Әw гьли һәваләкә Биби жерʹа гот. Бибийе гәләк баве хwә һʹьз дькьр у һәвала wе пе wан гьлийа, нә кö wе дьлрʹьһʹәт кьр, ле һе зедә дьлбьриндар кьр. Бибийе һьше хwәда дьгот, «мьрьна баве мьн, нә тьштәки баш бу». Пәй салара әwе дәрһәqа ве йәке кʹьтеб ньвиси у жь кʹьтеба wе әʹшкәрә дьһатә кʹьфше, wәки әw диса жи шина баве хwә дькә у дьлтәнг ә.

Анәгори Биби, чахе мәрьв кәсәки хwә öнда дькьн, wанарʹа гәләк сал лазьм ә, сәва кö дьлтәнгийа wан дәрбаз бә, илаки һәрге әwана һәврʹа незик бун. Дь Кʹьтеба Пирозда сәр мьрьне те готьне «дьжмьне хьлазийе» (1 Корьнтʹи 15:26). Чахе кәсәк дьмьрә, әв жийина мә дьлтәнг дькә у тʹö тьшт нькарә әв бьдә сәкьнандьне. Әм жи нькарьн жь ве йәке хwә хьлаз кьн. Ләма жи һәрге wәʹде дьлтәнгийа, әм ньзаньн чь бькьн, әв тьштәки нормал ә.

Дьбәкә һун дьфькьрьн: ‹Чьqас wәʹдә лазьм ә, сәва кö дьлтәнгийа мьн дәрбаз бә? Чаwа тәйах кьм? Чаwа әз дькарьм дьлбинийе бьдьмә wан мәрийа, йед кö кәсәки öнда кьрьнә? Гәло әзе диса мьрийед хwә бьвиньм?›

Щәм тә qә öса qәwьмийә, wәки тö нәхwәш буйи у нәхwәшийа тә зу дәрбаз бу? Тә дьбәкә жи бир кьрийә дәрһәqа ве нәхwашийе. Ле шина кәсәки бьки, нә öса йә. Дохдьр Алан Wолфелт дь кʹьтеба хwә бь наве “Hеaling a Spousе’s Griеving Hеart” ньвиси, wәки шин әв тьштәки öса нә, чь кö дьреж дькʹьшинә. Әw öса жи зедә дькә: «Пәй wәʹдәрʹа у бь пьштгьрийа мәрьвед дьн, дьлтәнгийа тә дькарә һәвәк сьвьк бә».

Wәре әм бьньһерʹьн, кö Бьраһим пʹехәмбәр чаwа хwә кʹьфш кьрьбу, чахе жьна wи мьрьбу. Дь Кʹьтеба Пирозә орижиналеда те готьне, wәки «Бьраһим дәстпекьр сәр Сәрайе гьрийа у шина wе кьр». Ча те кʹьфше Бьраһим гәләк wәхт Сәрайи бира хwәда хwәй дькьр у шина wе дькьр.a Мәсәләки дьн дәрһәqа Аqуб ә, кʹижани кö хапандьн wәки йан чь һʹәйwанед бәйани, кöре wи Усьв хwарьн. Аqуб «гәләк рʹожа» шина кöрʹе хwә дькьр, у нәфәред мала wи нькарьбун еша дьле wи сьвьк кьрана. Пәй чәнд саларʹа жи, мьрьна Усьв диса әw дьлтәнг дькьр (Дәстпебун 23:2; 37:34, 35; 42:36; 45:28).

Иро жи анәгори ве йәке, гәләк мәрьв шина мәрьвед хwәйә незик дькьн. Wәрен әм дö мәсәла бьньһерʹьн.

• «Мере мьн Роберт, 9 Тирмәһе сала 2008-да мьрийә. Wе рʹоже, ча һәргав мә тәште хwар. Пешийа кö әw бьчуйа хәбате, мә һәв пач кьр, һәмез кьр у һәвдöрʹа гот: ‹Әз тә һʹьз дькьм›. Паше әз пʹеһʹәсийам кö әw кʹәтә qәзийе. Шәш сал дәрбаз буйә у һәла һе әв кöл дьле мьнда нә. Әз дьфькьрьм кö әзе тʹö щар нькарьбьм еша дьле хwә бәрдьм».-Геил, кʹöлфәта 60 сали.

• «Рʹаст ә 18 сала зедәтьр дәрбаз буйә, һьнгеда чахе мьн жьна хwә öнда кьр, ле һʹәта ньһа әз бира wе дькьм у шине дькьм. Чахе әз бәдәwийа тʹәбйәте дьвиньм, фькьред мьн дәрбера дьчьн сәр жьна мьн. Әз дьфькьрьм wәки әwе жи чьqас ша буйа, һәрге бәдәwийа wе йәке бьдита».-Етийен, мере 84 сали.

