Тимотʹейо хортәки щаһьл бу у әԝи бь шабун али мәрьва дькьр. Әԝ дькʹәтә рʹе у дьчу гәләк щийа, сәва кӧ али мәрьва бькә. У жь бо ве йәке әʹмьре ԝи гәләк һʹәԝас дәрбаз дьбу. Тӧ дьхԝази дәрһәԛа әʹмьре Тимотʹейо һе зедә пебьһʹәси?—

Тимотʹейо шәһәре Листрайеда мәзьн дьбу. Чахе әԝ һе зарʹ бу, пирька ԝи Лойис у дийа ԝи Әйньке, дәрһәԛа Йаһоԝа әԝ һин дькьрьн. Чахе Тимотʹейо мәзьн бу, әԝи хԝәст али мәрьва бькә, ԝәки әԝана дәрһәԛа Йаһоԝа пебьһʹәсьн.

Чахе Тимотʹейо һе гәләк щаһьл бу, Паԝлос әԝ тʹәглиф кьр кӧ әԝ тʹәви ԝи бькʹәвә рʹеԝитийе у щурʹә-щурʹә щийада хьзмәт бькьн. Тимотʹейо гот: «Бәле!» Ча те кʹьфше, Тимотʹейо һазьр бу тʹәви Паԝлос бьчуйа у али мәрьва бькьра.

Тимотʹейо тʹәви Паԝлос рʹе кʹәт у чу Макәдонйайе ль шәһәре Тʹесалонике. Сәва бьгьһиштана ԝи щийи, әԝана гәләк рʹе чун у паше жи пе ԛәйике чун. Чахе әԝана гьһиштьнә щи, дәстпекьрьн али гәләк мәрьва бькьн, ԝәки дәрһәԛа Йаһоԝа пебьһʹәсьн. Ле һьнә мәри гәләк сәр ԝан һерс кʹәтьбун, у дьхԝәстьн зийане жи бьдана ԝан. Ләма жи Паԝлос у Тимотʹейо жь ви шәһәри дәркʹәтьн у чун щийед дьн хьзмәт бькьн.

Чәнд мәһ дәрбаз бун у Паԝлос готә Тимотʹейо, кӧ әԝ вәгәрʹә шәһәре Тʹесалонике у пебьһʹәсә, ԝәки һʹале бьра ԝедәре чаԝа нә. Бь рʹасти жи мерхаси лазьм бу, ԝәки диса һәрʹи ԝи шәһәри, кʹидәре кӧ дьхԝазьн зийане бьдьнә тә! Ле йәкә Тимотʹейо чу ви шәһәри, чьмки әԝ бәр хԝә дькʹәт сәва ԝан бьра, йед кӧ ви шәһәрида дьжитьн. Чахе Тимотʹейо жь Тʹесалонике вәгәрʹийа, әԝи мьзгини Паԝлосрʹа ани. Демәк һʹале ԝан бьра, йед кӧ Тʹесалоникеда бун, баш бу!

Тимотʹейо гәләк сал тʹәви Паԝлос шьхӧлкʹари дькьр. Щарәке Паԝлос ньвиси, кӧ Тимотʹейо мәрики гәләк баш бу, кʹижани кӧ әԝи дькарьбу бьшанда щийа, ԝәки али щьвата бькә. Тимотʹейо Йаһоԝа у мәрьв һʹәз дькьрьн.

Ле тӧ мәрьва һʹәз дьки, у дьхԝази али ԝан бьки кӧ дәрһәԛа Йаһоԝа пебьһʹәсьн?— Һәрге тӧ ӧса бьки, ԝе әʹмьре тә жи мина йе Тимотʹейо гәләк бь шабун у һʹәԝас бә!

Һәла тӧ дькари бежи, әм дәрһәԛа кʹижан Пʹадшатийе хәбәр дьдьн?— Әре, әв Пʹадшатийа Хԝәде йә. У әв Пʹадшати ԝе әʹрде бькә щьнәт. Тӧ дьхԝази дәрһәԛа ве Пʹадшатийе һе зедә пебьһʹәси?—

Һәр пʹадшатийеда һәйә пʹадша. У пʹадша сәр щьмәʹта хԝә, әʹрде хԝәда пʹадшатийе дькә. Ле тӧ зани, ԝәки Пʹадшатийа Хԝәдеда кʹи йә пʹадша?— Иса Мәсиһ. Әԝ сәр әʹзмана йә. У зутьрәке әԝе сәр һʹәмуйа бьбә пʹадша! Ле ча тӧ дьфькьри, чахе Иса сәр тʹәмамийа дьнйайе пʹадшатийе бькә, һьнге әме бәхтәԝар бьн?—

Бәле, әме гәләк бәхтәԝар бьн! Щьнәтеда мәри тʹәви һәв ԝе шәрʹ нәкьн. Һәр кәс ԝе һәвдӧ һʹәз бькьн. Тʹӧ кәс ԝе ида нәхԝәш нәкʹәвә у нә жи бьмьрә. Чʹәʹве кора ԝе вәбьн, кәрʹ ԝе бьбьһен. У әԝед кӧ нькарьн рʹе һәрʹьн, ԝе бькарьбьн рʹе һәрʹьн у бьрʹәвьн. Хԝарьна һәр кәси ԝе тʹер тʹьжә бә. Һʹәйԝан ԝе һәврʹа бьлизьн, у әме жи тʹәви ԝан бьлизьн. Әԝ мәри йед кӧ мьрьнә, ԝе диса вәгәрʹьн жийине. Те бира тә, жь ве брошуре тә дәрһәԛа гәләк мер у жьна пеһʹәсийайи. Мәсәлә, Рʹевека, Рʹәхаб, Даԝьд у Елйас. Тӧ зани ԝәки әԝана жи ԝе жь мьрьне рʹабьн! Ле чахе әԝана жь мьрьне рʹабьн, тӧ дьхԝази ԝана бьвини?—

Йаһоԝа тә һʹәз дькә у дьхԝазә, ԝәки тӧ бәхтәԝар би. Һәрге тӧ бәрдәԝам ки дәрһәԛа Йаһоԝа пебьһʹәси у тʹьме гора ԝи бьки, тӧйе бькарьби щьнәта бәдәԝда һʹәта-һʹәтайе бьжи!Тӧ дьхԝази щьнәтеда бьжийи?—