Кани бона «Бәрнама Щьвине, Бьжин у Хьзмәт кьн»
5-11 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 31-32
«Жь Пʹутпʹарьстийе Бьрʹәвьн»
(Дәркʹәтьн 32:1) Гава щьмәʹте дина хԝә дайе кӧ Муса дәрәнги дькʹәвә жь сәр чʹийе найе харе, һьнге щьмәʹт тʹопи щәм Һарун бу у готә ԝи: «Рʹабә мәрʹа хԝәдейа чекә, кӧ пешийа мә кʹәвьн, чьмки әԝ Мусайе мәрьв, йе кӧ әм жь ԝәлате Мьсьре дәрхьстьн, әм ньзаньн чь һатә сәре ԝи».
ԝ09 15/5 11 ¶11
Рʹӧһʹанида Гьһишти Бьн, Чьмки Рʹожа Йаһоԝа Незик ә
11 Щарна һеса нинә ль гора һинкьрьнед Кʹьтеба Пироз бьжин, илаһи дәрәще чәтьнда. Мәсәлә, һьнә ԝәхт паши азакьрьна Исраелийа жь дилтийа Мьсьре, щьмәʹте дәстпекьр сәр Муса бькә кӧтә-кӧт у Йаһоԝа бьщерʹьбинә. Чьма? Чьмки ава ԝан кем бу (Дркʹ. 17:1-4). Щьмәʹта Исраеле пәйман тʹәви Йаһоԝа гьредабу у соз дабу, ԝәки ԝе һʹәму хәбәред Йаһоԝа биньн сери. Паши ԝе ԛәԝьмандьне һе дӧ мәһ жи дәрбаз нәбу, ԝана ԛануна Йаһоԝа дәрһәԛа пʹутпʹарьстийе тʹәрьбанд (Дркʹ. 24:3, 12-18; 32:1, 2, 7-9). Дьԛәԝьмә щьмәʹт тьрсийа, чахе Муса сәр гәләк ԝәхт әԝана һиштьбун, гава сәр чʹийайе Һорәбе тʹәмийед жь Хԝәде дьстанд. Щарәке, чахе Исраелийа тʹәви Амалекийа шәрʹ дькьрьн, әԝана бь дәстед Мусайи һьлбьрʹанди сәркʹәтьн. Ләма жи дьбәкә әԝана фькьрин, ԝәки Амалеки ԝе диса һʹьщуми сәр ԝан кьн, у әԝана ԝе бейи Муса бьдьнә дәр (Дркʹ. 17:8-16). Ле чь жи һәбә, Исраелийа «нәхԝәстьн» гӧһдар бьн (Кʹр.Шн. 7:39-41). Паԝлосе шанди Мәсиһи һелан дькьрьн, ԝәки чʹәʹв нәдьнә Исраелийед нәгӧһдар, кʹижан кӧ дьтьрсийан бькʹәвьнә Әʹрде Создайи (Ибр. 4:3, 11).
(Дәркʹәтьн 32:4-6) Һарун әԝ жь дәсте ԝан һьлдан, ԛав кʹоланд щурʹә дайе у голькәк рʹо кьр. Готьн: «Әв ә хԝәдейе тә Исраел! Йе кӧ тӧ жь ԝәлате Мьсьре дәрхьсти». 5 Гава Һарун әв йәк дит, бәр ԝи горигәһәк чекьр. Һарун кьрә гази у гот: «Сьбе щәжьна Хӧдан ә». 6 Рʹожа дьн сәре сьбәһе зу рʹабун дийарийед тʹәвайишәԝате дан у дийарийед һәләԛәтийе анин, щьмәʹте рʹуньшт хԝар, вәхԝар у рʹабун намуса һәврʹа листьн.
