Сәрһати 76

Һьлшандьна Оршәлиме

ПАШИ ԝе йәке ча Нәбукәднәсәр пʹадша һʹәму исраелийед хԝәнди у аԛьл бьр Бабилоне, ԝәкә 10 сал дәрбаз бу. Бьньһерʹә чь сәре Оршәлиме һат! Агьр пе кʹәтийә у гәлә жь исраелийа мьрьн. Ле ԝан исраелийа йе кӧ сах ман дьвьн Бабилоне дилти.

Те бира тә, пʹехәмбәред Йаһоԝа пешда дьготьн кӧ әв йәк ԝе бе сәре мәрийа һәрге әԝана жь рʹийе хԝәйә хьрав вәнәгәрʹьн. Ле исраелийа гӧһ нә дьданә пʹехәмбәра. Ԝана дәԝса ԛӧльхкьрьна Йаһоԝарʹа сәре хԝә бәр хӧданед ԛәлп датанин. Ләма жи әԝана һежайи щәза кьрьне бун. Һе зедә дәрһәԛа нәһәԛийед исраелийа әм дькарьн жь пʹехәмбәре Хԝәде Һәзәԛел пебьһʹәсьн.

Һәзәԛел йәк жь ԝан гәдед щаһьл бу, йе кӧ Нәбукәднәсәр 10 сала пешийа һьлшандьна Оршәлиме, анибу Бабилоне. Һәма ԝи чахи Данийел Шәдрак, Мәшак у Абәд-Нәго бьрьбун Бабилоне.

Йаһоԝа дь Бабилонеда нишани Һәзәԛел дькьр ԝан һʹәму тьштед хьрав йе кӧ ль Оршәлиме у дь пʹарьстгәһеда дьԛәԝьмин. Йаһоԝа бь кʹәрәмәте ве йәке дькьр. Рʹаст ә Һәзәԛел дь Бабилонеда бу, ле Йаһоԝа ӧса дькьр кӧ әԝ һʹәму тьшт йе кӧ ль пʹарьстгәһе дьԛәԝьмин дьдит. Әв тьштед кӧ Һәзәԛел дьдит әщев бун!

Йаһоԝа готә Һәзәԛел: «Бьньһерʹә ль сәр ван кьред мьрʹдарʹ йе кӧ щьмәʹт дь пʹарьстгәһеда дькә. Дина хԝә бьдә диԝара, йе кӧ бь сьфәтед мәʹр у һʹәйԝанед дьнена тʹьжә бунә. Бьньһерʹә ча исраели сәре хԝә бәр ԝан датиньн!» Һәзәԛел ван тьшта дьдит у дьньвиси.

Паше Йаһоԝа жь Һәзәԛел пьрси: «Дьвини сәркʹаред исраели пьшт мәрийава чь дькьн?» Бәле, әԝи дьдит. Ль ԝьр ԝәкә 70 мер һәбун, йе кӧ сәре хԝә бәр хӧданед ԛәлп датанин, у сәрда дьготьн: «Йәкә Йаһоԝа мә навинә. Әԝ жь әʹрде мә дур кʹәтийә».

Паше Йаһоԝа һьнә жьна нишани Һәзәԛел кьр, йа кӧ бәр дәрийа пʹарьстгәһе рʹуньшти бун. Әԝана сәре хԝә бәр хӧдане ԛәлп Тʹаммуз датиньн. Һәзәԛел ӧса жи бәр пʹарьстгәһе ԝәкә 25 мера дьвинә, йе кӧ бәр дәре дьне сәкьнибун у сәре хԝә бәр тәʹве датиньн!

Йаһоԝа дьвежә: «Әв щьмәʹт мьн бәр тьштәки һʹәсав накьн. Әԝ кьред хьрав кӧ әԝана дькьн бәс нибун, ле сәрда жи тенә пʹарьстгәһа мьн кӧ ԝан нәһәԛийа бькьн!» Ләма жи Йаһоԝа ԛьрар кьр: «Һерса мьн жорда ԝе бе сәр ԝан у гава әԝана бенә ԛьрʹкьрьне әзе гӧне хԝә ван найньм».

Паши ве йәке, вәкә се сал дәрбаз бу у исраели пешбәри Нәбукәднәсәр пʹадша рʹабун. Ләма жи Нәбукәднәсәр дәстпедькә тʹәви исраелийа шәрʹ бькә. Сал нивәк дәрбаз бу у бабилонийа диԝаред Оршәлиме һурдәхԝәши кьрьн у шәһәр жи шәԝьтандьн. Һʹәчʹи зәʹф жь мәрийа һатьнә кӧштьне, ле йе дьн жи бьрьн Бабилоне ча дил.

Ле гәло Йаһоԝа чьрʹа һишт кӧ әв йәк сәре ԝан бьԛәԝьмә? Бәле, чьмки ԝана гӧрʹа ԝи нәдькьр у ԛанунед ԝи хԝәй нәдькьрьн. Әв ԛәԝьмандьн мәрʹа нишадькә кӧ чьԛас фәрзә һәр гав гӧрʹа Йаһоԝа бькьн.

Пешийе һьнә мәри дь Исраеледа йәкә дьжитьн. Нәбукәднәсәр ль сәр ԝан щьһуйәк бь наве Гәдалйа кʹьвш кьр. Ле ԝәʹдә шунда һьнә исраелийа Гәдалйа кӧштьн. Бь ве мәʹнийе әԝана дәстпекьрьн бьтьрсьн, кӧ сәва кьред ван Бабилонийа дькарьн бен у ԛьрʹа ван биньн. Ләма жи әԝана рʹәвин Мьсьре у Йерәмийа жи зоре тʹәви хԝә бьрьн.

Бь ве йәке әʹрде Исраеле ԝеран ма. Ԝәкә 70 сала ль ԝьр тӧ кәс нәдьжит у әʹрд тʹәмам вала бу. Ле Йаһоԝа соз да кӧ паши 70 сала әԝ щьмәʹта хԝә ԝе пашда вәгәрʹинә сәр әʹрде ԝанә һʹәлал. Ле нава ван 70 сала дь Бабилонеда чь дьԛәԝьмә тʹәви щьмәʹта Хԝәде? Ԝәрʹен әм пебьһʹәсьн.

2 П’адшати 25:1-26; Йерәмйа 29:10; Һәзәԛел 1:1-3; 8:1-18.