Паши Щәжьна Дәрбазбуне Иса тʹәви шагьртед хԝә жь Самәрйайе дәрбази Щәлиле дьбун. Иса незики шәһәре Сиһар бәр бире рʹуньшт, ԝәки һеса бә, әв бира Аԛуб бу. Ле ԝи ԝәʹдәйи шагьртед ԝи чунә шәһәр, ԝәки хԝарьне бькʹьрʹьн.

Кʹӧлфәтәк һатә бәр бире, ԝәки аве хԝәрʹа бькʹшинә. Иса жерʹа гот: «Аве бьдә мьн, әз вәхԝьм». Әԝе гот: «Чьрʹа тә тʹәви мьн хәбәр да? Нә әз Самәри мә. У Щьһу тʹәви Самәрийа хәбәр надьн». Иса готә ԝе: «Һәрге тә бьзаньбуйа әз кʹе мә, тәйе хԝәха жь мьн ав бьхԝәста у мьне тәрʹа ава жийине бьда». Кʹӧлфәте жь ԝи пьрси: «Бь ԝан готьна тӧ чь дьхԝази бежи? Нә тьштәк бал тә тʹӧнәйә, ԝәки аве бькʹьшини». Иса гот: «Кʹе кӧ жь ԝе аве вәхԝә, кʹижане әз бьдьм, ԝе тʹӧ щар тʹи нәбә». Кʹӧлфәте готә ԝи: «Жь кʹәрәма хԝә әԝе аве бьдә мьн».

Ԝи чахи Иса готә ԝе: «Гази мере хԝә кә, бьра бе вьра». Әԝе гот: «Мере мьн тʹӧнә». Иса гот: «Тә рʹаст гот. Тӧ пенщ щара меркьри буйи у ньһа тʹӧ тʹәви ԝи мери дьжийи, тʹәви кʹе зәԝащеда нини». Кʹӧлфәте гот: «Әз дьбиньм тӧ пʹехәмбәри. Мьләте мьн баԝәр дькьн, ԝәки әм гәрәке сәр ви чʹийайи сәре хԝә бәр Хԝәде дайньн, ле Щьһу дьбежьн, ԝәки щийе һʹәбандьна Хԝәде, Оршәлимеда нә. Әз һивийе мә, кʹәнге Мәсиһ бе, әԝе мә һин кә чаԝа рʹаст Хԝәде бьһʹәбиньн». Паши ԝе йәке Иса ԝерʹа тьштәк гот, чь кӧ тʹӧ кәсирʹа нәготьбу: «Әз ьм Мәсиһ».

Әԝ кʹӧлфәт чу нав шәһәр у Самәрйарʹа гот: «Әз дьфькьрьм мьн Мәсиһ дит. Әԝи һәр тьшт дәрһәԛа мьн заньбу. Ԝәрен у ԝи бьвиньн!» Әԝана тʹәви ԝе кʹӧлфәте чунә бәр бире у гӧһ данә хәбәред Иса.

Самәрийа жь Иса лава кьрьн, ԝәки шәһәре ԝанда бьминә. Дӧ рʹожа әԝи ԝана һин дькьр, у гәләк мәрьв баԝәрийа хԝә ԝи анин. Ԝана готьнә кʹӧлфәта Самәри: «Ньһа әм бь рʹасти заньн, ԝәки әԝ хьлазкʹаре дьнйа йә».

Иса паши ньхӧмандьне дәстпекьр мьзгинийа хере бәла кә: «Пʹадшатийа Хԝәде незик ә». Иса тʹәви шагьртед хԝә, дьчунә Щәлиле у ӧса жи Щьһустане. Гава Иса вәгәрʹийа әʹрде хԝәйи Ньсрәте, әԝ һатә кʹьниште у кʹьтеба гӧломәтккьри вәкьр, кʹидәре ньвисаред Ишайа ньвиси бун у бь дәнге бьльнд дәстпекьр бьхунә: «Йәһоԝа рʹӧһе пироз да мьн, ԝәки әз бькарьбьм мьзгинийа хере бәла кьм». Әԝ гьли чь дьһатә һʹәсабе? Рʹаст ә Иса кʹәрәмәт дькьрьн у әԝ йәк мәрьва хԝәш дьһат, ле йа әʹԝльн Иса рʹӧһʹе пироз стандьбу, сәва кӧ мьзгинийа хере бәла кә. Әԝи гӧһдарванарʹа гот: «Иро әԝ пʹехәмбәрти һатә сери».

Паше Иса чу бәр чʹәме Щәлиле. Ԝедәре әԝ рʹасти чар мәʹсигьра һат, йед кӧ ахьрийеда бунә шагьртед ԝи. Әԝи готә ԝан: «Ԝәрен пәй мьн у әзе ԝә бькьмә нечʹирванед мәрьва». Наве ԝан Пәтрус, Әндраԝьс, Аԛуб у Йуһʹәнна бу. Ԝана шьхӧлед хԝә һишт, пәй Иса чун у бунә шагьртед ԝи. Ԝана тʹәви Иса тʹәмамийа Щәлиледа мьзгинийа Пʹадшатийа Йәһоԝа бәла дькьрьн. Ӧса әԝана кʹьништада, базарада у мәйданада хьзмәт дькьрьн. Әʹлаләтәкә мәзьн тʹьме пәй ԝан дьчу. Әʹламәтийа дәрһәԛа Иса һʹәму щийа бәла бу, һәла һе Сурйайеда жи.

Һьнә ԝәʹдә шунда Иса ԛәԝатәкә ӧса да шагьртед хԝә, ԝәки әԝана бькарьбьн йед нәхԝәш ԛәнщ кьн у щьна жь ԝан дәрхьн. Ле тʹәви шагьртед дьн, әԝ чу шәһәра у гӧнда, ԝәки хьзмәт кә. Тʹәви ԝан ӧса жи чәнд жьнед амьн бун, бь наве Мәрйәма Мәждәлани, Йоһана, Сосьн у йед дьн. Әԝ жьн мьԛати Иса у шагьртед ԝи дьбун.

Чахе Иса шагьртед хԝә һазьр кьрьн, әԝи ԝана шандә хьзмәтийе. Гава әԝана чунә Щәлиле, гәләк мәрьв йед кӧ гӧһ дьданә ԝан, бунә шагьртед Иса у һатьнә ньхӧмандьне. Әԝед кӧ дьхԝәстьн бенә ньхӧмандьне гәләк бун, ләма жи Иса ԝана бәрамбәри зәвийе кьр, кʹижан бона нандьруне һазьр бу. Әԝи гот: «Жь Йәһоԝа лава кьн, ԝәки һе зедә хәбатчийа бьшинә, сәва нандьруне». Паши ԝе йәке әԝи 70 шагьрт жьбарт у дӧдӧ-дӧдӧ шандә хьзмәтийе. Әԝана һʹәму щурʹа мәрьварʹа дәрһәԛа Пʹадшатийше гьли дькьрьн. Гава шагьрт жь хьзмәтийе вәгәрʹийан, ԝана бь шабуне дәрһәԛа хьзмәтийе Исарʹа гьли кьрьн. Чаԝа те кʹьфше, Шәйтʹан тʹӧ тьшти нькарьбу бькьра, ԝәки хьзмәтийа ԝан бьда сәкьнандьне.

Иса тʹәми да шагьртед хԝә, ԝәки әԝ хәбата фәрз бәрдәԝам кьн ԝи чахи жи бькьн, гава әԝ һәрʹә сәр әʹзмана. Әԝи готә ԝан: «Әве мьзгинийа хере сәр тʹәмамийа дьне бәла кьн. Хәбәра Хԝәде мәрьва һин кьн у ԝана бьнӧхьминьн».

