Йаһоԝа Хԝәде әʹфьрандаре мә йә. Әԝи һәр тьшт чекьрийә, чь кӧ әм дькарьн бьвиньн у йед кӧ найенә кʹьфше. Пешийа ԝе йәке, гава әԝи дәстпекьр ԝан тьшта чекә, чь кӧ әм дькарьн бьвиньн, әԝи гәләк мәләк чекьр. Ле тӧ зани ԝәки мәләк һәнә? Йаһоԝа мәләк мина хԝә чекьр. Әм нькарьн ԝан мәләка бьвиньн, чаԝа нькарьн Хԝәде бьвиньн. Мәләке пешийе, йе кӧ Йаһоԝа хԝәха чекьр, бу аликʹарчийе ԝи. Әԝи мәләки али Йаһоԝа дькьр, ԝәки стәйрка, планета у тьштед дьн чекә. Йәк жь ԝан планета әʹрд ә, демәк мала мәйә бәдәԝ, сәр кʹижани әм дьжин.

Йаһоԝа әʹрд һазьр кьр, ԝәки һʹәйԝан у ӧса жи мәрьв сәр бьжин. Әԝи тәʹв чекьр, ԝәки сәр әʹрде рʹонайи һәбә. Ӧса жи Хԝәде гәләк чʹийа, океан у чʹәм чекьр.

Ле гәло паше чь ԛәԝьми? Йаһоԝа гот: «Әзе чʹерә, шинкайи у щурʹә-щурʹә баха чекьм». У паши ԝе йәке щурʹә-щурʹә емиш у кӧлирк дәстпебун шин бьн. Паше Йаһоԝа дәстпекьр щурʹә-щурʹә һʹәйԝана чекә, йед кӧ дьфьрʹьн, аведа дьжин у ль сәр әʹрде дькʹьшьн. Хԝәде һьн һʹәйԝанед бьчʹук чекьр һьн жи йед мәзьн, мәсәлә кʹеврушк у фил. Ле кʹижан һʹәйԝан тә хԝәш те?

Паше Йаһоԝа готә мәләке пешийе: «Ԝәрә әм мәрьв чекьн». Мәрьв гәрәке жь һʹәйԝана щӧдә буна. Әԝана гәрәке һин бьн хԝәха бь дәсте хԝә тьшта чекьн. Ӧса жи бькарьбьн хәбәр дьн, бькʹәньн у дӧа бькьн. Әԝана гәрәке мьԛати әʹрде у һʹәйԝана бьн. Гәло тӧ зани мәрьвед пешийе кʹе бун? Ԝәрә әм пебьһәʹсьн.

Йаһоԝа бахчә чекьр у наве ԝи щийи дани Еден. Ԝи бахчәйида тʹьжә кӧлирк, бах у һʹәйԝан һәбун. Паше Хԝәде жь халийа әʹрде мәрьве пешьн Адәм чекьр, у һӧлма жийине пʹьфи позе ԝи кьр. Зани паши ԝе йәке чь ԛәԝьми? Адәм дәстпекьр бьжи! Йаһоԝа, Адәм кьрә бахче Едене у готе, ԝәки әԝ нав бьдә сәр һʹәйԝана.

Йаһоԝа тʹәмик жи да Адәм. Әԝи готә ԝи: «Тӧ дькари емишед жь һʹәму баха бьхԝи, ле һәйә бахәк жь кʹижани тӧ гәрәке нәхԝи. Һәрге тӧ емиша ԝи бахи бьхԝи, тӧйе бьмьри».

Паши ԝе йәке Йаһоԝа гот: «Әз дьхԝазьм жьнәке чекьм, йа кӧ ԝе аликʹарийе бьдә Адәм». Хԝәде ӧса кьр, ԝәки Адәм кʹәтә хәԝа кʹур у паше әԝи пʹарханәкә ԝи дәрхьст у пе ве пʹархане ԝирʹа жьн чекьр. Наве ԝе һатә данине Һеԝа. Адәм у Һеԝа бунә малбәта пешьн. Гәло Адәм чь тʹәхмин кьр гава жьна хԝә дит? Адәм ӧса ша бу, ԝәки гот: «Һәла Йаһоԝа жь пʹархана мьн чь чекьр? Шькьр! Әԝ мина мьн ә».

Йаһоԝа Адәм у Һеԝайерʹа гот, кӧ зарʹа биньн у әʹрде тʹьжә кьн. Хԝәде дьхԝәст, ԝәки әԝана шабуне бьстиньн жь ԝе йәке, кӧ тʹәвайи тьштәкива мьжул бьн у тʹәмамийа әʹрде бькьнә щьнәт, чаԝа бахче Едене. Ле һәр тьшт ӧса дәрнәкʹәт чаԝа Хԝәде хԝәст. Гәло чьрʹа? Һе зедә дәрһәԛа ԝе йәке, әме сәре дьнда пебьһʹәсьн.