Иса Дәрһәԛа Ахьрийе Пʹехәмбәртийе Дькә

ИСА тʹәви чар шандийед хԝә рʹуньштьбу сәр Чʹийайе Зәйтʹуне, жь кʹидәре кӧ Оршәлим у пʹарьстгәһ рʹьнд дьһатьнә кʹьфше. Иса ԝанарʹа гьли дькьр дәрһәԛа кʹӧтаси у «ахьрийа ве дьнйа» ԛәлп. Әԝи ӧса жи гот, ԝәки пʹарьстгәһ ԝе бе һьлшандьне (Мәтта 13:40, 49). Һьнге шагьртед Иса жь ԝи пьрсин: «Нишана һатьна тә у ахьрийа ве дьнйайе ԝе чаԝа бә?» (Мәтта 24:3).

Иса шьровәкьр, ԝәки пешийа һьлшандьна Оршәлиме ԝе чь бьԛәԝьмә. Ле гьлийе ԝи нә тʹәне дәрһәԛа Оршәлиме бун, әԝ гьли ахьрийеда жи гәрәке бьһатана сери ль сәр тʹәмамийа дьнйайе. Иса Мәсиһ пʹехәмбәрти кьр, у һур бь һур шьровәкьр, ԝәки чь ԝе бьԛәԝьмә рʹожед пашьнда у һʹале ве дьнйайе ԝе чаԝа бә. Әва һʹәму тьшт тʹәвайи ԝе нишана дәстпека пʹадшатийа Иса бә. Бь гьлийед майин, ван нишана ԝе әшкәрә кьрана кӧ Хԝәде, Иса Мәсиһ кьрә Пʹадше Пʹадшатийа әʹзмана, демәк Иса ԝе зутьрәке ԛьрʹа ве дьнйа хьраб бинә, у әʹдьлайа рʹаст бьдә мәрийа. Пʹехәмбәртийед Иса, бун нишана кʹӧтасийа ве дьнйа хьраб, динед ԛәлп, система политике у сосйали, у ӧса жи бу нишана дәстпебуна дьнйа тʹәзә.

Иса гот, ԝәки чахе әԝ бьбә Пʹадша, ль сәр әʹрде ԝе шәрʹ дәстпебьн, бьрʹчибун, әʹрдһʹәжед ԛәԝи, нәхԝәшийед гьран һʹәму щийа, у нәһәԛи жи ԝе зедә бьн. Шагьртед Исайә рʹаст, ль сәр тʹәмамийа дьнйайе мьзгинийа дәрһәԛа Пʹадшатийа Хԝәде ԝе бәла кьн. Хьлазийеда, ԝе «тәнгасийа ӧса мәзьн» дәстпебә, кӧ жь дәстпебуна дьнйайе һʹәта ньһа йа ӧса тʹӧнә буйә (Мәтта 24:21).

Мәсиһи ча гәрәке фәʹм бькьн ԝәки әв тәнгаси незик ә? Иса гот: «Жь дара һежире дәрсәке һин бьн» (Мәтта 24:32). Чахе ль сәр дара һежире бәлг дәртен, әв нишана ԝе йәке йә кӧ һавин незик ә. Хут ԝи чахи, гава пʹехәмбәртийед Иса дәрбәкерʹа бьԛәԝьмьн, әв ԝе бе һʹәсабе ԝәки кʹӧтаси незик ә. Ле хенщи Бав, кәсәк ԝе ньзаньбә рʹож у сьһʹәта дәстпебуна тәнгасийа мәзьн. Ләма жи Иса Мәсиһ ширәта ӧса да шагьртед хԝә: «Һʹьшйар бьминьн! Чьмки һун ньзаньн кʹәнге ԝәхте перʹа бьгьһижә» (Марԛос 13:33).

​—Сәр һʹиме кʹьтебед Мәтта сәре 24 у 25; Марԛос сәре 13; Луԛа сәре 21.