Чь Дьqәwьмә Паши Мьрьне?

1-3. Дәрһәqа кʹижан пьрса мәри тʹьме дьшьрмиш дьбьн, у сәрwеред дине дьнйайе ль сәр ван пьрса чь щаба дьдьн?

НАВА тʹәрихийа дьнйайе мәрьв тʹьме дәрһәqа ван пьрса дьшьрмиш дьбун. Бь рʹастийе жи әв пьрсед гәлә фәрз ьн, у фьрqи тʹӧнә, әм кʹи нә, йан жь кʹидәре һатьнә, һәр кәс жь мә дьхwазә щаба ван пьрса бьстинә.

² Дь сәре пенщадa әм пеһʹәсийан, кӧ бь сайа qӧрбанбуна Иса Мәсиһ мәри гӧмана жийина һʹәта-һʹәтайе дьстиньн. Ӧса жи жь Кʹьтеба Пироз әм пеһʹәсийан, кӧ wе бе wәʹдә, чахе «иди мьрьне тʹӧнәбә» (Әʹйанти 21:4). Ле ньһа мәри һе дьмьрьн. Пʹадшаки билан, Сьлеман гьлийед ӧса гот: «Йед кӧ дьжин дьзаньн кӧ wе бьмьрьн» (Ԝаиз 9:5). Рʹаст ә тʹӧ кәс нахwазә бьмьрә у дьхwазә wәки әʹмьре wи дьреж бә, ле мәрьв ахьрийа-ахьрийе дьмьрә. Ле чь жи һәбә, әм дьхwазьн пебьһʹәсьн, чь дьqәwьмә паши мьрьне?

³ Гава мәрьвед мәйә незик дьмьрьн, әм гәләк дьлтәнг дьбьн у бәр хwә дькʹәвьн. Жь бо ве йәке әм дәстпедькьн пьрсед ӧса бьдьнә хwә: ‹Гәло ньһа әwана кʹидәре нә? Гәло әwана дьчәрчьрьн? Әwана мә дьбиньн, йан на? Ле әм дькарьн али wан бькьн? Гәло әм дькарьн диса щарәке wана бьбиньн?› Сәрwеред дине дьнйайе, ль сәр ван пьрса щабед щурʹә-щурʹә дьдьн. Һьнәк һин дькьн кӧ һәрге мәри qәнщийе бькә, wе ль әʹзмана бьжи, ле һәрге хьрабийе бькә wе бькʹәвә щәʹньме. Һьнәк жи дьбежьн кӧ паши мьрьне мәри дьчә дьнйакә рʹӧһʹани, щәм кал-бавед хwә. Һәнә йед ӧса жи, кӧ дьбежьн wәки паши мьрьне һʹәму мәрийед мьри тʹоп дьбьн, сәва кӧ бенә диwанкьрьне у паше тʹәзәда бенә буйине ле ида бь бәдәнәкә дьн.

4. Чьда һинкьрьнед дине дьнйайе йәк ьн?

⁴ Һинкьрьнед wан религийа фькьрәке пешда тиньн, wәки паши мьрьне тьштәк жь мәрийа дәрте у дьжи. Ча бәре, ӧса жи рʹожа иройин, гәләк жь мәрийа баwәр дькьн кӧ паши мьрьне мәрьв дькарьн бьбиньн, бьбьһен, бьхwьн у дьшьрмиш бьн. Ле әв йәк нәрʹаст ә. Нет-фькьред мә һʹьше мәва тʹәвгьредайи йә. Һәрге һʹьше мә дьхәбьтә әм дькарьн дьшьрмиш бьн у тьштәки сафи кьн. Ле чахе мәри дьмьрә, һʹьше wи жи дьмьрә, wе дәме һʹәму нет-фькьред wи дьшьрмишбуна wи, бәтавәдьбьн. Фькьр бейи һʹьш, нькарьн һәбьн.

БЬ РʹАСТИЙЕ ЧЬ ДЬQӘWЬМӘ ПАШИ МЬРЬНЕ?

5, 6. Чь һин дькә Кʹьтеба Пироз дәрһәqа мьрийа?

