Бьчʹуктайеда qә öса буйә, кö тö кʹәти у дәст-мьле тә ешийан? Те бира тә ча дийа тә бәр дьле тәда дьһат? Дьбә кö әwе бьринед тә тʹәмьз дькьр у гьредьда. Тö дьгьрийайи, ле әwе, тә да һәмеза хwә у пач кьр. У тә ида хwә баш тʹәхмин кьр. Бьчʹуктайеда тә тʹьме бәрдьли дитийә.

Ле чахе әм мәзьн дьбьн, жийин һе чәтьн дьбә. Проблемед мә жи һе мәзьн дьбьн, у ида чәтьн дьбә бәрдьлийе бьвинин. Йазьх ле проблемед мәзьна öса һеса найенә сафикьрьне чаwа кö заротийеда. Wәрен әм дәрһәqа һьнә мәсәла хәбәр дьн.

• Дьбәкә тә хәбата хwә öнда кьрийә. Чахе мерәки бь наве Һулийан хәбата хwә öнда кьр, әw гәләк бәрхwәдькʹәт у дьфькьри: «Әзе ньһа чаwа малбәта хwә хwәй кьм? Мьн һаqас сал әв хәбат дькьр, чьма мәзьне хәбате сафи кьр кö әз ида нәлазьм ьм?»

• Дьqәwьмә жьн йан мере тә, жь тә qәтийайә у жь бо wе йәке тö гәләк дьлтәнг дьби. Кʹöлфәтәкә бь наве Ракел гьли дькә: «18 мәһ пешда мере мьн, ньшкева әз һиштьм. Әв йәк бона мьн кʹәдәрәкә гьран бу. Дьле мьн ча бежи шькәст. У ешәкә мәзьн кʹәтә дьле мьн у бәдәна мьн. Әз дьтьрсийам, гәло ахьрийа мьн wе чаwа бә».

• Йан дьбәкә тö гьран нәхwаш и у һʹале тә баш набә. Щарна жь бо һʹале хwә дьбәкә тö мина Ибо пʹехәмбәр öса дьфькьри: «Әз жь жийана хwә . . . дькәрьһьм [нәфрʹәт дькьм]: Һʹәта һʹәтайийе жийане нахwазьм» (Ибо 7:16). Дьбәкә щарна тö жи öса дьфькьри мина мерәки 80 сали бь наве Луйис йе кö дьбежә: «Щарна әз тʹәне мьрьне хwәрʹа дьхwазьм».

• Йан дьбә кö тә мәрьве хwәйә незик öнда кьрийә у ньһа һьзрәта бәрдьлийе йи. Мерәки бь наве Роберт дьбежә: «Чахе кöрʹе мьн кʹәтә qәзийе у мьр, мьн пешийе баwәр нәдькьр. Ле паше, ешәкә мәзьн кʹәтә дьле мьн. Чаwа кö Кʹьтеба Пироз дьбежә, әw еш мина «тʹирәке нав мьнрʹа дәрбаз бу» (Луqа 2:35).

Роберт, Луйис, Ракел у Һулийан һәла һе дәрәщед чәтьнда жи бәрдьли дитьн. Әw йе кö бәрдьли дабу wан, Хwәдайе Һьмзор ә. Гәло Хwәде чь щурʹәйи бәрдьли дьда wан? У чь щурʹәйи әwе бәрдьлийе бьдә тә?

Паwлосе шанди сәр Йаһоwаa дьбежә, «Хwәдейе һʹәму бәрдьлийе», йе кö «нава һʹәму тәʹли-тәнгийада дьл дьдә бәр мә» (2 Корьнтʹи 1:3, 4). Кʹьтеба Пироз мә дьдә баwәркьрьне, кö Хwәде аликʹарийе дьдә һʹәмуйа. Фьрqи тʹöнә әм рʹасти чь чәтьнайа йан qәзийа бен, qәwата Баве мәйи әʹзмана дьгьһиже бәрдьлийе бьдә мә.

