Адәм у Һеԝа жь бахче Едене һатьнә дәрхьстьне, у паше гәләк зарʹ ԝанрʹа һатьнә буйине. Ԛайин, кӧрʹе ԝани пешийе, бу щоткʹар, ле кӧрʹе дӧда Һабил, бу шьван.

Рʹожәке Ԛайин у Һабил Йаһоԝарʹа ԛӧрбан анин. Тӧ зани чь те һʹәсабе ԛӧрбан? Әԝ те һʹәсабе пʹешкʹеша ԛимәт бона Хԝәде. Йаһоԝа ԛӧрбана Һабилрʹа гәләк ша бу, ле йа Ԛайинрʹа ша нәбу. Сәва ԝе йәке Ԛайин гәләк һерс кʹәт. Йаһоԝа готә Ԛайин, ԝәки һерса ԝи дькарә ԝи бәрбь кьре хьраб бьвә. Ле Ԛайин гӧһ нәда Хԝәде.

Дәԝсе Ԛайин готә Һабил: «Ԝәрә әм һәрʹьнә чоле». Гава әԝана чоледа тʹәне бун, Ԛайин бьре хԝә хьст у ԝи кӧшт. Гәло, Йаһоԝа ԝе дәрәщеда чь гәрәке бькьра? Йаһоԝа Ԛайин бь ԝе йәке щәза кьр, кӧ ԝи жь малбәта ԝи дур хьст. У ида изьна ԝи тʹӧнә бу пашда вәгәрʹә.

Жь ԝе йәке әм чь дәрсе дькарьн һин бьн? Әм жи дькарьн һерс кʹәвьн, һәрге тьштәк ӧса набә, чаԝа әм дьхԝазьн. Һәрге әм тʹәхмин дькьн, ԝәки зу һерс дькʹәвьн, у йед дьн жи ԝе йәке мәрʹа дьбежьн, демәк әм гәрәке сәр хԝә бьхәбьтьн у емосийед хԝә зәфт кьн, һʹәта кӧ әԝе емосийе сәр мә контрол нәкьрийә.

Һабил, Йаһоԝа һʹьз дькьр у тьштед рʹаст дькьр, ләма жи Йаһоԝа ԝе тʹӧ щар ԝи бир нәкә. Гава Йаһоԝа әʹрде бькә щьнәт, ԝе Һабил диса вәгәрʹинә жийине.

Ԝәʹдә шунда сәр әʹрде мәрьв зедә бун. Гәләк жь ԝан мәрьва хьраб бун. Ӧса жи һьнә мәләкед сәр әʹзмана хьраб бун. Әԝана мала хԝә демәк әʹзман һиштьн у һатьнә сәр әʹрде. Ле тӧ зани чьрʹа ԝана ӧса кьр? Ԝана хԝә кьрә мәри, ԝәки бьзәԝьщьн.

Ԝан мәләкарʹа зарʹ һатьнә буйине. Әԝ зарʹ мәзьн дьбун у ԛәԝата ԝан зедә дьбу у әԝана дьбунә мәрьвед тәрʹьки. Ԝана зийан дьданә мәрьва. Йаһоԝа ида нькарьбу изьн бьда, ԝәки әԝ йәк ӧса бәрдәԝам бә. Ләма жи әԝи сафи кьр, ԝәки ԝан мәрьвед зӧлм селаведа кʹӧта кә.

Ле мәрьвәк һәбу, йе кӧ жь ԝан щӧдә дьбу. Әԝи Йаһоԝа һʹьз дькьр. Наве ԝи Нӧһ бу. Жьн у се кӧрʹед ԝи һәбун, Сәм, Һам у Йафәт, һәрсек кӧрʹед ԝи зәԝьщи бун. Йаһоԝа готә Нӧһ, ԝәки әԝ гәрәке гәмикә мәзьн ава кә, сәва кӧ әԝ у малбәта ԝи жь Селаве бенә хԝәйкьрьне. Әԝ гәми гәрәке мина ԛӧтийа мәзьн буйа у сәр аве кʹәта. Ӧса жи Йаһоԝа готә Нӧһ, ԝәки әԝ гәрәке һʹәйԝана тʹәви хԝә бькә гәмийе, сәва кӧ әԝана жи сах бьминьн.

Нӧһ перʹа-перʹа дәстпекьр гәмийе ава кә. Ԝәкә 50 сала Нӧһ у малбәта ԝи гәми ава дькьрьн. Әԝана гәми ӧса ава кьрьн, чаԝа кӧ Йаһоԝа ԝанарʹа гот. Ԝи чахи Нӧһ һьн жи мәрьварʹа дәрһәԛа Селаве гьли дькьр. Ле тʹӧ кәси гӧһ нәдьда ԝи.

