«ФЬКЬРЕД ХԜӘДА НУЙӘЖИЙИН БЬН»

7. Әм ча дькарьн дьл у һʹьше хԝә бьгӧһезьн?

⁷ Ле гәло әм дькарьн хәйсәте хԝә бьгӧһезьн, демәк дьлда бьбьнә мәрьве ну? Хәбәра Хԝәде дьбежә: «Бь рʹӧһʹ у фькьред хԝәда нуйәжийин бьн, мәрьве ну ль сәр хԝә ԝәргьрьн, кӧ кьрасе Хԝәдеда бь рʹастийе у һʹәлалийе бе ԛәлпи хӧльԛи йә» (Әфәс. 4:23, 24). Бәле, әм дькарьн һʹьше хԝә у дьле хԝә бьгӧһезьн, ле әԝ йәк һеса нинә. Әм гәрәке нә кӧ тʹәне хԝәстьнед хьраб бьтәмьриньн у хԝә жь кьред хьраб дур бьгьрьн, ле ӧса жи фькьред хԝә, демәк һʹьше хԝә бьгӧһезьн. Гӧһастьна хԝәстьнед мә, хәйсәт у нет-мәрәмед мә жи дькʹәвьн нава ве йәке. Әм гәрәке сәр ԝан тьшта һәр гав бьхәбьтьн.

8-9. Чаԝа ԛәԝьмандьна бьраки дьдә кʹьфше, ԝәки әм гәрәке кʹурайа дьле хԝәда бенә гӧһастьне?

⁸ Ԝәрә әм шеԝьр кьн мәсәла бьраки, йе кӧ бәре мәрьвәки һерс у шәрʹуд бу. Чахе әԝи ичʹкә тʹәрьканд у ида мәрьварʹа шәрʹ нәдькьр, әԝ һатә ньхӧмандьне. Әԝе йәке щинаред ԝирʹа шәʹдәтийа баш да. Ле һьнә ԝәʹдә шунда паши ньхӧмандьне, еварәке, әԝ ньшкева рʹасти щерʹьбандьне һат. Мерькәки вәхԝари һатә бәр мала ԝи у хԝәст тʹәви ԝи шәрʹ бькә. Пешийе әԝи бьрайи хԝә гьрт, кӧ шәрʹа нәкә. Ле гава әԝи мерьки ахьрийеда наве Йаһоԝа беһӧрмәт кьр, әԝ бьра кӧ тʹәзә һатьбу ньхӧмандьне, ида һерса хԝә нәгьрт. Әԝ дәркʹәт у мерьк ԛайим кʹӧта. Ле чьрʹа әԝи хԝә нәгьрт? Рʹаст ә чахе әԝ Кʹьтеба Пироз һин дьбу, әԝе йәке али ԝи кьр, кӧ һерс нәкʹәвә у шәрʹа нәкә, ле йәкә әԝи дьл у һʹьшда хԝә нәгӧһаст.

⁹ Ле әԝ бьра нәфькьри кӧ әԝ ԝе ида нькарьбә бе гӧһастьне (Мәтʹлк. 24:16). Әԝи пе аликʹарийа рʹуспийа, бәрдәԝам дькьр пешда һәрʹә. Ахьрийеда әԝ бу рʹуспи. Паше диса еварәке, һәма бәр Ода Щьвате, әԝ диса рʹасти дәрәщәкә ӧса һат, чаԝа кӧ бь сала пешда рʹасти ԝи һатьбу. Мерькәки вәхԝари дьхԝәст рʹуспики хьста у әԝ бьра жи ԝедәре бу. Ле әԝи хԝә ча да кʹьфше? Әԝи рʹьһʹәт у бь нәрми тʹәви ԝи мерьке вәхԝари хәбәр да, һерса мерьк дани у әԝ чу мала хԝә. Ле чьрʹа ве щаре әԝи бьрайи ида щурʹәки майин хԝә да кʹьфше? Чьмки әԝи һʹьш-аԛьле хԝә гӧһастьбу. Әԝ дьле хԝәда һатьбу гӧһастьне, бьбу мәрьвәки әʹдьлайиһʹьз у мьлук. Бь ԝе йәке әԝи Йаһоԝарʹа пәсьн ани!

10. Әм гәрәке чь бькьн сәва кʹурайа дьле хԝәда бенә гӧһастьне?

¹⁰ Әԝ гӧһастьн һәма ньшкева у хԝәха наԛәԝьмьн. Әм гәрәке һәр алийава хирәт бьн, кӧ гәләк сала сәр хԝә бьхәбьтьн (2 Пәт. 1:5). Әԝ гӧһастьн ве йәкева гьредайи нинә, кӧ әм гәләк сал Йаһоԝарʹа хьзмәт дькьн. Әм гәрәке һәр тьшти бькьн, сәва кʹурайа дьле хԝәда бенә гӧһастьне. Сәва ԝан гӧһастьнед мәзьн бькьн, гәләк тьшт дькарьн али мә бькьн, ле ԝәрә әм жь ԝан тʹәне чәнд һʹәва шеԝьр кьн.

