Һәр сал 14 нисане, Щьһу Щәжьна Дәрбазбуне дәрбаз дькьрьн. Әԝ щәжьн дькьрә бира ԝан, ԝәки Йаһоԝа ԝана жь дилтийа Мьсьре аза кьр у бьрә Әʹрде Создайи. Сала 33 Д.М., Оршәлимеда Иса у шагьртед ԝи маләкеда, отʹаха жорьнда тʹоп бьбун, ԝәки Щәжьна Дәрбазбуне дәрбаз кьн. Хьлазийа шиве, Иса готә ԝан: «Йәк жь ԝә, ԝе мьн бьдә дәсте дьжмьнед мьн». Шагьрт гәләк әʹщебмайи ман у жь Иса пьрсин: «Кʹе ԝе әԝе йәке бькә?» Иса гот: «Кʹижанирʹа әзе әԝи нани бьдьм, әԝ ә». Һьнге Иса нан да дәсте Щьһуда Исхәрйоти. Әԝ дәрберʹа рʹабу у жь оде дәркʹәт.

Паше Иса дӧа кьр, нан кәр кьр у да шагьртед хԝә. Әԝи гот: «Әԝи нани бьхԝьн. Әԝ те һʹәсабе бәдәна мьн, йа кӧ әзе сәва ԝә бьдьм». Паше әԝи дӧа кьр, шәрав һьлда у да ԝан. Әԝи гот: «Әве шәраве вәхԝьн. Әԝ те һʹәсабе хуна мьн, йа кӧ әзе бона бахшандьна гӧне ԝә бьрʹежьм. Әз соз дьдьмә ԝә, ԝәки һуне тʹәви мьн сәр әʹзмана бьбьнә пʹадша. Һәр сал әԝе щәжьне бона биранина мьн дәрбаз кьн». Һʹәта рʹожа иро пәйчуйед Иса һәр сал ԝе еваре тʹоп дьбьн. Рʹожа иройин әԝ щәжьн те навкьрьне Евара Биранина Мьрьна Иса.

Паши шиве, шагьртед ԝи кʹәтьнә дәʹве, һәла кʹе жь ԝан йе һәри мәзьн ә. Ле Иса готә ԝан: «Йе һәри мәзьн әԝ ә, кʹе хԝә йе һәри бьчʹук һʹәсаб дькә у хԝә бьльнд накә».

Иса бәрдәԝам кьр у гот: «Һун һәвалед мьн ьн. Әз һәр тьшти дьвежьмә ԝә, чь кӧ Баве мьн тʹәми мьн кьр. Зутьрәке әзе һәрʹьм щәм Баве хԝә сәр әʹзмана. Һуне вьра бьминьн, у мәрьв ԝе ԝә нас кьн, ча шагьртед мьн, һәрге һун һәвдӧ һʹьз бькьн. Һун гәрәке һәвдӧ һʹьз бькьн, чаԝа әз ԝә һʹьз дькьм».

Паше Иса дӧа кьр у жь Йаһоԝа лава кьр, ԝәки һʹәму шагьртед ԝи хԝәй кә. У гот, ԝәки али ԝан бькә йәктийе хԝәй кьн. Әԝи дӧа кьр, ԝәки наве Йаһоԝа пироз бә. Паше Иса у шагьртед ԝи бь кʹьлама пәсьн данә Йаһоԝа у жь мал дәркʹәтьн. Ԝәʹдә гьһиштьбу, ԝәки Иса бьһата гьртьне.

Иса у шагьртед ԝи жь Нәԝала Ԛьдроне чунә сәр Чʹийайе Зәйтʹуне. Ида ниве шәвебу у һив тʹьжә бу. Гава әԝана гьһиштьнә бахче Гетшәмани, Иса шагьртарʹа гот: «Вьра бьн у һʹьшйар бьминьн». У Иса һьнәки пешда чу у кʹәтә сәр чока. Бь кʹәл-бин әԝи Йаһоԝарʹа дӧа кьр у гот: «Бьра хԝәстьна тә бә». Йаһоԝа мәләк шанд, ԝәки бәр дьле Исада бе. Чахе Иса вәгәрʹийа бал шагьрта, әԝи дит ԝәки әԝана хәԝрʹа чунә. Иса гот: «Һʹьшйар бьн! Ньһа ԝәʹде хәԝе нинә! Ԝәхт һат, ԝәки әз бькʹәвьмә дәсте дьжмьнед хԝә».

Ԝәʹдә шунда, Щьһуда тʹәви гәләк әскәра пе шурʹа у дара һатьнә бахчә. Щьһуда заньбу кʹидәре дькарә рʹасти Иса бе, чьмки әԝана гәләк щар тʹәвайи ԝи бахчәйида тʹоп дьбун. Щьһуда готә әскәра, ԝәки ԝе нишане бьдә ԝан, кӧ Иса кʹижан ә. Әԝ бәрбь Иса чу у гот: «Сьлав ль тә, Дәрсдар», у незик бу ԝи пачʹ кьр. Иса готе: «Щьһуда, тӧ пе пачʹкьрьне мьн дьфьроши?»

Иса бәрбь әскәра чу у ԝана пьрси: «Һун кʹе дьгәрʹьн?» Ԝана гот: «Исайе жь Ньсрәте». Паше Иса гот: «Әԝ әз ьм», әԝана ӧса әʹщебмайи ман, ԝәки пьштосан кʹәтьн. У Иса щарәке жи жь ԝан пьрси: «Һун кʹе дьгәрʹьн?» Ԝана диса гот: «Исайе жь Ньсрәте». Иса гот: «Мьн ԝәрʹа гот, әԝ әз ьм. Шагьртед мьн бәрʹдьн».

Гава Пәтрус фәʹм кьр чь дьԛәԝьмә, әԝи шур дәрхьст у гӧһе хӧламе сәрәккʹаһин бьри. Ле Иса дәст да гӧһе ԝи у ԛәнщ кьр. Иса готә Пәтрус: «Шуре хԝә бькә щи. Кʹе шур бьдә хәбате, ԝе пе шур жи бе кӧштьне». Әскәра Иса гьртьн у дәсте ԝи гьредан, ле шагьрта ԝи һиштьн у рʹәвин. Ԝан әскәра ԝи бьрьнә щәм Һәнане сәроке кʹаһина. Һәнана дәстпекьр пьрса бьдә Иса у паше ԝи шандә бал Ԛәйафа сәрәккʹаһин. Ле чь һатә сәре шагьрта?

