Ль гор Кʹьтеба Пироз

Ньһерʹандьна Тә Һьндава Спортед Хоф Гәрәке Ча бә?

«РʹОЖЕД МӘДА ҺЕ ЗЕДӘ МӘРЬВ ДӘԜСА КӦ ДУРВА БЬНЬҺЕРʹЬН, ХԜӘХА ЖИ ХԜӘ ЖЬ ТӘЙАРЕ ПЕ ПАРАШУТЕ ДАВЕЖЬН, ЖЬ ЧʹИЙА ПЕ ТʹОГА БӘРЖЕР ДЬБЬН, СӘР АВЕД ГӦРГӦРӘРʹА ПЕ ԚАЙЬКЕ БӘРЖЕР ДЬБЬН У ӦСА ЖИ ХԜӘ ТʹӘВИ СӘМӘʹСИЙА АВЕ ДЬХЬН» (РʹОЖНАМӘ «THE WILLOW GLEN RESIDENT»).

ӘԜ ГОТЬНА жь рʹожнаме әʹйан дькә ньһерʹандьна мәрьва һьндава спорте. Һʹәԝаса гәләк мәрьва спортед ӧсарʹа те, мәсәлә кӧ хԝә пе парашуте бавежьн, чʹийайе бузрʹа һьлкʹьшьн, пе параплане бьфьрʹьн, у жь бьльндщийа банздьн (BASE jumping).a Әв йәк дьдә кʹьфше, ԝәки мәрьва хԝәш те тьштед ӧса бькьн, чь кӧ әʹмьре ԝан дькьнә бьн ԛәзийе. Мәрьв бь сайа сноуборде, ажотьна бисиклете сәр чʹийарʹа, скейтборде, солед пе тʹәкәрәка, хԝәавитьна жь бьльндщийа, дьхԝазьн ԝе йәке бькьн, чь кӧ жь синоред ԝан дәр ә. Журнала «Тʹайм» (Time) дьбежә, ԝәки «спортед хоф» дьһа бәла дьбьн, демәк спортед ӧса кӧ әʹмьре мәрьва дькьнә бьн ԛәзийе. Әв йәк дьдә кʹьфше, ԝәки хԝәстьна бь милйона мәрьва һәйә, кӧ «дәрбаз бьн жь ԝи синори, кʹидәре кӧ хофи, һостәти у тьрс тʹәвайи дьбьн у бал мәрьвед кӧ ԝан спорта һʹьз дькьн, һәстед ӧса пешда тиньн, те бежи әԝана тьштед нәбуйи дькьн».

Бәлабуна ԝан спортед хоф, сәр мәрьва гьран рʹудьне. Әԝана бьриндар дьбьн, чахе спортед бехофда жи тьштед хоф дькьн. Сала 1997-да нәхԝәшханед Дәԝләтед Йәкбуйида сәләфе спортсменед кӧ бьриндар бунә, бьльнд буйә, мәсәлә һәжмара йед скейтер 33 сәләф, йед сноубордер 31 сәләф у йед кӧ һьлдькʹьшьнә сәр чʹийарʹа 20 сәләфа бьльнд буйә. Ле спортед дьнда дәрәщә дьһа хьраб ә, у һәжмара мәрьвед кӧ ԝәʹде «спортед хоф» мьрьнә, әԝе йәке избат дькә. Мәрьвед кӧ спортед ԝи щурʹәйива мьжул дьбьн, зәʹф рʹьнд фәʹм дькьн кӧ әʹмьре хԝә дькьнә бьн ԛәзийе. Кʹӧлфәтәкә кӧ бь щурʹе хоф хԝә сәр бузе дьшьмьтинә, ӧса дьбежә: «Әз тʹьме дәрһәԛа мьрьне дьфькьрьм». Сноубордерәк жи ньһерʹандьна мәрьвед кӧ спорта хоф һʹьз дькьн, ӧса шьровәдькә: «Һәрге тӧ зийане настини, демәк тӧ шьхӧле хԝәда һʹәму ԛәԝате нади хәбате».

Сәр һʹиме ԝан избатийа, Мәсиһи гәрәке ча сәр спортед хоф бьньһерʹьн? Кʹьтеба Пироз ча дькарә али мә бькә кӧ сафи кьн, һәла һежа йә ԝан спортава мьжул бьн йан на? Ньһерʹандьна Хԝәдейә сәр пирозийа жийине, ԝе али мә бькә кӧ щаба ԝан пьрса бьдьн.

Ньһерʹандьна Хԝәдейә Дәрһәԛа Жийине

Кʹьтеба Пирозда те готьне, ԝәки «канийа жийане» Йаһоԝа йә (Зәбур 36:9). Әԝи нә кӧ тʹәне әм әʹфьрандьнә, ле ӧса жи һʹәму тьшт дайә мә, ԝәки әм жь жийине ләзәте бьстиньн (Зәбур 139:14; Кʹаред Шандийа 14:16, 17; 17:24-28). Ләма жи логики йә, ԝәки Хԝәде жь мә дәʹԝа дькә кӧ әм мьԛати ве пʹешкʹеша ԝи бьн. Әԝ йәк зәлал те кʹьфше жь ԛанун у принсипед кӧ Әԝи дабу Исраелийа.

