Жь дәркʹәтьна Мьсьре дӧһ мәһ шунда Исраели гьһиштьнә Чʹийайе Синайе у ԝедәре чадьре хԝә лехьстьн. Йаһоԝа гази Муса кьр. Әԝ һьлкʹьшийа сәр чʹийе у Йаһоԝа готә ԝи: «Мьн Исраели хьлаз кьрьн. Һәрге әԝана гӧһ бьдьнә мьн у ԛанунед мьн хԝәй кьн, ԝе бьбьнә щьмәʹта мьн ә мәхсус». Муса пашда вәгәрʹийа у Исраелийарʹа гот дәрһәԛа ԝе йәке, чь Йаһоԝа ԝирʹа гот. Гәло ԝана чь щаб да? Ԝана гот: «Әме һәр готьнед Йаһоԝа биньн сери».

Муса диса һьлкʹьшийа сәр чʹийе. Ԝедәре Йаһоԝа готә ԝи: «Рʹожа сьсийа әзе тʹәви ԝә хәбәр дьм. Бежә щьмәʹте, ԝәки әԝана фәсал бьн у незики Чʹийайе Синайе нәбьн». Муса жь чʹийа вәгәрʹийа у готә Исраелийа, ԝәки һазьр бьн гӧһ бьдьнә Йаһоԝа.

Рʹожа сьсийа, Исраели сәр чʹийе бьруськ у әʹԝре рʹәш дитьн. Ӧса жи ԝана гьрмина әʹԝра у дәнге борʹийе бьһистьн. Паше Йаһоԝа агьрда пәйайи сәр чʹийа бу. Гава Исраели әԝ йәк дитьн әԝана тьрса ләрьзин. Ду сәр чʹийе тʹоп бьбу у чʹийа педа дьһәжийа. Дәнге борʹийе һе зедә у зедә дьбу. Паше Хԝәде гот: «Әз Йаһоԝа мә. Сәре хԝә бәр хӧданед дьн данәйньн».

Муса диса һьлкʹьшийа сәр чʹийе у ԝедәре Йаһоԝа ԛанун да ԝи, сәва щьмәʹт бьзаньбә чь бькә у чь щурʹә Хԝәдерʹа хьзмәт кә. Муса әԝ ԛанун ньвисин у паше Исраелийарʹа хԝәнд. Ԝана соз да: «Әме һәр готьнед Йаһоԝа биньн сери». Рʹаст ә, ԝана соз данә Хԝәде, ле гәло паше әԝ созе хԝә анинә сери?

Йаһоԝа готә Муса: «Һьлкʹьшә сәр чʹийе. Әзе ԛанунед хԝә сәр сәлед кәвьр лекьм у бьдьмә тә. Муса һьлкʹьшийа сәр чʹийе, 40 рʹожа у 40 шәв ԝедәре ма. Һʹәта Муса ԝедәре бу, Хԝәде Дәһә Ԛанунед фәрз сәр сәлед кәвьр лекьр у да ԝи.

Һьнәк ԝәхт шунда Исраелийа дәстпекьрьн бьфькьрьн, ԝәки Муса ԝана һиштийә. Ԝана готә Һарун: «Әм дьхԝазьн, ԝәки кәсәк рʹебәрийе мә бькә. Сәва мә хӧданәки чекә!» Һарун гот: «Зерʹе хԝә биньн щәм мьн». Әԝи зерʹ һʹәланд у голька зерʹ чекьр. Гава щьмәʹт әԝ голька зерʹ дит, ԝана гот: «Әв гольк Хԝәдайе мә йә, әԝи мә жь Мьсьре дәрхьст!» Ԝана дәстпекьр сәре хԝә бәр гольке дайньн, бәр дьрʹәԛьсин у ша дьбун. Ле гәло әԝ йәк рʹаст бу? На, чьмки ԝана соз дабу, ԝәки тʹәне Йаһоԝарʹа хьзмәт кьн. Пе кьред ӧса, ԝана созе хԝә пʹепәс кьрьн.

Йаһоԝа кьред Исраелийа дит у готә Муса: «Пәйайи жере бә, әԝ щьмәʹт гӧрʹа мьн накә у сәре хԝә бәр хӧдане ԛәлп датинә». Муса жь чʹийе пәйа бу у дӧ кәвьред ԛануне дәсте ԝида бун.

Гава әв жь чʹийе пәйа бу, әԝи сьтрана щьмәʹте бьһист, дит ча щьмәʹт дьрʹәԛьсә у сәре хԝә бәр гольке датинә. Муса гәләк һерс кʹәт, әԝи әв дӧ кәвьред ԛануне авитә әʹрде у кәвьр һурдәхԝәши бун. Әԝи дәрберʹа әԝ һәйкәле зерʹ һурдәхԝаши кьр. Паше әԝи Һарун пьрси: «Әԝе щьмәʹте ча карьбу зоре тә бькә, ԝәки тә гӧнәки ӧса кьр?» Һарун гот: «Һерс нәкʹәвә. Тӧ хԝәха әԝе щьмәʹте нас дьки. Ԝана хԝәст, ԝәки сәва ԝан хӧданәки чекьм, мьн жи зерʹе ԝан авитә агьр у гольк чебу». Һарун гәрәке ӧса нәкьра. Муса диса һьлкʹьшийа сәр чʹийе у жь Йаһоԝа лава кьр, ԝәки бьбахшинә щьмәʹте.

Йаһоԝа бахьшандә ԝан, йед кӧ дьхԝәстьн гӧрʹа ԝи бькьн. Дьвини чьԛас фәрз бу, ԝәки Исраелийа гӧрʹа Муса бькьрана?

Кʹәнге Муса сәр Чʹийайе Синайе бу, Йаһоԝа готә ԝи, ԝәки әԝ гәрәке коне мәхсус ава кә, демәк коне пироз. Ԝи конида Исраелийа дькарьбун Йаһоԝарʹа хьзмәт кьн. Һәр гав кʹәнге әԝана дәрбази щики дьн дьбун, ԝана дькарьбу әԝ кон тʹоп кьрана у тʹәви хԝә бьбьрана.

Йаһоԝа гот: «Бежә щьмәʹте, ԝәки әԝана чь дькарьн, бьра бьдьн бона аликʹарийа авакьрьна коне пироз». Исраелийа зерʹ, зив, сьфьр, кәвьред бьһа у хьшьр демәк гӧһар, гӧстилк дьанин. Ԝана ӧса жи һьри, кʹьтан, чʹәрме һʹәйԝана у гәләк тьштед дьн дьанин. Әԝана дәствәкьри бун у гәләк пʹешкʹеш дьанин, ләма жи Муса готә ԝан: «Һаԛас бәс ә! Ида нәйньн».

Гәләк жьн у меред дәстпешә, шьхӧле авакьрьнеда аликʹари дьдан. Йаһоԝа билани да ԝан, ԝәки ԝи шьхӧли биньн сери. Һәр кәсәки тьштәк дькьр, тʹел дьрьсийан, пʹәрчʹә чедькьрьн, сәр пʹәрчʹә нәԛьш дькьрьн, сәр кәвьра у сәр зерʹа дьхәбьтин, у ӧса жи дар дьнәԛьшандьн.

Щьмәʹте коне пироз һәма ӧса ава кьр, чаԝа Йаһоԝа готә ԝан. Ԝана пʹәрʹде бәдәԝ чекьр, ԝәки кон бькьнә дӧ пʹара, Щийе Пироз у Щийе Һәри Пироз. Сьндоԛа пәймане, йа кӧ жь дара акасийе у жь зерʹ һатьбу чекьрьне, данин Щийе Һәри Пироз. Ле шәмдана зерʹ, тәхтә, у горигәһа бона шәԝьтандьна бьхуре, данин Щийе Пироз. Дәрва, бәр кон, тʹаса сьфьр у горигәһа мәзьн һәбу. Сьндоԛа пәймане дькьрә бира Исраелийа, ԝәки әԝана гәрәке гӧрʹа Йаһоԝада бьминьн, чаԝа ԝана соз дабу ԝи. Тӧ зани чь те һʹәсабе пәйман? Әԝ те һʹәсабе, чахе созе мәхсус дьди.

Йаһоԝа Һарун у кӧрʹед ԝи жьбартьн, ԝәки әԝана чаԝа кʹаһин конда хьзмәт кьн. Әԝана гәрәке мьԛати кон буна у ԝедәре Йаһоԝарʹа ԛӧрбан бьдана. Ле тʹәне изьна Һарун һәбу, ча сәрәккʹаһин бькʹәвә Щийе Һәри Пироз. Әԝ сале щарәке дькʹәтә ԝедәре, ԝәки Йаһоԝарʹа ԛӧрбане бьдә сәва гӧне хԝә, гӧне нәфәред хԝә у бона тʹәмамийа Исраеле.

Исраелийа паши дәркʹәтьна жь Мьсьре, саләкеда авакьрьна коне пироз хьлаз кьрьн. Ида щи һәбу, кʹидәре ԝана дькарьбу Йаһоԝарʹа хьзмәт кьн.

Йаһоԝа коне пироз пе рʹумәта хԝә тʹьжә кьр, у әʹԝр дани сәр кон. Һәрге әʹԝр сәр сәре кон бу, Исраели гәрәке жь ԝи щийи нәчуна, ле һәрге әʹԝр жь кон һьлдькʹьшийа жоре, ԝи чахи ԝана фәʹм дькьр, ԝәки гәрәке рʹекʹәвьн. Ԝана коне пироз тʹоп дькьрьн у пәй әʹԝр дьчун.

Исраели жь Чʹийайе Синайе, бәрʹийа Паранерʹа чун һʹәта щийе бь наве Кадәш. Ԝедәре Йаһоԝа готә Муса: «Донздәһ мерʹа бьшинә, жь һәр ԛәбиләке мәрьвәки бьшинә, ԝәки щәʹсусийа әʹрде Кәнане бькьн, йа кӧ әзе бьдьмә Исраелийа». Муса 12 мер жьбарт у готә ԝан: «Һәрʹьн әʹрде Кәнане у пебьһʹәсьн әԝ әʹрд чаԝа йә, хԝәйи дәрәмәт ә йан бе бәр ә. Мәрьвед ԝи әʹрди ԛәԝат ьн йан сьст ьн, шәһәред ԝан һәнә йан чадьрада дьжин». Әԝ 12 щәʹсус чунә Кәнане, Йешу у Кʹаләб жи нав ԝан щәʹсусада бун.

Паши 40 рʹожи әԝана пашда вәгәрʹийан у тʹәви хԝә һежир, һʹьнар у тьри анин. Щәʹсуса гьли кьр: «Әʹрде ԝан баш ә, ле әԝана гәләк ԛәԝат ьн у диԝаре шәһәред ԝан зәʹф бьльнд ьн». Ле Кʹаләб гот: «Әм дькарьн ԝана алт кьн. Ԝәрен әм һәма ньһа жи һәрʹьн!» Тӧ зани чьрʹа Кʹаләб ӧса гот? Чьмки Кʹаләб у Йешу итʹбарийа хԝә Йаһоԝа дьанин. Ле дәһ щәʹсусед дьн готьн: «На! Мәрьвед ԝедәре гәләк тәрʹьки нә! Мә хԝә мина кӧлийа тʹәхмин дькьр бәр ԝана».

Исраели бәр хԝә кʹәтьн у сьст бун. Ԝана дәстпекьр бькьнә кӧтә-кӧт у һәврʹа готьн: «Ԝәрен әм хԝәрʹа рʹебәрәки дьн бьжберьн у пашда һәрʹьн Мьсьре. Чьрʹа әм гәрәке һәрʹьн ԝи щийи у бенә кӧштьне?» Йешу у Кʹаләб готьн: «Мьԛабьли Йаһоԝа рʹанәбьн у нәтьрсьн. Йаһоԝа ԝе мә хԝәй кә». Ле Исраелийа гӧһ нәданә ԝан. Һәла һе ԝана хԝәст Йешу у Кʹаләб бькӧжьн!

Һьнге Йаһоԝа чь кьр? Әԝи готә Муса: «Мьн һаԛас тьшт бона Исраелийа кьр, ле йәкә ԝана диса гӧһ нәдьданә мьн. Сәва ԝе йәке әԝана ԝе 40 сала бәрʹийеда бьминьн, һʹәта бьмьрьн. Тʹәне зарʹед ԝан, у ӧса жи Йешу у Кʹаләб ԝе бькʹәвьнә ԝи әʹрди, кʹижан мьн ԝанрʹа соз дайә».

Һьнәк ԝәхт шунда, чахе Исраели һе бәрʹийеда бун, Ԛорах, Датʹан, Абирам у 250 меред дьн мьԛабьли Муса дәркʹәтьн. Ԝана готә ԝи: «Бәсә, әм вәстийа нә! Һʹәта кʹәнге те сәрԝертийе мә бьки у Һарун жи кʹаһинтийе мә бькә? Йаһоԝа тʹәви мә һәр кәси йә, нә кӧ тʹәне тʹәви тә у Һарун ә». Әԝ йәк Йаһоԝа хԝәш нәһат. Хԝәде һʹәсаб кьр, ԝәки әԝана мьԛабьли ԝи рʹабун, нә кӧ мьԛабьли Һарун у Муса.

Муса готә Ԛорах у пәйчуйед ԝи: «Сьбе бьхурдане хԝә тʹәви бьхуре һьлдьн у ԝәрен бәр коне пироз. Йаһоԝа ԝе нишан кә, әԝи кʹе жьбартийә».

Рʹожа дьн Ԛорах у 250 пәйчуйед ԝи чун, ԝәки бәр коне пироз рʹасти Муса бен. Ԝедәре ԝана бьхур шәԝьтандьн, чаԝа кӧ кʹаһина дькьрьн. Ԝе дәме Йаһоԝа готә Муса у Һарун: «Дури Ԛорах у пәйчуйед ԝи бьн».

Чахе Ԛорах чу бәр коне пироз, кʹидәре Муса бу, Датʹан, Абирам у нәфәред ԝан нәхԝәстьн һәрʹьн ԝедәре. Йаһоԝа готә Исраелийа, ԝәки хԝә дур бьгьрьн жь чадьред Ԛорах, Датʹан у Абирам. Әԝана перʹа-перʹа дури ԝан чун. Датʹан, Абирам у нәфәред ԝан бәр чадьред хԝә сәкьни бун. Ньшкева әʹрд вәбу у әԝана теда чун. Паше, жь коне пироз агьр дәркʹәт, Ԛорах у 250 пәйчуйед ԝи шәԝьтанд.

Паше Йаһоԝа готә Муса: «Шьвдара һәр сәрԝеред бәрәка һьлдә у наве ԝана сәр шьвдара ԝан бьньвисә. Ле сәр шьвдара жь бәрәка Леԝи, наве Һарун бьньвисә. Ԝан шьвдара дайнә коне пироз у әз кʹе бьжберьм, шьвдара ԝи ԝе гӧл бьдә».

Рʹожа дьн Муса һәр шьвдар дәрхьст у нишани сәрԝера кьр. Шьвдара Һарун гӧл дабу у бәр гьртьбу. Ӧса Йаһоԝа избат кьр, ԝәки әԝи Һарун жьбартийә ча кʹаһин.

Исраели ԝәкә 40 сала бәрʹийеда ман. Ԝана гәләк шәһәр алт кьрьн. Ньһа әԝана незики Моԝабе щиԝар бунә, бәр Чʹәме Урдӧне. Әԝ ԝәʹдә бу кʹәнге әԝана гәрәке бькʹәтана Әʹрде Создайи. Балаԛ, пʹадше Моԝабе дьтьрсийа, ԝәки әԝана дькарьн әʹрд жь ԝи бьстиньн. Ләма жи әԝи мерәки, наве кʹижани Бьлам бу, тʹәглифи Моԝабе кьр, ԝәки әԝ ньфьрʹа Исраелийа бькә.

Ле Йаһоԝа готә Бьлам: «Ньфьрʹа Исраелийа нәкә». Ләма жи Бьлам нәчу Моԝабе. Балаԛ Пʹадша щара дӧда ԝи тʹәглиф кьр у соз да, ԝәки һәр тʹьшт чь кӧ әԝ бьхԝазә ԝе бьдә ԝи. Ле Бьлам диса жи ԛайил нәбу. Паше Хԝәде готә ԝи: «Тӧ дькари һәри, ле гәрәке тʹәне ԝе йәке бежи, чь кӧ әзе бежьмә тә».

Бьлам кʹәре хԝә сийар бу у чу бәрбь Моԝабе. Рʹаст ә Йаһоԝа готә ԝи, ԝәки әԝ ньфьрʹа Исраелийа нәкә, ле әԝи диса жи сафи кьр ньфьрʹа ԝана бькә. Мәләке, Йаһоԝа, ԝәкә се щара сәр рʹийа ԝи сәкьни. Бьлам мәләк нәдьдит, ле кʹәре ԝи дьдит. Щарʹа пешийе кʹәнге кʹәр мәләк дит, әԝи рʹийа хԝә гӧһаст у чу бәрбь чоле. Щарәкә дьн, кʹәр бәрбь диԝер чу у ньге Бьлам ӧса спартә диԝер, ԝәки һʹьнщьрʹанд. Щара хьлазийе, кʹәр ортʹа рʹеда хԝә авитә әʹрде. Һәр щара Бьлам кʹәре хԝә пе дар дькʹӧта.

Паше Йаһоԝа ӧса кьр, ԝәки кʹәр дәстпекьр хәбәр дә. Кʹәр жь Бьлам пьрси: «Тӧ чьрʹа мьн дькʹӧти?» Бьлам гот: «Тә әз кьрьмә пекʹәни. Һәрге шур бал мьн һәбуйа, мьне сәре тә лехьста». Кʹәр готә ԝи: «Әԝа ида гәләк сал ә, әз кʹәре тә мә. Ԛә пешда мьн тьштәки ӧса сәре тә кьрийә?»

Паше Йаһоԝа ӧса кьр, ԝәки Бьлам мәләк бьвинә. Мәләк готә ԝи: «Нә Йаһоԝа пешда готә тә, ԝәки тӧ ньфьрʹа Исраелийа нәки». Бьлам гот: «Әре әз заньм, ԝәки әз нәһәԛ ьм, ләма жи әзе пашда вәгәрʹьм». Ле мәләк готә ԝи: «Тӧ дькари һәри Моԝабе, ле тʹәне ԝе йеке гәрәке бежи, чь кӧ Йаһоԝа бежә тә».

Гәло жь ԝе йәке Бьлам хԝәрʹа дәрс һьлда? На. Паши ԝе йәке жи Бьлам се щарʹа хԝәст ньфьрʹа Исраелийа бькә, ле дәԝсе Йаһоԝа ӧса кьр, ԝәки әԝи дӧа ԝана кьр. Ахьрийеда Исраелийа Моԝаб зәфт кьрьн у Бьлам һатә кʹӧштьне. Гәло ԝе дьһа баш нибуйа, һәрге Бьлам сәре-серида гӧрʹа Йаһоԝа бькьра?

Муса гәләк сал рʹебәрийа щьмәʹта Исраел дькьр, у ида әʹмьрда мәзьн бу. Йаһоԝа готә ԝи: «Тӧ нә әԝ мәрьв и, йе кӧ гәрәке щьмәʹта Исраел бькә Әʹрде Создайи. Ле әзе изьне бьдьмә тә, ԝәки тӧ ԝи әʹрди бьвини». Муса жь Йаһоԝа һиви кьр, ԝәки мәрьвәки дьн бьжберә, сәва кӧ рʹебәрийе щьмәʹта ԝи бькә. Йаһоԝа готә Муса: «Һәрʹә бал Йешу у бежә ԝи, ԝәки әԝе бьбә рʹебәр».

Муса готә Исраелийа, ԝәки әԝ бәр мьрьне йә у Йаһоԝа Йешу жьбарт, ԝәки ԝана бьвә Әʹрде Создайи. Муса готә Йешу: «Нәтьрсә, Йаһоԝа ԝе али тә бькә». Паши ԝе йәке ча Муса һьлкʹьшийа сәр Чʹийайе Нәбо, Йаһоԝа әԝ әʹрд нишани ԝи кьр, кʹижан соз дабу, ԝәки бьдә зӧрʹәта Бьраһим, Исһаԛ у Аԛуб. Муса 120 сали бу кʹәнге мьр.

Йаһоԝа готә Йешу: «Чʹәме Урдӧне дәрбаз бьн у һәрʹьнә Кәнане. Чаԝа мьн али Муса дькьр, әзе ӧса али тә бькьм. Ԛанунед мьн һәр рʹож бьхунә. Нәтьрсә. Мерхас бә. У ԝе йәке бькә, чь кӧ әзе тәрʹа бежьм».

