Бейсбол бона мьн һʹәму тьшт бу!

ЖИЙИНА МЬНӘ БӘРЕ

Әз мәзьн бумә бажарәкида, дь Коста-Рикайеда алийе рʹöһьлате. Һʹәйшт зарʹед де-баве мьн һәбун у әз йе һʹәфта бум. Чахе әз һʹәфт сали бум, баве мьн мьр. Ләма жи дийа мьн әм тʹәне мәзьн кьрьн.

Бейсболa тʹьме пʹарәкә жийина мьн бу. Жь бьчʹуктайе мьн әв спорт пʹьрʹ һʹьз дькьр. Чахе әз wәкә 20 сали бум, әз кʹәтьмә нава кʹома листьквана, йед кö вәк мьн спорте һʹьз дькьрьн. Чәнд wәхт шунда мәрьвәки әз тʹәглиф кьрьм кö дь Никарагöайеда кʹома професйоналада бьлизьм. Сьһʹәт-qәwата дийа мьн сьст бу, у әз мьqати wе дьбум, ләма жи мьн нәдьхwәст дь Никарагöайеда бьжим. У мьн сафи кьр әве тʹәглифе инкʹар кьм. Һьнә wәʹдә шунда мәрьвәки дьн жи әз тʹәглиф кьрьм, кö дь кома мьләтийейә бейсболеда сәва Коста Рикайе бьлизьм. Әв кʹом жь листькванед бьжарти бу йед кö спорт һʹьз дькьрьн, у әз жи qайил бум. Әз жь сала 1949 һʹәта 1952 ве кʹома мьләтийеда бум, у мьн чәнд листькада дь Кубайеда, Мәксикайеда у Никарагöайеда дьлист. Әз листькванәки пʹьрʹ баш бум у мьн qә шашийа жи бәрнәдьда, чьмки мьн гәләк баш дьлист. Гәләк мьн хwәш дьһат, чахе әʹлаләте бь пʹайа дькьрә гази у наве мьн һьлдьда!

Йазьх, ле мьн öса жи бь жийинәкә бенамуси дьжит. Рʹаст ә мьн тʹәви кәчʹькәке дьжит, ле әз тʹьме тʹәви кʹолфәтед майин жи бум. Мьн гәләк ичʹкә вәдьхwар. Рʹожәке әз жь ичʹке öса геж бум, кö сьвәтьре чахе мьн чʹәʹве хwә вәкьр, qә нәдьһатә бира мьн әз чаwа һатьмә мал! Мьн öса жи һʹьз дькьр хöмар бьлизьм. Мәсәлә, мьн домино сәр пʹәра дьлист у латарейа жи дькʹьри.

Чахе мьн бь жийинәкә öса дьжит, wан чаха дийа мьн ида Шәʹде Йаһоwа бу. Әw дьхәбьти кö баwәрийа хwә бькә дьле мьн, ле пешийе щәм wе дәрнәдькʹәт, чьмки әз педа нав спортеда бум. Сәр листьке wәʹде нан-хwарьне, мьн нәдьхwар, чьмки тʹәхмин нәдькьр кö әз бьрчимә! Һʹьше мьн тʹәне сәр листьке бу. Бейсбол бона мьн һʹәму тьшт бу!

Чахе әз 29 сали бум, wәʹде листькәке гава мьн дьхwәст тʹопе бьгьрьм, мьн зийана мәзьн станд. Ле чахе әз рʹабум сәр ньга, мьн ида нькарьбу рʹьнд бьлизьм. Ле диса жи әз бейсболева гьредайи бум, мәсәлә незики мала хwә мьн листькван һазьр дькьрьн.

ЧАWА КʹЬТЕБА ПИРОЗ ЖИЙИНА МЬН ГÖҺАСТ

Дь сала 1957-да әз һатьм тʹәглифкьрьне ль сәр щьвата мәзьнә Шәʹдед Йаһоwа, йа кö дәрбаз дьбу ль ве стадийоне кʹидәре кö мьн бейсбол дьлист. Чахе мьн щийе хwә гьрт, мьн дина хwә дайе, кö фьрqийа мәзьн һәйә ортʹа рʹабун-рʹуньштандьна Шәʹдед Йаһоwайә маqули у әʹлаләта кö тʹьме wәʹде листька бейсболе, жь щийе хwә дькьрнә qалмә-qалм. Чь кö мьн сәр ве щьвата мәзьн дит, әз һелан кьрьм кö һинбуна Кʹьтеба Пироз тʹәви Шәʹдед Йаһоwа дәрбаз бьм у тʹьме сәр щьватед wан һазьр бьм.

Әз гәләк әʹщебмайи дьмам чахе дәрһәqа гәләк һинкьрьнед Кʹьтеба Пироз педьһʹәсийам. Бәʹса хәбәре, Иса пʹехәмбәрти кьр кö рʹожед ахьрийе шагьртед wи, wе ль нав тʹәмамийа дьнйайе, мьзгинийа хере йа Пʹадшатийа Хwәде әʹлам кьн (Мәтта 24:14). Әз öса жи пеһʹәсийам, кö Мәсиһйед рʹаст бепʹәрә хьзмәт дькьн. Иса гот: «Wә беһәq стандийә, беһәq жи бьдьн» (Мәтта 10:8).

