Шабуне Бьстинә жь Хәбата Хwә

1-3. (а) Гәләк мәрьв һьндава хәбате чь щурʹәйи нә? (б) Кʹьтеба Пироз мә чь һелан дькә дәрһәqа хәбате у ви сәрида әме дәрһәqа кʹижан пьрса хәбәр дьн?

РʹОЖА иройин гәләк мәри шабуне настиньн жь хәбата хwә. Әwана мәщбур ьн бь сьһʹәта ве хәбате бькьн кʹижан кö wан хwәш найе, у әwана һәр рʹож бе дьл әве хәбате дькьн. Wе чь али wан бькә, сәва кö жь хәбата хwә шабуне бьстиньн?

² Кʹьтеба Пироз мә һелан дькә кö әм һьмбәри хәбате, рʹаст бьн. Ль wьр те готьне кö хәбат у бәре wе, кʹәрәм ә. Сьлеман готийә, кö һәр мәрьв гәрәке бьхwә у вәхwә у хере бьстинә жь кʹәда хwә. Әва дайина Хwәде йә (Wаиз 3:13). Йаһоwа мә һʹьз дькә у бона кʹара мә дьфькьрә, әw дьхwазә кö әм хәбатеда ләзәте бьвиньн у кʹәда хwәрʹа ша бьн. Ләма жь сәва кö әм нава һʹьзкьрьна Хwәдеда бьминьн, лазьм ә кö пьрсед хәбатеда, принсипе wи бьqәдиньн. (Бьхунә Wаиз 2:24; 5:18.)

³ Ви сәрида әме хәбәр дьн дәрһәqа чар пьрса: ча әм дькарьн жь хәбата хwә шабуне бьстиньн? Мәсиһийед рʹастрʹа кʹижан щурʹә хәбат дәст надә? Әм ча дькарьн öса бькьн кö ньһерʹандьна мә һьндава хәбате у тьштед рʹöһʹани, рʹаст бә? Кʹижан ә шьхöле мәйи лапи фәрз? Wәрә әм пешийе бьньһерʹьн мәсәлед Йаһоwа Хwәде у Иса Мәсиһ, кʹижан кö хәбатчийе һәри мәзьн ьн ль сәр тʹәмамийа әʹрд у әʹзмен.

ХӘБАТЧИ У ҺОСТАЙЕ ҺӘРИ МӘЗЬН

4, 5. Ча жь Кʹьтеба Пироз те кʹьфше, кö Йаһоwа хәбатһʹьз ә?

⁴ Йаһоwа хәбатчийе һәри мәзьн ә. Дь Дәстпебун 1:1 да те готьне wәки «дь дәспекеда Хwәде әʹзман у әʹрд афьрандьн». Чахе Хwәде әʹфьрандьна дьнйайе хьлаз кьр әwи öса гот: «Заһф qәнщ» (Дәстпәбун 1:31). Бешьк әw зәʹф рʹази бу жь wан һʹәму тьшта чь кö ль сәр әʹрде әʹфьрандьбу. Йаһоwа, «Хwәдейе хwәзьли» йә у әwи шабунәкә мәзьн сьтанд жь шьхöле хwә (1 Тимотʹейо 1:11).

⁵ Хwәдейе мәйи хәбатһʹьз, хәбата хwә тʹö щар надә сәкьнандьне. Гәләк wәхт паши әʹфьрандьна дьнйайе у һʹәму тьштед ль сәр, Иса гот: «Баве мьн һʹәта ньһа шьхöле хwә дькә» (Йуһʹәнна 5:17). Ле гәло Бав чь дькьр? Әwи жь әʹзмана рʹебәри дьда мәрийа у бона wан хәм дькьр. Паше әwи öса кьр кö һьнә Мәсиһи бькарьбьн ль әʹзмана бьжин, wәки тʹәви Иса сәрwертийе бькьн, демәк Хwәде «әʹфьринәки ну» чекьр (2 Корьнтʹи 5:17). Әwи һʹәму тьшт кьр, сәва кö нета хwәйә дәрһәqа мәрийа бинә сери, wәки кʹи кö wи һʹьз дькә, жийина һʹәта-һʹәтайе дьнйа тʹәзәда бьстинә (Рʹомайи 6:23). Йаһоwа шабуне дьстинә чахе ахьрийа хәбата хwә дьвинә. Бь милйона мәрьв гöһ дьдьнә мьзгинийа Пʹадшатийе у хwә дьгöһезьн, сәва кö бьминьн нава һʹьзкьрьна Хwәдеда (Йуһʹәнна 6:44).