Ахьрийе ԝәʹдә ида гьһишт, ԝәки бькʹәвьнә гәмийе. Ԝәрен бьньһерʹьн паше чь ԛәԝьми.

Нӧһ, малбәта ԝи у һʹәйԝан кʹәтьнә гәмийе. Йаһоԝа дәре гәмийе дада, у баран дәстпебу. Баран ӧса ԛайим дьбари, ԝәки гәми сәр аве кʹәт. Ахьрийе тʹәмамийа әʹрде тʹьжә ав бу. Мәрьвед хьраб, йед кӧ нәкʹәтьнә гәмийе, мьрьн. Ле Нӧһ у малбәта ԝи һатьнә хԝәйкьрьне. Бьдә бәр чʹәʹве хԝә, әԝана чьԛас ша дьбун, ԝәки гӧрʹа Йаһоԝа кьрьн!

Баран 40 рʹож у 40 шәва дьбари у паше сәкьни. Паши ԝе йәке ав һеди-һеди дадькʹәт. Хьлазийе, гәми сәр чʹийе сәкьни. Нӧһ у малбәта ԝи нькарьбун жь гәмийе дәркʹәтана, чьмки ав һәла һе бь тʹәмами данәкʹәтьбу.

Ав һеди-һеди дадькʹәт. Нӧһ у малбәта ԝи саләке зедәтьр гәмийеда бун. Паше Йаһоԝа готә ԝан, ԝәки әԝана дькарьн жь гәмийе дәрен. Әԝана гәләк жь Йаһоԝа рʹази бун, ԝәки әԝи ԝана хьлаз кьр. Ԝана рʹазибуна хԝә Йаһоԝарʹа бь ԝе йәке данә кʹьфше, кӧ ԝирʹа ԛӧрбан анин.

Йаһоԝа ԝе йәкерʹа гәләк ша бу. Әԝи соз да, ԝәки ида тʹӧ щар пе селаве ԝе һәр тьштед сәр әʹрде кʹӧта нәкә. Сәва кӧ созе хԝә избат кә, Йаһоԝа сәр әʹзман кʹәскәсор да кʹьфше. Ле тә кʹәскәсор дитийә?

Паши ԝе йәке Йаһоԝа готә Нӧһ у малбәта ԝи, зарʹа биньн у сәр әʹрде тʹьжә бьн.

Паши Селаве, Нӧһрʹа гәләк нәби һатьнә буйине. Нәфәред ԝан зедә дьбун у әԝана сәр әʹрде бәла бун, чаԝа кӧ Йаһоԝа ԝанарʹа гот.

Ле һәбун малбәтед ӧса, йед кӧ гӧрʹа Йаһоԝа нәкьрьн. Ԝана гот: «Ԝәрен әм хԝәрʹа шәһәр ава кьн у теда бьминьн. У бьрʹщәкә ӧса ава кьн кӧ бьгьһижә әʹзмана. Ӧса әме бьбьнә навдар».

Әԝ йәк Йаһоԝа хԝәш нәһат, ләма жи әԝи сафи кьр хәбата ԝан бьдә сәкьнандьне. Ле тӧ зани Йаһоԝа ча ԝана да сәкьнандьне? Әԝи ньшкева ӧса кьр, ԝәки ԝана дәстпекьр сәр щурʹә-щурʹә зьмана хәбәр дьн. Сәва ԝе йәке, кӧ ԝана ида һәвдӧ фәʹм нәдькьрьн, ԝана авакьрьн да сәкьнандьне. Әԝ шәһәре кӧ ԝана дәстпекьр ава кьн, һатә навкьрьне Бабилон, чь кӧ те һʹәсабе «Ләвхьстьн». У мәрьв жь ԝи шәһәри чун, әԝана сәр тʹәмамийа әʹрде бәла бун, ле диса жи дәстпекьрьн кьред нәрʹаст бькьн. Гәло һәбун йед ӧса, кӧ Йаһоԝа һʹьз дькьрьн? Дәрһәԛа ԝе йәке, әме сәре дьнда пебьһʹәсьн.

Незики шәһәре Бабилоне шәһәрәки бь наве Ур һәбу, ԝи шәһәрида мәрьва щурʹә-щурʹә хӧдан дьһʹәбандьн, нә кӧ Йаһоԝа. Ле шәһәре Урда мәрьвәк һәбу, йе кӧ тʹәне Йаһоԝа дьһʹәбанд. Наве ԝи Бьраһим бу.