Иса һатә сәр әʹрде, ԝәки мьзгинийа Пʹадшатийа Хԝәде бәла кә. Йаһоԝа рʹӧһʹе пироз да Иса, ԝәки кʹәрәмәта бькә у бь ԝе йәке бьдә кʹьфше әԝе ахьрийеда чь бькә, гава бьбә Пʹадша. Иса дькарьбу һәр нәхԝәши ԛәнщ кә. Мәрьв дьһатьнә бал ԝи у аликʹари жь ԝи дьхԝәстьн, у әԝи ԝана ԛәнщ дькьр. Чʹәʹве кора вәдьбун, гӧһе кʹәра дьбьһистьн, йед шьлушәʹт рʹе дьчун, ле әԝед кӧ бьн һʹӧкӧме щьнада бун, аза дьбун. Мәрьв һәла һе ԝи чахи жи дьһатьнә ԛәнщкьрьне, чахе дәсте хԝә дьданә рʹишийе кʹьнще ԝи. Мәрьв пәй Иса дьчун һәр щийа, кʹидәре әԝ дьчу. Иса бәри тʹӧ кәси нәдьда һәла һе ԝи чахи жи, гава ԝәстийайи бу у дьхԝәст һесабуйа.

Щарәке мәрьвәки шьлушәʹт анинә ԝе мале, кʹидәре Иса бу. Ле ԝе маледа тʹьжә мәрьв бун у ләма әԝана нькарьбун дәрирʹа бькʹәтана һьндӧр. Әԝана һьлкʹьшийанә сәр бани, кʹӧләк вәкьрьн у мәрьве шьлушәʹт дахьстьнә бал Иса. Гава Иса әԝ йәк дит, готә ԝи мәрьви: «Рʹабә сәр пʹийа». Гава шьлушәʹт рʹабу, мәрьв зәндәгьрти ман.

Щарәкә дьн гава Иса кʹәтә гӧндәки, дәһ мәрьвед кʹоти дурва гази Иса кьрьн, чьмки ԝан чаха изьн тʹӧнә бу, ԝәки кʹоти незики мәрьва бьн. Ләма жи ԝана дурва дьготьнә ԝи: «Иса, али мә бькә!» Иса тʹәми да ԝан у гот, ԝәки һәрʹьнә пʹарьстгәһе. Бь Ԛануна Йаһоԝа гава кʹоти ԛәнщ дьбу, әԝ гәрәке бьчуйа пʹарьстгәһе. Рʹева кʹәнге әԝана дьчунә пʹарьстгәһе, әԝана ԛәнщ бун. Йәк жь мәрьве кʹоти, гава дит кӧ ԛәнщ бу, пашда вәгәрʹийа бал Иса, ԝәки рʹазибуне ԝирʹа бьдә кʹьфше у Хԝәде рʹумәт кә. Жь ԝан дәһ мәрьва, тʹәне әԝ бу, кʹе рʹазибун да Иса.

Кʹӧлфәтәк йа кӧ 12 сал нәхԝәш бу гәләк дьхԝәст ԛәнщ бә. Щарәке чахе әʹлаләтәкә мәзьн дора Иса гьртьбун, әԝ пьштева незики Иса бу у дәсте хԝә авитә рʹишийед кʹьнще ԝи. Һәма ԝе дәме әԝ ԛәнщ бу. Гава әԝ йәк ԛәԝьми Иса пьрси: «Кʹе дәсте хԝә да мьн?» Әԝ кʹӧлфәт тьрсийа, ләма жи һат бәрбь Иса у һәр тьшт ԝирʹа гьли кьр. Иса бәр дьле ԝеда һат у готә ԝе: «Ԛиза мьн, бь хер у сьламәт һәрʹә».

Йәк жь сәрԝеред кʹьниште бь наве Йайиро, жь Иса лава дькьр у дьгот: «Ԝәре мала мьн! Ԛиза мьн гәләк нәхԝәш ә». Ле һʹәта кӧ Иса бьчуйа мала Йайиро, ԛиза ԝи мьр. Кʹәнге Иса һатә бәр мала Йайиро, әԝи дит, ԝәки гәләк мәрьв шина ԛизьке дькьн. Иса готә ԝан: «Нәгьрин, ԛизьк һеньжи йә». Паше Иса дәсте ԛизьке гьрт у готә ԝе: «Ԛизьк, әз тәрʹа дьбежьм, рʹабә!» Ԛизьк перʹа-перʹа рʹабу сәр пʹийа. Иса готә де-баве ԛизьке, ԝәки хԝарьне бьдьнә ԝе. Һәла бьдьнә бәр чʹәʹве хԝә, чаԝа де-баве ԛизьке ша дьбун!

Ида сал нивәк ә Иса хьзмәт дькә. Ԝәʹдә гьһишт, ԝәки әԝ сафикьрьнәкә фәрз бькә. Кʹе ԝе бьбьнә шагьртед ԝийи незик? Паши чуйина ԝи сәр әʹзмана, кʹе ԝе хәм бькә бона щьвата Мәсиһийа? Сәва кӧ Иса ԝе сафикьрьне бькә, ԝирʹа аликʹарийа Йаһоԝа лазьм бу. Ләма жи Иса чу сәр чʹийе у тʹәмамийа шәве дӧа дькьр. Сьбәһе зу Иса гази шагьрта кьр у жь ԝана 12 шагьрт хԝәрʹа жьбарт. Ле тӧ наве ԝан зани? Наве ԝан, Пәтрус, Әндраԝьс, Аԛуб, Йуһʹәнна, Филипо, Бәртоломәйо, Мәтта, Тʹума, Аԛубе кӧрʹе Һалфаԝо, Тәдайо, Шьмһʹун у Щьһуда Исхәрйоти.

Әԝ Донздәһ шагьрт тʹьме гәрәке тʹәви Иса буна. Иса әԝана һин кьрьн у паше ԝан шандә хьзмәтийе. Йаһоԝа ԛәԝат да ԝан, ԝәки щьна жь мәрьва дәрхьн у мәрьва ԛәнщ кьн.

Иса әԝ Донздәһ шагьртед хԝә һʹәсаб дькьр чаԝа һәвалед хԝә. Әԝи гәләк итʹбарийа хԝә ԝана дьани. Ле Ферьса шагьртед Иса һʹәсаб дькьрьн, ча мәрьвед нәхԝәнди. Ле ньһерʹандьна Иса жь йа ԝан щӧдә дьбу. Әԝи ԝана һин дькьр у тʹәми дьда ԝан. Әԝана кʹеләка Иса бун һьн пешийа мьрьна ԝи, һьн жи паши сахбуна ԝи. Чаԝа Иса, ӧса жи һәчʹи зәʹф жь шагьртед ԝи жи, жь Щәлиле бун. Һьнәк жь ԝан зәԝьщи бун.

Шагьртед Иса мәрьвнә гӧнәкʹар бун, шашийед ԝан жи һәбун. Щарна әԝана тьштәки нәрʹаст дькьрьн йан дьготьн. Хенщи ԝе йәке сәбьра ԝан жи тʹӧнә бу. Әԝана һәла һе жи шәрʹ дькьрьн дәрһәԛа ԝе йәке, кʹе жь ԝан лапи баш ә. Ле бь рʹасти әԝана мәрьвнә һʹәйф бун у Йаһоԝа һʹьз дькьрьн. Ахьрийеда, паше чуйина Иса сәр әʹзмана, әԝана гәрәке бьбуна һʹиме щьвата Мәсиһийа.

