Рʹасти Дәрһәqа Бав, Кӧрʹ у Рʹӧһʹе Пироз

ӘW МӘРЬВ йeд кӧ сейәканә баwәр дькьн, дьбежьн кӧ Хwәде се пʹар ә: Бав, Кӧрʹ у Рʹӧһʹе Пироз. Әв һәрсек йәк ьн, у wәкә һәв һьмзор ьн. Демәк, һинкьрьна wан әw ә, wәки Бав Хwәде йә, Кӧрʹ Хwәде йә, Рʹӧһʹе Пироз жи Хwәде йә, ле Хwәде тʹәне йәк ә.

Гәләк жь wан мәрийа, йeд кӧ сейәканә баwәр дькьн, qайил дьбьн кӧ нькарьн ве һинкьрьне шьровәкьн. Ле баwәр дькьн, кӧ әв һинкьрьн жь Кʹьтеба Пироз ә. Бь рʹастийе, дь Кʹьтеба Пирозда qә щарәке жи хәбәра «сейәканә» нәһатийә ньвисаре. Ле дьбәк жи ль wе дәре тьштәк дәрһәqа сейәканә те готьне? Сәва кӧ щаба ве пьрсе пебьһʹәсьн, wәрә әм пешийе пебьһʹәсьн wәки гава мәрьв дәрһәqа сейәканә хәбәр дьдьн, кʹижан щи жь Кʹьтеба Пироз әwана дьдьн хәбате.

«ХӘБӘР ХWӘХА ХWӘДЕ БУ»

Дь Йуһʹәнна 1:1-да те готьне: «Дәстпебунеда Хәбәр һәбу. Хәбәр тʹәви Хwәде бу у Хәбәр хwәха Хwәде бу». Паше дь ви сәрида Йуһʹәнна шьровәдькә, кӧ «Хәбәр» әва Иса Мәсиһ йә (Йуһʹәнна 1:14). Чьмки ньвисар ә кӧ Хәбәр Хwәде йә, ләма жи гәләка ӧса фәʹм кьрьн, кӧ Кӧрʹ у Бав әwана һәр дӧ жи, һәнә Хwәдек.

Дина хwә бьдә wе йәке, кӧ әва пʹара жь Кʹьтеба Пироз сәре-серида ль сәр зьмане Йунанийа һатийә ньвисаре, паше ида ль сәр зьманeд дьне һатийә тʹәрщьмәкьрьне. Һьнә тʹәрщьманeд Кʹьтеба Пироз сафи кьрьн ӧса тʹәрщьмә кьн, wәки бе фәʹмкьрьне кӧ «Хәбәр» Хwәдайе Һьмзор нинә. Мәсәлә, wана ньвиси кӧ «хәбәр хwәде бу», бь һʹәрфа бьчʹук, чь кӧ те һʹәсабе wәки рʹаст ә хәбәр хwәде йә, ле нә Хwәдайе Һьмзор. Ле гәло чьрʹа ль сәр Иса, те готьне «хwәде»? Чьмки ль сәр зьмане Йунанийа, «хwәде» те һʹәсабе «йәки зор» у Иса рʹасти жи йәки зор ә у ль сәр әʹзмана паши Хwәдайе Һьмзор, щийе бьльнд дьгьрә.

ЗЕДӘ ИЗБАТКЬРЬН

Чьмки гәләк жь мәрийа зьмане Йунанийа йа бәре ньзаньн, ләма жи пьрс пешда те: «Жь кʹӧ әм заньн wәки Йуһʹәнна бь ван гьлийа чь дьхwәст бьгота?» Wәрә әм дәрһәqа мәсәләкә ӧса дьшьрмиш бьн. Дәрсдарәк тьштәк шагьртeд хwәрʹа гот, ле шагьрт бь тʹәмамийе фәʹм нәкьрьн кӧ дәрсдар чь дьхwәст бьгота. Ле чь гәрәке шагьрт бькьн, wәки сәрwахт бьн? Әwана гәрәке жь дәрсдар һе зедә әʹламәти дәрһәqа ве йәке пебьһʹәсьн, ӧса нинә? Бь сайа әʹламәтийeд зедә, шагьрт ида wе бькарьбьн һе рʹьнд гьлийeд дәрсдаре фәʹм бькьн. Дәрһәqа гьлийeд Йуһʹәнна жи әм дькарьн ӧса бежьн, сәва кӧ Йуһʹәнна 1:1 һе рʹьнд фәʹм бькьн, әм гәрәке дәрһәqа Иса дь кʹьтеба Йуһʹәннада һе зедә әʹламәти бьхуньн. Һәрге тӧ дәрһәqа ве пьрсе һе зедә избаткьрьне бьстини, тӧйе бькарьби бейи ль сәр нета рʹаст.

