Әм жь кʹӧ Заньн ԝәки Йаһоԝа ԝе Дьне Бькә Щьнәт?

1. Ишайа пʹехәмбәр чь готә Исраелийа?

ИШАЙА пʹехәмбәр Йаһоԝа нав кьр Хԝәдайе рʹастийе. Әв хәбәра кӧ ча «рʹасти» һатийә ԝәлгәрʹандьне, рʹастә-рʹаст те һʹәсабе «амин» (Ишайа 65:16, ДТʹ). У хәбәра «амин» те һʹәсабе «бьра ӧса бә». Гава әв хәбәр Кʹьтеба Пирозда сәр Йаһоԝа йан сәр Иса Мәсиһ те хәбьтандьне, әв избат дькә кӧ фьлан тьшт бь тʹәмами рʹаст ә. Ишайа Исраелийарʹа әшкәрә кьр, ԝәки Йаһоԝа пешда чь дьбежә, һәма ӧса жи дьбә. Ԝәʹде бәре, Йаһоԝа гәләк щара избат кьрийә, кӧ әԝ хԝәйе созе хԝәй йә.

2. Әм чьма дькарьн баԝәрийа хԝә созед Йаһоԝа биньн, у әме дина хԝә бьдьнә кʹижан пьрса?

² Гәло әм дькарьн баԝәрийа хԝә ԝан созед Йаһоԝа биньн, йед кӧ дәрһәԛа ахьрийе нә? Незики 800 сал паши һена Ишайа пʹехәмбәр, Паԝлосе шанди шьровәкьр, кӧ чьрʹа созед Хԝәде һәртʹьм рʹаст ьн. Паԝлос дәрһәԛа Хԝәде ӧса гот: «Набә кӧ әԝ дәрәԝ дәре» (Ибрани 6:18). Чаԝа кӧ жь канике һьм ава тʹәзә, һьм жи ава шорʹ дәрнакʹәвә, Йаһоԝа жи, йе кӧ Канийа рʹастийе йә, нькарә дәрәԝа бькә. Ләма жи әм дькарьн баԝәрийа хԝә һʹәму готьн у созед ԝи биньн. Ве готареда, әме дина хԝә бьдьнә ван пьрса: Йаһоԝа бона ахьрийе чь соз дайә мә? У әм жь кʹӧ заньн, ԝәки созе Хԝәде ԝе бь рʹасти бе сери?

ЙАҺОԜА ЧЬ СОЗ ДАЙӘ?

3. (а) Кʹижан созе жь Кʹьтеба Пироз бона хьзмәткʹаред Хԝәде ԛимәт ә? (Әʹйанти 21:3, 4) (б) Һьнә кәс дәрһәԛа ви сози чь дьбежьн?

³ Созе кӧ әме ньһа дина хԝә бьдьне, бона һʹәму хьзмәткʹаред Хԝәде ԛимәт ә (Бьхунә Әʹйанти 21:3, 4). Йаһоԝа бона ахьрийе соз дайә, кӧ «иди мьрьне тʹӧнәбә, нә шин, нә гьри, нә еш-ешук». Гава әм мьзгинийе мәрьварʹа бәла дькьн, әм бь шабуне ԝанарʹа бәʹса ве рʹеза хԝәш дькьн. Гәло һьнә мәрьвед кӧ ви сози дьбьһен, чь дьбежьн? Дьԛәԝьмә әԝана дьбежьн: «Әв гьлийед хԝәш ьн, ле тʹәне хәԝн у хәйал ә».

4. (а) Йаһоԝа чь занә у пешда чь дьвинә? (б) Хенщи созе хԝә, Йаһоԝа чь дайә ньвисаре?