6, 7. Чьма әм дькарьн бежьн кö Иса хәбатһʹьз ә?

⁶ Иса жи мәсәла хәбатһʹьзийе йе. Пешийа һатьна сәр әʹрде, әw щәм Хwәде «сәр һостәйи» бу у бь аликʹарийа wи «һәр тьштед ль әʹрд у әʹзмана әʹфьринә» (Мәтʹәлок-8:22-31; Колоси 1:15-17). Иса чахе ль сәр әʹрде дьжит, әwи диса бәрдәwам дькьр бь дьл дьхәбьти. Әw зарʹотийа хwәда пʹешә һин бу у бу нәщарәки әʹйан (Марqос 6:3). a Сәва ве хәбате, лазьм бу кö Иса дәстпʹешә буйа у бона хәбата гьран һазьр буйа, чьмки wи чахи чәтьн бу дара дәст хьн. Öса жи һьнге тʹöнәбун бьрʹәкед бь токе у һащәтед майин, нә жи дькʹан бона нәщартийе. Бьдә бәр чʹәʹве хwә, Иса ча жь мешә дара дьбьрʹә у тинә щийе хәбата хwә, у ча мала, дәрийа у навмала чедькә. Иса бь шьхöле хwә заньбу, кö хәбата бь дьл шабуне тинә.

⁷ Иса хьзмәткьрьна хwә жи бь дьл у щан дькьр. Әwи се сал у нива һʹәму qәwата хwә дабу ви шьхöла фәрз. Сәва кö мьзгинийа хере чьqас кö те сьтандьн бьгьһинә гәләк мәрьва, әwи шәбәqе зу һʹәта евара дәрәнг, мьзгинийе бәла дькьр (Луqа 21:37, 38; Йуһʹәнна 3:2). Әw «гöнд у бажара дьгәрʹийа, даннасин дькьр Мьзгинийа Пʹадшатийа Хwәде дьда» ( Луqа 8:1). Иса сәва кö мьзгинийа хере бьгьһинә мәрийа, бь сәда километьр рʹейед тʹоз у халирʹа ньга дьчу.

8, 9. Иса ча шабун дьстанд жь хәбата хwә?

⁸ Гәло Иса шабун дьдит жь хьзмәта хwәйә бь дьл? Һьлбәт әре! Әwи тʹохьме рʹастийе дьрʹәшанд у дьдит кö дәшт гьһиштьнә бона дьруне. Иса жь хьзмәта хwә qәwатәкә öса дьстанд кö нанхwарьн жи бира дькьр (Йуһʹәнна 4:31-38). Бьдә һʹәсабе хwә кö Иса жь хьзмәта хwә öса рʹази бу, wәки әwи хьлазийа хьзмәткьрьна хwә йа ль сәр әʹрде, баве хwәрʹа гот: «Мьн тö ль сәр рʹуйе әʹрде рʹумәт кьри, әw шьхöле тә дабу мьн кö әз бькьм мьн ани сери» (Йуһʹәнна 17:4).

⁹ Йаһоwа у Иса бь рʹасти шабуне дьвиньн жь кʹәда хwә у мәсәлед баш ьн бона мә. Һʹьзкьрьна мә һьндава Йаһоwа мә һелан дькә кö «чʹәʹв бьдьнә» wи (Әфәси 5:1). Ле һʹьзкьрьна һьндава Иса мә һелан дькә, кö әм «пʹегәһа wида һәрʹьн» (1 Пәтрус 2:21). Wәрә әм бьньһерʹьн кö ча әм жи дькарьн жь хәбата хwә шабуне бьстиньн.

ЧА ШАБУНЕ БЬСТИНЬН ЖЬ ХӘБАТА ХWӘ

10, 11. Чь wе али тә бькә, сәва кö хwә бьгöһези һьндава хәбате?

