Чьрʹа Хwәде Дьһелә, wәки Кӧл-Дәрд Һәбьн?

1, 2. Чь щурʹә-щурʹә кӧл-дәрд рʹасти мәрийа тен, у жь бо ве йәке чь пьрс бал wана пешда те?

ДЬ WӘЛАТӘКИДА паши шәрʹе гьран, бь һʹәзара жьн у зарʹ һатьнә кӧштьне. У әwана тʹәмам тʹәвайи дь тʹьрбәкеда дәфьн кьрьн. Дора ве тʹьрбе хач данин у ль сәр ван һʹәму хача ньвисар бу: «Чьрʹа?» Бь ве пьрсе мәри еш у кʹәсәра дьле хwә дьдә кʹьфше. Мәри әве пьрсе дьдьн чахе жь шәрʹ у qәзийа мәрьвед wанә незик жь wан тенә стандьне, у чахе малед wан тенә һьлшандьне. Нәхwәши у щурʹә-щурʹә нәһәqи жи, wанарʹа дьбә кʹәдәрәкә мәзьн. Ләма жи әwана дьхwазьн пебьһʹәсьн, чьрʹа әв йәк те сәре wан.

² Чьрʹа Хwәде дьһелә, wәки кӧл-дәрд һәбьн? Һәрге Йаһоwа Хwәдайе һьмзор ә, qәwат у билан ә, у һәрге әw Хwәдайе һәq у һʹьзкьрьн ә, ле чьрʹа әw дьһелә кӧ дьнйайеда һаqас нәһәqи у зӧлми һәбә? Дь әʹмьре тәда qә әв пьрс бал тә пешда һатийә?

3, 4. (а) Чь нишан дькә, кӧ һәрге пьрс ки чьрʹа Хwәде дьһелә һаqас кӧл-дәрд һәбьн, дь ве йәкеда тьштәки нәрʹаст тʹӧнә? (б) Ча Йаһоwа дьньһерʹә ль сәр зӧлмийе у нәһәqийе?

³ Гәло рʹаст ә дьшьрмиш бьн, дәрһәqа wе йәке, кӧ чьрʹа Хwәде дьһелә, wәки кӧл-дәрд һәбьн? Һьнәк дьшьрмиш дьбьн, кӧ һәрге әве пьрсе бьдьн, wе бе кʹьфше кӧ баwәрийа wан кем ә у qәдьре Хwәде нагьрьн. Ле һәрге тӧ Кʹьтеба Пироз бьхуни, тӧйе бьбини кӧ бал qӧльхкʹаред Хwәдейә амьн жи пьрсед ӧса пешда һатьнә. Мәсәлә, чахе Һәбаqуq пʹехәмбәр дәр-доре хwә гәлә нәһәqи, зӧлми у шәрʹ-дәʹw дьдит, әwи пьрс да Йаһоwа Хwәде, кӧ чьрʹа Йаһоwа дьһелә, wәки әw һаqа нәрʹастийе бьбинә (Һәбаqуq 1:3).

⁴ Ле жь бо ве пьрсе Йаһоwа Һәбаqуq нәһәq дәрхьст? На. Дәwсе Йаһоwа хәм кьр, wәки гьлийед Һәбаqуqә дьлсахи дь Кʹьтеба Пирозда бенә ньвисаре. Хенщи ве йәке, Йаһоwа али Һәбаqуq кьр, wәки әw щаба ве пьрсе рʹьнд фәʹм бькә, у баwәрийа wи жи qәwи кьр. Йаһоwа дьхwазә али тә жи бькә. Бир нәкә, wәки Кʹьтеба Пироз һин дькә, кӧ Йаһоwа «бона wә хәм дькә» (1 Пәтрус 5:7). Йаһоwа жь мәрьва зедәтьр нәфрʹәт дькә, һʹәму зӧлмийе у нәһәqийе (Ишайа 55:8, 9). Ле һәрге ӧса нә, чьрʹа Йаһоwа дьһелә, кӧ дьнйайеда һаqас кӧл-дәрд һәбьн?

ЧЬРʹА ҺАQАС КӦЛ-ДӘРД ҺӘНӘ?

5. Мәри тʹьме мәʹнийа кӧл-дәрда ча шьровәдькьн, ле Кʹьтеба Пироз чь һин дькә?

