Кʹьтеба Пироз Чь Дьбежә Дәрһәԛа Зарʹбәркьрьне?

Щаба Кʹьтеба Пироз

Кʹьтеба Пирозда хәбәра «зарʹбәркьрьн» тʹӧнә йә. Ле гәләк рʹезед Кʹьтеба Пироз зәлал дьдьнә кʹьфше, кӧ ньһерʹандьна Хԝәде ча нә сәр жийина бәнда у һәла һе сәр жийина зарʹа зьке деда жи.

Жийин пʹешкʹеша жь Хԝәде йә (Дәстпебун 9:7; Зәбур 36:10). Хԝәде жийина һʹәму бинбәра ԛимәт дькә, һәла һе жийина зарʹа нәбуйи жи. Ләма һәрге кәсәк һʹәмде хԝә зарʹа нәбуйи бькӧжә, әв те һʹәсабе кӧ әԝи мәрьв кӧштийә.

Хԝәде ԛанунәкә ӧса дабу Исраелийа: «Гава мәрьв һәврʹа шәрʹ кьн у дәрб жьна дӧһʹали кʹәвә, зарʹа ԝе ԝәʹдә зутьр бьбә у зьрарәкә майин тʹӧнәбә, һьнге бьра мере ԝе чьԛас кӧ жь ԝан бьхԝазә, бь ԛьрара һʹакьмтийе бе дайине. Ле һәгәр зьрарәк бьбә, һьнге гәрәке әʹмьр жь бәр әʹмьрва бә» (Дәркʹәтьн 21:22, 23).a

• Кʹәнге жийина бәндә дәстпедьбә?

• Гәло Хԝәде ԝе бьбахшинә ԝан мәрьва, йед кӧ зарʹ бәркьрьнә?

• Гәло зарʹбәркьрьн изьн ә, чахе жийина де йан зарʹе бьн ԛәзийеда нә?

Кʹәнге жийина бәндә дәстпедьбә?

Чахе зьке деда әмбирйо чедьбә, Хԝәде ида һʹәсаб дькә, ԝәки әԝ бинбәре сах ә. Әԝи Кʹьтеба Пирозда әʹйан кьрийә, ԝәки зарʹа зьке деда кәсе башԛә йә. Дина хԝә бьдьнә чәнд мәсәла, жь кʹижана кӧ те кʹьфше, ԝәки Хԝәде фьрԛийе накә ортʹа зарʹа зьке деда у зарʹа дьнекʹәти.

• Даԝьд Пʹадша Хԝәдерʹа гот: «Һе дь малзарок деда чʹәʹвед тә әз дитьм» (Зәбур 139:16, ИМ). Хԝәде һәла һе пешийа буйина Даԝьд, ԝи һʹәсаб дькьр мәрьв.

• Хԝәде бона Йерәмйа пʹехәмбәр шьхӧләкә мәхсус һазьр кьрьбу, гава әԝ һәла һе зьке деда бу. Хԝәде ԝирʹа гот: «Бәри кӧ дь зьке дайкеда шькьл бьдьм тә, тә нас кьрьм у бәри кӧ тӧ бьбә, тә пироз кьрьм; тә жь нәтәԝәйанрʹа кьрьм пʹехәмбәр» (Йерәмйа 1:5).

• Ньвискʹарәки Кʹьтеба Пироз Луԛа, һʹәким бу. Әԝи сәр зьмане Йунани дәрһәԛа зарʹа нәбуйи ӧса жи дәрһәԛа зарʹа дьнекʹәти хәбәрәк дьда хәбате (Луԛа 1:41; 2:12, 16).

Гәло Хԝәде ԝе бьбахшинә ԝан, йед кӧ зарʹ бәрхԝә кьрьнә?

Әԝед кӧ зарʹ бәрхԝә кьрьнә, дькарьн бахшандьна Хԝәде бьстиньн. Һәрге әԝана ньһа жийине ԛимәт кьн, чаԝа Хԝәде дьхԝазә, ида нәлазьм ә хԝә нәһәԛ кьн. Кʹьтеба Пироз дьбежә: «Дьлшәԝат у р›ә›м ә Хӧдан [Йаһоԝа, ДТʹ], ... Чьԛас р›оһьлат жь р›оавайе дуртьр ә, һаԛаси жи гӧнәйед мә жь мә дур хьсти нә»b (Зәбур 103:8-12). Йаһоԝа ԝе бьбахшинә ԝан һʹәмуйа, йед кӧ гӧнед хԝә тʹобә кьрьнә, һәла һе ԝан жи йед кӧ зарʹ бәрхԝә кьрьнә (Зәбур 86:5).

Гәло, изьн ә зарʹе бәр бькьн, һәрге жийина де йан жи йа зарʹе бьн ԛәзийеда нә?

Һәрге кәсәк зарʹе бәр бькә жь бо ԝе мәʹнийе, кӧ жийина де йан зарʹе дьԛәԝьмә бьн ԛәзийеда нә, әԝ нькарә һәԛ дәре ль сәр һʹиме ԝе йәке, чь кӧ Кʹьтеба Пироз дәрһәԛа жийина зарʹа нәбуйи дьбежә.

Ле чь бькьн һәрге ԝи чахи, гава зарʹ ида гәрәке бьбә, дохдьр дьбежьн, ԝәки нькарьн һьм зарʹе хьлаз кьн, һьм жи де, у гәрәке бьжберьн кʹижане хьлаз кьн? Дәрәщед ӧсада, әԝед кʹе щабдар ьн бона ԝан, хԝәха гәрәке әве йәке сафи кьн.