Гава Иса тʹәви шагьртед хԝә шив дәрбаз дькьр, әԝи готә ԝан: «Һәр кәс жь ԝә, ԝе шәве ԝе мьн бьһелә». Пәтрус гот: «На! Һәрге һәр кәс тә бьһелә, әзе тʹӧ щар тә нәһельм». Ле Иса готә Пәтрус: «Ишәв пешийа бангдана дик, тӧйе се щара бежи, ԝәки тӧ мьн нас наки».

Чахе әскәра Иса бьрьнә мала Ԛәйафа, һәчʹи зәʹф жь шагьрта, Иса һиштьн. Ле дӧ шагьрт нава әʹлаләтеда пәй Иса дьчун. Йәк жь ԝан Пәтрус бу. Әԝ кʹәтә һʹәйата Ԛәйафа у бәр кӧчʹьк хԝә гәрм дькьр. Бәр рʹонайа агьр хӧламәки сәрчʹәʹве Пәтрус дит у гот: «Мьн тӧ нас кьри! Тӧ жи тʹәви Иса буйи!»

Пәтрус гот: «На, әԝ әз нибум! Әз фәʹм накьм дәрһәԛа чь тӧ дьбежи!» Әԝи дьхԝәст хԝә вәшарта у бәрбь дәргәһ чу. Ле ԝедәре хӧламә дьн әԝ дит у готә щьмәʹте: «Әԝ мәрьв тʹәви Иса бу!» Пәтрус гот: «Әз нә жи ԝи нас дькьм!» Мерәки жи гот: «Тӧ йәк жь ԝан и! Пе хәбәрдана тә те кʹьфше, ԝәки тӧ жи чаԝа Иса жь Щәлиле йи». Ле Пәтрус сонд хԝар у гот: «Әз ԝи нас накьм!»

Һәма ԝе дәме дик банг да. У Пәтрус дит ча Иса зьвьрʹи у ԝи ньһерʹи. Хәбәред Иса кʹәтьнә бира ԝи, әԝ дәркʹәтә дәрва у кʹәлә-кʹәл гьрийа.

Ԝи чахи Щьвина Гьрәгьра тʹоп бу, сәва кӧ мала Ԛәйафада диԝана Иса бькьн. Ԝана пешда сафи кьрьбун, ԝи бькӧжьн у бона ԝе йәке мәʹни дьгәрʹийан. Ле нькарьбун тʹӧ мәʹни бьдитана. Һьнге Ԛәйафа жь Иса пьрси: «Тӧ Кӧрʹе Хԝәде йи?» Иса гот: «Бәле». Ԛәйафа гот: «Мәʹникә дьн мәрʹа нәлазьм ә. Әԝ кʹьфьрийа дькә!» Һʹакьм ԛайил бун у готьн: «Әԝ гәрәке бе кӧштьне». Һьнге ԝана шәмаԛа данә Иса, тʹуйи ԝи кьрьн, чʹәʹве ԝи гьредан, данә бәр кʹӧлма у дьготьнә ԝи: «Һәрге тӧ пʹехәмбәр и, бежә, әԝ кʹе бу тә хьст!»

Гава сьбәһ сафи бу, ԝана Иса бьрьнә Щьвина Гьрәгьра у ԝедәре диса жь ԝи пьрсин: «Тӧ Кӧрʹе Хԝәде йи?» Иса щаба ԝан да у гот: «Ԝә хԝәха гот, ԝәки әз әԝ ьм». Ԝана ԝи нәһәԛ кьрьн, ԝәки йан чь әԝ кʹьфьрийа дькә у бьрьнә мала Понтийо Пилато, йе кӧ сәрԝере Рʹоме бу. Ле гәло паше чь ԛәԝьми? Ԝәрен әм пебьһʹәсьн.

Сәрокед кʹаһина Иса бьрьнә бал Пилато. Пилато ԝана пьрси: «Әԝи мәрьви чь нәһәԛи ԝә кьрийә?» Ԝана гот: «Әԝ дьбежә, ԝәки әԝ пʹадша йә!» Пилато Иса пьрси: «Тӧ йи Пʹадше Щьһудайе?» Иса гот: «Пʹадшатийа мьн, нә жь ве дьне йә».

Паше Пилато Иса шандә бал Һеродәс сәрԝере Щәлиле, ԝәки әԝ тьштәки мьԛабьли ԝи бьвинә. Һеродәс тьштәки хьраб Исада нәдит у ԝи пашда шандә бал Пилато. Паше Пилато готә щьмәʹте: «Нә Һеродәс, нә жи мьн тьштәки хьраб ԝида нәдит. Ләма жи әзе ԝи аза кьм». Щьмәʹте кьрә ԛарʹини: «Ԝи бькӧжьн! Ԝи бькӧжьн!» Әскәра Иса данә бәр ԛамчийа, тʹуйи ԝи дькьрьн у ԝи дькʹӧтан. Ԝана тʹащәк жь стьрийа вәгьрти, данә сәр сәре ԝи у бь ԛәрфа дьготьн: «Хԝәш бә, Пʹадше Щьһуда!» Пилато диса готә щьмәʹте: «Мьн тьштәки хьраб ԝи мәрьвида нәдитийә». Ле әԝана сәр йа хԝә сәкьнин у готьн: «Ԝи дарда кьн!» Һьнге Пилато ԝи да дәсте әскәра, ԝәки ԝи бькӧжьн.

Ԝана ԝи бьрьнә Голготайе у ԝедәре сәр стуне мьх кьрьн. Иса дӧа кьр: «Баво бьбахшинә ԝана, чьмки әԝана ньзаньн чь дькьн». Щьмәʹте ԛәрфе хԝә Иса дькьрьн у дьготьн: «Һәрге тӧ Кӧрʹе Хԝәде йи, жь стуне пәйа бә! Хԝә хьлаз кә».