Әʹшкәрә йә, wәки еш у һәстед öса, әв тьштәки нормал ә. Һәр мәрьвәк бь щурʹе хwә шина кәсәки дькә, ләма жи wе нәрʹаст бә wана сущдар кьн. Әм хwәха жи гәрәке хwә сущдар нәкьн, һәрге реаксийа мә сәр мьрьна кәсәки гәләк qайим ә. Чаwа әм дькарьн тәйах кьн?

Дәрһәqа ве тʹемайе гәләк ширәт һәнә. Ле һʹәму ширәт нькарьн аликʹарийе бьдьн. Мәсәлә, һьнәк мәрьв дькарьн бежьн, wәки нәлазьм ә бьгьрин, йан жи бь щурʹед дьн һәстед хwә бьдьнә кʹьфше. Һьнәк жи дькарьн пашопе бежьн. Ле Кʹьтеба Пироз тьштәки әʹйан дькә у гәләк пьштгьрийа wе йәке дькьн.

Һьнә културада нәмеранти йә, һәрге мер бьгьри. Ле гәло шәрм ә бәр мәрийа бьгьрин? Һьнә дохдьр дьбежьн, кö әв тьштәкә нормал ә чахе мәрьв wәʹде шине дьгьри. Чахе бәндә һәстед хwә дьдә кʹьфше, wирʹа даһа һеса дьбә тәйах кә. Ле чахе мәрьв һʹәму тьшти нав хwәда дьгьрә, бь wе йәке әw зийане дьдә хwә. Дь Кʹьтеба Пирозда тʹö щийа найе готьне, wәки wәʹде шине нәрʹаст ә у нәмерʹанти йә, һәрге кәсәк бьгьри. Һәла дәрһәqа Иса бьфькьрьн. Чахе һәвале wи Лазар мьрьбу, qәwата Иса дьгьһиште кö һәвале хwә Лазар вәгәрʹинә жийине, ле йәкә әw бәр һʹәмуйа гьрийа! (Йуһʹәнна 11:33-35).

Чахе кәсәк шине дькә, wи wәʹдәйда әw дькарә сәрт у һерс бә. Илаһи wи чахи, гава мәрьве wийи нас тьштәки бефәми дьбежә. Мәрьвәки жь Африкайа Башуре бь наве Майк, гьлийе öса дьбежә: «Әз wәкә 14 сали бум чахе баве мьн мьр. Wәʹде шине кʹаһинәки мьнрʹа гот, wәки Хwәдерʹа мәрьвед баш лазьм ьн, ләма жи әw wана һьлдьдә щәм хwә.a Жь бо ве йәке әз гәләк һерс кʹәтьм, чьмки бь рʹасти әм һʹәwще баве хwә бун. Ида 63 сал дәрбаз бу у һʹәта ньһа әw гьли дьле мьн дешиньн».

Ле әм чь дькарьн бежьн дәрһәqа хwәнәһәqкьрьне? Чахе мәрьве незик ньшкева дьмьрә, фькьре öса пешда те, ‹Әw йәк wе нәqәwьмийа, һәрге мьн öса, йан щурʹәки майин бькьра›. У һәрге пешийа мьрьна wи мәрьви, тә тʹәви wи шәр кьрьбу, әв йәк еша дьле тә һе зедә дькә.

Һәрге фькьред хwәнәһәqкьрьне йан һерс щәм тә һәйә, гәләк фәрз ә әwе йәке нав хwәда нагьри. Wе баш бә хәбәрди тʹәви һәваләки хwә, йе кö wе гöһ бьдә тә у тә бьдә баwәркьрьне, кö һәстед öса тьштәкә нормал ә. Кʹьтеба Пироз дьбежә: «Һәвал һәр тʹьм һʹәз дькә у бьра дь рʹожа тәнгда хöйа дьбә» (Мәтʹәлок 17:17).

