Сәрһати 87
Исайе Донздәһ Сали Дь Пʹарьстгәһеда
ҺӘЛА дина хԝә бьдә ви гәди, йе кӧ тʹәви меред мәзьн хәвәр дьдә. Әв Иса йә. Әԝ ида мәзьн буйә у ԝәкә 12 сали йә.
Ле әв мер, йе кӧ тʹәви Иса хәвәр дьдьн, дь пʹарьстгәһе Оршәлимеда мәрийа дәрһәԛа Хԝәде һин дькьн. Ньһа әԝана жь Иса зәндәгьрти манә, чьмки әԝ гәлә тьшта жь Кʹьтеба Пироз дәрһәԛа Хԝәде занә. Ле гәло чьрʹа Иса тʹәне йә? Ле Усьв у Мәрйәм кʹӧ нә? Ԝәрә әм пебьһʹәсьн.
Усьв һәр сал тʹәви нәфәред мала хԝә дьчу Оршәлиме ль сәр әʹидәки кʹьвш кьри бь наве Щәжьн. Рʹийа жь Ньсрәте һʹәта Оршәлиме рʹеки дьреж бу. Ль ԝи чахи нә авто һәбун нә жи автобус. Мәрьв тʹьме пʹе хԝә рʹе дькʹәтьн у сәва кӧ бьгьһижьн Оршәлиме ԝәкә се рʹож лазьм бу.
Ньһа нәфәред мала Усьв гәләк ьн. Щәм Иса ида һьн хушк һәнә һьн жи бьра. Усьв у Мәрйәм тʹәви һʹәму зарʹед хԝә чубун Оршәлиме, у ньһа әԝана вәдгәрʹьн пашда Ньсрәте. Рʹева әԝана мьԛати зарʹа бьчʹук дьбун. Ләма жи гава ԝана Иса кʹеләка хԝә нәдит, ԝана тʹьре кӧ дьбәк жи әԝ тʹәви мәрьвед дьне рʹе дьчә. Бәре еваре әԝана ль щики сәкьнин у дәстпекьр Иса нава һәвалед у бьра пьзмаме хԝә бьгәрʹьн. Ле ԝана Иса нәдит! Ләма жи әԝана пашда вәгәрʹийан Оршәлиме, сәва кӧ ль ԝьр Иса бьвиньн.
Хьлазийе ԝана Иса дь пʹарьстгәһеда нав дәрсдара дит. Әԝи пьрса дьда ԝан у щава ԝан дьбьһист. Һʹәму мәрьв дӧр-бәре Иса әщевмайи бун, ԝәки әԝ чьԛас аԛьл ә. Ле Мәрйәм готә Иса: «Лаԝо! Тә чьма ӧса сәре мә кьр? Әз у баве тә бәрхԝә дькʹәтьн, ль тә дьгәрʹийан».
Ле Иса готе: «Һун чьма ль мьн дьгәрʹийан? Ԝә ньзаньбу, кӧ әз гәрәке мала Баве хԝәда бьм?»
Бәле, һʹәԝаса Иса һәбу тʹьме дәрһәԛа Хԝәде һин буйа. Әм жи гәрәке мина Иса бьн, ӧса нинә? Дь Ньсрәтеда Иса һәр һʹәфтийе дьчә ль сәр щьвате сәва ԛӧльхкьрьне. Әԝ тʹьме рʹьнд гӧһе хԝә дьдә гьлийа, ләма жи әԝ Кʹьтеба Пироз рʹьнд занә. Кʹа әм жи мина Иса бьн у чʹәʹв бьдьнә ԝи.