Йәк жь ԛачаха, йе кӧ кʹеләка Иса дардакьри бу, готә ԝи: «Гава бькʹәви Пʹадшатийа хԝә, мьн бькә бира хԝә». Иса соз да ԝи у гот: «Тӧйе тʹәви мьн Щьнәтеда би». Нивро тәʹри кʹәтә әʹрде у се сьһʹәт кʹьшанд. Һьнә шагьрт бәр стуне сәкьни бун, Мәрйәм дийа Иса жи нава ԝанда бу. Иса готә Йуһʹәнна, ԝәки мьԛати Мәрйәме бә ча мьԛати дийа хԝә.

Ахьрийе Иса гот: «Тʹәмам ԛәԝьми!» Әԝи сәре хԝә дахьст у мьр. Ԝе дәме әʹрд һʹәжийа, пʹарьстгәһеда пʹәрʹда ортʹа Пироз у Һәри Пирозда бу дӧһ пʹара. Һьнге сәрԝерәки әскәра гот: «Әԝ бь рʹасти Кӧрʹе Хԝәде бу».

Паши мьрьна Иса, мәрьвәки дәԝләти, наве ԝи Усьв бу, чу бал Пилато у изьн хԝәст, ԝәки бәдәна Иса жь стуне пәйа кә. Усьв бәдәна ԝи бь рʹуне бинхԝәш рʹун кьр, пе кʹьтан кʹәфән кьр у бәдәна ԝи дани тʹьрба тʹәзә. У дәре тʹьрбе пе кәвьрәки мәзьн дада. Сәрокед кʹаһина готьнә Пилато: «Әм дьтьрсьн, ԝәки йәк жь шагьртед ԝи дькарә бәдәна ԝи дьзива бьвә у бежә, ԝәки әԝ сах буйә».

Се рʹож паши мьрьна Иса, чәнд кʹӧлфәт һатьнә бәр тʹьрба Иса у дитьн, ԝәки дәре тʹьрбе вәкьри йә. Мәләк һьндӧре тʹьрбеда бу у әԝи готә ԝан: «Нәтьрсьн. Иса жь мьрьне рʹабуйә. Бежьнә шагьртед ԝи, ԝәки һәрʹьнә Щәлиле у рʹасти ԝи бен».

Мәрйәма Мәждәлани ләзә-ләз чу щәм Пәтрус у Йуһʹәнна. Әԝе готә ԝан: «Щьнйазе Иса бьрьнә!» Пәтрус у Йуһʹәнна бәрбь тʹьрбе рʹәвин. Ԝана дит,ԝәки тʹьрб вала йә у пашда вәгәрʹийанә малед хԝә.

Чахе Мәрйәм пашда вәгәрʹийа тʹьрбе, әԝе дӧ мәләк һьндӧре тʹьрбеда дит, у готә ԝан: «Щьнйазе Иса һьлданә у әз ньзаньм ԝи бьрьнә кʹидәре». Ньшкева Мәрйәм мәрьвәк дит у фькьри, ԝәки әԝ бахчәван ә у жь ԝи пьрси: «Хайе мьн, һәрге тә бәдәна Иса һьлда йә, бежә мьн, тә ԝи данийә кʹӧ». Ле гава әԝи гот, «Мәрйәм!» әԝе перʹа-перʹа фәʹм кьр, ԝәки әԝ Иса йә. Әԝе бь дәнге бьльнд гот: «Дәрсдар!» у ԝи һʹәмез кьр. Иса готә ԝе: «Һәрә бал бьред мьн у бежә ԝан, ԝәки тә әз дитьмә». Һәма ԝе дәме Мәрйәм рʹабу чу бал шагьрта у гот, ԝәки әԝе Иса дит.

Ԝе рʹоже дӧ шагьртед Иса жь Оршәлиме дьчунә Әмԝасе. Рʹева мәрьвәк незики ԝан һат у пьрси, кӧ әԝана дәрһәԛа чь хәбәр дьдьн. Ԝана готә ԝи: «Ле тә дәрһәԛа ԝе йәке нәбьһистийә? Се рʹож пешда сәрокед кʹаһина Иса данә кӧштьне. Ле ньһа чәнд жьн дьбежьн, ԝәки әԝ сах ә!» Әԝи гот: «Һун баԝәрийа хԝә пʹехәмбәра найньн? Ԝана пешда дьгот, ԝәки Мәсиһ ԝе бе кӧштьне, у паше ԝе бе сахкьрьне». Әԝи дәстпекьр дәрһәԛа Ньвисаред Пироз ԝанарʹа шьровәкә. Гава әԝана һатьн Әмԝасе, шагьрта жь ԝи мәрьви лава кьрьн, ԝәки тʹәви ԝан бьминә. Ԝәʹде нан-хԝарьне, кʹәнге әԝи нан һьлда у дӧа кьр, шагьрта фәʹм кьр, ԝәки әԝ Иса йә. У ньшкева әԝ ӧнда бу.

Дӧ шагьрт пашда вәгәрʹийанә Оршәлиме бал шагьртед дьн у гьли кьрьн һәр тьшт чь кӧ ԛәԝьми. Ԝе маледа кʹидәре әԝана тʹоп бьбун, ньшкева Иса һатә хԝәйане. Шагьрта перʹа-перʹа фәʹм нәкьрьн, ԝәки әԝ Иса йә. У Иса готә ԝан: «Һәла дәсте мьн бьньһерьн у дәсте хԝә бьдьнә мьн. Чаԝа һатьбу пʹехәмбәртикьрьне, Мәсиһ жь мьрьне рʹабу».

Һьнә ԝәʹдә паши ԝе йәке, чахе Иса шагьртарʹа әʹйан бу, Пәтрус сафи кьр һәрʹә Бәʹра Щәлиле, ԝәки мәʹсийа бьгьрә. Тʹума, Аԛуб, Йуһʹәнна у йед дьн тʹәви ԝи чун. Тʹәмамийа шәве ԝана тʹӧре хԝә авитьбунә аве, ле ԛә мәʹсик нәгьртьн.