Чахе бәндә шина кәсәки дькә, wи wәʹдәйида Досте wийи лапи баш дькарә Әʹфьрандаре мә бә, демәк Йаһоwа Хwәде. Дöада дьле хwә wира вәкьн, «чьмки әw бона wә хәм дькә» (1 Пәтрус 5:7). Йаһоwа öса жи соз дьдә, wәки әw мәрьв wе фькьред хwәда у дьле хwәда архайин бьн, чьмки «әʹдьлайийа Хwәде . . . жь һәр һʹьш-аqьли дәрбазтьр ә» (Филипи 4:6, 9). Демәк әм гәрәке бьһельн, wәки Хwәде бь сайа Кʹьтеба Пироз али мә бькә у дьлбинийе бьдә мә. Хwәрʹа һʹьнә рʹеза бьньвисә йед кö дьле тә рʹьһʹәт дькьн. (Бьньһерʹә чаргошә). Тö дькари һьнә жь wан, бь әзбәри һин би. Чахе тö бьфькьри дәрһәqа wан реза, әwе али тә бькьн wи чахи, мәсәлә гава еваре тö тʹәне йи у нькари хәвра һәрʹи (Ишайа 57:15).

Мерәки 40 сали, wәрен wи нав кьн Щек, жьна хwә öнда кьр, йа кö жь рәqе (кʹансәре) мьр. Щек щарна тʹәнебуне тʹәхмин дькә, ле дöа али wи дькә. Әw дьбежә: «Чахе әз Йаһоwарʹа дöа дькьм, әз ида хwә тʹәне тʹәхмин накьм. Гәләк щар әз ниве шәве һʹьшийар дьбьм у ида нькарьм рʹазем. Һьнге әз дәстпедькьм һьнә рʹеза жь Ньвисаред Пироз бьхуньм у ль сәр бьфькьрьм. Әw мьн дьлрʹьһʹәт дькьн. Паше әз Йаһоwарʹа дöа дькьм у дьле хwә wирʹа вәдькьм. Дьле мьн архайин дьбә у әʹдьлайа Хwәде һʹьш-аqьле мьн öса рʹьһʹәт дькә, кö паше әз дькарьм рʹьһʹәт рʹазем».

Кʹöлфәтәкә щаһьл бь наве Ванеса, дийа хwә жь бо нәхwәшийе öнда кьр. Әwе жи ль сәр хwә qәwата дöакьрьне тʹәхмин кьр. Әw дьбежә: «Wәʹде лапи чәтьнда, мьн гази наве Хwәде дькьр у кʹәлә-кʹәл дьгьрийам. Йаһоwа гöһ дьда дöайед мьн у тʹьме әз qәwи дькьрьм».

Һьне дохдьр ширәт дьдьн, кö һәрге тö дьлтәнгийе тʹәхмин дьки, wе баш бә кö тʹьштәкива мьжул би. Мәсәлә дькари тьштәкида али кәсәки бьки. Әв йәк дькарә шабуне тәрʹа бине у дьлтәнгийа дьле тә жи сьвьк кә (Кʹаред Шандийа 20:35). Гәләк Мәсиһийа дь wе йәкеда аликʹари у бәрдьли хwәрʹа дитьнә (2 Корьнтʹи 1:3, 4).

Щәм тә qә öса qәwьмийә, wәки кәсәк шине дькьр у тә нькарьбуйә аликʹарийе бьди wи? Щарна әм ньзаньн чь бежьн у чь бькьн, ләма жи әм хwә кәр дькьн. Ле һьнә тьштед керһати һәнә, чь кö әм дькарьн бькьн.

Щарна лазьм ә, wәки тö тʹәне бал wи мәрьви би у wирʹа әʹйан ки кö чьqас сәва ве йәке бәрхwәдькʹәви. Мәсәлә дь гәләк културада öса нә: һәрге тö мәрьв һʹәмез ки йан жи дәсте хwә бьди сәр мьле wи, öса тö хәмгинийа хwә дьди кʹьфше. Һәрге мәрьве кö шине дькә, дьхwазә тʹәви тә хәбәр дә, гöһ бьдә wи. Öса жи wе баш бә, һәрге тö хwарьне сәва wи мәрьви һазьр ки, мьqати зарʹед wи би, йан жи аликʹарийе бьди шьхöлед дьнда, һәрге әw дьхwазә. Шьхöлед öса wе даһа керһати бьн, нә кö пʹьрʹхәбәрийа мә.

Щарна тö дькари дәрһәqа мьрийед wан хәбәр ди у дина хwә бьди һьнә хәйсәтед wанә баш йан qәwьмандьнед һʹәwас. Хәбәрдана öса дькарә ша кә мәрьве дьлтәнг. Бәʹса хәбәре, Пем йе кö шәш сал пешда мере хwә Ийан öнда кьр, дьбежә: «Щарна мәрьв мьрʹа тьштед öса баш дәрһәqа Ийан гьли дькьрьн, чь кö мьн ньзаньбу. Әв йәк мьн дьлрʹьһʹәт дькьр».

