Әw әʹламәтийа фәрз жь чар кʹьтебед пешьн жь Мьзгини йә, кʹижан öса жи те навкьрьне ча Пәймана Ну. Ле әw тьшт бь рʹастийе qәwьмин? Әw пьрсәкә гәләк фәрз ә. Чьмки һәрге әw тьшт нәqәwьмийә, wәки öса нә баwәрийа Мәсиһийа пʹучʹ ә у баwәрийа һьндава жийина һʹәта-һʹәтайе жи чʹирʹок ә (1 Корьнтʹи 15:14). Алийе дьнва жи һәрге сәрһатийа дәрһәqа Иса рʹасти qәwьмийә, демәк әw йәк ахьрикә гәләк баш wе бинә, у тö жи дькари жь wе йәке кʹаре бьстини. Ләма wәрә әм пебьһʹәсьн әw һʹәму тьшт бь рʹастийе qәwьминә, йан на.

ӘW QӘWЬМАНДЬН ЧЬ НИШАН ДЬКЬН

Сәрһатийа дәрһәqа Иса жь чар кʹьтебед пешьн жь Пәймана Ну әw нә мина чʹирокед нә реали нә. Әw сәрһати гәләк тʹәрбәт һатийә ньвисаре у wе сәрһатийеда әʹламәтийед һур жи һатьнә ньвисаре. Мәсәлә, дь wе сәрһатийеда ньвисар ә навед гәләк щийа, кʹижан кö рʹожа иройин жи дькарьн бьвиньн. Дь wе сәрһатийеда те гьликьрьне бона мәрьвед реали, дәрһәqа кʹижана ньвискʹаред нә мәсиһи хwәха избат дькьн (Луqа 3:1, 2, 23).

Дь qьрʹна йәке у дöдада ньвискʹаред нәмәсиһи жи гьли дькьрьн дәрһәqа Иса.a Иса һәма бь wи щурʹәйи һатә кöштьне, чаwа кö wи чахи Рʹомайа мәрьве сущдар дькöштьн. Кöштьна Иса чаwа ньвисар ә дь чар кʹьтебед пешьн жь Пәймана Нуда тʹәвгьредайи йә тʹәви методед кöштьнед Рʹомайа wәʹде бәре. Хенщи wе йәке, әw qәwьмандьн тʹәвгьредайи йә тʹәви избаткьрьнед кö бь рʹастийе qәwьминә у һәла һе жи дьдьнә кʹьфше шашийед шагьрта (Мәтта 26:56; Луqа 22:24-26; Йуһʹәнна 18:10, 11). Әw һәр тьшт избат дькьн кö әwед Мьзгини ньвисинә, мәрьвнә дьлпʹак бунә у дәрһәqа Иса һʹәму тьшт рʹаст ньвисинә.

ЛЕ ЧЬ ӘМ ДЬКАРЬН БЕЖЬН ДӘРҺӘQА РʹАБУНА ИСА ЖЬ МЬРЬНЕ?

Рʹаст ә гәләк мәрьв баwәр дькьн кö Иса дьжит у мьр, ле һәнә мәрьв дöдьли дьбьн кö әw һатийә сахкьрьне. Сәре серида һәла һе шагьртед Иса жи баwәр нәкьрьн кö әw wәгәрʹийа жийине (Луqа 24:11). Ле, чахе wана паши сахкьрьне Иса дь щурʹә-щурʹә дәрәщада дитьн, әwана ида дöдьли нибун. Мәсәлә, щарәке wәкә 500 мәрьва Исайе сахбуйи дитьн (1 Корьнтʹи 15:6).

Рʹаст ә шагьртед Иса дькарьбун бенә гьртьне у кöштьне, ле wана диса жи бь мерхаси һʹәмуйарʹа гьли дькьрьн дәрһәqа рʹабуна Иса жь мьрьне, һәла һе wанарʹа жи кʹе Иса кöшт (Кʹаред Шандийа 4:1-3, 10, 19, 20; 5:27-32). Һәрге шагьрта сәд сәләфи баwәр нәкьрана кö Иса жь мьрийа рʹабуйә, wана öса бь мерхаси wе гьли нәкьра дәрһәqа wи. Бәле әw йәк кö Иса рʹасти жь мьрьне һатә рʹакьрьне, qәwате дьдә һʹәму Mәсиһийед рʹаст, wәки мерхас бьн бәр чәтьнайа.

Әʹламәтийед жь Пәймана Ну, дәрһәqа мьрьн у рʹабуна Иса жь мьрьне йә, әw әʹламәти избат дькьн кö әw ньвисар рʹаст ьн. Һәрге әм бьхуньн у кʹур дина хwә бьдьнә wан әʹламәтийа, әw йәк wе мә бьдә баwәркьрьне, кö әw qәwьмандьн бь рʹастийе qәwьминә. Баwәрийа тә wе һе qәwи бә, һәрге тö фәʹм бьки чьрʹа әw һәр тьшт qәwьминә. Дәрһәqа wе йәке дь тʹема дьнда wе бе шьровәкьрьне.

