Йаһоԝа бахчә чекьр у наве ԝи щийи дани Еден. Ԝи бахчәйида тʹьжә кӧлирк, бах у һʹәйԝан һәбун. Паше Хԝәде жь халийа әʹрде мәрьве пешьн Адәм чекьр, у һӧлма жийине пʹьфи позе ԝи кьр. Зани паши ԝе йәке чь ԛәԝьми? Адәм дәстпекьр бьжи! Йаһоԝа, Адәм кьрә бахче Едене у готе, ԝәки әԝ нав бьдә сәр һʹәйԝана.

Йаһоԝа тʹәмик жи да Адәм. Әԝи готә ԝи: «Тӧ дькари емишед жь һʹәму баха бьхԝи, ле һәйә бахәк жь кʹижани тӧ гәрәке нәхԝи. Һәрге тӧ емиша ԝи бахи бьхԝи, тӧйе бьмьри».

Паши ԝе йәке Йаһоԝа гот: «Әз дьхԝазьм жьнәке чекьм, йа кӧ ԝе аликʹарийе бьдә Адәм». Хԝәде ӧса кьр, ԝәки Адәм кʹәтә хәԝа кʹур у паше әԝи пʹарханәкә ԝи дәрхьст у пе ве пʹархане ԝирʹа жьн чекьр. Наве ԝе һатә данине Һеԝа. Адәм у Һеԝа бунә малбәта пешьн. Гәло Адәм чь тʹәхмин кьр гава жьна хԝә дит? Адәм ӧса ша бу, ԝәки гот: «Һәла Йаһоԝа жь пʹархана мьн чь чекьр? Шькьр! Әԝ мина мьн ә».

Йаһоԝа Адәм у Һеԝайерʹа гот, кӧ зарʹа биньн у әʹрде тʹьжә кьн. Хԝәде дьхԝәст, ԝәки әԝана шабуне бьстиньн жь ԝе йәке, кӧ тʹәвайи тьштәкива мьжул бьн у тʹәмамийа әʹрде бькьнә щьнәт, чаԝа бахче Едене. Ле һәр тьшт ӧса дәрнәкʹәт чаԝа Хԝәде хԝәст. Гәло чьрʹа? Һе зедә дәрһәԛа ԝе йәке, әме сәре дьнда пебьһʹәсьн.

Рʹожәке чахе Һеԝа тʹәне бу, мәʹр тʹәви ԝе хәбәр да. Әԝи гот: «Әԝ рʹаст ә, ԝәки Хԝәде изьн нәда ԝә, кӧ һун емишед жь һʹәму бахед бахчәда бьхԝьн?» Һеԝайе гот: «Жь һʹәму бахед бахчә әм дькарьн бьхԝьн, хенщи бахәки. Ле һәрге әм жь ԝи бахи бьхԝьн, әме бьмьрьн». Мәʹр гот: «Һуне нәмьрьн. Гава һун жь ԝи бахи бьхԝьн, һуне бьбьнә мина Хԝәде». Гәло әԝ йәк рʹаст бу? На, әԝ йәк дәрәԝ бу. Ле Һеԝайе баԝәр кьр. Чьԛас әԝе дина хԝә дьда ве емише, һаԛас тʹәме ԝе дькʹьшанде. Әԝе әԝ емиш хԝар у да Адәм. Адәм заньбу һәрге әԝ гӧрʹа Хԝәде нәкә, ԝе бьмьрә. Ле йәкә әԝи әԝ емиш хԝар.

Ԝе рʹоже, Йаһоԝа тʹәви Адәм у Һеԝайе хәбәр да. Әԝи пьрси, чьрʹа ԝана гӧрʹа ԝи нәкьр. Ԝе йәкеда Һеԝайе мәʹр нәһәԛ кьр, ле Адәм Һеԝа нәһәԛ кьр. Рʹийе ԝе йәкеда кӧ Адәм у Һеԝайе гӧрʹа Йаһоԝа нәкьрьн, әԝи ԝана жь бахчә дәрхьст. Ԝәки әԝана тӧ щар нькарьбьн пашда вәгәрʹьн, Хԝәде мәләк у шуре бь агьр данә бәр дәре бахчә.