Паши ԝе йәке чахе Иса 12 шагьрт хԝәрʹа жьбарт, әԝ незики әʹлаләте бу, кʹижан кӧ сәр чʹийе һивийа ԝи бун. Әԝ мәрьв жь Щәлиле, Щьһустане, Суре, Сайдайе, Сурйайе һатьбун у жь щурʹә-щурʹә щийед Урдӧне. Ԝана мәрьвед нәхԝәш у щьнакʹәти дьанин бал Иса, у әԝи ԝан ԛәнщ дькьр. Паше Иса рʹуньшт у дәстпекьр мәрьва һин кә. Әԝи шьровәдькьр, ԝәки чь гәрәке бькьн сәва кӧ бьбьнә досте Хԝәде. Әм гәрәке бир нәкьн, ԝәки әм һʹәԝще рʹебәрийа Йаһоԝа нә у гәрәке һин бьн һʹьзкьрьна хԝә ԝирʹа бьдьнә кʹьфше. Ле һәрге әм мәрьва һʹьз накьн, әм нькарьн Хԝәде һʹьз бькьн. Әм гәрәке мәрьвнә һʹәйф бьн у һьндава йед дьн һʹәлал бьн, һәла һе һьндава ԝан жи кʹе һьмбәри мә нәһәԛийе дькә.

Иса гот: «Бәс нинә тʹәне һәвалед хԝә һʹьз бьки. Тӧ ӧса жи гәрәке дьжмьнед хԝә һʹьз бьки у бь дьл бьбахшини ԝан. Һәрге кәсәк сәр тә хәйди йә, перʹа-перʹа һәрә у жь ԝи бахшандьне бьхԝазә. Һьндава йед дьн ӧса бә, чаԝа тӧ дьхԝази, ԝәки әԝана һьндава тә бьн».

Иса ӧса жи ширәтед баш дьда, ԝәки һьндава тьштед материйали, ньһерʹандьна рʹаст хԝәй кьн. Әԝи гот: «Достийа тʹәви Хԝәде жь һәбуне четьр ә. Дьз дькарә һәбуна тә бьдьзә, ле тʹӧ кәс нькарә достийа тә тʹәви Хԝәде бьԛәтинә. Ләма жи, бона әʹмьре хԝә хәма нәкә, ԝәки тӧйе чь бьхԝи, чь вәхԝи у чь хԝә ки. Дина хԝә бьдә тәйрәдед әʹзмана. Хԝәде һәртʹьм рʹьсԛе ԝан дьгьһинә ԝан. Хәмкьрьн, әʹмьре тә ԝе дьреж нәкә. Бир нәкә, ԝәки Йаһоԝа занә тӧ һʹәԝще чь йи».

Тʹӧ кәси пешда мина Иса щьмәʹт һин нәдькьр, һәла һе сәрԝеред рʹелигийа жи. Чьрʹа Иса дәрсдарәки ӧса баш бу? Чьмки тьштед кӧ әԝи һин дькьр жь Йаһоԝа бун.

Ферьса һʹәму тьшт тʹәне бона наве хԝә дькьрьн. Ԝана тьштед ԛәнщ тʹәне бона ԝе йәке дькьрьн, ԝәки мәрьв бьвиньн. Ԝана щийед ӧса дӧа дькьрьн, кʹидәре гәләк мәрьв бун. Ферьс дӧайед дьреж әзбәри һин дьбун, мәйданада у кʹьништада дьготьн, сәва кӧ мәрьв ԝана бьвиньн. Ләма жи мәрьв әʹщебмайи дьман кʹәнге Иса дьготә ԝан: «Дӧакьрьнеда чʹәʹв нәдьнә Ферьса. Әԝана дьфькьрьн, ԝәки дӧайед ԝани дьреж Хԝәде хԝәш тен, ле ӧса нинә. Дӧакьрьн, әԝ хәбәрдана тәйә шәхси йә тʹәви Йаһоԝа. Һәртʹьм бь щурʹәки дӧа нәкә. Кʹурайа дьле хԝә Йаһоԝарʹа вәкә».

Иса шьровәкьр дәрһәԛа чь гәрәке дӧа бькьн: «Баве мәйи әʹзмана, бьрʹа наве тә пироз бә. Бьра Пʹадшатийа тә бе. Бьра хԝәстьна тә сәр әʹрде бә, чаԝа сәр әʹзмана». Иса ӧса жи гот, дӧа бькьн бона хԝарьна һәр рʹожи, бахшандьна гӧна у бона хәмед шәхси.

Иса зедә кьр у гот: «Тʹьме дӧа бькьн. Бәрдәԝам кьн жь Йаһоԝа Баве хԝәйи әʹзмана аликʹарийе бьхԝазьн. Һәр де-бав тьштед ԛәнщ бона зарʹед хԝә дьхԝазьн. Гәло ӧса дьԛәԝьмә, ԝәки зарʹа ԝә жь ԝә нан бьхԝазә, ле һун кәвьр бьдьнә ԝи? Йан жь ԝә мәʹси бьхԝазә, ле һун мәʹр бьдьнә ԝи?»

Паше Иса хәбәред хԝә шьровәкьр: «Һун заньн ча тьштед ԛәнщ бьдьнә зарʹед хԝә, илаһи Баве ԝә йи әʹзмана ԝе һе зедә рʹӧһʹе пироз бьдә ԝан, кʹе жь ԝи дьхԝазә. Һун тʹәне гәрәке бьхԝазьн». Ле тӧ пе һинкьрьна Иса дьжийи? Дәрһәԛа чь тӧ дӧа дьки?

Пешийа Щәжьна Дәрбазбуне, сала 32 Д.М., шагьртед Иса жь хьзмәтийе гәләк ԝәстийайи вәгәрʹийан. Ләма жи Иса готә ԝан, ԝәки тʹәви ԝи пе ԛәйьке һәрʹьнә Бәйтсайдайе у һьнәки һеса бьн. Ле гава әԝана гьһиштьнә бәр дәве бәʹре, Иса әʹлаләтәкә мәзьн дит, йа кӧ ԝедәре һивийа ԝи бу. Рʹаст ә Иса тʹәви шагьртед хԝә дьхԝәст һеса буйа, ле гава әԝи щьмәʹт дит, бь дьл ԝана ԛәбул кьр. Иса һʹәму мәрьвед нәхԝәш ԛәнщ кьр, у паше дәстпекьр дәрһәԛа Пʹадшатийа Хԝәде ԝана һин кә. Тʹәмамийа рʹоже Иса ԝан мәрьва һин дькьр. Гава тәʹри кʹәтә әʹрде, шагьрт незики ԝи бун у готьн: «Мәрьв бьрʹчи нә. Бежә ԝан, бьра һәрʹьн хԝәрʹа хԝарьне бькʹьрʹьн».

Ле Иса готә ԝан: «Әʹсә нинә, ԝәки әԝана һәрʹьн. Һун хԝарьне бьдьнә ԝан». Шагьрта пьрси: «Тӧ дьхԝази, ԝәки әм һәрʹьн у нан бона һʹәмушка бькʹьрʹьн?» Йәк жь шагьртед Иса, Филипо, гот: «Һәрге гәләк пʹәре мә һәбуйа, мәйе диса жи нькарбуйа тʹера һʹәмушка нан бькʹьрʹийа».

Иса пьрси: «Чьԛас нан щәм мә һәйә?» Әндраԝьс гот: «Пенщ нан у дӧ мәʹсийед бьчʹук. Ле әԝ тʹера һʹәмушка накә». Иса гот: «Нан у мәʹсийа биньнә вьра». Әԝи готә щьмәʹте, ԝәки кʹом-кʹом пʹарәвәбьн сәр 50 йан 100 мәрьва у сәр чʹере рʹунен. Әԝи нан у мәʹси һьлда, әʹзмен ньһерʹи у дӧа кьр. Паше Иса нан да шагьрта, ԝәки әԝана щьмәʹтерʹа бәла кьн. Ԝедәре 5 000 мер, у ӧса жи жьн у зарʹ тʹоп бьбун. Хԝарьне тʹера һʹәмушка кьр у һәр кәс тʹер бу. Паше шагьрта һурькед бәрмайи тʹоп кьрьн, сәва кӧ тʹӧ тьшт ӧнда нәбә. Жь ԝан һурька 12 сәвәт тʹьжи дәркʹәтьн! Кʹәрәмәтәкә ӧса пешда тʹӧ кәси һе нәдитьбу!