ԝ12 15/10 25 ¶12
Гӧһ Бьдә Хԝәде, ԝәки Бьвини кӧ Әԝ Чаԝа Созед Хԝә Тинә Сери
12 Йаһоԝа дәрберʹа дәстпекьр созед хԝәйи ль гора пәймана Ԛануне бинә сери. Демәк әԝи кон бона һʹәбандьне да чекьрьне у кʹаһин һатьнә кʹьфшкьрьне. Бь сайа ве йәке мәрьвед гӧнәкʹар дькарьбун незики Йаһоԝа бьн. Ле Исраели зу тʹәсмилбуйина хԝә Йаһоԝарʹа бир кьрьн у «Пирозе Исраеле бинтәнг дькьрьн» (Зб. 78:41). Мәсәлә, һʹәта кӧ Муса сәр Чʹийайе Синайе рʹебәри жь Йаһоԝа дьстанд, щьмәʹта Исраеле тәйаха хԝә у баԝәрийа хԝә ӧнда кьр. Ԝана тʹьре Муса әԝ һиштьн. Ләма жи щьмәʹте голька зерʹин хԝәрʹа чекьр у гот: «Әв ә хԝәдейе тә Исраел! Йе кӧ тӧ жь ԝәлате Мьсьре дәрхьсти» (Дркʹ. 32:1, 4). Паше, әԝана ава готи «щәжьна Хӧдан» саз кьрьн, бәр голька зерʹин та дьбун у ԛӧрбан дьанин. Чахе Йаһоԝа әв йәк дит, готә Муса: «Әвана ӧса зу жь ԝе рʹийе шьһʹьтин, йа кӧ мьн тʹәми дабу ԝан» (Дркʹ. 32:5, 6, 8). Ле йазьх, жь ԝи чахи щьмәʹта Исраел гәләк щар созед хԝәйи кӧ Йаһоԝарʹа дабун, пьшт гӧһе хԝәва давитьн (Жм. 30:2).
(Дәркʹәтьн 32:9, 10) Хӧдан готә Муса: «Мьн дина хԝә да ве щьмәʹте, ва йә әԝ щьмәʹтәкә сәрһʹьшк ә. 10 Ньһа бьһелә кӧ әз һерса хԝә ль сәр ванда бьрʹежьм, ԛьрʹа ван биньм. Ле әз тә бькьмә мьләтәки мәзьн».
ԝ18.07 20 ¶14
Кʹе Алийе Йаһоԝа йә?
14 Щьмәʹте рʹьнд заньбу, ԝәки пʹутпʹарьсти бәр чʹәʹве Йаһоԝа гӧнәки гәләк гьран ә (Дәркʹ. 20:3-5). Ле ԝәʹдә дәрбаз бу у ԝана сәре хԝә бәр голькәкә зерʹ данин! Исраелийа заньбун кӧ бь ве йәке әԝана гӧрʹа Хԝәде накьн, ле йәкә ԝана хԝәха хԝә дьхапандьн йанчь әԝана диса жи алийе Йаһоԝа нә. Һәла һе Һарун жи кʹәтә ве тʹәльке чахе гот кӧ әԝ гольк бона «щәжьна» Йаһоԝа йә. Ле Йаһоԝа ча сәр ве йәке ньһерʹи? Әԝи һʹәсаб кьр ԝәки ԝана пьшта хԝә данә ԝи у нәмамийа ԝи кьрьн. Йаһоԝа готә Муса ԝәки щьмәʹт «жь ԝе рʹийе шьһʹьтин» кʹижанерʹа кӧ әԝи «тʹәми дабу ԝан» кӧ һәрʹьн. «Һерса» Йаһоԝа ӧса сәр ԝан рʹабу, кӧ әԝи һәла һе жи дьхԝәст бь тʹәмами ԛьрʹа мьләте Исраел бинә (Дәркʹ. 32:5-10).
Хьзна Кʹьтеба Пироз Бьгәрʹьн
(Дәркʹәтьн 31:17) Әԝ нишана һʹәта-һʹәтайе йә ль нав мьн у зарʹед Исраелда, чьмки Хӧдан ль нава шәш рʹожада әʹрд у әʹзман әʹфьрандьн у рʹожа һʹәфта дәсте хԝә жь хәбате кьр у рʹьһʹәт бу›».