Бәрбанге, бәр дәве бәʹре ԝана мерәк дит. Әԝи бь дәнге бьльнд ԝана пьрси: «Ԝә ԛә мәʹси гьрт?» Ԝана готә ԝи: «На!» Һьнге әԝи гот: «Тʹоре хԝә бавежьнә алийе рʹасте». Әԝана гӧрʹа ԝи кьрьн, у тʹоре ԝан ӧса тʹьжә мәʹси бу, ԝәки ԝана нькарьбун тʹор жь аве дәрхьстана. Ԝи чахи Йуһʹәнна фәʹм кьр, ԝәки әԝ мер Иса йә у бь дәнге бьльнд гот: «Әԝа Иса йә!» Ԝе дәме Пәтрус банзда кʹәтә аве у бәрбь Иса чу. Ле шагьртед дьн пе ԛәйьке гьһиштьнә дәве бәʹре.

Гава әԝана гьһиштьнә дәве бәʹре, ԝана нан дит у сәр агьр мәʹси дьһатә чекьрьне. Иса готә шагьрта, ԝәки чәнд мәʹсийа биньн, йед кӧ ԝана гьртьбу. У ԝаньрʹа гот: «Ԝәрен тәʹште бьхԝьн».

Паши нан-хԝарьне, Иса жь Пәтрус пьрси: «Тӧ мьн жь мәʹсигьртьне зедәтьр һʹьз дьки?» Пәтрус гот: «Бәле, тӧ зани, ԝәки әз тә дьһа зәʹф һʹьз дькьм». Иса гот: «Бәрхед мьн бьчʹеринә». Иса щара дӧда ԝи пьрси: «Тӧ мьн һʹьз дьки?» Пәтрус гот: «Иса, нә тӧ зани, ԝәки әз тә һʹьз дькьм». Иса готә ԝи: «Шьвантийе пәзед мьн бькә». Иса щара сьсийа пьрси. Һьнге дьле Пәтрус гәләк ешийа у әԝи гот: «Хӧдан, тӧ һәр тьшти зани. Тӧ зани, ԝәки әз тә һʹьз дькьм». Иса гот: «Бәрхед мьн бьчʹеринә», у зедә кьр: «Бәрдәԝам кә пәй мьн ԝәре».

Щәлиледа, Иса рʹасти шагьртед хԝә һат. Әԝи тʹәмийа фәрз да ԝан у гот: «Һәрʹьн у һʹәму мьләта һин кьн. Әԝ тʹәмийед кӧ мьн данә ԝә, ԝана һин кьн у бьньхӧминьн». Иса соз да ԝан: «Бьзаньбьн, ԝәки әзе тʹьме тʹәви ԝә бьм».

Иса паши сахбуине 40 рʹожа бь сәда шагьртарʹа әʹйан дьбу, чаԝа Щәлиледа ӧса жи Оршәлимеда. Әԝи тьштед фәрз ԝана һин кьр у гәләк кʹәрәмәт кьр. Щара пашьн Иса сәр Чʹийайе Зәйтʹуне рʹасти шагьртед хԝә һат. Әԝи готә ԝан: «Жь Оршәлиме нәчьн. Бәрдәԝам кьн һивийа ԝе йәке бьн, чь кӧ Бав соз дайә ԝә».

Шагьрта фәʹм нәкьрьн, дәрһәԛа чь әԝ дьбежә у жь ԝи пьрсин: «Ньһа тӧйе бьби Пʹадше Исраеле?» Иса щаба ԝан да у гот: «Йаһоԝа һʹәсаб дькә, ԝәки әԝ ԝәʹдә һе нәһатийә, ԝәки әз бьбьмә Пʹадша. Зутьрәке һуне ԛәԝата рʹӧһʹе пироз бьстиньн у бьбьнә шәʹдед мьн. Һәрʹьнә Оршәлиме, Щьһустане, Самәрйайе у һʹәта сәре дьне шәʹдәтийе бьдьн».

Паши Иса вәгәрʹийа әʹзмана, у әʹԝр әԝ жь бәр чʹәʹве ԝан вәшарт. Шагьрт сәкьнибун у жор дьньһерʹин, ле Иса ида нәдьһатә кʹьфше.

Шагьрт жь Чʹийайе Зәйтʹуне пәйа бун у чунә Оршәлиме. Әԝана һәртʹьм маләкеда, отʹаха жорьнда тʹоп дьбун, дӧа дькьрьн у һивийа рʹебәрийа Иса бун.

Дәһ рʹож паши ԝе йәке ча Иса чу сәр әʹзмана, шагьртед ԝи рʹӧһʹе пироз стандьн. Әԝ йәк ԛәԝьми Рʹожа Пенщийе Һʹәсабе, сала 33 Д.М., гәләк мәрьв жь щурʹә-щурʹә щийа һатьнә Оршәлиме. Маләкеда отʹаха жорьнда 120 шагьртед Иса тʹоп бьбун. Ньшкева тьштәки әʹщебмайи ԛәԝьми. Сәр сәре һәр шагьртәки тьштәк мина агьр векʹәт у әԝана сәр щурʹә-щурʹә зьмана дәстпекьрьн хәбәр дьн. Ньшкева дәнг һат, те бежи баки ԛәԝи ԝе отʹахеда рʹабу.

Әԝ мәрьв, йед кӧ жь щийед дьн һатьбунә Оршәлиме, әԝ дәнг бьһистьн у рʹәвин бәрбь ԝе мале, ԝәки пебьһʹәсьн ԝедәре чь ԛәԝьми. Әԝана гәләк зәндәгьрти ман чахе дитьн, ԝәки шагьрт сәр щурʹә-щурʹә зьмана хәбәр дьдьн. Ԝана гот: «Әԝ мәрьв жь Щәлиле нә. Чаԝа әԝана дькарьн сәр зьмане мә хәбәр дьн?»

Пәтрус у шагьртед дьн бәр ԝан мәрьва сәкьнин. Пәтрус готә ԝан, ԝәки Иса һатьбу кʹӧштьне, ле Йаһоԝа ԝи жь мьрьне рʹакьр. Пәтрус гот: «Ньһа Иса сәр әʹзмана йә у кʹеләка Хԝәде, алийе рʹасте рʹуньштийә у чаԝа әԝи соз дабу, ԝәки ԝе рʹӧһʹе пироз бьдә мә, әԝи ӧса жи кьр. Ләма жи ньһа һун ԝе кʹәрәмәте дьвиньн».