Һәмьки әм жи гәрәке тьштәки бькьн, сәва кö бәрдьлийе жь Хwәде бьстиньн. Мәсәлә һәрге әм нәхwаш ьн у начьнә щәм дохдьр, әwе нькарьбә али мә бькә, öса нинә? Ләма жи Ньвисаред Пироз мә һелан дькьн: «Хwә ль Хwәде бьгьрьн, Хwәде жи wе хwә ль wә бьгьрә» (Аqуб 4:8).

Әм чьма баwәр дькьн, кö Хwәде wе хwә ль мә бьгьрә? Бәри әʹwльн әw ә, кö Хwәде хwәха мәрʹа дьбежә, кö дьхwазә али мә бькә. (Дина хwә бьдьнә чаргоше.) Йа дöда жи әw ә, кö һәйә избаткьрьна wе йәке, wәки чаwа wәʹде бәре у ньһа, гәләк мәрьв , бәрдьли жь Хwәде дьстандьн.

Иро гәләк мәрьв аликʹарийа Хwәде дьгәрʹьн. Анәгори ве йәке Даwьд Пʹадша жи йе кö кʹәтьбу qәзийе, жь Хwәде рʹәща дькьр: «Бьбьһизә дәнге һаwара мьн». Гәло Хwәде әw бьһист? Бәле. Даwьд сәрда зедә дькә: «Дьле мьн ль wи әwлә бу у мьн аликʹари дит» (Зәбур 28:2, 7, ИМ).

ЧАWА ИСА БӘРДЬЛИ ДЬДА ДЬЛШКӘСТИЙА

Хwәде qьрар кьрьбу, wәки Иса бәрдьлийе бьдә мәрийа. Бь qьрара Хwәде Иса гәрәке гәләк тьшт бькьра. Шьхöләки wи әw бу, wәки «бьрине йед дьлшькәсти» qәнщ кә у бәрдьлийе бьдә wан, йед кö дьлбьриндар ьн (Ишайа 61:1, 2). Чаwа кö һатьбу пʹехәмбәртикьрьне, Иса бь рʹасти хәм дькьр дәрһәqа мәрьвед «wәстийайи у баргьран» (Мәтта 11:28-30).

Иса бь ширәтед аqьлайи бәр дьле мәрьвада дьһат у һьндава wанда дьлшәwат бу. Әwи һәла һе нәхwәшийед wан жи qәнщ дькьр. Щарәке мәрьвәк кʹоти рʹәща Иса кьр: «Һәгәр тö бьхwази, дькари мьн паqьж ки». Гöне Иса пе һат, у жерʹа гот: «Әз дьхwазьм. Паqьж бә!» (Марк 1:40, 41). Һьнге мәрьве кʹоти qәнщ бу.

Рʹаст ә кöрʹе Хwәде иро ль сәр әʹрде нинә, wәки али мә бькә, ле Баве wи Йаһоwа демәк «Хwәдейе һʹәму бәрдьлийе», диса жи аликʹарийе дьдә мә (2 Корьнтʹи 1:3). Wәрен әм хәбәр дьн дәрһәqа чар тьшта, йед кö Хwәде дьдә хәбате сәва бәрдьлийе бьдә мәрийа.

• Хәбәра Хwәде. «Чь кö пешда кʹьтебада һатә ньвисаре, бона һинбуна мә һатә ньвисаре, wәки әм бь сәбьре у wан готьнед ньвисарада кö бине дьдьнә бәр мә, хwәйигöман бьн» (Рʹомайи 15:4).

• Рʹöһʹе Хwәдейи Пироз. Пәй мьрьна Исарʹа һьнә wәʹдә дәрбаз бу у тʹәмамийа щьвата Мәсиһтийада әʹдьлайи һәбу. Бь сайа чь әʹдьлайи чебу? «Бь хофа Хöдан у бь дьлдайина Рʹöһʹе Пироз» (Кʹаред Шандийа 9:31). Рʹöһʹе пироз, демәк qәwата Хwәде, гәләк qәwи йә. Хwәде дькарә ве бьдә хәбате, сәва кö һʹәму дәрәщада бәрдьлийе бьдә һәркәса.