⁵ Рʹасти дәрһәqа мьрьне жь һʹәмушка баштьр Йаһоwа занә, чьмки әw ә Әʹфьрандаре мәрийа. Әw занә паши мьрьне чь сәре мәрийа дьqәwьмә, дь Кʹьтеба Пирозда Хәбәра хwәда әw зәлал шьровәдькә кӧ: Гава мәри дьмьрә әw ида әʹмьр накә. Мьри нькарьн бьбиньн, бьбьһен йан жи дьшьрмиш бьн. Паши мьрьне, тьштәк жь мәрийа дәрнакʹәвә у нажи, нә рʹӧһʹе мәрийа нә жи нәфса мәрийа.a

⁶ Сьлеман пʹадша гьлийед ӧса ньвиси: «Йед кӧ дьжин дьзаньн кӧ wе бьмьрьн; ле бәле мьри . . . тьштәки ньзаньн». Сәрда жи әw зедә дькә, wәки мьри нькарьн нә һʹьз бькьн, нә жи ль сәр кәсәки һерс бьн. (Бьхунә Ԝаиз 9:5, 6, 10.) Ӧса жи дь кʹьтеба Зәбур 146:4-да ньвисар ә, wәки паши мьрьне «фькьред wи тʹӧнә дьбьн (АБ)». Һәр кәс дьмьрә, у паши мьрьна бәдәне, мәри нькарә бьжи. Әм дькарьн әʹмьре мәрийа һьмбәри алава муме бькьн. Һәрге муме весиньн, алав wе начә щики майин нәшхӧлә. Алав кʹӧта дьбә.

ЧЬ ДЬГОТ ИСА МӘСИҺ ДӘРҺӘQА МЬРЬНЕ?

7. Иса Мәсиһ мьрьн һьмбәри чь кьр?

⁷ Жь гьлийед Иса Мәсиһ әм педьһʹәсьн, кӧ паши мьрьне чь дьqәwьмә. Щарәке, Иса пеһʹәсийа кӧ һәвале wийи незик Лазар, мьрийә. Иса Мәсиһ готә шагьртед хwә: «Пьсмаме мә Лазар хәwрʹа чуйә». Шагьртед Иса заньбун кӧ Лазар нәхwәше гьранә, ләма жи wана тʹьре Лазар рʹазайә wәки пʹак бә. Ле бь рʹастийе әwана шаш бун. Иса Мәсиһ wанарʹа шьровәкьр wәки: «Лазар мьр». (Бьхунә Йуһʹәнна 11:11-14.) Дина хwә бьде кӧ Иса Мәсиһ мьрьн һьмбәри хәwе кьр. Гава Лазар мьр, әw нәчу ль әʹзмана, нә жи чу ль щәʹньме. Әw нә жи чу дьнйакә рʹӧһʹани бал кал-бавед хwә. У ӧса жи тʹәзә нәһатә буйине бь бәдәнәкә дьн. Әw бь хәwа мьрьне рʹаза бу, у әwи нькарьбу тʹӧ тьшт тʹәхмин кьра, нә жи дьшьрмиш буйа. Диса щарәке Иса Мәсиһ мьрьн һьмбәри хәwе кьр. Гава qиза Йайиро мьр, Иса гот: «Әw нәмьрийә, ле һеньжийә» (Луԛа 8:52, 53).

8. Жь кʹӧ әм заньн, wәки Йаһоwа нәдьхwәст кӧ мәрьв бьмьрьн?