Йешу дӧ щәʹсус шандә шәһәре Әриһайе. Сәре дьнда, әме һе зедә пебьһʹәсьн дәрһәԛа ԝе йәке чь ԝедәре ԛәԝьми. Гава әԝана вәгәрʹийан, готьн, ԝәки ньһа ԝәʹдәки баш ә бькʹәвьнә Кәнане. Рʹожа дьн, Йешу готә щьмәʹте, ԝәки чадьред хԝә тʹоп кьн. Ле пешийа щьмәʹте әԝи кʹаһин шанд, йед кӧ гәрәке сьндоԛа пәймане бьвьрана у бькʹәтана Чʹәме Урдӧне. Чʹемда ав ӧса тʹьжә бу, ԝәки жь чʹәм дәрдькʹәт. Ле гава ньге кʹаһина кʹәтә аве, чʹәм зьһа бу! Кʹаһин гьһиштьнә ортʹа чʹәм у сәкьнин, һʹәта кӧ тʹәмамийа щьмәʹте дәрбази алийе дьн бун. Чаԝа тӧ дьшьрмиш дьби, әԝ кʹәрәмәт кьрә бира ԝан дәрһәԛа ԝе йәке, чь кӧ Йаһоԝа бәр Бәʹра Сор кьр?

Паши һаԛас сал, Исраели гьһиштьнә Әʹрде Создайи. Ԝана гәрәке мал у шәһәр ава кьрана. Ӧса жи гәрәке әʹрд бещәр кьрана, рʹәзед тьрийа у шинкайа бахчәда дачькандана. Әʹрде Создайи гәләк баш бу сәва жийине, чьмки ԝедәре нан-хԝарʹьн тʹер-тʹьжә бу, ләма жи әԝ әʹрд һатә навкьрьне әʹрде шир у һьнгьв.

Чахе щәсусед Исраели чунә Әриһайе, әԝана мала жьнәкеда ман, наве ԝе Рʹәхаб бу. Пʹадше Әриһайе пеһʹәсийа у әскәред хԝә шандә мала Рʹәхабе. Әԝе дӧ щәсус сәр бане мала хԝә вәшарт, ле әскәрарʹа гот, ԝәки бьдьнә пәй ԝан, чьмки әԝана дәркʹәтьн у чун. Әԝе щәсусарʹа гот: «Әзе али ԝә бькьм, чьмки әз заньм, ԝәки Йаһоԝа тʹәви ԝә йә у әԝи әʹрди ԝе бьдә ԝә. Соз бьдьнә мьн, ԝәки һуне малбәта мьн хьлаз кьн».

Щәʹсуса готьнә Рʹәхабе: «Әм соз дьдьнә тә, ԝәки һʹәму кәсед, кӧ мала тәда бьн, ԝе зийане нәстиньн». Ԝана готә ԝе: «Бәне сор пʹәнщәрʹа хԝәва гьредә, ԝәки малбәта тә, бе хьлазкьрьне».

Рʹәхабе али щәʹсуса кьр, ԝәки жь пʹәнщәрʹа мала ԝе, пе тʹог дакʹәвьн. Пешийа кӧ һәрʹьнә бал Йешу, щәʹсус се рʹожа сәре чʹийе хԝә вәдьшартьн. Исраели Чʹәме Урдӧнерʹа дәрбаз бьбун у хԝә һазьр дькьрьн, ԝәки әԝи әʹрди зәфт кьн. Әриһа әʹрде пешийе бу, кʹижан ԝана гәрәке зәфт кьра. Йаһоԝа готә ԝан, ԝәки нава шәш рʹожада, рʹоже щарәке гәрәке дора ԝи шәһәри бьзьвьрʹьн. Ле рʹожа һʹәфта, әԝана һʹәфт щара дора шәһәр зьвьрʹин. Кʹаһина борʹийе дьхьстьн, ле әскәра бь дәнге ԛайим дькьрьнә ԛарʹә-ԛарʹ. Ԝи чахи диԝаред шәһәр жорда һатьн! Ле диԝаре мала Рʹәхабе, тʹьштәк пе нәһат. Рʹәхаб у малбәта ԝе хьлаз бун, чьмки әԝе баԝәрийа хԝә Йаһоԝа ани.

Әʹламәтийа дәрһәԛа зәфткьрьна Әриһайе, һатә бәлакьрьне нав тʹәмамийа мьләте Кәнане. Пʹадше ԝан мьләта сафи кьрьн тʹәвайи пешбәри Исраелийа шәрʹ кьн. Ле Гибони пе нетәкә дьн һатьнә бал Исраелийа. Әԝана кʹьнщед кәвьн хԝәкьрьн, һатьнә бал Йешу у готьн: «Әм жь ԝәлате дур һатьнә. Мә дәрһәԛа Йаһоԝа бьһистийә у дәрһәԛа ԝе йәке, чь кӧ әԝи бона ԝә Мьсьреда у Моԝабеда кьр. Соз бьдьнә мә, ԝәки һуне мә нәкʹӧжьн у әме бьбьнә бәрдәстийед ԝә».

Йешу баԝәрийа хԝә ԝана ани у ԛайил бу ԝана нәкӧжә. Паши се рʹожа Йешу пеһʹәсийа, ԝәки әԝана нә жь ԝәлате дур ьн, ле жь ԝәлате Кәнане нә. Йешу ԝана пьрси: «Чьрʹа ԝә әм хапанд ьн?» Ԝана гот: «Әм жь ԝә тьрсийан! Әм заньн, ԝәки Йаһоԝа Хԝәдайе ԝә бона ԝә шәрʹ дькә. Лава дькьн мә нәкӧжьн». Йешу созе хԝә ани сери у изьн нәда, ԝәки әԝана бенә кӧштьне.

Паши ԝе йәке, пенщ пʹадшед Кәнане у әскәред ԝан хԝәстьн Гибонийа зәфт кьн. Ле Йешу у әскәред ԝи тʹәмамийа шәве рʹе кʹәтьбун, сәва кӧ Гибонийа хьлаз кьн. Сьбәһе зу шәрʹе ԝан дәстпебу. Кәнани рʹәвин, ԝәки хԝә хьлаз кьн, ле Йаһоԝа тәйрока ԛайим сәр ԝанда баранд. Паше Йешу жь Йаһоԝа лава кьр, ԝәки рʹо нәчә ава. Чьрʹа Йешу жь Йаһоԝа һиви кьр, ԝәки тьштәки ӧса бькә, чь кӧ тʹӧ щар нәԛәԝьмибу? Чьмки әԝи баԝәрийа хԝә Йаһоԝа дьани. Һʹәта кӧ Исраелийа тʹәви пʹадшед Кәнанийа у әскәред ԝан шәрʹ дькьрьн, тʹәмамийа ԝе рʹоже, рʹо нәдьчу ава.

Йешу гәләк сал рʹебәри щьмәʹта Йаһоԝа дькьр, әԝ 110 сали бу чахе мьр. Һʹәта Йешу сах бу, Исраелийа Йаһоԝарʹа хьзмәт дькьрьн. Ле паши мьрьна ԝи, әԝана чʹәʹв данә Кәнанийа у дәстпекьрьн мина ԝана сәре хԝә бәр пʹута дайньн. Сәва ԝе йәке кӧ Исраели Йаһоԝарʹа амьн нәман, Әԝи изьн да пʹадше Кәнане, бь наве Йаԝин, ԝәки әʹмьре ԝан чәтьн кә. Щьмәʹта Исраел лава дькьр, ԝәки Йаһоԝа али ԝан бькә. Ләма жи Йаһоԝа рʹебәре тʹәзә, бь наве Барак, сәр ԝан кʹьфш кьр. Барак гәрәке али щьмәʹте бькьра, ԝәки әԝана вәгәрʹьн бал Йаһоԝа.

Кʹӧлфәтәкә пʹехәмбәр, наве кʹижани Дәбора бу, мәрьв шандьн, ԝәки әʹламәтикә фәрз жь Йаһоԝа бежьнә Барак. Ԝана готә Барак: «Тʹәви хԝә 10 000 мер һьлдә, һәрʹә бәр чʹәме Кишоне, у тʹәви әскәред Йаԝин шәрʹ бькә. Ԝедәре тʹӧйе Сисәра, сәрԝере әскәре Йаԝин алт ки». Барак готә Дәборайе: «Әзе һәрʹьм, тʹәне һәрге тӧ тʹәви мьн бейи». Әԝе готә ԝи : «Әзе тʹәви тә бем. Ле бьзаньбә, ԝәки тӧ нә әԝ и, йе кӧ гәрәке Сисәра бькӧжә. Йаһоԝа гот, ԝәки әԝе жь дәсте кʹӧлфәтәке бе кӧштьне».

Дәбора тʹәви Барак у әскәред ԝи чу сәр Чʹийайе Тәбор, ԝәки бона шәрʹ хԝә һазьр кьн. Гава Сисәра бьһист дәрһәԛа ԝе йәке, әԝи әскәр у әʹрәбед ԝан тʹоп кьр у чу бәр мәйдана незики чʹәме Кишоне. Дәборайе готә Барак: «Иро әԝ рʹож ә, кʹәнге Йаһоԝа ԝе Сисәра бьдә дәсте тә». Барак у 10 000 әскәред ԝи жь чʹийа пәйа бун, ԝәки рʹасти Сисәра у әскәред ԝийә ԛәԝи бен.

Ԝи чахи Йаһоԝа ӧса кьр, ԝәки ава чʹәме Кишоне рʹабу у жь чʹәм дәркʹәт. Әʹрәбед әскәред Сисәра жь һʹәрʹийе нькарьбун дәрен. Сисәра әʹрәба хԝә һишт у жь ԝедәре рʹәви. Барак тʹәви әскәред хԝә әскәред Сисәра алт кьрьн, ле Сисәра хԝә вәшарт! Әԝ рʹәви у хԝә чадьра кʹӧлфәтәкеда, наве кʹижане Йаел бу, вәшарт. Әԝе шир да ԝи у орхан авитә сәр. Сисәра вәстийайи бу у хәԝрʹа чу. Паши ԝе йәке Йаел тәлә-тәл незики ԝи бу у сьнгәк кʹӧта щеника ԝи у әԝ кӧшт.

Ԝи чахи Барак Сисәра дьгәрʹийа. Йаел жь чадьра хԝә дәркʹәт у гот: «Ԝәрә бькʹәвә һьндӧр. Әзе нишани тә кьм ԝи мәрьви, кʹижани тӧ дьгәрʹи». Барак кʹәтә чадьре у дит, ԝәки Сисәра мьрийә. Барак у Дәбора пе кʹьлама пәсьн дьданә Йаһоԝа сәва ԝе йәке, кӧ әԝи али Исраелийа кьр, ԝәки дьжмьнед хԝә алт кьн. Паши ԝе йәке Исраели 40 сала әʹдьлайеда дьжитьн.

Чахе Исраеледа бьрчибун бу, кʹӧлфәтәкә Исраели бь наве Наһоми, тʹәви мере хԝә у дӧ кӧрʹед хԝә чунә Моԝабе. Ԝәʹдә шунда мере Наһомийе мьр. Дӧ кӧрʹед ԝе ԛизед Моԝаби стандьн, наве ԝан Рʹутʹ у Орпʹа бу. Ле йазьх, паше дӧ кӧрʹед ԝе жи мьрьн.

Кʹәнге Наһоми бьһист, ԝәки Исраеледа бьрчибун хьлаз бу, әԝе сафи кьр вәгәрʹә мала хԝә. Рʹутʹ у Орпʹа тʹәви ԝе рʹекʹәтьн, ле рʹева Наһомийе готә ԝан: «Һун жьнед баш бун бона кӧрʹед мьн у букед баш бона мьн. Әз дьхԝазьм, ԝәки һун диса мер кьн. Вәгәрʹьн у һәрʹьн Моԝабе, малед хԝә». Ԝана готә ԝе: «Әм тә һʹьз дькьн! Әм нахԝазьн тә бьһельн». Наһомийе диса жи дьготә ԝан, ԝәки әԝана вәгәрʹьн. Ахьрийеда Орпʹа вәгәрʹийа, ле Рʹутʹ ма. Наһомийе готә ԝе: «Дьбини Орпʹа вәгәрʹийа бал щьмәʹта хԝә у хӧданед хԝә. Тӧ жи тʹәви ԝе һәрʹә». Ле Рʹутʹ готә ԝе: «Әз тә наһельм. Щьмәʹта тә ԝе бьбә щьмәʹта мьн у Хԝәдайе тә ԝе бьбә Хԝәдайе мьн». Ча тӧ дьшьрмиш дьби, Наһомийе чь сәр хԝә тʹәхмин кьр, чахе Рʹутʹ жерʹа ӧса гот?

Рʹутʹ у Наһоми гьһиштьнә Исраеле, чахе дәстпекьрьна щәһдьруне бу. Рʹожәке, Рʹутʹ чу зәвийе, ԝәки сьмбьла тʹоп кә, чь кӧ паши хәбатчийа мабу. Әԝ зәвийа Боԝаз бу, кӧрʹе Рʹәхабе. Әԝи бьһистьбу, ԝәки Рʹутʹ жь Моԝабе йә у әԝе хасийа хԝә рʹожед чәтьнда тʹәне нәһишт. Әԝи готә хәбатчийед хԝә, ԝәки пәй хԝә һе зедә сьмбьла бьһельн, сәва кӧ Рʹутʹ тʹоп кә.

Еваре, Наһомийе жь Рʹутʹ пьрси: «Иро тә зәвийа кʹеда тʹоп дькьр?» Рʹутʹ гот: «Әԝ зәвийа Боԝаз бу». Наһомийе готә Рʹутʹ: «Боԝаз мәрьве мере мьн ә. Бәрдәԝам кә тʹәви жьнед дьн зәвийа ԝида тʹоп кә, чьмки ԝедәре тӧйе хԝәйкьри би».

Рʹутʹ бәрдәԝам дькьр зәвийа Боԝазда тʹоп кә, һʹәта кӧ тʹопкьрьна щәһдьруне хьлаз бу. Боԝаз дина хԝә дайе, ԝәки Рʹутʹ хәбате натьрсә у кʹӧлфәтәкә гәләк баш ә. Ԝан чаха, гава мере кәсәки дьмьр у зӧрʹәта ԝан тʹӧнә бу, йәк жь мәрьвед мере ԝе жьнәбийе гәрәке әԝ бьстанда. Ләма жи Боԝаз хԝәрʹа Рʹутʹ жьнти ани. Ԝанарʹа кӧрʹәк бу, ԝи нав кьрьн Овед, ахьрийеда әԝ бу кальке Даԝьд Пʹадша. Һәвалед Наһоми гәләк ша бун. Ԝана гот: «Йаһоԝа тәрʹа Рʹутʹ шанд, ԝәки пьштгьрийа тә бькә, ле ньһа нәби тәрʹа бу. Бьра наве Йаһоԝа рʹумәт бә».

Ԝәʹдә шунда Исраелийа пьшта хԝә данә Йаһоԝа у дәстпекьрьн сәре хԝә бәр хӧданед ԛәлп дайньн. Һʹәфт сала Мьдйана һʹәйԝанед Исраелийа зәфти хԝә дькьр у зийан дьданә зәвийед ԝан. Исраели жь тьрса Мьдйана, хԝә сәр чʹийа у шкәфтада вәдьшартьн. Ԝана жь Йаһоԝа лава дькьр, ԝәки али ԝан бькә. Йаһоԝа дӧайед ԝан бьһист у мәләк шанд бал мерәки щаһьл, наве кʹижани Гидәйон бу. Мәләк готә ԝи: «Йаһоԝа тә жьбарт, ԝәки тӧ щьмәʹта ԝи хьлаз ки». Гидәйон гот: «Чаԝа әз дькарьм Исраелийа хьлаз кьм? Нә әз тʹӧ тьшт ниньм».

Чаԝа Гидәйон дькарьбу избат буйа, ԝәки Йаһоԝа һәма ԝи жьбартийә, сәва Исраелийа хьлаз кә? Әԝи һьнә һьри һьлда, дани сәр әʹрде у готә Йаһоԝа: «Һәрге сьбәһе зу ави тʹәне сәр һьрийе бә, ле әʹрде дор-бәр зьһа бә, ԝи чахи әзе бьзаньбьм, ԝәки тә мьн жьбартийә, кӧ Исраелийа хьлаз кьм». Сьбәһе зу һьри бь ави тʹьжә бу, ле әʹрде дор-бәр зьһа бу! Ле Гидәйон диса щарәке жь Йаһоԝа һиви кьр, ԝәки ве щаре һьри зьһа бә, ле әʹрд шьл бә. Рʹожа дьн һәма ӧса жи ԛәԝьми у ве щаре Гидәйон избат бу, ԝәки Йаһоԝа ԝи жьбартийә. Ләма жи әԝи әскәред Исраелийа тʹоп кьр, ԝәки пешбәри Мьдйана шәрʹ кә.

Йаһоԝа готә Гидәйон: «Әзе ӧса бькьм, ԝәки Исраели сәр Мьдйана кʹәвьн. Ле чьмки әскәред тә гәләк ьн, тӧ дькари бьфькьри, ԝәки һун пе ԛәԝата хԝә сәркʹәтьн. Ләма жи бежә ԝан мәрьва йед кӧ дьтьрсьн, бьра вәгәрʹьнә малед хԝә». Паши ԝе йәке 22 000 әскәр вәгәрʹийанә малед хԝә, ле 10 000 ман. Йаһоԝа диса жи готә Гидәйон: «Әскәред тә һәла һе гәләк ьн. Ԝана бьвә бәр канийе у бежә ԝан бьра ава канийе вәхԝьн. Әԝ мер, йед кӧ ԝәʹде вәхԝарьна аве дор-бәре хԝә бьньһерʹьн, ԝәки дьжмьн незики ԝан нәбьн, тʹәне ԝан мерʹа тʹәви хԝә бьвә». Ԝи чахи тʹәне 300 мера ԝәʹде вәхԝарʹьна аве дор-бәре хԝә ньһерʹин.

Ԝе шәве Йаһоԝа готә Гидәйон: «Ньһа әԝ ԝәʹдә йә, ԝәки мьԛабьли Мьдйана дәркʹәви!» Гидәйон борʹи, кʹупед мәзьн, кʹижанада пʹьтил һәбу да дәсте һәр әскәрәки хԝә у готә ԝан: «Мьн бьньһерʹьн у ԝе йәке бькьн, чь кӧ әзе бькьм». Гидәйон борʹийе хьст, кʹупе хԝә шкʹенанд, пʹьтила хԝә һьлбьрʹи у бь дәнге бьльнд гот: «Шуре Йаһоԝа у йе Гидәйон!» Сесьд әскәред ԝи һәма ӧса кьрьн, чаԝа кӧ әԝи кьр. Әскәред Мьдйана тьрсийан у дәстпекьрьн бьрʹәвьн. Әԝана ӧса тʹәвиһәв кʹәтьн, ԝәки гьһиштьнә һәв у дәстпекьрьн һәвдӧ бькӧжьн. Ве щаре жи, Йаһоԝа али Исраелийа кьр, ԝәки әԝана дьжмьнед хԝә алт кьн.

Бал мерәки Исраели, наве кʹижани Әлкана бу, дӧ жьн һәбун, Һанна у Пенина. Әԝи Һанна һе зедә һʹьз дькьр. Гәләк зарʹед Пенине һәбун, ле Һанна безӧрʹәт бу, ләма жи Пенина һәр гав сәр ԝе дькʹәнийа. Һәр сал Әлкана тʹәви малбәта хԝә дьчунә Шило, ԝәки конда сәре хԝә бәр Йаһоԝа дайньн. Щарәке чахе әԝана ԝедәре бун, әԝи тʹәхмин кьр, ԝәки жьна ԝийә һʹьзкьри мәʹдәкьри йә. Әԝи готә ԝе: «Һанна, лава дькьм, нәгьри. Нә әз кʹеләка тә мә, әз тә һʹьз дькьм».

Ԝәʹдә шунда Һанна чу, ԝәки дӧа бькә. Әԝ кʹәлә-кʹәл дьгьрийа у дӧада пе һесьра аликʹари жь Йаһоԝа дьхԝәст. Әԝе соз да у гот: «Йаһоԝа, һәрге тӧ кӧрʹәки бьди мьн, әзе ԝи тʹәсмили тә бькьм у әԝе тʹәмамийа әʹмьре хԝә тәрʹа хьзмәт кә».

Чахе Әли Сәрәккʹаһин дит, ԝәки Һанна дькә бьрмә-бьрм, әԝи тʹьре әԝ вәхԝари йә. Һаннайе готә ԝи: «На, ахайе мьн, әз вәхԝари ниньм. Дәрʹдәки мьни гьран һәйә, у әз Йаһоԝарʹа дәрһәԛа дәрʹде хԝә гьли дькьм». Әли фәʹм кьр, ԝәки әԝ нәрʹаст бу, ләма жи готә ԝе: «Бьра Хԝәде бьдә тә әԝ, чь кӧ тӧ жь ԝи дьхԝази». Дьле Һаннайе рʹьһʹәт бу у әԝ пашда вәгәрʹийа мал. Паши ве йәке саләк жи тʹәмам нәбу, кӧрʹ жера бу у наве ԝи данин Самуйел. Тӧ дькари бьди бәр чʹәʹве хԝә, Һанна чьԛас ша дьбу?