Хәбәред Пәтрус гәләк сәр щьмәʹте һʹӧкӧм кьрьн у ԝана жь ԝи пьрси: «Чь әм гәрәке бькьн?» Пәтрус готә ԝан: «Гӧне хԝә бьдьнә рʹуйе хԝә у бь наве Иса ԝәрьнә ньхӧмандьне. Ԝи чахи һуне жи рʹӧһʹе пироз бьстиньн». Ԝе рʹоже 3 000 мәрьв һатьнә ньхӧмандьне. Жь ԝи чахи Оршәлимеда шагьрт зедә у зедә дьбун. Пе ԛәԝата рʹӧһʹе пироз шагьрта гәләк щьват саз кьрьн, сәва кӧ мәрьва тʹәмийед Иса һин кьн.

Һәр рʹож бәр дәргәһе пʹарьстгәһе, мәрьвәки сәԛәт йе кӧ нькарьбу рʹе бьчуйа, пʹарс дькьр. Рʹожәке әԝи дит, ԝәки Пәтрус у Йуһʹәнна тенә пʹарьстгәһе. Әԝи готә ԝан: «Лава дькьм, тьштәки бьдьнә мьн». Пәтрус готә ԝи: «Әзе тьштәки ӧса бьдьмә тә, ԝәки жь пʹәра четьр ә. Бь наве Иса, рʹабә сәр пʹийа у рʹе һәрʹә!» Паше Пәтрус али ԝи кьр, әԝ рʹабу сәр пʹийа у рʹе чу. Мәрьвед кӧ әԝ кʹәрәмәт дитьн, гәләк ша бун у баԝәрийа хԝә Иса анин.

Ле кʹаһин у Садуԛи гәләк һерс кʹәтьн. Ԝана шагьрт гьртьн у бьрьнә диԝане у жь ԝан пьрсин: «Ԝә әԝ ԛәԝат жь кӧ стандийә? Ԝә ча карьбу ԝи мәрьви ԛәнщ кьн?» Пәтрус гот: «Мә әԝ ԛәԝат жь Иса Мәсиһ стандийә, кʹижан ԝә кӧшт». Сәрԝера кьрьнә ԛарʹини: «Бәсә дәрһәԛа Иса хәбәр дьн!» Ле шагьрта гот: «Әме дәрһәԛа ԝи хәбәр дьн у тʹӧ щар хԝә кәрʹ накьн».

Чахе Пәтрус у Йуһʹәнна бәрдан, әԝана чунә щәм шагьртед дьн у ԝанарʹа гьли кьрьн чь һатә сәре ԝан. Паше ԝана тʹәвайи дӧа кьр у готьн: «Йаһоԝа лава дькьн, мерхасийе бьдә мә, ԝәки әм шьхӧлед тә биньн сери». Йаһоԝа рʹӧһʹе пироз да ԝан у ԝана бәрдәԝам кьр мьзгинийа хере бәла кьн у мәрьва ԛәнщ кьн. Гәләк мәрьв бунә баԝәрмәнд. Сәва ԝе йәке Садуԛи гәләк һерс кʹәтьн у шагьрт авитьнә кәле. Ле ве шәве, Йаһоԝа мәләк шанд, әԝи дәре кәле вәкьр у готә шагьрта: «Вәгәрʹьн пʹарьстгәһе у бәрдәԝам кьн ԝедәре щьмәʹте һин кьн.

Сьвәтьре, Щьвина Гьрәгьра сәва диԝане тʹоп бун у ԝанарʹа готьн: «Дәре кәле дадайи йә, ле һьндӧрда тʹӧ кәс тʹӧнә йә! Әԝ мәрьвед, кӧ ԝә кьрә кәле, ньһа пʹарьстгәһеда щьмәʹте һин дькьн!» Диса шагьрт гьртьн у бьрьнә сәр Щьвина Гьрәгьра. Сәрәккʹаһин готә ԝан: «Нә мә ԝәрʹа гот дәрһәԛа Иса хәбәр нәдьн!» Ле Пәтрус гот: «Әм гәрәке гӧрʹа Хԝәде бькьн, нә кӧ гӧрʹа мәрьва».

Щьвина Гьрәгьра гәләк һерс кʹәт у сафи кьрьн шагьрта бькӧжьн. Ле ньшкева Ферьсәк бь наве Гамалйел рʹабу у гот: «Ләз нәкʹәвьн! Дьԛәԝьмә Хԝәде тʹәви ԝан ә. Һун дьхԝазьн һьмбәри Хԝәде шәрʹ кьн?» Ԝана гӧһ данә хәбәред ԝи, шагьрт пе ԛамчийа кʹӧтан у готьнә ԝан, ԝәки ида хьзмәт нәкьн. Ле тʹӧ тьшти нькарьбу ԝана бьда сәкьнандьне. Ԝана бәрдәԝам дькьр бь мерхаси мьзгинийа хере бәла кьн пʹарьстгәһеда, ӧса жи мал бь мал.

Шаԝул бажарване Рʹоме бу, әԝ Тарсуседа һатьбу буйине. Әԝ Ферьси бу у Ԛануна Щьһуйа рʹьнд заньбу, әԝи Мәсиһийа нәфрʹәт дькьр. Әԝ дькʹәтә малед Мәсиһийа, ԝана дьгьрт у давитә кәле. Щарәке Шаԝул сәкьнибу у дьньһерʹи ча щьмәʹта һерс пе кәвьра Стәйфан дькӧштьн.

Ле Шаԝул нә тʹәне Оршәлимеда пәй Мәсиһийа дькʹәт. Шаԝул готә сәрәккʹаһин, ԝәки изьне бьдә ԝи һәрʹә шәһәре Шаме у ԝедәре жи Мәсиһийа бьдә гьртьне. Гава Шаԝул незики шәһәр дьбу, ньшкева рʹонкайа жь әʹзмен дора ԝи шәԝԛ да у әԝ әʹрде кʹәт. Әԝи дәнг бьһист кӧ готә ԝи: «Шаԝул, чьма тӧ пәй мьн кʹәти?» Шаԝул гот: «Тӧ кʹе йи?» Әԝи гот: «Әз Иса мә. Һәрʹә Шаме у тӧйе пебьһʹәси чь гәрәке бьки». Ԝе дәме Шаԝул кор бу, мәрьвед кӧ тʹәви ԝи бун мьле ԝи гьртьн у бьрьнә шәһәр.