⁸ Ле гәло мәрәма Йаһоwа Хwәде сәва мәрийа чь бу? Гәло әwи дьхwәст кӧ мәрьв бьмьрана? Фәʹмдари йә, wәки на! Йаһоwа мәри әʹфьранд сәва кӧ әwана һʹәта-һʹәтайе ль щьнәте бьжин. Ча әм ида пеһʹәсийан, чахе Йаһоwа мәрьвед пешьн әʹфьранд, әwи wана кьрә ль щьнәта бәдәw. Йаһоwа әwана бь сьһʹәт-qәwата кʹамьл әʹфьрандьн. У wанарʹа тʹәне qәнщи дьхwәст. Мәсәлә, ча бав у де нахwазьн wәки зарʹед wан нәхwәш кʹәвьн, бьчәрчьрьн, паше жи кал-пир бьн у бьмьрьн. Ӧса жи Йаһоwа, әwи зарʹед хwә гәләк һʹьз дькьр у дьхwәст кӧ әwана бәхтәwар бьн. Дәрһәqа мәрийа Кʹьтеба Пироз дьбежә wәки Йаһоwа, «абадини [һʹәта-һʹәтайе] жи хьст дьлед wан» (Ԝаиз 3:11). Бәле, Йаһоwа Хwәде әм ӧса чекьрьнә, кӧ хwәстьна мә һәйә һʹәта-һʹәтайе бьжин. Ләма жи, әwи Кӧрʹе хwә шандә әʹрде, сәва кӧ әм әʹмьре һʹәта-һʹәтайе бькарьбьн бьстиньн.

ЧЬРʹА МӘРИ ДЬМЬРЬН?

9. Кʹижан qәдәхәкьрьн Йаһоwа да Адәм у Һеwайе, у чьрʹа сәва wана чәтьн нибу гӧрʹа Йаһоwа Хwәде бькьрана?

⁹ Һәрге Йаһоwа Хwәде дьхwәст кӧ мәри һʹәта-һʹәтайе бьжин, ле чьрʹа мәри дьмьрьн? Сәва кӧ щаба ве пьрсе бьстиньн, wәрә пешийе әм пебьһʹәсьн, чь qәwьми чахе ль сәр әʹрде тʹәне жьн у мерәк бун. Кʹьтеба Пироз шьровәдькә: «Хӧдан Хwәде жь әʹрде һәр дар шин кьрьн, дитьнерʹа һʹәwаскʹар у хwарьнерʹа хwәш» (Дәстпебун 2:9, ПКʹМ). Ле qәдәхәкьрьнәк һәбу. Йаһоwа готә Адәм: «Жь һәр даред бахчәда, дьле тә дькʹьшинә кʹижане бьхwә, ле жь дара qәнщи у хьраби наскьрьне нәхwә, чьмки wе рʹожа гава тӧ жь wе бьхwи, те әʹсә бьмьри» (Дәстпебун 2:16, 17, ПКʹМ). Сәва Адәм у Һеwайе чәтьн нибу гӧрʹа Йаһоwа Хwәде бькьрана. Чьмки дь щьнәтеда гәләк даред дьн жи һәбун, жь кʹижана Адәм у Һеwа дькарьбун бьхwарана. Һәрге wана гӧрʹа Хwәде бькьра wе рʹазибуна хwә Хwәдерʹа нишан кьрана, йе кӧ әʹмьре qәданди дабу wан, у һьн жи һʹәму тьштед дьн. Бь гӧһдарикьрьна хwә, Адәм у Һеwайе wе бькарьбуна нишан кьрана, wәки әwана һʹӧкӧмәта Йаһоwа qәдьр-qимәт дькьн, у дьхwазьн пәй рʹебәрийа wи һәрʹьн.

10, 11. (а) Ча мәрийед пешьн гӧрʹа Йаһоwа Хwәде нәкьрьн? (б) Чьрʹа әм дькарьн бежьн кӧ сәва нәгӧһдарикьрьне, Адәм у Һеwа һежайи бахшандьне нибун?

¹⁰ Ле йа хьраб әw ә, кӧ мәрийед пешьн гӧрʹа Йаһоwа Хwәде нәкьрьн. Мире-щьна мәʹр да хәбате сәва кӧ Һеwайерʹа хәбәрдә. Мире-щьна гот: «Рʹасти Хwәде готийә wәки жь һʹәму даред бахчә гәрәке нәхwьн?» Һеwайе щаба wи да: «Жь бәред даред бахчә әм дькарьн бьхwьн. Ле жь бәре wе дара кӧ нава бахчәда йә, Хwәде гот нәхwьн у дәст нәдьне, wәки һун нәмьрьн» (Дәстпебун 3:1-3, ПКʹМ).