⁴ Һәмьки гава Йуһʹәннайе шанди жь бина бәр Хԝәде әв созе дәрһәԛа жийина Щьнәтеда ньвиси, Йаһоԝа заньбу кӧ әме иро кәсед дьнрʹа дәрһәԛа ве гӧмане бежьн. Ӧса жи Йаһоԝа бәреда заньбу, кӧ гәләк мәрьв ԝе баԝәрийа хԝә созед ԝи нәйньн (Ишайа 42:9; 60:2; 2 Корьнтʹи 4:3, 4). Ле әм чаԝа дькарьн хԝә у кәсед дьн бьдьнә баԝәркьрьне, кӧ гьлийед жь Әʹйанти 21:3, 4 ԝе бь рʹасти бенә сери? Сәва кӧ әм баԝәрийа хԝә ви созе хԝәш биньн, Йаһоԝа избатийед ве йәке дайә ньвисаре. Әме ньһа ԝан избатийа шеԝьр кьн.

ЙАҺОԜА ԜЕ ӘʹСӘЙИ СОЗЕ ХԜӘ БИНӘ СЕРИ

5. Кʹижан рʹез али мә дькьн, кӧ әм созе Хԝәде дәрһәԛа Щьнәте баԝәр кьн у әԝ рʹез чь дьбежьн?

⁵ Рʹезед Кʹьтеба Пироз нишан дькьн, кӧ әм дькарьн баԝәрийа хԝә созе Йаһоԝа биньн. Кʹьтеба Пироз ӧса дьбежә: «Һьнге әԝи ль сәр тʹәхт рʹуньшти гот: ‹Ва әз һәр тьшти ну чедькьм›. У мьнрʹа гот: ‹Бьньвисә, чьмки әв хәбәрнә амьн у рʹаст ьн›. Ӧса жи готә мьн: ‹Һәр тьшт һатә сери. Әз ьм Алфа у Омега, Дәстпебун у Ахьри›» (Әʹйанти 21:5, 6а).

6. Гьлийед жь Әʹйанти 21:5, 6 чаԝа баԝәрийа мә һьндава созе Хԝәде ԛәԝи дькьн?

⁶ Әв гьлийед Кʹьтеба Пироз чьма баԝәрийа мә һьндава созе Хԝәде дьһа ԛәԝи дькьн? Бь ван гьлийа, Йаһоԝа ча бежи ԛоле хԝә датинә сәр документәке, ԝәки мәрьвед амьнрʹа избат кә, кӧ әԝе әʹсәйи созе хԝә бинә сери. Әв созе Хԝәде Әʹйанти 21:3, 4-да һатийә ньвисаре. Ле паше рʹезед 5 у 6-да, әм диса ча бежи ԛоле Йаһоԝа дьвиньн, йа кӧ мә һе зедә дьдә баԝәркьрьне, ԝәки ԝе сәд сәләфи созе хԝә бинә сери. Әме ньһа ван гьлийед Йаһоԝа һур бь һур лекʹолин бькьн.

7. Рʹеза 5-да, кʹе хәбәр дьдә, у әв йәк чьрʹа фәрз ә?

⁷ Рʹеза 5 ӧса дәстпедьбә: «Һьнге әԝи ль сәр тʹәхт рʹуньшти гот» (Әʹйанти 21:5а). Әв гьлийед мәхсус ьн, чьмки әв йәк жь ван се дәрәща йә, гава кʹьтеба Әʹйантида Йаһоԝа хԝәха хәбәр дьдә. Бәле, йе кӧ әв соз дайә, нә мәләк ә, нә жи Иса Мәсиһ йә, ле хԝәха Йаһоԝа йә! Әв йәк рʹастийа ван гьлийа избат дькә, йед кӧ әԝ паше дьбежә. Гәло чьрʹа? Чьмки Йаһоԝа «хԝәйе готьна хԝә» йә (Тито 1:2). Әв йәк нишан дькә, кӧ һежа йә ԝәки әм бь тʹәмами итʹбарийа хԝә гьлийед жь Әʹйанти 21:5, 6 биньн.