Мәрьва кьред Иса дитьн, әʹщебмайи ман у хԝәстьн ԝи бькьнә пʹадша. Ле Иса заньбу, ԝәки әԝ ԝәʹдә һе нәһатийә кӧ Йаһоԝа ԝи бькә пʹадша. Ләма жи Иса щьмәʹт шандә малед ԝан. Ле шагьртарʹа гот, ԝәки жь Бәʹра Щәлиле һәрʹьнә алийе дьн. Шагьрт кʹәтьнә ԛәйьке, ле Иса тʹәне чу сәр чʹийе. Гәло чьрʹа? Әԝи дьхԝәст Баве хԝәрʹа дӧа бькә. Рʹаст ә Иса бәтал нибу, ле әԝи диса жи ԝәʹдә бона дӧакьрьне дьдит.

Иса дькарьбу нә кӧ тʹәне нәхԝәша ԛәнщ кә у мьрийа рʹакә, ле әԝи ӧса жи дькарьбу ба у баран бьда сәкьнандьне. Паши дӧакьрьна хԝәйә сәр чʹийе, Иса сәр Бәʹра Щәлиле ньһерʹи у дит, ԝәки фьртонәкә ԛайим рʹабу. Ле ԝи чахи шагьртед ԝи ԛәйькеда бун у бь һʹәму ԛәԝата хԝә бера ԛәйьке дьданә хәбате. Иса жь чʹийа пәйа бу у сәр аверʹа бәрбь ԛәйька шагьртед хԝә чу. Гава шагьрта дит, ԝәки кәсәк сәр аверʹа незики ԝан дьбә, әԝана гәләк тьрсийан. Ләма Иса готә ԝан: «Әԝа әз ьм. Нәтьрсьн».

Пәтрус гот: «Хӧдан, һәрге әԝа бь рʹасти тӧ йи, ӧса бькә ԝәки әз сәр аверʹа бемә щәм тә». Иса готә Пәтрус: «Ԝәрә щәм мьн». Фьртонә һәла һе нәсәԛьрʹи бу, ле Пәтрус жь ԛәйьке пәйа бу у сәр аверʹа бәрбь Иса чу. Ле гава Пәтрус незики Иса бу, әԝ чʹәʹв фьртоне кʹәт у тьрсийа. У гава дәстпекьр бьхәньԛә, гази Иса кьр у гот: «Хӧдан, мьн хьлаз кә!» Иса дәст авитә ԝи у гот: «Чьма тӧ дӧдьли буйи? Кʹа баԝәрийа тә?»

Иса у Пәтрус һьлкʹьшийанә ԛәйьке у ԝе дәме фьртонә сәԛьрʹи. Бьдә һʹәсабе хԝә, чаԝа шагьрта хԝә тʹәхмин кьрьн? Ԝана готә Иса: «Тӧ бь рʹасти Кӧрʹе Хԝәде йи».

Ле Иса нә тʹәне щарәке тʹәшԛәлед тʹәбийәте дьда сәкьнандьне. Щарʹәке, кʹәнге Иса у шагьртед ԝи сәр бәʹрера дәрбази алийе дьн дьбун, Иса ԛәйькеда рʹазабу. Ԝи ԝәʹдәйи фьртонәкә ԛайим рʹабу. Пʹелед бәʹре ӧса ԛәйьке дьхьстьн, ԝәки ԛәйьк тʹьжә ав бу. Шагьрта Иса һʹьшйар кьрьн у готьн: «Дәрсдар, һьнәк майә әм бьхәньԛьн! Али мә бькә!» Иса рʹабу у фәрман да бәʹре: «Бьсәԛьрʹә, кәрʹ бә!» У перʹа-перʹа ба сәкьни у бәʹр сәԛьрʹи. Иса шагьрта пьрси: «Кʹа баԝәрийа ԝә?» Ԝана готә һәвдӧ: «Һәла һе ба у бәʹр гӧрʹа ԝи дькьн». Шагьрт избат бун, һәрге әԝана бь тʹәмами баԝәрийа хԝә Иса биньн, әԝана ԝе ида тʹӧ тьшти нәтьрсьн.

Ферьса Иса нәфрʹәт дькьр у мәʹни дьгәрʹийан, ԝәки ԝи бьдьнә гьртьне. Ԝана дьгот, ԝәки изьна ԝи тʹӧнә рʹожа шәмийе мәрьва ԛәнщ кә. Щарʹәке, рʹожа шәмийе Иса рʹасти мәрьвәки кор һат, йе кӧ пʹарс дькьр. Иса готә шагьртед хԝә: «Ньһа һуне бьвиньн, чаԝа ԛәԝата Хԝәде ԝе али ԝи мәрьви бькә». Иса тʹука хԝә у һәрʹи ләвхьст у дани сәр чʹәʹве ԝи мәрьве кор. Иса готә ԝи: «Һәрʹә һʹәԝзе Силԝамеда чʹәʹве хԝә бьшо». Әԝи мери һәма ӧса жи кьр, у чʹәʹвед ԝи ԝәбун.

Мәрьвед дор-бәр гәләк әʹщебмайи ман. Ԝана дьпьрси: «Әԝа әԝ мәрьв ә, йе кӧ пʹарс дькьр? Йан әԝ рʹәнге ԝида нә?» Мәрьве кӧ чʹәʹве ԝи вәбьбу, гот: «Әԝа әз ьм, йе кӧ жь буйине кор бум!» Һьнге ԝана пьрси: «Ле ча ӧса ԛәԝьми, ԝәки тӧ ньһа дьвини?» Гава әԝи ԝанарʹа гьли кьр чь ԛәԝьми, ԝана перʹа-перʹа ԝи бьрьн бал Ферьса.

Әԝи Ферьсарʹа шьровәкьр у гот: «Иса тьштәк дани сәр чʹәʹве мьн у готә мьн, һәрʹә чʹәʹве хԝә бьшо. Мьн һәма ӧса жи кьр у ньһа әз дькарьм бьвиньм». Ферьса бь һерс готьн: «Һәрге Иса рʹожа шәмийе мәрьва ԛәнщ дькә, демәк ԛәԝата ԝи нә жь Хԝәде йә». Ле мәрьвед дор-бәр готьн: «Һәрге ԛәԝата ԝи нә жь Хԝәде буйа, әԝи ԝе нькарьбуйа ԛәнщ кьра».

Ферьса гази де-баве ԝи мәрьви кьрьн у жь ԝан пьрсин: «Әԝа чаԝа ԛәԝьми, ԝәки чʹәʹве кӧрʹе ԝә вәбу?» Де-баве ԝи гәләк дьтьрсийан, чьмки Ферьса дьгот, ԝәки ԝе ԝан мәрьва жь кʹьниште дәрхьн, йед кӧ баԝәрийа хԝә Иса биньн. Ләма жи ԝана гот: «Әм ньзаньн. Жь ԝи пьрс кьн». Ферьса гәләк пьрс данә ԝи мәрьви, у ахьрийе әԝи готә ԝан: «Нә мьн ида ԝәрʹа һәр тьшт гьли кьр. Чьрʹа һун диса у диса ԝан пьрса дьдьнә мьн?» Ферьс гәләк һерс кʹәтьн у бәри ԝи дан.