⁵ Гәлә мәрьвед баwәрмәнд, пьрсе дьдьнә ӧлмдар у тʹәреqа, кӧ чьрʹа һаqас кӧл-дәрд һәнә. Ӧлмдар у тʹәреq тʹьме дь щабед хwәда дьбежьн, wәки кӧл-дәрд әв һәйә qьрара Хwәде, у Хwәде пешда сәва мәрьва qәзийа у чәрчьрандьн qьрар кьрийә. Һьнәк жи дьшьрмиш дьбьн, wәки рʹийед Хwәде нә әʹйан ьн, у йан чь Хwәде мәрийарʹа мьрьне тинә, һәла һе зарʹарʹа жи у wана дьбә әʹзмана бал хwә. Ле ча тӧ ида пеһʹәсийайи, Йаһоwа Хwәде тʹӧ щар хьрабийе накә. Дь Кʹьтеба Пирозда те готьне, wәки нькарә бьqәwьмә: «Кӧ Хwәде хьрабийе бькә у Йе кӧ һеза [qәwата] wи тʹера һәр тьшти дькә, нәһәqийе пек бинә!» (Ибо 34:10).

6. Чьрʹа гәләк мәри бона һʹәму кӧл-дәрда кӧ дьнйайеда дьqәwьмьн, Хwәде нәһәq дькьн?

⁶ Ле тӧ зани чьрʹа мәри бона ван һʹәму кӧл-дәрда, кӧ дьнйайеда дьqәwьмьн, Хwәде нәһәq дькьн? Гәлә мәрийа тʹьре кӧ сәрwере ве дьнйайе Хwәде йә, ләма дь һʹәму тьштида wи нәһәq дькьн. Мәри ньзаньн әwе рʹастийа әʹйан у фәрз, йа кӧ Кʹьтеба Пироз һин дькә, кӧ бь рʹастийе Шәйтʹан ә сәрwере ве дьнйайе. Әве рʹастийе әм дь ве кʹьтебеда жь сәре 3 рʹьнд пеһʹәсийан.

7, 8. (а) Жь чь те кʹьфше, кӧ һʹӧнӧр у хәйсәтед ве дьнйайе, мина йед Мире-щьна ньн? (б) Ча гӧнәкʹарийа мәрьва, у ӧса жи «wәʹхт» у qәwьмандьн, кӧл-дәрдед мәрьва зедә дькьн?

⁷ Дь Кʹьтеба Пирозда әшкәрә те готьне: «Тʹәмамийа дьнйайе бьн һʹӧкӧме Йе Хьрабда йә» (1 Йуһʹәнна 5:19). Һәрге тӧ дьшьрмиш би сәр ван гьлийа, рʹасти wе тәрʹа зәлал бә. Дь ве дьнйайеда мәри пе кьред хwә дьдьн кʹьфше һʹöнöр у хәйсәтед Мире-щьна у щьнед wи, йе кӧ «тʹәмамийа дьне хальфандийә» (Әʹйанти 12:9). Мире-щьна йәки хьраб, зӧлм у бӧхданбеж ә. Ләма жи, дьнйа кӧ бьн сәрwерийа Шәйтʹан Мире-щьнада нә, педа бь хьрабийе зӧлмийе у нәһәqийе тʹьжә йә. Әв һәйә мәʹнийа пешьн, кӧ чьрʹа сәр әʹрде һаqас кӧл-дәрд һәнә.

⁸ Мәʹнийа дӧда әw ә, кӧ паши wе йәке ча дь Адәнеда мәри мьqабьли Хwәде рʹабун, әwана бунә нәqәданди у гӧнәкʹар. Дәрһәqа ве йәке, дь сәре 3-да дьһатә готьне. Мәрьвед гӧнәкʹар тʹьме дьхwазьн ль сәр мәрийа сәрwертийе бькьн, у жь бо ве йәке шәрʹ дькьн, ләма жи дьнйайеда шәрʹ, кӧл-дәрд у зорбәти һәйә (Wаиз 4:1; 8:9). Мәʹнийа сьсийа жи әв һәйә «wәʹхт» у qәwьмандьн. (Бьхунә Wаиз 9:11.) Мәсәлә, һәрге мәри бәр авайикирʹа дәрбаз бә, тьштәк жь авайи бьqәтә сәр wида бькʹәвә у бькӧжә, әв һәйә wәхт у qәwьмандьн. Иро дь ве дьнйайеда һәр кәс дькарә щики нә баш у wәʹде нә башда бькʹәвә qәзийе, чьмки Хwәдайе кӧ дькарә мә жь wәхт у qәwьмандьне хwәй кә у хьлаз кә сәрwере wе дьне нинә.