Wәʹде һинбуне, мьн һьмбәри һәв дькьр әв чь кö Кʹьтеба Пироз дьбежә у чь кö Шәʹдед Йаһоwа дькьн. Мьн гәләк qәдьре wан гьрт, кö әwана öса бь хирәт qәwат дьданә хәбате сәва кö мьзгинийа хере йа Пʹадшатийа Хwәде ль тʹәмамийа дьнйайе бәла кьн. Мьн дит кö чаwа әwана бь һазьрбун әв тʹәмийа Иса тиньн сери. Чахе мьн Марqос 10:21 хwәнд у дит тʹәглифа Иса кö дьбежә «пәй мьн wәрә», мьн хwәст бьбьмә Шәʹде Йаһоwа.

Wәʹдә мьнрʹа лазьм бу, сәва кö бь һазьрбун гьлийе Иса биньм сери. Мәсәлә нава гәләк салада һәр һʹәфти мьн сәр «бәхт» латарейа дьлист. Жь Кʹьтеба Пироз әз пеһʹәсийам кö Хwәде мәрьвед тьма сущдар дькә у wан мәрийа жи, йед кö сәре хwә бәр хöдане Йазийе демәк бәр хöдане Бәхт датанин (Ишайа 65:11; Колоси 3:5). Ләма жи мьн сафи кьр хöмаре бьһельм. Чахе мьн листька латарейе һишт, паши wе йәке һәма һʹәфтийа пешьнда «бәхте» мьн лехьст, у һәжмара латарейа мьн бьр! Мәрьва qәрфе хwә мьн дькьрьн, чьмки ль ве һʹәфтийе мьн ида нәдьлист у әwана гәләк сәр мьн һʹöкöм дькьрьн сәва кö әз диса дәстпекьм бьлизьн, ле әз нәкʹәтьм бәр байе wан. Паши wе йәке мьн ида бь тʹәмами дәст жь хöмаре бәрда.

Һәма wе рʹоже чахе әз ль сәр щьвата мәзьнә Шәʹдед Йаһоwа һатьмә ньхöмандьне, щерʹьбандьнәкә дьн рʹасти мьн һат (Әфәси 4:24). Ве еваре әз вәгәрʹийамә отеле, кʹидәре кö әз дьмам у мьн дит wәки әw кәчʹька кö мьн бәре тʹәви wе wәʹдә дәрбаз дькьр, бәр дәре отʹаха мьн һивийа мьн ә. Әwе готә мьн: «Wәрә Самуйел, әм wәʹдәки рʹьнд дәрбаз кьн!» Ле мьн дәрбера гот: «На!» Мьн кьрә бира wе, кö ньһа әз бь нормед Кʹьтеба Пирозә нав-намусийе дьжим (1 Корьнтʹи 6:18). Әwе гот: «Ижар чь?» Әwе әв нормед нав-намусийе йа Кʹьтеба Пироз бәр тʹö тьшти һʹәсаб нәкьр у ль сәр йа хwә дьсәкьни, сәва кö әм диса һәләqәтийа хwә тʹәзәда чекьн. Әз зьвьрим кʹәтьмә отʹаха хwә у дәри жи пәй хwә дадам. Иро әз дькарьм бь шабунәкә мәзьн бежьм, кö жь сала 1958 чахе әз бумә Шәʹде Йаһоwа, һьнгеда әз бь амьни хwә ль wан гöһастьна дьгьрьм, чь кö мьн жийина хwәда кьрийә.

ЧЬ КʹАР МЬН СТАНД

Әз дьфькьрим кʹьтебәке бьньвисьм дәрһәqа wе йәке, кö чь кʹар мьн станд чахе хwә ль рʹебәрийа Кʹьтеба Пироз гьрт! Мәсәлә, кʹарәкә мәзьн әw ә, кö гәләк һәвалед мьнә амьн һәнә, нета жийина мьн һәйә у әз бь рʹасти жи бәхтәwар ьм.

Һʹәта ньһа әз бейсболе һʹьз дькьм, ле мьн ньһерʹандьна хwә гöһаст. Дь бейсболеда мьн нав-дәнг у пʹәрә qазанщ дькьр, ле әв һʹәму тьшт wәʹдәлу бу. Ле достийа мьн тʹәви Хwәде у бьратийа һʹәмдьнйайе wе һʹәрһәйи бькʹьшинә. Кʹьтеба Пироз дьбежә: «Дьнйайе жи дәрбаз бә, һавьжийа wе жи, ле әwе кö әʹмьре Хwәде дьqәдинә wе һʹәта-һʹәтайе бьминә» (1 Йуһʹәнна 2:17). Ньһа Йаһоwа у щьмәʹта wи, сәва мьн һʹәму тьшт ә!