Гава Иса әԝ мәрьв дит, жь ԝи пьрси: «Тӧ Мәсиһ баԝәр дьки?» Әԝи мәрьви щаба хԝә да у гот: «Мьне баԝәр кьра, һәрге мьн бьзаньбуйа әԝ кʹижан ә?» Иса гот: «Әз ьм Мәсиһ». Ԝе йәкеда һʹьзкьрьна Иса дьһатә кʹьфше, чьмки әԝи нә кӧ тʹәне ԝи ԛәнщ кьр, ле али ԝи кьр, ԝәки баԝәрийе һьндава Мәсиһ пешда бинә.

Се һәвалед Иса йед незик һәбун, әԝана Бәйтанйайеда дьман. Әԝ Лазар у дӧ хушкед ԝи Мәрйәм у Мәртʹа бун. Щарәке гава Иса мьһала Пәреайеда бу, Мәрйәм у Мәртʹайе әʹламәтчи шандьнә бал Иса, ԝәки бежьнә ԝи: «Лазар гәләк нәхԝәш ә. Лава дькьн, ләз кʹәвә, ԝәре!» Ле Иса перʹа-перʹа нәчу. Дӧ рʹож шунда Иса готә шагьртед хԝә: «Рʹабьн әм һәрʹьн Бәйтанйайе. Лазар рʹазайә у әз дьчьм ԝи һʹьшйар кьм». Шагьрта гот: «Һәрге Лазар рʹазайә, демәк ԝе ԛәнщ бә». Һьнге Иса әʹйан ԝанарʹа гот: «Лазар мьрийә».

Кʹәнге Иса һатә Бәйтанйайе, ида чар рʹож бу кӧ Лазар мьрьбу. Гәләк мәрьв тʹоп бьбун, ԝәки бәр дьле Мәртʹайе у Мәрйәмеда бен. Кʹәнге Мәртʹайе бьһист, ԝәки Иса һат, әԝ бәрбь ԝи рʹәви у готе: «Хӧдан, һәрге тӧ вьра буйайи, бьре мьн ԝе нәмьра». Иса бәр дьле ԝеда һат у гот: «Бьре тә ԝе диса бьжи. Тӧ ԝе йәке баԝәр дьки, Мәртʹа?» Әԝе гот: «Әре, әз баԝәр дькьм, ԝәки ахьрийеда рʹожа сахкьрьна мьрийа, ԝе рʹабә». Иса гот: «Әз ьм рʹабун у жийин».

Паше Мәртʹайе гази Мәрйәме кьр у гот: «Иса вьра йә». Мәрйәм һатә бәрбь Иса, у щьмәʹт пәй ԝе һат. Әԝ бәр Иса кʹәтә сәр чока у кʹәлә-кʹәл дәстпекьр бьгьри у гот: «Һәрге тӧ вьра буйайи, бьре мә ԝе нәмьра!» Гава Иса дит, чаԝа әԝ жь еша дьле хԝә дьчәрчьрә, Иса жи гьрийа. Кʹәнге щьмәʹте дит, ԝәки Иса дьгьри, ԝана һәврʹа гот: «Бьньһерʹә Иса ча Лазар һʹьз дькьр». Һьнәка жи дьготьн: «Чьрʹа әԝи һәвале хԝә хьлаз нәкьр?» Ле гәло Иса чь кьр?

Иса бәрбь тʹьрбе чу, кʹидәре Лазар дәфьнкьри бу, дәве тʹьрбе пе кәвьрәки мәзьн дадай бу. Әԝи гот: «Ԝи кәвьри ԝеда кьн». Мәртʹайе гот: «Әԝ ида чар рʹож ә мьрийә! Ньһа бин кʹәтийә бәдәна ԝи». Ԝана кәвьр ԝеда кьр, у Иса дӧа кьр у гот: «Баво, әз зәʹф рʹази мә, ԝәки тә дәнге мьн бьһист. Әз заньм, ԝәки тӧ һәртʹьм дәнге мьн дьбьһейи, ле мьн бона хатьре ве щьмәʹте гот, ԝәки баԝәр бькьн, кӧ тә мьн шандийә». Паше әԝи бь дәнге бьльнд гот: «Лазар, дәркʹәвә!» Ԝе дәме тьштәки әʹщебмайи ԛәԝьми. Лазар жь тʹьрбе бь кʹьтан кʹәфәнкьри дәркʹәт. Иса гот: «Кʹәфәне сәр ԝи вәкьн у бьһельн бьра рʹе һәрʹә».

Гәләка, гава әԝ йәк дитьн, баԝәрийа хԝә Иса анин. Ле һьнә мәрьв чунә бал Ферьса у һәму тьшт гьли кьрьн. Бона ԝе йәке Ферьса дьхԝәстьн Иса у Лазар бькӧжьн. Йәк жь 12 шагьрте Иса, Щьһуда Исхәрйоти, дьзикава чу бал Ферьса у жь ԝан пьрси: «Һуне чь бьдьнә мьн, һәрге әз Иса бьдьмә дәсте ԝә?» Ԝана си зив ԝирʹа соз дан, у жь ԝи ԝәʹдәйи Щьһуда мәщал дьгәрʹийа, ԝәки Иса бьдә дәсте Ферьса.

Һәр сал 14 нисане, Щьһу Щәжьна Дәрбазбуне дәрбаз дькьрьн. Әԝ щәжьн дькьрә бира ԝан, ԝәки Йаһоԝа ԝана жь дилтийа Мьсьре аза кьр у бьрә Әʹрде Создайи. Сала 33 Д.М., Оршәлимеда Иса у шагьртед ԝи маләкеда, отʹаха жорьнда тʹоп бьбун, ԝәки Щәжьна Дәрбазбуне дәрбаз кьн. Хьлазийа шиве, Иса готә ԝан: «Йәк жь ԝә, ԝе мьн бьдә дәсте дьжмьнед мьн». Шагьрт гәләк әʹщебмайи ман у жь Иса пьрсин: «Кʹе ԝе әԝе йәке бькә?» Иса гот: «Кʹижанирʹа әзе әԝи нани бьдьм, әԝ ә». Һьнге Иса нан да дәсте Щьһуда Исхәрйоти. Әԝ дәрберʹа рʹабу у жь оде дәркʹәт.

Паше Иса дӧа кьр, нан кәр кьр у да шагьртед хԝә. Әԝи гот: «Әԝи нани бьхԝьн. Әԝ те һʹәсабе бәдәна мьн, йа кӧ әзе сәва ԝә бьдьм». Паше әԝи дӧа кьр, шәрав һьлда у да ԝан. Әԝи гот: «Әве шәраве вәхԝьн. Әԝ те һʹәсабе хуна мьн, йа кӧ әзе бона бахшандьна гӧне ԝә бьрʹежьм. Әз соз дьдьмә ԝә, ԝәки һуне тʹәви мьн сәр әʹзмана бьбьнә пʹадша. Һәр сал әԝе щәжьне бона биранина мьн дәрбаз кьн». Һʹәта рʹожа иро пәйчуйед Иса һәр сал ԝе еваре тʹоп дьбьн. Рʹожа иройин әԝ щәжьн те навкьрьне Евара Биранина Мьрьна Иса.

Паши шиве, шагьртед ԝи кʹәтьнә дәʹве, һәла кʹе жь ԝан йе һәри мәзьн ә. Ле Иса готә ԝан: «Йе һәри мәзьн әԝ ә, кʹе хԝә йе һәри бьчʹук һʹәсаб дькә у хԝә бьльнд накә».

