Лут тʹәви апе хԝә Бьраһим, сәр әʹрде Кәнане дьжит. Ахьрийеда пʹәз-дәԝаред Бьраһим у Лут ӧса зедә бун, ԝәки щи тʹера ԝан нәдькьр. Бьраһим готә Лут: «Щийе мә тʹәнг буйә у тʹера мә накә. Жь кʹәрәма хԝә хԝәрʹа дәштәке бьжберә, кʹи алида тʹӧ дьхԝази, һәрʹә, ле әзе жи алийе дьнда һәрʹьм». Чаԝа те кʹьфше ԝе йәкеда Бьраһим кʹара хԝә нәдьгәрʹийа!

Лут дина хԝә дайе у незики шәһәре Содоме әʹрдәки бәдәԝ дит, кʹидәреда кани дькʹьшийан у тʹьжә шинкайи һәбу. Әԝи нәфәре хԝә һьлда у дәрбази ԝедәре бу.

Щьмәʹта Содоме у шәһәре незики ԝи Гоморайе, гәләк хьраб бун. Мәрьвед ԝан шәһәра ӧса хьраб бун, ԝәки Йaһоԝа сафи кьр ԛьрʹа ԝан бинә. Ле Хԝәде дьхԝәст Лут у малбәта ԝи хьлаз кә, ләма жи әԝи дӧ мәләк шанд, ԝәки бежьнә ԝи: «Зу бькә! Рʹабә жь ԝи шәһәри дәре! Йaһоԝа дьхԝазә ԛьрʹа ԝан шәһәра бинә».

Лут ләз нәкʹәт, ԝәки перʹа-перʹа жь шәһәр дәре. Ләма жи мәләк дәсте Лут, жьна ԝи у дӧ ԛизед ԝи гьртьн у ләзә-ләз жь шәһәр дәрхьстьн у готьнә ԝан: «Бьрʹәвьн! Хԝә хьлаз кьн у пәй хԝә нәньһерʹьн. Һәрге һун пәй хԝә бьньһерʹьн, һуне бьмьрьн!»

Чахе әԝана гьһиштьнә шәһәре Соһар, Йaһоԝа агьр у кʹьркʹут жь әʹзман баранд сәр Содом у Гоморайе. Әԝ дӧ шәһәр һатьнә кʹӧтакьрьне. Ле жьна Лут гӧрʹа Йaһоԝа нәкьр у зьвьрʹи, ԝе дәме әԝ бу стуна хԝе! Ле Лут у ԛизед ԝи һатьнә хԝәйкьрьне, чьмки гӧрʹа Йaһоԝа кьрьн. Рʹаст ә, кьред жьна Лут дьле малбәта ԝе ешанд, ле әԝана ша дьбун, ԝәки ԝана гӧрʹа Йaһоԝа кьр.

Бьраһим кӧрʹе хԝә Исһаԛ һин дькьр, ԝәки Йаһоԝа һʹьз бькә у баԝәрийа хԝә созед ԝи бинә. Ле кʹәнге Исһаԛ ԝәкә 25 сали бу, Йаһоԝа шьхӧләкә гәләк чәтьн да Бьраһим. Гәло әԝ чь шьхӧл бу?

Хԝәде готә Бьраһим: «Жь кʹәрәма хԝә, кӧрʹе хԝәйи тайе-тʹәне һьлдә бьвә сәр чʹийайе Морийайе, у ԝедәре кӧрʹе хԝә бькә ԛӧрбан». Бьраһим фәʹм нәдькьр чьрʹа Йаһоԝа готә ԝи ӧса бькә. Ле диса жи әԝи гӧрʹа Йаһоԝа кьр.

Рʹожа дьн сьбәһе зу, Бьраһим кӧрʹе хԝә Исһаԛ у дӧ хӧламед хԝә һьлда у чунә сәр чʹийайе Морийайе. Се рʹож шунда, әԝана гьһиштьнә ԝи чʹийайи. Бьраһим готә хӧламед хԝә, ԝәки әԝана һивийе бьн, һʹәта кӧ әԝ у Исһаԛ һәрʹьн у ԛӧрбане бьдьн. Бьраһим даред бона шәԝате да дәсте Исһаԛ, ле хԝәха кʹер һьлда. Исһаԛ баве хԝәрʹа гот: «Кʹане әԝ һʹәйԝан, кʹижани әм гәрәке ԛӧрбан кьн?» Бьраһим щаба ԝи да у гот: «Кӧрʹе мьн, Йаһоԝа ԝе хԝәха бона ԝе йәке хәм бькә».

Чахе әԝана гьһиштьнә ԝи чʹийайи, ԝана горигәһ һазьр кьр. Паше Бьраһим дәст-ньгед Исһаԛ гьреда у ԝи дани сәр горигәһе.

Гава Бьраһим кʹер һьлда, мәләке Хԝәде жь әʹзман гази ԝи кьр у гот: «Бьраһим! Зийане нәдә гәдә! Ньһа әз ида заньм, ԝәки тӧ баԝәрийа хԝә Хԝәде тини, чьмки тӧ һазьр буйи кӧрʹе хԝә бьки ԛӧрбан». Гава Бьраһим дина хԝә дайе, әԝи бәранәк дит, стьруйе кʹижани кʹәтьбу нава чʹьԛьлед бахе. Әԝи перʹа-перʹа дәст-ньге Исһаԛ вәкьр, у дәԝсе әԝ бәран ани кьрә ԛӧрбан.

Паши ԝе рʹоже, Йаһоԝа Бьраһим нав кьр ча досте хԝә. Ле тӧ зани чьрʹа? Чьмки Бьраһим ньзаньбу, чьрʹа Йаһоԝа әԝе йәке жь ԝи дәԝа дькә, ле йәкә Бьраһим гӧрʹа ԝи кьр.

Йаһоԝа диса дәрһәԛа созе хԝә готә Бьраһим: «Әзе тә кʹәрәм кьм, у зӧрʹәта тә зедә кьм». Әԝ йәк те һʹәсабе, ԝәки Йаһоԝа ԝе һʹәму мәрьвед баш кʹәрәм кә, чаԝа малбәта Бьраһим.

Чахе Исаԛ Рʹевека станд, әԝ 40 сали бу. Әԝи гәләк ле һʹьз дькьр. Паше дӧ кӧрʹед щеԝи ԝанарʹа һатьнә буйине.

Наве кӧрʹе пешьн данин Әсаԝ, ле йе дӧда Аԛуб. Әсаԝ һʹьз дькьр чоле бә у әԝ бу нечʹирванәки баш. Ле Аԛуб һʹьз дькьр малда бьминә.

Ԝан чаха әʹдәт бу, ԝәки паши мьрьна бав, ниве зәʹф жь һәбуна ԝи гәрәке бьгьһишта кӧрʹе ԝийи мәзьн. Демәк мал у мьлке ԝи. Ӧса жи созе Хԝәде дькʹәвә нава ԝе һәбуне, йе кӧ әԝи дабу Бьраһим. Ле Әсаԝ әԝ созе кӧ Хԝәде дабу Бьраһим, ԛимәт нәкьр, ле Аԛуб әԝ соз гәләк ԛимәт дькьр.

Щарәке Әсаԝ гәләк ԝәстийайи жь нечʹире вәгәрʹийа мал. Әԝи тʹәхмин кьр, ԝәки бинәкә хԝәш те, чьмки ԝе дәме Аԛуб хԝарьн чедькьр. Әсаԝ готә ԝи: «Әз бьрчина дьмьрьм! Ԝе шорба сор мьнрʹа дагьрә!» Аԛуб готе: «Әзе тәрʹа дагьрьм, ле пешийе соз бьдә мьн, ԝәки әзе, мал у мьлке баве мә бьстиньм, йа кӧ гәрәке бьбә пʹара тә». Әсаԝ гот: «Чи мьнрʹа нә, тӧ дькари һьлди. Әз бьрчи мә у дьхԝазьм бьхԝьм». Ча тӧ дьшьрмиш дьби, Әсаԝ тьштәки аԛьлайи кьр? На, әв йәк беаԛьлайи бу. Әсаԝ сәва һьнә хԝарьн, тьштәки гәлә ԛимәт ӧнда кьр.

Чахе Исһаԛ ида гәләк кал бу, ԝәʹдә гьһишт, ԝәки әԝ кӧрʹе хԝәйи мәзьн кʹәрәм кә. Ле Рʹевекайе али кӧрʹе хԝәйи бьчʹук кьр, у әԝи кʹәрәм станд. Чахе Әсаԝ сәва ве йәке пеһʹәсийа әԝ гәләк һерс кʹәт у хԝәст бьре хԝә бькӧжә. Исһаԛ у Рʹевекайе хԝәстьн Аԛуб жь ԛәзийе хԝәй кьн, ԝана готә ԝи: «Һәрʹә бал хале хԝә Лабан бьминә, һʹәта кӧ һерса Әсаԝ дайнә». Аԛуб гӧрʹа де-баве хԝә кьр у рʹәви чу, ԝәки әʹмьре хԝә хьлаз кә.

Йаһоԝа соз да Аԛуб, ԝәки ԝе ԝи хԝәй кә чаԝа Бьраһим у Исһаԛ хԝәй дькьр. Аԛуб шәһәре Һаранеда щи-ԝар бу у ԝедәре зәԝьщи. Әԝ бу хԝәйе малбәтәкә мәзьн у йәки дәԝләти бу.

Паше Йаһоԝа готә Аԛуб: «Вәгәрʹә сәр әʹрде хԝә». У Аԛуб тʹәви малбәта хԝә рʹекʹәт. Рʹева чәнд мәрьв незики Аԛуб бун у готьнә ԝи: «Бьре тә Әсаԝ бәрбь тә те, у 400 мер тʹәви ԝи тен!» Аԛуб тьрсийа, ԝәки Әсаԝ зийане нәдә ԝи у нәфәред ԝи. Әԝи Йаһоԝарʹа дӧа кьр: «Лава дькьм мьн жь бьре мьн хԝәй кә». Рʹожа дьн, Аԛуб бьре хԝәй Әсаԝрʹа гәләк бәрх, бьзьн, чʹеләк, дәԝә у кʹәр, чаԝа пʹешкеш шанд.

Ԝе шәве чахе Аԛуб тʹәне бу, әԝи мәләк дит! Мәләк кʹәтә гӧлаше тʹәви ԝи, һʹәта кӧ сьбәһ сафи бу. Рʹаст ә Аԛуб зийан станд, ле диса жи тʹәрка ԝи нәда. Мәләк готә Аԛуб: «Мьн бәрдә әз һәрʹьм». Ле Аԛуб готә ԝи: «На, һʹәта кӧ тӧ мьн кʹәрәм нәки, әз тә бәрнадьм».

Ахьрийе, мәләк Аԛуб кʹәрәм кьр. У һьнге Аԛуб фәʹм кьр, ԝәки Йаһоԝа ԝе изьне нәдә Әсаԝ зийане бьдә ԝи.

Сьбәһе зу, Аԛуб дина хԝә дайе у дурва дит ча Әсаԝ тʹәви 400 мера бәрбь ԝи те. Аԛуб пешийа малбәта хԝә бәрбь Әсаԝ чу у һʹәфт щара сәре хԝә бәр ԝи дахьст. Ле Әсаԝ бәрбь бьре хԝә рʹәви у хԝә авитә пʹесира ԝи. Һәр дӧ кʹәлә-кʹәл гьрийан, ӧса ԝана әʹдьлайи хԝәй кьрьн. Ча тӧ дьшьрмиш дьби, Йаһоԝа чь тʹәхмин кьр, гава Аԛуб ԝе дәрәщеда хԝә рʹаст да кʹьфше?

Паши ԝе йәке Әсаԝ хԝәст вәгәрʹә мала хԝә, ле Аԛуб рʹийа хԝә бәрдәԝам кьр. Аԛуб бу баве 12 кӧрʹа. Наве кӧрʹед ԝи ӧса бун; Рʹубен, Шьмһʹун, Леԝи, Чьһуда, Дан, Нәфтәли, Гад, Ашер, Исахар, Зәбулон, Усьв у Бьнйамин. Йаһоԝа бь дәсте кӧрʹәки ԝи, демәк Усьв, щьмәʹта хԝә хьлаз кьр. Зани чь щурʹәйи? Ԝәрен әм пебьһʹәсьн.