Wәйе ча щаба хwә бьда һәрге wә пьрскьрана: «Һун дьхwазьн һʹәта-һʹәтайе бьжин?» Һьлбәт гәләк мәрьв wе бежьн әре, ле йәкә дьфькьрьн кö әw йәк wе наqәwьмә. Чьмки әwана дьбежьн кö мьрьн әw тьштәки нормал ә дь әʹмьре мәрьвада.

Ле һәрге әве пьрсе бь wи щурʹәйи бьдьнә wә: «Һун һазьр ьн әʹмьре хwә öнда кьн?» Тʹö кәс жь мәрьва нахwазә бьмьрә. Гәло чьрʹа? Мәрьв чьqас жи рʹасти чәтьнайа бен, йәкә дьхwазьн бьжин. Жь Кʹьтеба Пироз әм педьһʹәсьн кö Хwәде мәрьв öса әʹфьрандийә кö дьхwазьн бьжин. Хәбәра wида öса те готьне кö «wи һәр тьшти . . . абадини хьст дьлед wан» (Wаиз 3:11).

Рʹожа иройин мәрьв һʹәта-һʹәтайе нажин. Ле чьрʹа? Гәло Хwәде тьштәк кьр сәва кö әwе дәрәще бьдә гöһастьне? Щабед wан пьрса дь Кʹьтеба Пирозда һәнә, у әw мә дьлгәрм дькьн. Кʹьтеба Пироз öса жи әʹйан дькә сәва чь Иса чәрчьри у мьр.

ЧЬ ШАШИ ҺАТӘ БӘРДАН

Се сәред пешьн жь кʹьтеба Дәстпебунеда те готьне кö Хwәде Адәм у Һеwа әʹфьранд, сәва кö әwана һʹәта-һʹәтайе бьжин. Әwи готә wан кö әwана чь гәрәке бькьн бона wе жийине. Жь wан сәрийа әм öса жи педьһʹәсьн кö wана гöрʹа Хwәде нәкьр, у ләма әʹмьре хwәйи һʹәта-һʹәтайе öнда кьрьн. Дәрһәqа wе йәке öса һеса һатийә гьликьрьне, wәки гәләк һʹәсаб дькьн кö әw йәк чʹирʹок ә. Ле кʹьтеба Дәстпебун, öса жи Пәймана Ну, избат дькә кö әw йәк рʹасти qәwьми.

Әw йәк кö Адәм гöрʹа Хwәде нәкьр чь ахьри ани инсанәтерʹа? Кʹьтеба Пироз щаба wе пьрсе öса дьдә: «Аwа чаwа бь мәрьвәки гöнә кʹәтә дьне у жь гöнә жи мьрьн һат, öса жи мьрьн сәр һʹәму мәрьва бәла бу, чьмки һʹәмуйа жи гöнә кьр» (Рʹомайи 5:12). Адәм гöнәки мәзьн кьр, чьмки әwи гöрʹа Хwәде нәкьр у ләма жи әʹмьре һʹәта-һʹәтайе öнда кьр у мьр. Әм зöрʹәте wи нә, ләма гöнә дәрбази сәр мә жи бу. Ләма жи мәрьв нәхwәш дькʹәвьн, кал-пир дьбьн у дьмьрьн. Шьровәкьрьна wе йәке кö әм чьрʹа дьмьрьн, ләv те тʹәви шьровәкьрьна зандара дәрһәqа wе йәке, кö ча нәхwәшийа де-бава бь генетик дәрбази сәр зарʹе wан дьбә. Ле пьрс пешда те, гәло Хwәде чь кьр wәки гöнә у мьрьн бьдә һьлдане?

ХWӘДЕ БОНА WЕ ЙӘКЕ ЧЬ КЬР

Хwәде пешда хәм кьр, wәки wәгәрʹинә мәрийарʹа әw әʹмьре һʹәта-һʹәтайе, кʹижан кö Адәм öнда кьр. Ле Хwәде wе ча әwе йәке бинә сери?

Кʹьтеба Рʹомайида 6:23 те готьне кö «маше гöнә мьрьн ә». Әw те һʹәсабе кö ахьрийа гöнә мьрьн ә. Адәм гöнә кьр ләма жи мьр. Бь wи щурʹәйи әм жи чаwа зöрʹәте Адәм, жь бо гöнә дьмьрьн. Чьмки әм бь гöнә һатьнә буйине. Ләма жи Хwәде бь һʹьзкьрьне кöрʹе хwә Иса Мәсиһ шандә сәр әʹрде wәки «маше гöнә» һьлдә сәр хwә. Ле чь щурʹәйи?

Чьмки бь мәрьвәки беqьсур, демәк бь Адәм, гöнә у мьрьн дәрбази мә бун, ләма жи сәва кö гöне һәр кәси бенә һьлдане, лазьм бу мәрьвәки мина wи беqьсур, кʹижан кö гәрәке һʹәта мьрьна хwә жи амьн бьма. Кʹьтеба Пироз öса дьбежә: «Бь нәгöһдарийа йәки гәләк бунә гöнәкʹар, öса жи бь гöһдарийа йәки гәләк wе рʹаст бенә һʹәсабе» (Рʹомайи 5:19). Әw мәрьве беqьсур Иса бу.a Әwи әʹзман һишт, бу мәрьве беqьсур, у сәва мә әʹмьре хwә да. Мьрьна Иса мәщале да мә wәки һәләqәтийа хwә тʹәви Хwәде незик кьн у әʹмьре һʹәта-һʹәтайе бьстиньн.

