Политик Дәрһәԛа Һармәгәдоне Хәбәр Дьдьн—Гәло Кʹьтеба Пироз Чь Дьбежә?

Дӧшәме шәбәԛе, 10 Щотмәһе, сала 2022, Русйа сәр пʹьра кӧ Крим у Русйайе гьредьдә, пе ракета ериши сәр чәнд бажаред Украине кьр. Әԝ йәк ԛәԝьми паши ве йәке, гава политик готьн, ԝәки әм незики Һармәгәдона атоми дьбьн.

•  «Жь һена Щон Кенеди у Кризиса Кубайе, дьнеда хофәкә ӧса мәзьн тʹӧнә буйә, кӧ әм ӧса незики Һармәгәдона атоми бьн. Әз дьфькьрьм ԝәки хәбьтандьна бомбед атоме ԝе әʹсәйи бәрбь Һармәгәдоне бьвә»—Гьлийед Президенте Дәԝләтед Йәкбуйи, Що Байден, 6 Щотмәһе, сала 2022.

•  «Бь рʹасти тʹәмамийа дьнйайе бәр шемика Һармәгәдоне йә». Әва гьлийед Президенте Украине, Владимир Зеленски йә, гава жь ԝи пьрсин дәрһәԛа ахьрийа хәбьтандьна бомбед атоме—BBC News, 8 Щотмәһе, сала 2022.

Гәло бь рʹасти хәбьтандьна бомбед атоме дькарә бәрбь Һармәгәдоне бьвә? Кʹьтеба Пироз чь дьбежә?

Гәло бомбед атоме ԝе бьбьнә мәʹнийа Һармәгәдоне?

На. Кʹьтеба Пирозда хәбәра Һармәгәдон щарәки һатийә хәбьтандьне, тʹәне Әʹйанти 16:16-да. Әв ԝе шәрʹе ортʹа мьләтада нибә, ле чаԝа әм жь Кʹьтеба Пироз педьһʹәсьн, әв һәйә шәрʹе ортʹа Хԝәде у «пʹадшед дьнйайе» (Әʹйанти 16:14). Һәма бь сайа шәрʹе Һармәгәдоне, Хԝәде ԝе кʹока һʹәму сәрԝертийед мәрьва бинә (Данийел 2:44).

Сәва кӧ һе зедә пебьһʹәсьн чь те һʹәсабе Һармәгәдон у чь һивийа планета мәйә, бьхуньн готара бь наве Һармәгәдон Чь йә?

Гәло шәрʹе атоме ԝе ԛьрʹа әʹрде у инсанәте бинә?

На. Рʹаст ә сәрԝер дькарьн ахьрийеда бомбед атоме бьдьнә хәбате, ле Хԝәде ԝе тʹӧ щар нәһелә ԝәки әʹрд кʹӧта бә. Кʹьтеба Пирозда те готьне:

•  «Дьнйа абадин [һʹәта-һʹәтайе] дьсәкьнә» (Ԝаиз 1:4).

•  «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).

Ле пʹехәмбәртийа Кʹьтеба Пироз у ԛәԝьмандьнед иройин әʹйан дькьн, ԝәки әм незики ԝи ԝәʹдәйи нә, кӧ тʹәрихийа инсанәтеда тʹӧ щар нәԛәԝьмийә (Мәтта 24:3-7; 2 Тимотʹейо 3:1-5). Бь сайа курса һинбуна Кʹьтеба Пирозә бепʹәрә, пебьһʹәсьн һәла Кʹьтеба Пироз дәрһәԛа ахьрийе чь дьбежә.