дәстпекьр пʹадшатийе бькә. Демәк 20 салийа пʹадшатийа Артаһшашт, дькʹәвә сала 455. Жь вьр те кʹьфше, кӧ әw wәʹдә дәрһәqа чь жи Данийел дьгот, дь сала 455-да дәстпебу.

Данийел әʹйан кьр, wәки һʹәта һатьна Иса Мәсиһ чьqас wәʹдә гәрәке дәрбаз буйа. Дь пʹехәмбәртийеда һатьбу готьне кӧ «һʹәфт һʹәфтә у шест у дӧ һʹәфтә», бь тʹәмамийе әв дәрдькʹәвә 69 һʹәфтә. Ле гәло әв wәʹдә чьqаси дьреж дьбә? Жь һьнә wәлгәрʹандьнeд Кʹьтеба Пироз рʹьнд те кʹьфше, wәки хәбәрдан дәрһәqа һʹәфтийе сала дьчә, нә кӧ дәрһәqа һʹәфт рʹожeд һʹәфтийе. Демәк һәр һʹәфтийе сала, дәрдькʹәвә 7 сал. Щьмәʹта Щьһуйа дәрһәqа ван һʹәфтийе сала рʹьнд заньбун. Мәсәлә, һәр сала һʹәфта дь Исраеледа дьһатә һʹәсабе сала Шәмийе (Дәркʹәтьн 23:10, 11). Демәк пʹехәмбәрти дәрһәqа 69 һʹәфтә, әв те һʹәсабе 69 wәʹдә у дь һәр жь ван wәʹдада 7 сал һәнә. Һәрге 7 дәрба 69 һʹәсаб кьн, wе дәрдькʹәвә 483 сал, демәк 69 һʹәфтә әв 483 сал ьн.

Ньһа әм ида дькарьн һʹәсаб кьн, wәки кʹәнге Иса Мәсиһ гәрәке бьһата. Һәрге әм жь сала 455 бәри дәwрана мә Б.Д.М., бьжмерьн 483 сал, әме бьгьһижнә сала 29 дәwрана мә Д.М. Һәма дь ве саледа Иса һатә ньхӧмандьне у кʹьфш бу ча Мәсиһ!a (Луqа 3:1, 2, 21, 22). Гәло әв йәк әʹщебмайи нинә, кӧ пʹехәмбәртийeд жь Кʹьтеба Пироз ӧса һур бь һур һатьнә сери?

СӘВА кӧ әм бькарьбьн Мәсиһ нас кьн, Йаһоwа хәм кьр wәки гәлә пʹехәмбәр дәрһәqа буйин, qӧльхкьрьн у мьрьна Иса, Хьлазкʹаре создайи лекьн. Әв һʹәму пʹехәмбәрти һур бь һур у рʹаст ль сәр Иса Мәсиһ һатьн сери. Сәва кӧ баwәрийа мә дь ве йәкеда qәwи бә, wәрен әм бьньһерʹьн һьнә жь wан пʹехәмбәртийа, йeд кӧ тʹәви буйин у зарʹотийа Иса тʹәвгьредайи нә, чаwа һатьнә сери.

Ишайа пʹехәмбәр пешда дьгот, кӧ кәсәк жь зӧрʹәте Даwьд wе бьбә Мәсиһ (Ишайа 9:7). У бь рʹастийе жи, Иса жь ньсьла Даwьд бу (Мәтта 1:1, 6-17).

Пʹехәмбәрәки дьн Миха, дьгот кӧ зарʹ дь Бәйтләһʹма-Әфратеда (Щьһустанеда) wе бе буйине, у хьлазийе wе бьбә пʹадша (Миха 5:2). Чахе Иса һатә буйине, дь Оршәлимеда дӧ шәһәр бь наве Бәйтләһʹм һәбун. Йәк ль алийе бакʹуреда незики Ньсрәте бу, йе дӧда жи дь Щьһустанеда бәрбь Оршәлиме бу, wирʹа бәре Бәйтләһʹма-Әфрата дьготьн. Һәма дь ви шәһәреда Иса Мәсиһ һатә буйине, у бь ве йәке пʹехәмбәртийа Миха һатә сери (Мәтта 2:1).

Пʹехәмбәрәки жи гот, wәки Хwәде wе «жь Мьсьре гази кӧрʹе хwә» бькә. Рʹасти жи Исайе бьчʹук бьрьбун Мьсьре. Ле паши мьрьна Һеродәс, әw пашда вәгәрʹандьн у бь ве йәке диса пʹехәмбәртик ль сәр Иса һатә сери (Һосәйа 11:1; Мәтта 2:15).

Ль сәр рʹупʹела 200 һәйә чаргошә. Дь ве чаргошеда кʹьфшкьри нә сәри у рʹезeд Кʹьтеба Пироз, дь кʹижанада ньвисар ә «Пʹехәмбәрти» дәрһәqа Иса. Кʹеләке диса сәри у рʹезeд жь Кʹьтеба Пироз тенә кʹьфшкьрьне, кʹидәре ида те гьликьрьне, кӧ ча әв пʹехәмбәрти «һатә сери». Жь кʹәрәма хwә, ван рʹеза һьмбәри һәв кә. Бь ве йәке баwәрбуна тә wе һе qәwи бә у wе тәрʹа зәлал бә, кӧ бь рʹастийе жи Кʹьтеба Пироз һежайи йә, wәки әм баwәрийа хwә ле биньн.

Һәрге тӧ ван рʹеза бь Кʹьтеба Пироз һьмбәри һәв ки, те тʹәхмин ки кӧ әв һʹәму пʹехәмбәрти wәкә сәд сал пешда, пешийа буйина Иса Мәсиһ һатьн ньвисаре. Дәрһәqа ве йәке хwәха Иса гот: «Гәрәке һәр тьштeд кӧ бона мьн Qануна Муса, ньвисарeд пʹехәмбәра у Зәбурада ньвисар бун бьһатана сери» (Луqа 24:44). Жь Кʹьтеба Пироз әшкәрә те кʹьфше, кӧ һʹәму пʹехәмбәрти бь рʹастийе жи, һур бь һур һатьн сери.

ӘW МӘРЬВ йeд кӧ сейәканә баwәр дькьн, дьбежьн кӧ Хwәде се пʹар ә: Бав, Кӧрʹ у Рʹӧһʹе Пироз. Әв һәрсек йәк ьн, у wәкә һәв һьмзор ьн. Демәк, һинкьрьна wан әw ә, wәки Бав Хwәде йә, Кӧрʹ Хwәде йә, Рʹӧһʹе Пироз жи Хwәде йә, ле Хwәде тʹәне йәк ә.