Усьв йәк жь кӧрʹед Аԛуб бу. Бьред ԝийи мәзьн дьдитьн, ԝәки Аԛуб жь ԝана гьшка зәʹфтьр Усьв һʹьз дькә. Ча тӧ дьшьрмиш дьби, ԝана чь сәр хԝә тʹәхмин дькьр? Ԝана дәхәси дькьр у ԝи нәфрʹәт дькьрьн. Щарәке Усьв чәнд хәԝн дит у дәрһәԛа ԝан хәԝна бьред хԝәрʹа гьли кьр. Жь хәбәрдана ԝи ԝана тедәрхьстьн, ԝәки ԝәʹдәки ӧса ԝе бе, кӧ әԝана гәрәке сәре хԝә бәр ԝи дахьн. Гава ԝана әԝ йәк бьһист, дәстпекьрьн һе зедә ԝи нәфрʹәт кьн!

Рʹожәке незики шәһәре Шәкәме, бьред Усьв пәзед хԝә дьчʹерандьн. Аԛуб, Усьв шанд, ԝәки пебьһʹәсә һәла әԝана чаньн. Ԝана дина хԝә дайе, ԝәки Усьв бәрбь ԝан те у һәвдӧрʹа готьн: «Һәла дина хԝә бьдьне, хԝәйе хәԝна те, ԝәрә әм ԝи бькӧжьн!» Ԝана ԝи гьртьн у авитьнә чʹәʹле. Ле бьраки ԝан, Щьһуда, готә ԝан: «Ԝи нәкӧжьн, ԝәрен әм ԝи чаԝа дил бьфьрошьн!» У ԝана Усьв сәр 20 зиви фьротьнә базьргане Мьдйани, йед кӧ дьчунә Мьсьре.

Паше бьред Усьв кʹьнще ԝи һьлдан, хуна бьзьне лехьстьн, нишани баве хԝә кьрьн у готьнә ԝи: «Әва кʹьнще кӧрʹе тә нинә?» Аԛуб фькьри, ԝәки тәрәԝьла Усьв хԝарьнә. У жь дәрде щәгәре, еша гьран кʹәтә дьле ԝи. Тӧ кәси нькарьбу еша ԝи сьвьк кьра.

Мьсьреда, Усьв чаԝа дил фьротьнә Потифаре нав у дәнг. Ле Йаһоԝа тʹәви Усьв бу. Потифар тедәрхьст, ԝәки Усьв хәбатчики баш ә у мәрьв дькарә итʹбарийа хԝә ԝи бинә. Ԝәʹдә шунда Потифар, Усьв сәр һʹәму һәбуна хԝәрʹа кʹьфш кьр.

Жьна Потифар дит, ԝәки Усьв хортәки бәдәԝ у ԛәԝат ә. Һәр рʹож әԝе дьготә Усьв, ԝәки әԝ сәре хԝә перʹа дайнә. Гәло Усьв чь кьр? Әԝи инкʹар кьр у гот: «На! Әԝ йәк нәрʹасти йә. Хԝәйе мьн итʹбарийа хԝә мьн тинә у тӧ жьна ԝийи. Һәрге әз сәре хԝә тʹәра дайньм, әзе бәр Хԝәде гӧнәки мәзьн бькьм!»

Рʹожәке жьна Потифар дәст авитә Усьв у хԝәст зоре ԝи бькә, ԝәки әԝ сәре хԝә перʹа дайнә. Әԝе дәст авитә кʹьнще ԝи, ле Усьв жь ԝе рʹәви. Гава Потифар вәгәрʹийа мал, жьна ԝи гот, ԝәки Усьв дьхԝәст дәст бавежә ԝе. Әԝе шәрʹ авитә ԝи. Потифар гәләк һерс кʹәт, ләма жи Усьв авитә кәле. Ле Йаһоԝа Усьв бир нәкьр.

Гава Усьв кәледа бу, Фьрәԝьн хәԝн дит, шьровәкьрьна кʹижани тʹӧ кәси ньзаньбу. Хӧламе Фьрәԝьн готә ԝи, ԝәки Усьв дькарә хәԝнед ԝи шьровәкә. Фьрәԝьн перʹа-перʹа шандә пәй Усьв.

Фьрәԝьн жь ԝи пьрси: «Тӧ дькари хәԝнед мьн шьровәки?» Усьв щаба ԝи да у гот: «Мьсьреда һʹәфт сала хԝарьн ԝе тʹер-тʹьжә бә, ле паше, һʹәфт салед дьн ԝе бьрчибун дәстпебә. Мәрьвәки билан кʹьфш кә, ԝәки ԝан һʹәфт сала хԝарьне тʹоп кә, сәва щьмәʹта тә бьрʹчи нәминә». Фьрәԝьн готә ԝи: «Әз тә дьжберьм! Тӧйе бьби мәрьве дӧда Мьсьреда!» Ча тӧ дьшьрмиш дьби, Усьв жь кʹӧ заньбу шьровәкьрьна хәԝнед Фьрәԝьн? Йаһоԝа али ԝи кьр.

Нава ԝан һʹәфт салада, Усьв дәстпекьр гәләк хԝарьн тʹоп кә. Паши ԝе йәке, сәр әʹрде бьрчибун дәстпебу, чаԝа кӧ Усьв пешда готьбу. Мәрьвед жь һәр ԝәлати дәстпекьрьн бенә бал Усьв, ԝәки хԝарьне бькʹьрьн. Гава баве ԝи Аԛуб пеһʹәсийа, ԝәки Мьсьреда хԝарьн һәйә, әԝи дәһ кӧрʹед хԝә шандә ԝедәре, ԝәки хԝарьне бькʹьрьн.

Кӧрʹед Аԛуб һатьнә бал Усьв, у әԝи дәрберʹа ԝана нас кьр. Ле бьред ԝи ньзаньбун, ԝәки әԝ Усьв ә. Әԝана сәре хԝә бәр ԝи дахьстьн, чаԝа кӧ әԝи пешда хәԝнеда дитьбу. Усьв дьхԝәст пебьһʹәсә, һәла бьред ԝи диса ӧса зӧлм ьн. Ләма жи әԝи готә ԝан: «Һун щәсус ьн. Һун һатьнә вьра, ԝәки пебьһʹәсьн һәла чьда ԝәлате мә сьст ә». Ле ԝана гот: «На! Әм 12 бьранә, жь ԝәлате Кәнане. Бьраки мә мьрийә, ле йе бьчʹук тʹәви баве мә майә». Паше Усьв готә ԝан: «Дә һәрʹьн у бьред хԝәйә бьчʹук биньн бал мьн, ԝәки әз ԝә баԝәр кьм». Паши ԝе йәке, әԝана вәгәрʹийанә щәм баве хԝә.

Һьнәк ԝәʹдә шунда хԝарьна ԝан хьлаз бу. Аԛуб диса кӧрʹед хԝә шанд ә Мьсьре. Ԝе щаре, ԝана бьре хԝәйи бьчʹук Бьнйамин жи тʹәви хԝә бьрьн. Усьв, сәва кӧ бьред хԝә бьщерʹьбинә, кʹаса хԝәйә зив кьрә тʹорбе Бьнйамин у шәрʹ авитә ԝан, ԝәки ԝана дьзийа ԝи кьрийә. Гава хӧламед Усьв кʹаса ԝи тʹорбе Бьнйаминда дитьн, бьред ԝи гәләк тьрсийан. Ԝана лавайа Усьв кьрьн, ԝәки дәԝса Бьнйамин ԝана щәза кә.

Усьв тедәрхьст, ԝәки бьред ԝи һатьнә гӧһастьне. Кʹәла Усьв тʹьжә бу у әԝи нькарьбу хԝә бьгьрта. Әԝ кʹәлә-кʹәл гьрийа у гот: «Әз Усьв ьм, бьре ԝә мә. Баве мьн һе сах ә?» Бьред ԝи гәләк әʹщебмайи ман. Усьв готә ԝан: «Хәмгин нәбьн бона ԝе йәке, кӧ ԝә чь сәре мьн кьр. Хԝәде мьн шандә вьра, ԝәки әʹмьре ԝә хԝәй кә. Ньһа ләз кʹәвьн һәрʹьн у баве мьн биньнә вьра».

Әԝана вәгәрʹийанә мал у мьзгинийа баш гиһандьнә баве хԝә, ԝи һьлдан у пашда вәгәрʹийанә Мьсьре. Паши һаԛас сал, Усьв у Аԛуб диса һәв дитьн.

Шәһәре Утседа мәрьвәк дьма, йе кӧ Йаһоԝарʹа хьзмәт дькьр. Наве ԝи Ибо бу. Малбәта ԝи гәләк мәзьн бу у әԝ йәки дәԝләти бу. Әԝ мәрьвәки мәрʹд бу у али кʹәсиба, жьнәбийа, у етʹима дькьр. Ле әԝ йәк кӧ Ибо тʹьме ԛәнщи дькьр, гәло дьһатә һʹәсабе, ԝәки әԝе тʹӧ щар рʹасти тәнгасийа нәһата?

Ибо һаш пе тʹӧнә бу, ԝәки Шәйтʹан Мире-щьна тʹьме дина хԝә дьдә ԝи. Йаһоԝа, Шәйтʹан пьрси: «Тә дина хԝә дайә хьзмәткʹаре мьн Ибо? Тʹӧ кәс мина ԝи сәр әʹрде тʹӧнә. Әԝ гӧрʹа мьнда нә у һәртʹьм тьштед рʹаст дькә». Ле Шәйтʹан гот: «Һәмьки Ибо ԝе гӧрʹа тәда бә. Чьмки тӧ ԝи хԝәй дьки у кʹәрәм дьки. Тә әʹрд у беһʹәсаб һʹәйԝан дайә ԝи. Ле һәрге тӧ һәр тьшти жь ԝи бьстини, әԝе ида тәрʹа хьзмәт нәкә». Йаһоԝа готә ԝи: «Әз изьне дьдьм тә, ԝәки Ибо бьщерʹьбини. Тʹәне әʹмьре ԝи, жь ԝи нәстинә». Чьрʹа Йаһоԝа изьн да Шәйтʹан, ԝәки Ибо бьщерʹьбинә? Чьмки Әԝ баԝәр бу, ԝәки Ибо ԝе ԝирʹа амьн бьминә.

Шәйтʹан дәстпекьр Ибо бьщерʹьбинә у гәләк ԛәзи ани сәре ԝи. Әԝи щьмәʹта Шәбайи шанд, ԝәки әԝана дәԝар у кʹәред ԝи бьдьзьн. Паше жь бо агьр һʹәму пәзед ԝи ԛьр бун. Щьмәʹта Кьлданийан жи дәԝәйед ԝи дьзин у мәрьве, кӧ дәԝа дьбунә хԝәйи, кӧштьн. Паше ԛәзикә лапә гьран ԛәԝьми. Әԝ мал кʹижанида зарʹед Ибо тʹоп бьбун, сәр ԝанда һьлшийа. Ибо дәрде гьран дит, ле йәкә тʹәрк нәда Йаһоԝарʹа хьзмәт кә.

Шәйтʹан дьхԝәст, ԝәки Ибо һе зедә бьчәрчьрә, ләма жи әԝи бәдәна ԝи бь тʹәмами кʹоти кьр. Бәдәна Ибо гәләк дешийа. Әԝи ньзаньбу чьрʹа һаԛас тьшт те сәре ԝи, ле диса жи бәрдәԝам дькьр Йаһоԝарʹа хьзмәт кә у амьн бьминә. Йаһоԝа әԝ йәк дьдит у амьнийа Ибо ԛимәт дькьр.