«ВА ӘЗ ҺӘР ТЬШТИ НУ ЧЕДЬКЬМ»

8. Йаһоԝа чаԝа нишан дькә, кӧ әԝе созе хԝә бинә сери? (Ишайа 46:10)

⁸ Паше Йаһоԝа хәбәрәкә ӧса дьбежә: «Ва» (Әʹйанти 21:5). Хәбәра Йунани, йа кӧ ча «ва» һатийә ԝәлгәрʹандьне, кʹьтеба Әʹйантида гәләк щар һатийә хәбьтандьне. Кʹьтебәк дьбежә, ԝәки әв гьли «дина хԝәндәвана дькʹьшинә сәр готьнед кӧ паши ве тен». Паше Хԝәде гот: «Ва әз һәр тьшти ну чедькьм». Йаһоԝа ԝе ван гӧһастьна ахьрийеда бинә сери. Әԝ занә кӧ әԝ созе ԝи ԝе әʹсәйи бе сери, ләма жи әԝ ӧса хәбәр дьдә, те бежи әԝ ида һатийә сери (Бьхунә Ишайа 46:10).

9. (а) Гьлийе «әз һәр тьшти ну чедькьм» дина мә дькʹьшиньнә сәр чь? (б) Чь ԝе бе сәре «әʹрд» у «әʹзманед» кӧ ньһа һәнә?

⁹ Әме ньһа ван гьлийа лекʹолин бькьн: «Ва әз һәр тьшти ну чедькьм» (Әʹйанти 21:5) Әв сәри жь Әʹйанти, дина мә дькʹьшинә сәр гӧһастьне у тʹәзәкьрьне. Йа йәке, Йаһоԝа ԝе чь бьгӧһезә? Әʹйанти 21:1 ӧса дьбежә: «Әʹрд у әʹзмане бәре дәрбаз бун». «Әʹзмане бәре» әԝ сәрԝертийед политики нә, йед кӧ бьн һʹӧкӧме Мире-щьна у щьнед ԝида ньн (Мәтта 4:8, 9; 1 Йуһʹәнна 5:19). Кʹьтеба Пирозда, «әʹрд» дькарә бе һʹәсабе бьнәлийед әʹрде (Дәстпебун 11:1; Зәбур 96:1). Ләма жи «әʹрде бәре» те һʹәсабе мәрьвед хьраб. Йаһоԝа ԝе һʹале «әʹрд» у «әʹзмане» кӧ һәнә, ахьрийеда нә тʹәне дьһа баш кә, ле ԝе бь тʹәмами бьгӧһезә. Дәԝсе, әԝе «әʹзманәки ну», демәк сәрԝертийа тʹәзә саз кә, у ӧса жи ԝе ‹әʹрдәки ну› саз кә, демәк мәрьвед рʹаст, йед кӧ ԝе бьн ве сәрԝертийеда бьжин.

10. Йаһоԝа ԝе чь ну бькә?

¹⁰ Гәло Йаһоԝа ԝе ча һәр тьшти ну бькә? (Әʹйанти 21:5) Йаһоԝа ԝе мәрьва у дьнйайе диса бьгьһинә беԛьсуртийе. Чаԝа кӧ Ишайа пешда готьбу, тʹәмамийа дьнйайе ԝе мина бахче Едене бьбә бахчәки хԝәш. Әме жи бенә нукьрьне, демәк әме бь тʹәмами бенә ԛәнщкьрьне. Кәсед сәԛәт, кәрʹ, лал у кор ԝе ԛәнщ бьн у һәла һе мьри жи ԝе бенә рʹакьрьне (Ишайа 25:8; 35:1-7).

«ӘВ ХӘБӘРНӘ АМЬН У РʹАСТ ЬН. . . . ҺӘР ТЬШТ ҺАТӘ СЕРИ»

11. Йаһоԝа чь фәрман да Йуһʹәнна, у чьрʹа?