Йаһоԝа готә Бьраһим: «Мала хԝә у бьра-пьсмамед хԝә бьһелә, рʹабә һәрʹә ԝи әʹрди, кʹижан кӧ әзе нишани тә кьм». Паше Хԝәде соз да ԝи у гот: «Жь тә ԝе мьләтәки мәзьн пешда бе у бона хатьре тә әзе гәләк тьштед баш сәва мәрьвед сәр тʹәмамийа дьнйайе, бькьм».

Бьраһим ньзаньбу чьрʹа Йаһоԝа готә ԝи, ԝәки әԝ рʹабә һәрә, ле әԝи бь тʹәмами баԝәрийа хԝә Йаһоԝа дьани. Ләма жи Бьраһим, жьна ԝи Сәра, баве ԝи Тераһ у кӧрʹе бьре ԝи Лут гӧһ данә Хԝәде, һур-муре хԝә тʹоп кьрьн у рʹекʹәтьн.

Бьраһим 75 сали бу кʹәнге әԝ у малбәта ԝи чунә ԝи щийи, кʹидәре кӧ Йаһоԝа гот. Әԝ әʹрде Кәнане бу. Ԝедәре Хԝәде тʹәви Бьраһим хәбәр да у готә ԝи: «Әԝ әʹрде дор-бәре тә, йе кӧ тӧ дьбини, әзе бьдьмә зарʹед тә». Ле Бьраһим у Сәра әʹмьрда мәзьн бун у зарʹед ԝан тʹӧнә бун. Гәло Йаһоԝа чь кьр, сәва созе хԝә бинә сери?

Бьраһим у Сәра ида гәләк сал зәԝьщи бун. Әԝана мала хԝәйә бәдәԝ шәһәре Урда һиштьн у чадьрада дьжитьн. Сәва ԝе йәке Сәрайе нәдькьрә кӧтә-кӧт, чьмки әԝе баԝәрийа хԝә Йаһоԝа дьани.

Сәрайе гәләк дьхԝәст, ԝәки зарʹед ԝе һәбьн, ләма жи әԝе готә Бьраһим: «Һәрге щарийа мьн Һащәрерʹа зарʹ бьбә, демәк әԝ ԝе чаԝа зарʹа мьн бә». Ԝәʹдә дәрбаз бу у Һащәрерʹа зарʹ бу. Наве ԝи данин Исмайил.

Чәнд сал шунда, чахе Бьраһим 99 сали бу, ле Сәра 89 сали бу, се мер һатьнә мала ԝан. Бьраһим ԝана тʹәглифи мала хԝә кьр, ԝәки бьне бахда рʹунен у һеса бьн, әԝи дәстпекьр сьфре ԝанарʹа рʹаст кә. Тӧ зани әԝ се мер кʹе бун? Әԝ мәләк бун! Ԝана готә Бьраһим: «Саләкә дьн ԝан чаха, кӧрʹәк ԝе тʹәра бьбә». Сәра һьндӧре конда сәкьни бу у хәбәред ԝан дьбьһист. Әԝ бәр хԝәда кʹәнийа у гот: «Гәло рʹасти әзе ԝи әʹмьре хԝәйи мәзьнда зарʹ биньм? Нә әз ида пир бумә!»

Саләкә дьн Сәрайерʹа кӧрʹ бу, чаԝа кӧ Йаһоԝа пьшти мәләке хԝә соз дабу. Бьраһим ԝи нав кьр Исһаԛ, чь кӧ те һʹәсабе «Кʹән».

Гава Исһаԛ пенщ сали бу, Сәрайе дит, ԝәки Исмайил ԛәрфе хԝә Исһаԛ дькә. Сәрайе хԝәст кӧрʹе хԝә жь ԝи хԝәй кә, ләма жи чу бал Бьраһим у готә ԝи, ԝәки әԝ Һащәре у кӧрʹе ԝе Исмайил жь мал дәрхә. Сәрида Бьраһим нәдьхԝәст ӧса бькә. Ле Йаһоԝа готә Бьраһим: «Гӧһ бьдә Сәрайе. Әзе бона Исмайил хәм бькьм. Ле әԝ созе кӧ мьн дайә тә ԝе сәр Исһаԛ бе сери».

