Чьма Мәрьв Нькарьн Әʹдьлайеда Бьжин?—Кʹьтеба Пироз Чь Дьбежә?

Сәрԝеред навдәнг у тʹәшкиләтед һʹәмдьнйайе нькарьн әʹдьлайе биньн дьнйайе. Рʹожа иройин нава тʹәмамийа дьнйайеда һаԛас шәрʹ у дәʹԝ һәнә, чаԝа кӧ дәстпебуйи жь Шәрʹе Һʹәмдьнйайейә II, тʹӧ щар тʹӧнә бу. Ԝәкә дӧ милйард мәрьва, чь кӧ дькә пʹара чара жь тʹәмамийа инсанәте, дьжин ԝан щийада, кʹидәре кӧ шәрʹ дьчьн.

Чьма мәрьв нькарьн бьгьһижьнә әʹдьлайе? Кʹьтеба Пироз чь дьбежә?

Се мәʹни, кӧ чьма мәрьв нькарьн әʹдьлайеда бьжин

1.  Мәрьв хәйсәт-һʹӧнӧред ӧса әʹйан дькьн, кӧ рʹийа ԝан дьгьрә һәма гавәк жи бавежьн, ԝәки әʹдьлайе чекьн. Кʹьтеба Пирозда һатьбу пʹехәмбәртикьрьне, ԝәки рʹожед мәда мәрьв ԝе «бьбьнә хԝәһʹьз, пʹәрәһʹьз, кʹӧбар, бабах, . . . һʹәрам, . . . берʹәʹм, . . . тәмсьст, зӧлмкʹар, . . . щӧләʹт, хԝәрʹази» (2 Тимотʹейо 3:2-4).

2. Мәрьв, ча башԛә ӧса жи ча кʹом, нькарьн бе аликʹарийа Әʹфьрандаре хԝә, Йаһоԝаa Хԝәде, проблемед хԝә сафи кьн, чьмки Хԝәде әв фәрәсәт нәдайә ԝан. Кʹьтеба Пирозда ньвисийә, ԝәки «рʹийа мьров нә дь дәсте ԝида йә: гавед хԝә рʹасткьрьн, нә дь дәсте мьрове кӧ дьмәшәда йә» (Йерәмйа 10:23, ИМ).

3. Тʹәмамийа дьнйа дәсте сәрԝерәки ԛәԝи у зӧлмда йә, демәк бьн һʹӧкӧме Шәйтʹан Мире-щьнда, «йе кӧ тʹәмамийа дьне хальфандийә» (Әʹйанти 12:9). Һʹәта кӧ «тʹәмамийа дьнйайе бьн һʹӧкӧме Йе Хьрабда йә», сәр әʹрде ԝе тʹьме шәрʹ у дәʹԝ һәбьн (1 Йуһʹәнна 5:19).

Кʹи дькарә әʹдьлайе бинә?

Кʹьтеба Пироз дьбежә, ԝәки әʹдьлайи ԝе чебә нә кӧ бь сайа ԛәԝата мәрьва, ле бь ԛәԝата Хԝәде.

• «‹Әз рʹьнд заньм әԝ, чь кӧ мьн сәва ԝә ԛьрар кьрийә› Йаһоԝа дьбежә. ‹Мьн әʹдьлайи сәва ԝә ԛьрар кьрийә, нә кӧ хәзәба, сәва кӧ һевийе у ахьрийа баш бьдьмә ԝә›» (Йерәмйа 29:11, ДТʹ).

Хԝәде ча әв соза хԝә бинә сери? «Хԝәдейе әʹдьлайийе зутьрәке ԝе сәре Мирещьн . . . бьпʹәлехә» (Рʹомайи 16:20). Хԝәде ԝе сәрԝертийа әʹзмани бьдә хәбате, йе кӧ Кʹьтеба Пирозда те навкьрьне «Пʹадшатийа Хԝәде», сәва кӧ әʹдьлайе бинә сәр тʹәмамийа дьнйайе (Луԛа 4:43). Бьн сәрԝертийа Иса Мәсиһда, йе кӧ Пʹадше ве Пʹадшатийе йә, мәрьв ԝе бенә һинкьрьне кӧ чаԝа әʹдьлайеда бьжин (Ишайа 9:6, 7).

• Сәва кӧ һе зедә пебьһʹәсьн, бьхуньн готар «Пʹадшатийа Хԝәде ԝе Чь Бькә?»