Дәʹԝатед Шәʹдед Йаһоԝа Чаԝа Дәрбаз Дьбьн?
Дәʹԝатед Шәʹдед Йаһоԝа бь маԛули у лайиԛ дәрбаз дьбьн, у готара сәр һʹиме Кʹьтеба Пироз те хԝәндьне. Бук у зәʹва дькарьн сафи кьн, ԝәки паши готаре сьфре бона мевана вәкьн.a Иса дәстпека хьзмәтийа хԝә чубу шәһәре Ԛанайе сәр дәʹԝате (Йуһʹәнна 2:1-11).
Дәʹԝат чаԝа дәрбаз дьбьн?
Готара дәʹԝате, пʹарәкә гәләк фәрз ә. Әве готаре йәк жь Шәʹдед Йаһоԝа ԝәкә 30 дәԛада дьхунә. Әв готара дьлгәрми дьдә кʹьфше, кӧ чаԝа Кʹьтеба Пироз дькарә али йед зәԝьщи бькә, ԝәки зәԝаща ԝанда һʹьзкьрьн у бәхтәԝари һәрһәйи һәбә (Әфәси 5:33).
Гәләк ԝәлатада һʹӧкӧмәти изьне дьдә кӧ кәсәк жь Шәʹдед Йаһоԝа зәԝаще бь ԛануни дәстур кьн. Ләма жи ве дәрәщеда хьлазийа готаре, бук-зәʹва соз дьдьнә һәв дӧ. Әԝана ӧса жи дькарьн гӧстилке бькьнә тʹьлийа һәв. Паше әв мәрьве кӧ готаре дәрбаз дькә, әʹлам дькә, кӧ әԝана жьн-мер ьн.
Ле ԝәлатед дьнда те дәʹԝакьрьне, ԝәки бук у зәʹва һәрʹьн щийе кӧ зәԝаще дәстур дькьн. Ләма жи бук у зәʹва пешийе бь ԛануни зәԝаща хԝә дәстур дькьн, паше жи готара зәԝаще те хԝәндьне. Һәрге бук у зәʹва щийе дәстуркьрьнеда соз нәданә һәв, әԝана дькарьн әве йәке хьлазийа готаре бькьн. Һәрге щийе дәстуркьрьнеда ԝана ида соз дайә һәв, һьнге әԝана дькарьн сафи кьн ԝәки диса щарәке созе хԝә һәврʹа бьԝәкʹьлиньн, ле ида бь ԝәʹде дәрбазбуйи. Готар бь дӧакьрьне хьлаз дьбә. Дӧада жь Хԝәде те һивикьрьне, ԝәки бук у зәʹва кʹәрәм бькә.
Дәʹԝатед Шәʹдед Йаһоԝа кʹидәре дәрбаз дьбьн?
Гәләк Шәʹдед Йаһоԝа дьхԝазьн, ԝәки готара зәԝаще Ода Щьватеда дәрбаз бә.b Һәрге паши ве йәке ԝана сафи кьр тʹәви мевана тʹоп бьн, әԝана дьчьнә щики дьн.
Кʹи дькарә һәрʹә дәʹԝате?
Һәрге дәʹԝат Ода Щьватеда дәрбаз дьбьн, бь тʹәбийәти дәри бона һʹәмуйа вәкьри нә һьм бона Шәʹдед Йаһоԝа, һьм жи бона мәрьвед дьн. Һәрге паши ве йәке, щоте зәԝьщи дьхԝазьн щики тʹоп бьн, әԝана сафи дькьн, кʹе тʹәглифи дәʹԝата хԝә кьн.
Кʹьнщхԝәкьрьна мевана гәрәке чь щурʹәйи бә?
Бона кʹьнщхԝәкьрьна сәр дәʹԝате рʹебәрийа конкрет найе дайине, ле әԝана рʹебәрийа Кʹьтеба Пироз һьлдьдьн һʹәсаб, сәва кӧ кʹьнщхԝәкьрьна ԝан бь маԛули у лайиԛ бә. Әв йәк гәләк те ԛимәткьрьне, гава һәр кәсед сәр дәʹԝате әԝан принсипа һьлдьдьн һʹәсаб (1 Тимотʹейо 2:9). Һәмьки әԝан принсипа һьнге жи дьдьнә хәбате, һәрге паши готаре дьчьн щики ԝәʹдә дәрбаз кьн.
Меван дькарьн пʹешкʹеша биньн?