Шәйтʹан се мер шанд, ԝәки Ибо бьщерʹьбиньн. Ԝана готә Ибо: «Те кʹьфше тә гӧнә кьрийә у дьхԝази әԝе йәке вәшери. Ләма жи Хԝәде тә щәза дькә». Ибо готә ԝан: «Мьн тьштәки хьраб нәкьрийә». Паше Ибо фькьри, ԝәки Хԝәде йә мәʹнийа кӧл-дәрʹдед ԝи у гот, ԝәки Хԝәде нәһәԛийе ԝи дькә.

Хортәки щаһьл бь наве Әлиһу гӧһ дьда хәбәрдана ԝан. Паше әԝи дәстпекьр хәбәр дә у гот: «Һʹәму хәбәрдана ԝә нәрʹаст ә. Йаһоԝа Хԝәде гәләк зор ә у әм әԝе йәке нькарьн бь тʹәмами бьдьнә бәр чʹәʹве хԝә. Әԝ тʹӧ щар тьштед хьраб накә. Әԝ һәр тьшт дьбинә у али мәрьва дькә, гава әԝана дькʹәвьнә тәнгасийа».

Паше Йаһоԝа тʹәви Ибо хәбәр да у гот: «Тӧ кʹидәре буйи гава мьн әʹрд у әʹзман чедькьр? Тӧ чьрʹа дьбежи, ԝәки әз нәһʹәԛийе тә дькьм? Тӧ хәбәр дьди, ле ньзани чьрʹа әԝ һәр тьшт дьԛәԝьмьн». Ибо шашийа хԝә фәʹм кьр у гот: «Әз нәрʹаст бум. Мьн дәрһәԛа тә бьһистьбу, ле ньһа әз бь рʹасти тә нас дькьм. Тӧ һәр тьшти дькари бьки. Бьбахшинә сәва готьнед мьнә нәрʹаст».

Гава щерʹьбандьнед Ибо хьлаз бун, Йаһоԝа ԝи ԛәнщ кьр у һе зедә ԝи хәлат кьр. Ибо дьреж у бәхтәԝар әʹмьр кьр. Йаһоԝа Ибо кʹәрәм кьр, чьмки әԝ һәла һе ԝәʹде чәтьнда жи гӧрʹа ԝида ма. Ле тӧ һазьр и чаԝа Ибо һәр дәрәщада Йаһоԝарʹа хьзмәт ки?

Мьсьреда малбәта Аԛуб ча Исраели нас дькьрьн. Паши мьрьна Аԛуб у Усьв, Мьсьреда Фьрәԝьнәки дьн дәстпекьр сәрԝертийе бькә. Гава әԝи дит, ԝәки Исраели жь Мьсьрийа зедәтьр у ԛәԝаттьр ьн, әԝ тьрсийа. Ләма жи әԝи сафи кьр Исраелийа бькә диле хԝә. Әԝи зоре ԝана дькьр кʹәлпичʹа чекьн у чоле бьхәбьтьн. Рʹаст ә, Мьсьрийа зоре Исраелийа дькьрьн хәбата гьран бькьн, ле диса жи әԝана һәв зедә дьбун. Әԝ йәк Фьрәԝьн хԝәш нәдьһат у әԝи фәрман да, ԝәки һʹәму кӧрʹед ԝанә тʹәзәбуйи бькӧжьн. Бьдә бәр чʹәʹве хԝә, ԝәки Исраели чьԛас тьрсийан гава әԝ йәк бьһистьн?

Жьнәкә Исраелирʹа бь наве Йокʹәбәд, кӧрʹәки бәдәԝ һатә буйине. Әԝе хԝәст зарʹа хԝә жь ԛәзийе хԝәй кә, әԝе кӧрʹе хԝә кьрә сәвәте у нава ԛамуше Чʹәме Нилда вәшарт. Ԝи чахи хушка ԝи Мәрйәм дина хԝә дьдайе, һәла чь ԝе сәре бьре ԝе бьԛәԝьмә.

Һьнәк ԝәхт шунда ԛиза Фьрәԝьн һат, ԝәки Чʹәме Нилда хԝә аве хә у сәвәт сәр аве дит. Гава әԝе сәвәт вәкьр, кӧрʹәки бьчʹук теда дит, кʹижан кӧ дьгьрийа у әԝе гӧне хԝә ԝи ани. Һьнге Мәрйәме гот: «Дьхԝазьн әз гази кʹӧлфәтәке кьм, ԝәки әԝ зарʹе ԝәрʹа мәзьн кә?» Гава ԛиза Фьрәԝьн ԛайил бу, Мәрйәм чу пәй дийа хԝә. Ԛиза Фьрәԝьн готә ԝе: «Әԝе зарʹе һьлдә у бона мьн мәзьн кә у әзе һәԛе тә бьдьмә тә».

Гава зарʹ һьнә мәзьн бу, Йокʹәбәд ԝи ани бал ԛиза Фьрәԝьн. Ԛиза Фьрәԝьн наве ԝи дани Муса у чаԝа кӧрʹе хԝә мәзьн кьр. Муса һатә мәзьнкьрьне ча кӧрʹе Фьрәԝьн у һәр тьшт чь кӧ дьхԝәст дькарьбу бькьра. Ле әԝи тʹӧ щар Йаһоԝа бир нәдькьр. Чьмки заньбу, ԝәки әԝ Исраели йә, нә кӧ Мьсьри йә. Ләма жи әԝи сафи кьр Йаһоԝарʹа хьзмәт кә.

Кʹәнге Муса 40 сали бу, әԝи сафи кьр али щьмәʹта хԝә бькә. Гава Муса дит ча мерәки Мьсьри диле Исраели дькʹӧтә, әԝи ӧса сәрт Мьсьри хьст кӧ әԝ мьр. Паше Муса щьнйазе ԝи нава ԛумеда вәшарт. Гава Фьрәԝьн дәрһәԛа ԝе йәке пеһʹәсийа әԝи хԝәст Муса бькʹӧжә. Ле Муса рʹәви чу ԝәлате Мьдйайе. Ԝедәре Йаһоԝа бона ԝи хәм дькьр.

Муса 40 сала Мьдйайеда ма. Әԝ зәԝьщи у зарʹ ԝирʹа һатьнә буйине. Рʹожәке, Муса незики Чʹийайе Синайе пәз дьчʹеранд у тьштәки әʹщеб дит. Әԝи дит, ԝәки агьр тʹум кʹәтийә, ле тʹум нашәԝьтә! Чахе Муса незик бу, ԝәки бьньһерʹә һәла чьрʹа әԝ тʹум нашәԝьтә, жь тʹум дәнгәк һат: «Муса! Гәләк незики вьр нәбә. Чарьхед хԝә бехә, чьмки тӧ сәр әʹрде пироз сәкьнийи». Йаһоԝа бь сайа мәләк тʹәви ԝи хәбәр дьда.

Муса тьрсийа у сәр чʹәʹве хԝә дада. Йаһоԝа гот: «Мьн дит чаԝа Исраели дьчәрчьрьн. Әзе ԝана жь дәсте Мьсьрийа хьлаз кьм у бьвьмә әʹрдәки баш. Тӧйе щьмәʹта мьн жь Мьсьре дәрхи». Бьдә бәр чʹәʹве хԝә, Муса чьԛас әʹщебмайи ма гава әв йәк бьһист!

Муса пьрси у гот: «Ле һәрге щьмәʹт пьрс кә, кʹе тә шандийә, әз чь бежьмә ԝан?» Хԝәде готе: «Ԝанарʹа бежә, ԝәки Йаһоԝа, Хԝәдайе Бьраһим, Хԝәдайе Исһаԛ у Хԝәдайе Аԛуб тә шандийә». Ԝи чахи Муса гот: «Ле һәрге әԝана гӧһ нәдьнә мьн?» Йаһоԝа Мусарʹа да кʹьфше, ԝәки ԝе али ԝи бькә. Хԝәде готә ԝи, ԝәки шьвдара хԝә бавежә әʹрде. Муса шьвдар авит у әԝ бу мәʹр! Чахе Муса почʹа ԝи гьрт, әԝ диса бу шьвдар. Йаһоԝа готе: «Чахе тӧ ԝи кʹәрәмәти нишани ԝан ки, әԝана ԝе баԝәр кьн, ԝәки мьн тә шандийә».

Муса гот: «Ле әз нькарьм зәлал хәбәр дьм». Ԝи чахи Йаһоԝа соз да ԝи: «Әзе тә һин кьм чь бежи у бьре тә Һарун тʹәви тә бьшиньм, ԝәки али тә бькә». Чахе Муса дит, ԝәки Йаһоԝа тʹәви ԝи йә, әԝи жьн-зарʹе хԝә һьлда у вәгәрʹийа Мьсьре.

Исраели пе хәбата гьран дьчәрчьрандьн у чаԝа дил дьданә хәбате. Йаһоԝа Муса у Һарун шандә бал Фьрәԝьн, ԝәки бежьнә ԝи: «Щьмәʹта мьн бәрдә, ԝәки бәрʹийеда мьнрʹа хьзмәт кьн». Ле Фьрәԝьне кʹӧбар-бабах гот: «Мьнрʹа йәкә Йаһоԝа чь дьбежә, әз Исраелийа бәрнадьм». Паши ԝе йәке Фьрәԝьн зоре Исраелийа кьр, ԝәки һе зедә бьхәбьтьн. Ԝи чахи Йаһоԝа Фьрәԝьн щәза кьр. Зани чь щурʹәйи? Әԝи дәһ бәла ани сәре Мьсьрийа. Йаһоԝа готә Муса: «Фьрәԝьн гӧрʹа мьн накә. Сьбәһе зу әԝе бәр дәве Чʹәме Нил бә. Һәрʹә щәм ԝи у беже, сәва ԝе йәке кӧ тӧ щьмәʹта Исраел бәрнади, Чʹәме Нил ԝе педа бьбә хун». Муса гӧрʹа Хԝәде кьр у чу щәм Фьрәԝьн. Фьрәԝьн дит, ԝәки Һарун пе шьвдара хԝә Чʹәме Нил хьст у чʹәм бу хун. Бина гәни жь чʹәм дьһат, мәʹсийе теда мьрьн у тӧ кәси нькарьбу ава Чʹәме Нил вәхԝә. Ле диса жи, Фьрәԝьн Исараели бәрнәдан.

Паши һʹәфт рʹожа, Йаһоԝа диса Муса шандә бал Фьрәԝьн, ԝәки беже: «Һәрге тӧ щьмәʹта мьн бәрнәди, Мьсьреда ԝе тʹьжә бәԛ бьн». Һарун шьвдара хԝә бьльнд кьр у ԝәлат тʹьжә бәԛ бун. Әԝана дькʹәтьнә малед мәрийа, нав щи-ньвин у дәрданед ԝан. Һәʹму щийа бәԛ бун. Фьрәԝьн гази Муса кьр у готе, ԝәки әԝ лавайа Йаһоԝа бькә, кӧ ве бәлайе бьдә сәкьнандьне у соз да, ԝәки ԝе Исраелийа бәрдә. Йаһоԝа әԝ бәла да сәкьнандьне, у Мьсьрийа дәстпекьрьн ԝан бәԛед мьри тʹопи сәр һәв кьн. Тʹәмамийа ԝәлатда бина гәни дьһат. Ле ве щаре жи, Фьрәԝьн щьмәʹт бәрнәда.

Ижар Йаһоԝа готә Муса: «Һарун гәрәке шьвдара хԝә тʹоза әʹрде хә у әԝе бьбә вьзьк, демәк мешед бьчʹук». У тʹәмамийа ԝәлате Мьсьреда тʹьжә вьзьк бун. Щьмәʹта Фьрәԝьн готә ԝи: «Әԝ бәла жь Хԝәде йә». Ле ԝе щаре жи Фьрәԝьн изьн нәда, ԝәки Исраели һәрʹьн.