ЧАԜА ҺʹЬШ-АԚЬЛЕ ХԜӘ БЬГӦҺЕЗЬН

11. Ча дӧа али мә дькә, кӧ һʹьш-аԛьле хԝә бьгӧһезьн?

¹¹ Гава пешьн кӧ әм гәрәке бькьн, әԝ һәйә дӧа. Әм гәрәке мина зәбурбеж дӧа бькьн: «Хԝәде, дьләки паԛьж нав мьнда бьәʹфьринә у рʹӧһʹәки рʹаст нав мьнда сәр һәвда бинә» (Зәб. 51:10). Әм гәрәке фәʹм бькьн, ԝәки мәрʹа әʹсә лазьм ә щурʹе фькьрандьна хԝә бьгӧһезьн у аликʹарийе жь Йаһоԝа һиви кьн. Ле чьрʹа әм дькарьн баԝәр бьн, ԝәки Йаһоԝа ԝе али мә бькә, кӧ әм бенә гӧһастьне? Әм дькарьн биньн бира хԝә созе Йаһоԝа, кӧ әԝи Исраелийед сәрһʹьшкрʹа, йед кӧ ԝәʹде Һәзәԛел дьжитьн, гот: «Әзе йәк дьләки бьдьм ԝан у әзе рʹӧһʹәки ну бьхьм һӧндьре [ԝан] . . . у дьләки жь гошт бьдьм ԝан» [демәк, дьләки ӧса, кӧ һазьр ә пәй рʹебәрийа Хԝәде һәрʹә] (Һәзԛл. 11:19). Йаһоԝа бь дьл у щан дьхԝәст али Исраелийа бькьра ԝәки бенә гӧһастьне, у әԝ дьхԝазә али мә жи бькә.

12-13. а) Ль гора Зәбур 119:59, әм сәр чь гәрәке бьфькьрьн? б) Әм кʹижан пьрса гәрәке бьдьнә хԝә?

¹² Гава дӧда, әԝ һәйә фькьрандьн. Чахе әм һәр рʹож Хәбәра Хԝәде дьхуньн, әм гәрәке ԝәʹдә башԛә кьн, ԝәки кʹур сәр бьфькьрьн, сәва тедәрхьн кӧ лазьм ә чь ньһерʹандьн у хәйсәт-һʹӧнӧра нав хԝәда бьгӧһезьн. (Бьхунә Зәбур 119:59; Ибрн. 4:12; Аԛуб 1:25). Әм гәрәке тедәрхьн һәла чь фькьр у ньһерʹандьнед ве дьнйайе сәр мә һʹӧкӧм бунә. Ӧса жи әм гәрәке һʹәлал кемасийед хԝә биньн сәр хԝә у паше сәр хԝә гәләк бьхәбьтьн, сәва ԝан кемасийа кʹокева дәрхьн.

¹³ Мәсәлә, пьрсе бьдьнә хԝә: «Гәло дьбә кӧ дьле мьнда һʹәвсуди йан чʹәʹвнәбари һәйә?» (1 Пәт. 2:1). «Дьԛәԝьмә кӧ әз һьнәки хԝә ԛӧрʹә дькьм жь бо малбәта хԝә, хԝәндьна хԝәйә бьльнд, йан жи һәбука хԝә?» (Мәтʹлк. 16:5). «Әз ньмьз һʹәсаб дькьм ԝан мәрьва, кʹижан дәсттәнг ьн, йан жи нә жь мьләте мьн ьн?» (Аԛуб 2:2-4). «Әз һʹьз дькьм ԝан тьшта, кӧ дьнйа Шәйтʹан дьдә?» (1 Йуһʹн. 2:15-17). «Мьн хԝәш тен ԝәʹдәдәрбазкьрьнед бенамуси у зорбәти?» (Зәб. 97:10; 101:3; Амс. 5:15). Әм гәрәке дьле хԝәда щаба ԝан пьрса бьдьн, у тедәрхьн, һәла чьда мәрʹа лазьм ә сәр хԝә бьхәбьтьн. Чахе әм ԝан тьшта жь кʹурайа дьле хԝә дәрхьн, әме дьле Баве хԝәйи әʹзмана ша кьн (Зәб. 19:14).

14. Чьрʹа гәләк фәрз ә һәвалед баш бьжберьн?

¹⁴ Гава сьсийа кӧ гәләк фәрз ә, әԝ ә ԝәки һәвалед рʹаст хԝәрʹа бьжберьн. Фьрԛи тʹӧнә әм тиньн сәр хԝә йан на, йәкә һәвалед мә, ԛайим сәр мә һʹӧкӧм дьбьн (Мәтʹлк. 13:20). Сәр хәбате йан жи мәкʹтәбеда, дор бәре мә әԝ мәрьв ьн, йед кӧ али мә накьн чʹәʹв бьдьнә ньһерʹандьна Хԝәде. Мәрьвед кӧ дькарьн мәрʹа бьбьнә һәвалед лапи баш, әм дькарьн щьватед мәда бьвиньн. Тʹәне ԝедәре әм дькарьн «һʹьзкьрьне у ԛәнщикьрьнеда» һелане бьстиньн (Ибрн. 10:24, 25).