Лут тʹәви апе хԝә Бьраһим, сәр әʹрде Кәнане дьжит. Ахьрийеда пʹәз-дәԝаред Бьраһим у Лут ӧса зедә бун, ԝәки щи тʹера ԝан нәдькьр. Бьраһим готә Лут: «Щийе мә тʹәнг буйә у тʹера мә накә. Жь кʹәрәма хԝә хԝәрʹа дәштәке бьжберә, кʹи алида тʹӧ дьхԝази, һәрʹә, ле әзе жи алийе дьнда һәрʹьм». Чаԝа те кʹьфше ԝе йәкеда Бьраһим кʹара хԝә нәдьгәрʹийа!

Лут дина хԝә дайе у незики шәһәре Содоме әʹрдәки бәдәԝ дит, кʹидәреда кани дькʹьшийан у тʹьжә шинкайи һәбу. Әԝи нәфәре хԝә һьлда у дәрбази ԝедәре бу.

Щьмәʹта Содоме у шәһәре незики ԝи Гоморайе, гәләк хьраб бун. Мәрьвед ԝан шәһәра ӧса хьраб бун, ԝәки Йaһоԝа сафи кьр ԛьрʹа ԝан бинә. Ле Хԝәде дьхԝәст Лут у малбәта ԝи хьлаз кә, ләма жи әԝи дӧ мәләк шанд, ԝәки бежьнә ԝи: «Зу бькә! Рʹабә жь ԝи шәһәри дәре! Йaһоԝа дьхԝазә ԛьрʹа ԝан шәһәра бинә».

Лут ләз нәкʹәт, ԝәки перʹа-перʹа жь шәһәр дәре. Ләма жи мәләк дәсте Лут, жьна ԝи у дӧ ԛизед ԝи гьртьн у ләзә-ләз жь шәһәр дәрхьстьн у готьнә ԝан: «Бьрʹәвьн! Хԝә хьлаз кьн у пәй хԝә нәньһерʹьн. Һәрге һун пәй хԝә бьньһерʹьн, һуне бьмьрьн!»

Чахе әԝана гьһиштьнә шәһәре Соһар, Йaһоԝа агьр у кʹьркʹут жь әʹзман баранд сәр Содом у Гоморайе. Әԝ дӧ шәһәр һатьнә кʹӧтакьрьне. Ле жьна Лут гӧрʹа Йaһоԝа нәкьр у зьвьрʹи, ԝе дәме әԝ бу стуна хԝе! Ле Лут у ԛизед ԝи һатьнә хԝәйкьрьне, чьмки гӧрʹа Йaһоԝа кьрьн. Рʹаст ә, кьред жьна Лут дьле малбәта ԝе ешанд, ле әԝана ша дьбун, ԝәки ԝана гӧрʹа Йaһоԝа кьр.

Бьраһим кӧрʹе хԝә Исһаԛ һин дькьр, ԝәки Йаһоԝа һʹьз бькә у баԝәрийа хԝә созед ԝи бинә. Ле кʹәнге Исһаԛ ԝәкә 25 сали бу, Йаһоԝа шьхӧләкә гәләк чәтьн да Бьраһим. Гәло әԝ чь шьхӧл бу?

Хԝәде готә Бьраһим: «Жь кʹәрәма хԝә, кӧрʹе хԝәйи тайе-тʹәне һьлдә бьвә сәр чʹийайе Морийайе, у ԝедәре кӧрʹе хԝә бькә ԛӧрбан». Бьраһим фәʹм нәдькьр чьрʹа Йаһоԝа готә ԝи ӧса бькә. Ле диса жи әԝи гӧрʹа Йаһоԝа кьр.

Рʹожа дьн сьбәһе зу, Бьраһим кӧрʹе хԝә Исһаԛ у дӧ хӧламед хԝә һьлда у чунә сәр чʹийайе Морийайе. Се рʹож шунда, әԝана гьһиштьнә ԝи чʹийайи. Бьраһим готә хӧламед хԝә, ԝәки әԝана һивийе бьн, һʹәта кӧ әԝ у Исһаԛ һәрʹьн у ԛӧрбане бьдьн. Бьраһим даред бона шәԝате да дәсте Исһаԛ, ле хԝәха кʹер һьлда. Исһаԛ баве хԝәрʹа гот: «Кʹане әԝ һʹәйԝан, кʹижани әм гәрәке ԛӧрбан кьн?» Бьраһим щаба ԝи да у гот: «Кӧрʹе мьн, Йаһоԝа ԝе хԝәха бона ԝе йәке хәм бькә».