ԝ19.12 3 ¶4
«Ԝәхте» Хәбате у Рʹьһʹәтийе Һәйә
4 Ле гәло әԝ йәк кӧ Йаһоԝа у Иса гәләк дьхәбьтьн у мәсәла баш ьн бона мә, те һʹәсабе ԝәки әʹсәйи нинә әм һеса бьн? Тʹӧ щар на. Фәʹмдари йә, Йаһоԝа тʹӧ щар наԝәстә, у жерʹа нәлазьм ә алийе физикида һеса бә. Ле Кʹьтеба Пироз дьбежә, ԝәки чахе Йаһоԝа әʹзман у әʹрд әʹфьрандьн, «дәсте хԝә жь хәбате кьр у рʹьһʹәт бу» (Дәркʹ. 31:17). Әшкәрә жь ве йәке те кʹьфше, ԝәки чахе Йаһоԝа әʹфьрандьн хьлаз кьр, паше сәкьни дина хԝә да чекьрьна дәсте хԝә у перʹа ша дьбу. Ӧса жи Иса, рʹаст ә чахе әԝ сәр әʹрде бу, гәләк шьхӧл дькьр, ле ӧса жи хԝәрʹа ԝәʹдә дьдит, ԝәки һьнәки һеса бә у тʹәви һәвалед хԝә хԝарьне бьхԝә (Мәт. 14:13; Луԛа 7:34).
(Дәркʹәтьн 32:32, 33) Ньһа әз рʹәща дькьм гӧне ԝан бьбахшинә! Ле һәгәр на, һиви дькьм наве мьн жь кʹьтеба хԝәйә ньвисар рʹәсит кә». 33 Хӧдан готә Муса: «Кʹе ль бәр мьн гӧнә кьрийә, әзе ԝи жь кʹьтеба хԝә рʹәсит кьм.
ԝ87 1/9 29
Пьрсед Хԝәндәвана
Һәрге дәрһәԛа мәрьвәки те готьне, ԝәки әԝи ԛәбулкьрьн стандийә (демәк наве ԝи «кʹьтеба жийинеда» ньвисар ә) әв найе һʹәсабе, кӧ әԝ ԝе сәд сәләфи жийина һʹәта-һʹәтайе бьстинә у ԝе тʹӧ тьшт нәйе гӧһастьне. Муса бона щьмәʹта Исраеле лавайа Йаһоԝа дькьр: «Әз рʹәща дькьм гӧне ԝан бьбахшинә! Ле һәгәр на, һиви дькьм наве мьн жь кʹьтеба хԝәйә ньвисар рʹәсит кә». Хԝәде жи щаба ԝи да: «Кʹе ль бәр мьн гӧнә кьрийә, әзе ԝи жь кʹьтеба хԝә рʹәсит кьм» (Дәркʹәтьн 32:32, 33). Бәле, һәла һәрге Хԝәде кәсәки һʹәсаб кә лайиԛи ве йәке кӧ наве ԝи «кʹьтеба жийинеда» бе ньвисаре, дькарә ӧса бьԛәԝьмә кӧ мәрьв баԝәрийа хԝә ӧнда кә у нәгӧһдар бә. Ве дәрәщеда, Хԝәде наве ԝи мәрьви ԝе «жь кʹьтеба жийине» рʹәсит кә (Әʹйанти 3:5).