• Дöа. Кʹьтеба Пирозда ньвисар ә: «Бона тʹö тьшти хәм нәкьн». Ле дәwсе «хwәстьна wә бьра . . . Хwәдева әʹйан бә. У әʹдьлайийа Хwәде кö жь һәр һʹьш-аqьли дәрбазтьр ә, wе дьл у фькьред wә . . . хwәй кә» (Филипи 4:6, 7).

• Хьзмәткʹаред Хwәдейи Рʹаст дькарьн сәва wә бьбьнә дост, йед кö wәʹде чәтьнайа wе бәрдьлийе бьдьнә wә. Паwлосе шанди дәрһәqа достед хwә гот, кö «нава һʹәму тәʹли у тәнгийада» әwана сәва wи бунә канийа бәрдьлийе у һеланкьрьне (Колоси 4:11; 1 Тʹесалоники 3:7).

Дьбәкә тö дьфькьри, ле гәло рʹасти әв тьшт бәрдьли у аликʹари дьдьн? Wәрен әм һе рʹьнд дина хwә бьдьнә мәсәла мәрийа, йед кö рʹасти чәтьнайа һатьбун у дәрһәqа кʹижана кö мә ида хәбәр дайә. Тö жи мина wан, дькари бәрдьлийа Хwәде сәр хwә тʹәхмин ки. У жь Хәбәра хwә, Хwәде мәрʹа дьбежә wәки чаwа кö де у бав бәр дьле зарʹед хwә тен, öса жи Әw wе бәр дьле мәда бе (Ишайа 66:13).

ЧАХЕ БЕ ХӘБАТ ДЬМЬНИ

Мерәки бь наве Сетa дькә бира хwә: «Мьн тʹәви жьна хwә Прискила, wәʹдәкида хәбата хwә öнда кьр. Дö сала мәрьвед мә аликаʹри дьданә мә, у мә жи щурʹә-щурʹә хәбат дькьр. Жь бо wе дәрәще, жьна мьн гәләк дьлтәнг дьбу у мьн хwә бекер тʹәхмин дькьр.

«Ле мә карьбу тәйах кьн бәр ве чәтьнайе. Прискиллайе һәргав дькьрә бира хwә гьлийе Иса жь Мәтта 6:34, кʹидәре кö Иса дьбежә wәки әм бона рʹожа сьбе хәма нәкьн, чьмки хәме һәр рʹожәки һәнә. У чахе жьна мьн бь дьл у щан дöа дькьр, әв йәк ле qәwи дькьр. Ле бона мьн Зәбура 55:22 аликʹари бу. Анәгори зәбурбеж, мьн баре хwә да дәсте Йаһоwа Хwәде, у әз жи qәwи бум. Ньһа хәбата мьн һәйә, ле әм диса жи ль гора ширәта Иса дьжин йе кö Мәтта 6:20-22-да ньвисар ә. Хенщи wе йәкә әм һе незики Хwәде бун у һәврʹа жи даһа незик бун».

Мәрьвәки бь наве Йонатʹан дьбьжә: «Чахе бизнеса малбәта мә һатә дадане, әз гәләк тьрсийам сәва ахьрийа малбәта хwә. Мьн wәкә 20 сала әв хәбат дькьр, у жь бо кризиса аборийе әв хәбат бекер бу. Мьн тʹәви жьна хwә дәстпекьр сәва пʹәра шәрʹа бькьн. Мә нә жи дькарьбу тьштәк бь кредит һьлда, чьмки дьфькьрин кö wе кредит нәдьнә мә.

«Ле Хәбәра Хwәде у рʹöһʹе wийи пироз, али мә кьр сафикьрьна баш бькьн. Әз һин бум һʹәму щурʹә хәбатрʹа рʹази бьм у мә тʹәне әw тьшт дькʹьри, чь кö рʹасти жи мәрʹа лазьм бун. Мә öса жи аликʹари дьстанд жь хушк-бьред мәйи щьвате, демәк жь Шʹәдед Йаһоwа. Әwана али мә кьрьн, сәва кö әм qәдьре хwә öнда нәкьн, у аликʹарийа мәзьн дьдан һәла һе wәʹде чәтьнда жи».