Иса бәрдәԝам кьр у гот: «Һун һәвалед мьн ьн. Әз һәр тьшти дьвежьмә ԝә, чь кӧ Баве мьн тʹәми мьн кьр. Зутьрәке әзе һәрʹьм щәм Баве хԝә сәр әʹзмана. Һуне вьра бьминьн, у мәрьв ԝе ԝә нас кьн, ча шагьртед мьн, һәрге һун һәвдӧ һʹьз бькьн. Һун гәрәке һәвдӧ һʹьз бькьн, чаԝа әз ԝә һʹьз дькьм».

Паше Иса дӧа кьр у жь Йаһоԝа лава кьр, ԝәки һʹәму шагьртед ԝи хԝәй кә. У гот, ԝәки али ԝан бькә йәктийе хԝәй кьн. Әԝи дӧа кьр, ԝәки наве Йаһоԝа пироз бә. Паше Иса у шагьртед ԝи бь кʹьлама пәсьн данә Йаһоԝа у жь мал дәркʹәтьн. Ԝәʹдә гьһиштьбу, ԝәки Иса бьһата гьртьне.

Иса у шагьртед ԝи жь Нәԝала Ԛьдроне чунә сәр Чʹийайе Зәйтʹуне. Ида ниве шәвебу у һив тʹьжә бу. Гава әԝана гьһиштьнә бахче Гетшәмани, Иса шагьртарʹа гот: «Вьра бьн у һʹьшйар бьминьн». У Иса һьнәки пешда чу у кʹәтә сәр чока. Бь кʹәл-бин әԝи Йаһоԝарʹа дӧа кьр у гот: «Бьра хԝәстьна тә бә». Йаһоԝа мәләк шанд, ԝәки бәр дьле Исада бе. Чахе Иса вәгәрʹийа бал шагьрта, әԝи дит ԝәки әԝана хәԝрʹа чунә. Иса гот: «Һʹьшйар бьн! Ньһа ԝәʹде хәԝе нинә! Ԝәхт һат, ԝәки әз бькʹәвьмә дәсте дьжмьнед хԝә».

Ԝәʹдә шунда, Щьһуда тʹәви гәләк әскәра пе шурʹа у дара һатьнә бахчә. Щьһуда заньбу кʹидәре дькарә рʹасти Иса бе, чьмки әԝана гәләк щар тʹәвайи ԝи бахчәйида тʹоп дьбун. Щьһуда готә әскәра, ԝәки ԝе нишане бьдә ԝан, кӧ Иса кʹижан ә. Әԝ бәрбь Иса чу у гот: «Сьлав ль тә, Дәрсдар», у незик бу ԝи пачʹ кьр. Иса готе: «Щьһуда, тӧ пе пачʹкьрьне мьн дьфьроши?»

Иса бәрбь әскәра чу у ԝана пьрси: «Һун кʹе дьгәрʹьн?» Ԝана гот: «Исайе жь Ньсрәте». Паше Иса гот: «Әԝ әз ьм», әԝана ӧса әʹщебмайи ман, ԝәки пьштосан кʹәтьн. У Иса щарәке жи жь ԝан пьрси: «Һун кʹе дьгәрʹьн?» Ԝана диса гот: «Исайе жь Ньсрәте». Иса гот: «Мьн ԝәрʹа гот, әԝ әз ьм. Шагьртед мьн бәрʹдьн».

Гава Пәтрус фәʹм кьр чь дьԛәԝьмә, әԝи шур дәрхьст у гӧһе хӧламе сәрәккʹаһин бьри. Ле Иса дәст да гӧһе ԝи у ԛәнщ кьр. Иса готә Пәтрус: «Шуре хԝә бькә щи. Кʹе шур бьдә хәбате, ԝе пе шур жи бе кӧштьне». Әскәра Иса гьртьн у дәсте ԝи гьредан, ле шагьрта ԝи һиштьн у рʹәвин. Ԝан әскәра ԝи бьрьнә щәм Һәнане сәроке кʹаһина. Һәнана дәстпекьр пьрса бьдә Иса у паше ԝи шандә бал Ԛәйафа сәрәккʹаһин. Ле чь һатә сәре шагьрта?

Гава Иса тʹәви шагьртед хԝә шив дәрбаз дькьр, әԝи готә ԝан: «Һәр кәс жь ԝә, ԝе шәве ԝе мьн бьһелә». Пәтрус гот: «На! Һәрге һәр кәс тә бьһелә, әзе тʹӧ щар тә нәһельм». Ле Иса готә Пәтрус: «Ишәв пешийа бангдана дик, тӧйе се щара бежи, ԝәки тӧ мьн нас наки».

Чахе әскәра Иса бьрьнә мала Ԛәйафа, һәчʹи зәʹф жь шагьрта, Иса һиштьн. Ле дӧ шагьрт нава әʹлаләтеда пәй Иса дьчун. Йәк жь ԝан Пәтрус бу. Әԝ кʹәтә һʹәйата Ԛәйафа у бәр кӧчʹьк хԝә гәрм дькьр. Бәр рʹонайа агьр хӧламәки сәрчʹәʹве Пәтрус дит у гот: «Мьн тӧ нас кьри! Тӧ жи тʹәви Иса буйи!»

Пәтрус гот: «На, әԝ әз нибум! Әз фәʹм накьм дәрһәԛа чь тӧ дьбежи!» Әԝи дьхԝәст хԝә вәшарта у бәрбь дәргәһ чу. Ле ԝедәре хӧламә дьн әԝ дит у готә щьмәʹте: «Әԝ мәрьв тʹәви Иса бу!» Пәтрус гот: «Әз нә жи ԝи нас дькьм!» Мерәки жи гот: «Тӧ йәк жь ԝан и! Пе хәбәрдана тә те кʹьфше, ԝәки тӧ жи чаԝа Иса жь Щәлиле йи». Ле Пәтрус сонд хԝар у гот: «Әз ԝи нас накьм!»

Һәма ԝе дәме дик банг да. У Пәтрус дит ча Иса зьвьрʹи у ԝи ньһерʹи. Хәбәред Иса кʹәтьнә бира ԝи, әԝ дәркʹәтә дәрва у кʹәлә-кʹәл гьрийа.

Ԝи чахи Щьвина Гьрәгьра тʹоп бу, сәва кӧ мала Ԛәйафада диԝана Иса бькьн. Ԝана пешда сафи кьрьбун, ԝи бькӧжьн у бона ԝе йәке мәʹни дьгәрʹийан. Ле нькарьбун тʹӧ мәʹни бьдитана. Һьнге Ԛәйафа жь Иса пьрси: «Тӧ Кӧрʹе Хԝәде йи?» Иса гот: «Бәле». Ԛәйафа гот: «Мәʹникә дьн мәрʹа нәлазьм ә. Әԝ кʹьфьрийа дькә!» Һʹакьм ԛайил бун у готьн: «Әԝ гәрәке бе кӧштьне». Һьнге ԝана шәмаԛа данә Иса, тʹуйи ԝи кьрьн, чʹәʹве ԝи гьредан, данә бәр кʹӧлма у дьготьнә ԝи: «Һәрге тӧ пʹехәмбәр и, бежә, әԝ кʹе бу тә хьст!»

Гава сьбәһ сафи бу, ԝана Иса бьрьнә Щьвина Гьрәгьра у ԝедәре диса жь ԝи пьрсин: «Тӧ Кӧрʹе Хԝәде йи?» Иса щаба ԝан да у гот: «Ԝә хԝәха гот, ԝәки әз әԝ ьм». Ԝана ԝи нәһәԛ кьрьн, ԝәки йан чь әԝ кʹьфьрийа дькә у бьрьнә мала Понтийо Пилато, йе кӧ сәрԝере Рʹоме бу. Ле гәло паше чь ԛәԝьми? Ԝәрен әм пебьһʹәсьн.