Йаһоԝа гот, ԝәки әԝе кӧ Һеԝа хапанд, әԝ жи гәрәке бе щәзакьрьне. Әԝе кӧ тʹәви Һеԝайе хәбәр да, бь рʹасти мәʹр нибу. Йаһоԝа мәʹр ӧса ченәкьрьбу, ԝәки бькарьбуйа хәбәрда. Әԝе кӧ дәԝса мәʹр хәбәр дьда, мәләке хьраб бу. Әԝи ӧса кьр, ԝәки Һеԝайе бьхапинә. Әԝ мәләк һатә навкьрьне, Шәйтʹан Мире-щьна. Ахьрийеда Йаһоԝа ԝе Шәйтʹан кʹӧта кә, сәва кӧ әԝ ида нькарьбә мәрийа бьхапинә, ԝәки әԝана тьштед хьраб бькьн.

Адәм у Һеԝа жь бахче Едене һатьнә дәрхьстьне, у паше гәләк зарʹ ԝанрʹа һатьнә буйине. Ԛайин, кӧрʹе ԝани пешийе, бу щоткʹар, ле кӧрʹе дӧда Һабил, бу шьван.

Рʹожәке Ԛайин у Һабил Йаһоԝарʹа ԛӧрбан анин. Тӧ зани чь те һʹәсабе ԛӧрбан? Әԝ те һʹәсабе пʹешкʹеша ԛимәт бона Хԝәде. Йаһоԝа ԛӧрбана Һабилрʹа гәләк ша бу, ле йа Ԛайинрʹа ша нәбу. Сәва ԝе йәке Ԛайин гәләк һерс кʹәт. Йаһоԝа готә Ԛайин, ԝәки һерса ԝи дькарә ԝи бәрбь кьре хьраб бьвә. Ле Ԛайин гӧһ нәда Хԝәде.

Дәԝсе Ԛайин готә Һабил: «Ԝәрә әм һәрʹьнә чоле». Гава әԝана чоледа тʹәне бун, Ԛайин бьре хԝә хьст у ԝи кӧшт. Гәло, Йаһоԝа ԝе дәрәщеда чь гәрәке бькьра? Йаһоԝа Ԛайин бь ԝе йәке щәза кьр, кӧ ԝи жь малбәта ԝи дур хьст. У ида изьна ԝи тʹӧнә бу пашда вәгәрʹә.

Жь ԝе йәке әм чь дәрсе дькарьн һин бьн? Әм жи дькарьн һерс кʹәвьн, һәрге тьштәк ӧса набә, чаԝа әм дьхԝазьн. Һәрге әм тʹәхмин дькьн, ԝәки зу һерс дькʹәвьн, у йед дьн жи ԝе йәке мәрʹа дьбежьн, демәк әм гәрәке сәр хԝә бьхәбьтьн у емосийед хԝә зәфт кьн, һʹәта кӧ әԝе емосийе сәр мә контрол нәкьрийә.

Һабил, Йаһоԝа һʹьз дькьр у тьштед рʹаст дькьр, ләма жи Йаһоԝа ԝе тʹӧ щар ԝи бир нәкә. Гава Йаһоԝа әʹрде бькә щьнәт, ԝе Һабил диса вәгәрʹинә жийине.

Ԝәʹдә шунда сәр әʹрде мәрьв зедә бун. Гәләк жь ԝан мәрьва хьраб бун. Ӧса жи һьнә мәләкед сәр әʹзмана хьраб бун. Әԝана мала хԝә демәк әʹзман һиштьн у һатьнә сәр әʹрде. Ле тӧ зани чьрʹа ԝана ӧса кьр? Ԝана хԝә кьрә мәри, ԝәки бьзәԝьщьн.