Муса у Һарун чунә бал Фьрәԝьн, ԝәки әʹламәтийа Хԝәде дәрбази ԝи кьн: «Һәрге тӧ щьмәʹта мьн бәрʹнәди, әзе мешед мәзьн бьшиньм сәр ԝәлате тә. Мешед мәзьн дькʹәтьнә һʹәму малед Мьсьрийа, ча малед кʹәсиба ӧса жи йед дәԝләтийа. Тʹәмамийа ԝәлат тʹьжә мешед мәзьн бун. Ле әʹрде Гошәнеда, кʹидәре Исраели дьман, мешед мәзьн тʹӧнә бун. Дәстпебуйи жь бәла чарʹа зийан дьгьһиштә тʹәне Мьсьрийа. Фьрәԝьн бәр Муса у Һарун лава кьр: «Йаһоԝарʹа бежьн бьра мә жь ԝан мешед мәзьн хьлаз кә. У әзе щьмәʹта ԝи бәрʹдьм». Ле гава Йаһоԝа мешед мәзьн кʹӧта кьр, Фьрәԝьн пʹошман бу. Гәло әԝ йәк бона Фьрәԝьн бу дәрс?

Йаһоԝа гот: «Һәрге Фьрәԝьн щьмәʹта мьн бәрʹнәдә, һʹәйԝанед Мьсьрийа ԝе нәхԝәш кʹәвьн у һʹьшк бьн». Рʹожа дьн һʹәйԝанед ԝан йәк пәй йәке һʹьшк дьбун. Ле һʹәйԝанед Исраелийа һʹьшк нәдьбун. Диса жи Фьрәԝьн сәр йа хԝә сәкьни, у фькьред хԝә нәгӧһаст.

Паше Йаһоԝа готә Муса, ԝәки әԝ диса һәрʹә бал Фьрәԝьн у кʹозийе бәрбь әʹзман бьрәшинә. Һәԝа Мьсьреда хьраб бу, чьмки кʹози, тʹәмамийа әʹрде гьрт. Жь бо ԝе йәке, щьмәʹта Мьсьрийа у һʹәйԝанед ԝан, гьран нәхԝәш кʹәтьн, чьмки бәдәна ԝан дәстпебу кʹоти бә. Паши ԝан һʹәму тьшта Фьрәԝьн диса жи изьн нәда, ԝәки Исраели һәрʹьн.

Йаһоԝа диса Муса шандә бал Фьрәԝьн, сәва кӧ дәрһәԛа готьнед ԝи бежә: «Тӧ һʹәта ньһа щьмәʹта мьн бәрʹнади? Сьбеһ тәйрок ԝе бьбарә». Рʹожа дьн Йаһоԝа тәйрок, бьруск у агьр шандә сәр әʹрде. Тьштәки ӧса пешда Мьсьреда тʹӧ щар нәԛәԝьми бу. Һʹәму бах у шинкайи зийан стандьн, хенщи әʹрде Гошән. Фьрәԝьн гот: «Лава Йаһоԝа бькә, ԝәки әԝе йәке бьдә сәкьнандьне! Паше һун дькарьн рʹабьн у һәрʹьн». Ле гава тәйрок у баран сәкьни, Фьрәԝьн фькьред хԝә гӧһаст.

Муса гот: «Ньһа кӧли һʹәму шинкайед кӧ паши тәйроке манә, ԝе бьхԝьн». Милйонә кӧли дәстпекьрьн ԛьрʹа һәр тьшти биньн, чь кӧ чоледа у сәр баха мабу. Фьрәԝьн дәстпекьр лава бькә: «Бежә Йаһоԝа бьра ԝан кӧлийа жь мә дурхә». Ле диса жи паши ԝе йәке чахе Йаһоԝа Мьсьри жь кӧлийа хьлаз кьрьн, йәкә Фьрәԝьн щьмәʹт бәрʹнәда.

Йаһоԝа готә Муса: «Дәсте хԝә бәрбь әʹзман бьльнд кә». Һәма ԝе дәме әʹзман рʹәш бу у тәʹри кʹәтә әʹрде. Се рʹожа Мьсьрийа нькарьбун тʹӧ тьшт у тʹӧ кәс бьдитана. Тʹәне бал Исраелийа рʹонкайи бу.

Фьрәԝьн готә Муса: «Тӧ у щьмәʹта тә дькарьн һәрʹьн. Ле һʹәйԝанед хԝә вьра бьһельн». Муса гот: «Әм гәрәке һʹәйԝанед хԝә тʹәви хԝә бьвьн, ԝәки Хԝәдерʹа бькьнә ԛӧрбан». Фьрәԝьн гәләк һерс кʹәт, кьрә ԛарʹә-ԛарʹ у гот: «Бьщәʹмьн һәрʹьн! Һәрге әз ԝә диса вьра бьвиньм, һуне бенә кӧштьне».

Муса соз да Фьрәԝьн, ԝәки ԝе ида нәйе щәм ԝи. Ле һʹәта бьчуйа, Муса готә Фьрәԝьн: «Ниве шәве һәр ньхӧрийед Мьсьрийа ԝе бьмьрьн, чаԝа ньхӧрийе Фьрәԝьн, ӧса жи ньхӧрийе хӧлама».

Йаһоԝа готә Исраелийа, ԝәки хԝарьна мәхсус һазьр кьн. Әԝи гот: «Бәрх йан бьзьна йәксали сәржекьн, у хуна ԝи дәре мала хԝә хьн. Гоште ԝи сәр агьр бьпежьн у пе нане шкәва бьхԝьн. Кʹьнще ԝә бьра ԝә бә, чарьхе ԝә бьра ньге ԝәда бә, сәва һазьр бьн рʹекʹәвьн. Ишәв әзе ԝә аза кьм». Һун дькарьн бьдьн бәр чʹәʹве хԝә, Исраели чьԛас ша дьбун?

Ниве шәве, мәләке Йаһоԝа кʹәтә һʹәму малед Мьсьрийа. Әԝ мал, рʹәхдәрийед кʹижани хун лехьсти нибу, ньхӧрийед ԝан мьрьн. Ле әԝ малед, кӧ рʹәхдәрийед ԝан хун лехьсти бун, мәләк бәррʹа дәрбаз бу. Ньхӧрийе һәр малбәтәкә Мьсьрийа, ча йед дәԝләти ӧса жи йед кʹәсиб, мьрьн. Ле ԛә зарʹәкә Исраелийа нәмьр.

Һәла һе кӧрʹе Фьрәԝьн жи мьр. Фьрәԝьн ида нькарьбу тәйах кьра. Әԝи гази Муса у Һарун кьр у готә ԝан: «Рʹабьн, жь вьра дәркʹәвьн һәрʹьн. Һәрʹьн у Хԝәдайе хԝәрʹа хьзмәт кьн. Һʹәйԝанед хԝә жи, тʹәви хԝә бьвьн!»

Гава Исраели жь Мьсьре дәркʹәтьн, һив тʹьжә бу. Әԝана малбәт пәй малбәт, кʹом пәй кʹом дәркʹәтьн. Хенщи 600 000 мера ӧса жи гәләк кʹӧлфәт у зарʹ һәбун. Тʹәви ԝан гәләк мәрьвед жь мьләте дьн жи дәркʹәтьн, ԝәки Йаһоԝарʹа хьзмәт кьн. Ижар Исраели бь рʹасти аза бун!

Ԝәки бир нәкьрана ча Йаһоԝа ԝана хьлаз кьр, әԝана гәрәке һәр сал әԝ хԝарьна мәхсус һазьр кьрана. Әԝ рʹож һатә навкьрьне Щәжьна Дәрбазбуне.

Гава Фьрәԝьн бьһист, ԝәки Исраели жь Мьсьре чун, әԝ пʹошман бу, ԝәки изьн да ԝан һәрʹьн. Әԝи фәрман да әскәред хԝә у гот: «Әʹрәба һазьр кьн, ԝәки әм пәй ԝан кʹәвьн! У изьне нәдьнә ԝан, ԝәки әԝана һәрʹьн». Фьрәԝьн тʹәви әскәред хԝә данә пәй Исраелийа.

Йаһоԝа, рʹож пе стуна әʹԝр, ле шәв пе стуна агьр, рʹе нишани щьмәʹта хԝә дькьр. Әԝи ԝана бьрә бәрбь Бәʹра Сор у готә ԝан, ԝәки чадьред хԝә вәкьн.

Паши ԝе йәке Исраелийа дитьн, ԝәки Фьрәԝьн у әскәред ԝи пәй ԝан кʹәтьнә. Әԝана гәләк тьрсийан, чьмки алики Бәʹра Сор рʹийа ԝан гьртьбу, ле алийе дьн әскәред Фьрәԝьн. Ԝана дәстпекьр сәр Муса бькьнә ԛарʹә-ԛарʹ у готьн: «Әме вьра бьмьрьн! Тә гәрәке мә жь Мьсьре дәрнәхьста». Муса готә ԝан: «Нәтьрсьн. Бьсәкьньн у бьньһерʹьн чаԝа Йаһоԝа ԝе мә хьлаз кә». Дьвини Муса ча баԝәрийа хԝә Йаһоԝа ани?

Йаһоԝа готә Исраелийа, ԝәки чадьред хԝә тʹоп кьн. Ԝе шәве Йаһоԝа стуна әʹԝр кьрә ортʹа Исраелийа у Мьсьрийа. Алийе Мьсьрийа тәʹри бу, ле алийе Исраелийа рʹонкайи бу.

Йаһоԝа готә Муса, дәсте хԝә дьрежи сәр бәʹре кә. Паше Йаһоԝа тʹәмамийа шәве баки ԛайим рʹакьр. Бәʹр бу дӧ пʹара у ортʹеда рʹе вәбу. Чәнд Милйон Исраели сәр әʹрде зьһарʹа ортʹа дӧ диԝаред бәʹрерʹа дәрбази бәре дьн бун.

Әскәред Фьрәԝьн ԝе рʹерʹа данә пәй Исраелийа у кʹәтьнә ортʹа бәʹре. Йаһоԝа ӧса кьр, ԝәки тʹәкәрәкед әʹрәбед ԝан шкәстьн у тьрс кʹәтә дьле Мьсьрийа. Ԝана кьрьнә ԛарʹә-ԛарʹ у готьн: «Жь вьра бьрʹәвьн! Чьмки Йаһоԝа дәԝса ԝан, тʹәви мә шәрʹ дькә».

Йаһоԝа готә Муса: «Дәсте хԝә дьрежи сәр бәʹре кә». У ԝе дәме диԝаред бәʹре жорда һатьн хԝаре у әскәред Мьсьрийа бьн аведа ман. Фьрәԝьн у әскәред ԝи аведа хәньԛин, тʹӧ кәс жь ԝан хьлаз нәбу.

Ле әԝ щьмәʹта мәзьн йа кӧ бәʹрерʹа дәрбаз бу, пе страна пәсьн дьданә Хԝәде у дьготьн: «Бьстьрен Йаһоԝарʹа, чьмки әԝи наве хԝә пироз кьр, әԝи һәсп у сийаред ԝан авитә бәʹре». Щьмәʹте дьстьра, жьн дьрәʹԛьсин у дәфе дьхьстьн. Әԝана гәләк ша дьбун, чьмки бь рʹасти аза бун.

Жь дәркʹәтьна Мьсьре дӧһ мәһ шунда Исраели гьһиштьнә Чʹийайе Синайе у ԝедәре чадьре хԝә лехьстьн. Йаһоԝа гази Муса кьр. Әԝ һьлкʹьшийа сәр чʹийе у Йаһоԝа готә ԝи: «Мьн Исраели хьлаз кьрьн. Һәрге әԝана гӧһ бьдьнә мьн у ԛанунед мьн хԝәй кьн, ԝе бьбьнә щьмәʹта мьн ә мәхсус». Муса пашда вәгәрʹийа у Исраелийарʹа гот дәрһәԛа ԝе йәке, чь Йаһоԝа ԝирʹа гот. Гәло ԝана чь щаб да? Ԝана гот: «Әме һәр готьнед Йаһоԝа биньн сери».

Муса диса һьлкʹьшийа сәр чʹийе. Ԝедәре Йаһоԝа готә ԝи: «Рʹожа сьсийа әзе тʹәви ԝә хәбәр дьм. Бежә щьмәʹте, ԝәки әԝана фәсал бьн у незики Чʹийайе Синайе нәбьн». Муса жь чʹийа вәгәрʹийа у готә Исраелийа, ԝәки һазьр бьн гӧһ бьдьнә Йаһоԝа.