Сәрокед кʹаһина Иса бьрьнә бал Пилато. Пилато ԝана пьрси: «Әԝи мәрьви чь нәһәԛи ԝә кьрийә?» Ԝана гот: «Әԝ дьбежә, ԝәки әԝ пʹадша йә!» Пилато Иса пьрси: «Тӧ йи Пʹадше Щьһудайе?» Иса гот: «Пʹадшатийа мьн, нә жь ве дьне йә».

Паше Пилато Иса шандә бал Һеродәс сәрԝере Щәлиле, ԝәки әԝ тьштәки мьԛабьли ԝи бьвинә. Һеродәс тьштәки хьраб Исада нәдит у ԝи пашда шандә бал Пилато. Паше Пилато готә щьмәʹте: «Нә Һеродәс, нә жи мьн тьштәки хьраб ԝида нәдит. Ләма жи әзе ԝи аза кьм». Щьмәʹте кьрә ԛарʹини: «Ԝи бькӧжьн! Ԝи бькӧжьн!» Әскәра Иса данә бәр ԛамчийа, тʹуйи ԝи дькьрьн у ԝи дькʹӧтан. Ԝана тʹащәк жь стьрийа вәгьрти, данә сәр сәре ԝи у бь ԛәрфа дьготьн: «Хԝәш бә, Пʹадше Щьһуда!» Пилато диса готә щьмәʹте: «Мьн тьштәки хьраб ԝи мәрьвида нәдитийә». Ле әԝана сәр йа хԝә сәкьнин у готьн: «Ԝи дарда кьн!» Һьнге Пилато ԝи да дәсте әскәра, ԝәки ԝи бькӧжьн.

Ԝана ԝи бьрьнә Голготайе у ԝедәре сәр стуне мьх кьрьн. Иса дӧа кьр: «Баво бьбахшинә ԝана, чьмки әԝана ньзаньн чь дькьн». Щьмәʹте ԛәрфе хԝә Иса дькьрьн у дьготьн: «Һәрге тӧ Кӧрʹе Хԝәде йи, жь стуне пәйа бә! Хԝә хьлаз кә».

Йәк жь ԛачаха, йе кӧ кʹеләка Иса дардакьри бу, готә ԝи: «Гава бькʹәви Пʹадшатийа хԝә, мьн бькә бира хԝә». Иса соз да ԝи у гот: «Тӧйе тʹәви мьн Щьнәтеда би». Нивро тәʹри кʹәтә әʹрде у се сьһʹәт кʹьшанд. Һьнә шагьрт бәр стуне сәкьни бун, Мәрйәм дийа Иса жи нава ԝанда бу. Иса готә Йуһʹәнна, ԝәки мьԛати Мәрйәме бә ча мьԛати дийа хԝә.

Ахьрийе Иса гот: «Тʹәмам ԛәԝьми!» Әԝи сәре хԝә дахьст у мьр. Ԝе дәме әʹрд һʹәжийа, пʹарьстгәһеда пʹәрʹда ортʹа Пироз у Һәри Пирозда бу дӧһ пʹара. Һьнге сәрԝерәки әскәра гот: «Әԝ бь рʹасти Кӧрʹе Хԝәде бу».

Паши мьрьна Иса, мәрьвәки дәԝләти, наве ԝи Усьв бу, чу бал Пилато у изьн хԝәст, ԝәки бәдәна Иса жь стуне пәйа кә. Усьв бәдәна ԝи бь рʹуне бинхԝәш рʹун кьр, пе кʹьтан кʹәфән кьр у бәдәна ԝи дани тʹьрба тʹәзә. У дәре тʹьрбе пе кәвьрәки мәзьн дада. Сәрокед кʹаһина готьнә Пилато: «Әм дьтьрсьн, ԝәки йәк жь шагьртед ԝи дькарә бәдәна ԝи дьзива бьвә у бежә, ԝәки әԝ сах буйә».

Се рʹож паши мьрьна Иса, чәнд кʹӧлфәт һатьнә бәр тʹьрба Иса у дитьн, ԝәки дәре тʹьрбе вәкьри йә. Мәләк һьндӧре тʹьрбеда бу у әԝи готә ԝан: «Нәтьрсьн. Иса жь мьрьне рʹабуйә. Бежьнә шагьртед ԝи, ԝәки һәрʹьнә Щәлиле у рʹасти ԝи бен».

Мәрйәма Мәждәлани ләзә-ләз чу щәм Пәтрус у Йуһʹәнна. Әԝе готә ԝан: «Щьнйазе Иса бьрьнә!» Пәтрус у Йуһʹәнна бәрбь тʹьрбе рʹәвин. Ԝана дит,ԝәки тʹьрб вала йә у пашда вәгәрʹийанә малед хԝә.

Чахе Мәрйәм пашда вәгәрʹийа тʹьрбе, әԝе дӧ мәләк һьндӧре тʹьрбеда дит, у готә ԝан: «Щьнйазе Иса һьлданә у әз ньзаньм ԝи бьрьнә кʹидәре». Ньшкева Мәрйәм мәрьвәк дит у фькьри, ԝәки әԝ бахчәван ә у жь ԝи пьрси: «Хайе мьн, һәрге тә бәдәна Иса һьлда йә, бежә мьн, тә ԝи данийә кʹӧ». Ле гава әԝи гот, «Мәрйәм!» әԝе перʹа-перʹа фәʹм кьр, ԝәки әԝ Иса йә. Әԝе бь дәнге бьльнд гот: «Дәрсдар!» у ԝи һʹәмез кьр. Иса готә ԝе: «Һәрә бал бьред мьн у бежә ԝан, ԝәки тә әз дитьмә». Һәма ԝе дәме Мәрйәм рʹабу чу бал шагьрта у гот, ԝәки әԝе Иса дит.

Ԝе рʹоже дӧ шагьртед Иса жь Оршәлиме дьчунә Әмԝасе. Рʹева мәрьвәк незики ԝан һат у пьрси, кӧ әԝана дәрһәԛа чь хәбәр дьдьн. Ԝана готә ԝи: «Ле тә дәрһәԛа ԝе йәке нәбьһистийә? Се рʹож пешда сәрокед кʹаһина Иса данә кӧштьне. Ле ньһа чәнд жьн дьбежьн, ԝәки әԝ сах ә!» Әԝи гот: «Һун баԝәрийа хԝә пʹехәмбәра найньн? Ԝана пешда дьгот, ԝәки Мәсиһ ԝе бе кӧштьне, у паше ԝе бе сахкьрьне». Әԝи дәстпекьр дәрһәԛа Ньвисаред Пироз ԝанарʹа шьровәкә. Гава әԝана һатьн Әмԝасе, шагьрта жь ԝи мәрьви лава кьрьн, ԝәки тʹәви ԝан бьминә. Ԝәʹде нан-хԝарьне, кʹәнге әԝи нан һьлда у дӧа кьр, шагьрта фәʹм кьр, ԝәки әԝ Иса йә. У ньшкева әԝ ӧнда бу.

Дӧ шагьрт пашда вәгәрʹийанә Оршәлиме бал шагьртед дьн у гьли кьрьн һәр тьшт чь кӧ ԛәԝьми. Ԝе маледа кʹидәре әԝана тʹоп бьбун, ньшкева Иса һатә хԝәйане. Шагьрта перʹа-перʹа фәʹм нәкьрьн, ԝәки әԝ Иса йә. У Иса готә ԝан: «Һәла дәсте мьн бьньһерьн у дәсте хԝә бьдьнә мьн. Чаԝа һатьбу пʹехәмбәртикьрьне, Мәсиһ жь мьрьне рʹабу».

