Иса Тʹьме Гöһдар бу

Һеса йә һәр гав гöра де-баве хwә бьки?~ Щарна һеса нинә. Ле ча тö дьшьрмиш дьби Иса гöра кʹе дькьр?~ Әwи гöра Йаһоwа у де-баве хwә дькьр. Мәсәла Иса дькарә али тә бькә, wәки тö һәла һе һьнге жи гöра де-баве хwә бьки, чахе әв йәк һеса нинә. Wәре әм һе зедә дәрһәqа ве йәке пебьһʹәсьн.

Һʹәта кö Иса ль сәр әʹрде бьһата буйине, әw тʹәви Баве хwә Йаһоwа, дь әʹзманда бу. Ле ль сәр әʹрде жи де-баве wи һәбун. Навед wан Усьв у Мәрйәм бу. Ле тö зани әwана чаwа бунә де-баве Иса?~

Йаһоwа әʹмьре Иса жь әʹзман һьлда у дәрбази зьке Мәрйәме кьр. Öса Иса ль сәр әʹрде һатә буйине. Әв йәк кʹәрәмәт бу! Чаwа кö зарʹ зьке дийа хwәда мәзьн дьбьн, öса жи Иса зьке Мәрйәмда мәзьн дьбу. Нәһ мәһ дәрбаз бун, у Иса һатә буйине. Öса Мәрйәм у Усьв бунә де-баве Иса.

Чахе Иса 12 сали бу, әwи тьштәки öса кьр, йа кö да кʹьфше wәки әw гәләк Баве хwә Йаһоwа һʹьз дькә. Әв йәк qәwьми wи чахи, гава Иса у малбәта wи, рʹе кʹәтьн сәва кö һәрʹьн Оршәлиме. Әwана дьчунә Оршәлиме сәва кö ль wьр Йаһоwарʹа qöльх кьн. Ле чахе әwана вәдгәрʹийан мале, Усьв у Мәрйәм тʹö щики нькарьбун Иса бьдитана. Зани Иса кʹидәре бу?~

Усьв у Мәрйәм гәләк ләз дькʹәтьн чахе жь Оршәлиме вәдьгәрʹийан мал. У чахе Иса öнда кьрьн, дәстпекьрьн һʹәму щийа әwи бьгәрʹьн. Әwана гәләк бәрхwә дькʹәтьн чьмки нькарьбун әw бьдитана. Ле се рʹож шунда, wана Иса дь пʹәрстгәһеда дит! Ча тö дьшьрмиш дьби, Иса чьрʹа дь пʹәрстгәһеда бу?~ Чьмки wе дәре әwи дькарьбу һе зедә дәрһәqа Баве хwә Йаһоwа пебьһʹәсийа. Иса гәләк Йаһоwа һʹьз дькьр у дьхwәст пебьһʹәсийа кö ча дькарьбу дьле wи ша кьра. Һәла һе чахе Иса мәзьн бу жи, әwи һәр гав гöра Йаһоwа дькьр. Исарʹа тʹьме һеса нибу гöра Баве хwә бькә, ле йәкә әw гöра wида бу. Һәла һе һьнге жи әw гöһдар бу, гава гәрәке бьчәрчьрийа. Ле Иса гöра Усьв у Мәрийәме жи дькьр?~ Бәле. Дь Кʹьтеба Пирозда ньвисар ә wәки Иса wанарʹа жи гöһдар бу.

Чь тö дькари жь мәсәла Иса һин би?~ Тö гәрәке гöра де-баве хwә бьки, һәла һе һьнге жи чахе тәрʹа һеса нинә. Тöйе гöра де-баве хwә бьки?~