ПʹАРА 5
Вәгәрʹә щәм «Шьван у Сәʹвийе Рʹӧһʹе Хԝә»
Дьԛәԝьмә тәрʹа жи нас ьн әԝ чәтьнайи, дәрһәԛа кʹижана ԝе брошуреда те готьне? Һәрге әре, тӧ тʹәне нини. Хьзмәткʹаред Йаһоԝайә амьн, йед ԝәʹде бәре у йед ԝәʹде мә жи, рʹасти ԝе йәке һатьнә. Йаһоԝа али ԝан кьрийә, у әԝе ӧса жи али тә бькә.
Һәрге тӧ сафи ки вәгәрʹи щәм Йаһоԝа, әԝе тʹьме пьштгьрийа тә бькә
БАԜӘР БӘ, һәрге тӧ сафи ки вәгәрʹи щәм Йаһоԝа, әԝе тʹьме пьштгьрийа тә бькә. Әԝе али тә бькә хәмед тә сьвьк бьн, еш жь дьле тә дәре, дьлрʹьһʹәт би у бь исафа тʹәмьз пешда һәрʹи. У ԝи чахи хԝәстьна тә, кӧ тʹәви хушк-бьра Йаһоԝарʹа хьзмәт ки, дькарә диса пешда бе. Дәрәщед тә жи дькарьн мина дәрәщед Мәсиһийед ԛьрна йәке бьн, кʹижанарʹа Пәтрус ньвиси: «Һун мина пәзед хальфи бун, ле ньһа һун ль Шьван у Сәʹвийе рʹӧһʹе хԝә вәгәрʹийанә» (1 Пәтрус 2:25).
Сафикьрьна лапә баш әԝ ә, кӧ вәгәрʹьнә щәм Йаһоԝа. Гәло чьрʹа? Чьмки ӧса тӧйе дьле Йаһоԝа ша ки (Мәтʹәлок 27:11). Чаԝа әм заньн һәстед Йаһоԝа һәнә, у әԝ бетʹалаш нинә һьндава ԝе йәке, ча әм хԝә дьдьнә кʹьфше. Ӧса жи әм заньн, ԝәки Йаһоԝа зоре мә накә, кӧ ԝи һʹьз бькьн у ԝирʹа хьзмәт кьн (Ԛануна Дӧщари 30:19, 20). Зандарәки Кʹьтеба Пироз ӧса гот: «Дәре дьле мәрьва нә кӧ дәрвава вәдьбә, ле һьндӧрва вәдьбә». Чахе дьле мә бь һʹьзкьрьна һʹәлал һьндава Йаһоԝа тʹьжә дьбә, ԝи чахи әм хԝәха дәре дьле хԝә вәдькьн. Гава әм ӧса дькьн, әм Йаһоԝарʹа пʹешкʹешәкә ԛимәт дьдьн, демәк амьнийа хԝә, йа кӧ шабунәкә мәзьн дькә дьле ԝи. Бь рʹасти жи тʹӧ тьшт нькарә шабунәкә ӧса мәзьн мәрʹа бинә, ча әԝ йәк кӧ бь тʹәмамийа дьле хԝә Йаһоԝарʹа хьзмәт кьн, йе кӧ һежайи ԝе йәке йә (Кʹаред Шандийа 20:35; Әʹйанти 4:11).
Хенщи ԝе йәке, чахе тӧ диса вәгәрʹи хьзмәтийа хԝә, тӧйе һʹәԝщәтийа хԝәйә рʹӧһʹани рʹази ки (Мәтта 5:3). Чь щурʹәйи? Мәрьв нав тʹәмамийа дьнйайеда пьрсәкә ӧса дьдьн: «Чьрʹа әм дьжин?» Әԝана һʹәԝще ԝе йәке нә, кӧ бьстиньн щаба пьрсед ӧса, йед кӧ әʹмьрва гьредайи нә. Әԝ һʹәԝщәти Йаһоԝа кьрийә дьлԛе ԝан. У әԝи мә ӧса әʹфьрандийә, ԝәки хьзмәткьрьна ԝирʹа рʹьһʹәтийе мәрʹа тинә. Тʹӧ тьшт бәрамбәри ԝе шабуне набә, йа кӧ әм сәр хԝә тʹәхмин дькьн, чахе бь һʹьзкьрьне Йаһоԝарʹа хьзмәт дькьн (Зәбур 63:1-5).
Һиви дькьн, бир нәкә дәрһәԛа ԝе йәке, кӧ Йаһоԝа дьхԝазә, ԝәки тӧ пашда вәгәрʹи щәм ԝи. Ле чьма тӧ дькари ԝе йәкеда дӧдьли нәби? Бьфькьрә: Әԝ брошур бь сайа гәләк дӧакьрьна һатийә сазкьрьне. Дьԛәԝьмә тә әԝ брошур жь рʹуспийа станд йан жь Мәсиһийед дьн. Хԝәстьна тә һәбу бьхуни, тә хԝәнд у әԝ йәк дьле тә гьрт. Әԝ һәр тьшт избат дькә, ԝәки Йаһоԝа тә бир нәкьрийә. Ле әԝ бь дьлгәрмийе тә һелан дькә, диса вәгәрʹи щәм ԝи (Йуһʹәнна 6:44).
Әԝ фькьр, кӧ Йаһоԝа тʹӧ щар бәрхед хԝәйә ӧндабуйи бир накә, мә дьлгәрм дькә. Һәма әԝ йәк хушка бь наве Донна сәр хԝә тʹәхмин кьрийә, әԝ дьбежә: «Әз һеди-һеди жь Йаһоԝа дур кʹәтьм, ле әз һәртʹьм дьфькьрим дәрһәԛа хәбәред жь Зәбур 139:23, 24: ‹Мьн әʹнәнә кә, Хӧдано, дьле мьн заньбә, мьн бьщерʹьбинә у фькьред мьн бьзаньбә. Дина хԝә бьде, ха әз нә рʹийа хьрабда мә, рʹийа һʹәта-һʹәтайеда рʹебәрийа мьн бькә›. Мьн тʹәхмин дькьр, ԝәки әв дьнйа бона мьн хәриб ә. Мьн тʹӧ щар хԝә ве дьнйайеда рʹьһʹәт тʹәхмин нәдькьр у мьн фәʹм дькьр, ԝәки щийе мьн тʹәшкиләта Йаһоԝада йә. Мьн заньбу, ԝәки Йаһоԝа әз нәһиштьмә, ләма жи мьнрʹа лазьм бу бьвиньм әԝ рʹе, йа кӧ дьбә бәрбь ԝи. У әз ша мә, ԝәки мьн әԝ рʹе дит!»
«Мьн заньбу, ԝәки Йаһоԝа әз нәһиштьмә, ләма жи мьнрʹа лазьм бу бьвиньм әԝ рʹе, йа кӧ дьбә бәрбь ԝи»
Әм бь дьл у щан дӧа дькьн, ԝәки тӧ диса жи «шабунийа Хӧдан» бьвини (Нәһәмийа 8:10). Тӧйе тʹӧ щар пʹошман нәби, ԝәки вәгәрʹийайи щәм Йаһоԝа.