Рʹожа сьсийа, Исраели сәр чʹийе бьруськ у әʹԝре рʹәш дитьн. Ӧса жи ԝана гьрмина әʹԝра у дәнге борʹийе бьһистьн. Паше Йаһоԝа агьрда пәйайи сәр чʹийа бу. Гава Исраели әԝ йәк дитьн әԝана тьрса ләрьзин. Ду сәр чʹийе тʹоп бьбу у чʹийа педа дьһәжийа. Дәнге борʹийе һе зедә у зедә дьбу. Паше Хԝәде гот: «Әз Йаһоԝа мә. Сәре хԝә бәр хӧданед дьн данәйньн».

Муса диса һьлкʹьшийа сәр чʹийе у ԝедәре Йаһоԝа ԛанун да ԝи, сәва щьмәʹт бьзаньбә чь бькә у чь щурʹә Хԝәдерʹа хьзмәт кә. Муса әԝ ԛанун ньвисин у паше Исраелийарʹа хԝәнд. Ԝана соз да: «Әме һәр готьнед Йаһоԝа биньн сери». Рʹаст ә, ԝана соз данә Хԝәде, ле гәло паше әԝ созе хԝә анинә сери?

Йаһоԝа готә Муса: «Һьлкʹьшә сәр чʹийе. Әзе ԛанунед хԝә сәр сәлед кәвьр лекьм у бьдьмә тә. Муса һьлкʹьшийа сәр чʹийе, 40 рʹожа у 40 шәв ԝедәре ма. Һʹәта Муса ԝедәре бу, Хԝәде Дәһә Ԛанунед фәрз сәр сәлед кәвьр лекьр у да ԝи.

Һьнәк ԝәхт шунда Исраелийа дәстпекьрьн бьфькьрьн, ԝәки Муса ԝана һиштийә. Ԝана готә Һарун: «Әм дьхԝазьн, ԝәки кәсәк рʹебәрийе мә бькә. Сәва мә хӧданәки чекә!» Һарун гот: «Зерʹе хԝә биньн щәм мьн». Әԝи зерʹ һʹәланд у голька зерʹ чекьр. Гава щьмәʹт әԝ голька зерʹ дит, ԝана гот: «Әв гольк Хԝәдайе мә йә, әԝи мә жь Мьсьре дәрхьст!» Ԝана дәстпекьр сәре хԝә бәр гольке дайньн, бәр дьрʹәԛьсин у ша дьбун. Ле гәло әԝ йәк рʹаст бу? На, чьмки ԝана соз дабу, ԝәки тʹәне Йаһоԝарʹа хьзмәт кьн. Пе кьред ӧса, ԝана созе хԝә пʹепәс кьрьн.

Йаһоԝа кьред Исраелийа дит у готә Муса: «Пәйайи жере бә, әԝ щьмәʹт гӧрʹа мьн накә у сәре хԝә бәр хӧдане ԛәлп датинә». Муса жь чʹийе пәйа бу у дӧ кәвьред ԛануне дәсте ԝида бун.

Гава әв жь чʹийе пәйа бу, әԝи сьтрана щьмәʹте бьһист, дит ча щьмәʹт дьрʹәԛьсә у сәре хԝә бәр гольке датинә. Муса гәләк һерс кʹәт, әԝи әв дӧ кәвьред ԛануне авитә әʹрде у кәвьр һурдәхԝәши бун. Әԝи дәрберʹа әԝ һәйкәле зерʹ һурдәхԝаши кьр. Паше әԝи Һарун пьрси: «Әԝе щьмәʹте ча карьбу зоре тә бькә, ԝәки тә гӧнәки ӧса кьр?» Һарун гот: «Һерс нәкʹәвә. Тӧ хԝәха әԝе щьмәʹте нас дьки. Ԝана хԝәст, ԝәки сәва ԝан хӧданәки чекьм, мьн жи зерʹе ԝан авитә агьр у гольк чебу». Һарун гәрәке ӧса нәкьра. Муса диса һьлкʹьшийа сәр чʹийе у жь Йаһоԝа лава кьр, ԝәки бьбахшинә щьмәʹте.

Йаһоԝа бахьшандә ԝан, йед кӧ дьхԝәстьн гӧрʹа ԝи бькьн. Дьвини чьԛас фәрз бу, ԝәки Исраелийа гӧрʹа Муса бькьрана?

Кʹәнге Муса сәр Чʹийайе Синайе бу, Йаһоԝа готә ԝи, ԝәки әԝ гәрәке коне мәхсус ава кә, демәк коне пироз. Ԝи конида Исраелийа дькарьбун Йаһоԝарʹа хьзмәт кьн. Һәр гав кʹәнге әԝана дәрбази щики дьн дьбун, ԝана дькарьбу әԝ кон тʹоп кьрана у тʹәви хԝә бьбьрана.

Йаһоԝа гот: «Бежә щьмәʹте, ԝәки әԝана чь дькарьн, бьра бьдьн бона аликʹарийа авакьрьна коне пироз». Исраелийа зерʹ, зив, сьфьр, кәвьред бьһа у хьшьр демәк гӧһар, гӧстилк дьанин. Ԝана ӧса жи һьри, кʹьтан, чʹәрме һʹәйԝана у гәләк тьштед дьн дьанин. Әԝана дәствәкьри бун у гәләк пʹешкʹеш дьанин, ләма жи Муса готә ԝан: «Һаԛас бәс ә! Ида нәйньн».

Гәләк жьн у меред дәстпешә, шьхӧле авакьрьнеда аликʹари дьдан. Йаһоԝа билани да ԝан, ԝәки ԝи шьхӧли биньн сери. Һәр кәсәки тьштәк дькьр, тʹел дьрьсийан, пʹәрчʹә чедькьрьн, сәр пʹәрчʹә нәԛьш дькьрьн, сәр кәвьра у сәр зерʹа дьхәбьтин, у ӧса жи дар дьнәԛьшандьн.

Щьмәʹте коне пироз һәма ӧса ава кьр, чаԝа Йаһоԝа готә ԝан. Ԝана пʹәрʹде бәдәԝ чекьр, ԝәки кон бькьнә дӧ пʹара, Щийе Пироз у Щийе Һәри Пироз. Сьндоԛа пәймане, йа кӧ жь дара акасийе у жь зерʹ һатьбу чекьрьне, данин Щийе Һәри Пироз. Ле шәмдана зерʹ, тәхтә, у горигәһа бона шәԝьтандьна бьхуре, данин Щийе Пироз. Дәрва, бәр кон, тʹаса сьфьр у горигәһа мәзьн һәбу. Сьндоԛа пәймане дькьрә бира Исраелийа, ԝәки әԝана гәрәке гӧрʹа Йаһоԝада бьминьн, чаԝа ԝана соз дабу ԝи. Тӧ зани чь те һʹәсабе пәйман? Әԝ те һʹәсабе, чахе созе мәхсус дьди.

Йаһоԝа Һарун у кӧрʹед ԝи жьбартьн, ԝәки әԝана чаԝа кʹаһин конда хьзмәт кьн. Әԝана гәрәке мьԛати кон буна у ԝедәре Йаһоԝарʹа ԛӧрбан бьдана. Ле тʹәне изьна Һарун һәбу, ча сәрәккʹаһин бькʹәвә Щийе Һәри Пироз. Әԝ сале щарәке дькʹәтә ԝедәре, ԝәки Йаһоԝарʹа ԛӧрбане бьдә сәва гӧне хԝә, гӧне нәфәред хԝә у бона тʹәмамийа Исраеле.

Исраелийа паши дәркʹәтьна жь Мьсьре, саләкеда авакьрьна коне пироз хьлаз кьрьн. Ида щи һәбу, кʹидәре ԝана дькарьбу Йаһоԝарʹа хьзмәт кьн.

Йаһоԝа коне пироз пе рʹумәта хԝә тʹьжә кьр, у әʹԝр дани сәр кон. Һәрге әʹԝр сәр сәре кон бу, Исраели гәрәке жь ԝи щийи нәчуна, ле һәрге әʹԝр жь кон һьлдькʹьшийа жоре, ԝи чахи ԝана фәʹм дькьр, ԝәки гәрәке рʹекʹәвьн. Ԝана коне пироз тʹоп дькьрьн у пәй әʹԝр дьчун.

Исраели жь Чʹийайе Синайе, бәрʹийа Паранерʹа чун һʹәта щийе бь наве Кадәш. Ԝедәре Йаһоԝа готә Муса: «Донздәһ мерʹа бьшинә, жь һәр ԛәбиләке мәрьвәки бьшинә, ԝәки щәʹсусийа әʹрде Кәнане бькьн, йа кӧ әзе бьдьмә Исраелийа». Муса 12 мер жьбарт у готә ԝан: «Һәрʹьн әʹрде Кәнане у пебьһʹәсьн әԝ әʹрд чаԝа йә, хԝәйи дәрәмәт ә йан бе бәр ә. Мәрьвед ԝи әʹрди ԛәԝат ьн йан сьст ьн, шәһәред ԝан һәнә йан чадьрада дьжин». Әԝ 12 щәʹсус чунә Кәнане, Йешу у Кʹаләб жи нав ԝан щәʹсусада бун.

Паши 40 рʹожи әԝана пашда вәгәрʹийан у тʹәви хԝә һежир, һʹьнар у тьри анин. Щәʹсуса гьли кьр: «Әʹрде ԝан баш ә, ле әԝана гәләк ԛәԝат ьн у диԝаре шәһәред ԝан зәʹф бьльнд ьн». Ле Кʹаләб гот: «Әм дькарьн ԝана алт кьн. Ԝәрен әм һәма ньһа жи һәрʹьн!» Тӧ зани чьрʹа Кʹаләб ӧса гот? Чьмки Кʹаләб у Йешу итʹбарийа хԝә Йаһоԝа дьанин. Ле дәһ щәʹсусед дьн готьн: «На! Мәрьвед ԝедәре гәләк тәрʹьки нә! Мә хԝә мина кӧлийа тʹәхмин дькьр бәр ԝана».

Исраели бәр хԝә кʹәтьн у сьст бун. Ԝана дәстпекьр бькьнә кӧтә-кӧт у һәврʹа готьн: «Ԝәрен әм хԝәрʹа рʹебәрәки дьн бьжберьн у пашда һәрʹьн Мьсьре. Чьрʹа әм гәрәке һәрʹьн ԝи щийи у бенә кӧштьне?» Йешу у Кʹаләб готьн: «Мьԛабьли Йаһоԝа рʹанәбьн у нәтьрсьн. Йаһоԝа ԝе мә хԝәй кә». Ле Исраелийа гӧһ нәданә ԝан. Һәла һе ԝана хԝәст Йешу у Кʹаләб бькӧжьн!

Һьнге Йаһоԝа чь кьр? Әԝи готә Муса: «Мьн һаԛас тьшт бона Исраелийа кьр, ле йәкә ԝана диса гӧһ нәдьданә мьн. Сәва ԝе йәке әԝана ԝе 40 сала бәрʹийеда бьминьн, һʹәта бьмьрьн. Тʹәне зарʹед ԝан, у ӧса жи Йешу у Кʹаләб ԝе бькʹәвьнә ԝи әʹрди, кʹижан мьн ԝанрʹа соз дайә».

Һьнәк ԝәхт шунда, чахе Исраели һе бәрʹийеда бун, Ԛорах, Датʹан, Абирам у 250 меред дьн мьԛабьли Муса дәркʹәтьн. Ԝана готә ԝи: «Бәсә, әм вәстийа нә! Һʹәта кʹәнге те сәрԝертийе мә бьки у Һарун жи кʹаһинтийе мә бькә? Йаһоԝа тʹәви мә һәр кәси йә, нә кӧ тʹәне тʹәви тә у Һарун ә». Әԝ йәк Йаһоԝа хԝәш нәһат. Хԝәде һʹәсаб кьр, ԝәки әԝана мьԛабьли ԝи рʹабун, нә кӧ мьԛабьли Һарун у Муса.