Гәләк щара мәрьве дьлтәнг, жь һәвалед хwә дәрбера аликʹарийе дьстинә. Ле йазьх, паше һәвалед wи жь бо шьхöлед хwә, зу бир дькьн һʹәwщед wи. Бьхәбьтә сәр ве йәке, wәки тʹәви мәрьве дьлтәнг текли би.a Мәрьве дьлтәнг гәләк әве йәке дьшекьринә, чьмки öса әw дькарә еша дьле хwә һьнәки сьвьк кә.

Wәрен мәсәла Каори бьньһерʹьн, кʹöлфәта кö дь Жапонийеда дьжи. Әв гәләк дьлтәнг бьбу чьмки әwе дийа хwә öнда кьрьбу у паши 15 мәһа хушка хwә жи öнда кьр. Һәвалед wейә амьн, тʹьме бәр дьле wеда дьһатьн. Кʹöлфәтәкә бь наве Ритсуко, готә Каори, wәки дьхwазә бьбә һәвала wейә незик. Каори дьбежә: «Бь рʹасти бежьм, жь бо wе йәке әз ша нәбум. Мьн нәдьхwәст кö кәсәк дәwса дийа мьн буйа. Ле Ритсуко Де, гәләк тʹәви мьн назьк бу у жь бо wе йәке әз незики wе бум. Һәр һʹәфти әм тʹәвай дәрдькʹәтьнә хьзмәте у тʹәвай жи дьчунә щьвате. Әwе әз тʹәглиф дькьрьм сәр чай, хwарьн мьнрʹа дьани у гәләк щара нәʹмә мьнрʹа ледькьр. Ньһерʹандьна рʹаст йа Ритсуко Де, баш ль сәр мьн һʹöкöм кьр».

Жь мьрьна дийа Каори, ида донздәһ сал дәрбаз бу. Иро Каори тʹәви мере хwә wәк пешәнге һәртʹьм хьзмәт дькә. Каори дьбежә: «Ритсуко Де, диса жи дәрһәqа мьн хәм дькә. Чахе әз wәдьгәрʹьм шәһәре хwә, әз тʹьме дьчьмә щәм wе у ләзәтәкә мәзьн дьстиньм жь һәвалтийа wе».

Диса мәсәләк һәйә дәрһәqа Поли, йа кö Шәʹде Йаһоwа йә у хwәха жь Кипрусе йә. Әwе жи аликʹарийа мәзьн стандьбу жь һәвала. Мере Поли, бь наве Созос мәрьвәки баш бу. Әw ча шьване Мәсиһи, мәсәләкә баш һишт wе йәкеда кö гәләк щара жьнәби у зарʹед етʹим, ль сәр хwарьне тʹәглифи мала хwә дькьр, сәва кö wәʹдә дәрбаз кьн (Аqуб 1:27). Йазьх, ле чахе әw 53 сали бу, әwи мьр жь бо гьре кö сәре wида дәркʹәтьбу. Поли дьбежә: «Мьн мере хwәйи амьн öнда кьр, тʹәви кʹижани кö әз wәкә 33 сала зәwащеда бум».

Паши чʹәлкьрьне, Поли тʹәви кöрʹе хwәйи 15 сали, бь наве Данийел, дәрбази Канаде бу. Ль wьр wана дәстпекьр тʹәви щьватәкә Шәʹдед Йаһоwа шьхöлкʹарийе бькьн. Поли тинә бира хwә: «Һәвалед жь щьвата мәйә тʹәзә, тʹö тьшт ньзаньбун дәрһәqа дәрәщед чәтьн кö жийина мәда һәбун. Ле йәкә әwана тʹьме незики мә дьбун у әм һʹәмез дькьрьн. Әwана гьлийед һеланкьрьне мәрʹа дьготьн у аликʹарийа керһати жи дьдан. Бь рʹасти жи аликʹарийа wан, wи чахи wәʹдәда бу, чьмки һьнге кöрʹе мьн гәләк һʹәwще бав бу! Бьред щабдар һьндава Данийел гәләк дьлован бун. Мәсәлә чахе әwана тʹоп дьбун, гази Данийел жи дькьрьн кö тʹәви wан wәʹдә дәрбаз кә, йан футболе бьлизә». Иро де у кöрʹ, хwә баш тʹәхмин дькьн.

Бь һʹәлали бежьн, гәләк мәщал һәнә кö чаwа әм дькарьн аликʹарийа керһати бьдьнә мәрьвед дьлтәнг у бәр дьле wанда бен. Кʹьтеба Пироз жи дьлбиникә мәзьн дьдә мә у созе баш дәрһәqа ахьрийе.