Һаннайе дәрһәԛа созе хԝә бир нәкьр, йа кӧ әԝе Йаһоԝарʹа дабу. Гава Самуйел жь шир һатә ԛәтандьне, әԝе ԝи бьрә коне пироз, ԝәки әԝ Хԝәдерʹа хьзмәт кә. Әԝе готә Әли: «Әԝа йә әԝ зарʹок, кʹижан мьн жь Йаһоԝа лава дькьр. Әз ԝи тʹәсмили Йаһоԝа дькьм». Һәр сал Әлкана у Һаннайе сәрик Самуйел дьхьстьн у кʹьнщед тʹәзә ԝирʹа дьанин. Йаһоԝа, Һанна кʹәрәм кьр бь ԝе йәке, кӧ диса се кӧрʹ у дӧ ԛиз да ԝе.

Исраелийа диса пьшта хԝә данә Йаһоԝа у дәстпекьрьн хӧданед ԛәлпрʹа хьзмәт кьн. Гава Аммонийа Исраели кьрьнә бьн дәсте хԝә, хӧданед ԝани ԛәлп нькарьбун ԝана хьлаз кьн. Гәләк сал Исраели дьчәрчьрин. Ахьрийеда ԝана готә Йаһоԝа: «Мә гӧнә кьр. Әм лава дькьн, мә жь дьжмьнед мә хьлаз кә». Паши ԝе йәке Исраелийа пʹутед хԝә шкенандьн у диса дәстпекьрьн Йаһоԝарʹа хьзмәт кьн. Йаһоԝа нәдьхԝәст бьдита чаԝа Исраели дьчәрчьрьн.

Йаһоԝа Йәфтаһ жьбарт, ԝәки әԝ али әскәра бькә, сәва әԝана шәрʹе тʹәви Аммонийада сәркʹәвьн. Әԝи готә Йаһоԝа: «Һәрге тӧ ԝи шәрʹида мьн сәрфьнийаз ки, әз соз дьдьм, ԝәки әзе ԝи мәрьви тʹәсмили тә бькьм, йе кӧ ԝе жь мала мьн пешийа һʹәмуйа дәре, ԝәки рʹасти мьн бе». Йаһоԝа гӧһ да дӧайе Йәфтаһ у Аммони данә дәсте ԝи.

Чахе Йәфтаһ вәгәрʹийа мал, пешийа һʹәмуйа ԛиза ԝи бәрбь ԝи һат, әԝ зарʹа ԝийә тайе-тʹәне бу. Ԛиза ԝи дьрʹәԛьси у дәфе дьхьст. Гәло ԝи чахи Йәфтаһ чаԝа хԝә тʹәхмин кьр? Созе ԝи кʹәтә бира ԝи у әԝи гот: «Ԛиза мьн, тʹә чь сәре мьн кьр! Тә еш кьрә дьле мьн. Мьн соз дайә Йаһоԝа, у сәва кӧ ԝи сози биньм сери, әз гәрәке тә тʹәсмили ԝи кьм у бьшиньмә Шилоне, ԝәки тӧ ԝедәре коне пирозда хьзмәт ки». Ԛиза ԝи гот: «Баво, һәрге тә соз дайә Йаһоԝа, тӧ гәрәке созе хԝә бини сери. Тʹәне хԝәстьнәкә мьн һәйә, изьне бьдә әз тʹәви кʹәчʹька һәрʹьмә чʹийа у дӧ мәһа ԝедәре дәрбаз кьм. Паше әзе һәрʹьм коне пирозда хьзмәт кьм». Ԛиза Йәфтаһ тʹәмамийа әʹмьре хԝә бь амьни коне пирозда хьзмәт дькьр. Һәр сал һәвалед ԝе дьчунә Шилоне, ԝәки тʹәсәлийа ԝе бькьн.

Дӧ кӧрʹед Сәрәккʹаһин Әли һәбун, йед кӧ конда ча кʹаһин хьзмәт дькьрьн. Наве ԝан Һофни у Финәһас бу. Әԝана гӧһ нәдьдан ԛануне Йаһоԝа у гәләк зӧлм бун һьндава мәрьва. Гава щьмәʹта Исраели ԛӧрбан Йаһоԝарʹа дьанин, Һофни у Финәһас кӧдоре гоште лапи баш хԝәрʹа һьлдьдан. Рʹаст ә, Әли дьбьһист дәрһәԛа ԝе йәке, чь кӧ кӧрʹед ԝи дькьрьн, ле әԝи пьшт гӧһе хԝәва давит у тьштәк ԝанарʹа нәдьгот. Чаԝа тӧ дьшьрмиш дьби, әԝ йәк Йаһоԝа хԝәш дьһат?

Рʹаст ә, Самуйел жь Һофни у Финәһас гәләк бьчʹуктьр бу, ле әԝи чʹәʹв нәдьда ԝана. Самуйел дьле Йаһоԝа ша дькьр. Шәвәке, гава Самуйел рʹаза бу, әԝи бьһист, ԝәки кәсәк гази ԝи дькә. Әԝ рʹабу, чу бал Әли у гот: «Әз һатьм!» Ле Әли готә ԝи: «Мьн гази тә нәкьрийә. Һәрʹә, бькʹәвә нав щийа у рʹазе». Самуйел вәгәрʹийа у кʹәтә нав щийа. Самуйел щара дӧда әԝ дәнг бьһист. Ле кʹәнге әԝи щара сьсийа әԝ дәнг бьһист, Әли фәʹм кьр, ԝәки Йаһоԝа гази Самуйел дькә. Әԝи готә Самуйел, һәрге тӧ диса щарәке әԝи дәнги бьбьһейи, гәрәке бежи: «Йаһоԝа, бежә, хӧламе тә гӧһ дьдә тә».

Самуйел чу, кʹәтә нав щийе хԝә у диса дәнг бьһист: «Самуйел! Самуйел!» Әԝи щаб да у гот: «Бежә, хӧламе тә гӧһ дьдә тә». Йаһоԝа готә ԝи: «Бежә Әли, ԝәки әзе ԝи у малбәта ԝи щәза кьм. Әԝ занә, ԝәки кӧрʹед ԝи тьштед хьраб коне мьнда дькьн, ле әԝ бона ԝе йәке тьштәки накә». Сьбәһе зу, чаԝа һәр гав Самуйел чу, дәре кон вәкьр, ле дьтьрсийа бежә Әли дәрһәԛа ԝе йәке, чь кӧ Йаһоԝа ԝирʹа гот. Әли әԝ йәк тʹәхмин кьр, гази ԝи кьр у жь ԝи пьрси: «Кӧрʹе мьн, Йаһоԝа ԛә чь готә тә? Һәр тьшти мьнрʹа бежә». У Самуйел һәр тьшт Әлирʹа гьли кьр.

Ԝәʹдә дәрбаз дьбу у Самуйел мәзьн дьбу, у Йаһоԝа һәртʹьм тʹәви ԝи бу. Тʹәмамийа Исраеледа щьмәʹт пеһʹәсийа, ԝәки Йаһоԝа Самуйел жьбартийә, кӧ әԝ бьбә пʹехәмбәр у һʹакьм.

Ниве зәʹф жь Исраелийа диса дәстпекьрьн сәре хԝә бәр пʹута дайньн. Сәва ԝе йәке Йаһоԝа изьн да, ԝәки Фьльсти әʹрʹде ԝан бькьн бьн дәсте хԝә. Ле нава Исраелийада һәбун мәрьвед ӧса, йед кӧ Йаһоԝарʹа амьн дьман. Наве йәки Маноаһ бу, у зарʹед ԝи тʹӧнә бун. Рʹожәке Йаһоԝа мәләк шанд бал жьна Маноаһ. Мәләк готә ԝе: «Кӧрʹ ԝе тәрʹа бьбә. Әԝе Исраелийа жь дәсте Фьльстийа хьлаз кә. Әԝ ԝе бьбә Нәзир». Ле тӧ зани, кʹижан мәрьв дьһатьнә һʹәсабе Нәзир? Әԝана хьзмәткʹаред мәхсус бун бәр Йаһоԝа. Изьна ԝан тʹӧнә бу пʹорʹе хԝә бьбьрʹьн.

Паши ԝе йәке Маноаһ у жьна ԝирʹа кӧрʹ һʹатә буйине у ԝана наве ԝи данин Шьмшон. Һʹәта Шьмшон мәзьн дьбу, Йаһоԝа гәләк ԛәԝат дьда ԝи. Бьдә һʹәсабе хԝә, ԝәки әԝи дькарьбу дәствала шер бькӧшта. Щарәке Шьмшон 30 Фьльсти дәрбәкерʹа кӧшт. Фьльстийа ӧса Шьмшон нәфрʹәт дькьрьн, ԝәки мәщал дьгәрʹийан ԝи бькӧжьн. Шәвәке, чахе Шьмшон шәһәре Газда маләкеда рʹаза бу, Фьльсти һатьнә бәр дәргәһе ԝи шәһәри у һивийа ԝи бун, ԝәки сьбәһе зу ԝи бьгьрьн у бькӧжьн. Ле ниве шәве Шьмшон һʹьшйарʹ бу у чу бәр дәргәһе шәһәр. Әԝи дәргәһе шәһәр жь диԝер рʹакьр, дани сәр пьшта хԝә у бьрә сәр чʹийе, йа кӧ незики Һәброне бу!

Ԝәʹдә шунда Фьльсти чунә бал һʹьзкьрийа Шьмшон, Дәлилайе, у готьнә ԝе: «Һәрге тӧ бона мә пебьһʹәси, жь кʹӧ һаԛас ԛәԝата Шьмшон һәйә, әме гәләк пʹәрә бьдьнә тә. Әм дьхԝазьн ԝи бьгьрьн у бавежьнә кәле». Дәлилайе гәләк дьхԝәст пʹәра бьстинә, ләма жи ԛайил бу али ԝан бькә. Сәрида Шьмшон нәдьготә ԝе, ԛәԝата ԝи жь кʹӧ йә. Ле әԝе һаԛас дькьрә кӧтә-кӧт, ԝәки Шьмшон ида нькарьбу тәйах кьра у жерʹа гот, чь кӧ изьн тʹӧнәбу бьгота. Әԝи готә ԝе: «Пʹорʹе мьн тʹӧ щар нәһатийә бьрʹине, чьмки әз Нәзир ьм. Һәрге пʹорʹе мьн бе бьрʹине, әзе ԛәԝата хԝә ӧнда кьм». Шьмшон шашикә мәзьн бәрда, гава Дәлилайерʹа дәрһәԛа ԝе йәке гьли кьр!

Дәлилайе Фьльстийарʹа гот: «Әз пеһʹәсийам ԛәԝата ԝи чьда нә!» Дәлилайе сәре Шьмшон дани сәр чоке хԝә у ԝи да рʹазандьне. Әԝе готә ԝан мера, ԝәки пʹорʹе ԝи бьбьрʹьн. Дәлилайе бь дәнге бьльнд гот: «Шьмшон, Фьльсти вьра нә!» Шьмшон һʹьшйар бу, ле ԛәԝат ԝида тʹӧнәбу. Фьльстийа әԝ гьртьн, чʹәʹве ԝи дәрхьстьн у авитьнә кәле.

Щарәке бь һʹәзара Фьльсти пʹарьстгәһа хӧдане хԝәйи Дагонда тʹоп бьбун. Ԝедәре ԝана бь дәнге бьльнд дьготьн: «Хӧданед мә Шьмшон данә дәсте мә! Ԝи биньнә вьра, ԝәки әм сәр бькʹәньн!» Ԝана ԝи кьрьнә ортʹа дӧ стуна, сәр кʹижана әԝ авайи сәкьни бу у ԛәрфе хԝә ԝи дькьрьн. Шьмшон лава Йаһоԝа кьр у гот: «Йа Йаһоԝа, лава дькьм, диса щарәке ԛәԝате бьдә мьн». Ле ԝи чахи пʹорʹе Шьмшон һʹәвәки дьреж бьбу. Бь һʹәму ԛәԝата хԝә әԝи дӧ стунед пʹарьстгәһе дәʹф да у тʹәмамийа авайи һьлшийа. Шьмшон у һәр мәрьвед пʹарьстгәһеда мьрьн.

Йаһоԝа бона Исарелийа һʹакьм кʹьфш дькьрьн, ԝәки рʹебәрийа ԝан бькьн, ле щьмәʹта Исраели хԝәстьн, ԝәки пʹадше ԝан һәбә. Ԝана готә Самуйел: «Һʹәму мьләтед, кӧ дор-бәре мә дьжин, пʹадше ԝан һәнә. Әм жи дьхԝазьн». Бәр чʹәʹве Самуйел әԝ йәк хьраб һатә кʹьфше, ләма жи әԝи дәстпекьр Йаһоԝарʹа дӧа бькә. Йаһоԝа готә ԝи: «Әԝ щьмәʹт нә кӧ тә инкʹар дькә, әԝана мьн инкʹар дькьн. Бежә ԝан, һәрге пʹадше ԝан һәбә, әԝе гәләк тьшт жь ԝана дәʹԝа бькә». Ле диса жи щьмәʹте готә ԝи: «Бона ԝе йәке әм хәма накьн. Әм дьхԝазьн, ԝәки пʹадше мә һәбә!»

Йаһоԝа готә Самуйел, ԝәки Шаԝул гәрәке бьбә пʹадше пешьн. Щарәке Шаԝул чу шәһәре Рʹаме, ԝәки Самуйел бьвинә. Һьнге Самуйел рʹун сәр сәре Шаԝулда кьр у әԝ һатә кʹьфшкьрьне кӧ бьбә пʹадша.

Паше Самуйел гази тʹәмамийа щьмәʹте кьр, ԝәки пʹадше тʹәзә нишани ԝан кә. Ле ԝана тӧ щики нькарьбун Шаԝул бьдитана. Зани чьма? Чьмки әԝи хԝә вәшарт. Гава ԝана Шаԝул дит, ԝана ԝи кьрә ортʹа щьмәʹте. Шаԝул гьшка бьльндтьр бу у йәки гәләк бәдәԝ бу. Самуйел гот: «Дина хԝә бьдьне, Йаһоԝа кʹе бона ԝә жьбарт». Гава щьмәʹт пʹадша дит, әԝана гәләк ша бун.

Сәрида Шаԝул Пʹадша гӧһ дьда Самуйел у рʹебәрийа Йаһоԝа. Ле ахьрийеда әԝ һатә гӧһастьне. Мәсәлә, бь ԛануне изьна Пʹадше тʹӧнә бу, ԝәки ԛӧрбане бинә. Щарәке Шаԝул гәрәке һивийа Самуйел буйа, ԝәки әԝи ԛӧрбан бьда. Ле Шаԝул ләз кʹәт у пешийа һатьна Самуйел, ԛӧрбан да. Ньһерʹандьна Самуйел сәр ԝе йәке чь щурʹәйи бу? Әԝи готә Шаԝул: «Тә гӧһ нәда Йаһоԝа у тә тьштәки нәрʹаст кьр». Гәло Шаԝул жь ԝе шашийа хԝә хԝәрʹа дәрс һьлда?

Паши ԝе йәке, чахе Шаԝул пешбәри Амалекийа чу шәрʹ, Самуйел тʹәми да Шаԝул, ԝәки тʹӧ кәси сах нәһелә. Ле Шаԝул Агаг Пʹадша сах һишт. Йаһоԝа готә Самуйел: «Шаԝул пьшта хԝә да мьн у гӧһ нәда тʹәмийед мьн». Самуйел бәр хԝә кʹәт у готә Шаԝул: «Сәва ԝе йәке кӧ тӧ гӧһ нади Йаһоԝа, әԝе дәԝса тә пʹадшаки дьн бьжберә». Гава Самуйел вәгәрʹийа кӧ һәрә, Шаԝул дәст авитә пʹеша ԝи, пʹеша ԝи ԛәльши ле дәсте ԝида нәма. Паше Самуйел готә Шаԝул: «Чаԝа пʹеша мьн жь дәсте тә дәркʹәт, ӧса жи Йаһоԝа ԝе пʹадшатийе жь тә бьстинә». Йаһоԝа сафи кьр пʹадшатийе бьдә ԝи мәрьви, йе кӧ ԝе ԝи һʹьз бькә у гӧрʹа ԝида бә.

Йаһоԝа готә Самуйел: «Һәрʹә мала Йеша. Кӧрʹәки ԝи гәрәке бьбә пʹадше Исраеле». Самуйел чу мала Йеша. Гава әԝи кӧрʹе мәзьн дит, фькьри: «Һәма әԝ ә, кʹе гәрәке бьбә пʹадша». Ле Йаһоԝа готә Самуйел, ԝәки әԝ жьбартийе ԝи нинә, у зедә кьр: «Әз дьле мәрьва дьвиньм, нә кӧ сәр рʹуйе ԝи».

Йеша шәш кӧрʹе хԝәйи дьн жи ани бал Самуйел. Ле Самуйел готә ԝи: «Йаһоԝа тʹӧ кәс жь ԝан нәжьбартийә. Диса кӧрʹе тә һәнә?» Йеша гот: «Әре, кӧрʹәки мьни бьчʹук жи һәйә, наве ԝи Даԝьд ә. Әԝ чоле йә, пез дьчʹеринә». Гава Даԝьд һатә мал, Йаһоԝа готә Самуйел: «Әԝ ә жьбартийе мьн!» Самуйел рʹун сәр сәре Даԝьдда кьр, сәва ахьрийеда әԝ бьбә пʹадше Исраеле.

Ԝәʹдә шунда ортʹа Исраелийа у Фьльстийа шәрʹ дәстпебу. Бал Фьльстийа әскәрәки тәрʹьки бь наве Голйатʹ һәбу. Һәр рʹож Голйатʹ ԛәрфе хԝә Исраелийа дькьр. Әԝи дькьрә ԛарʹә-ԛарʹ у дьгот: «Мерәки бьшиньн пешбәри мьн, ԝәки тʹәви мьн шәрʹ кә. Һәрге әԝ мьн алт кә әме бьбьнә диле ԝә. Ле һәрге әз ԝи алт кьм, һуне бьбьнә диле мә».

Даԝьд һатә бәр чадьред әскәред Исраелийа, сәва хԝарьне бьдә бьред хԝә, йед кӧ әскәр бун. Ԝедәре Даԝьд гьлийе Голйатʹ бьһист у гот: «Әзе пешбәри ԝи дәрем!» Шаԝул Пʹадша гот: «Ле тӧйе ча пешбәри ԝи дәрейи, нә тӧ һе щаһьл и?» Даԝьд щаб да у гот: «Йаһоԝа ԝе али мьн бькә».

Шаԝул дьхԝәст, ԝәки Даԝьд кʹьнще әскәра хԝәкә, ле Даԝьд готә ԝи: «Әз нькарьм пе ԝан тьшта шәрʹ кьм». Даԝьд шьдана хԝә һьлда у чу бәр чʹем. Әԝи пенщ кәвьре пәʹн тʹоп кьр, кьрә кʹисе хԝә у чу бәрбь Голйатʹ. Голйатʹ бь дәнге бьльнд готә ԝи: «Ԝәре вьра. Әзе бәдәна тә бьдьмә чʹьвикед әʹзмана у тәрәԝьла». Ле Даԝьд нәтьрсийа у пе дәнге бьльнд готә ԝи: «Тӧ пе шур у рʹьм дәрдькʹәви пешбәри мьн, ле әз бь наве Йаһоԝа пешбәри тә дәрдькʹәвьм. Тӧ нә кӧ тʹәви мә шәрʹ дьки, ле тʹәви Хԝәде. У ньһа һʹәмуйе бьвиньн, ԝәки Йаһоԝа жь шур у рʹьм ԛәԝаттьр ә. Әԝе ԝә бьдә дәсте мә».

Даԝьд кәвьр кьрә шьдана хԝә у бь һʹәму ԛәԝата хԝә авитә Голйатʹ. Йаһоԝа ӧса кьр, ԝәки кәвьр фьри у әʹнийа Голйатʹ кʹәт. Әԝ әʹрде кʹәт у мьр. Фьльсти тьрса рʹәвин, сәва кӧ әʹмьре хԝә хьлаз кьн. Ле тӧ, мина Даԝьд итʹбарийа хԝә Йаһоԝа тини?