¹⁰ Жийина Мәсиһийада бона хәбате жи щи һәйә. Әм гьшк жи дьхwазьн жь хәбате шабуне бьстиньн, ле әв йәк һеса нинә, илаһи чахе әм хәбатәкә öса дькьн, кʹижан кö мә хwәш найе. Дәрәща öсада wе чь али мә бькә?

¹¹ Һьндава хәбате хwә бьгöһезә. Рʹаст ә әм нькарьн дәрәщед хwә бьгöһезьн, ле әм дькарьн ньһерʹандьна хwә бьгöһезьн. Сәва ве йәке лазьм ә әм бьфькьрьн һәла ньһерʹандьна Хwәде һьндава хәбате чь щурʹәйи йә. Мәсәлә, һәрге тö малхе мале йи, дьбәк хәбата тә гьран ә у тә хwәш найе, ле бир нәкә кö тö бь ве хәбате малбәта хwә хwәйи дьки. Йаһоwа пʹьрʹ qимәт дькә wан мәрьва, кʹи кö хәм дькә бона малбәта хwә. Хәбәра wида те готьне «һәгәр мәрьвәк ... бона мала хwә хәм накә, әwи баwәри инкʹар кьрийә у жь нәбавәра жи хьрабтьр ә» (1 Тимотʹейо 5:8). Демәк, хәбата тә чьqас жи гьран бә, чахе тö фәʹм ки кö бь хәбата хwә, тö тини сери wи борщи кʹижан кö Хwәде жь тә дәʹwа дькә, әв фькьр wе али тә бькә кö хәбат тәрʹа һʹәwас бә у wе бинә бира тә кö чьма тö дьхәбьти. Бь ве йәке те щöда би жь һәвалхәбатчийе хwә.

12. Чь кʹаре тинә шьхöлкʹари у дьлпʹаки?

¹² Шьхöлкʹар у дьлпʹак бә. Һәрге әм шьхöлкʹар бьн, у һин бьн кö хәбата хwә рʹьнд бькьн әw йәк дькарә бәре баш бинә. Хәбатчийед öса тʹьме гәләк тенә qимәткьрьне (Мәтʹәлок 12:24; 22:29). Әм ча Мәсиһийед рʹаст гәрәке хәбатеда дьлпʹак бьн, нәдьзьн пʹәра, wәʹдә у тьшта (Әфәси 4:28). Сәре 14-да әм пеһʹәсийан, кö дьлпʹаки кʹаре тинә. Һәрге әм дьлпʹак бьн, мәзьне хәбате, wе гәләк тьштада амьнийа хwә мә бинә. Ле һәрге әw дьлпʹакийа мә qәт тʹәхмин нәкә жи, йәке исафа мә wе тʹәмьз бә у әме ша кьн дьле Хwәде, кʹижани кö әм һʹьз дькьн (Ибрани 13:18; Колоси 3:22-24).

13. Рʹабун-рʹуньштандьна мәйә баш wәʹде хәбате wе чь кʹаре бинә?

¹³ Хwәде һöрмәт кә пе рʹабун-рʹуньштандьна хwә. Һәрге әм дь хәбатеда бь принсипе Ньвисаред Пироз рʹебәри бьн, әв йәк wе әʹсәйи бе тʹәхминкьрьне. У бь wе йәке әме «һинкьрьна . . . Хьлазкьре мә Хwәде, һәр алийава бьхәмьлиньн» (Тито 2:9, 10). Бәле, мәрьв кö бьвиньн рʹабун-рʹуньштандьна мәйә баш, wе фәʹм бькьн кö чьqас баш ә религийа мә у wе бьхазьн һе зедә дәрһәqа рʹастийе пебьһʹәсьн. Шабунәкә чьqас мәзьн тöйе бьстини, һәрге һәвалхәбатчики тә бь сайа рʹабун-рʹуньштандьна тә, бьхwазә дәрһәqа рʹастийе бьзаньбә! Һе зедә шабун әw ә, кö тöйе бь шьхöле хwәйи баш Йаһоwа рʹумәт ки у дьле wи ша ки. (Бьхунә Мәтʹәлок 27:11; 1 Пәтрус 2:12.)

ПЕШИЙА КÖ ХӘБАТЕ БЬЖБЕРИ КʹУР БЬФЬКЬРӘ

14-16. Чахе әм сафи дькьн кö кʹидәре бьхәбьтьн, гәрәке дәрһәqа кʹижан пьрсед фәрз бьфькьрьн?

