Йаһоԝа, йе кӧ әʹмьр дайә мә, жь мә дәʹԝа дькә ԝәки әм хуне нәдьнә хәбате (Дәстпебун 9:3, 4). Ԛануна Хԝәдеда кʹижан кӧ Исраелед бәрерʹа һатьбу дайине, дьһатә готьне ԝәки хуне нәдьнә хәбате, чьмки әв те һʹәсабе әʹмьр. Хԝәде гот: «Чьмки әʹмьре һәр бинбәри хунеда йә у мьн әԝ да ԝә кӧ һун пе ԝе ль сәр горигәһе кʹәԝандьне бона әʹмьре хԝә бькьн, чьмки хун бона әʹмьр кʹәԝандьне дькә». Ле чахе мәрьв бона хԝарьне һʹәйԝанәк сәрже дькьр, әԝи гәрәке чь бькьра? Хԝәде гот: «Гәрәке бьһелә хун же һәрʹә у пе хԝәлийе хуне бьньхемә»a (Ԛануна Кʹаһинтийе 17:11, 13). Йаһоԝа чәнд щара әв тʹәми дьԝәкʹьланд (Ԛануна Дӧщари 12:16, 24; 15:23). Әʹдәбйәтәкә Ибранида те готьне: «Гәрәке хуне хԝәй нәкьн, ле бьрʹежьн сәр әʹрде, у бь ве йәке бьдьнә кʹьфше, ԝәки әв найе хԝарьне» («Soncino Chumash»). Изьна тʹӧ Исраели тʹӧнә бу хуна бинбәрәки хԝәй кьра у бьда хәбате, чьмки әʹмьре ԝи жь Хԝәде йә.

Щара һʹәким нәхԝәша һелан дькьн, ԝәки чәнд һʹәфти пешийа операсийоне хуна хԝә тʹәсмил кьн (хунһьлдана пешийа операсийоне), сәва кӧ ԝәʹде операсийоне һәгәр һʹәԝщә бә, хуна ԝи бәри ԝи дьн. Ле тʹопкьрьн, хԝәйкьрьн у бәридайина хуне мьԛабьли ве йәке йә, чь кӧ кʹьтеба Ԛануна Кʹаһинтийе у Ԛануна Дӧщарида те готьне. Изьн тʹӧнә хуне хԝәй кьн, ле гәрәке бьрʹежьн сәр әʹрде, демәк ча бежи пашда вәгәрʹиньн бал Хԝәде. Рʹаст ә иро Ԛануна Муса ида ԛәԝатеда нинә, ле Шәʹдед Йаһоԝа ԛәдьре принсипед жь ван ԛануна дьгьрьн, у хԝә ‹дури хуне дьгьрьн›. Ләма жи әм хуне нә дьдьн, нә жи дьдьнә хԝәйкьрьне сәва кӧ паше бәри мә дьн, чьмки әԝ йәк мьԛабьли ԛануна Хԝәде йә.