Паши ԝе йәке, кʹәнге Даԝьд Голйатʹ кӧшт, Шаԝул Пʹадша ԝи кʹьфш кьр ча сәрәскәре ордийа хԝә. Даԝьд гәләк шәрʹада сәрдькʹәт у бу йәки навдар. Һәр щара гава Даԝьд паши шәрʹ вәдьгәрʹийа мал, жьн дәрдькʹәтьн, пешийа ԝи дьрәԛьсин у дьстьран: «Шаԝул һʹәзара кӧшт, ле Даԝьд дәһ һʹәзара!» Шаԝул һʹәвсуди Даԝьд кьр у дьхԝәст ԝи бькӧжә.

Даԝьд гәләк баш чәнге дьхьст. Щарәке, кʹәнге Даԝьд бона Шаԝул чәнге дьхьст, Шаԝул рʹьме хԝә авитә ԝи. Даԝьд перʹа гиһанд хԝә дур хә у рʹьм диԝерда рʹуньшт. Паши ԝе йәке Шаԝул диса гәләк щар мәщал дьгәрʹийа, ԝәки Даԝьд бькӧжә. Ахьрийе Даԝьд рʹәви у бәрʹийеда хԝә вәшарт.

Шаԝул 3 000 әскәред хԝә һьлда у чу, ԝәки Даԝьд бьгәрʹә. Ӧса ԛәԝьми, ԝәки Шаԝул кʹәтә ԝе шкәфте, кʹидәре Даԝьд у әскәред ԝи хԝә вәшартьбун. Әскәред Даԝьд бь дәнге ньмьз готьнә ԝи: «Мәщал тʹәра һатә дайине, тӧ дькари Шаԝул бькӧжи». Даԝьд дьзикава незики Шаԝул бу у пʹеша кʹьнще ԝи бьрʹи. Шаԝул нә жи тʹәхмин кьр. Паши ве йәке, Даԝьд бәр хԝә дькʹәт, чьмки әԝи һьндава Шаԝул Пʹадша, йе кӧ жьбартийе Йаһоԝа бу, ԛәдьр нишан нәкьр. Даԝьд изьн нәда әскәред хԝә, ԝәки әԝана Шаԝул бькӧжьн. Гава Шаԝул жь шкәфте дәркʹәт, Даԝьд кьрә гази у готә ԝи, ԝәки мәщала ԝи һәбу ԝи бькӧжә, ле әԝи ӧса нәкьр. Гәло паши ԝе йәке Шаԝул ньһерʹандьна хԝә һьндава Даԝьд гӧһаст?

На. Әԝи диса жи мәщал дьгәрʹийа, ԝәки Даԝьд бькӧжә. Шәвәке Даԝьд тʹәви кӧрʹе хушка хԝә Абишә, дьзикава кʹәтә нава чадьред әскәред Шаԝул. Бәрдәстийе Шаԝул, Абнәр хәԝрʹа чубу. Абишә готә Даԝьд: «Әԝа мәщаләкә баш ә! Бьһелә әз ԝи бькӧжьм». Даԝьд готә ԝи: «Йаһоԝа ԝе хԝәха ԝи щәза кә. Ԝәре әм тʹәне рʹьме ԝи у кʹупе ԝийи аве һьлдьн у һәрʹьн».

Даԝьд һьлкʹьшийа сәр чʹийаки, жь кʹидәрева Шаԝул у әскәред ԝи дьһатьнә кʹьфше. Әԝи бь дәнге бьльнд кьрә гази: «Абнәр, чьма тӧ мьԛати пʹадше хԝә наби? Рʹьм у кʹупе ава ԝи кʹидәре йә?» Шаԝул дәнге Даԝьд нас кьр у гот: «Тә дькарьбу мьн бькӧшта, ле тә әԝ йәк нәкьр. Әз заньм, ԝәки паши мьн тӧйе бьби пʹадше Исраеле». Паши ԝе йәке Шаԝул вәгәрʹийа мала хԝә. Ле нә һәр кәс жь малбәта Шаԝул, Даԝьд нәфрʹәт дькьр.

Йонатʹан кӧрʹе Шаԝули мәзьн, әскәрәки мерхас бу. Щарәке Даԝьд сәр ԝи гот, ԝәки әԝ тәйра зутьр ә у шера ԛәԝаттьр ә. Рʹожәке Йонатʹан 20 әскәред Фьльсти сәр бьльндщики дит. Әԝи готә бәрдәстийе хԝә: «Тʹәне ԝи чахи әме пешбәри ԝан дәред, гава Йаһоԝа нишанәке бьдә мә. Һәрге Фьльсти мәрʹа бежьн һьлкʹьшьн щәм мә, әме фәм кьн, ԝәки әм гәрәке һʹьщуми сәр ԝан кьн». У ԝи чахи Фьльстийа кьрьнә гази: «Һьлкʹьшьнә щәм мә у тʹәви мә шәрʹ кьн». Йонатʹан у әскәред ԝи дәрберʹа һьлкʹьшийан сәр ԝи бьльндщи у әԝ әскәр алт кьрьн.

Йонатʹан кӧрʹе мәзьн бу, ләма жи әԝ гәрәке паши баве хԝә Шаԝул, бьбуйа пʹадша. Ле Йаһоԝа Даԝьд кʹьфш кьр, ԝәки паши Шаԝул бьбә пʹадша. Рʹаст ә, Йонатʹан дәрһәԛа ԝе йәке заньбу, ле әԝи чʹәʹвнәбари Даԝьд нәдькьр. Дәԝсе, Йонатʹан у Даԝьд бунә һәвале незик. Ԝана соз да һәв, ԝәки ԝе пьштгьрийа һәвдӧ бькьн. Чаԝа нишан, Йонатʹан кʹьнщ, шур, тир у кʹәмбәра хԝә да Даԝьд.

Кʹәнге Даԝьд хԝә жь Шаԝул вәдьшарт, Йонатʹан һатә бал Даԝьд у готә ԝи: «Нәтьрсә у мерхас бә. Йаһоԝа тә жьбартийә, ԝәки тӧ бьби пʹадша. Һәла һе баве мьн жи әԝе йәке занә». Ле тӧ жи нахԝази, ԝәки һәваләки тә ӧса баш, мина Йонатʹан һәбә?

Йонатʹан гәләк щар сәва һәвале хԝә әʹмьре хԝә дькьрә бьн ԛәзийе. Әԝи заньбу, ԝәки Шаԝул дьхԝәст Даԝьд бькӧжә, ләма готә баве хԝә: «Әԝ нәрʹаст ә, ԝәки тӧ дьхԝази Даԝьд бькӧжи. Нә әԝи тьштәки хьраб нәкьрийә!» Ԝи чахи Шаԝул гәләк һерс кʹәт сәр Йонатʹан. Чәнд сал шунда Шаԝул у Йонатʹан шәрʹда мьрьн.

Паши мьрьна Йонатʹан, Даԝьд кӧрʹе ԝи Мәфибошәт, гәрʹийа у гава ԝи дит, готе: «Баве тә һәвале мьни незик бу, ләма жи әзе тʹәмамийа әʹмьре тә мьԛати тә бьм. Те мала мьнда бьмини у сәр тʹәхт-сьфрәке тʹәви мьн нан бьхԝи». Даԝьд тӧ щар һәвале хԝә Йонатʹан бир нәдькьр.

Паши мьрьна Шаԝул, Даԝьд бу пʹадша. Ԝи чахи Даԝьд 30 сали бу. Паши чәнд сале пʹадшатийа хԝә, әԝи гӧнәки гьран кьр. Шәвәке жь бане мала хԝә Даԝьд жьнәкә бәдәԝ дит. Даԝьд пеһʹәсийа, ԝәки наве ԝе Батʹ-Шәба йә у әԝ жьна әскәре ԝи Урийа йә. Даԝьд Батʹ-Шәба ани мала хԝә у сәре хԝә перʹа дани. Батʹ-Шәба һʹәмлә дәркʹәт. Даԝьд дьхԝәст гӧне хԝә вәшерә. Ләма жи әԝи готә сәроке әскәред хԝә, ԝәки Урийа дәрбази мәйдана шәрʹ бькьн, ле хԝә бьдьнә паш. Паши ԝе йәке ча Урийа шәрʹда һатә кӧштьне, Даԝьд Батʹ-Шәба жьнти хԝәрʹа ани.

Йаһоԝа хьрабийа Даԝьд дит. Ле гәло Йаһоԝа чь кьр? Йаһоԝа Натʹан пʹехәмбәр шандә бал Даԝьд. Натʹан готә ԝи: «Бал мәрьвәки дәԝләти гәләк пәз һәбун, ле бал йе кʹәсиб тʹәне бәрхәкә ԝи һәбу, кʹижан әԝи гәләк һʹьз дькьр. Рʹожәке, әԝ мәрьве дәԝләти бәрха йе кʹәсиб зәфти хԝә кьр». Даԝьд гәләк һерс кʹәт у готә Натʹан: «Мәрьве дәԝләти һежайи мьрьне йә!» Һьнге Натʹан готә Даԝьд: «Әԝ мәрьве дәԝләти тӧ йи!» Ԝи чахи Даԝьд бәр хԝә кʹәт, гӧне хԝә да рʹуйе хԝә у гот: «Мьн бәр Йаһоԝа гӧнә кьр». Гӧне Даԝьд ԝи у малбәта ԝирʹа гәләк кӧл-дәрд ани. Йаһоԝа Даԝьд щәза кьр, ле ԝи нәкӧшт, чьмки Даԝьд йәки мьлук бу у ԛәлпи дьле ԝида тʹӧнә бу.

Даԝьд дьхԝәст Йаһоԝарʹа пʹарьстгәһе ава кә, ле Йаһоԝа кӧрʹе ԝи Сьлеман жьбарт, сәва пʹарьстгәһе ава кә. Даԝьд дәстпекьр тьштед бона авакьрьне сәва Сьлеман һазьр кә у гот: «Пʹарьстгәһа Йаһоԝа гәрәке рʹумәт бә. Сьлеман һе щаһьл ә, ләма жи әз гәрәке һәр тьштед бона авакьрьне, сәва ԝи һазьр кьм». Даԝьд гәләк пʹәрә сәва авакьрьне ԛӧрбан кьр. Әԝи хәбатчийед баш жьбарт. Зер у зив тʹоп кьр у жь шәһәре Сур у Сайда даред әрзе ани. Даԝьд пешийа мьрьна хԝә Сьлеманрʹа шьровәкьр, ԝәки чь щурʹә әԝ гәрәке пʹарьстгәһе ава кә у готә ԝи: «Йаһоԝа готә мьн, ԝәки нәхша пʹарьстгәһе бона тә һазьр кьм. Нәтьрсә, Йаһоԝа ԝе али тә бькә. Ԛәԝи бә у авакьрьне дәстпекә».

Паши ԝе йәке чахе Сьлеман бу пʹадше Исраеле, Йаһоԝа жь ԝи пьрси: «Чь тӧ дьхԝази, ԝәки әз бьдьмә тә?» Сьлеман гот: «Әз һе щаһьл ьм у ньзаньм чь гәрәке бькьм. Лава дькьм биланийе бьдә мьн, ԝәки әз бькарьбьм рʹебәрийе щьмәʹта тә бькьм». Йаһоԝа готә ԝи: «Сәва кӧ тә билани жь мьн хԝәст, әзе тә бькьмә мәрьве лапи билан сәр әʹрде. Ӧса жи әзе һәбуна мәзьн бьдьмә тә. У һәрге тӧ гӧрʹа мьнда би, әзе әʹмьре дьреж бьдьмә тә».

Сьлеман дәстпекьр пʹарьстгәһе ава кә. Әԝи пʹарьстгәһ пе зерʹ, зив, дар у кәвьре бьһа ава дькьр. Һʹәзара жьн у мер авакьрьнеда аликʹари дьдан. Паши һʹәфт сала, авакьрьна пʹарьстгәһе һатә сери у һазьр бу, ԝәки тʹәсмили Йаһоԝа кьн. Ԝедәре горигәһ һәбу сәр кʹижани Йаһоԝарʹа ԛӧрбан дьдан. Сьлеман бәр горигәһе кʹәтә сәр чока у дӧа кьр: «Йа Йаһоԝа, тӧ һежайи пʹарьстгәһа һе мәзьн у бәдәԝ и, ле лава дькьм хьзмәти у дӧакьрьна мә ԛәбул кә». Гәло Йаһоԝа пʹарьстгәһ ԛәбул кьр у гӧһ да дӧайе Сьлеман? Паши дӧакьрьна Сьлеман, агьр жь әʹзман дакʹәт сәр ԛӧрбана горигәһе. Ӧса Йаһоԝа да кʹьфше, ԝәки пʹарьстгәһ ԛәбул кьр. Гава Исраелийа әԝ йәк дитьн, әԝана гәләк ша бун.

Дәрһәԛа биланийа Сьлеман Пʹадша, нә кӧ тʹәне тʹәмамийа Исраеледа заньбун, ле һәла һе ԝәлатед дур жи. Мәрьв дьһатьн щәм ԝи, ԝәки әԝ проблемед ԝан сафи кә. Щарәке жьн-пʹадша Шәбайе һатә бал ԝи, ԝәки пе пьрсед чәтьн биланийа ԝи бьщерʹьбинә. Гава әԝе гӧһ да ԝи, гот: «Мьн баԝәр нәдькьр, чь кӧ мәрьв дәрһәԛа биланийа тә дьготьн, ле ньһа әз дьвиньм, ԝәки биланийа тә жь готьнед ԝан зедәтьр ә. Хԝәдайе тә Йаһоԝа кʹәрәма хԝә дайә тә». Щьмәʹта Исраел бь әʹмьрәки баш дьжит у бәхтәԝар бун. Ле ԝәʹдәки кьнда, әԝ һәр тьшт һатә гӧһастьне.

Һʹәта кӧ Сьлеман Йаһоԝарʹа хьзмәт дькьр, Исраеледа әʹдьлайи һәбу. Ле Сьлеман гәләк жьнед жь мьләтед дьн хԝәрʹа дьанин, кʹижана пʹут дьһʹәбандьн. Һеди-һеди, Сьлеман һатә гӧһастьне у әԝи жи дәстпекьр пʹута бьһʹәбинә. Йаһоԝа гәләк сәр Сьлеман һерс кʹәт у готә ԝи: «Әзе пʹадшатийе жь тә бьстиньм у бькьм дӧ пʹара. Әзе пʹара лапә мәзьн бьдьмә хӧламе тә, ле зӧрʹәта тә ԝе тʹәне сәр пʹарәкә бьчʹук пʹадшатийе бькә».

Йаһоԝа бь щурʹәки майин жи сафикьрьна хԝә да кʹьфше. Щарәке хӧламәки Сьлеман, Йәровам, рʹева рʹасти пʹехәмбәр Аһийа һат. Аһийа кʹьнща хԝә кьрә 12 пʹара у готә Йәровам: «Йаһоԝа ԝе пʹадшатийа Исраеле жь зӧрʹәта Сьлеман бьстинә у бькә дӧ пʹара. Дәһә пʹара һьлдә, чьмки тӧ йе бьби пʹадше дәһә бәрәка». Гава Сьлеман Пʹадша дәрһәԛа ԝе йәке бьһист, әԝи хԝәст Йәровам бькӧжә! Ләма жи Йәровам рʹәви Мьсьре. Ԝәʹдә шунда Сьлеман мьр у кӧрʹе ԝи Рʹәһобоԝам бу пʹадша. Ԝи чахи Йәровам фькьри, ԝәки дькарә вәгәрʹә Исраеле, чьмки әʹмьре ԝи иди бьн ԛәзийеда нибу.

Рʹуспийед Исраеле готьнә Рʹәһобоԝам: «Һәрге тӧ һьндава щьмәʹте баш би, әԝана ԝе тәрʹа амьн бьн». Ле һәвалед Рʹәһобоԝам, йед щаһьл, готьнә ԝи: «Тӧ гәрәке һьндава щьмәʹте сәрт би! Зоре щьмәʹте бькә, ԝәки һе зәʹф бьхәбьтьн!» Рʹәһобоԝам гӧрʹа һәвалед хԝәйи щаһьл кьр. Әԝ гәләк сәрт бу һьндава щьмәʹте, ләма жи дәһә бәрәкед Исраеле пешбәри ԝи рʹабун. Ԝана Йәровам кьрьнә пʹадше хԝә, у әв пʹадшатийа сәр дәһә бәрәка һатә навкьрьне пʹадшатийа Исраеле. Ле дӧ бәрәкед дьн, йед кӧ Рʹәһобоԝамрʹа амьн ман, һатьн навкьрьне пʹадшатийа Щьһуда. Ԝи щурʹәйи 12 бәрәкед Исраеле һатьнә пʹарәвәкьрьне.

Йәровам нәдьхԝәст, ԝәки щьмәʹта ԝи һәрә пʹарьстгәһа Оршәлимә сәва хьзмәткьрьне. Гәло чьрʹа? Чьмки әԝ шәһәр бьн пʹадшатийа Рʹәһобоԝамда бу у Йәровам дьтьрсийа, ԝәки щьмәʹт дькарә пьшта хԝә бьдә ԝи у алийе Рʹәһобоԝам бьгьрә. Ләма жи Йәровам дӧ голькед зерʹ чекьр у готә щьмәʹте: «Оршәлим гәләк дур ә. Һун дькарьн вьра хьзмәтийа хԝә биньн сери». Щьмәʹте дәстпекьр сәре хԝә бәр голькед зерʹ дайнә у диса Йаһоԝа бир кьрьн.

Гәләк пʹадшед дәһә бәрәкед пʹадшатийа Исраел, хьраб бун, ле Аһаб пʹадша гьшка хьрабтьр бу. Әԝи жьнәкә бь наве Изабел станд, кʹижане хӧдане ԛәлп Баәл, дьһәбанд. Аһаб у Изабел щьмәʹт һин кьрьн, ԝәки сәре хԝә бәр Баәл дайньн у ԝана пʹехәмбәред Йаһоԝа дькӧшт. Ле сәва ԝе йәке Йаһоԝа чь кьр? Әԝи пʹехәмбәре хԝә Елйас шанд, ԝәки әԝ әʹламәтийа ԝи дәрбази Аһаб кә.

Елйас готә Аһаб Пʹадша, ԝәки сәва зӧлмийа ԝи Исраеледа баран ԝе се сала нәбарә. Се сала зедәтьр зәви шин нәдьбун у щьмәʹт бьрчина дьмьр. Йаһоԝа готә Елйас, ԝәки һәрә бал Аһаб. Гава пʹадша ԝи дит, готә ԝи: «Тӧ йи, мәʹнийа һәр щәфед мә! Рʹуйе тәда әм кʹәтьнә ԝи һʹали!» Елйас щаба ԝи да у гот: «Рʹуйе мьнда нинә, ԝәки бебарани йә. Әԝ рʹуйе ԝәда йә, чьмки һун сәре хԝә бәр Баәл датиньн. Щьмәʹт у пʹехәмбәред Баәл сәр чʹийайе Кармәл тʹоп кьн у әме бьщерʹьбиньн, кʹе йә Хԝәдайе рʹаст».

Щьмәʹт сәр чʹийе тʹоп бу. У Елйас готә ԝан: «Сәр һʹьше хԝәда ԝәрен. Һәрге Йаһоԝа йә Хԝәдайе рʹаст, пәй ԝи һәрʹьн, ле һәрге Баәл ә, пәй ԝи һәрʹьн. Ԝәрен әм бьщерʹьбиньн. Бьра 450 пʹехәмбәред Баәл ԛӧрбане һазьр кьн у гази хӧдане хԝә бькьн. Әзе жи ԛӧрбане һазьр кьм у гази Йаһоԝа кьм. Кʹе агьрʹ жь әʹзман бьшинә сәр ԛӧрбане, әԝ ә Хԝәдайе рʹаст». Щьмәʹт ԛайил бу.

Пʹехәмбәред Баәл ԛӧрбан һазьр кьрьн. Тʹәмамийа рʹоже ԝана гази хӧдане хԝә дькьрьн: «Ԝәй, Баәл, щаба мә бьдә!» Ле Баәл щаб нәдьда у Елйас ԛәрфе хԝә ԝана дькьр. Әԝи дьгот: «Һе ԛайим бькьнә ԛарʹә-ԛарʹ. Дьбәк әԝ рʹазайә, у лазьм ә, ԝәки кәсәк ԝи һʹьшйар кә». Тәʹри кʹәтә әʹрде, ле пʹехәмбәред Баәл бәрдәԝам дькьрьн гази ԝи кьн. Ле әԝи диса жи щаб нәдьда.

Елйас ԛӧрбана хԝә дани сәр горигәһе у гәләк ав сәрда кьр. Паше әԝи дӧа кьр у гот: «Йа Йаһоԝа, лава дькьм бьра щьмәʹт бьвинә, ԝәки тӧ йи Хԝәдайе рʹаст». Һәма ве дәме Йаһоԝа агьр жь әʹзман шандә сәр ԛӧрбане. Щьмәʹте бь дәнге бьльнд гот: «Йаһоԝа йә, Хԝәдайе рʹаст!» Елйас гот: «Нәһельн, ԝәки пʹехәмбәред Баәл бьрʹәвьн у хԝә вәшерьн!» Ԝе рʹоже 450 пʹехәмбәред Баәл һатьнә кӧштьне.