Шамеда Мәсиһики амьн дьма, наве кʹижани Һананийа бу. Иса хәԝн-хәйаледа готә ԝи: «Һәрʹә кʹуча кӧ жерʹа Рʹаст дьбежьн, мала Щьһудада, бона Шаԝул бьпьрсә». Һананийа гот: «Хӧдан, әз һʹәму тьшти дәрһәԛа ԝи мәрьви заньм! Әԝ пәй шагьртед тә дькʹәвә у ԝана дькә кәле». Ле Иса гот: «Һәрʹә щәм ԝи. Мьн Шаԝул жьбартийә, ԝәки әԝ мьзгинийа хере нава гәләк мьләтада бәла кә».

Һананийа чу пәй Шаԝул у гава ԝи дит, готе: «Шаԝул, бьре мьн, Иса мьн шанд, ԝәки тӧ бькарьби диса бьвини». Һәма ԝе дәме чʹәʹве Шаԝул вәбун. Әԝи дәстпекьр дәрһәԛа Иса занәбуне бьстинә у бу шагьрте ԝи. Әԝ һатә ньхӧмандьне чаԝа Мәсиһи у кʹьништада тʹәви Мәсиһийед дьн рʹастийе һин дькьр. Бьдә һʹәсабе хԝә, мәрьвед Щьһу чьԛас әʹщебмайи дьман, чахе дьдитьн, ԝәки Шаԝул дәрһәԛа Иса щьмәʹте һин дькә! Ԝана дьгот: «Гәло әԝ нә әԝ мәрьв ә, кʹижан пәй шагьртед Иса дькʹәт?»

Шаԝул ԝәкә се сала шәһәре Шамеда хьзмәт дькьр. Щьһуйа Шаԝул нәфрʹәт дькьрьн у һәв дьшеԝьрин ча ԝи бькӧжьн. Шагьрт дәрһәԛа ԝе йәке пеһʹәсийан у али Шаԝул кьрьн, ԝәки әԝ хьлаз бә. Диԝаре дора шәһәрда ԛӧл һәбу, ԝана ԝи кьрьнә сәвәте у ԝе ԛӧлерʹа дахьстьн.

Чахе Шаԝул һатә Оршәлиме, әԝи дьхԝәст рʹасти бьред ԝедәре бе. Ле әԝана гәләк ԝи дьтьрсийан. Ләма шагьртәки рʹәм бь наве Барнабас, тʹәви Шаԝул һатә бал шагьрта у ԝана да баԝәркьрьне, ԝәки Шаԝул һатийә гӧһастьне. Шаԝул тʹәви щьвата Оршәлиме дәстпекьр бь хирәт мьзгинийа хере бәла кә. Ԝәʹдә шунда ԝи нас дькьрьн чаԝа Паԝлос.

Ԛәйсәрйайеда мерәки бь наве Корʹнелйо дьжит, әԝ сәрсәде ордийа Рʹоме бу. Рʹаст ә әԝ Щьһу нибу, ле Щьһуйа ԛәдьре ԝи дьгьртьн. Әԝ йәки рʹәм бу у алийе кʹәсиба дькьр. Корʹнелйо баԝәрийа хԝә Йаһоԝа дьани у һәртʹьм ԝирʹа дӧа дькьр. Рʹожәке, мәләк Корʹнелйорʹа һатә хӧйане у готә ԝи: «Хԝәде дӧайед тә бьһист. Ньһа мәрьва бьшинә шәһәре Йафайе, кʹидәре Пәтрус дьминә у бежә, ԝәки бе бал тә». Һәма ԝе дәме Корʹнелйо се мер шандә Йафайе, кʹижан жь Ԛәйсәрйайе 50 километьра дур алийе башуре бу.

Ԝи чахи Йафайеда Пәтрус хәԝн-хәйал дит. Хәԝн-хәйаледа әԝи һʹәйԝан дитьн, йед кӧ Щьһуйарʹа изьн тʹӧнәбу бьхԝьн, у әԝи дәнг бьһист, кӧ дьготә ԝи, ԝан һʹәйԝана бьхԝә. Пәтрус әԝ йәк инкʹар кьр у гот: «Ле мьн тʹӧ щар әʹмьре хԝәда һʹәйԝанед һʹәрам нәхԝарийә». Һьнге дәнг готе: «Әԝ һʹәйԝанед, кӧ Хԝәде һʹәлал кьрийә, тӧ һʹәрам һʹәсаб нәкә». Хенщи ԝе йәке дәнг диса готә Пәтрус: «Се мер һатьнә пәй тә. Тʹәви ԝан һәрʹә». Пәтрус дәри вәкьр у жь ԝан мера пьрси, кӧ әԝана сәва чь һатьнә. Ԝана гот: «Сәрсәде ордийа Рʹоме, бь наве Корʹнелйо, әм шандьнә пәй тә, ԝәки тӧ тʹәви мә бейи Ԛәйсәрйайе, мала ԝи». Пәтрус ԝана сәр шәвәке тʹәглифи мала хԝә кьр. Рʹожа дьн әԝана тʹәви чәнд бьра жь Йафайе чунә Ԛәйсәрйайе.

Гава Корʹнелйо у Пәтрус рʹасти һәв һатьн, Корʹнелйо бәр ԝи кʹәтә сәр чока. Ле Пәтрус готә ԝи: «Рʹабә! Әз жи мәрьвәки мина тә мә. Тӧ зани, ԝәки әʹдәте Щьһуйа изьне надә мә, һәрʹьн мала нәщьһуйа. Ле Хԝәде готә мьн, ԝәки бемә мала тә. Жь кʹәрәма хԝә бежә мьн, тә чьма гази мьн кьр?»