Чахе әԝана гьһиштьнә ԝи чʹийайи, ԝана горигәһ һазьр кьр. Паше Бьраһим дәст-ньгед Исһаԛ гьреда у ԝи дани сәр горигәһе.

Гава Бьраһим кʹер һьлда, мәләке Хԝәде жь әʹзман гази ԝи кьр у гот: «Бьраһим! Зийане нәдә гәдә! Ньһа әз ида заньм, ԝәки тӧ баԝәрийа хԝә Хԝәде тини, чьмки тӧ һазьр буйи кӧрʹе хԝә бьки ԛӧрбан». Гава Бьраһим дина хԝә дайе, әԝи бәранәк дит, стьруйе кʹижани кʹәтьбу нава чʹьԛьлед бахе. Әԝи перʹа-перʹа дәст-ньге Исһаԛ вәкьр, у дәԝсе әԝ бәран ани кьрә ԛӧрбан.

Паши ԝе рʹоже, Йаһоԝа Бьраһим нав кьр ча досте хԝә. Ле тӧ зани чьрʹа? Чьмки Бьраһим ньзаньбу, чьрʹа Йаһоԝа әԝе йәке жь ԝи дәԝа дькә, ле йәкә Бьраһим гӧрʹа ԝи кьр.

Йаһоԝа диса дәрһәԛа созе хԝә готә Бьраһим: «Әзе тә кʹәрәм кьм, у зӧрʹәта тә зедә кьм». Әԝ йәк те һʹәсабе, ԝәки Йаһоԝа ԝе һʹәму мәрьвед баш кʹәрәм кә, чаԝа малбәта Бьраһим.

Чахе Исаԛ Рʹевека станд, әԝ 40 сали бу. Әԝи гәләк ле һʹьз дькьр. Паше дӧ кӧрʹед щеԝи ԝанарʹа һатьнә буйине.

Наве кӧрʹе пешьн данин Әсаԝ, ле йе дӧда Аԛуб. Әсаԝ һʹьз дькьр чоле бә у әԝ бу нечʹирванәки баш. Ле Аԛуб һʹьз дькьр малда бьминә.

Ԝан чаха әʹдәт бу, ԝәки паши мьрьна бав, ниве зәʹф жь һәбуна ԝи гәрәке бьгьһишта кӧрʹе ԝийи мәзьн. Демәк мал у мьлке ԝи. Ӧса жи созе Хԝәде дькʹәвә нава ԝе һәбуне, йе кӧ әԝи дабу Бьраһим. Ле Әсаԝ әԝ созе кӧ Хԝәде дабу Бьраһим, ԛимәт нәкьр, ле Аԛуб әԝ соз гәләк ԛимәт дькьр.

Щарәке Әсаԝ гәләк ԝәстийайи жь нечʹире вәгәрʹийа мал. Әԝи тʹәхмин кьр, ԝәки бинәкә хԝәш те, чьмки ԝе дәме Аԛуб хԝарьн чедькьр. Әсаԝ готә ԝи: «Әз бьрчина дьмьрьм! Ԝе шорба сор мьнрʹа дагьрә!» Аԛуб готе: «Әзе тәрʹа дагьрьм, ле пешийе соз бьдә мьн, ԝәки әзе, мал у мьлке баве мә бьстиньм, йа кӧ гәрәке бьбә пʹара тә». Әсаԝ гот: «Чи мьнрʹа нә, тӧ дькари һьлди. Әз бьрчи мә у дьхԝазьм бьхԝьм». Ча тӧ дьшьрмиш дьби, Әсаԝ тьштәки аԛьлайи кьр? На, әв йәк беаԛьлайи бу. Әсаԝ сәва һьнә хԝарьн, тьштәки гәлә ԛимәт ӧнда кьр.

Чахе Исһаԛ ида гәләк кал бу, ԝәʹдә гьһишт, ԝәки әԝ кӧрʹе хԝәйи мәзьн кʹәрәм кә. Ле Рʹевекайе али кӧрʹе хԝәйи бьчʹук кьр, у әԝи кʹәрәм станд. Чахе Әсаԝ сәва ве йәке пеһʹәсийа әԝ гәләк һерс кʹәт у хԝәст бьре хԝә бькӧжә. Исһаԛ у Рʹевекайе хԝәстьн Аԛуб жь ԛәзийе хԝәй кьн, ԝана готә ԝи: «Һәрʹә бал хале хԝә Лабан бьминә, һʹәта кӧ һерса Әсаԝ дайнә». Аԛуб гӧрʹа де-баве хԝә кьр у рʹәви чу, ԝәки әʹмьре хԝә хьлаз кә.