9. Чьрʹа әм баwәр дькьн, wәки мәʹнийа Йаһоwа һәйә, кӧ дьһелә һʹәму кӧл-дәрд һәбьн?

⁹ Дьлбиникә чьqас мәзьн ә кӧ бьзаньбьн, wәки Хwәде нинә сәбәбе кӧл-дәрда. Хwәде щабдар нинә бона шәрʹа, нәһәqийа, зорбәтийа йан әʹрдһʹәжа у диса тьштед дьн, жь бо чь жи мәри һаqас дьчәрчьрьн, ле әм дьхwазьн пебьһʹәсьн, кӧ чьрʹа Йаһоwа Хwәде дьһелә, wәки кӧл-дәрд һәбьн? Һәрге әw йәки Һьмзор ә, демәк qәwата wи дьгьһиже һʹәму зӧлмийе бьдә һьлдане. Ле чьрʹа әw, әwе йәке накә? Хwәдайе кӧ бь һʹьзкьрьн тʹьжә йә, мәʹнийа wи һәйә, жь бо чь жи әw дьһелә wәки кӧл-дәрд һәбьн (1 Йуһʹәнна 4:8).

ПЬРСӘКӘ ФӘРЗ ҺАТӘ ДАНИНЕ

10. Мире-щьна чь кьрә бьн шьке, у ча?

¹⁰ Сәва кӧ пебьһʹәсьн, чьрʹа Йаһоwа дьһелә кӧл-дәрд һәбьн, wәрә әм биньнә бира хwә ча кӧл-дәрд дәстпебун. Чахе Шәйтʹан Мире-щьна һелан да Адәм у Һеwайе, кӧ әwана гӧрʹа Хwәде нәкьн, пьрсәк һатә данине. Мире-щьна qәwата Йаһоwа Хwәде нәкьрә бьн шьке, чьмки әwи рʹьнд заньбу, wәки qәwата Йаһоwа пʹьрʹ зәʹф ә. Ләма жи әwи пьрсәкә дьн дани, пьрс дәрһәqа изьна Хwәде сәркʹартийе бькә. Мире-щьна бӧхдан авитә Хwәде у гот кӧ әw жь әʹфьринед хwә тьштәки вәдьшерә, бь ве йәке әwи да кʹьфше, йан чь Хwәде сәрwерәки хьраб ә. (Бьхунә Дәстпебун 3:2-5.) Жь гьлийед Мире-щьна дьһатә кʹьфше, кӧ мәри бейи сәрwертийа Йаһоwа, wе һе рʹьнд бьжин. Бь ве йәке әwи изьна Хwәде сәркʹартийе бькә, кьрә бьн шьке.

11. Чьрʹа Йаһоwа, Адәм у Һеwа дь бахче Адәнеда перʹа-перʹа qьрʹ нәкьр?

¹¹ Адәм у Һеwа мьqабьли Йаһоwа дәркʹәтьн. Әв кьре wан, дькарә бе һʹәсабе кӧ wана гьлийед ӧса гот: «Әм нахwазьн, wәки Йаһоwа сәрwере мә бә. Әм хwәха дькарьн сафи кьн чь йә qәнщи у чь йә хьраби». Гәло Йаһоwа әв пьрса фәрз ча гәрәке сафи кьра? У әwи ча гәрәке һʹәму әʹфринед хwәрʹа нишан кьра кӧ Адәм у Һеwа нә рʹаст бун, у wәки тʹәне рʹийа Йаһоwа бәхтәwарийе тинә? Һьнәк дьбә ӧса бежьн, кӧ Йаһоwа Хwәде гәрәке перʹа-перʹа Адәм у Һеwа кʹӧта кьра, у дәwсе мәрьвед тʹәзә бьәфьранда. Ле сәре-серида нета Йаһоwа әw бу, кӧ зӧрʹәтед Адәм у Һеwайе дь щьнәтеда бьжин (Дәстпебун 1:28). Йаһоwа тʹьме нетед хwә тинә сери, ләма әwи Адәм у Һеwа нәкӧшт (Ишайа 55:10, 11). Хенщи ве йәке, һәрге Йаһоwа дь бахче Адәнеда Адәм у Һеwа qьрʹ кьра, чаwа wе бьһата избаткьрьне кӧ мәрьв бейи сәркʹартийа Хwәде нькарьн бәхтәwар бьн, у кӧ тʹәне изьна Хwәде һәйә сәрwертийе бькә?