Һьнә ԝәʹдә паши ԝе йәке, чахе Иса шагьртарʹа әʹйан бу, Пәтрус сафи кьр һәрʹә Бәʹра Щәлиле, ԝәки мәʹсийа бьгьрә. Тʹума, Аԛуб, Йуһʹәнна у йед дьн тʹәви ԝи чун. Тʹәмамийа шәве ԝана тʹӧре хԝә авитьбунә аве, ле ԛә мәʹсик нәгьртьн.

Бәрбанге, бәр дәве бәʹре ԝана мерәк дит. Әԝи бь дәнге бьльнд ԝана пьрси: «Ԝә ԛә мәʹси гьрт?» Ԝана готә ԝи: «На!» Һьнге әԝи гот: «Тʹоре хԝә бавежьнә алийе рʹасте». Әԝана гӧрʹа ԝи кьрьн, у тʹоре ԝан ӧса тʹьжә мәʹси бу, ԝәки ԝана нькарьбун тʹор жь аве дәрхьстана. Ԝи чахи Йуһʹәнна фәʹм кьр, ԝәки әԝ мер Иса йә у бь дәнге бьльнд гот: «Әԝа Иса йә!» Ԝе дәме Пәтрус банзда кʹәтә аве у бәрбь Иса чу. Ле шагьртед дьн пе ԛәйьке гьһиштьнә дәве бәʹре.

Гава әԝана гьһиштьнә дәве бәʹре, ԝана нан дит у сәр агьр мәʹси дьһатә чекьрьне. Иса готә шагьрта, ԝәки чәнд мәʹсийа биньн, йед кӧ ԝана гьртьбу. У ԝаньрʹа гот: «Ԝәрен тәʹште бьхԝьн».

Паши нан-хԝарьне, Иса жь Пәтрус пьрси: «Тӧ мьн жь мәʹсигьртьне зедәтьр һʹьз дьки?» Пәтрус гот: «Бәле, тӧ зани, ԝәки әз тә дьһа зәʹф һʹьз дькьм». Иса гот: «Бәрхед мьн бьчʹеринә». Иса щара дӧда ԝи пьрси: «Тӧ мьн һʹьз дьки?» Пәтрус гот: «Иса, нә тӧ зани, ԝәки әз тә һʹьз дькьм». Иса готә ԝи: «Шьвантийе пәзед мьн бькә». Иса щара сьсийа пьрси. Һьнге дьле Пәтрус гәләк ешийа у әԝи гот: «Хӧдан, тӧ һәр тьшти зани. Тӧ зани, ԝәки әз тә һʹьз дькьм». Иса гот: «Бәрхед мьн бьчʹеринә», у зедә кьр: «Бәрдәԝам кә пәй мьн ԝәре».

Щәлиледа, Иса рʹасти шагьртед хԝә һат. Әԝи тʹәмийа фәрз да ԝан у гот: «Һәрʹьн у һʹәму мьләта һин кьн. Әԝ тʹәмийед кӧ мьн данә ԝә, ԝана һин кьн у бьньхӧминьн». Иса соз да ԝан: «Бьзаньбьн, ԝәки әзе тʹьме тʹәви ԝә бьм».

Иса паши сахбуине 40 рʹожа бь сәда шагьртарʹа әʹйан дьбу, чаԝа Щәлиледа ӧса жи Оршәлимеда. Әԝи тьштед фәрз ԝана һин кьр у гәләк кʹәрәмәт кьр. Щара пашьн Иса сәр Чʹийайе Зәйтʹуне рʹасти шагьртед хԝә һат. Әԝи готә ԝан: «Жь Оршәлиме нәчьн. Бәрдәԝам кьн һивийа ԝе йәке бьн, чь кӧ Бав соз дайә ԝә».

Шагьрта фәʹм нәкьрьн, дәрһәԛа чь әԝ дьбежә у жь ԝи пьрсин: «Ньһа тӧйе бьби Пʹадше Исраеле?» Иса щаба ԝан да у гот: «Йаһоԝа һʹәсаб дькә, ԝәки әԝ ԝәʹдә һе нәһатийә, ԝәки әз бьбьмә Пʹадша. Зутьрәке һуне ԛәԝата рʹӧһʹе пироз бьстиньн у бьбьнә шәʹдед мьн. Һәрʹьнә Оршәлиме, Щьһустане, Самәрйайе у һʹәта сәре дьне шәʹдәтийе бьдьн».

Паши Иса вәгәрʹийа әʹзмана, у әʹԝр әԝ жь бәр чʹәʹве ԝан вәшарт. Шагьрт сәкьнибун у жор дьньһерʹин, ле Иса ида нәдьһатә кʹьфше.

Шагьрт жь Чʹийайе Зәйтʹуне пәйа бун у чунә Оршәлиме. Әԝана һәртʹьм маләкеда, отʹаха жорьнда тʹоп дьбун, дӧа дькьрьн у һивийа рʹебәрийа Иса бун.

Дәһ рʹож паши ԝе йәке ча Иса чу сәр әʹзмана, шагьртед ԝи рʹӧһʹе пироз стандьн. Әԝ йәк ԛәԝьми Рʹожа Пенщийе Һʹәсабе, сала 33 Д.М., гәләк мәрьв жь щурʹә-щурʹә щийа һатьнә Оршәлиме. Маләкеда отʹаха жорьнда 120 шагьртед Иса тʹоп бьбун. Ньшкева тьштәки әʹщебмайи ԛәԝьми. Сәр сәре һәр шагьртәки тьштәк мина агьр векʹәт у әԝана сәр щурʹә-щурʹә зьмана дәстпекьрьн хәбәр дьн. Ньшкева дәнг һат, те бежи баки ԛәԝи ԝе отʹахеда рʹабу.

Әԝ мәрьв, йед кӧ жь щийед дьн һатьбунә Оршәлиме, әԝ дәнг бьһистьн у рʹәвин бәрбь ԝе мале, ԝәки пебьһʹәсьн ԝедәре чь ԛәԝьми. Әԝана гәләк зәндәгьрти ман чахе дитьн, ԝәки шагьрт сәр щурʹә-щурʹә зьмана хәбәр дьдьн. Ԝана гот: «Әԝ мәрьв жь Щәлиле нә. Чаԝа әԝана дькарьн сәр зьмане мә хәбәр дьн?»

Пәтрус у шагьртед дьн бәр ԝан мәрьва сәкьнин. Пәтрус готә ԝан, ԝәки Иса һатьбу кʹӧштьне, ле Йаһоԝа ԝи жь мьрьне рʹакьр. Пәтрус гот: «Ньһа Иса сәр әʹзмана йә у кʹеләка Хԝәде, алийе рʹасте рʹуньштийә у чаԝа әԝи соз дабу, ԝәки ԝе рʹӧһʹе пироз бьдә мә, әԝи ӧса жи кьр. Ләма жи ньһа һун ԝе кʹәрәмәте дьвиньн».

Хәбәред Пәтрус гәләк сәр щьмәʹте һʹӧкӧм кьрьн у ԝана жь ԝи пьрси: «Чь әм гәрәке бькьн?» Пәтрус готә ԝан: «Гӧне хԝә бьдьнә рʹуйе хԝә у бь наве Иса ԝәрьнә ньхӧмандьне. Ԝи чахи һуне жи рʹӧһʹе пироз бьстиньн». Ԝе рʹоже 3 000 мәрьв һатьнә ньхӧмандьне. Жь ԝи чахи Оршәлимеда шагьрт зедә у зедә дьбун. Пе ԛәԝата рʹӧһʹе пироз шагьрта гәләк щьват саз кьрьн, сәва кӧ мәрьва тʹәмийед Иса һин кьн.