Гава сәр бәʹрерʹа әʹԝрәки бьчʹук һатә кʹьфше, Елйас готә Аһаб: «Ԝе лейи бькʹьшә. Зу әʹрәба хԝә сийар бә у һәрʹә мал». Ԝе дәме әʹԝре рʹәш тʹоп бу у барана ԛайим дәстпебу. Паши ԝе йәке һʹьшкайи хьлаз бу. Аһаб пе әʹрәба хԝә ләзә-ләз рʹе кʹәт. Бь аликʹарийа Йаһоԝа, Елйас жь әʹрәбе зутьр дьрʹәвийа! Гәло чәтьнайед Елйас хьлаз бун? Ԝәрә әм бьвиньн.

Изабел гәләк һерс кʹәт чахе бьһист, чь һатә сәре пʹехәмбәред Баәл. Әԝе мәрьв шандьн, ԝәки бежьнә Елйас: «Сьбе, тӧйе мина пʹехәмбәред Баәл бейи кӧштьне». Елйас гәләк тьрсийа у рʹәви бәрʹийе. Елйас дӧа дькьр: «Йаһоԝа, тәйаха мьн тʹӧнә. Лава дькьм, әʹмьр жь мьн бьстинә». Елйасе вәстийайи бьн бахда хәԝрʹа чу.

Мәләк ԝи һʹьшйар кьр у бь дәнге нәрм готә ԝи: «Рʹабә, нан бьхԝә». Елйас дит, ԝәки незики ԝи, сәр кәвьра нане гәрм ә у кʹупе аве бәр ә. Әԝи хԝар-вәхԝар у диса рʹаза. Мәләк диса ԝи һʹьшйар кьр у гот: «Рʹабә, нан бьхԝә. Тәрʹа ԛәԝат лазьм ә, ԝәки рʹекʹәви». Елйас рʹабу у нан хԝар. Паше әԝ 40 рʹож у 40 шәви рʹеда бу, һʹәта гьһиштә Чʹийайе Һорәб. Ԝедәре әԝ кʹәтә шкәфте у рʹаза. Ле Йаһоԝа тʹәви ԝи хәбәр да у готә ԝи: «Елйас, тӧ вьра чь дьки?» Елйас щаб да у гот: «Исраелийа созе, кӧ дабун тә нәанин сери. Әԝана горигәһа тә һурдәхԝәши кьрьн у пʹехәмбәред тә кӧштьн. Ле ньһа әԝана дьхԝазьн мьн жи бькӧжьн».

Йаһоԝа готә ԝи: «Дәре у сәр чʹийе бьсәкьнә». Ньшкева баки ԛайим рʹабу, әʹрд һәжийа, у паше агьр һатә кʹьфше. Ахьрийе, Елйас бьһист дәнгәки нәрм у рʹьһʹәт. Әԝи пе кʹьнще хԝә сәр чʹәʹве хԝә дада у шкәфте дәркʹәт. Йаһоԝа жь ԝи пьрси, ԝәки чьрʹа әԝ рʹәви. Елйас готә ԝи: «Тʹәне әз жь хьзмәткʹаред тә сах мамә». Ле Йаһоԝа готә ԝи: «Тӧ тʹәне нини. Исраеледа диса 7 000 хьзмәткʹаред мьни амьн манә. Һәрʹә у Елиша дәԝса хԝә чаԝа пʹехәмбәр кʹьфш кә». Елйас перʹа-перʹа чу у кьр әԝ, чь кӧ Йаһоԝа ԝирʹа гот. Һәрге тӧ ԝе йәке дьки, чь кӧ Йаһоԝа жь тә дәԝа дькә, ча тӧ дьшьрмиш дьби, әԝе али тә жи бькә? Әре, сәд сәләфи. Ԝәрен әм ньһа бьньһерʹьн чь диса ԛәԝьми ԝәʹде бебаранийе.

Чахе Исраеледа бебарани бу, Йаһоԝа Елйасрʹа гот: «Һәрʹә Сәрәпте. Ԝедәре жьнәбик ԝе хԝарьне бьдә тә». Бәр дәре шәһәр Елйас жьнәкә кʹәсиб дит, йа кӧ дар тʹоп дькьр. Әԝи ав жь ԝе хԝәст. Әԝ кʹӧлфәт чу аве ԝирʹа бинә, ле һʹәта әԝ дьчу Елйас кьрә гази у гот: «Лава дькьм, һьнә нан жи бинә». Ле жьнәбийе гот: «Нане мьн тʹӧнә. Бал мьн тʹәне һьнә ар у рʹун майә, әԝа ԝе анщах тʹера мьн у кӧрʹе мьн бькә». Елйас готә ԝе: «Йаһоԝа соз дьдә, һәрге тӧ һьнә нан бона мьн бьпежи, ар у рʹуне тә ԝе кʹӧта нәбә, һʹәта бебарани хьлаз бә».

Жьнәби чу мал у дәстпекьр, сәва пʹехәмбәре Йаһоԝа нан бьпежә. Ԝи ԝәʹде чәтьн мала жьнәбийеда һәр гав хԝарьн һәбу, чаԝа Йаһоԝа соз дабу. Ар у рʹуне ԝе хьлаз нәдьбу.

Паше әԝе жьнәбийе дәрʹдәки гьран дит. Кӧрʹе ԝе гәләк нәхԝәш кʹәт у мьр. Әԝе лава Елйас кьр, ԝәки али ԝе бькә. Елйас зарʹ жь дәсте ԝе һьлда у бьрә отʹаха жоре. Әԝи зарʹ дани сәр щи-ньвина у дәстпекьр дӧа бькә: «Йаһоԝа, лава дькьм, зарʹе сах кә». Тӧ зани чьрʹа әԝ йәк ԝе әʹщебмайи буйа, һәрге Йаһоԝа әԝ кʹәрәмәт бькьра? Чьмки чаԝа әм заньн, тӧ кәс пешда жь мьрьне нәһатьбу сахкьрьне. Һьн жи жьнәби у кӧрʹе ԝе Исраели нибун.

Ле диса жи зарʹок һатә сахкьрьне! Елйас готә жьнәбийе: «Бьньһерʹә! Кӧрʹе тә вәгәрʹийа жийине». Де гәләк ша бу у готә Елйас: «Ньһа әз заньм, ԝәки тӧ жь Хԝәде һати. У һәр тьшт, чь кӧ тӧ дьбежи жь Хԝәде йә у әԝ тенә сери».

Аһаб Пʹадша Йизреәледа жь пʹәнщәра мала хԝәва дькарьбу рʹәзед тьрийе Набот бьвинә. Әԝи гәләк дьхԝәст әԝи әʹрди бькʹьрʹә. Ле Набот нәдьфьрот, чьмки бь ԛануна Йаһоԝа изьна ԝи тʹӧнә бу әʹрде кал-баве хԝә бьфьрошә. Ле гәло әԝ йәк Аһаб хԝәш һат? На. Аһаб гәләк һерс кʹәт. Әԝ ӧса дьлшкәсти бу, ԝәки нәдьхԝәст жь отʹаха хԝә дәре у нә жи дьхԝәст хԝарьне бьхԝә.

Жьна Аһаб Изабел, йәкә зӧлм бу, әԝе готә мере хԝә: «Тӧ пʹадше Исраеле йи. Чь жи бьхԝази гәрәке бьстини. Әзе әԝи әʹрди бона тә бьстиньм». Әԝе нәʹмә шаньд рʹуспийед ԝи шәһәрирʹа, кʹижанида Набот дьжит. Нәʹмеда ньвисибу, ԝәки бӧхдана бавежьнә Набот, кӧ йан чь әԝи ньфьрʹ Хԝәде кьрийә, ләма жи гәрәке ԝи пе кәвьра бькӧжьн. Әԝан меред мәзьн, һәма ӧса жи кьрьн. Паши ԝе йәке Изабеле готә Аһаб: «Набот мьр. Рʹәзед тьрийе ԝи ида йе тә нә».

Ле нә тʹәне Набот бе мәʹни жь дәсте Изабеле һатә кӧштьне, әԝе гәләк мәрьв кӧшт, кʹижана Йаһоԝа һʹьз дькьрьн. Әԝе пʹут дьһʹәбандьн у диса гәләк тьштед хьраб дькьр. Йаһоԝа әԝ һʹәму кьред ԝейә зӧлм дьдит. Ле гәло Йаһоԝа чь ани сәре ԝе?

Паши ԝе йәке Аһаб мьр, у кӧрʹе ԝи Йорам бу пʹадша. Йаһоԝа мерәк, наве кʹижани Йәһу бу, шандә бал Изабеле, ԝәки ԝе у малбәта ԝе щәза кә.

Йәһу кʹәтә әʹрәба хԝә у чу Йизреәле, мала Изабеле. Йорам жи кʹәтә әʹрәба хԝә сәва рʹасти Йәһу бе, гава әԝ дит, жь ԝи пьрси: «Һатьна тә хер ә?» Йәһу готә ԝи: «Һʹәта кӧ дийа тә Изабел кьред хьраб дькә, тьштед хер ԝе тʹӧнә бә». Ԝи чахи Йорам хԝәст әʹрәба хԝә бьзьвьрʹинә у пашда бьрʹәвә, ле Йәһу пь тир Йорам кӧшт.

Гава Изабеле дит, ԝәки Йәһу те бәрбь мала ԝе, чу хԝә хәмьланд, һьлкʹьшийа отʹаха жоре у бәр пʹәнщәрʹе һивийа ԝи бу. Чахе Йәһу незик бу, әԝе гәләк сәрт ԝи сьлав кьр. Йәһу готә хӧламед ԝе, йед кӧ кʹеләка ԝе сәкьни бун: «Ле жорда бавежьн!» Ԝана Изабел жь пʹәнщәрʹе авитьн, әԝ жорда кʹәт у мьр.

Паши ԝе йәке Йәһу ӧса кьр, ԝәки 70 кӧрʹед Аһаб һатьн кӧштьне у әʹрд жь хьзмәткʹаред Баәл һатә тʹәмьзкьрьне. Дьвини, ԝәки Йаһоԝа һʹәму тьшти дьвинә у чахе лазьм ә, щәза дькә ԝан мәрьва, йед кӧ тьштед нәрʹаст дькьн?

Йәһошәфат, пʹадше Щьһуда, горигәһа Баәл у пʹутед ԝи һурдәхԝәши кьр. Әԝи дьхԝәст, ԝәки мәрьв бьзаньбьн дәрһәԛа ԛанунед Йаһоԝа. Пʹаше әԝи ԝәкʹил у Леԝи шандьн Щьһудайе, ԝәки щьмәʹте ԛанунед Йаһоԝа һин кьн.

Щьмәʹта дор-бәре Щьһудайе, дьтьрсийан пешбәри ԝан дәрен, чьмки заньбун, ԝәки Йаһоԝа тʹәви щьмәʹта хԝәйә. Әԝана һәла һе пʹешкʹеш жи Йәһошәфат Пʹадшарʹа анин. Ле әскәред жь ԝәлате Моԝабе у Аммоне у жь чʹийайе Сәир һатьн шәрʹ пешбәри Щьһуда. Йәһошәфат заньбу, ԝәки аликʹарийа Йаһоԝа ԝирʹа лазьм ә. Әԝи Оршәлимеда мер, жьн у зарʹ тʹоп кьр у бь дәнге бьльнд дӧа кьр: «Йаһоԝа, бе аликʹарийа тә әм нькарьн сәркʹәвьн. Лава дькьн, бежә мә, әм чь гәрәке бькьн».

Йаһоԝа щаба дӧайе ԝи да у готә ԝан: «Нәтьрсьн. Әзе али ԝә бькьм. Бьсәкьньн у бьньһерʹьн, чаԝа әзе ԝә хьлаз кьм». Чаԝа Йаһоԝа ԝана хьлаз кьр?

Сьбәһе зу, Йәһошәфат дәнгбеж тʹоп кьрьн у готә ԝан, ԝәки пешийа әскәра дәркʹәвьн. Әԝана жь Оршәлиме дәркʹәтьн у чунә сәр мәйдана шәрʹкьрьне, йа бь наве Тәкоа.

Һʹәта кӧ дәнгбежа пе дәнге бьльнд у бь шабуне наве Йаһоԝа рʹумәт дькьрьн, Йаһоԝа пеш щьмәʹта хԝәва шәрʹ дькьр. Йаһоԝа ӧса Моԝаб у Аммонийа тʹәвиһәв хьст, ԝәки ԝана дәстпекьр һәвдӧ бькӧжьн у тʹӧ кәс жь ԝан сах нәма. Ӧса Йаһоԝа щьмәʹта хԝә хьлаз кьр. Һʹәму мьләтед дор-бәре шәһәре ԝан бьһистьн, ԝәки Йаһоԝа бона щьмәʹта хԝә чь кьр. У ԝана фәʹм кьр, ԝәки Йаһоԝа тʹӧ щар щьмәʹта хԝә наһелә. Рʹожа иройин, Йаһоԝа чаԝа дькарә щьмәʹта хԝә хԝәй кә? Пе щурʹә-щурʹә метода. У сәва ԝе йәке, аликʹарийа мәрьва ԝирʹа нәлазьм ә.

Әʹрде Сурйайеда һәбу кәчʹькәкә бьчʹук йа кӧ Исраели бу, әԝ жь малбәта хԝә һатьбу ԛәтандьне. Әскәред Сурйайе әԝ кәчʹьк чаԝа дил һьлданә бал хԝә у кьрьнә щарийа жьна Нәʹмане сәрәскәр. Рʹаст ә, дор-бәре ԝе кәчʹьке хьзмәткʹаред Йаһоԝа тʹӧнә бун, ле диса жи әԝе баԝәрийа хԝә һьндава Йаһоԝа сьст нәдькьр.

Нәʹман нәхԝәшийа гьран кʹәт, әв нәхԝәшийа ԝи йа чʹәрʹм бу, әԝи һәр гав еш сәр хԝә тʹәхмин дькьр. Кәчʹька бьчʹук бь дьл у щан дьхԝәст али ԝи бькә. Әԝе готә жьна Нәман: «Әз заньм дәрһәԛа пʹехәмбәрәки Йаһоԝа, йе кӧ жь Исраеле йә. Наве ԝи Елиша йә. У әԝ дькарә мере тә ԛәнщ кә».

Жьна Нәʹман дәрһәԛа ԝе йәке готә мере хԝә. Сәва кӧ ԛәнщ бә, Нәʹман һазьр бу һәр тьшти бькә, ләма жи әԝ рʹабу у чу Исраеле мала Елиша. Нәʹман һивийе бу, ԝәки Елиша ԝе бь ԛәдьр ԝи ԛәбул кә. Ле дәԝса кӧ хԝәха дәре тʹәви ԝи хәбәр дә, Елиша хӧламе хԝә шанд, ԝәки әԝ Нәʹман сьлав кә у бежә ԝи: «Һәрʹә у һʹәфт щарʹа бькʹәвә Чʹәме Урдӧне. Паши ԝе йәке тӧйе ԛәнщ би».

Нәман гәләк хәмгин бу. Әԝи гот: «Әз һивийе бум, ԝәки пʹехәмбәр ԝе хԝәха бәрбь мьн бе, гази Хԝәдайе хԝә кә у бь щурʹәки мәхсус мьн ԛәнщ кә. Дәԝса ԝе йәке әԝ мьнрʹа дьбежә, ԝәки әз һәрʹьм у бькʹәвьмә чʹәме ԝан. Бал мә Сурйайеда, чʹәме дьһа баш һәнә. Чьрʹа әз нькарьм һәрʹьм ԝедәре?» Нәʹман һерс кʹәт у жь мала Елиша чу.

Хӧламед Нәʹман али ԝи кьрьн, ԝәки әԝ сәр ԝе йәке щурʹәки майин бьньһерʹә. Ԝана готә ԝи: «Нә тӧ һазьр буйи һәр тьшти бьки, ԝәки ԛәнщ би? Әԝ чь кӧ пʹехәмбәр готә тә, чәтьн нинә бьки. Рʹаст нинә?» Нәʹман гӧһ да хӧламед хԝә у чу һʹәфт щара кʹәтә Чʹәме Урдӧне. Паши щара һʹәфта бәдәна ԝи ԛәнщ бу. Әԝ гәләк рʹази бу у ләма жи вәгәрʹийа бал Елиша, ԝәки рʹазибуна хԝә бьдә кʹьфше. Нәʹман готә ԝи: «Ньһа әз заньм, ԝәки Йаһоԝа йә, Хԝәдайе рʹаст». Чаԝа тӧ дьшьрмиш дьби кәчʹька бьчʹук чь тʹәхмин кьр, гава дит, ԝәки Нәʹман ԛәнщ буйә?

Пʹадше Сурйайе Бән-һадад бәрдәԝам дькьр пешбәри Исраелийа дәре. Ле һәр щар Елиша пʹехәмбәр дәрһәԛа ԝе йәке әʹлами пʹадше Исраеле дькьр у пʹадша дькарьбу хԝә дури дьжмьна бьгьрә. Ләма жи Бән-һадад дьхԝәст Елиша бьгьрʹта. Әԝ пеһʹәсийа, ԝәки Елиша шәһәре Дотанеда нә, әԝи әскәред хԝә шандә ԝедәре, ԝәки ԝи бьгьрьн.

Еваре әскәред Сурйайе гьһиштә Дотане. Сьбәһе зу хӧламе Елиша дәркʹәт дәрва у дит, ԝәки әскәра дор-бәре шәһәр гьртьнә. Әԝ гәләк тьрсийа у кьрә гази: «Елиша әм чь бькьн?» Елиша готә ԝи: «Йед кӧ тʹәви мә нә дьһа зәʹф ьн, нә кӧ йед тʹәви ԝан». Ԝе дәме Йаһоԝа ӧса кьр, ԝәки хӧламе Елиша сәр чʹийайед дор-бәре хԝә, һәсп у әʹрәбед агьр дит.

Гава әскәред Сурйайе хԝәстьн Елиша бьгьрьн, әԝи жь Йаһоԝа аликʹари хԝәст. Ньшкева Йаһоԝа ӧса кьр, ԝәки әскәр тʹәвиһәв бун у фәʹм нәдькьрьн кʹидәре нә. Елиша готә әскәра: «Ԝә щийе хԝә шаш кьрийә у һун һатьнә шәһәрәки дьн. Пәй мьн ԝәрен у әзе ԝә бьвьм бал ԝи мәрьви, кʹижани һун дьгәрʹьн». Әԝана пәй Елиша һʹәта Самәрийе чун, кʹидәре пʹадше Исраеле дьжит.

Чахе әскәред Сурйайе фәʹм кьрьн әԝана кʹидәре нә, ида гәләк дәрәнг бу. Пʹадше Исраеле жь Елиша пьрси: «Әз ԝана бькӧжьм?» Гәло Елиша хԝәст әԝе мәщале бьдә хәбате, сәва һʹәйфе ԝәкә? На. Елиша гот: «Ԝана нәкӧжә. Хԝарьне бьдә ԝан у пашда бьшинә». Пʹадша ԝана тʹер кьр у шандә мала ԝан.

Аталйа ԛиза Изабеле бу, йа кӧ мина дийа хԝә гәләк зӧлм бу. Мере Аталйайе пʹадше Щьһуде бу. Чахе мере ԝе мьр, кӧрʹе ԝе щийе баве хԝә гьрт. Ле гава кӧрʹе ԝе жи мьр, Аталйайе Щьһуда кьрә бьн дәсте хԝә. Паши ԝе йәке, әԝе дьхԝәст рʹькʹьнйата пʹадшатийе кʹӧта кьра. Ләма жи әԝе һәр кәс, кʹе дькарьбу дәԝса ԝе сәрԝертийе бькә, дькӧшт, һʹәла һе нәбийед хԝә жи. Әԝе тьрса хԝә кьрьбу сәр һʹәмушка.

Йәһойад сәрәккʹаһин у жьна ԝи Йәһошәба фәʹм дькьрьн, ԝәки кьред Аталйайе гәләк хьраб ьн. Әԝана әʹмьре хԝә дькьрьнә бьн ԛәзийе, сәва нәбийе Аталйайе вәшерьн, наве кʹижани Йоаш бу. Ԝана әԝ зарʹок пʹарьстгәһеда мәзьн кьрьн.