ЧАХЕ ЖЬ ҺӘВ ДЬQӘТЬН

Ракел тинә бира хwә: «Чахе мере мьн ньшкева әз һиштьм, әз гәләк дьлтәнг бум у һерса мьн рʹадьбу. Әв йәк мьрʹа бу дәрдәки гьран. Ле мьн хwә ль Хwәде дьгьрт, у Әwи бәрдьли да мьн. Чахе мьн һәр рʹож дöа дькьр, мьн тʹәхмин дькьр кö әʹдьлайа жь Хwәде дьле мьн хwәй дькә. Мьрʹа öса дьһатә кʹьфше, кö те бежи Йаһоwа дьле мьни шькәсти qәнщ кьр.

«У бь сайа Хәбәра wи, демәк Кʹьтеба Пироз, мьн карьбу һерс у хәйда хwә дахьм. Мьн гöһ да гьлийе Паwлосе шанди, йед кö Рʹомайи 12:21-да ньвисар ьн: ‹Нәһелә хьраби сәр тә кʹәвә, ле бь qәнщийе тö сәр хьрабийе кʹәвә›.

«Һәваләки мьн али мьн кьр wәки әз хwә qайим бьгьрьм. Әwи мьнрʹа нишан кьр Wаиз 3:6 у бь нәрми готә мьн, кö ньһа ида wәʹдә йә һини дәрәще хwә бьм. Әв йәк чәтьн бу, ле ширәта wи wәʹдәда бу. Ньһа әз ида дина хwә надьмә проблемед хwә у шабуна хwә öнда накьм».

Кʹöлфәта бь наве Елизабет дьбежә: «Чахе мер-жьн жь һәв дьqәтьн, аликʹари у пьштгьри лазьм ә. Һәваләкә мьнә баш һәр рʹож пьштгьрийа мьн дькьр. Әw тʹәви мьн дьгьрийа, әз һелан дькьрьм, у жь алийе wеда мьн һʹьзкьрьн тʹәхмин дькьр. Әwе әз нәһиштьм. Әз баwәр ьм, wәки Йаһоwа бь сайа ве һәвале, бьринед дьле мьн qәнщ кьр.

ЧАХЕ НӘХWАШ ДЬКʹӘВЬН У КАЛ-ПИР ДЬБЬН

Луйис, дәрһәqа кʹижани кö мә пешда дьгот, гьран нәхwаш ә у нәхwашийа wи дьлва гьредайи йә. Жь бо ве йәке дö щара һьндьк мабу әw бьмьра. Рʹоже 16 сьһʹәта wирʹа оксижән лазьм ә, кö бькарьбә бина хwә бькʹьшинә. Әw дьбежә: «Әз һәр гав Йаһоwарʹа дöа дькьм. У паши дöакьрьне әз тʹәхмин дькьм, кö Хwәде бь рʹöһʹе хwә мьн qәwи дькә. Дöа али мьн дькә мерхас бьм у хwә qайим бьгьрьм, чьмки әз баwәр дькьм кö Хwәде сәва мьн хәм дькә».

Петра кʹöлфәта кö 80 сали зедәтьр ә, дьбежә: «Әз гәләк тьшт дьхwазьм бькьм, ле нькарьм. Әз гәләк бәрхwә дькʹәвьм, кö qәwата мьн кем дьбә. Әз öса сьст ьм, кö дәрманава гьредайи мә. Гәләк щара әз дьфькьрьм сәр гьлийе Иса, йе кö готьбу Баве хwә кö һәрге дьбә, бьра әв щәфа сәр wирʹа дәрбаз бә. Йаһоwа Иса qәwи кьр, у мьн жи qәwи дькә. Дöа сәва мьн ча дәрмане һәррʹожи йә. Чахе әз тʹәви Хwәде хәбәр дьдьм, паше әз ида хwә даһа баш тʹәхмин дькьм» (Мәтта 26:39).