¹⁴ Дь Кʹьтеба Пирозда конкрет найе готьне, кö кʹижан хәбат Мәсиһи гәрәке qәбул кә, у кʹижан на. Ле әwа найе һʹәсабе кö әм дькарьн һәр щурʹә хәбат бькьн. Кʹьтеба Пироз wе али мә бькә, кö әм хәбата öса керһати бьжберьн кʹижан кö Хwәде хwәш те, у wан хәбата нәкьн кʹижан кö wи хwәш найе (Мәтʹәлок 2:6). Чахе әм сафи дькьн кö кʹидәре бьхәбьтьн, лазьм ә дәрһәqа дö пьрсед фәрз бьфькьрьн.

¹⁵ Әв хәбат нәбә мәʹни, кö әм мәщбур бьн мьqабьли qанунед Кʹьтеба Пироз бькьн? Дь Кʹьтеба Пирозда те сущдаркьрьне дьзи, дәрәw у чекьрьна пʹута (Дәркʹәтьн 20:4; Кʹаред Шандийа 15:29; Әфәси 4:28; Әʹйанти 21:8). Кʹи кö Хwәде һʹьз дькә wе инкʹар кә wан һʹәму хәбата, кʹидәре кö те дәʹwакьрьне, кö мьqабьли qанунед Хwәде бькьн. (Бьхунә 1 Йуһʹәнна 5:3.)

¹⁶ Һәрге әм әве хәбате бькьн, әме тʹәви wан шьхöла нәбьн, кʹижан кö мьqабьли принсипед Кʹьтеба Пироз ьн? Мәсәлә, тьштәки хьраб тʹöнә wе йәкеда кö әм хәбата тʹәмьзкьрьне бькьн. Ле дьбә кö әм әве хәбате бькьн нәхwәшханәкә öсада, кʹидәре кö зарʹбәркьрьне дькьн? Рʹаст ә хәбатчийе кö тʹәмьз дькә, әw хwәха зарʹбәркьрьне накә. Ле әw, ча бежи тʹәви wи шьхöли дьбә, кʹижан кö Кʹьтеба Пироз qәдәхә дькә, öса нинә? (Дәркʹәтьн 21:22-24). Әм нахwазьн тʹәви wан шьхöла бьн, йед кö Кʹьтеба Пироз qәдәхә дькә, чьмки әм Йаһоwа һʹьз дькьн.

17. (а) Чь гәрәке һьлдьн һʹәсаб пешийа бьжартьна хәбате? (Бьньһерʹә чаргоша «Әз әве Хәбате Бькьм йан На?»). (б) Исафа мә ча дькарә али мә бькә, wәки öса сафи кьн, ча кö Хwәде хwәш те?

¹⁷ Әме рʹаст сафи кьн пьрсед дәрһәqа жьбартьна хәбате, һәрге бьфькьрьн сәр дö пьрсед фәрз кʹижан кö ньвисар ьн абзаса 15 у 16 да. Хенщи wә йәке, пешийа жьбартьна хәбате лазьм ә һьлдьн һʹәсаб һьнә тьштед майин жи.b Әм гәрәке һивийе нибьн кö хöламе амьн бона һәр дәрәщәкә, qануна бьдә. Әм гәрәке хwәха кʹур бьфькьрьн. Ча әм жь сәре 2 пеһʹәсийан, лазьм ә исафа хwә һин кьн кö принсипед Кʹьтеба Пироз жийина хwәйи һәр рʹожида бьдьнә хәбате. Бь wе йәке әме «тегьһиштьна» хwә һин кьн, wәки сафикьрьнед öса бькьн, йед кö Хwәде хwәш те у бьминьн нава һʹьзкьрьна wида (Ибрани 5:14 ИМ).

НЬҺЕРʹАНДЬНА РʹАСТ ҺЬНДАВА ХӘБАТЕ

18. Чьма һеса нинә рʹöһʹанида qәwи бьсәкьньн?