Кʹәнге Йоаш һʹәфт сали бу, Йәһойад сәроке һәр бәрәка у Леԝийа тʹоп кьр у готә ԝан: «Мьԛати дәргәһед пʹарьстгәһе бьн, ԝәки тʹӧ кәс нәкʹәве». Пʹаше Йәһойад Йоаш кьрә пʹадше Щьһудайе у тʹащ дани сәр сәре ԝи. Щьмәʹта Щьһудайе кьрә гази: «Әʹмьре дьреж пʹадшерʹа!»

Жьн-пʹадша Аталйа дәнге щьмәʹте бьһист у дәрберʹа чу пʹарьстгәһе. Чахе әԝе пʹадше тʹәзә дит, кьрә ԛарә-ԛар: «Һьмбәри мьн рʹабун! Һьмбәри мьн рʹабун!» Ԝи чахи сәрокед бәрәка әԝ жьн-пʹадшайа зӧлм гьртьн у бьрьн щики дьн кӧштьн. Ле чь һатә сәре щьмәʹте, йа кӧ бьн һʹӧкӧме ԝеда бу?

Йәһойад али щьмәʹте кьр, ԝәки пәймане тʹәви Йаһоԝа гьредьн у соз бьдьн, ԝәки тʹәне ԝирʹа хьзмәт кьн. Йәһойад ӧса кьр, ԝәки щьмәʹте пʹарьстгәһа Баәл у пʹут һурдәхԝәши кьрьн. Әԝи кʹаһин у Леԝи кʹьфш кьрьн, ԝәки әԝана пʹарьстгәһа Йаһоԝада хьзмәт кьн, сәва кӧ щьмәʹт бькарьбә диса ԝедәре Йаһоԝа бьһʹәбинә. Йәһойад нобәдар да бәр дәре пʹарьстгәһе, ԝәки тʹӧ кәсе нәтʹәмьз бәр чʹәʹве Йаһоԝа, нькарьбә бькʹәвә ԝедәре. Паше Йәһойад у сәрокед бәрәка, Йоаш сәр тʹәхте пʹадше данә рʹуньштандьне. Щьмәʹта Щьһуда гәләк ша бу. Ахьрийе әԝана жь һʹәбандьна Баәл у жь зӧлмийа Аталйа аза бун у дькарьбун Йаһоԝарʹа хьзмәт кьн. Тә дина хԝә дайе, ча мерхасийа Йәһойад али гәләк мәрьва кьр?

Нәйноԝайеда мәрьв гәләк зӧлм бун. Йаһоԝа готә пʹехәмбәре хԝә Уньс, ԝәки әԝ һәрә Нәйноԝайе у бежә ԝан мәрьва, ԝәки әԝана кьред хԝәйә хьрʹаб бьһельн у хԝә рʹийа рʹаст бьгьрьн. Ле Уньс рʹәви щики дьн. Әԝ кʹәтә гәмийе, йа кӧ дьчу Тʹаршише.

Гава гәми нава бәʹреда бу, фьртонә рʹабу у гәмиван гәләк тьрсийан. Ԝана дәстпекьрьн хӧданед хԝәрʹа дӧа бькьн: «Чьрʹа әԝ йәк те сәре мә?» Ахьрийе Уньс готә ԝан: «Мәʹнийа ԝе ԛәзийе әз ьм. Әз дьрʹәвьм, ԝәки тʹәмийед Йаһоԝа нәйньм сери. Мьн бавежьнә бәʹре у фьртонә ԝе бьсәԛьрʹә». Гәмивана нәдьхԝәстьн Уньс бавежьнә бәʹре, ле йәкә әԝи дәʹԝа дькьр, ԝәки ԝи бавежьн. Гава ԝана ԝи авитьнә бәʹре, бәʹр сәԛьри.

Уньс дьфькьри, ԝәки ԝе хьлаз нәбә. Һʹәта кӧ әԝ дадькʹәтә бьне бәʹре, әԝи Йаһоԝарʹа дӧа дькьр. Йаһоԝа мәʹсийа мәзьн шанд у әԝи Уньс даԛӧрчʹанд, ле Уньс нәмьр. Әԝи зьке мәʹсида Йаһоԝарʹа дӧа кьр: «Әз соз дьдьмә тә, ԝәки әзе һәр гав гӧрʹа тәда бьм». Йаһоԝа се рʹожа Уньс зьке мәʹсида хԝәй кьр. Паше Йаһоԝа ӧса кьр, ԝәки мәʹси Уньс авитә бәр дәве бәʹре.

Рʹаст ә, Йаһоԝа Уньс хьлаз кьр, ле гәло әԝ йәк дьһатә һʹәсабе, ԝәки әԝ гәрәке нәчә Нәйноԝайе? На. Йаһоԝа диса щарәке готә Уньс, ԝәки һәрʹә ԝедәре. Ве щаре Уньс гӧһ да Хԝәде. Әԝ чу ԝедәре у готә ԝан мәрьвед зӧлм: «Паши 40 рʹожа, Нәйноԝа ԝе бе кʹӧтакьрьне». Ле ԝи чахи тьштәки әʹщеб ԛәԝьми, щьмәʹта Нәйноԝайе гӧһ данә хәбәра Хԝәде у кьред хԝәйи хьраб һиштьн. Пʹадше Нәйноԝайе готә щьмәʹте: «Гази Хԝәде кьн у кьред хԝәйә нәрʹаст тʹобә кьн. Дьбәк әм хьлаз бьн». Гава Йаһоԝа дит, ԝәки щьмәʹте тʹобә кьр, әԝи сафи кьр ԛьрʹа Нәйноԝайе нәйнә.

Уньс гәләк һерс кʹәт гава дит, ԝәки әԝ шәһәр нәһатә ԛьрʹкьрьне. Чаԝа тә дина хԝә дайе, Йаһоԝа дьлрʹәми да кʹьфше һьндава Уньс, ле Уньс һьндава щьмәʹта Нәйноԝайе дьлрʹәм нибу. Әԝ һерс кʹәт у хәйиди, жь ԝи шәһәри дәркʹәт у бьн сийа бәлге кӧндьрда рʹуньшт. Һьнәк ԝәхт шунда кӧндьр зьһа бу, у Уньс сәва ԝе йәке жи гәләк һерс кʹәт. Паше Йаһоԝа готә ԝи: «Һʹәйфа тә ԝи кӧндьри һат, нә кӧ щьмәʹта Нәйноԝайе. Ле мьн һʹәйфа хԝә ԝан ани, дьлрʹәми да кʹьфше у әԝана хԝәй кьрьн». Бь ԝе йәке Йаһоԝа чь дьхԝәст бьдә кʹьфше? Йаһоԝа әʹйан кьр, ԝәки щьмәʹта Нәйноԝайе дьһа ԛимәт ә, нә кӧ шинкайи.

Имперйа Ашуре дәһә бәрәкед Исраеле кьрә бьн дәсте хԝә. Санһәриб, пʹадше Ашуре, ӧса жи дьхԝәст дӧ бәрәкед пʹадшатийа Щьһудайе бькә бьн дәсте хԝә. Әԝи шәһәред Щьһудайе йәк пәй йәке зәфт дькьр. Ле дьһа зәʹф әԝи дьхԝәст Оршәлиме зәфт кә. Ле Санһәриб ньзаньбу дәрһәԛа ԝе йәке, ԝәки чʹәʹве Йаһоԝа сәр Оршәлиме йә.

Һьзԛийа, пʹадше Щьһудайе, гәләк пʹәрә да Санһәриб, ԝәки әԝ дәсте хԝә нәдә Оршәлиме. Рʹаст ә Санһәриб пʹәрә һьлда, ле әԝи диса жи әскәред хԝә дьшанд, ԝәки пешбәри Оршәлиме дәрен. Щьмәʹта Оршәлиме бьн тьрседа бун, чьмки әскәред Ашурʹа һеди-һеди незики Оршәлиме дьбун. Һьнге Һьзԛийа готә ԝан: «Нәтьрсьн. Рʹаст ә, Ашур ԛәԝат ьн, ле Йаһоԝа ԝе мә дьһа ԛәԝат кә».

Санһәриб Рабшак шандә Оршәлиме, ԝәки ԛәрфе хԝә щьмәʹте бькә. Рабшак бәр дәргәһе шәһәр сәкьни бу у бь дәнге бьльнд дьгот: «Йаһоԝа нькарә али ԝә бькә. Нәһельн, ԝәки Һьзԛийа ԝә бьхапинә. Тʹӧ хӧданәк нькарә ԝә жь дәсте мә хьлаз кә».

Һьзԛийа жь Йаһоԝа пьрси чь әԝ гәрәке бькә. Йаһоԝа щаб да у гот: «Хәм нәкә бона готьнед Рабшак. Әзе Оршәлиме нәдьмә дәсте Санһәриб». Паши ԝе йәке, Һьзԛийа нәʹма жь Санһәриб станд. Нәʹмеда ньвиси бу: «Тʹәсмили мьн бьн. Йаһоԝа нькарә ԝә хьлаз кә». Һьзԛийа дӧа дькьр: «Йаһоԝа, лава дькьм, мә хьлаз кә, сәва кӧ һәр кәс бьзаньбә, ԝәки тʹәне тӧ йи Хԝәдайе рʹаст». Йаһоԝа гот: «Пʹадше Ашуре ԝе нәкʹәвә Оршәлиме. Әзе шәһәре хԝә хԝәй кьм».

Сәнһәриб баԝәр бу, ԝәки Оршәлим ԝе бькʹәвә дәсте ԝи. Ле шәвәке Йаһоԝа мәләке хԝә шандә мәйдана әскәра, йед кӧ незики шәһәр щивар бьбун. Әԝи мәләки 185 000 әскәр кӧшт! Сәнһәриб Пʹадша, әскәред хԝәйи ԛәԝи ӧнда кьр. Әԝ бь шәрми вәгәрʹийа мала хԝә. Чаԝа Йаһоԝа соз дабу, ԝәки ԝе Һьзԛийа у Оршәлиме хԝәй кә, әԝи һәма ӧса жи кьр. Һәрге тӧ ԝи чахи Оршәлимеда буйайи, тәйе жи итʹбарийа хԝә Йаһоԝа бьанийа?

Йошийа һʹәйшт сали бу кʹәнге дәстпекьр Щьһудайеда пʹадшатийе бькә. Ԝан чаха мәрьв сербазийева мьжул дьбун у пʹут дьһʹәбандьн. Гава Йошийа бу 16 сали, әԝи ԛәԝат дьда хәбате, ԝәки һин бә чаԝа рʹаст Йаһоԝа бьһʹәбинә. Ле гава әԝ бу 20 сали, әԝи дәстпекьр пʹут у горигәһед тʹәмамийа ԝәлатда һурдәхԝәши кә. У 26 салийед хԝәда, әԝи дәстпекьр пʹарьстгәһа Йаһоԝа тʹәзә кә.

Һилкийа сәрәккʹаһин пʹарьстгәһеда кʹьтеба гӧломәтккьри дит, сәр кʹижани Ԛанунед Йаһоԝа ньвисар бун. Дьԛәԝьмә әԝ Ԛанун хут ньвисаред дәсте Муса бун. Шафан, бәрдәстийе Йошийа Пʹадша, кʹьтеба Ԛануне бьрә бал пʹадша у бь дәнге бьльнд ԝирʹа хԝәнд. Гава Йошийа Пʹадша әԝ йәк бьһист фәʹм кьр, ԝәки щьмәʹте гәләк сал гӧһ нәдьдан Ԛанунед Йаһоԝа. Йошийа Пʹадша готә Һилкийа: «Йаһоԝа гәләк һерс ә сәр мә. Һәрʹә у жь ԝи пебьһʹәсә әм чь гәрәке бькьн». Йаһоԝа бь аликʹарийа жьнәкә пʹехәмбәр, наве кʹижане Һулда бу, готә ԝан: «Щьмәʹта Щьһудайе пьшта хԝә дайә мьн. Әԝе бе щәзакьрьне ле нә рʹожед Йошийада, чьмки әԝи мьлукти да кʹьфше».

Гава Йошийа Пʹадша әʹламәтийа Йаһоԝа бьһист, әԝи щьмәʹта Щьһуда пʹарьстгәһеда тʹоп кьр, у Ԛануна Йаһоԝа бь дәнге бьльнд ԝанарʹа хԝәнд. Йошийа у щьмәʹте соз дан, ԝәки ԝе бь тʹәмамийа дьле хԝә гӧрʹа Йаһоԝа бькьн.

Ида гәләк сал бу, ԝәки щьмәʹта Щьһудайе Щәжьна Дәрбазбуне кʹьфш нәдькьрьн. Ле гава Йошийа жь кʹьтеба Ԛануне хԝәнд, ԝәки чьԛас фәрз ә Щәжьна Дәрбазбуне дәрбаз кьн, әԝи готә щьмәʹте: «Әме Щәжьна Йаһоԝа һәр гав дәрбаз кьн». Йошийа хԝә һазьр кьр, ԝәки гәләк ԛӧрбана бинә у кʹома дәнгбежа пʹарьстгәһеда саз кьр. Паше ԝана Щәжьна Дәрбазбуне дәрбаз кьрьн, пәй кʹижанирʹа ԝана һʹәфт рʹожа Щәжьна Нане Шкәва дәрбаз кьрьн. Паши рʹожед Самуел, Исраелийа Щәжьна ви щурʹәйи, дәрбаз нәкьрьбун. Йошийа бь рʹасти ԛанунед Йаһоԝа һʹьз дькьр. Ле тӧ бь дьл у щан дәрһәԛа Йаһоԝа һин дьби?

Йаһоԝа Йерәмйа ча пʹехәмбәр жьбарт, ԝәки әԝ Щьһудайеда шәʹдәтийе бьдә. Хԝәде готә ԝи, ԝәки әԝ гәрәке шәʹдәтийе бьдә у әʹлами ԝан кә, сәва кӧ әԝана кьред хԝәйи хьраб бьтʹәрькиньн. Ле Йерәмйа гот: «Йаһоԝа, нә әз һе щаһьл ьм. Әз ньзаньм чаԝа әз гәрәке тʹәви щьмәʹте хәбәр дьм». Ле Йаһоԝа готә ԝи: «Нәтьрсә. Әзе тә һин кьм чь бежи. Әзе али тә бькьм».

Йаһоԝа готә Йерәмйа, ԝәки әԝ гази рʹуспийа кә у бәр чʹәʹве ԝан кʹупе һʹәрʹи һурдәхԝәши кә у бежә: «Оршәлим ԝе мина ԝи кʹупи һурдәхԝәши бә». Гава Йерәмйа ӧса кьр, рʹуспи гәләк һерс кʹәтьн. Кʹаһинәк, наве кʹижани Пашһур бу, Йерәмйа хьст у дәст ньге ԝи ԛәйдада шьданд. Тʹәмамийа шәве Йерәмйа нькарьбу хԝә бьвьра-бьанийа. Сьбәтьре Пашһур Йерәмйа бәрʹда. Йерәмйа фькьри: «Әз ӧса нькарьм. Әз гәрәке ида шәʹдәтийе нәдьм». Гәло бь рʹасти Йерәмйа сьст бу? На. Чахе әԝ һе кʹур фькьри, әԝи гот: «Мьзгинийа Хԝәде чаԝа агьр ә дьле мьнда. Әз нькарьм хԝә кәрʹ кьм». Йерәмйа хьзмәтийа хԝә нәда сәкьнандьне.

Сал дәрбаз бун у Щьһудайеда пʹадшәки тʹәзә һатә кʹьфшкьрьне. Әԝ йәк, чь кӧ Йерәмйа дьгот, кʹаһин у пʹехәмбәред дәрәԝрʹа хԝәш нәдьһат. Ԝана готә сәрԝера: «Әԝ мәрьв һежайи мьрьне йә». Ле Йерәмйа готә ԝан: «Рʹьнд бьзаньбьн, һәрге һун мьн бькӧжьн, һуне мәрьве нәгӧнәкʹар бькӧжьн. Чьмки әз нә кӧ хәбәред хԝә дьбежьм, ле хәбәред Йаһоԝа». Һьнге сәрԝера гот: «Ԝи мәрьви гәрәке нәкӧжьн».

Йерәмйа бәрдәԝам дькьр хьзмәт кә у сәрԝер гәләк һерс дькʹәтьн. Ԝана готә пʹадша, ԝәки Йерәмйа бькӧжә. Пʹадша изьн да ԝан, ԝәки чь жи бьхԝазьн, дькарьн биньнә сәре ԝи. Ԝана Йерәмйа гьрт, авитьнә бира кʹур у һʹәрʹи, у баԝәр бун, ԝәки әԝе ԝедәреда бьмьрә. Йерәмйа һеди-һеди дькʹәтә нава һʹәрʹийе.

Ԝәзирәк, наве кʹижани Әдәдмәләк бу, готә пʹадше: «Сәрԝера, Йерәмйа авитьнә бире. Һәрге ԝи дәрнәхьн, әԝе бьрʹчина бьмьрә». Пʹадша фәрман да Әдәдмәләк, ԝәки тʹәви хԝә 30 мери һьлдә у Йерәмйа жь бире дәрхә. Ча мә дит, Йерәмйа нәһишт, ԝәки тʹӧ тьшт рʹийа ԝи бьгьрә Йаһоԝарʹа хьзмәт кә. Ле тӧ дьхԝази ԝе йәкеда чʹәʹв бьди Йерәмйа?

Һеди-һеди щьмәʹта Щьһудайе пьшта хԝә дьданә Йаһоԝа у сәре хԝә бәр хӧдане ԛәлп датанин. Гәләк сал Йаһоԝа һәр тьшт дькьр, ԝәки али ԝан бькә. Әԝи пʹехәмбәре хԝә дьшанд щәм Исраелийа, ле ԝана гӧһ нәдьдане ԝан. Һәла һе ԛәрфе хԝә жи ԝана дькьрьн. Ле чаԝа Йаһоԝа пʹутпʹарьсти да һьлдане?

Нәбукәднәсәр, пʹадше Бабилоне, шәһәр пәй шәһәр зәфт дькьр. Щара пешийе, кʹәнге әԝи шәһәре Оршәлиме зәфт кьр, әԝи Йәһойаким Пʹадша кьрә диле хԝә. Әԝи ӧса жи сәрԝер, әскәр у мәрьвед дәстпʹешә бьрә Бабилоне. Хенщи ԝе йәке, әԝи хьзна пʹарьстгәһа Йаһоԝа зәфти хԝә кьр. Паши ԝе йәке Нәбукәднәсәр, Тʹсәдәкийа кьрә пʹадше Щьһудайе.

Сәрида Тʹсәдәкийа гӧрʹа Нәбукәднәсәр дькьр. Ле щьмәʹта дор-бәре ԝи у пʹехәмбәред дәрәԝ Тʹсәдәкийа һелан кьрьн мьԛабьли Бабилоне дәре. Ле Йерәмйа готә Тʹсәдәкийа: «Һәрге тӧ мьԛабьли ԝан дәрейи, ԝе Щьһудайеда кӧштьн, бьрчибун у нәхԝәши дәстпебьн».

Паши һʹәйшт сала Тʹсәдәкийа сафи кьр мьԛабьли Бабилоне дәре. Ԝе йәкеда әԝи аликʹари жь әскәред Мьсьрийа хԝәст. Ԝи чахи жи Нәбукәднәсәр әскәред хԝә шандә Оршәлиме у әскәред ԝи дора шәһәр гьртьн. Йерәмйа готә Тʹсәдәкийа: «Йаһоԝа дьбежә, һәрге тӧ тʹәсмили Бабилоне би, тӧ у тʹәмамийа шәһәр ԝе хьлаз бьн. Ле һәрге тʹәсмили ԝан нәби, Бабилони ԝе Оршәлиме бьшәԝьтиньн у тә бькьнә дил». Тʹсәдәкийа гот: «Әз тʹәсмил набьм!»

Сал нивәк дәрбаз бу, әскәред Бабилоне диԝаре Оршәлиме һьлшандьн у шәһәр шәԝьтандьн. Ԝана ӧса жи пʹарьстгәһ шәԝьтандьн, гәләк мәрьв кӧштьн у һʹәзара кьрьнә дил.

Тʹсәдәкийа жь Оршәлиме рʹәви, ле Бабилонийа данә пәй ԝи, незики Әриһайе ԝи гьртьн у бьрьнә бал Нәбукәднәсәр. Пʹадше Бабилоне ӧса кьр, ԝәки Тʹсәдәкийа пе чʹәʹве хԝә бьвинә, чаԝа әԝ кӧрʹед ԝи дькӧжә. Паши ԝе йәке Нәбукәднәсәр, Тʹсәдәкийа кор дькә у ԝи давежә кәле, кʹидәреда ԝәʹдә шунда әԝ дьмьрә. Ле Йаһоԝа щьмәʹта Щьһуйарʹа соз да у гот: «Паши 70 сала, әзе ԝә диса вәгәрʹиньм Оршәлиме».

Ле чь һатә сәре ԝан щаһьла, йед кӧ чаԝа дил бьрьнә Бабилоне? Гәло әԝана Йаһоԝарʹа амьн ман?