¹¹ Әм чьрʹа диса дькарьн баԝәрийа хԝә Хԝәде биньн? Йаһоԝа Йуһʹәннарʹа гот: «Бьньвисә, чьмки әв хәбәрнә амьн у рʹаст ьн» (Әʹйанти 21:5). Йаһоԝа нә тʹәне гот «бьньвисә», ле ӧса жи гот кӧ чьрʹа гәрәке ве йәке баԝәр кьн. Әԝи гот: «Чьмки әв хәбәрнә амьн у рʹаст ьн», демәк гьлийед Хԝәде рʹаст у бь итʹбар ьн. Ча баш ә кӧ Йуһʹәнна гӧһ да ве тʹәмийа Хԝәде. Ләма жи әм дькарьн дәрһәԛа созе Хԝәде бьхуньн у дәрһәԛа ԝан кʹәрәма бьфькьрьн, йед кӧ Щьнәтеда һивийа мә нә.

12. Йаһоԝа чьрʹа дьбежә: «Һәр тьшт һатә сери»?

¹² Паше Хԝәде чь дьбежә? Әԝ дьбежә: «Һәр тьшт һатә сери» (Әʹйанти 21:6). Ньһа Йаһоԝа ӧса хәбәр дьдә, те бежи гьлийед ԝи дәрһәԛа Щьнәта создайи ида һатьнә сери. Бәле, изьна ԝи һәйә ӧса хәбәр дә, чьмки тʹӧ тьшт нькарә ԝи бьдә сәкьнандьне, кӧ нета хԝә бинә сери. Паше, Йаһоԝа мә диса дьдә баԝәркьрьне, ԝәки әԝ хԝәйе созе хԝә йә.

«ӘЗ ЬМ АЛФА У ОМЕГА»

13. Чьрʹа Йаһоԝа сәр хԝә дьбежә «Алфа у Омега»?

¹³ Чаԝа һатә готьне, Йаһоԝа се щара пе хәԝн-хәйала Йуһʹәннарʹа хәбәр да (Әʹйанти 1:8; 21:5, 6; 22:13). Һәр се щара жи, Йаһоԝа гот: «Әз ьм Алфа у Омега». Алифбәйа Йунани бь һʹәрфа алфа дәстпедьбә у бь һʹәрфа омега хьлаз дьбә. Бь ԝан гьлийа, «Алфа у Омега», Йаһоԝа дьдә кʹьфше, кӧ гава әԝ дәстпедькә тьштәки бькә, бе шьк әԝ ԝи тьшти тинә сери.

14. (а) Йаһоԝа кʹәнге гот «Алфа», у ԝе кʹәнге бежә «Омега»? Мәсәле бинә. (б) Гьлийед жь Дәстпебун 2:1-3 чь избат дькьн?

¹⁴ Йаһоԝа Адәм у Һеԝайерʹа гот, кӧ ԛьрара ԝи бона мәрьва у әʹрде чь йә. Кʹьтеба Пироз дьбежә: «Хԝәде дӧа ль ԝан кьр у Хԝәде ԝанрʹа гот: ‹Шин бьн у ль һәв зедә бьн, әʹрде тʹьжи кьн у хԝәйитийе ле бькьн›» (Дәстпебун 1:28). Чахе Йаһоԝа щара пешьн дәрһәԛа ԛьрара хԝә гот, әв йәк дәстпек бу, демәк «Алфа» бу. Ле чахе ԛьрара ԝи бь тʹәмами бе сери у мәрьвед гӧһдар жь зӧрʹәта Адәм у Һеԝайе дьнйайе тʹьжә кьн у бькьнә Щьнәт, әв йәк ԝе «Омега» бә. Чахе әʹфьрандьна «әʹрд у әʹзман тʹәмамийа нәхшед хԝәва ль сәр һәвда һатьн», һьнге Йаһоԝа тьштәки ӧса гот, чь кӧ да кʹьфше ԝәки созе ԝи ԝе әʹсәйи бе сери (Бьхунә Дәстпебун 2:1-3). Йаһоԝа гот кӧ рʹожа һʹәфта, рʹожәкә пироз ә. Әв чь те һʹәсабе? Әв йәк нишан дькә, ԝәки ԛьрара Йаһоԝа бона мәрьва у әʹрде, ԝе хьлазийа рʹожа һʹәфта бь тʹәмами бе сери.