Һулийан, wәкә 30 сала бь нәхwәшикә гьран нәхwәш ә. Әw öса дьбежә: «Мьн хәбатеда щийе бьльнд дьгьрт, ле ньһа щийе мьн ль сәр кʹöрсийе йә, кö сәва мәрьвед сәqәт ә. Ле жийина мьнда шабун йәкә һәйә, чьмки әз аликʹарийе дьдьм мәрьвед дьн у мьзгинийе бәла дькьм. Чахе әз мәрийарʹа мьзгинийе бәла дькьм, чәтьнайед мьн сьвьк дьбьн, чьмки Йаһоwа чаwа кö соз дабу, wәʹде чәтьнайа мә qәwи дькә. Wәк Паwлосе шанди, әз бь рʹасти дькарьм бежьм: ‹Әз һәр тьшти бь сайа wи дькарьм, йе кö qәwате дьдә мьн›» (Филипи 4:13).

ЧАХЕ МӘРЬВЕД ХWӘЙӘ НЕЗИК ÖНДА ДЬКЬН

Мерәки бь наве Антонйо дьбежә: «Баве мьн архайин рʹерʹа дәрбаз дьбу, у ньшкева кʹәтә qәзийе. Пешийе мьн әв йәк qә баwәр нәдькьр. Әw wәкә 5 рʹожа комайеда бу, у мьн нькарьбу аликʹари бьдайе. У хьлазийе баве мьн мьр. Мьн хwә дьгьрт, сәва кö бәр дийа хwә нәгьрим, ле чахе әз тʹәне дьмам, әз кʹәлә-кʹәл дьгьрийам. У мьн пьрс дьда хwә: ‹Гәло чьма? Чьма?›

«Нава wан рʹожед чәтьнда, мьн рʹәща Йаһоwа дькьр кö әʹдьлайе бьдә мьн у али мьн бькә хwә бьгьрьм. Öса дьле мьн һеди-һеди һеса дьбу. Гьлийе жь Кʹьтеба Пироз дькʹәтьнә бира мьн, кö һәркәс жь мә дькарә рʹасти ‹qәwьмандьнед› хьраб бе. Әз заньм кö Хwәде хwәйе созе хwә йә, ләма жи баwәр дькьм кö әw wе баве мьн диса вәгәрʹинә жийине» (Wаиз 9:11; Йуһʹәнна 11:25; Тито 1:2).

Роберт жи, дәрһәqа кʹижани кö мә пешда хәбәр дьда, фькьред ви щурʹәйи дьбежә: «Чахе мьн тʹәви жьна хwә Марибел, Йаһоwарʹа дöа дькьр, мә әʹдьлайа Хwәде ль сәр хwә тʹәхмин дькьр, кö жь һәр һʹьш-аqьли дәрбазтьр ә. Дәрһәqа ве йәке те готьне дь Филипи 4:6, 7-да. Әв әʹдьлайи кö кʹәтә дьле мә, qәwат да мә wәки дь телевизийонеда хәбәр дьн дәрһәqа баwәрийа хwә һьндава сахкьрьне. Рʹаст ә жь бо кʹәтьна тәйаре мә кöрʹе хwә öнда кьр, ле әме тʹö щар öнда нәкьн биранине дәрһәqа wи. Әм тʹьме дина хwә дьдьнә wан wәʹда.

«Хушк-бьред щьвате готьнә мә кö wана әм телевизийонеда дитьн, wәки ча мә архайин дәрһәqа баwәрийа хwә гьли дькьр. Мә гот кö әв һʹәму тьшт бь сайа дöакьрьна гәләка бу, йед кö дәрһәqа һʹалхwәшийа мә дöа дькьрьн. Әз бь рʹасти жи баwәр дькьм, кö Йаһоwа пьштгьрийа мә дькьр бь сайа гәләк нәʹма кö мәрʹа дьшандьн у бәрдьли дьданә мә».

Жь мәсәлед жоре готи, те кʹьфше кö Хwәде дькарә бәрдьлийе бьдә мәрийа, йед кö рʹасти щурʹә-щурʹә чәтьнайа у qәзийа тен. Ле тö әве йәке баwәр дьки? Фьрqи тʹöнә тö рʹасти чь чәтьнайа бей, бьзаньбә тö дькари бәрдьлийе бьстини у Хwәде wе wәʹде чәтьнайа али тә бькә.b Ләма жи wе баш бә кö әм жь Йаһоwа аликʹарийе бьхwазьн. Чьмки әw «Хwәдейе һʹәму бәрдьлийе» йә (2 Корьнтʹи 1:3).