Чь Бькьм Һәрге Де-Баве Мьн жь Һәв Дьԛәтьн?

Чахе жьн-мер жь һәв дьԛәтьн сәр зарʹа әв йәк гәләк хьраб һʹӧкӧм дькә. Һәрге малбәта тә жи рʹасти ԝе йәке һатийә, чь дькарә али тә бькә тәйах ки?

Ве готареда

• Се тьшт чь кӧ тӧ гәрәке нәки

• Се тьшт чь кӧ тӧ гәрәке бьки

• Щаһьлед дьн чь дьбежьн

Се тьшт чь кӧ тӧ гәрәке нәки

1. Хԝә сущдар нәкә

«Щарәке дийа мьн готә мьн, кӧ проблеме ԝе тʹәви баве мьн паше буйина мьн дәстпебун. Ләма жи әз дьфькьрьм кӧ әԝана рʹийе мьнда һәв ԛәтийан»—Диана.

Ве йәке бир нәкә: Рʹийе тәда нинә кӧ де-баве тә һәв ԛәтийан, чьмки проблем ортʹа ԝанда ԛәԝьми. Тӧ нькари проблемед ԝан сафи ки, чьмки әԝана хԝәха щабдар ьн бона проблемед кӧ ортʹа ԝанда пешда тен.

2. Һерсе дьле хԝәда хԝәй нәкә

«Әз сәр баве хԝә гәләк һерс кʹәтьм, чахе әԝи нәмамийа дийа мьн кьр. У әз нә жи заньм кӧ әзе бькарьбьм ԝи бьбахшиньм йан на»—Рианна.

Ве йәке бир нәкә: Әв тьштәки нормал ә һәрге тӧ һерс дькʹәви у дьлтәнг дьби жь бо ве йәке, кӧ ортʹа де-баве тәда тьштәк дьԛәԝьмә. Ле һәрге тӧ бәрдәԝам ки һерс кʹәви, әв йәк ԝе хьраб һʹӧкӧм кә сәр сьһʹәт-ԛәԝата тәйә физики у емосийали. Һерскʹәтьн мина ве йәке йә, һәрге тӧ жәʹр бьхԝи у бьфькьри ԝәки әԝ йәк ԝе зийане бьдә кәсәки дьн.a

3. Нәфькьрә кӧ тӧйе жи мина де-баве хԝә шашийа бәрʹди

«Әз гәләк дьтьрсьм, ԝәки әзе жи мина баве хԝә шашийа ԝи щурʹәйи бәрʹдьм. Әз бәр хԝә дькʹәвьм чахе дьфькьрьм, кӧ гава әзе мер кьм у зарʹе мьн һәбьн, әзе жи мина де-баве хԝә бькʹәвьмә дәрәща ӧса, кʹижан кӧ ԝе бәр бь һәвԛәтандьне бьбә»—Щессика.

Ве йәке бир нәкә: Һәрге де-баве тә һәв ԛәтийанә, әв йәк найе һʹәсабе ԝәки ахьрийе те жи жь һәвалзәԝаще хԝә бьԛәти. Дәԝсе тӧ дькари жь ԝан һин би у шашийед ӧса нәки. Мәсәлә пешийа кӧ рʹасти кәсәки бейи, тӧ дькари дина хԝә бьди сәр хәйсәт һʹӧнӧред ӧса, йед кӧ тӧ дьхԝази нав ԝи мәрьвида бьвини. Хенщи ԝе йәке тӧйе бькарьби һʹӧнӧред ӧса нав хԝәда пешда бини, йед кӧ ԝе ахьрийе али те бькьн бьби һәвалзәԝащәки баш.