12, 13. Бь мәсәле нишан кә, wәки чьрʹа Йаһоwа изьн да Мире-щьна, кӧ әw бьбә сәрwере ве дьнйайе, у чьрʹа Хwәде изьн да мәрьва кӧ әwана хwәха сәрwертийе ль хwә бькьн?

¹² Wәрә әм дәрһәqа мәсәләке хәбәрдьн. Бьдә бәр чʹәʹве хwә, дәрсдар шагьртарʹа дәрсәкә чәтьн шьровәдькә. Шагьртәки сәрwахт у нәгӧһдар мьqабьли дәрсдар дәрдькʹәвә у дьбежә, кӧ әw дәрсе рʹаст шьровәнакә. Шагьрт дәрсдар нәһәq дькә, у дьбежә wәки әw жь дәрсдар рʹьндтьр занә сафикьрьна ве пьрсе. Һьнә шагьртед дьне жи qайил дьбьн тʹәви ви шагьрте нәгӧһдар, пьшта wи дьгьрьн у дьшьрмиш дьбьн кӧ дәрсдар нәрʹаст ә. Һьнге дәрсдар чь гәрәке бькә? Һәрге дәрсдар ван шагьртед нәгӧһдар жь мәкʹтәбе дәрхә, ле шагьртед дьн wе чь дьшьрмиш бьн? Әwана wе бькарьбьн те дәрхьн кʹи йә бь рʹастийе рʹаст у кʹи йә нәрʹаст? Дьqәwьмә әwана дьшьрмиш бьн кӧ дәрсдар дьтьрсә, wәки бе сафикьрьне, кӧ әw нәрʹаст ә, у шагьрт ида qәдьре дәрсдар нәгьрьн. Ле бьдә һʹәсабе, wәки дәрсдар изьне дьдә шагьрте нәгӧһдар, wәки әw дәрсе бь щурʹе хwә сафи кә.

¹³ Йаһоwа жи һәма ӧса кьр. Әwи Адәм у Һеwа перʹа-перʹа кʹӧта нә кьр. Ле чьрʹа? Йа пешьн, бь милйона мьлйакʹәта пәй ве йәке дьньһерʹьн (Ибо 38:7; Әʹйанти 5:11). Әw йәк кӧ чаwа Йаһоwа wе дәрәщеда хwә кʹьфш кьра, дькарьбу ль ахьрийе гәләк һʹӧкӧм кьра ль сәр wан һʹәму мьлийакʹәта у мәрийа. Һʹәму мәрьв, йед кӧ wе бьһатана буйине гәрәке бьзаньбуна изьна кʹе һәйә сәрwертийе бькә, изьна Йаһоwа йан йа Шәйтʹан Мире-щьна. Ләма жи Йаһоwа изьн да Мире-щьна, wәки әw нишан кә кӧ ча wе сәрwертийе ль сәр инсанәте бькә. Йаһоwа Хwәде ӧса жи изьн да мәрийа, wәки әwана бьн сәрwертийа Мире-щьна, сәркʹартийе ль хwә бькьн.

14. Әw йәк кӧ Йаһоwа изьн да wәки мәрьв хwәха сәрwертийе ль хwә бькьн, wе чь кʹаре бинә?

¹⁴ Әв дәрсдар, дәрһәqа кʹижани кӧ мә дь мәсәледа гьли кьр, занә кӧ шагьрте нәгӧһдар у һәвалед wи кӧ пьшта wи гьртьн нәрʹаст ьн. Дәрсдар ӧса жи занә, кӧ һәрге изьне бьдә шагьрта әве пьрсе бь щурʹе хwә сафи кьн, әв йәк wе һʹәму шагьртарʹа кʹаре бинә. Чьмки чахе әв шагьртед нәгӧһдар нькарьбьн әве пьрсе сафи кьн у бал wан нәйе стандьне, шагьртед дьне wе бьбиньн кӧ дәрсдар рʹаст бу у тʹәне әw дькарә дәрсе бьдә шагьрта. Паши ве йәке әwана wе фәʹм бькьн, кӧ чьрʹа дәрсдар бәри ван шагьртед нәгӧһдар дьдә у жь мәкʹтәбе дәрдьхә. Ӧса жи Йаһоwа занә, кӧ мәрьвед мьлук у мьлйакʹәт wе кʹаре бьстиньн, чахе бьбиньн кӧ Мире-щьна у пьштгьред wи нәрʹаст бун, у wе фәʹм бькьн кӧ мәрьв нькарьн хwәха сәрwертийе ль хwә бькьн. Әwана wе тʹәви гьлийед Йерәмйа пʹехәмбәр qайил бьн, кӧ мәрьв нькарә бейи Хwәде гавед хwә рʹаст дайнә у «рʹийа мәрьва нә дь дәсте wида йә» (Йерәмйа 10:23).