Муса готә Ԛорах у пәйчуйед ԝи: «Сьбе бьхурдане хԝә тʹәви бьхуре һьлдьн у ԝәрен бәр коне пироз. Йаһоԝа ԝе нишан кә, әԝи кʹе жьбартийә».

Рʹожа дьн Ԛорах у 250 пәйчуйед ԝи чун, ԝәки бәр коне пироз рʹасти Муса бен. Ԝедәре ԝана бьхур шәԝьтандьн, чаԝа кӧ кʹаһина дькьрьн. Ԝе дәме Йаһоԝа готә Муса у Һарун: «Дури Ԛорах у пәйчуйед ԝи бьн».

Чахе Ԛорах чу бәр коне пироз, кʹидәре Муса бу, Датʹан, Абирам у нәфәред ԝан нәхԝәстьн һәрʹьн ԝедәре. Йаһоԝа готә Исраелийа, ԝәки хԝә дур бьгьрьн жь чадьред Ԛорах, Датʹан у Абирам. Әԝана перʹа-перʹа дури ԝан чун. Датʹан, Абирам у нәфәред ԝан бәр чадьред хԝә сәкьни бун. Ньшкева әʹрд вәбу у әԝана теда чун. Паше, жь коне пироз агьр дәркʹәт, Ԛорах у 250 пәйчуйед ԝи шәԝьтанд.

Паше Йаһоԝа готә Муса: «Шьвдара һәр сәрԝеред бәрәка һьлдә у наве ԝана сәр шьвдара ԝан бьньвисә. Ле сәр шьвдара жь бәрәка Леԝи, наве Һарун бьньвисә. Ԝан шьвдара дайнә коне пироз у әз кʹе бьжберьм, шьвдара ԝи ԝе гӧл бьдә».

Рʹожа дьн Муса һәр шьвдар дәрхьст у нишани сәрԝера кьр. Шьвдара Һарун гӧл дабу у бәр гьртьбу. Ӧса Йаһоԝа избат кьр, ԝәки әԝи Һарун жьбартийә ча кʹаһин.

Исраели ԝәкә 40 сала бәрʹийеда ман. Ԝана гәләк шәһәр алт кьрьн. Ньһа әԝана незики Моԝабе щиԝар бунә, бәр Чʹәме Урдӧне. Әԝ ԝәʹдә бу кʹәнге әԝана гәрәке бькʹәтана Әʹрде Создайи. Балаԛ, пʹадше Моԝабе дьтьрсийа, ԝәки әԝана дькарьн әʹрд жь ԝи бьстиньн. Ләма жи әԝи мерәки, наве кʹижани Бьлам бу, тʹәглифи Моԝабе кьр, ԝәки әԝ ньфьрʹа Исраелийа бькә.

Ле Йаһоԝа готә Бьлам: «Ньфьрʹа Исраелийа нәкә». Ләма жи Бьлам нәчу Моԝабе. Балаԛ Пʹадша щара дӧда ԝи тʹәглиф кьр у соз да, ԝәки һәр тʹьшт чь кӧ әԝ бьхԝазә ԝе бьдә ԝи. Ле Бьлам диса жи ԛайил нәбу. Паше Хԝәде готә ԝи: «Тӧ дькари һәри, ле гәрәке тʹәне ԝе йәке бежи, чь кӧ әзе бежьмә тә».

Бьлам кʹәре хԝә сийар бу у чу бәрбь Моԝабе. Рʹаст ә Йаһоԝа готә ԝи, ԝәки әԝ ньфьрʹа Исраелийа нәкә, ле әԝи диса жи сафи кьр ньфьрʹа ԝана бькә. Мәләке, Йаһоԝа, ԝәкә се щара сәр рʹийа ԝи сәкьни. Бьлам мәләк нәдьдит, ле кʹәре ԝи дьдит. Щарʹа пешийе кʹәнге кʹәр мәләк дит, әԝи рʹийа хԝә гӧһаст у чу бәрбь чоле. Щарәкә дьн, кʹәр бәрбь диԝер чу у ньге Бьлам ӧса спартә диԝер, ԝәки һʹьнщьрʹанд. Щара хьлазийе, кʹәр ортʹа рʹеда хԝә авитә әʹрде. Һәр щара Бьлам кʹәре хԝә пе дар дькʹӧта.

Паше Йаһоԝа ӧса кьр, ԝәки кʹәр дәстпекьр хәбәр дә. Кʹәр жь Бьлам пьрси: «Тӧ чьрʹа мьн дькʹӧти?» Бьлам гот: «Тә әз кьрьмә пекʹәни. Һәрге шур бал мьн һәбуйа, мьне сәре тә лехьста». Кʹәр готә ԝи: «Әԝа ида гәләк сал ә, әз кʹәре тә мә. Ԛә пешда мьн тьштәки ӧса сәре тә кьрийә?»

Паше Йаһоԝа ӧса кьр, ԝәки Бьлам мәләк бьвинә. Мәләк готә ԝи: «Нә Йаһоԝа пешда готә тә, ԝәки тӧ ньфьрʹа Исраелийа нәки». Бьлам гот: «Әре әз заньм, ԝәки әз нәһәԛ ьм, ләма жи әзе пашда вәгәрʹьм». Ле мәләк готә ԝи: «Тӧ дькари һәри Моԝабе, ле тʹәне ԝе йеке гәрәке бежи, чь кӧ Йаһоԝа бежә тә».

Гәло жь ԝе йәке Бьлам хԝәрʹа дәрс һьлда? На. Паши ԝе йәке жи Бьлам се щарʹа хԝәст ньфьрʹа Исраелийа бькә, ле дәԝсе Йаһоԝа ӧса кьр, ԝәки әԝи дӧа ԝана кьр. Ахьрийеда Исраелийа Моԝаб зәфт кьрьн у Бьлам һатә кʹӧштьне. Гәло ԝе дьһа баш нибуйа, һәрге Бьлам сәре-серида гӧрʹа Йаһоԝа бькьра?

Муса гәләк сал рʹебәрийа щьмәʹта Исраел дькьр, у ида әʹмьрда мәзьн бу. Йаһоԝа готә ԝи: «Тӧ нә әԝ мәрьв и, йе кӧ гәрәке щьмәʹта Исраел бькә Әʹрде Создайи. Ле әзе изьне бьдьмә тә, ԝәки тӧ ԝи әʹрди бьвини». Муса жь Йаһоԝа һиви кьр, ԝәки мәрьвәки дьн бьжберә, сәва кӧ рʹебәрийе щьмәʹта ԝи бькә. Йаһоԝа готә Муса: «Һәрʹә бал Йешу у бежә ԝи, ԝәки әԝе бьбә рʹебәр».

Муса готә Исраелийа, ԝәки әԝ бәр мьрьне йә у Йаһоԝа Йешу жьбарт, ԝәки ԝана бьвә Әʹрде Создайи. Муса готә Йешу: «Нәтьрсә, Йаһоԝа ԝе али тә бькә». Паши ԝе йәке ча Муса һьлкʹьшийа сәр Чʹийайе Нәбо, Йаһоԝа әԝ әʹрд нишани ԝи кьр, кʹижан соз дабу, ԝәки бьдә зӧрʹәта Бьраһим, Исһаԛ у Аԛуб. Муса 120 сали бу кʹәнге мьр.

Йаһоԝа готә Йешу: «Чʹәме Урдӧне дәрбаз бьн у һәрʹьнә Кәнане. Чаԝа мьн али Муса дькьр, әзе ӧса али тә бькьм. Ԛанунед мьн һәр рʹож бьхунә. Нәтьрсә. Мерхас бә. У ԝе йәке бькә, чь кӧ әзе тәрʹа бежьм».

Йешу дӧ щәʹсус шандә шәһәре Әриһайе. Сәре дьнда, әме һе зедә пебьһʹәсьн дәрһәԛа ԝе йәке чь ԝедәре ԛәԝьми. Гава әԝана вәгәрʹийан, готьн, ԝәки ньһа ԝәʹдәки баш ә бькʹәвьнә Кәнане. Рʹожа дьн, Йешу готә щьмәʹте, ԝәки чадьред хԝә тʹоп кьн. Ле пешийа щьмәʹте әԝи кʹаһин шанд, йед кӧ гәрәке сьндоԛа пәймане бьвьрана у бькʹәтана Чʹәме Урдӧне. Чʹемда ав ӧса тʹьжә бу, ԝәки жь чʹәм дәрдькʹәт. Ле гава ньге кʹаһина кʹәтә аве, чʹәм зьһа бу! Кʹаһин гьһиштьнә ортʹа чʹәм у сәкьнин, һʹәта кӧ тʹәмамийа щьмәʹте дәрбази алийе дьн бун. Чаԝа тӧ дьшьрмиш дьби, әԝ кʹәрәмәт кьрә бира ԝан дәрһәԛа ԝе йәке, чь кӧ Йаһоԝа бәр Бәʹра Сор кьр?

Паши һаԛас сал, Исраели гьһиштьнә Әʹрде Создайи. Ԝана гәрәке мал у шәһәр ава кьрана. Ӧса жи гәрәке әʹрд бещәр кьрана, рʹәзед тьрийа у шинкайа бахчәда дачькандана. Әʹрде Создайи гәләк баш бу сәва жийине, чьмки ԝедәре нан-хԝарʹьн тʹер-тʹьжә бу, ләма жи әԝ әʹрд һатә навкьрьне әʹрде шир у һьнгьв.

Чахе щәсусед Исраели чунә Әриһайе, әԝана мала жьнәкеда ман, наве ԝе Рʹәхаб бу. Пʹадше Әриһайе пеһʹәсийа у әскәред хԝә шандә мала Рʹәхабе. Әԝе дӧ щәсус сәр бане мала хԝә вәшарт, ле әскәрарʹа гот, ԝәки бьдьнә пәй ԝан, чьмки әԝана дәркʹәтьн у чун. Әԝе щәсусарʹа гот: «Әзе али ԝә бькьм, чьмки әз заньм, ԝәки Йаһоԝа тʹәви ԝә йә у әԝи әʹрди ԝе бьдә ԝә. Соз бьдьнә мьн, ԝәки һуне малбәта мьн хьлаз кьн».

Щәʹсуса готьнә Рʹәхабе: «Әм соз дьдьнә тә, ԝәки һʹәму кәсед, кӧ мала тәда бьн, ԝе зийане нәстиньн». Ԝана готә ԝе: «Бәне сор пʹәнщәрʹа хԝәва гьредә, ԝәки малбәта тә, бе хьлазкьрьне».

Рʹәхабе али щәʹсуса кьр, ԝәки жь пʹәнщәрʹа мала ԝе, пе тʹог дакʹәвьн. Пешийа кӧ һәрʹьнә бал Йешу, щәʹсус се рʹожа сәре чʹийе хԝә вәдьшартьн. Исраели Чʹәме Урдӧнерʹа дәрбаз бьбун у хԝә һазьр дькьрьн, ԝәки әԝи әʹрди зәфт кьн. Әриһа әʹрде пешийе бу, кʹижан ԝана гәрәке зәфт кьра. Йаһоԝа готә ԝан, ԝәки нава шәш рʹожада, рʹоже щарәке гәрәке дора ԝи шәһәри бьзьвьрʹьн. Ле рʹожа һʹәфта, әԝана һʹәфт щара дора шәһәр зьвьрʹин. Кʹаһина борʹийе дьхьстьн, ле әскәра бь дәнге ԛайим дькьрьнә ԛарʹә-ԛарʹ. Ԝи чахи диԝаред шәһәр жорда һатьн! Ле диԝаре мала Рʹәхабе, тʹьштәк пе нәһат. Рʹәхаб у малбәта ԝе хьлаз бун, чьмки әԝе баԝәрийа хԝә Йаһоԝа ани.