¹⁸ Wан «рʹожед ахьрийеда» рʹöһʹанида qәwи бьсәкьньн нә öса һеса йә, илаһи wи «зәманед хьраб» да (2 Тимотʹейо 3:1). Һеса нинә хәбате бьвини у öнда нәки. Ча Мәсиһийед рʹаст әм фәʹм дькьн кö чьqас фәрз ә бь дьл у щан бьхәбьтьн, сәва малбәта хwә хwәйи кьн. Ле һәрге әм фәсал нибьн у бьһельн кö щийе хәбате ньһерʹандьна мәрийа йан жи рʹöһʹе пʹәрәһʹьзийе сәр мә һʹöкöм бә, әw йәк wе зийане бьдә рʹуһʹанийа мә (1 Тимотʹейо 6:9, 10). Wәрә ньһа әм бьньһерʹьн ча ньһерʹандьна рʹаст хwәйи кьн, у wе йәке бьжберьн «кʹижан һәрә qәнщ ә» (Филипи 1:10).

19. Чьма Йаһоwа һежа йә, кö әм бь тʹәмами амьнийа хwә wи биньн у бь сайа ве амьнийе әме чь нәкьн?

¹⁹ Итʹбарийа хwә Йаһоwа бинә. (Бьхунә Мәтʹәлок 3:5, 6.) Әw һежа йә кö әм амьнийа хwә wи биньн, чьмки әw хәм дькә бона мә (1 Пәтрус 5:7). Әw мә рʹьндтьр занә кö әм һʹәwще чь нә у дәсте wи кьн нинә кö али мә бькә (Зәбур 37:25). Ләма жь wе баш бә, кö гöһ бьдьн у бир нәкьн ван гьлийе wи: «Пʹәрәһʹьзи бьра нава жийина wәда щи нәгьрә у дәстед wәда чьqас һәйә, рʹази бьн, чьмки Хwәде гот: ‹Әзе тʹö щар жь тә нәчьм у тʹö щар тә бәрʹнадьм›» (Ибрани 13:5). Гәләк хьзмәткʹаред һәртʹьм сәр хwә тʹәхмин кьрьнә кö Йаһоwа дькарә бьдә мә әwан һʹәму тьшта, чь кö мәрʹа лазьм ә. Һәрге әм бь тʹәмами итʹбарийа хwә Йаһоwа биньн у бир нәкьн кö әw хәм дькә бона мә, әме гәләки бәрхwәнәкʹәвьн сәва wе йәке, кö малбәта хwә ча хwәйи кьн (Мәтта 6:25-32). Әме нәһельн кö хәбата ве дьнйайе рʹийа мә бьгьрә сәва шьхöлед рʹöһʹани бькьн, йед öса ча бәлакьрьна мьзгинийе у чуйина сәр щьвате (Мәтта 24:14; Ибрани 10:24, 25).

20. Чь те һʹәсабе чʹәʹве хwә пʹак хwәйи кьн у әм ча дькарьн бь жийина һеса бьжин?

²⁰ Чʹәʹве хwә пʹак хwәйи кә. (Бьхунә Мәтта 6:22, 23.) Әw те һʹәсабе кö бь жийина һеса бьжин. Мәсиһийед кö чʹәʹве хwә пʹак хwәйи дькьн, нета wанә сәрәкә әw ә, wәки хwәстьна Хwәде бьqәдиньн. Һәрге әм һʹьш у аqьле хwә бьдьнә сәр wе нете, әме нәфькьрьн дәрһәqа wе йәке, кö хәбата öса дәстхьн wәки пʹәра зәʹфи бьстиньн, йан жи дәрһәqа жийина дәwләмәндти. У öса жи әме нәкʹәвьнә һʹәйра wе йәке, кö дәстхьн тьштед тʹәзәдәркʹәти, кʹижан кö реклам дькьн, wәки мәрийа бьдьнә баwәркьрьне кö йан чь әw тьшт лазьм ә бона бәхтәwарбуне. Ча әм дькарьн чʹәʹве хwә пʹак хwәйи кьн? Бадиһәwа хwә нәкьнә бьн дәйна. Тьштед öса нәкʹьрʹьн кö гәләк wәʹдә у qәwат лазьм бә. Гöһ бьдьнә әван тʹәмийед Кʹьтеба Пироз: «Кʹьнщ у хöрәке мә һәбьн, бь wан әм рʹази бьн» (1 Тимотʹейо 6:8). Чьqас дькари öса бькә кö жийина хwә һеса ки.