15. Чьрʹа дьбәкә ӧса дьһатә кʹьфше, кӧ Мире-щьна рʹийа Хԝәде гьрт ԝәки ԛьрара Хԝә бинә сери?

¹⁵ Чахе Адәм у Һеԝа мьԛабьли Хԝәде рʹабун, әԝана бунә мәрьвнә гӧнәкʹар, һьм жи ԝана гӧнә у мьрьн дәрбази зӧрʹәтед хԝә кьрьн (Рʹомайи 5:12). Дьԛәԝьмә ӧса дьһатә кʹьфше, кӧ Мире-щьна рʹийа Хԝәде гьрт, ԝәки ԛьрара Ԝи һьндава мәрьва у әʹрде нәйе сери. Ле гәло ԛә дьбу, ԝәки Мире-щьна нета Йаһоԝа бьда сәкьнандьне? Дьбәкә Мире-щьна дьфькьри кӧ Йаһоԝа нькарә хԝәйе созе хԝә бә. Дьԛәԝьмә әԝ дьфькьри кӧ Хԝәде ԝе бона пеканина ԛьрара хԝә Адәм у Һеԝайе бьдә кӧштьне у дәԝса ԝан, жьн у мерәки беԛьсур бьәʹфьринә. Ле һәрге Хԝәде ӧса бькьра, Мире-щьна ԝе бьгота кӧ Хԝәде дәрәԝа дькә. Гәло чьма? Чьмки ль гора Дәстпебун 1:28, Йаһоԝа готьбу Адәм у Һеԝайе, ԝәки дьнйа ԝе бь зӧрʹәта ԝан тʹьжә бә.

16. Чьрʹа дьԛәԝьмә Мире-щьна дьфькьри, кӧ Йаһоԝа ԝе хԝәйе созе хԝә нибә?

¹⁶ Дьбәкә Мире-щьна ӧса жи дьфькьри, кӧ Йаһоԝа ԝе бьһелә ԝәки Адәм у Һеԝа зарʹед ԛьсурдар биньн дьнйайе, йед кӧ ԝе ԛәт нәгьһиштана беԛьсуртийе (Ԝаиз 7:20; Рʹомайи 3:23). Бе шьк, ве дәрәщеда Мире-щьна ԝе бьгота, кӧ Йаһоԝа хԝәйе созе хԝә нинә. Гәло чьрʹа? Чьмки дьнйа ԝе бь мәрьвед кʹамьл тʹьжә нәбуйа. У бь ве йәке, ԛьрара Хԝәде йа әʹсьли ԝе нәһата сери.

17. Йаһоԝа пьрса мьԛабьлибуна Мире-щьна у мәрьвед пешьн чаԝа сафи кьр, у ахьрийа ве йәке ԝе ча бә? (Бьньһерʹә ӧса жи шькьл.)