ЧЬРʹА ИСА ЩӘФА КЬШАНД У МЬР?

Чьрʹа мьрьна Иса лазьм бу? Гәло Хwәдайе һьмзор нькарьбу öса бькьра кö зöрʹәтед Адәм һʹәта-һʹәтайе бьжитана? Әw йәк wирʹа qә чәтьн нибу. Ле һәрге Хwәде әw йәк бькьра, wе мьqабьли qануна хwә бьчуйа, кö маше гöнә мьрьн ә. Әw qанун нә кö тьштәкә нәфәрз ә йа кö дькарә бе гöһастьне йан жи нәйе сери. Ле бь рʹастийе әw һʹиме һәqийа у рʹастийа Хwәде йә (Зәбур 37:28).

Һәрге Хwәде wе дәрәщеда һәрге хwә нәда кʹьфше, мәрьв дькарьбун дöдьли буна кö дь дәрәщед дьнда жи Хwәде wе һәqийа хwә бьда алики. Мәсәлә, гәло Хwәде wе бь һәqийе бьжберә кʹе жь зöрʹәта Адәм һежайи әʹмьре һʹәта-һʹәтайе йә? Йан жи гәло әм дькарьн амьнийа хwә Хwәде биньн кö әw wе созед хwә бинә сери? Әw йәк кö Хwәде рʹастийа хwә да кʹьфше, һе зедә баwәрийа мә qәwи дькә, кö әw wе тʹьме бь һәqийе һәр тьшти бькә.

Хwәде бь сайа qöрбана Иса мәщал да мә, кö ль сәр әʹрде, Щьнәтеда һʹәта-һʹәтайе бьжин. Дина хwә бьдьнә гьлийед Иса жь Йуһʹәнна 3:16 «Хwәде öса дьнйа һʹьз кьр, кö Кöрʹе хwәйи тайе тʹәне бәрва да, wәки һәр кәсе кö wи баwәр бькә öнда нәбә, ле жийина wийә һʹәта-һʹәтайе һәбә». Бь wи щурʹәйи мьрьна Иса әw нә кö тʹәне һәqийа Хwәде дьдә кʹьфше, ле һе зедә дьдә кʹьфше һʹьзкьрьна wи һьндава мәрьва.

Ле чьрʹа Иса гәрәке бьчәрчьрийа у öса бьмьрийа? Иса хwә кьрә qöрбан у амьн ма, бь wе йәке әwи избат кьр wәки Шәйтʹан дәрәw кьр чахе бöхдан авит кö мәрьв һʹәта хьлазийе Хwәдерʹа амьн наминьн гава рʹасти чәтьнайа тен (Ибо 2:4, 5). Әw бöхдана Шәйтʹан дькарьбу рʹаст бьһата һʹәсабе, чьмки Адәме беqьсур рʹасти чәтьнайада амьн нәма у гöнә кьр. Ле чьмки Иса кö мина Адәм беqьсур бу, wәʹде чәтьнайед гьран жи амьн ма, әwи бь wе йәке избат кьр кö Шәйтʹан дәрәwин ә (1 Корьнтʹи 15:45). Иса öса жи избат кьр кö Адәм жи дькарьбу Хwәдерʹа амьн бьма, һәрге әwи сафикьрьна рʹаст бькьра. Бь wе йәке кö Иса щәфа кʹьшанд у амьн ма әwи нәхшәк у мәсәлә бона мә һишт (1 Пәтрус 2:21). Ләма жи Хwәде Иса кʹәрәм кьр сәва амьнийа wи, бь wе йәке кö әʹмьре һʹәта-һʹәтайе ль сәр әʹзмана да wи.

ӘW ЙӘК ЧЬ КʹАР ДЬКАРӘ WӘРʹА БИНӘ

Иса бь рʹастийе мьр. У мьрьна wи рʹийа бона жийина һʹәта-һʹәтайе мәрʹа вәкьр. Һун дьхwазьн жийина һʹәта-һʹәтайе бьстиньн? Иса гот кö чь әм гәрәке бькьн сәва кö әве жийине бьстиньн: «Әв ә жийина һʹәта-һʹәтайе, wәки әw тә нас кьн, чаwа Хwәдейе рʹасти бешьрики-беһәвал у öса жи Иса Мәсиһе кö тә шандийә» (Йуһʹәнна 17:3).

Әм wә тʹәглиф дькьн кö һун һе зедә пебьһʹәсьн дәрһәqа Йаһоwа, Хwәдайе рʹастийе у Кöрʹе wи Иса Мәсиһ. Шәʹдед Йаһоwа йе кö дь мьһала wәда дьжин wе бь шабуне аликʹарийе бьдьн wә дь wе йәкеда. Һун öса жи дькарьн аликʹарийе бьстиньн жь малпәра мә, www.jw.org.