Се тьшт чь кӧ тӧ гәрәке бьки

1. Дәрһәԛа һәстед хԝә гьли кә. Әԝ мәрьвед кӧ һәстед негатив дьле хԝәда дьһельн у тʹӧ кәсирʹа дьле хԝә вәнакьн, һʹәчʹи зәʹф мәрьве ӧса ичкева йан жи наркотикева мьжул дьбьн. Дәԝсе ԝе баш бә ве йәке бьки:

Дәрһәԛа һәстед хԝә де-баве хԝәрʹа гьли кә. Һәрге де йан баве тә дьхԝазьн тә бькьнә нава проблемед хԝә, бе шәрʹ-дәʹԝ ԝанарʹа бежә, ԝәки әв йәк ча сәр тә һʹӧкӧм дькә. Ле һәрге тәрʹа чәтьн ә ве йәке бежи, тӧ дькари ԝанрʹа нәʹмә бьньвиси.

Дәрһәԛа һәстед хԝә, һәвале хԝәйи бь итʹбаррʹа бежә. Чахе һәйә әв кәс, кʹе һазьр ә гӧһ бьдә тә, тәрʹа ида дьһа һеса дьбә. Кʹьтеба Пирозда те готьне кӧ «һәвал һәр гав һʹьз дькә, бьра буйә бона рʹожа охьрме гьран» (Мәтʹәлок 17:17).

Дәрһәԛа һәстед хԝә Әʹфьрандаре хԝәрʹа гьли кә. Әԝ һәр тʹьм һазьр ә гӧһ бьдә тә (Зәбур 65:2). Кʹьтеба Пирозда те готьне, ԝәки һун дькарьн «һʹәму хәмед хԝә бавежьнә сәр ԝи, чьмки әԝ бона ԝә хәм дькә» (1 Пәтрус 5:7).

• Гәло тәйе бькарьбуйа тʹәви дийа хԝә, йан баве хԝә рʹьһʹәт хәбәр да?

• Бь тʹәхмина тә кʹижан һәвале тәйи незик, фьрԛи тʹӧнә жь тә мәзьнтьр ә йан ԝәкә тәйә, дькарә пьштгьрийа тә бькә?

• Дәрһәԛа кʹижан тьштед конкрет тӧ дькари Хԝәдерʹа дӧа бьки?

2. Һини гӧһастьна бә

Жь бо һәвԛәтандьна де-баве тә, дьбәкә тәрʹа лазьм бә һини мала тʹәзә би, мәкʹтәба тʹәзә, щурʹе әʹмьре тʹәзә ӧса жи һәвалед тʹәзә. Әԝ йәк стресәкә мәзьн пешда тинә у дькарә ӧса бе кʹьфше, кӧ әʹмьре тәда һәр тьшт пашопе дьчә. Дәрәщәкә ӧсада гәло чь дькарә али тә бькә? Дина хԝә бьдә сәр ве йәке, ԝәки ча һини ԝан гӧһастьна би.

• Кʹижан гӧһастьнәкә мәзьн тӧ мәщбур буйи бьки, гава де-баве те һәв ԛәтийан?

• Чь тӧ дькари бьки сәва кӧ тәрʹа һеса бә һини ԝан гӧһастьна би?

3. Нав хԝәда һʹӧнӧред баш бьвинә

Рʹаст ә һәвԛәтандьна де-баве тә дькарә бәрхԝәкʹәтьне пешда бинә, ле ӧса жи әԝ дькарә али тә бькә һʹӧнӧред ԛимәт нав хԝәда бьвини. Әв йәк ӧса жи дькарә али тә бькә, нав хԝәда һʹӧнӧред тʹәзә бьвини. Щереми де-баве кʹижани һәв ԛәтийан гава әԝ 13 сали бу ӧса дьбежә: «Жь бо һәвԛәтандьна де-баве мьн әз дьһа бумә йәки щабдар. Әз бьре хԝә мәзьнтьр бум, ләма жи мьн гәрәке али дийа хԝә бькьра у ӧса жи мьԛати бьре хԝә бума».

• Жь бо һәвԛәтандьна де-баве хԝә, тә чь һʹӧнӧред ԛимәт нав хԝәда дит?

• Кʹижан һʹӧнӧр тӧ дьхԝази нав хԝәда пешда бини?