Корʹнелйо готә Пәтрус: «Чар рʹож пешда мьн Хԝәдерʹа дӧа дькьр у мәләк мьнрʹа хӧйа бу у гот, ԝәки гази тә кьн. Лава дькьм, хәбәред Йаһоԝа мә һин кә». Пәтрус гот: «Ньһа әз дьвиньм, ԝәки Хԝәде фьрԛийе накә ортʹа мәрьва! Әԝ һәр кәси ԛәбул дькә кʹе дьхԝазә ԝирʹа хьзмәт кә». У Пәтрус ԝанарʹа гәләк тьшт дәрһәԛа Иса гьли кьр. Паше рʹӧһʹе пироз һатә сәр Корʹнелйо у сәр ԝан кʹе мала ԝида тʹоп бьбун, у һәр кәс жь ԝан һатә ньхӧмандьне.

Шагьрта гӧрʹа тʹәмийа Иса кьрьн у мьзгинийа хере сәр тʹәмамийа дьне бәла кьрьн. Сала 47 Д. М., бьрайед жь Әнтакйайе Паԝлос у Барнабас шандьнә рʹеԝитийе, сәва хьзмәтийе. Әԝ һәрдӧ хьзмәткʹаред хирәт, нав тʹәмамийа Асйа Бьчʹук рʹеԝити кьрьн, шәһәред ӧсада ча Дербә, Листра у Ԛонйайеда.

Паԝлос у Барнабас мьзгини һʹәмуйарʹа гьли дькьрьн, йед дәԝләтирʹа, кʹәсибарʹа, йед щаһьл у йед әʹмьрда мәзьнрʹа . Гәләк мәрьв рʹастийа дәрһәԛа Мәсиһ ԛәбул кьрьн. Щарәке Паԝлос у Барнабас дәрһәԛа рʹастийе гьли дькьрьн сәрԝере Кипрусрʹа, наве кʹижани Сәргийо Паԝлос бу. Ԝи чахи сербазәки дәстпекьр ԝана әʹщьз кә, ԝәки ԝана бьдә кәрʹкьрьне. Паԝлос готә ԝи сербази: «Бьра Йаһоԝа тә щәза кә». Һәма ԝе дәме сербаз кор бу. Гава Сәргийо Паԝлос әԝ йәк дит, әԝи дәстпекьр баԝәр кә.

Паԝлос у Барнабас һʹәму щийа хьзмәт дькьрьн, мал бь мал, базарада, рʹева у ӧса жи кʹьништада. Щарәке шәһәре Листрайеда ԝана мерәки тʹопал ԛәнщ кьрьн, һьнә мәрьва әԝ йәк дитьн у фькьрин, ԝәки әԝана хӧдан ьн у дәстпекьрьн сәре хԝә бәр ԝан дайньн. Ле Паԝлос у Барнабас ԝана дьданә сәкьнандьне у дьготьн: «Сәре хԝә бәр Хԝәде дайньн! Әм мәрьвнә мина ԝә нә». Паше һьнә меред Щьһу һатьн у щьмәʹт һьмбәри Паԝлос рʹакьрьн. Һьнге щьмәʹте пе кәвьра Паԝлос хьстьн, жь шәһәр дәрхьстьн у ԝедәре һиштьн, ԝәки әԝ бьмьрә. Ле Паԝлос сах ма! Бьра дәрберʹа һатьнә һәԝара ԝи у ԝи бьрьнә шәһәр. Һьнәк ԝәхт шунда Паԝлос вәгәрʹийа Әнтакйайе.

Сала 49 Д. М., Паԝлос рʹеԝитийа хьзмәткьрьна хԝәйә дӧда дәстпекьр. Әԝ вәгәрийа Асйа Бьчʹук, ԝәки сәрики бьред ԝедәре хә, у паше щийе дур, демәк Әԝрупайе, мьзгини бәла кьр. Әԝ чу Атʹинайе, Әфәсе, Филипйайе, Тʹесалонике у гәләк щийед дьн. Силас, Луԛа у хортәк, наве кʹижани Тимотейо бу, тʹәви ԝи чунә рʹеԝитийе. Ԝана тʹәвайи хьзмәт дькьрьн, ԝәки щьватед ну саз кьн у али ԝан бькьн, сәва кӧ әԝана рʹӧһʹанида ԛәԝи бьн. Паԝлос сал нивәке шәһәре Корьнтʹеда ма у бьрайе ԝедәре рʹӧһʹанида ԛәԝи дькьр. Әԝи хьзмәт дькьр у гәләк щьватарʹа нәʹмә дьньвиси. Әԝ ӧса жи дьхәбьти, әԝи чадьр дьдьрутьн. Паше Паԝлос вәгәрʹийа Әнтакйайе.

Ԝәʹдә шунда, сала 52 Д. М., Паԝлос рʹеԝитийа хьзмәткьрьна хԝәйә сьсийа Асйа Бьчʹукда дәстпекьр. Әԝ чу Филипйа бакʹӧре у паше чу шәһәре Корьнтʹи. Паԝлос чәнд сала Әфәседа дәрбаз кьр у ԝедәре мәрьв һин дькьр, ԝана ԛәнщ дькьр у аликʹари дьда щьвате. Ӧса жи әԝ һәр рʹож, авайе мәкʹтәбәкеда пе готарʹа дәрдькʹәт. Гәләка гӧһ дьданә ԝи у әʹмьре хԝә дьгӧһастьн. Ахьрийе, гава Паԝлос гәләк шәһәрада хьзмәт кьр, әԝ чу Оршәлиме.

Шәһәре Филипйайеда кәчʹькәкә хӧлам дьжит, йа кӧ щьн кʹәтьбуйе. Әԝе кәчʹьке кʹочʹәкти дькьр, у бь ԝе йәке хԝәйе хԝәрʹа гәләк пʹәрә чедькьр. Гава Паԝлос у Силас һатьнә Филипйайе, әԝ кәчʹьк гәләк рʹож пәй ԝан дьчу. Щьн зоре ԝе дькьр, ԝәки әԝ бькә ԛарә-ԛар: «Әв мәрьв хӧламе Хԝәдейе Һәри Жорьн ьн». Ахьрийе Паԝлос готә щьн: «Бь наве Иса Мәсиһ фәрмане дьдьмә тә, жь ԝе кәчʹьке дәре!» У перʹа-перʹа щьн жь ԝе дәркʹәт.

