле тә жь бо мьрьна мәрьве тә дешә, тәрʹа чәтьн ә зәлал бьфькьри, ләма жи ԝе баш бә мьԛати сьһʹәт-ԛәԝата хԝә би. Хԝарьне жь хԝә кем нәкә у епʹещә хәԝа хԝә бьстинә».—Марийа.
Аликʹарийе бьдә мәрьвед дьн. Кʹьтеба Пироз дьбежә: «Хԝәзи ль дайийа, нә кӧ ль стандийа» (Кʹаред Шандийа 20:35).
«Хирәт бькә ԝәки тьштәки бона мәрьвед дьн бьки, илаһи бона ԝан йед кӧ мәрьвед хԝәйи һʹьзкьри ӧнда кьрьнә. Әв йәк ԝе бинә бира тә, ԝәки тӧ тʹәне нини, мәрьвед дьн жи дьчәрчьрьн».—Карлос.
Дьле хԝә Хԝәдерʹа вәкә. Кʹьтеба Пироз дьбежә, ԝәки Йаһоԝа Хԝәде «дӧа дьбьһизә» (Зәбур 65:2, ИМ). Ԝедәре ӧса жи ньвисар ә, ԝәки Йаһоԝа «дьлшкәстийа ԛәнщ дькә у бьринед ԝан дьпʹечʹә» (Зәбур 147:3).
«Жь Йаһоԝа һиви кә, ԝәки ԛәԝате бьдә тә у тә һелан кә. Щарна ԝе рʹожед ӧса һәбьн, гава тәрʹа гәләк чәтьн бә, ле диса жи бир нәкә, кӧ Йаһоԝа тʹьме тʹәви тә йә».—Щенет.
Бьра ньһерʹандьна тә реали бә. Бир нәкә ԝәки һәр мәрьвәк бь щурʹәки дәрде дьле хԝә дькʹьшинә. Кʹьтеба Пирозда те гьликьрьне кӧ чахе Аԛуб пеһʹәсийа, ԝәки кӧрʹе ԝи мьрийә, дьлбини «ԛәбул нә дькьр» (Дәстпебун 37:35). Әʹщебмайи нәминә, һәрге еша дьле тә дьреж бькʹьшинә.
«Рʹаст ә ида 15 сал ә кӧ пирька мьн мьрийә, ле щарна гәләк тьшт диса әԝе тиньн бира мьн».—Тейлор.
Бьдә бәр чʹәʹве хԝә ԝәки тә ньге хԝә шкенандийә. Ньге тә дешә у ԝәʹдә лазьм ә кӧ әԝ ԛәнщ бә. Ле сәва кӧ зу ԛәнщ би, тӧ гәрәке ширәтед дохдьр һьлди һʹәсаб.
Анәгори ԝе йәке чахе тӧ мәрьве хԝәйи һʹьзкьри ӧнда дьки, тӧ жи ешәкә ӧса дькʹьшини. Ԝәʹдә лазьм ә, сәва кӧ еша тә сьвьк бә, ләма жи сәбьр кә. Бьфькьрә дәрһәԛа ширәтед кӧ ве готареда тенә дайине у бьньһерʹә, кӧ ԝе жь ԝана кʹижан дьһа али тә бькьн.