¹⁷ Йаһоԝа пьрса мьԛабьлибуна Мире-щьна у мәрьвед пешьн, гәләк баш сафи кьр. Мире-щьна нә жи дькарьбу бьфькьрийа, кӧ Йаһоԝа чь дькарә бькә (Зәбур 92:5). Йаһоԝа һишт кӧ Адәм у Һеԝайерʹа зарʹ бьбьн. У чьмки Йаһоԝа дәрәԝа накә, гьлийед ԝи рʹаст һатьнә сери. Йаһоԝа избат кьр, кӧ әԝ һәр тьштида рʹаст у сәрфьраз ә. Әԝ баԝәр бу кӧ созе ԝи ԝе бе сери у соз да ԝәки әԝе бь сайа кʹьрʹине, жь зӧрʹәта Адәм у Һеԝайе кәсед гӧһдар хьлаз кә (Дәстпебун 3:15; 22:18). Мире-щьна әв йәк ԛәт һьлнәда һʹәсаб! Гәло чьрʹа? Чьмки Йаһоԝа жь һʹәзкьрьна мәзьн, Иса ча ԛӧрбан бона мә бәрва да (Мәтта 20:28; Йуһʹәнна 3:16). Әв һʹӧнӧр бал Мире-щьна тʹӧнә йә, әԝ тʹәне хԝә һʹәз дькә. Демәк, бь сайа кʹьрʹина Иса Мәсиһ чь мәщал ԝе вәбьн? Хьлазийа Сәрԝертийа Һʹәзарсали йа Мәсиһ, чаԝа кӧ Йаһоԝа бәреда ԛьрар кьрьбу, щьнәтеда сәр әʹрде ԝе мәрьвед кʹамьл у гӧһдар бьжин. Һьнге Йаһоԝа ԝе бежә, кӧ әԝ йәк «Омега» йә.

БАԜӘРИЙА ХԜӘ ҺЬНДАВА СОЗЕ ЙАҺОԜА ҺЕ ԚӘԜИ КЬН

18. Әм чьрʹа дькарьн баԝәр бьн, кӧ дьнйа ԝе бьбә Щьнәт? (Бьньһерʹә чаргошә «Жь бо Се Мәʹнийа Әм Баԝәрийа Хԝә Созе Йаһоԝа Тиньн»).

¹⁸ Ве готареда, мә дит кӧ әм чьрʹа дькарьн баԝәр бьн, ԝәки дьнйа ԝе бьбә Щьнәт. Гәло әм чаԝа дькарьн кәсед дьн бьдьнә баԝәркьрьне, кӧ әв созе Хԝәде ԝе бь рʹасти бе сери? Йа йәке, Йаһоԝа хԝәха ви сози дьдә. Кʹьтеба Әʹйанти дьбежә: «Һьнге әԝи ль сәр тʹәхт рʹуньшти гот: ‹Әз һәр тьшти ну дькьм!›» Ԛәԝат, билани у хԝәстьна Хԝәде һәйә, ԝәки созе хԝә бинә сери. Йа дӧда, Йаһоԝа занә ԝәки чь кӧ әԝи готийә, ԝе әʹсәйи бе сери. Ләма жи әԝ ӧса дьбежә: «Әв хәбәрнә амьн у рʹаст ьн. . . . Һәр тьшт һатә сери!» Йа сьсийа, гава Йаһоԝа тьштәки дәстпедькә, әԝ дьгьһижә нета хԝә. Гьлийед «Әз ьм Алфа у Омега» ве йәке избат дькә. Йаһоԝа ԝе избат кә, кӧ Мире-щьна дәрәԝин ә у нькарә рʹийа Ԝи бьгьрә, кӧ нета хԝә бинә сери.

19. Һәрге кәсед дьн һьндава созе Хԝәде дӧдьли дьбьн, тӧ чь дькари бьки?

¹⁹ Һәр щар гава тӧ мәрийарʹа бәʹса Щьнәте дьки, тӧ баԝәрийа хԝә һьндава созе Йаһоԝа һе ԛәԝи дьки. Һәрге тӧ кәсәкирʹа бәʹса гӧмана жь Әʹйанти 21:4 бьки у әԝ бежә, «Әв гьли гәләк хԝәш ьн, ле тʹәне хәԝн у хәйал ьн», тӧ дькари чь бьки? Тӧ дькари рʹезед 5 у 6 бьхуни у шьровәки. Нишан кә, кӧ Йаһоԝа һәртʹьм хԝәйе созе хԝә йә, чьмки Йаһоԝа ча бежи ԛоле хԝә данийә (Ишайа 65:16).