¹¹ Мире-щьна жи щаба Һеwайе да у гот: «На, һун тʹӧ щар намьрьн, ле Хwәде занә, wе рʹожа гава һун жь wе бьхwьн, чʹәʹвед wәйе вәбьн у [һуне] бьбьнә мина Хwәде, qәнщи у хьрабийе жь һәв дәрхьн» (Дәстпебун 3:4, 5, ПКʹМ). Шәйтʹан Мире-щьна дьхwәст Һеwа бьда баwәркьрьне, кӧ һәрге әw бәра qәдәхәкьри бьхwә, wе кʹарәкә мәзьн бьстинә. Бь готьна Мире-щьна, Һеwайе дькарьбу хwәха qәнщи у хьраби жь һәв дәрхьста, у дькарьбу һʹәму тьшт, чь кӧ дьле wе бьхwәста, бькьра. Һьн жи Мире-щьна бӧхдан авитә Йаһоwа Хwәде. Әwи гот кӧ Йаһоwа тьштәки жь wан вәдьшерә у ләма жи изьне надә wана, бәра жь ве даре бьхwьн. Һеwайе баwәрийа хwә Мире-щьна ани. Әwе дәст авитә бәре wе даре, хwар у да мере хwә жи, у әwи жи хwар. Адәм у Һеwайе рʹьнд заньбун, кӧ Йаһоwа Хwәде изьн нәдайә wан әви емиши бьхwьн, ле wана хwәха жьбарт гӧрʹа Хwәде нәкьн. Чахе wана жь бәре wе даре хwарьн, бь ве йәке әwана мьqабьли фәрмана Хwәде чун, йа кӧ сәва wан керһати бу у чәтьн нибу. Һьн жи бь нәгӧһдарикьрьна хwә, wана Баве хwәйи әʹзмана у һʹӧкӧмәта wи беһӧрмәт кьрьн. Ләма жи кьред Адәм у Һеwайе нә йе бахшандьне бун!

12. Пе кʹижан мәсәле әм дькарьн фәʹм бькьн, кӧ Йаһоwа ль сәр хwә чь тʹәхмин кьр, гава Адәм у Һеwа мьqабьли wи рʹабун?

¹² Һәла бьдә бәр чʹәʹве хwә. Мәсәлә, һәрге кӧрʹе тә йан жи qиза тә, йе кӧ тә дәлали хwәйи кьрийә у мәзьн кьрийә, пе шьхӧлед хwә нишанкьрана кӧ тә һʹьз накьн у qәдьре тә нагьрьн, әв йәк wе ча сәр тә һʹӧкӧм буйа? Һьлбәт, wе дьле тә зәʹф бешанда. Дә ньһа бьдә бәр чʹәʹве хwә Йаһоwа чь еш сәр хwә тʹәхмин кьр, гава Адәм у Һеwайе гӧрʹа Хwәде нәкьрьн у мьqабьли wи дәркʹәтьн.

13. Дәрһәqа һʹале Адәм паши мьрьне, Йаһоwа чь гот, у әв йәк чь дьһатә һʹәсабе?

¹³ Ләма жи Йаһоwа нәһишт, wәки Һеwа у Адәме нәгӧһдар, һʹәта-һʹәтайе бьжин. Ча wанарʹа һатьбу готьне, әwана мьрьн. Адәм у Һеwа ида нәдьжитьн. Әwана нәкʹәтьнә дьнйакә рʹӧһʹани. Әв йәк жь гьлийед Йаһоwа те кʹьфше, кӧ дьбежә Адәм: «Тӧ вәгәрʹи ль wи әʹрди жь кʹӧ һати һьлдане, чьмки тӧ ах и у те диса бьби ах» (Дәстпебун 3:19, ПКʹМ). Йаһоwа, Адәм жь аха әʹрде әʹфьранд (Дәстпебун 2:7). Пешийа кӧ Йаһоwа Хwәде Адәм чекьра, Адәм тʹӧ щикида нәдьжит, нә жи тʹӧ щикида һәбу. Ләма жи гава Йаһоwа готә Адәм тӧ вәгәрʹи ль wи әʹрди, әв дьһатә һʹәсабе кӧ Адәм гәрәке бьбуйа ах, у диса вәгәрʹийа ль тʹӧнәбуне.