Ԛануна Муса дәʹԝа дькьр, ԝәки һәр мәрьв һʹәму тьшти чь дәсте ԝи те бькә, ԝәки жийина мәрьвед дәр-доре хԝә бьпарезә. Һәрге кәсәки ԛанунед бехофийе пьшт гӧһе хԝәва бавита, у рʹуйе ԝида мәрьвәк бьмьра, хуна ԝи мәрьви дькʹәтә стуйе ԝи. Мәсәлә, чахе Исраелики мал ава дькьр, гәрәке дора бани сур кьра. Һәрге ӧса нәкьра у кәсәк жь бани бькʹәта у бьмьра, хуна ԝи дькʹәтә стуйе хԝәйе мале (Ԛануна Дӧщари 22:8). Һәрге гаки ньшкева мәрьвәки хьста у бькӧшта, хԝәйе ԝи гайи щабдар нибу сәва ԝе ԛәԝьмандьне. Ле һәрге әԝ га пешда жи мәрьва хьстьбу у хԝәйе ԝи дәрһәԛа ԝе йәке заньбу, ле пәй гайе хԝә нәньһерʹибу, у га кәсәк бькӧшта, хԝәйе ԝи нәһәԛ дьһатә һʹәсабе у гәрәке бьһата кӧштьне (Дәркʹәтьн 21:28, 29). Бона Йаһоԝа әʹмьр ԛимәт ә, ләма жи Ԛанунеда хԝәйкьрьн у парастьна әʹмьр, щийе фәрз дьгьрт.

Хьзмәткʹаред Йаһоԝайи амьн фәʹм дькьрьн, ԝәки әԝ принсип дькарьн ӧса жи бона ԝан дәрәща бьдьнә хәбате, гава мәрьв хԝәха әʹмьре хԝә дькә бьн ԛәзийе. Кʹьтеба Пирозда ньвисар ә, ԝәки щарәке Даԝьд гәләк тʹи бу у гот: «Хԝәзика йәк жь бира кӧ ль Бәйтләһʹәме ль бәр дери йә, аве бьдә мьн!» Ԝи ԝәʹдәйи Бәйтләһʹм бьн дәсте Фьльстийада бу. Гава се әскәред Даԝьд әв хԝәстьна ԝи бьһистьн, дьзикава чун нав зома Фьльстийа, ав жь бира Бәйтләһʹме һьлдан у Даԝьдрʹа анин. Гәло реаксийа Даԝьд чь щурʹәйи бу? Әԝи ав вәнәхԝар, ле дәԝсе рʹетә сәр әʹрде. Әԝи гот: «Кьрьна вейа бьла Хԝәде жь мьнва дур бькә; гәло әз хуна ван зьламед кӧ щане хԝә авитьнә хәтәре вәхԝьм? Жь бәр кӧ ԝе бь баһе щане хԝә анин» (1 Дирок 11:17-19). Һʹьше Даԝьдрʹа дәрбаз нәдьбу кӧ әʹмьре кәсәки бькә бьн ԛәзийе, сәва кӧ хԝәстьна хԝә рʹази кә.

Иса жи хԝә һәма ӧса да кʹьфше, чахе ча те кʹьфше хәйаледа Мире-щьна ԝи дьщерʹьбанд у готе кӧ жь бьльндщийа бане пʹарьстгәһе хԝә бавежә, сәва кӧ бьньһерʹә һәла мәләк ԝе ԝи хьлаз кьн йан на. Иса щаба ԝи да у гот: «Хӧдан Хԝәдейе хԝә нәщерʹьбинә» (Мәтта 4:5-7). Әʹйан ә, ԝәки ча Даԝьд ӧса жи Иса фәʹм дькьр, ԝәки бәр чʹәʹве Хԝәде нәрʹаст ә, кӧ бадиһәԝа әʹмьре хԝә йан жи йе кәсәки, бькьнә бьн ԛәзийе.

Әԝ мәсәлә дькарьн ԝан пьрса пешда биньн: «Кʹәнге щурʹе спорте дьбә хоф? Спорта бехоф у ԝәʹдәдәрбазкьрьна баш мәрьв дькарьн бь щурʹе хоф дәрбаз кьн. Ле ча әм дькарьн тедәрхьн кӧ чь изьн ә бькьн у чь на?»

Һежа йә Әʹмьре Хԝә Бькьнә бьн Ԛәзийе?

Һәрге дәрһәԛа һәр ԝәʹдәдәрбазкьрьне бь һʹәлали бьфькьрьн, әв йәк ԝе али мә бькә, кӧ сафикьрьна рʹаст бькьн. Мәсәлә, дькари пьрсе бьди хԝә: «Мәрьвед кӧ ве спортева мьжул дьбьн, чьԛас щар дькʹәвьнә ԛәзийе у бьриндар дьбьн? Әз ве спорте рʹьнд һин бумә, йан жи тьштед мьнә бона ве спорте һәнә, ԝәки мьн жь зийане хԝәй кьн? Әзе чь зийане бьстиньм, һәрге бьльндайе рʹаст һʹәсаб нәкьм, бькʹәвьм йан жи һащәтед мьнә бехофийе ньшкева хьраб бьн? Гәло әзе зийанәкә бьчʹук бьстиньм, йан ԛайим бьриндар бьм, у һәла һе жи бьмьрьм?»

Һәрге Мәсиһи жь бо кʹефа хԝә, әʹмьре хԝә дькә бьн ԛәзийе, әв йәк дькарә сәр һәләԛәтийа ԝийә ԛимәт тʹәви Йаһоԝа һʹӧкӧм бә. Әԝ ӧса жи дьбәкә щьватеда щабдарийед хԝә ӧнда кә (1 Тимотʹейо 3:2, 8-10; 4:12; Тито 2:6-8). Демәк, ԝәʹде ԝәʹдәдәрбазкьрьна жи, Мәсиһи гәрәке бир нәкьн, кӧ жийин бәр чʹәʹве Әʹфьрандар пироз ә.

[Спартьн]