Чахе Нәбукәднәсәр зӧрʹәта сәрԝеред Щьһудайе бьрә Бабилоне, әԝи ԝәзире хԝә, Ашкәназ, сәр ԝанрʹа кʹьфш кьр. Нәбукәднәсәр готә Ашкәназ, ԝәки жь ԝан хорта йед лапи сьһәт-ԛәԝат у аԛьл бьжберә. Пʹадшә фәрман да, ԝәки әԝ хортед щаһьл се сала бенә һинкьрьне. Әԝ һинкьрьн гәрәке али ԝан бькьра, ԝәки әԝана бьбуна мәрьвнә навдар Бабилонеда. Әԝ хорт гәрәке бьһатана һинкьрьне бьньвисьн, бьхуньн, у зьмане Бабилонийа һин бьн. Ӧса жи ԝана гәрәке әԝ хԝарьн бьхԝарʹана, йед кӧ дьданә бәр пʹадше у ԝәзиред ԝи. Наве ԝан чар хорта Данийел, Һананйа, Мишаел у Азарйа бу. Ашкәназ наве тʹәзә йед кӧ Бабилонеда бәлабуйи бун, да сәр ԝан хорта: Бәлтәшатсар, Шәдрак, Мәшак у Абәднәго. Гәло әԝе һинкьрьне рʹийа ԝан гьрт, ԝәки әԝана ида Йаһоԝарʹа хьзмәт нәкьн?

Әԝан чар хорта дьле хԝәда сафи кьрьбун, ԝәки гӧрʹа Йаһоԝада бьминьн. Ԝана заньбу, ԝәки гәрәке хԝарьна жь сьфьра пʹадше нәхԝьн, чьмки нава ԝе хԝарьнеда жи һәбу гоштед ԝан һʹәйԝана, кʹижан бь ԛануна Йаһоԝа изьн тʹӧнә бу бьхԝьн. Ләма жи ԝана готә Ашкәназ: «Жь кʹәрәма хԝә зоре мә нәкә, ԝәки әм хԝарьн жь сьфьра пʹадше бьхԝьн». Ашкәназ готә ԝан: «Һәрге һун ԝе хԝарьне нәхԝьн, һуне нәхԝәш кʹәвьн, у һәрге пʹадша әԝе йәке бьвинә, ԝе мьн бькӧжә!»

Данийел тьштәк сафи кьр у готә ԝи: «Жь кʹәрәма хԝә нава дәһә рʹожада тʹәне хԝарьнед пе пьнщаре у бе гошт бьдьнә мә. Паше ԝан дәһә рʹожа мә бәрамбәри ԝан щаһьла кьн, йед кӧ жь сьфьра пʹадше дьхԝарьн». Ашкәназ тʹәви ԝан рʹази бу.

Паши дәһә рʹожа, Данийел у се һәвалед ԝи дьһа сьһʹәт-ԛәԝат дьһатьнә кʹьфше, нә кӧ щаһьлед дьн. Әԝ йәк гәләк дьле Йаһоԝа хԝәш һат, ԝәки әԝ хорт ԝирʹа амьн ман. Йаһоԝа ӧса жи билани да Данийел, ԝәки әԝ бькарьбә дитьнока у хәԝна шьровәкә.

Гава һинкьрьна ԝан хьлаз бу, Ашкәназ әԝ щаһьл бьрьнә бал Нәбукәднәсәр. Кʹәнге пʹадша тʹәви ԝан хәбәр да, әԝи тʹәхмин кьр, ԝәки Данийел, Һананйа, Мишаел у Азарйа жь һәр хортед дьн аԛьлтьр ьн. Ләма жи әԝи әԝ чар хорт пʹадшатийа хԝәда кʹьфш кьрьн. Паши ԝе йәке пʹадша гәләк щар ширәт жь ԝана дьхԝәст, дәрһәԛа пьрсед фәрз. Йаһоԝа биланийа ӧса да ԝан, ԝәки бал тʹӧ аԛьлбәнд у сербазед пʹадше тʹӧнә бун.

Рʹаст ә Данийел, Һананйа, Мишаел у Азарйа ԝәлате хәрибда бун, ле диса жи бир нәдькьрьн, ԝәки әԝана жь щьмәʹта Йаһоԝа нә. Ле һәрге тӧ жи жь де-баве хԝә дур би, гәло тӧйе Йаһоԝарʹа амьн бьмини?

Шәвәке Нәбукәднәсәр Пʹадша хәԝнәкә әʹщеб дит. Рʹуйе ԝе йәкеда әԝ һʹьшйар бу у нькарьбу рʹаза. Әԝи гази сербазед хԝә кьр у готә ԝан: «Хәԝна мьн, мьнрʹа шьровәкьн». Ԝана готә ԝи: «Пʹадшайе мә, хәԝна хԝә мәрʹа гьли кә». Ле Нәбукәднәсәр готә ԝан: «На! Һун хԝәха хәԝна мьн мьнрʹа гьли кьн, йане на, әзе ԝә бькӧжьм». Ԝана диса готә ԝи: «Тӧ мәрʹа гьли кә хәԝна хԝә у әме мәʹнийа ԝе хәԝне тәрʹа шьровәкьн». Әԝи готә ԝан: «Һәр кәс жь ԝә дьхԝазә мьн бьхапинә. Бежьнә мьн чь хәԝн мьн дит!» Әԝана готьнә пʹадше: «Тʹӧ кәс нькарә хәԝна тә шьровәкә. Тӧ тьштед нәбуйи дәʹԝа дьки».

Нәбукәднәсәр ӧса һерс кʹәт, ԝәки фәрман да, кӧ һәр меред сербаз у билан бенә кӧштьне. Нава ԝан мерада ӧса жи Данийел, Шәдрак, Мәшак у Абәднәго бун. Һьнге Данийел жь пʹадша һьнә ԝәʹдә хԝәст. Паши ԝе йәке Данийел у се һәвалед ԝи, Йаһоԝарʹа дӧа кьрьн у аликʹари жь ԝи хԝәстьн. Гәло Йаһоԝа чь кьр?

Йаһоԝа хәԝна Нәбукәднәсәр у мәʹнийа ԝи хәԝн-хәйали Данийелрʹа нишан кьр. Рʹожа дьн, Данийел чу бал хӧламе пʹадше у готә ԝи: «Тʹӧ кәси нәкӧжьн. Әзе хәԝна пʹадше шьровәкьм». Хӧламәк Данийел бьрә бал Нәбукәднәсәр. Данийел готә пʹадше: «Хԝәде тәрʹа әʹйан кьр дәрһәԛа ахьрийе. Әԝ ә хәԝна тә, тә һәйкәләки тәрʹьки бь сәре зерʹ дит, синг у дәсте ԝи жь зив бун, зьк у һете ԝи жь сьфьр бун, ньге ԝи жь һәʹсьн бун у пʹийе ԝи жь һʹәсьн у һәрʹийе бун. Кәвьр жь чʹийа ԛәтийа у пʹийе һәйкәл кʹәт. Һәйкәл һурдәхԝәши бу у бу тʹоз-хали, йа кӧ ба лехьст бьр. Әԝ кәвьре, кӧ жь чʹийе ԛәтийа, хԝәха бу чʹийаки мәзьн, у тʹәмамийа әʹрде гьрт».

Паше Данийел готә пʹадше: «Мәʹнийа ԝе хәԝне әԝ ә, ԝәки сәре зерʹ те һʹәсабе пʹадшатийа тә. Пʹара зив те һʹәсабе пʹадшатийа кӧ ԝе паши тә бе. Ле пʹара сьфьр дәрһәԛа ԝи йә, кʹе ԝе бьбә сәрԝере дьнйайе. Пʹадшатийа дьн ԝе мина һʹәсьн ԛәԝи бә. Ле пʹадшатийа пашьн ԝе жь дӧ пʹара бә, пʹарәк ԝе мина һʹәсьн ԛәԝи бә, ле пʹара дьн ԝе мина һʹәрʹийе сьст бә. Әԝ кәвьр, кʹижан бу чʹийайәки мәзьн, те һʹәсабе Пʹадшатийа Хԝәде. Әԝе һʹәму пʹадшатийед дьнйайе бьдә һьлдане у хԝәха ԝе һʹәта-һʹәтайе сәрԝертийе бькә».

Нәбукәднәсәр бәр Данийел кʹәтә сәр чʹока у готә ԝи: «Хԝәдайе тә әԝ хәԝн тәрʹа әʹйан кьр. Тʹӧ Хԝәдеки мина ԝи тʹӧнә йә». Рʹаст ә сәрида Нәбукәднәсәр дьхԝәст Данийел жи тʹәви һʹәму меред билан бькӧшта, ле дәԝсе әԝи, ԝи кьрә сәрԝеред ԝан у рʹебәрийа щьмәʹта Бабилоне да дәсте ԝи. Тә дина хԝә да, чаԝа Йаһоԝа щаба дӧакьрьна Данийел да?

Һьнә ԝәхт паши ԝе йәке, ча Нәбукәднәсәр хәԝнеда һәйкәл дит, әԝи һәйкәләки тәрʹки жь зерʹ чекьр. Әԝ һәйкәл әԝи дани дәшта Дурайеда у гази һʹәму мәрьвед навдар кьр, чаԝа Шәдрак, Мәшак у Абәднәго, сәва кӧ бәр һәйкәл тʹоп бьн. Пʹадша фәрман да: «Гава һун дәнге борʹийе, чәнг у зӧрне бьбьһен, гәрәке бәр һәйкәле зерʹ бькʹәвьнә сәр чока! Әԝед кʹе нәкʹәвьнә сәр чока, ԝе бенә авитьне фьрʹна агьр». Гәло әԝ се хортед Ибрани, ԝе бькʹәвьнә сәр чока бәр һәйкәл, йан ԝе тʹәне Йаһоԝа бьһʹәбиньн?

Пʹадша фәрман да, ԝәки мьԛаме вехьн. Хенщи Шәдрак, Мәшак у Абәднәго һәр кәс бәр һәйкәл кʹәтә сәр чока. Һьнә мер әԝ йәк тʹәхмин кьрьн у готьнә пʹадша: «Әԝ се хортед Ибрани инкʹар кьрьн, ԝәки сәре хԝә бәр һәйкәле тә дайньн». Һьнге Нәбукәднәсәр гот, ԝәки ԝан се хорта биньнә бал ԝи у әԝи готә ԝан: «Әз диса мәщаләке дьдьмә ԝә, ԝәки һун сәре хԝә бәр һәйкәла мьн дайньн. Һәрге һун әԝе йәке нәкьн, әзе ԝә бавежьмә фьрʹна агьр. Ԝи чахи ԝе тʹӧ хӧдан нькарьбә ԝә жь дәсте мьн хьлаз кә». Ԝана гот: «Пʹадше мә, нәлазьм ә диса мәщале бьди мә. Хԝәдайе мә дькарә мә хьлаз кә. Ле һәрге әԝ мә хьлаз нәкә, әме йәкә сәре хԝә бәр һәйкәле тә данәйньн».

Нәбукәднәсәр гәләк һерс кʹәт. Әԝи хӧламед хԝәрʹа гот: «Агьре фьрʹне һʹәфт щара зедәтьр гӧрʹ кьн!» Паше әԝи тʹәми да әскәред хԝә у гот: «Ԝана гьредьн у бавежьнә агьр!» Се хортед Ибрани авитьнә фьрʹна агьр. Агьр ӧса ԛәԝи бу, ԝәки әскәред кӧ ԝана давитьнә фьрʹне, жь алава агьр мьрьн. Ле гава Нәбукәднәсәр дина хԝә да фьрʹне, әԝи дит ԝәки дәԝса се мера, фьрʹнеда чар мер нава агьрда дьчьн-тен. Әԝ гәләк тьрсийа у жь сәрәскәред хԝә пьрси: «Нә мә се мер авитә фьрʹне? Ле ньһа әз чар мерʹа дьвиньм у йәк жь ԝан мина мәләк ә!»

Нәбукәднәсәр незики фьрʹне бу у гази ԝан кьр: «Жь фьрʹне дәркʹәвьн, хьзмәткʹаред Хԝәдайе Һьмзор!» Һәр кәс әʹщебмайи ма гава дитьн, ԝәки Шәдрак, Мәшак у Абәднәго бе зийан жь агьр дәркʹәтьн. Нә чʹәрьме ԝан, нә пʹорʹ у нә жи кʹьнще ԝан, нәшәвьти бу у ԛе бина ду жи ԝан нәдьһат.

Нәбукәднәсәр гот: «Бьра Хԝәдайе Шәдрак, Мәшак у Абәднәго рʹумәт бә. Чьмки әԝи мәләке хԝә шанд у әԝана хьлаз кьрьн. Тʹӧ хӧданәки мина ԝи тʹӧнә йә».

Чь дәрәщада жи тӧ ниби, тӧ һазьр и мина ԝан се хортед Ибрани, амьни Йаһоԝарʹа хԝәй ки?

Шәвәке Нәбукәднәсәр хәԝнәкә тьрс дит. Әԝи гази меред билан кьр у жь ԝана пьрси, әԝ хәԝн чь те һʹәсабе. Ле тʹӧ кәси жь ԝан нькарьбу әԝе хәԝне ԝирʹа шьровәкә. Ахьрийе пʹадша гази Данийел кьр.

Нәбукәднәсәр готә Данийел: «Мьн хәԝна хԝәда бахәк дит. Әԝ ӧса мәзьн бу, ԝәки гьһиштә әʹзмана, у жь һʹәму ԛӧлбед дьнйайе дьһатә хӧйане. Әԝ бь емиша тʹьжә бу у бәлгед ԝи гәләк бәдәԝ бун. Һʹәйԝан бьн сийа бахда һеса дьбун, ле чʹьвика сәр чʹьԛьлед ԝи бахи һелун хԝәрʹа чедькьрьн. Паши ԝе йәке, мәләк жь әʹзмана дакʹәт. Әԝи гот, ԝәки бах у чʹьԛьлед ԝи бьбьрʹьн. Ле кочʹ бь кʹокева әʹрдеда бьһельн. Бьра һʹәсьн у сьфьр дора кочʹва бьалиньн. Бьра дьле бахейә мәрьвайи бе гӧһастьне сәр дьле һʹәйԝен у паши ԝе йәке һәʹфт ԝәхт ԝе дәрбаз бьн. У мәрьв ԝе пебьһʹәсьн, ԝәки Хԝәде йә Сәрԝере һʹәму дьнйайе у кʹерʹа дьхԝазә, сәрԝертийе дьдә».

Йаһоԝа Данийелрʹа шьровәкьр чь те һʹәсабе әԝ хәԝн. Гава Данийел пеһʹәсийа чь те һʹәсабе әԝ хәԝн, хоф кʹәтә дьле ԝи. Әԝи гот: «Пʹадше мьн, мьне бьхԝәста, ԝәки әԝ хәԝн бе сәре дьжмьнед тә, ле йазьх әԝ дәрһәԛа тә йә. Әԝ баха мәзьн йа кӧ һатьбу бьрʹине, әԝ тӧ йи. Те сәрԝертийа хԝә ӧнда ки, у тӧйе мина һʹәйԝанед бәйани чоледа чʹере бьхԝи. Ле әԝ йәк кӧ мәләк гот, кочʹ бь кʹокева әʹрдеда бьһельн, те һʹәсабе ԝәки тӧйе диса вәгәрʹи сәр сәрԝертийа хԝә».

Саләк шунда, Нәбукәднәсәр сәр бане мала хԝә дьгәрʹийа, дина хԝә дьда шәһәре хԝә Бабилоне у һʹәԝаса ԝи перʹа дьһат. Әԝи гот: «Һәла дина хԝә бьдьн, мьн шәһәрәки чьԛас мәзьн у ԛәԝи ава кьрийә. Әз йәки һьмзор ьм!» Әԝи һе хәбәрдана хԝә хьлаз нәкьр, дәнгәки жь әʹзмана гот: «Нәбукәднәсәр, тә сәрԝертийа хԝә ӧнда кьр».

Ԝе дәме, Нәбукәднәсәр һʹьше хԝә ӧнда кьр у бу мина һʹәйԝанед бәйани. Ләма жи әԝ ида нькарьбу мала хԝәда бьминә, ле тʹәви һʹәйԝанед бәйани чоледа дьжит. Пʹорʹе ԝи мина пʹәрʹед тәйр дьреж бьбун у нәйнькед ԝи мина пʹәнще тәйр бун.

Һʹәфт сал дәрбаз бун, Нәбукәднәсәр һатә сәр һʹьше хԝә у Йаһоԝа диса сәрԝертийа Бабилоне да дәсте ԝи. Нәбукәднәсәр гот: «Пәсьна дьдьмә Йаһоԝа, Хԝәдайе һәри Һьмзор. Ньһа әз заньм, ԝәки Йаһоԝа йә Пʹадше әʹрд у әʹзмана. Әԝ мәрьвед бабах ньмьз дькә у кʹерʹа дьхԝазә, сәрԝертийе дьдә».

Ԝәʹдә шунда Бәлшатсар бу пʹадше Бабилоне. Рʹожәке, әԝи бь һʹәзара мәрьвед навдар тʹәглиф кьр, сәва кӧ тʹәвайи кʹеф кьн. Әԝи готә хӧламед хԝә, ԝәки әԝана кʹасед зерʹ биньн, кʹижан Нәбукәднәсәр жь пʹарьстгәһа Йаһоԝа һьлда бу. Бәлшатсар у меванед ԝи жь ԝан кʹасед зәрʹ вәдьхԝарьн у хӧданед хԝә рʹумәт дькьрьн. Ньшкева дәсте мерьв хӧйа бу у дәстпекьр хәбәред әʹщеб сәр диԝер бьньвисә.

Бәлшатсар гәләк тьрсийа. Әԝи гази сербазед хԝә кьр у соз да ԝан: «Һәрге кʹәсәк бькарьбә ԝан хәбәра шьровәкә, әԝе пʹадшатийеда щийе сьсийа бьгьрә». Ԝана чь жи кьр, ле йәкә нькарьбун ԝан хәбәра шьровәкьн. Паши ԝе йәке жьн-пʹадша һат у гот: «Ԝьрʹа мерәки һәйә, наве кʹижани Данийел ә, у әԝ хәԝн-хәйалед Нәбукәднәсәр шьровәдькьр. Әԝе бькарьбә ԝан хәбәра тәрʹа жи шьровәкә».

Данийел һатә щәм Бәлшатсар пʹадша, у әԝи готә Данийел: «Һәрге тӧ бькарьби ԝан хәбәра мьнрʹа шьровәки, әзе зьнщира зерʹ пешкʹеши тә кьм у тә бькьмә сәрԝере сьсийа пʹадшатийеда». Данийел щаба ԝи да у гот: «Әз пʹешкʹешед тә ԛәбул накьм, ле ԝан хәбәра әзе тәрʹа шьровәкьм. Баве тә Нәбукәднәсәр гәләк ԛӧрʹә бу, у Йаһоԝа ви ньмьз кьр. Тә дәрһәԛа ԝе йәке заньбу, ле диса жи тә жь кʹасед зерʹ вәдьхԝар, кʹижан кӧ жь пʹарьстгәһа Йаһоԝа һатьбун һьлдане. Бь ԝан кьред хԝә тә Хԝәде беһӧрмәт кьр. Ләма жи Хԝәде әԝ хәбәр тәрʹа ньвиси: «Мәнә, Мәнә, Тәкәл у Пәрәс. Әԝ хәбәр тенә һʹәсабе, ԝәки Мәдйа у Фарьс ԝе Бабилоне зәфт кьн у пʹадшатийе жь дәсте тә бьстиньн».

Дьһатә кʹьфше, кӧ тʹӧ кәс ԝе нькарьбә Бабилоне зәфт кә. Әԝ шәһәр бь диԝаред ԛальм һатьбу авакьрьне у дорерʹа дькʹьшийа. Ле һәма ԝе шәве, Мәдйа у Фарьса Бабилон зәфт кьрьн. Пʹадше Фарьса, Корәш, рʹийа ава чʹәм, да гӧһастьне, ава чʹәм дакʹәт у әскәр ида карьбун чʹәмрʹа дәрбаз бьн у незики дәргәһед шәһәр бьн. Бьдә һʹәсабе хԝә, ԝе шәве дәргәһед шәһәр вәкьри мабун! Әскәр кʹәтьнә һьндӧр, шәһәр зәфт кьрьн у пʹадша кӧштьн. Ӧса Корәш бу сәрԝере Бабилоне.