14. Гәло чьрʹа мәри дьмьрә?

¹⁴ Һәрге Адәм у Һеwа гӧрʹа Йаһоwа Хwәде бькьрана, әwана иро wе сах буна, ле чьмки wана гӧрʹа Хwәде нәкьр, әwана бунә гӧнәкʹар у дь ахьрийеда мьрьн. Ләма жь бо гӧне Адәм, әм жи дьмьрьн, чьмки гӧнә дәрбази ль сәр һʹәму мәрийа бу. (Бьхунә Рʹомайи 5:12.) Гӧнә мина нәхwәшийе йә, йе кӧ бь рʹькʹьнәтийе дәрбази һʹәмуйа дьбә у тʹӧ кәс нькарә ле хьлаз бә. Жь бо ве нәхwәшийе, демәк гӧнәкʹарийе ахьрийа-ахьрийе һʹәму мәрьв дьмьрьн. Ле мьрьн дьжмьне мәрийа йә, кʹәдәрәкә мәзьн мәрийарʹа тинә (1 Корьнтʹи 15:26). Ләма жи әм дькарьн жь Йаһоwа Хwәде гәләк рʹази бьн, чьмки әwи Кӧрʹе хwәйи дәлал кьрә qӧрбан, сәва кӧ мә жь мьрьне хьлаз кә.

ГӘЛӘ ФӘРЗ Ә, БЬЗАНБЬН РʹАСТИЙЕ ДӘРҺӘQА МЬРЬНЕ

15. Чьрʹа бьзаньбьн рʹастийе дәрһәqа мьрьне, әв дьле мә рʹьһʹәт дькә?

¹⁵ Кʹьтеба Пироз дәрһәqа мьрьне рʹастийе мәрʹа дьбежә. Әв йәк дьле мә рʹьһʹәт дькә. Ча әм ида пеһʹәсийан, мьри начәрчьрьн, у нә жи һаш жь хwә һәнә. Ләма жи әм гәрәке жь wана нәтьрсьн, чьмки әwана нькарьн зийане бьдьнә мә. Әм нькарьн тʹӧ тьштәкида али wан бькьн, у әwана жи нькарьн тʹӧ тьшти бона мә бькьн. Әм нькарьн wанарʹа хәбәр дьн, әwана жи нькарьн мәрʹа хәбәр дьн. Гәлә жь сәрwеред дине дьнйайе дьбежьн, wәки әwана дькарьн али мьрийа бькьн, у әw мәри кʹи кӧ баwәрийа хwә wан тиньн, бәр байе wан дькʹәвьн, пʹәра дьдьнә wан. Ле гава әм рʹастийе заньн, әв йәк мә жь дәрәwед wан мәрийа хwәй дькә.

16. Һинкьрьнед дине мәрийа бьн һʹӧкӧмтийа кʹеда ньн, у әwана чь һин дькьн?

¹⁶ Ле һинкьрьнед дине тә дәрһәqа мьрьне, у һинкьрьнед Кʹьтеба Пироз, йәк ьн? Һʹәчʹи зәʹф дәрһәqа мьрьне щурʹәки дьн һин дькьн. Гәло чьрʹа? Чьмки һинкьрьнед wан бьн һʹӧкӧмтийа Мире-щьнада ньн. Һьнә жь дине дьнйайе һин дькьн, кӧ бь рʹастийе мәри намьрә, ле паши мьрьна бәдәне әwана дькʹәвьнә дьнйакә рʹӧһʹани. Шәйтʹан Мире-щьна ве дәрәwийе дьдә хәбате, сәва кӧ мәрийа жь Йаһоwа Хwәде дур хә. Ле чь щурʹәйи?

17. Чьрʹа һинкьрьн дәрһәqа щәʹньме, Йаһоwа беһӧрмәт дькә?

