Сәрһати 91

Даннасинийа Иса Сәре Чʹийе

ҺӘЛА дина хԝә бьдә ви шькьли. Иса ль сәре чʹийайе Щәлиле рʹуньштийә, дӧр-бәре ԝи гәлә мәри тʹоп бунә у Иса ԝан һʹәмушка һин дькә. Ле әԝ кӧ незики ԝи рʹуньштьнә, шагьртед ԝи нә. Иса хԝәрʹа 12 шагьрта жьбарт, ԝәки әԝана бьбьнә шандийед ԝи. Шандийед Иса, шагьртед ԝийә башԛә нә. Ле зани навед ԝан чь йә?

Ль вьр һәбун дӧ бьра бь наве Шьмһʹуне Пәтрус у бьре ԝи Әндраԝьс. Ӧса жи Аԛуб у Йуһʹәнна, әԝана жи бьред һәв бун. Диса шанди һәбун бь наве Аԛуб, у ӧса жи Шьмһʹун. Дӧ шандийед Иса һәр дӧ жи бь наве Щьһуда һәбун. Йәк Щьһудайе Исхәрйоти, йе дьн жи Щьһуда йе кӧ ԝирʹа Тәдайо дьготьн. Ӧса жи һәбу Филипо у Натанйеле кӧ (ԝирʹа Бәртоломәйо дьготьн). Навед дӧ шандийед пашьн Мәтта у Тʹума бу.

Паши вәгәрʹандьна жь Самәрйайе, Иса перʹа-перʹа дәстпекьр даннасин бькә мәрийарʹа дәрһәԛа ԝе йәке кӧ: «Пʹадшатийа Әʹзмана незик буйә». Ле зани дәрһәԛа кʹижан пʹадшатийе хәвәр дан дьчу? Иса дьгот дәрһәԛа пʹадшатийа Хԝәде, йе кӧ рʹасти жи һәйә, пʹадше кʹижани хԝәха Иса йә. Иса ԝе жь әʹзмана сәркʹартийе бькә у әʹдьлайи бинә сәр әʹрде. Бь сайа ве пʹадшатийе тʹәмамийа әʹрде ԝе бьбә щьнәта хас у бәдәԝ.

Ль сәре чʹийе Иса дәрһәԛа пʹадшатийе диса тьштәк һин кьр. Әԝи гот: «Ле һун аһа дӧа бькьн: ‹Баве мәйи әʹзмана! Наве тә пироз бә, Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде›». Әв дӧакьрьна фәрз дь рʹожа иройинда гәлә навдар ә. Ле тӧ дькари әви дӧайи жь сәри һʹәта хьлазийе бьԝәкʹьлини?

Иса ӧса жи мәрийа һин дькьр, ԝәки әԝана ча гәрәке һьндава һәвда бьн. Әԝи гот: «Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʹа бькьн». Чьԛас башә чахе мәрʹа ԛәнщийе дькьн! Ӧса нинә? Ләма жи Иса гот ԝәки әм жи гәрәке мәрийарʹа ԛәнщийе бькьн. Бьдә һʹәсаве хԝә, чахе ль сәр әʹрде щьнәте һʹәму мәрьв тʹәне ԛәнщийе ԝе һәврʹа бькьн, чьԛас ԝе бәхтәԝар бә әʹмьре мә! Ӧса нинә?

Мәтта сәре 5 һʹәта 7; 10:1-4.