Ԝе сале Корәш әʹлам кьр: «Йаһоԝа готә мьн, ԝәки пʹарьстгәһа Оршәлиме тʹәзәда ава кьн. Һәр кәс жь щьмәʹта ԝи, кʹе дьхԝазә аликʹарийе бьдә, дькарә һәрʹә». Ча Йаһоԝа соз дабу, 70 сал паши ԝеранкьрьне Оршәлиме, гәләк Щьһу пашда вәгәрʹийан. Корәш һʹәму кʹасед зерʹ у зив, кʹижан Нәбукәднәсәр жь пʹарьстгәһе һьлдабу, пашда вәгәрʹанд. Тә дина хԝә да ԝе йәке, ча Йаһоԝа бь сайа Корәш али щьмәʹта хԝә кьр?

Ахьрийе Дарйус Мәди, бу пʹадше Бабилоне. Дарйус дина хԝә дайә, ԝәки Данийел йәки билан ә. Әԝи Данийел ԝәлате хԝәда кьрә сәркʹаре һʹәму мәрьвед навдар у гьринг. Әԝ меред навдар у гьринг һʹәвсуди ԝи дькьрьн у дьхԝәстьн ԝи сәр рʹьйа хԝә рʹәт кьн. Ԝана заньбу, ԝәки Данийел рʹоже се щара Йаһоԝарʹа дӧа дькә, ләма жи ԝана готә Дарйус: «Йа пʹадша, тӧ гәрәке ԛануне дәрхи, ԝәки һәр кәс тʹәне тәрʹа дӧа бькә. Әԝед кӧ ԝе ԛануне нәйньн сери, гәрәке ԝана бавежьн чʹәʹла шера». Әԝ фькьр дьле Дарйус хԝәш һат у әԝи әԝ ԛанун дәрхьст.

Гава Данийел әԝ әʹламәти бьһист, әԝ дәрберʹа чу мала хԝә, пешбәри пʹәнщәрʹа хԝәйә вәкьри кʹәтә сәр чока у Йаһоԝарʹа дӧа кьр. Мәрьвед һʹәвсуд ньшкева кʹәтьнә мала ԝи у дитьн чаԝа әԝ дӧа дькә. Әԝана перʹа-перʹа чунә бал Дарйус у готьнә ԝи: «Данийел ԛануна тә наԛәдинә. Әԝ рʹоже се щара Хԝәдайе хԝәрʹа дӧа дькә». Дарйус Данийел һʹьз дькьр у ләма жи нәдьхԝәст, ԝәки әԝ бьмьрә. Әԝ тʹәмамийа рʹоже дьфькьри сәр ԝе йәке, кӧ ча Данийел хьлаз кә. Ле һәла һе пʹадша жи нькарьбу ԝе ԛануне бьгӧһезә, кʹижан әԝи хԝәха мор кьрьбу. Әԝ мәщбур бу фәрмане бьдә әскәред хԝә, ԝәки Данийел бавежьнә чʹәʹла шера.

Дарйус бона Данийел ӧса бәр хԝә дькʹәт, ԝәки нькарьбу ԝе шәве рʹазе. Сьбәһе зу әԝ рʹәви бәр чʹәʹла шера у гази Данийел кьр: «Данийел Хԝәдайе тә, тӧ хьлаз кьри?»

Дарйус дәнг бьһист. Әԝ дәнге Данийел бу! Әԝи готә Дарйус: «Мәләке Йаһоԝа мьн жь дәве шера хьлаз кьр. У ԝана зийан нәданә мьн». Дарйус гәләк ша бу! Әԝи фәрман да, ԝәки Данийел жь ԝе чʹәʹле дәрхьн. Сәр Данийел ԛә дәхмәк жи тʹӧнә бу. Паше пʹадша әʹмьр кьр у гот: «Ԝан мера, йед кӧ Данийел нәһәԛ дькьрьн, бавежьнә ԝе чʹәʹле». Гава әԝ мәрьв авитьнә чʹәʹле, шер гьһиштьнә ԝан у ԝана вәчьрʹандьн.

Дарйус мәрьва шанд, ԝәки щьмәʹтерʹа бежьн: «Һәр кәс гәрәке Хԝәдайе Данийел бьтьрсә. Әԝи Данийел жь шера хьлаз кьр».

Гәло тӧ мина Данийел һәр рʹож Йаһоԝарʹа дӧа дьки?

Әстәр Щьһу бу у әԝ Фарьседа шәһәре Шушанда дьжит. Гәләк сал пешда, Нәбукәднәсәр малбәта ԝе жь Оршәлиме бьр у кьрә дил. Кӧрʹе апе ԝе, наве кʹижани Мордокаи бу, йе кӧ хӧламе Пʹадше Фарьса Аһашвәрош бу, ле мәзьн кьр у ле бу хԝәйи.

Аһашвәрош Пʹадша сафи кьр жьнәкә тʹәзә хԝәрʹа бьжберә. Хӧламед ԝи ԝирʹа жьнед лапи бәдәԝ жьбартьн у анинә мала ԝи. Әстәр жи нав ԝан жьнада бу. Жь ԝан һʹәму жьна, Аһашвәрош, Әстәр чаԝа жьн-пʹадша хԝәрʹа жьбарт. Мордокаи готә Әстәре, ԝәки нәбеже кӧ әԝ Щьһу йә.

Мәрьвәки бабах, наве кʹижани Һаман бу, сәркʹаре һʹәму сәрԝера бу. Әԝи дьхԝәст, ԝәки һәр кәс сәре хԝә бәр ԝи дахә. Ле Мордокаи сәре хԝә бәр ԝи данәдьхьст, ләма жи Һаман сәр ԝи һерс кʹәт у дьхԝәст ԝи бькӧжә. Гава Һаман пеһʹәсийа, ԝәки Мордокаи Щьһу йә, әԝи сафи кьр Щьһуйед ԝи ԝәлати бькӧжә. Әԝи готә пʹадша: «Щьһу щьмәʹтәкә хоф ә у тӧ гәрәке ԝана сәр рʹьйа хԝә рʹәт ки». Аһашвәрош гот: «Чь дьхԝази бькә». Һьнге Һаман ԛанун дәрхьст, ԝәки 13 мәһа Адаре һʹәму Щьһу бенә кӧштьне. Йаһоԝа әԝ һәр тьшт дьдит.

Әстәр һаш ԝе ԛануне тʹӧнә бу. Ләма жи Мордокаи дәрһәԛа ве ԛануне нәʹмә ньвиси у Әстәррʹа шанд. Мордокаи готә ԝе: «Һәрʹә у тʹәви пʹадше хәбәр дә». Әстәре гот: «Һәр кәс, кʹе нә һатийә тʹәглифкьрьне у незики пʹадше бә, дькарә бе кӧштьне. Әԝа ида 30 рʹож ә пʹадша мьн тʹәглиф нәкьрийә! Ле диса жи әзе һәрʹьм. Һәрге әԝ шьва хԝәйә зерʹ дьрежи мьн кә, әзе нәмьрьм, ле һәрге на, әзе бьмьрьм».

Әстәр кʹәтә һʹәйата пʹадше. Гава пʹадша ле дит, әԝи шьва хԝә дьрежи ԝе кьр. Әстәр незики пʹадше бу у пʹадша ле пьрси: «Әстәр, әз чь дькарьм бона тә бькьм?» Әԝе гот: «Әз дьхԝазьм тә у Һаман тʹәглифи щәм хԝә кьм». Әԝана чунә щәм Әстәре. Паше Әстәре диса әԝана тʹәглиф кьрьн, у ԝе щаре, пʹадша диса жь ԝе пьрси: «Әстәр, әз чь дькарьм бона тә бькьм?» Һьнге әԝе гот: «Кәсәк дьхԝазә мьн у щьмәʹта мьн бькӧжә. Һиви дькьм, мә хьлаз кә». Пʹадша пьрси: «Кʹе дьхԝазә ԝә бькӧжә?» Әԝе гот: «Әԝ мәрьве хьраб, Һаман ә». Аһашвәрош гәләк һерс кʹәт у тʹәми да, ԝәки Һаман бькӧжьн.

Ле ԛә тʹӧ кәси нькарьбу әв ԛануна Һаман бьдә һьлдане, һәла һе пʹадша жи. Ләма жи пʹадша Мордокаи кьрә сәркʹаре һʹәму сәрԝера у изьн да ԝи ԛануна тʹәзә дәрхә. Бь сайа ԝе ԛануна тʹәзә Щьһу дькарьбун хԝә жь дьжмьна хԝәй кьн. У 13 мәһа Адаре, Щьһуйа дьжмьнед хԝә алт кьрьн. Жь ԝи чахи, ԝана һәр сал әв сәркʹәтьна хԝә кʹьфш дькьрьн.

Ԝәкә 70 сал дәрбаз бьбу, жь ԝи ԝәʹдәйи чахе һʹәчʹи зәʹф жь Исраелийа вәгәрʹийане Оршәлиме, ле һьнәк жь ԝан сәр әʹрде Фарьса дьман. Йәк жь ԝан кʹаһин бу бь наве Әзра, йе кӧ Ԛануна Йаһоԝа һин дькьр. Әзра пеһʹәсийа, ԝәки Оршәлимеда щьмәʹт гӧһ надә Ԛануна Хԝәде у ләма жи әԝи сафи кьр, кӧ һәрʹә ԝедәре, сәва кӧ али ԝан бькә. Пʹадше Фарьса Артаһшашт готә ԝи: «Хԝәде билани дайә тә, сәва кӧ тӧ бькарьби Ԛануна ԝи һин ки. Һәрʹә у ԝан мәрьва һьлдә, кʹе дьхԝазә тʹәви тә бе». Әзра рʹасти ԝан һʹәмуйа һат, кʹе дьхԝәст вәгәрʹә Оршәлиме. Ԝана Йаһоԝарʹа дӧа кьр, ԝәки сәр ԝе рʹийа дьреж ԝана хԝәй кә у паше әԝана рʹе кʹәтьн.

Чар мәһа шунда, әԝана гьһиштьнә Оршәлиме. Сәрԝера готьнә Әзра: «Щьмәʹта Исраел гӧһ надә Йаһоԝа у сәр жьнед ӧса дьзәԝьщьн, йед кӧ хӧданед ԛәлп дьһʹәбиньн». Ле гәло Әзра чь кьр? Әԝ бәр чʹәʹве щьмәʹте, кʹәтә сәр чока у дӧа кьр: «Йаһоԝа, тә һаԛас тьшт бона мә кьрийә, ле әм диса жи гӧна дькьн у дьле тә дешиньн». Щьмәʹт гӧне хԝә да рʹуйе хԝә, ле диса жи ԝанарʹа аликʹари лазьм бу, ԝәки хԝә рʹаст кьн. Әзра рʹуспи у һʹакьм кʹьфш кьр, сәва кӧ аликʹарийе бьдьнә щьмәʹте. Нава се мәһед дьнда, әԝед кӧ Йаһоԝа нәдьһʹәбандьн, жь Оршәлиме дәркʹәтьн.

Донздәһ сал дәрбаз бу. Һаԛас ԝәʹдәда, Щьһу диԝаред Оршәлиме тʹәзәда ава кьрьн. Паши ԝе йәке, Әзра щьмәʹт тʹоп кьр, ԝәки Ԛануна Хԝәде ԝанарʹа бьхунә. Гава Әзра кʹьтеба Ԛануне вәкьр, щьмәʹт рʹабу сәр пʹийа. Әзра Йаһоԝа рʹумәт дькьр, щьмәʹт жи тʹәви ԝи рʹази бу у дәсте хԝә һьлкʹшандьнә жор. Әзра Ԛанун дьхԝәнд у шьровәдькьр, щьмәʹте жи дина хԝә дьда ԝи. Ԝана фәʹм кьр, ԝәки әԝана диса дури Йаһоԝа чунә. Рʹожа дьн Әзра һе зедә кʹьтеба Ԛануне ԝанарʹа хԝәнд. Щьмәʹт пеһʹәсийа, ԝәки зутьрәке әԝана гәрәке Щәжьна Һолькчекьрьне кʹьфш кьн. Ԝана перʹа-перʹа дәстпекьрьн бона ԝе йәке хԝә һазьр кьн.

Ԝан һʹәфт рʹожед щәжьне, щьмәʹт ша дьбу у рʹазибуне Йаһоԝарʹа дьданә кʹьфше бона нандьруна баш. Жь ԝәʹде Йешуда ԝана Щәжьна Һолькчекьрьне дәрбаз нәдькьрьн. Паши щәжьне, щьмәʹт тʹоп бу у Хԝәдерʹа дӧа кьр: «Йаһоԝа, тә мә жь дилтийе хьлаз кьр, тә мә бәрʹийеда тʹер дькьр у әʹрдәки бәдәԝ да мә. Ле йәкә, диса жи мә гӧрʹа тә нәдькьр. Тә пʹехәмбәра жи дьшандьнә щәм мә, ле мә гӧһ нәдьда ԝан. Ле диса жи тә сәбьр дьда кʹьфше һьндава мә. Әԝ созе тә дабу Бьраһим, тә ани сери. Ньһа әм тәрʹа соз дьдьн, ԝәки әме гӧрʹа тә бькьн». Ԝана созед хԝә ньвисин, у паше кʹаһина, Леԝийа у сәрԝера сәр ԝи сози мора хԝә данин.

Ԝәрен әм сәр чәнд сала пашда вәгәрʹьн. Мерәки Исраели бь наве Нәһәмийа, хӧламе пʹадше Артаһшашт бу. Әԝ Фарьседа шәһәре Шушанда дьжит. Бьре Нәһәмийа жь Щьһудайе әʹламәтикә хьраб ԝирʹа ани. Әԝи гот: «Әԝед кӧ вәгәрʹийанә Оршәлиме, кʹәтьнә ԛәзийе. Диԝар у дәргәһед шәһәр, кʹижан Бабилонийа ԝеран кьр, һе нәһатьнә авакьрьне». Нәһәмийа гәләк дьлтәнг бу. Әԝи хԝәст һәрʹә Оршәлиме, ԝәки али щьмәʹта хԝә бькә, у дӧа кьр сәва кӧ пʹадша ԝи бәрдә.

Пʹадша тʹәхмин кьр, ԝәки Нәһәмийа мәʹдәкьри йә у жь ԝи пьрси: «Мьн тʹӧ щарʹ тә ӧса мәʹдәкьри нәдитийә. Чь ԛәԝьми йә?» Нәһәмийа готе: «Шәһәре мьн, Оршәлим, ԝеранкьрʹи йә, ләма жи әз хәмгин ьм!» Пʹадша пьрси: «Чь тӧ дьхԝази, ԝәки әз бона тә бькьм?» Нәһәмийа дәрберʹа дьле хԝәда дӧа кьр у паше пʹадшерʹа гот: «Лава дькьм, изьне бьдә әз һәрʹьм Оршәлиме, ԝәки диԝаред ԝе тʹәзәда ава кьм». Артаһшашт пʹадша изьн да ԝи һәрʹә у хәм кьр, ԝәки Нәһәмийа бе ԛәзи бьгьһижә щи. Әԝи ӧса жи Нәһәмийа кьрә сәрԝере Щьһудайе у сәва авакьрьна дәргәһед Оршәлиме, кʹенар да ԝи.

Гава Нәһәмийа һатә Оршәлиме, әԝи тʹәсәлийа диԝаред дор-бәре шәһәр кьр. Паше әԝи һʹәму кʹаһин у сәрԝер тʹоп кьр у готә ԝан: «Һале мә хьраб ә. Әм гәрәке авакьрьне дәстпекьн». Гьшк ԛайил бун у авакьрьн дәстпекьрьн.

Һьнә дьжмьна дәстпекьрьн ԛәрфе хԝә ԝана бькьн у дьготьн: «Диԝаред ԝә ӧса сьст ьн, кӧ рʹуви жи һеса дькарә һьлшинә». Ле Исраели гӧһ нәдьданә ԝан у бәрдәԝам дькьрьн диԝар ава кьн. Рʹож бь рʹож ԝана диԝар һе дьшьдандьн у бьльнд дькьрьн.

Һьнге дьжмьна сафи кьрьн жь щурʹә-щурʹә алийава һʹьщуми сәр ԝан кьн. Гава Щьһу дәрһәԛа ԝе йәке пеһʹәсийан, тьрс кʹәтә дьле ԝан. Ле Нәһәмийа готә ԝан : «Нәтьрсьн, чьмки Йаһоԝа тʹәви мәйә». Нәһәмийа нобәдара кʹьфш кьр, ԝәки мьԛати ԝан бьн, кӧ дьжмьн нькарьбьн һʹьщуми сәр Исраели кьн.

Диԝар у дәргәһе шәһәр 52 рʹожада һатә авакьрьне. Нәһәмийа сәва ԝе дәрәща мәхсус, һʹәму Леԝи тʹоп кьрьн. Нәһәмийа ԝана кьрә дӧ кʹома. Әԝ дӧ кʹом һьлкʹьшийанә сәр диԝер у дәстпекьрьн дора шәһәр бьзьвьрʹьн, һәр дӧ кʹом бәрбь һәв дьчун. Ԝана борʹийе, чәнге у зәнгьле дьхьстьн у Йаһоԝарʹа дьстьран. Әзра тʹәви кʹомәкә дьчу, ле Нәһәмийа тʹәви йед дьн. Һәрдӧ кʹом пʹарьстгәһеда рʹасти һәв һатьн. Щьмәʹт, демәк мер, жьн у зарʹ Йаһоԝарʹа ԛӧрбан анин у щәжьнәкә мәзьн кʹьфш кьрьн. Дәнге шабуна ԝан дурва дьһатә бьһистьне.

Паше авакьрьна диԝаред Оршәлиме 400 сал дәрбаз бу. Сәрәккʹаһин, Зәкәрйа у жьна ԝи Елизабет, незики Оршәлиме дьман. Әԝана ида гәләк сал зәԝьщи бун, ле зарʹед ԝан тʹӧнә бун. Рʹожәке, Зәкәрйа пʹарьстгәһеда бьхур дьшәԝьтанд, у ԝи чахи ԝирʹа мәләк әʹйан бу, наве кʹижани Щьбрайил бу. Зәкәрйа әʹщебмайи ма, ле Щьбрайил готә ԝи: «Нәтьрсә. Мьн жь Йаһоԝа мьзгини тәрʹа ани. Жьна тә, Елизабет, ԝе кӧрʹ тәрʹа бинә у наве ԝи ԝе Йуһʹәнна бә. Йаһоԝа, Йуһʹәнна жьбарт бона шьхӧләки мәхсус». Зәкәрйа пьрси: «Чаԝа әз тә баԝәр кьм? Нә әз у жьна мьн ида әʹмьрда мәзьн ьн». Щьбрайил гот: «Хԝәде мьн шанд, ԝәки әԝе мьзгинийе бьгьһиньмә тә. Ле тә мьн баԝәр нәкьр, ләма жи һʹәта зарʹ тәрʹа бе буйине, тӧйе нькарьби хәбәр ди».

Ԝе щаре Зәкәрйа пʹарьстгәһеда һе зедә ԝәхт ма. У гава әԝ дәркʹәт дәрва, щьмәʹт һивийе бу сәва пебьһʹәсә чь ԛәԝьми. Ле Зәкәрйа нькарьбу хәбәр да. Әԝи тʹәне пе дәсте хԝә дькарьбу ԝанарʹа шьровәкә. Щьмәʹте фәʹм кьр, ԝәки Зәкәрйа жь Хԝәде мьзгини станд.

Паши ԝе йәке, чаԝа мәләк гот, Елизабетерʹа кӧрʹ бу. Һәвал у пьсмамед ԝе һатьн зарʹе бьвиньн. Әԝана бона ԝе гәләк ша бун. Елизабете гот: «Наве ԝи гәрәке дайньн Йуһʹәнна». Ԝана готе: «Нава бьра-пьсмамед тәда тʹӧ кәс тʹӧнә бь наве Йуһʹәнна». Наве ԝи дайньн Зәкәрйа, наве баве ԝи. Ле Зәкәрйа ньвиси: «Наве ԝи гәрәке Йуһʹәнна бә». Ԝе дәме Зәкәрйа дәстпекьр хәбәр дә! Дәрһәԛа ԝе йәке тʹәмамийа Щьһустане пеһʹәсийан у мәрьва дьгот: «Чахе әԝ зарʹ мәзьн бә, гәло әԝе бьбә кʹе?»

Рʹӧһʹе пироз һатә сәр Зәкәрйа у әԝи пʹехәмбәрти кьр: «Бьра Йаһоԝа рʹумәт бә. Әԝи Бьраһимрʹа соз дабу, ԝәки хьлазкʹар, демәк Мәсиһ, ԝе бьшинә, ԝәки мә хьлаз кә. Йуһʹәнна ԝе бьбә пʹехәмбәр, әԝе рʹе бона Мәсиһ һазьр кә».

Мәрйәм жи мина мәрьва хԝә Елизабете, рʹасти дәрәщәкә мәхсус һат. Ԝәрен әм дәрһәԛа ԝе йәке, жь сәре дьн пебьһʹәсьн.