Кʹьтеба Пироз һелан дькә, ԝәки мәрʹд бьн (Зәбур 37:21). Шәʹдед Йаһоԝа ша дьбьн чахе пʹешкʹеша дьдьнә бук-зәʹва, у бук-зәʹва жи ша дьбьн чахе пʹешкʹеша дьстиньн (Луԛа 6:38). Ле Шәʹдед Йаһоԝа накьнә гази, кӧ кʹе чь пʹешкʹеш анийә (Мәтта 6:3, 4; 2 Корьнтʹи 9:7; 1 Пәтрус 3:8). Әв йәк ль сәр һʹиме Кʹьтеба Пироз нинә, у һьм жи һьнә меван дьбәкә хԝә баш тʹәхмин нәкьн.
Салхи изьн ә?
На. Шәʹдед Йаһоԝа салхийе һьлнадьн, чьмки канийа ве йәке жь әʹдәтед религийа ԛәлп пешда һатьнә.c Әԝана бь щурʹәки дьн дӧа ль бук у зәʹва дькьн.
Изьн ә ԝәки бьрьнщ у кʹахазед бьрԛок сәр бук-зәʹведа бьрʹәшиньн?
На. Гәләк щийа мәрьв баԝәр дькьн, ԝәки рʹәшандьна бьрьнщ у кʹахазед бьрԛок, бәхтәԝари у жийина дьреж йед тʹәзә зәԝьщирʹа тинә, ләма жи әве йәке дькьн. Ле Шәʹдед Йаһоԝа хԝә жь кьред ӧса дур дьгьрьн, йед кӧ һинкьрьнед ԛәлпва гьредайи нә. Ӧса жи әԝана бук зәʹверʹа навежьн «йазийа ԝә баш бә», чьмки әв йәк ль сәр һʹиме Кʹьтеба Пироз нинә (Ишайа 65:11).
Изьн ә кӧ хԝарьн у вәхԝарьн һәбә?
Чахе Ода Щьватеда готара зәԝаще те хԝәндьне, хԝарьн у вәхԝарьн ԝедәре тʹӧнә. Һьнәкед зәԝьщи сафи дькьн, ԝәки паши готаре щики тʹоп бьн у сьфре вәкьн (Ԝаиз 9:7). Һәрге әԝана дьхԝазьн кӧ ичʹкә һәбә, гәрәке хәм бькьн кӧ зәʹф нибә, у тʹәне бона ԝан һәбә, изьна кʹижана һәйә вәхԝьн (Луԛа 21:34; Рʹомайи 13:1, 13).
Кʹьлам у рʹәԛас изьн ә?
Һәрге бук-зәʹва паши готаре дьхԝазьн щики тʹоп бьн у ԝәʹдә дәрбаз кьн, әԝана дькарьн сафи кьн, кӧ мьԛам у рʹәԛас жи һәбә (Ԝаиз 3:4). Мьԛама кӧ әԝана бьжберьн, ԝе култура ԝан әʹйан кә у ӧса жи кӧ чь ԝана хԝәш те. Хенщи ԝе йәке нета ԝан әԝ ә, кӧ әв мьԛам мевана хԝәш бе. Чахе дәʹԝат Ода Щьватеда дәрбаз дьбә, һьнге кʹьлам у готара ль сәр һʹиме Кʹьтеба Пироз тенә готьне.
Шәʹдед Йаһоԝа һәр сал рʹожа дәʹԝата хԝә дәрбаз дькьн?
Принсипед Кʹьтеба Пироз ԛәдәхә накә у нә жи һелан дькә, ԝәки һәр сал рʹожа дәʹԝата хԝә дәрбаз кьн. Ләма жи Шәʹдед Йаһоԝа йед зәԝьщи хԝәха сафи дькьн һәр сал әве рʹоже дәрбаз кьн йан на. Ле һәрге әԝана сафи дькьн әве йәке дәрбаз кьн, дькарьн тʹәви кʹомәкә бьчʹук тʹоп бьн, мәсәлә тʹәви һәвал у малбәта хԝә.
a Әʹдәт, култура, у дәʹԝакьрьна фәрми дькарә һәр щийада жь һәв щӧдә бә.
b Әв мәрьве кӧ готаре дьхунә, сәва ве йәке пʹәра һьлнадә. Ӧса жи бона хәбьтандьна Ода Щьвате пʹәрә найе стандьн.
c Сәва һе зедә дәрһәԛа канийа ԛәлпә салхийе пебьһʹәсьн, бьньһерʹьн журнала «Бьрща Ԛәрәԝьлийе», йа 15 Сьбате, сала 2007, «Пьрсед Хԝәндәԝана».