Әʹламәтийа дәрһәԛа зәфткьрьна Әриһайе, һатә бәлакьрьне нав тʹәмамийа мьләте Кәнане. Пʹадше ԝан мьләта сафи кьрьн тʹәвайи пешбәри Исраелийа шәрʹ кьн. Ле Гибони пе нетәкә дьн һатьнә бал Исраелийа. Әԝана кʹьнщед кәвьн хԝәкьрьн, һатьнә бал Йешу у готьн: «Әм жь ԝәлате дур һатьнә. Мә дәрһәԛа Йаһоԝа бьһистийә у дәрһәԛа ԝе йәке, чь кӧ әԝи бона ԝә Мьсьреда у Моԝабеда кьр. Соз бьдьнә мә, ԝәки һуне мә нәкʹӧжьн у әме бьбьнә бәрдәстийед ԝә».

Йешу баԝәрийа хԝә ԝана ани у ԛайил бу ԝана нәкӧжә. Паши се рʹожа Йешу пеһʹәсийа, ԝәки әԝана нә жь ԝәлате дур ьн, ле жь ԝәлате Кәнане нә. Йешу ԝана пьрси: «Чьрʹа ԝә әм хапанд ьн?» Ԝана гот: «Әм жь ԝә тьрсийан! Әм заньн, ԝәки Йаһоԝа Хԝәдайе ԝә бона ԝә шәрʹ дькә. Лава дькьн мә нәкӧжьн». Йешу созе хԝә ани сери у изьн нәда, ԝәки әԝана бенә кӧштьне.

Паши ԝе йәке, пенщ пʹадшед Кәнане у әскәред ԝан хԝәстьн Гибонийа зәфт кьн. Ле Йешу у әскәред ԝи тʹәмамийа шәве рʹе кʹәтьбун, сәва кӧ Гибонийа хьлаз кьн. Сьбәһе зу шәрʹе ԝан дәстпебу. Кәнани рʹәвин, ԝәки хԝә хьлаз кьн, ле Йаһоԝа тәйрока ԛайим сәр ԝанда баранд. Паше Йешу жь Йаһоԝа лава кьр, ԝәки рʹо нәчә ава. Чьрʹа Йешу жь Йаһоԝа һиви кьр, ԝәки тьштәки ӧса бькә, чь кӧ тʹӧ щар нәԛәԝьмибу? Чьмки әԝи баԝәрийа хԝә Йаһоԝа дьани. Һʹәта кӧ Исраелийа тʹәви пʹадшед Кәнанийа у әскәред ԝан шәрʹ дькьрьн, тʹәмамийа ԝе рʹоже, рʹо нәдьчу ава.

Йешу гәләк сал рʹебәри щьмәʹта Йаһоԝа дькьр, әԝ 110 сали бу чахе мьр. Һʹәта Йешу сах бу, Исраелийа Йаһоԝарʹа хьзмәт дькьрьн. Ле паши мьрьна ԝи, әԝана чʹәʹв данә Кәнанийа у дәстпекьрьн мина ԝана сәре хԝә бәр пʹута дайньн. Сәва ԝе йәке кӧ Исраели Йаһоԝарʹа амьн нәман, Әԝи изьн да пʹадше Кәнане, бь наве Йаԝин, ԝәки әʹмьре ԝан чәтьн кә. Щьмәʹта Исраел лава дькьр, ԝәки Йаһоԝа али ԝан бькә. Ләма жи Йаһоԝа рʹебәре тʹәзә, бь наве Барак, сәр ԝан кʹьфш кьр. Барак гәрәке али щьмәʹте бькьра, ԝәки әԝана вәгәрʹьн бал Йаһоԝа.

Кʹӧлфәтәкә пʹехәмбәр, наве кʹижани Дәбора бу, мәрьв шандьн, ԝәки әʹламәтикә фәрз жь Йаһоԝа бежьнә Барак. Ԝана готә Барак: «Тʹәви хԝә 10 000 мер һьлдә, һәрʹә бәр чʹәме Кишоне, у тʹәви әскәред Йаԝин шәрʹ бькә. Ԝедәре тʹӧйе Сисәра, сәрԝере әскәре Йаԝин алт ки». Барак готә Дәборайе: «Әзе һәрʹьм, тʹәне һәрге тӧ тʹәви мьн бейи». Әԝе готә ԝи : «Әзе тʹәви тә бем. Ле бьзаньбә, ԝәки тӧ нә әԝ и, йе кӧ гәрәке Сисәра бькӧжә. Йаһоԝа гот, ԝәки әԝе жь дәсте кʹӧлфәтәке бе кӧштьне».

Дәбора тʹәви Барак у әскәред ԝи чу сәр Чʹийайе Тәбор, ԝәки бона шәрʹ хԝә һазьр кьн. Гава Сисәра бьһист дәрһәԛа ԝе йәке, әԝи әскәр у әʹрәбед ԝан тʹоп кьр у чу бәр мәйдана незики чʹәме Кишоне. Дәборайе готә Барак: «Иро әԝ рʹож ә, кʹәнге Йаһоԝа ԝе Сисәра бьдә дәсте тә». Барак у 10 000 әскәред ԝи жь чʹийа пәйа бун, ԝәки рʹасти Сисәра у әскәред ԝийә ԛәԝи бен.

Ԝи чахи Йаһоԝа ӧса кьр, ԝәки ава чʹәме Кишоне рʹабу у жь чʹәм дәркʹәт. Әʹрәбед әскәред Сисәра жь һʹәрʹийе нькарьбун дәрен. Сисәра әʹрәба хԝә һишт у жь ԝедәре рʹәви. Барак тʹәви әскәред хԝә әскәред Сисәра алт кьрьн, ле Сисәра хԝә вәшарт! Әԝ рʹәви у хԝә чадьра кʹӧлфәтәкеда, наве кʹижане Йаел бу, вәшарт. Әԝе шир да ԝи у орхан авитә сәр. Сисәра вәстийайи бу у хәԝрʹа чу. Паши ԝе йәке Йаел тәлә-тәл незики ԝи бу у сьнгәк кʹӧта щеника ԝи у әԝ кӧшт.

Ԝи чахи Барак Сисәра дьгәрʹийа. Йаел жь чадьра хԝә дәркʹәт у гот: «Ԝәрә бькʹәвә һьндӧр. Әзе нишани тә кьм ԝи мәрьви, кʹижани тӧ дьгәрʹи». Барак кʹәтә чадьре у дит, ԝәки Сисәра мьрийә. Барак у Дәбора пе кʹьлама пәсьн дьданә Йаһоԝа сәва ԝе йәке, кӧ әԝи али Исраелийа кьр, ԝәки дьжмьнед хԝә алт кьн. Паши ԝе йәке Исраели 40 сала әʹдьлайеда дьжитьн.

Чахе Исраеледа бьрчибун бу, кʹӧлфәтәкә Исраели бь наве Наһоми, тʹәви мере хԝә у дӧ кӧрʹед хԝә чунә Моԝабе. Ԝәʹдә шунда мере Наһомийе мьр. Дӧ кӧрʹед ԝе ԛизед Моԝаби стандьн, наве ԝан Рʹутʹ у Орпʹа бу. Ле йазьх, паше дӧ кӧрʹед ԝе жи мьрьн.

Кʹәнге Наһоми бьһист, ԝәки Исраеледа бьрчибун хьлаз бу, әԝе сафи кьр вәгәрʹә мала хԝә. Рʹутʹ у Орпʹа тʹәви ԝе рʹекʹәтьн, ле рʹева Наһомийе готә ԝан: «Һун жьнед баш бун бона кӧрʹед мьн у букед баш бона мьн. Әз дьхԝазьм, ԝәки һун диса мер кьн. Вәгәрʹьн у һәрʹьн Моԝабе, малед хԝә». Ԝана готә ԝе: «Әм тә һʹьз дькьн! Әм нахԝазьн тә бьһельн». Наһомийе диса жи дьготә ԝан, ԝәки әԝана вәгәрʹьн. Ахьрийеда Орпʹа вәгәрʹийа, ле Рʹутʹ ма. Наһомийе готә ԝе: «Дьбини Орпʹа вәгәрʹийа бал щьмәʹта хԝә у хӧданед хԝә. Тӧ жи тʹәви ԝе һәрʹә». Ле Рʹутʹ готә ԝе: «Әз тә наһельм. Щьмәʹта тә ԝе бьбә щьмәʹта мьн у Хԝәдайе тә ԝе бьбә Хԝәдайе мьн». Ча тӧ дьшьрмиш дьби, Наһомийе чь сәр хԝә тʹәхмин кьр, чахе Рʹутʹ жерʹа ӧса гот?

Рʹутʹ у Наһоми гьһиштьнә Исраеле, чахе дәстпекьрьна щәһдьруне бу. Рʹожәке, Рʹутʹ чу зәвийе, ԝәки сьмбьла тʹоп кә, чь кӧ паши хәбатчийа мабу. Әԝ зәвийа Боԝаз бу, кӧрʹе Рʹәхабе. Әԝи бьһистьбу, ԝәки Рʹутʹ жь Моԝабе йә у әԝе хасийа хԝә рʹожед чәтьнда тʹәне нәһишт. Әԝи готә хәбатчийед хԝә, ԝәки пәй хԝә һе зедә сьмбьла бьһельн, сәва кӧ Рʹутʹ тʹоп кә.

Еваре, Наһомийе жь Рʹутʹ пьрси: «Иро тә зәвийа кʹеда тʹоп дькьр?» Рʹутʹ гот: «Әԝ зәвийа Боԝаз бу». Наһомийе готә Рʹутʹ: «Боԝаз мәрьве мере мьн ә. Бәрдәԝам кә тʹәви жьнед дьн зәвийа ԝида тʹоп кә, чьмки ԝедәре тӧйе хԝәйкьри би».

Рʹутʹ бәрдәԝам дькьр зәвийа Боԝазда тʹоп кә, һʹәта кӧ тʹопкьрьна щәһдьруне хьлаз бу. Боԝаз дина хԝә дайе, ԝәки Рʹутʹ хәбате натьрсә у кʹӧлфәтәкә гәләк баш ә. Ԝан чаха, гава мере кәсәки дьмьр у зӧрʹәта ԝан тʹӧнә бу, йәк жь мәрьвед мере ԝе жьнәбийе гәрәке әԝ бьстанда. Ләма жи Боԝаз хԝәрʹа Рʹутʹ жьнти ани. Ԝанарʹа кӧрʹәк бу, ԝи нав кьрьн Овед, ахьрийеда әԝ бу кальке Даԝьд Пʹадша. Һәвалед Наһоми гәләк ша бун. Ԝана гот: «Йаһоԝа тәрʹа Рʹутʹ шанд, ԝәки пьштгьрийа тә бькә, ле ньһа нәби тәрʹа бу. Бьра наве Йаһоԝа рʹумәт бә».

Ԝәʹдә шунда Исраелийа пьшта хԝә данә Йаһоԝа у дәстпекьрьн сәре хԝә бәр хӧданед ԛәлп дайньн. Һʹәфт сала Мьдйана һʹәйԝанед Исраелийа зәфти хԝә дькьр у зийан дьданә зәвийед ԝан. Исраели жь тьрса Мьдйана, хԝә сәр чʹийа у шкәфтада вәдьшартьн. Ԝана жь Йаһоԝа лава дькьр, ԝәки али ԝан бькә. Йаһоԝа дӧайед ԝан бьһист у мәләк шанд бал мерәки щаһьл, наве кʹижани Гидәйон бу. Мәләк готә ԝи: «Йаһоԝа тә жьбарт, ԝәки тӧ щьмәʹта ԝи хьлаз ки». Гидәйон гот: «Чаԝа әз дькарьм Исраелийа хьлаз кьм? Нә әз тʹӧ тьшт ниньм».

Чаԝа Гидәйон дькарьбу избат буйа, ԝәки Йаһоԝа һәма ԝи жьбартийә, сәва Исраелийа хьлаз кә? Әԝи һьнә һьри һьлда, дани сәр әʹрде у готә Йаһоԝа: «Һәрге сьбәһе зу ави тʹәне сәр һьрийе бә, ле әʹрде дор-бәр зьһа бә, ԝи чахи әзе бьзаньбьм, ԝәки тә мьн жьбартийә, кӧ Исраелийа хьлаз кьм». Сьбәһе зу һьри бь ави тʹьжә бу, ле әʹрде дор-бәр зьһа бу! Ле Гидәйон диса щарәке жь Йаһоԝа һиви кьр, ԝәки ве щаре һьри зьһа бә, ле әʹрд шьл бә. Рʹожа дьн һәма ӧса жи ԛәԝьми у ве щаре Гидәйон избат бу, ԝәки Йаһоԝа ԝи жьбартийә. Ләма жи әԝи әскәред Исраелийа тʹоп кьр, ԝәки пешбәри Мьдйана шәрʹ кә.

