Ль Гора Кʹьтеба Пироз Ча Гәрәке бона Де-Бавед Хԝәйә Әʹмьрда Мәзьн Хәм Бькьн?

Щаба Кʹьтеба Пироз

Щабдарийа зарʹа әԝ ә, кӧ бона де-бавед хԝәйә әʹмьрда мәзьн хәм бькьн. Кʹьтеба Пирозда те готьне, ԝәки зарʹ гәрәке «пешийе мала хԝәда һин бьн чаԝа хԝәденасийа хԝә бьдьнә кʹьфше у бь ви тьһәри дәйне де у баве хԝә вәгәрʹиньн, чьмки әв йәк ль Хԝәде хԝәш те» (1 Тимотʹейо 5:4). Чахе зарʹ бона де-бавед хԝәйә әʹмьрда мәзьн хәм дькьн, бь ԝе йәке әԝана тʹәмийа Кʹьтеба Пироз тиньн сери, ԝәки ԛәдьре де-баве хԝә бьгьрьн (Әфәси 6:2, 3).

Кʹьтеба Пирозда рʹебәрийа конкрет найе дайине, кӧ чаԝа бона де-бавед хԝәйә әʹмьрда мәзьн хәм бькьн. Ле диса жи ве кʹьтебеда һәнә мәсәлед ԝан жьн у меред амьн, йед кӧ рʹасти дәрәще ӧса һатьнә. Хенщи ԝе йәке әв кʹьтеб ширәтед керһати дьдә ԝан, кʹижан кӧ мьԛати де-баве хԝәйи әʹмьрда мәзьн дьбьн.

• Чаԝа ԝәʹде бәре һьнә мәрьв бона де-бавед әʹмьрда мәзьн хәм дькьрьн?

• Кʹижан ширәтед жь Кʹьтеба Пироз дькарьн аликʹарийе бьдьн ԝан, йед кӧ мьԛати де-бавед әʹмьрда мәзьн дьбьн?

• Гәло Кʹьтеба Пироз рʹебәрийа конкрет дьдә, ԝәки чаԝа гәрәке мьԛати де-бавед әʹмьрда мәзьн бьн?

Чаԝа ԝәʹде бәре һьнә мәрьв бона де-бавед әʹмьрда мәзьн хәм дькьрьн?

Ԝана әв йәк, ль гора дәрәща хԝә, бь щурʹә-щурʹә метода дькьрьн.

• Усьв жь баве хԝәйи әʹмьрда мәзьн, Аԛуб, дур дьжит. Гава мәщал чебу, Усьв ӧса кьр, ԝәки Аԛуб незики ԝи бьжи. Усьв бона щи-сьтʹар, хԝарьн у бехофийа баве хԝә хәм кьр (Дәстпебун 45:9-11; 47:11, 12).

• Рʹутʹ дәрбази ԝәлате хасийа хԝә бу у бь хирәт дьхәбьти, ԝәки ле хԝәйи кә (Рʹутʹ 1:16; 2:2, 17, 18, 23).

• Иса, пешийа мьрьна хԝә сафи кьр, ԝәки ке ԝе мьԛати дийа ԝи Мәрйәме бә, йа кӧ ԝи чахи ида жьнәби бу (Йуһʹәнна 19:26, 27).a

Кʹижан ширәтед жь Кʹьтеба Пироз дькарьн аликʹарийе бьдьн ԝан, йед кӧ мьԛати де-бавед әʹмьрда мәзьн дьбьн?

Чахе мьԛати де-баве әʹмьрда мәзьн дьбьн, әв йәк гәләк проблемед физики у емосийали пешда тинә. Ле принсипед Кʹьтеба Пироз аликʹарийе дьдьн, ԝәки тәйах кьн.

• Ԛәдьре де-баве хԝә бьгьрә.

  Кʹьтеба Пироз чь дьбежә: «Ԛәдьре де у баве хԝә бьгьри» (Дәркʹәтьн 20:12).

  Чаԝа дькарьн әве принсипе бьдьнә хәбате? Бьһелә, ԝәки де-баве тә һьнә дәрәщед жийина хԝә хԝәха контрол бькьн. Хенщи ԝе йәке чьԛас дьбә бьһелә, ԝәки әԝана хԝәха сафи кьн чьда али ԝан бькьн. Ӧса жи ԛәдьр һьндава ԝанда бьдә кʹьфше бь ԝе йәке, кӧ тʹьме һазьр бә ԝан тьштада али ԝан бьки, чьда әԝана һʹәԝщә нә.

• Де-баве хԝә фәʹм бькә у бьбахшинә ԝан.

  Кʹьтеба Пироз чь дьбежә: «Фәʹме ԛәнщ мерьв жь һерсе пашда дехә у рʹуспитийа ԝи ԛӧсур-нәньһерʹандьн ә» (Мәтʹәлок 19:11).

