Сәрһати 92
Иса Ԛизьке Жь Мьрьне Рʹадькә
ԚИЗЬКА йа кӧ ль сәр шькьл те кʹьвше 12 сали йә. Мере кӧ дәсте ԝе гьртийә Иса йә. Ле мер у жьне кʹеләке ԝе де-баве ԝе нә. Ле гәло чьрʹа әԝана ӧса ша дьбьн? Ԝәрә әм пебьһʹәсьн.
Баве ве ԛизьке мерәки навдар ә, наве ԝи Йайиро йә. Рʹожәке ԛиза ԝи нәхԝәш кʹәт у кʹәтә нав щийа. Һәр рʹож дәԝса кӧ ԛәнщ бьбә әԝ һе хьрав дьбу. Йайиро у жьна ԝи гәлә бәрхԝә дькʹәтьн, чьмки дьһатә кʹьвше кӧ ԛизьк бәр мьрьне бу. Әԝ жи ԛизәкә ԝанә тайе-тʹәне бу. Ләма жи Йайиро дьчә кӧ Иса бьвинә, чьмки әԝи бьһистьбу кӧ Иса кʹәрәмәта дькә.
Чахе Йайиро Иса дит, әʹлаләтәки гьран дӧр-бәре Иса бу. Йайиро әʹлаләтева дәрбаз бу, һат хԝә авитә ньгед Иса у һиви же кьр: «Ԛиза мьн гәлә нәхԝәшә, һиви тә дькьм ԝәрә у ԝе ԛәнщ кә». Иса ԛайил бу кӧ һәрә мала ԝи.
Гава әԝана рʹе дьчун, әʹлаләт һе зәʹмәте дьда Иса. Ньшкева Иса сәкьни у гот: «Әԝ кʹи бу кӧ дәсте хԝә ль мьн да?» Иса тʹәхмин кьр кӧ ԛәԝат жь ԝи дәркʹәт, ләма жи әԝ пеһʹәсийа кӧ кәсәк дәсте хԝә дә ԝи. Ле гәло әв кʹи бу? Әв кʹӧлфәтәк бу, йа кӧ ида 12 сал ә нәхԝәшийа ԝейә гьран һәбу. Әв кʹӧлфәт незики Иса бу дәсте хԝә да кʹьнщед ԝи у перʹа-перʹа ԛәнщ бу!
Жь бо ве йәке Йайиро гӧман бу, чьмки әԝи пе чʹәʹвед хԝә дит кӧ чьԛа һеса йә Исарʹа мәрийа ԛәнщ кә. Ле һьнә ԝәʹдә шунда кәсәк һатьбу бал Йайиро у ԝирʹа әʹламәти кьр: «Ԛиза тә мьр, иди зәʹмәте нәдә Иса». Гава Иса ԝан гьлийа бьһист, әԝи готә Йайиро: «Ԛә бәрхԝә нәкʹәвә, һʹәму тьшт ԝе баш бә».
Хьлазийе, гава әԝана гьһиштьнә мал, мәрьв дӧр-бәр тʹоп бьбун, дьгьрийан у шина ԛизьке дькьрьн. Ле Иса готә ԝан: «Нәгьрин, ԛизьк нәмьрийә әԝ һеньжийә». Ԝи чахи мәрьв дәстпекьрьн ԛәрфе хԝә Иса бькьн, чьмки ԝана заньбу кӧ ԛизьк мьрийә.
Паше Иса тʹәви де-баве ԛизьке у се шагьртед хԝә кʹәтә ль ԝе отʹахе кʹидәре ԛизьк вәләзийа бу. Иса дәсте ԛизьке гьрт у гот: «Ԛизьк, рʹабә!», у ча ль сәр шькьл жи те кʹьвше ԛизьк сах бу. Әԝ рʹабу у дәстпекьр бьгәрʹә! Аһан чьрʹа де-баве ԝе ӧса ша дьбьн.
Ле әва нә щара пешьн ә кӧ Иса кәсәк жь мьрийа рʹадькә. Кʹьтеба Пироз дьвежә кӧ щара пешийе Иса кӧрʹе жьнәби сах кьрьбу, у әв йәк дь шәһәре Найинда ԛәԝьми. Паше Иса бьре Мәртʹа у Мәрйәме, Лазар жь мьрийа рʹакьр. Чахе Иса дь пʹадшатийа Хԝәдеда сәркʹартийе бькә, әԝ гәлә мәрийа ԝе сах кә у жийин бьдә ԝан йе кӧ мьрьнә. Әв йәк гәлә дьле мә ша дькә! Ӧса нинә?
Луԛа 8:40-56; 7:11-17; Йуһ’әнна 11:17-44.