21. Чьма фәрз ә кö әм сафи кьн чь гәрәке дайньн щийе пешьн, у жийина мәда тьштед лапи фәрз чь нә?

²¹ Хwә нетед рʹöһʹанива бьгьрә. Чьмки найе стандьне, кö әм һʹәму тьштирʹа бьгьһиньн, ләма жи әм гәрәке сафи кьн кö чь дайньн щийе пешьн. Һәрге әм öса нәкьн, тьштед нәфәрз дькарьн wәʹде qимәт мә бьстиньн у шьхöле зәʹф фәрз пашкʹәвьн. Ле жийина хwәда әм гәрәке чь дайньн щийе пешьн? Ве дьнйайеда гәләк мәрьв кʹьфш дькьн, кö һинбуна бьльнд гәләк фәрз ә, сәва кö qöльха бьльндда щи бьгьрьн. Ле Иса һелан да шагьртед хwә: «Ле бәре пешьн...Пʹадшатийа Хwәде бьгәрʹьн» (Мәтта 6:33). Әм ча Мәсиһийед рʹаст, Пʹадшатийа Хwәде дьдьнә щийе пешьн. Гәрәке жь жийина мә, сафикьрьнед мә, нет-фькьр у шьхöлед мә, бе кʹьфше, кö әм хьзмәткьрьна хwә Хwәдерʹа, сәр һʹәму тьштирʹа дьгьрьн.

БЬ ХИРӘТ ХЬЗМӘТ КӘ

22, 23. (а) Бона Мәсиһийед рʹаст кʹижан шьхöл лапи фәрз ә, у әм ча дькарьн әwе йәке бьдьнә кʹьфше? (Бьньһерʹә чаргошә «Бь сайа Сафикьрьна Хwә Әз бь Жийинәки ша у Бәхтәwар Дьжим»). (б) Әм гәрәке ча бьн һьндава хәбата ве дьнйайе?

²² Әм заньн wәки әм рʹожед ахьрийеда дьжин, ләма жь әм һʹьш аqьле хwә дьдьнә сәр шьхöле лапи фәрз, демәк бәлакьрьна мьзгинийе у чахе шагьрта һазьр дькьн (Мәтта 24:14; 28:19, 20). Wәк Иса, әм жи дьхwазьн бь хирәт хьзмәт кьн. Әм ча дькарьн бьдьне кʹьфше кö әw шьхöл бона мә фәрз ә? Гәләк хьзмәткʹаред Хwәде бь меркʹими шьхöле бәлакьрьна мьзгинийе дькьн. Һьнәк шьхöле хwә öса сафи дькьн, wәки хьзмәт кьн ча пешәнге һәртʹьм йан жи мисийонер. Гәләк де-бав фәʹм дькьн, кö чьqас фәрз ә нетед рʹöһʹани бьдьнә пешийа хwә, у зарʹед хwә һелан дькьн, wәки хьзмәт кьн ча пешәнге һәртʹьм. Гәло мьзгинване хирәт бәре баш дьвиньн хьзмәта меркʹимида? Бешьк! Тʹәне хьзмәткьрьна мәйә бь дьл у щан Йаһоwарʹа, жийина мә бәхтәwар дькә, мә ша дькә у кʹәрәмед һʹәта-һʹәтайе тинә. (Бьхунә Мәтʹәлок 10:22.)

²³ Гәләк жь мә, сәва кö малбәта хwә хwәйи кьн, гәрәке зәʹф бьхәбьтьн. Бинә бира хwә кö Йаһоwа дьхwазә wәки әм шабуне бьстиньн жь хәбата хwә. Һәрге ньһерʹандьна мә һьндава хәбате мина ньһерʹандьна Хwәде бә, у әм принсипед wи бьqәдиньн, әме бькарьбьн жь хәбата хwә шабуне у ләзәте бьбиньн. Wәрә әм тʹö щар нәһельн кö хәбата ве дьнйайе, мә жь шьхöлед фәрз дур хә, демәк жь бәлакьрьна мьзгинийа хере дәрһәqа Пʹадшатийа Хwәде. Һәрге әм wан шьхöла дайньн щийе пешьн жийина хwәда, әме бьдьнә кʹьфше, кö Йаһоwа һʹьз дькьн, у бь wе йәке әме нава һʹьзкьрьна wида бьминьн.