Хԝәйед ԝе кәчʹьке фәʹм кьрьн, ԝәки әԝе ида нькарьбә пʹәра ԝанарʹа чекә у ләма жи гәләк һерс кʹәтьн. Ԝана Паԝлос у Силас гьртьн, бьрьнә бал сәрԝеред шәһәр у готьн: «Әԝ мер пешбәри ԛануна дәртен у шәһәре мә тʹәвиһәв дькьн!» Сәрԝера фәрман дан, ԝәки Паԝлос у Силас бьдьнә бәр шьва у паше бавежьнә кәле. Нобәдаре кәле ԝана авитә щийе лапи кʹур у тәʹри, у ньге ԝан ԛәйдада шьданд.

Ԝедәре Паԝлос у Силас бь дьл Хԝәдерʹа дьстьран, гьртийед дьн жи гӧһ дьданә ԝан. Ньшкева, ниве шәве, әʹрд ԛайим һʹәжийа. Жь бо ԝе йәке дәред кәле вәбун, зьнщир у ԛәйд жь дәст-ньге гьртийа кʹәтьн. Нобәдар рʹәви щийе ԝан у дит, ԝәки дәред кәле вәкьри нә. Әԝи тʹьре һʹәму гьрти рʹәвинә у шуре хԝә кʹьшанд, ԝәки хԝә бькӧжә.

Һәма ԝе дәме Паԝлос кьрә гази: «Зийане нәдә хԝә! Әм һʹәму жи вьра нә!» Нобәдар кʹәтә һьндӧр у хԝә авитә бәр ньге Паԝлос у Силас. Әԝи ԝана пьрси: «Әз чь гәрәке бькьм, ԝәки хьлаз бьм?» Ԝана готә ԝи: «Тӧ у нәфәред тә гәрәке баԝәрийа хԝә Иса биньн у һуне хьлаз бьн». Паши ԝе йәке Паԝлос у Силас хәбәред Йаһоԝа ԝанарʹа гьли кьрьн, нобәдар тʹәви һʹәму нәфәред хԝә рʹасти ԛәбул кьрьн у һатьнә ньхӧмандьне.

Тимотʹейо бьраки щаһьл бу, жь щьвата шәһәре Листрайе. Баве ԝи Йунан бу, ле дийа ԝи Щьһу бу. Дийа ԝи Әйнька у пирка ԝи Лойиса, дәрһәԛа Йаһоԝа Тимотʹейо зарʹотийа ԝида һин дькьрьн.

Гава Паԝлос ԝәʹде рʹеԝитийа хԝәйә дӧда Листрайеда бу, әԝи дит, ԝәки Тимотʹейо бь дьл у щан хушк-бьра һʹьз дькә у бь рʹӧһʹе һазьрбуне али ԝан дькә. Паԝлос Тимотʹейо тʹәглиф кьр, ԝәки тʹәви ԝи рʹеԝитийе бькә. Ԝи ԝәʹдәйи Паԝлос Тимотʹейо һин дькьр, ԝәки бьбә хьзмәткʹарәки баш у дәрсдаре мьзгинийа хере.

Һʹәму щийа кʹидәре Паԝлос у Тимотʹейо дьчун, рʹӧһʹе пироз рʹебәрийа ԝан дькьр. Шәвәке, хәԝн-хәйаледа мерәки готә Паԝлос, ԝәки бе Макәдонйайе у али ԝан бькә. Ләма Паԝлос, Тимотʹейо, Силас у Луԛа чун, ԝәки ԝедәре хьзмәт кьн у щьвата саз кьн.

Ԝәлате Макәдонйайеда шәһәре Тʹесалоникида, гәләк мер у кʹӧлфәт бунә Мәсиһи. Ле һьнә Щьһуйа һʹәвсуди Паԝлос у һәвалед ԝи дькьрьн. Ләма жи ԝана щьмәʹт мьԛабьли ԝан рʹакьрьн у ԝан кʹаши бал сәрԝера кьрьн, у бь ԛарʹә-ԛарʹ готьн: «Әԝ мәрьв дьжмьне сәрԝере Рʹоме нә!» Әʹмьре Паԝлос у Тимотʹейо кʹәтә бьн ԛәзийе, ләма жи әԝана шәв рʹәвин шәһәре Бәройайе.

Бәройайеда щьмәʹте мьзгинийа хере бь дьл у щан ԛәбул кьрьн у чаԝа Йунани ӧса жи Щьһу бунә баԝәрмәнд. Паши ԝе йәке чәнд Щьһу жь Тʹесалоники һатьнә ԝедәре у чәтьнайи пешда анин, ләма жи Паԝлос чу шәһәре Атʹинайе. Ле Тимотʹейо у Силас Бәройайеда ман, ԝәки бьра ԛәԝи кьн. Ԝәʹдә шунда, Паԝлос Тимотʹейо пашда шандә Тʹесалоникийе, сәва кӧ ԝедәре али бьра бькә, ԝәки әԝана пәйкʹәтьнада амьн бьминьн. Паше Паԝлос Тимотʹейо дьшандә щурʹә-щурʹә щьвата, ԝәки әԝ тʹәсәлийа бьра бькә у һелане бьдә ԝан.

Паԝлос готә Тимотʹейо: «Һәр кәс, кʹе дьхԝазә Йаһоԝарʹа хьзмәт кә, ԝе рʹасти пәйкʹәтьна бе». Ахьрийе Тимойʹейо жи сәва баԝәрийа хԝә рʹасти пәйкʹәтьна һат у ԝи кьрьнә кәле. Ле йәкә әԝ ша дьбу, чьмки бь ԝе йәке әԝи амьнийа хԝә Йаһоԝарʹа избат кьр.

Паԝлос Филипйарʹа гот: «Әз Тимотʹейо дьшиньм бал ԝә. Әԝе али ԝә бькә, ԝәки һун фәʹм кьн, чь те һʹәсабе рʹастийеда бьмәшьн, у ԝе ԝә һин кә, ԝәки һун һе рʹьнд хьзмәт кьн». Паԝлос заньбу ,ԝәки әԝ дькарә итʹбарийа хԝә Тимотʹейо бинә. У әԝана гәләк сал һәвалхьзмәткʹаред гәләк баш бун.