Ԝан мәләкарʹа зарʹ һатьнә буйине. Әԝ зарʹ мәзьн дьбун у ԛәԝата ԝан зедә дьбу у әԝана дьбунә мәрьвед тәрʹьки. Ԝана зийан дьданә мәрьва. Йаһоԝа ида нькарьбу изьн бьда, ԝәки әԝ йәк ӧса бәрдәԝам бә. Ләма жи әԝи сафи кьр, ԝәки ԝан мәрьвед зӧлм селаведа кʹӧта кә.

Ле мәрьвәк һәбу, йе кӧ жь ԝан щӧдә дьбу. Әԝи Йаһоԝа һʹьз дькьр. Наве ԝи Нӧһ бу. Жьн у се кӧрʹед ԝи һәбун, Сәм, Һам у Йафәт, һәрсек кӧрʹед ԝи зәԝьщи бун. Йаһоԝа готә Нӧһ, ԝәки әԝ гәрәке гәмикә мәзьн ава кә, сәва кӧ әԝ у малбәта ԝи жь Селаве бенә хԝәйкьрьне. Әԝ гәми гәрәке мина ԛӧтийа мәзьн буйа у сәр аве кʹәта. Ӧса жи Йаһоԝа готә Нӧһ, ԝәки әԝ гәрәке һʹәйԝана тʹәви хԝә бькә гәмийе, сәва кӧ әԝана жи сах бьминьн.

Нӧһ перʹа-перʹа дәстпекьр гәмийе ава кә. Ԝәкә 50 сала Нӧһ у малбәта ԝи гәми ава дькьрьн. Әԝана гәми ӧса ава кьрьн, чаԝа кӧ Йаһоԝа ԝанарʹа гот. Ԝи чахи Нӧһ һьн жи мәрьварʹа дәрһәԛа Селаве гьли дькьр. Ле тʹӧ кәси гӧһ нәдьда ԝи.

Ахьрийе ԝәʹдә ида гьһишт, ԝәки бькʹәвьнә гәмийе. Ԝәрен бьньһерʹьн паше чь ԛәԝьми.

Нӧһ, малбәта ԝи у һʹәйԝан кʹәтьнә гәмийе. Йаһоԝа дәре гәмийе дада, у баран дәстпебу. Баран ӧса ԛайим дьбари, ԝәки гәми сәр аве кʹәт. Ахьрийе тʹәмамийа әʹрде тʹьжә ав бу. Мәрьвед хьраб, йед кӧ нәкʹәтьнә гәмийе, мьрьн. Ле Нӧһ у малбәта ԝи һатьнә хԝәйкьрьне. Бьдә бәр чʹәʹве хԝә, әԝана чьԛас ша дьбун, ԝәки гӧрʹа Йаһоԝа кьрьн!

Баран 40 рʹож у 40 шәва дьбари у паше сәкьни. Паши ԝе йәке ав һеди-һеди дадькʹәт. Хьлазийе, гәми сәр чʹийе сәкьни. Нӧһ у малбәта ԝи нькарьбун жь гәмийе дәркʹәтана, чьмки ав һәла һе бь тʹәмами данәкʹәтьбу.

Ав һеди-һеди дадькʹәт. Нӧһ у малбәта ԝи саләке зедәтьр гәмийеда бун. Паше Йаһоԝа готә ԝан, ԝәки әԝана дькарьн жь гәмийе дәрен. Әԝана гәләк жь Йаһоԝа рʹази бун, ԝәки әԝи ԝана хьлаз кьр. Ԝана рʹазибуна хԝә Йаһоԝарʹа бь ԝе йәке данә кʹьфше, кӧ ԝирʹа ԛӧрбан анин.

Йаһоԝа ԝе йәкерʹа гәләк ша бу. Әԝи соз да, ԝәки ида тʹӧ щар пе селаве ԝе һәр тьштед сәр әʹрде кʹӧта нәкә. Сәва кӧ созе хԝә избат кә, Йаһоԝа сәр әʹзман кʹәскәсор да кʹьфше. Ле тә кʹәскәсор дитийә?

Паши ԝе йәке Йаһоԝа готә Нӧһ у малбәта ԝи, зарʹа биньн у сәр әʹрде тʹьжә бьн.