¹⁷ Ча ида пешда һатьбу готьне, һьнә жь религийа йане динед дьнйа ӧса һин дькьн: һәрге мәри хьрабийе дькә, әw дькʹәвә ль щәʹньме, кʹидәре һʹәртьм wе бьчәрчьрә. Һинкьрьна ӧса, Йаһоwа Хwәде беһӧрмәт дькә. Чьмки Йаһоwа Хwәде һʹьзкьрьн ә, у әw тʹӧ щар мәрийа начәрчьринә. (Бьхунә 1 Йуһʹәнна 4:8.) Мәсәлә, те чь дьшьрмиш би дәрһәqа мәрьвәки, йе кӧ бона щәзакьрьна зарʹа хwәйә нәгӧһдар, дәсте wи ль сәр агьр бьгьрә? Тәйе qәдьре мәрьвәки ӧса бьгьрта? Йан жи тәйе бьхwәста wи мәрьвирʹа бьби дост? Фәʹмдари йә, wәки на! Тӧйе дьшьрмиш буйайи, кӧ әв мәрьв йәки гәләк зӧлм у хьраб ә. Мире-щьна жи дьхwазә мә бьдә баwәркьрьне, wәки Йаһоwа йәки хьраб ә у мәрийа дь щәʹньмеда бь агьре, һʹәртьм дьчәрчьринә.

18. Мьрийа бьһʹәбиньн, әв ль сәр һʹиме кʹижан һинкьрьнед нә рʹаст ә?

¹⁸ Бь аликʹарийа һинкьрьнед дине qәлп, Шәйтʹан Мире-щьна мәрийа дьдә баwәркьрьне, wәки паши мьрьне мәри дьбьнә кәсед рʹӧһʹани, у йед сах гәрәке qәдьре wан бьгьрьн. Әwана һин дькьн, кӧ рʹӧһʹе мьрийа дьбә йан пьштоване мәрийа, йан жи дьжмьне зӧлм. Мәри ниве зәʹф, баwәрийа хwә ве һинкьрьне тиньн. Ләма жи әwана жь мьрийа дьтьрсьн у wана һӧрмәт дькьн. Ле жь Кʹьтеба Пироз әм педьһʹәсьн, wәки мьри бь хәwа мьрьне рʹаза нә, у әм гәрәке тʹәне Йаһоwа һӧрмәт кьн у wирʹа qӧльх кьн, чьмки әw Әʹфьрандар у Жийиндаре мә йә (Әʹйанти 4:11).

19. Һәрге әм бьзаньбьн рʹастийе дәрһәqа мьрийа, әв йәк wе чьда али мә бькә?

¹⁹ Һәрге тӧ бьзаньби рʹастийе дәрһәqа мьрийа, тӧйе жь һинкьрьнед дине qәлп нәйе хапандьн. Хенщи ве йәке, чахе тӧ рʹастийе дәрһәqа мьрийа зани, тӧйе һинкьрьнед дьн жи жь Кʹьтеба Пироз рʹьнд фәʹм бьки. Мәсәлә, чахе тӧ баwәр дьки кӧ бь рʹастийе паши мьрьне жийин ида тʹӧнә, wи чахи те һе зедә бьшекьрини созе Йаһоwа Хwәде дәрһәqа жийина һʹәта-һʹәтайе ль сәр әʹрде.

20. Дь сәре майинда әме дәрһәqа чь пебьһʹәсьн?

²⁰ Гәләк сал пешда, мәрики амьн бь наве Ибо, пьрсәкә ӧса да: «Һәгәр мәрьв бьмьрә, гәло дькарә диса бьжи?» (Ибо 14:14, ДТʹ). Гәло, мәри йед кӧ бь хәwа мьрьне рʹазанә, дькарьн пашда вәгәрʹьн ль жийине? Ль сәр ве пьрсе Кʹьтеба Пироз щабәкә ӧса дьдә, кӧ дьле мә рʹьһʹәт дьбә. Дәрһәqа ве йәке әме дь сәре майинда пебьһʹәсьн.