ЧЬРʹА ЙАҺОWА КӦЛ-ДӘРДА ҺАQАС WӘʹДӘ ДЬҺЕЛӘ

15, 16. (а) Чьрʹа Йаһоwа һишт, wәки кӧл-дәрд һаqас дьреж бькʹьшинә? (б) Чьрʹа Йаһоwа нәһәqийе у зӧлмийе надә һьлдане?

¹⁵ Ле чьрʹа Йаһоwа дьһелә, wәки кӧл-дәрд һаqас wәʹдә бькʹьшинә? У чьрʹа әw мәрийа жь wан кӧл-дәрда хьлаз накә? Wәрә әм диса вәгәрʹьн ль сәр мәсәла дәрсдар у бьбиньн әwи чь нәкьр. Йа пешьн, чахе шагьрт бь щурʹе хwә дьхwәст пьрс сафи кьра, дәрсдар изьн да wи у әw нәда сәкьнандьне. Йа дӧда, дәрсдар дь сафикьрьна ве пьрседа али wи нәкьр. Йаһоwа жи һәма ӧса кьр, чахе Мире-щьна у әwед кӧ пьшта wи гьртьн, дьхwәстьн избат кьн, wәки әwана рʹаст ьн, Йаһоwа әwана нәданә сәкьнандьне. Ле дәwсе Йаһоwа wәʹдә да wан. Дь нава һʹәзара салада мәрийа щурʹә-щурʹә сәрwерти дьданә хәбате. Дь нава ван салада мәрьв алийе зандарийеда гәлә пешда чун, ле нәрʹасти, кʹәсиббун, зӧлми у шәрʹ кем набә ле һе зедә дьбә. Әв йәк иро нишани мә дькә, кӧ сәрwертийа мәрийа кʹаре найнә у мәрьв нькарә сәрwертийе бькә.

¹⁶ Йаһоwа нә жи али Мире-щьна кьр, чахе Мире-щьна дәстпекьр сәрwертийе бькә. Һәрге Йаһоwа али Мире-щьна бькьра у һʹәму зӧлми у нәһәqи бьда һьлдане, әв йәк wе Мире-щьнарʹа дәст бьда. Ӧса нинә? Ле һьнге wе мәрьв дьшьрмиш буна, кӧ әwана хwәха дькарьн бе Хwәде сәрwертийе ль хwә бькьн. У әwана wе сәрwа нәчуна, кӧ сәрwертийа wана дь ахьрийеда бона мәрьва wе чьqас хьраб бә. Һәрге Йаһоwа перʹа-перʹа кӧл-дәрд бьда һьлдане, әw wе дәрәwин дәркʹәта. Ле ча әм жь Кʹьтеба Пироз дәрһәqа Хwәде педьһʹәсьн «набә кӧ әw дәрәw дәре» (Ибрани 6:18).

17, 18. Йаһоwа wе чь бькә дәwса wан һʹәму зийана, йе кӧ сәрwертийа мәрьва бьн һӧкӧмтийа Мире-щьна ани?

¹⁷ Ле әм чь дькарьн бежьн дәрһәqа wан һʹәму зийана, йед кӧ мәрьв дь нава wан гәләк салада стандьн? Тʹьме гәрәке дь бира мәда бә, wәки Йаһоwа Хwәдайе Һьмзор ә. Әw дькарә у wе әʹсәйи һʹәму кӧл-дәрда бьдә һьлдане, йед кӧ мәрийарʹа һаqас зийане тиньн. Иро дьнйа бәрбь һьлшандьне дьчә, ле ча әм ида пеһʹәсийан дьнйа wе һьлнәше, ле wе бьбә щьнәт. Һәрге мәрьв баwәрийа хwә qӧрбанбуна Иса Мәсиһ биньн, әwана wе жь гӧнә бенә хьлазкьрьне у жь мьрьне бенә азакьрьне. Йаһоwа wе бь сайа Иса һʹәму «кьред Мирещьн хьраб кә» (1 Йуһʹәнна 3:8). Йаһоwа wе әван һʹәму тьшта әʹсәйи дь wәʹдәда пек бинә. Әм гәләк ша нә wәки Йаһоwа әв нета хwә һе пешда нәанийә сери, чьмки бь сайа сәбьркьрьна wи, әм дәрһәqа рʹастийе пеһʹәсийан у wирʹа qӧльх дькьн. (Бьхунә 2 Пәтрус 3:9, 10.) Ньһа жи Йаһоwа wан qӧльхкʹаред дьлсах дьгәрʹә, йед кӧ дьхwазьн wирʹа qӧльх кьн, у дь һʹәму чәтьнайада әw али wан дькә, сәва кӧ әwана бькарьбьн тәйах кьн (Йуһʹәнна 4:23; 1 Корьнтʹи 10:13).