  Чаԝа дькарьн әве принсипе бьдьнә хәбате? Щарна ӧса дьбә, ԝәки де-баве тәйи әʹмьрда мәзьн тьштәки ӧса дьбежьн, чь кӧ дьле тә дешинә, йан жи әԝана щәфе тә ԛимәт накьн. Ԝи чахи пьрсе бьдә хԝә: «Һәрге әз дәԝса ԝан бума у мина ԝан нәхԝәш бума, мьне хԝә ча тʹәхмин кьра?» Һәрге тӧ ԛәԝате дьди хәбате, ԝәки ԝана фәʹм ки у бьбахшини, ԝи чахи тӧйе ве дәрәще кӧ ӧса жи чәтьн ә, дьһа чәтьн нәки.

• Тʹәви йед дьн шеԝьр кә.

  Кʹьтеба Пироз чь дьбежә: «Бе ширәт мәрәм у тʹьвдир бәтал дьбьн, ле бь сайа гәләк ширәткʹара әԝ тенә сери» (Мәтʹәлок 15:22).

  Чаԝа дькарьн әве принсипе бьдьнә хәбате? Леколине бькә у пебьһʹәсә, ԝәки чаԝа де-баве тә дькарьн сьһʹәт-ԛәԝата хԝә хԝәй кьн. Пебьһʹәсә, кӧ шәһәре ԝәда чь щурʹә аликʹари бона мәрьвед әʹмьрда мәзьн те дайине. Тʹәви ԝан мәрьва бьшеԝьрә, йед кӧ мьԛати де-баве хԝәйи әʹмьрда мәзьн дьбун. Һәрге хушк-бьред тә һәнә, тʹәви һәв бьщьвьн у дәрһәԛа һʹәԝщед де-баве хԝә шеԝьр кьн. Тʹәвайи бьфькьрьн, ԝәки ча мьԛати ԝан бьн у чаԝа әԝе щабдарийе нав һәвда пʹарәвәкьн.

  

• Сәрԝахт бә.

  Кʹьтеба Пироз чь дьбежә: «Сәрԝахти тʹәви шкәстийа йә» (Мәтʹәлок 11:2)

  Чаԝа дькарьн әве принсипе бьдьнә хәбате? Синоре хԝә фәʹм бькә. Мәсәлә, ԝәʹдә у ԛәԝата һәр кәси синоркьри йә. Әԝ йәк ԝе али тә бькә тедәрхи, ԝәки тӧ бь реали чь у чьԛас дькари бона де-баве хԝә бьки. Һәрге жь щабдарийед хԝә тӧ ԛьдум дькʹәви, аликʹарийе жь нәфәред мале йан жь һʹәкима бьхԝазә.

• Мьԛати хԝә бә.

  Кʹьтеба Пироз чь дьбежә: «Бәдәна тʹӧ кәси бәр чʹәʹве ԝи нә рʹәш ә, ле ԝе тʹер дькә у хԝәй дькә» (Әфәси 5:29).

  Чаԝа дькарьн әве принсипе бьдьнә хәбате? Рʹаст ә, тӧ щабдар и мьԛати де-баве хԝә би, ле ӧса жи тӧ гәрәке бона һʹәԝщед хԝә у нәфәред хԝә хәм бьки, һәрге зәԝащеда ни. Тӧ гәрәке рʹьнд хԝарьна хԝә бьхԝи. Епʹещә һеса бә у хәԝа хԝә бьстинә (Ԝаиз 4:6). Чахе мәщал һәйә, ԝәʹде хԝә ӧса дәрбаз кә, кӧ ԛәԝата хԝә бини щи. Әв йәк ԝе али тә бькә физикида у емосийалида ԛәԝи би, кӧ бькарьби һе рʹьнд мьԛати де-баве хԝә би.

Гәло Кʹьтеба Пироз рʹебәрийа конкрет дьдә, ԝәки чаԝа гәрәке мьԛати де-баве әʹмьрда мәзьн бьн?

Кʹьтеба Пирозда рʹебәрийед конкрет найе дайине, кӧ чаԝа зарʹ гәрәке мьԛати де-бавед хԝәйи әʹмьрда мәзьн бьн. Һьнә малбәтада зарʹ хԝәха мьԛати де-бавед хԝә дьбьн. Ле щарна әԝана дькарьн кәсәки бьвиньн, ԝәки пʹәрәти мьԛати де-баве ԝан бә. Әԝ йәк дәрәщева гьредайи йә. Нәфәред мале дькарьн тʹәвайи тʹоп бьн у сафи кьн, ԝәки бона һәр кәси чь ԝе дьһа баш бә (Галати 6:4, 5).