Йаһоԝа готә Гидәйон: «Әзе ӧса бькьм, ԝәки Исраели сәр Мьдйана кʹәвьн. Ле чьмки әскәред тә гәләк ьн, тӧ дькари бьфькьри, ԝәки һун пе ԛәԝата хԝә сәркʹәтьн. Ләма жи бежә ԝан мәрьва йед кӧ дьтьрсьн, бьра вәгәрʹьнә малед хԝә». Паши ԝе йәке 22 000 әскәр вәгәрʹийанә малед хԝә, ле 10 000 ман. Йаһоԝа диса жи готә Гидәйон: «Әскәред тә һәла һе гәләк ьн. Ԝана бьвә бәр канийе у бежә ԝан бьра ава канийе вәхԝьн. Әԝ мер, йед кӧ ԝәʹде вәхԝарьна аве дор-бәре хԝә бьньһерʹьн, ԝәки дьжмьн незики ԝан нәбьн, тʹәне ԝан мерʹа тʹәви хԝә бьвә». Ԝи чахи тʹәне 300 мера ԝәʹде вәхԝарʹьна аве дор-бәре хԝә ньһерʹин.

Ԝе шәве Йаһоԝа готә Гидәйон: «Ньһа әԝ ԝәʹдә йә, ԝәки мьԛабьли Мьдйана дәркʹәви!» Гидәйон борʹи, кʹупед мәзьн, кʹижанада пʹьтил һәбу да дәсте һәр әскәрәки хԝә у готә ԝан: «Мьн бьньһерʹьн у ԝе йәке бькьн, чь кӧ әзе бькьм». Гидәйон борʹийе хьст, кʹупе хԝә шкʹенанд, пʹьтила хԝә һьлбьрʹи у бь дәнге бьльнд гот: «Шуре Йаһоԝа у йе Гидәйон!» Сесьд әскәред ԝи һәма ӧса кьрьн, чаԝа кӧ әԝи кьр. Әскәред Мьдйана тьрсийан у дәстпекьрьн бьрʹәвьн. Әԝана ӧса тʹәвиһәв кʹәтьн, ԝәки гьһиштьнә һәв у дәстпекьрьн һәвдӧ бькӧжьн. Ве щаре жи, Йаһоԝа али Исраелийа кьр, ԝәки әԝана дьжмьнед хԝә алт кьн.

Бал мерәки Исраели, наве кʹижани Әлкана бу, дӧ жьн һәбун, Һанна у Пенина. Әԝи Һанна һе зедә һʹьз дькьр. Гәләк зарʹед Пенине һәбун, ле Һанна безӧрʹәт бу, ләма жи Пенина һәр гав сәр ԝе дькʹәнийа. Һәр сал Әлкана тʹәви малбәта хԝә дьчунә Шило, ԝәки конда сәре хԝә бәр Йаһоԝа дайньн. Щарәке чахе әԝана ԝедәре бун, әԝи тʹәхмин кьр, ԝәки жьна ԝийә һʹьзкьри мәʹдәкьри йә. Әԝи готә ԝе: «Һанна, лава дькьм, нәгьри. Нә әз кʹеләка тә мә, әз тә һʹьз дькьм».

Ԝәʹдә шунда Һанна чу, ԝәки дӧа бькә. Әԝ кʹәлә-кʹәл дьгьрийа у дӧада пе һесьра аликʹари жь Йаһоԝа дьхԝәст. Әԝе соз да у гот: «Йаһоԝа, һәрге тӧ кӧрʹәки бьди мьн, әзе ԝи тʹәсмили тә бькьм у әԝе тʹәмамийа әʹмьре хԝә тәрʹа хьзмәт кә».

Чахе Әли Сәрәккʹаһин дит, ԝәки Һанна дькә бьрмә-бьрм, әԝи тʹьре әԝ вәхԝари йә. Һаннайе готә ԝи: «На, ахайе мьн, әз вәхԝари ниньм. Дәрʹдәки мьни гьран һәйә, у әз Йаһоԝарʹа дәрһәԛа дәрʹде хԝә гьли дькьм». Әли фәʹм кьр, ԝәки әԝ нәрʹаст бу, ләма жи готә ԝе: «Бьра Хԝәде бьдә тә әԝ, чь кӧ тӧ жь ԝи дьхԝази». Дьле Һаннайе рʹьһʹәт бу у әԝ пашда вәгәрʹийа мал. Паши ве йәке саләк жи тʹәмам нәбу, кӧрʹ жера бу у наве ԝи данин Самуйел. Тӧ дькари бьди бәр чʹәʹве хԝә, Һанна чьԛас ша дьбу?

Һаннайе дәрһәԛа созе хԝә бир нәкьр, йа кӧ әԝе Йаһоԝарʹа дабу. Гава Самуйел жь шир һатә ԛәтандьне, әԝе ԝи бьрә коне пироз, ԝәки әԝ Хԝәдерʹа хьзмәт кә. Әԝе готә Әли: «Әԝа йә әԝ зарʹок, кʹижан мьн жь Йаһоԝа лава дькьр. Әз ԝи тʹәсмили Йаһоԝа дькьм». Һәр сал Әлкана у Һаннайе сәрик Самуйел дьхьстьн у кʹьнщед тʹәзә ԝирʹа дьанин. Йаһоԝа, Һанна кʹәрәм кьр бь ԝе йәке, кӧ диса се кӧрʹ у дӧ ԛиз да ԝе.

Исраелийа диса пьшта хԝә данә Йаһоԝа у дәстпекьрьн хӧданед ԛәлпрʹа хьзмәт кьн. Гава Аммонийа Исраели кьрьнә бьн дәсте хԝә, хӧданед ԝани ԛәлп нькарьбун ԝана хьлаз кьн. Гәләк сал Исраели дьчәрчьрин. Ахьрийеда ԝана готә Йаһоԝа: «Мә гӧнә кьр. Әм лава дькьн, мә жь дьжмьнед мә хьлаз кә». Паши ԝе йәке Исраелийа пʹутед хԝә шкенандьн у диса дәстпекьрьн Йаһоԝарʹа хьзмәт кьн. Йаһоԝа нәдьхԝәст бьдита чаԝа Исраели дьчәрчьрьн.

Йаһоԝа Йәфтаһ жьбарт, ԝәки әԝ али әскәра бькә, сәва әԝана шәрʹе тʹәви Аммонийада сәркʹәвьн. Әԝи готә Йаһоԝа: «Һәрге тӧ ԝи шәрʹида мьн сәрфьнийаз ки, әз соз дьдьм, ԝәки әзе ԝи мәрьви тʹәсмили тә бькьм, йе кӧ ԝе жь мала мьн пешийа һʹәмуйа дәре, ԝәки рʹасти мьн бе». Йаһоԝа гӧһ да дӧайе Йәфтаһ у Аммони данә дәсте ԝи.

Чахе Йәфтаһ вәгәрʹийа мал, пешийа һʹәмуйа ԛиза ԝи бәрбь ԝи һат, әԝ зарʹа ԝийә тайе-тʹәне бу. Ԛиза ԝи дьрʹәԛьси у дәфе дьхьст. Гәло ԝи чахи Йәфтаһ чаԝа хԝә тʹәхмин кьр? Созе ԝи кʹәтә бира ԝи у әԝи гот: «Ԛиза мьн, тʹә чь сәре мьн кьр! Тә еш кьрә дьле мьн. Мьн соз дайә Йаһоԝа, у сәва кӧ ԝи сози биньм сери, әз гәрәке тә тʹәсмили ԝи кьм у бьшиньмә Шилоне, ԝәки тӧ ԝедәре коне пирозда хьзмәт ки». Ԛиза ԝи гот: «Баво, һәрге тә соз дайә Йаһоԝа, тӧ гәрәке созе хԝә бини сери. Тʹәне хԝәстьнәкә мьн һәйә, изьне бьдә әз тʹәви кʹәчʹька һәрʹьмә чʹийа у дӧ мәһа ԝедәре дәрбаз кьм. Паше әзе һәрʹьм коне пирозда хьзмәт кьм». Ԛиза Йәфтаһ тʹәмамийа әʹмьре хԝә бь амьни коне пирозда хьзмәт дькьр. Һәр сал һәвалед ԝе дьчунә Шилоне, ԝәки тʹәсәлийа ԝе бькьн.

Дӧ кӧрʹед Сәрәккʹаһин Әли һәбун, йед кӧ конда ча кʹаһин хьзмәт дькьрьн. Наве ԝан Һофни у Финәһас бу. Әԝана гӧһ нәдьдан ԛануне Йаһоԝа у гәләк зӧлм бун һьндава мәрьва. Гава щьмәʹта Исраели ԛӧрбан Йаһоԝарʹа дьанин, Һофни у Финәһас кӧдоре гоште лапи баш хԝәрʹа һьлдьдан. Рʹаст ә, Әли дьбьһист дәрһәԛа ԝе йәке, чь кӧ кӧрʹед ԝи дькьрьн, ле әԝи пьшт гӧһе хԝәва давит у тьштәк ԝанарʹа нәдьгот. Чаԝа тӧ дьшьрмиш дьби, әԝ йәк Йаһоԝа хԝәш дьһат?

Рʹаст ә, Самуйел жь Һофни у Финәһас гәләк бьчʹуктьр бу, ле әԝи чʹәʹв нәдьда ԝана. Самуйел дьле Йаһоԝа ша дькьр. Шәвәке, гава Самуйел рʹаза бу, әԝи бьһист, ԝәки кәсәк гази ԝи дькә. Әԝ рʹабу, чу бал Әли у гот: «Әз һатьм!» Ле Әли готә ԝи: «Мьн гази тә нәкьрийә. Һәрʹә, бькʹәвә нав щийа у рʹазе». Самуйел вәгәрʹийа у кʹәтә нав щийа. Самуйел щара дӧда әԝ дәнг бьһист. Ле кʹәнге әԝи щара сьсийа әԝ дәнг бьһист, Әли фәʹм кьр, ԝәки Йаһоԝа гази Самуйел дькә. Әԝи готә Самуйел, һәрге тӧ диса щарәке әԝи дәнги бьбьһейи, гәрәке бежи: «Йаһоԝа, бежә, хӧламе тә гӧһ дьдә тә».

Самуйел чу, кʹәтә нав щийе хԝә у диса дәнг бьһист: «Самуйел! Самуйел!» Әԝи щаб да у гот: «Бежә, хӧламе тә гӧһ дьдә тә». Йаһоԝа готә ԝи: «Бежә Әли, ԝәки әзе ԝи у малбәта ԝи щәза кьм. Әԝ занә, ԝәки кӧрʹед ԝи тьштед хьраб коне мьнда дькьн, ле әԝ бона ԝе йәке тьштәки накә». Сьбәһе зу, чаԝа һәр гав Самуйел чу, дәре кон вәкьр, ле дьтьрсийа бежә Әли дәрһәԛа ԝе йәке, чь кӧ Йаһоԝа ԝирʹа гот. Әли әԝ йәк тʹәхмин кьр, гази ԝи кьр у жь ԝи пьрси: «Кӧрʹе мьн, Йаһоԝа ԛә чь готә тә? Һәр тьшти мьнрʹа бежә». У Самуйел һәр тьшт Әлирʹа гьли кьр.

Ԝәʹдә дәрбаз дьбу у Самуйел мәзьн дьбу, у Йаһоԝа һәртʹьм тʹәви ԝи бу. Тʹәмамийа Исраеледа щьмәʹт пеһʹәсийа, ԝәки Йаһоԝа Самуйел жьбартийә, кӧ әԝ бьбә пʹехәмбәр у һʹакьм.