¹⁸ Һьнәк дьбә ӧса дьшьрмиш бьн: «Гәло чьрʹа Йаһоwа, Адәм у Һеwа ӧса нәәʹфьрандьн wәки wана тʹьме гӧрʹа wи бькьрана у мьqабьли wи дәрнәкʹәтана?» Сәва кӧ щаба ве пьрсе бьстини, тӧ гәрәке бини бира хwә һәла бь кʹижан пʹешкʹеше Йаһоwа тӧ хәлат кьри.

ТӦЙЕ ӘWЕ ПʹЕШКʹЕША ЖЬ ХWӘДЕ ЧА БЬДИ ХӘБАТЕ?

19. Йаһоwа кʹижан пʹешкʹешәкә qимәт дайә мә, у чьрʹа әм гәрәке әве пʹешкʹеше бьдьн хәбате?

¹⁹ Ча әм жь сәре 5 пеһʹәсийан, Хwәде әм бь азайа бьжартьне әʹфьрандьн. Дьбәк тӧ жи qайил и кӧ әв пʹешкʹешәкә qимәт ә. Мәсәлә Йаһоwа һʹәйwан ӧса әʹфьранд, кӧ әwана нькарьн хwәха те дәрхьн чь йә qәнщи у чь йә хьраби, чьмки әwана һʹәму тьшти бь зькмакийе дькьн (Мәтʹәлок 30:24). Мәрийа роботе ӧса чекьрьнә, кӧ пе програме дьдьнә хәбате, у мәри чь дьхwазьн робот ӧса жи дькә. Ле һәрге әм жи бь ви щурʹәйи бьһатана әʹфьрандьне, әме бькарьбуна бәхтәwар буна? Фәʹмдари йә, wәки на. Әм ша нә кӧ бал мә һәйә азайа бьжартьне у әм хwәха дькарьн бьжберьн әме мәрийед ча бьн, ча бьжин, тʹәви кʹе һәвалтийе бькьн у диса тьштед дьн. Азайа ӧса мә хwәш те, у Хwәде хwәха әв йәк сәва мә дьхwәст.

20, 21. Ча әм дькарьн әве азайа бьжартьне баш бьдьн хәбате, у чьрʹа әв йәк ӧса фәрз ә?

²⁰ Һәла дьшьрмиш бә. Ча wе де-бава һе хwәш бе, чахе зарʹ хwәха бежә wан кӧ әw wан һʹьз дькә, йан чахе кәсәк бежә зарʹе, wәки һәрʹә ӧса бежә? Бәле, Йаһоwа жи нахwазә wәки әм бь дәсте зоре wирʹа qӧльх кьн (2 Корьнтʹи 9:7). Ләма жи пьрс пешда те, ле те ча бьди хәбате әве азайа бьжартьне кӧ Хwәде дайә тә? Мире-щьна, Адәм у Һеwайе бьжартьнәкә хьраб кьрьнә, у Йаһоwа инкʹар кьрьн. Ле те чь бьки?

²¹ Тӧ дькари әве азайа бьжартьне гәләк баш бьди хәбате. Мәсәлә, һәрге тʹәви ван бь милйона мәрийа бьби йәк, йед кӧ хwә ль Йаһоwа гьртьнә. Әwана дьле Хwәде ша дькьн, чьмки һʹәму тьшти дькьн сәва кӧ избат кьн wәки Мире-щьна дәрәwин ә у wәки әв сәрwерәки бекер ә (Мәтʹәлок 27:11). Һәрге тӧ рʹекә рʹаст хwәрʹа бьжбери те жи бькарьби избат ки кӧ Мире-щьна дәрәwин ә. Дәрһәqа wе йәке һе зедә әме дь сәре майинда пебьһʹәсьн.