• Пьрсед Хԝәндәвана
    Бьрща Ԛәрәԝьлийе (Бона Һинбуне) — 2018 | Кануна Пешьн

    • Чь те һʹәсабе кӧ Паԝлосе шанди «һʹәта әʹзмане сьсийа һатә һьлатьне» у «һʹәта бӧһьште»? (2 Корн. 12:2-4)

      Паԝлос 2 Корьнтʹи 12:2, 3-да, дәрһәԛа мәрьвәки дьбежә, кʹижан кӧ «һʹәта әʹзмане сьсийа һатә һьлатьне». Гәло әԝ кʹе бу? Паԝлос нәʹма хԝәйә Корьнтʹийарʹа да кʹьфше, ԝәки Хԝәде ԝи чаԝа шанди дьда хәбате (2 Корн. 11:5, 23). Паши ве йәке, әԝи бәʹса «дитьн у әʹйантийа» кьр, йед кӧ Хӧдан нишани ԝи кьрьбу. Ве контекстеда Паԝлос бәʹса тʹӧ бьра нәкьр. Демәк, логики йә кӧ әԝи дәрһәԛа хԝә дьгот, йе кӧ хәԝн-хәйал у әʹйанти станд (2 Корн. 12:1, 5).

      Демәк, әԝ Паԝлос бу йе кӧ «һʹәта әʹзмане сьсийа һатә һьлатьне» у «һʹәта бӧһьште һатә һьлатьне» (2 Корн. 12:2-4). Әԝи хәбәра «әʹйанти» да хәбате, чь кӧ дьдә кʹьфше, ԝәки жерʹа һатә әʹйанкьрьне кӧ ахьрийеда ԝе чь бьԛәԝьмә.

      Ле «әʹзмане сьсийа» чь бу кӧ Паԝлос дит?

      Кʹьтеба Пирозда әʹзман дькарә бе һʹәсабе әʹзмане физики (Дәстп. 11:4; 27:28; Мәт. 6:26). Ле хәбәра «әʹзман» щурʹәки майин жи те хәбьтандьне. Щара әԝ те һʹәсабе сәрԝертийа мәрьва (Дан. 4:20-22). Йан жи сәрԝерийа Хԝәде, мәсәлә сәрԝерти бь сайа Пʹадшатийа Хԝәде (Әʹйан. 21:1).

      Паԝлос «әʹзмане сьсийа» дит. Әԝ чь те һʹәсабе? Кʹьтеба Пироз щарна тьштәки се щара дьԝәкʹьлинә, сәва әԝи тьшти рʹьнд кʹьфш кә, щӧдә кә йан жи ԛәԝата ԝе бьдә кʹьфше (Иша. 6:3; Һәзԛл. 21:27; Әʹйан. 4:8). Ча те кʹьфше, чахе Паԝлос дәрһәԛа «әʹзмане сьсийа» гот, әԝи дьда кʹьфше сәрԝертийа һәрә баш, бьльнд у гьринг, демәк Пʹадшатийа Мәсиһти, кʹижанеда Иса Мәсиһ у 144 000 ԝе сәрԝертийе бькьн (Бьньһерʹьн «Фәʹмкьрьна Ньвисаре», Пʹара 1, рʹупʹ. 1059, 1062). Чаԝа Паԝлос ньвиси, әм анәгори созе Хԝәде, һивийа «әʹзманед ну нә» (2 Пәт. 3:13).