Мәсәлә, wәрә әм бьньһерʹьн чь Йуһʹәнна ньвиси дь кʹьтеба хwәда, сәре 1-да, рʹеза 18-да: «Тʹӧ кәси тʹӧ щар Хwәде [йе Һьмзор] нәдитийә». Ле мәрийа Иса Мәсиһ дитийә. Йуһʹәнна гьлийeд ӧса ньвиси: «Хәбәр [Иса Мәсиһ] бу хун у гошт, бь кʹәрәм у рʹастийева тʹьжи дь нав мәда коне хwә дани. Мә рʹумәта wи дит» (Йуһʹәнна 1:14). Жь ве йәке те кʹьфше, кӧ Иса Мәсиһ Хwәдайе Һьмзор нинә. Йуһʹәнна ӧса жи готьбу кӧ Хәбәр «тʹәви Хwәде бу». Ле һәла дьшьрмиш бә, ча Иса дькарә тʹәви Хwәде бә у әв Хwәде хwәха Иса бә. Мәсәлә ча тӧ дькари тʹәви кәсәк би, у әв кәсәк жи хwәха тӧ би? Хенщи wе йәке, жь Йуһʹәнна 17:3 әм дькарьн пебьһʹәсьн, кӧ Иса ль сәр Баве хwә гот кӧ әw һәйә «Хwәдейе рʹасти бешьрики-беһәвал». Бь ве йәке Иса Мәсиһ хwәха нишан кьр, кӧ дь ортʹа wи у Баведа фьрqи һәйә, у әwана йәк ниньн. Ӧса жи хьлазийа кʹьтебе, Йуһʹәнна әви һʹәму тьшти бь гьлийeд ӧса һәвва гьредьдә: «Ле бәле әв һатьнә ньвисаре, wәки һун баwәр бькьн, кӧ Иса йә Мәсиһ, Кӧрʹе Хwәде» (Йуһʹәнна 20:31). Дина хwә бьде, кӧ Иса те навкьрьне ча Кӧрʹе Хwәде, нә кӧ Хwәде. Әва әʹламәтийeд зедә жь кʹьтеба Йуһʹәнна нишан дькә, wәки Йуһʹәнна 1:1 чаwа гәрәке бе фәʹмкьрьне. Иса Мәсиһ, демәк Хәбәр, һәйә «хwәде», чьмки әw паши Хwәдейе Һьмзор щийе мәзьн дьгьрә ль сәр әʹзмана. Ле әw нә Хwәдайе Һьмзор ә, у нькарә тʹәви wи бьбә йәк.

ИЗБАТКЬРЬНЕД ДЬН

Wәрә әм мәсәла дәрсдар у шагьрта бәрдәwан кьн. Бьдә һʹәсабе хwә, кӧ паши wе йәке ча дәрсдар һе зедә әʹламәти да шагьртарʹа, шагьрт йәкә дӧдьли нә дәрһәqа ве пьрсе. Бь тʹәхмина тә ньһа шагьрт чь гәрәке бькьн? Әwана гәрәке әве пьрсе жь дәрсдарәки дьн жи бьпьрсьн, wәки wанрʹа һе избат бә. Һәрге дәрсдарәки дьн жи һʹәму тьшти мина дәрсдаре пешьн шьровәкә, wи чахи шагьрт ида wе баwәр бькьн, ӧса нинә? Һәрге тӧ дӧдьли йи, һәла Йуһʹәнна дәрһәqа Иса у Хwәдайе Һьмзор чь дьхwәст бьгота, wәрә әм бьньһерʹьн, кӧ дәрһәqа ве пьрсе ньвискʹарәки дьн Мәтта чь дьбежә. Чахе Мәтта дәрһәqа хьлазийа ве дьнйа хьраб хәбәр дьда, әwи гьлийeд Иса wәкʹьланд у гот: «Ле бона wе рʹоже у wе сьһʹәте тʹӧ кәс ньзанә, нә мьлйакʹәтeд әʹзмана, нә жи Кӧрʹ, ле тʹәне Бав» (Мәтта 24:36). Ча әв гьли нишан дькьн, кӧ Иса нә Хwәдайе Һьмзор ә?

Бь ван гьлийа Иса нишан кьр, кӧ Бав жь Кӧрʹ, һе зәʹф занә. Һәрге Иса пʹарәк жь Хwәде буйа, әwи жи wе әв һʹәму тьшт бьзаньбуйа, чь кӧ Хwәде занә. Ләма жи әм фәʹм дькьн wәки Кӧрʹ тʹәви Бав йәк нинә. Ле һьнәк дьшьрмиш дьбьн, wәки wи чахи Иса ча мәрьв хәбәр дьда ләма ӧса гот. Ле wәки ӧса нә, дәрһәqа рʹӧһʹе пироз чь дькарьн бежьн? Һәрге рʹӧһʹе пироз пʹарәк жь Хwәде йә, чьрʹа Иса гот кӧ тʹәне Хwәде занә, ле дәрһәqа рʹӧһʹе пироз тʹӧ тьшт нәгот?

Wәʹде һинбуна Кʹьтеба Пироз, тӧйе һе зедә бькарьби пебьһʹәси дәрһәqа ве пьрсе. Әв һʹәму һинкьрьн wе али тә бькьн, wәки тӧ бьзаньби рʹастийе дәрһәqа Бав, Кӧрʹ у рʹӧһʹе пироз (Зәбур 90:2; Кʹарeд Шандийа 7:55; Колоси 1:15).