Те бира wә Геил, дәрһәqа кʹижани кö мә дь wан готарада дьгот? Әwе баwәр нәдькьр кö wе бькарьбә мьрьна мере хwә тәйах кә. Ле ньһа әw бь шабун ль ахьрийе дьньһерʹә у һивийа дьнйа тʹәзә йә, кö Хwәде соз дьдә. Чьмки бь сайа ве йәке, әwе бькарьбә диса мере хwә Роберт бьвинә. Әw дьбежә: «Готьнәкә жь Ньвисаред Пироз гәләк мьн хwәш те. Әв Әʹйанти 21:3, 4 йә, кʹидәре кö ньвисар ә: ‹Хwәде хwәха жи wе тʹәви wан бьминә, чаwа Хwәдейе wан. Әwе жь чʹәʹвед wан һʹәму һесьред wан паqьж кә у иди мьрьне тʹöнәбә, нә шин, нә гьри, нә еш-ешук, чьмки тьштед бәре дәрбаз бун›».

Геил дьбежә: «Әв готьн һʹәму тьшти әʹйан дькә. Бь рʹасти жи гöне мьн wан мәрийа те, йед кö мәрьвед хwәйә незик öнда кьрьнә у йед кö ньзаньн дәрһәqа созе Хwәде, wәки wе бькарьбьн диса wана бьвиньн». Геил ль гора баwәрийа хwә дьжи у бь рʹәзәдьли шьхöле пешәнгийе дькә. Әw мәрийарʹа гьли дькә дәрһәqа созед Хwәде у wе ахьрийе, кʹидәре кö «иди мьрьне тʹöнәбә».

Дьбәкә һуне бежьн: ‹Баwәр накьм!›. Wәрен әм дәрһәqа Ибо шеwьр кьн. Әw бь нәхwәшикә гьран нәхwәш бу (Ибо 2:7). Рʹаст ә Ибо һьзрәта мьрьна хwә бу, ле әwи йәкә баwәр дькьр wәки qәwата Хwәде дьгьһиже кö wи wәгәрʹинә жийине. Әwи бь баwәрийе гьлийе öса гот: «Те гази мьн бьки, әзе жи щаба тә бьдьм. Те бира әʹфьрандьнед дәстед хwә бьки» (Ибо 14:13, 15, ДТʹ). Ибо баwәр дькьр кö Хwәдайе wи, wе бира wи жи бькә у һьзрәт бә wи wәгәрʹинә жийине.

Зутьрәке, Хwәде wе әве йәке сәва Ибо у мәрьвед дьнена бькә. Әwана wе wәгәрʹьнә жийине, чахе әʹрд бьбә щьнәт (Луqа 23:42, 43). Дь Кʹьтеба Пирозда, Кʹаред Шандийа 24:15-да те готьне, мәрьв wе «жь мьрьне рʹабьн». Иса жи мәрʹа дьбежә: «Ль ве йәке әʹщебмайи нәминьн, чьмки wәхт незик дьбә, кö һʹәмуйед тʹьрбада wе дәнге wи бьбьһен . . . рʹабьн» (Йуһʹәнна 5:28, 29). Ибо wе пʹе чʹәʹве хwә бьвинә, кö чаwа әв созе Хwәде, wе бе сери. Әwе мәщале бьстинә, сәва кö wәгәрʹә «рʹожед хwәйи» щаһьлтийе (Ибо 33:24, 25). Әw йәк öса жи реали йә сәва wан мәрийа, йед кö qимәт дькьн у qәбул дькьн кʹьрина кö Хwәде дабу.

Һәрге тә жи кәсәки хwә öнда кьрийә, дьбәкә әв һʹәму тьштед готи нькарә бь тʹәмами еша дьле тә сьвьк кә. Ле һәрге тö бьфькьри дәрһәqа созед Хwәде, йед кö дь Кʹьтеба Пирозда ньвисар ьн, әв йәк wе баwәрийа тә qәwи кә у те бькарьби хwә qайим бьгьри (1 Тʹесалоники 4:13).

Дьхwази һе зедә пебьһʹәси кö чаwа әм дькарьн дьлтәнгийа хwәда тәйах кьн? Йан дьбәкә щәм тә пьрсәкә öса пешда те «Чьма Хwәде дьһелә, wәки зöлми у кöл-дәрд һәбьн?» Жь кʹәрәма хwә бькʹәвә малпәра мә, jw.org у бьвинә кö чаwа Кʹьтеба Пироз дькарә бәрдьли бьдә мә у щабед пьрсед мә бьдә.