Хԝәндьна Кʹьтеба Пироз
(Дәркʹәтьн 32:15-35) Муса вәгәрʹийа у жь чʹийе һатә харе, һәр дӧ сәлед Шәʹдәтийе жи дәстед ԝида бун. Сәр һәр дӧ алийа жи ньвисар бун, һьн ви алийи һьн жи ԝи алийи ньвисар бун. 16 Сәл шьхӧле дәсте Хԝәде бун у ньвисара сәр жи ньвисара Хԝәде бу ль сәр сәла кʹоланди. 17 Гава Йешу дәнге ԛарʹә-ԛарʹа щьмәʹте бьһист, готә Муса: «Дәнге шерʹ жь зоме те». 18 Муса готе: «Әв нә дәнге ԛарʹә-ԛарʹа сәркʹәтийа йә, нә жи дәнге ԛарʹә-ԛарʹа йед данә дәр, ле әз дәнге һәврʹа листьне дьбьһем». 19 Гава Муса незики зоме бу, чʹәʹв гольке у рʹәԛасе кʹәт, һерса ԝи рʹабу, әԝ сәлед дәстед хԝәда авитьн у бьнатʹара чʹийеда һурдәхԝәши кьрьн. 20 Голька ԝанә чекьри һьлда агьрда һʹәланд, һур-һури кьр кьрә тʹоз рʹәшандә сәр аве у зарʹед Исраел данә вәхԝарьне. 21 Муса готә Һарун: «Әве щьмәʹте чь тә кьр, кӧ тә әв гӧнәйе мәзьн ани сәр ԝан?» 22 Һарун готе: «Бьра хԝәйе мьн һерс нәкʹәвә. Тӧ ве щьмәʹте нас дьки, әԝ хьрабийерʹа һазьр ьн. 23 Готьнә мьн: ‹Мәрʹа хԝәдейа чекә кӧ пешийа мә кʹәвьн, чьмки әԝ Мусайе мәрьв кӧ әм жь ԝәлате Мьсьре дәрхьстьн, әм ньзаньн чь һатә сәре ԝи›. 24 Мьн жи готә ԝан: ‹Зерʹе кʹе һәйә бьра дәрхә›. Ԝан данә мьн, мьн жи әԝ авитьнә ль нав егьр әв голька дәркʹәт». 25 Муса дина хԝә дайе кӧ щьмәʹте һʹәԝла хԝә жь дәԝле авитийә, ԝе ль бәр дьжмьнед хԝә бьбьнә рʹобәт, (чьмки Һарун изьн дабу кӧ ԝана һʹәԝла хԝә жь дәԝле авитьбун). 26 Һьнге Муса бәр дәргәһе зоме сәкьни у гот: «Кʹе алийе Хӧдан ә, бьра бе щәм мьн!» Һʹәму зарʹед Леԝи щьвийанә щәм ԝи. 27 У готә ԝан: «Хӧдан Хԝәдейе Исраел аһа дьбежә: ‹Бьра һәр мәрьв шуре хԝә гьредә, зомеда жь дәргәһ һʹәта дәргәһ һәрʹьн ԝәрьн, һәр мәрьв бьре хԝә, һәр мәрьв һәвале хԝә, һәр мәрьв щинаре хԝә бькӧжә›». 28 Зарʹед Леԝи ԝәкә готьна Муса кьрьн, ԝе рʹоже жь щьмәʹте се һʹәзар мәрьв кʹәтьн. 29 Муса гот: «Иро ԝә бона хьзмәткʹарийа Хӧдан хԝә бь кӧштьна кӧрʹе хԝә у бьре хԝә бӧһӧрти-жьбарә кьр. Ләма иро дӧайе ль сәр ԝәда бе». 30 Рʹожа дьне Муса готә щьмәʹте: «Ԝә гӧнәки мәзьн кьрийә. Ва йә әзе һьлкʹьшьмә щәм Хӧдан, бәлки бькарьбьм кʹәԝандьне жь бәр гӧнед ԝәва бьдьм кьрьне». 31 Муса вәгәрʹийа щәм Хӧдан у готе: «Бәле! Әве щьмәʹте гӧнәки мәзьн кьр хԝәрʹа хԝәдеки зерʹин чекьр. 32 Ньһа әз рʹәща дькьм гӧне ԝан бьбахшинә! Ле һәгәр на, һиви дькьм наве мьн жь кʹьтеба хԝәйә ньвисар рʹәсит кә». 33 Хӧдан готә Муса: «Кʹе ль бәр мьн гӧнә кьрийә, әзе ԝи жь кʹьтеба хԝә рʹәсит кьм. 34 Ле ньһа тӧ һәрʹә щьмәʹте бьбә ԝи щийе кӧ мьн тәрʹа гот. Ва йә мьлйакʹәте мьне пешийа тәва һәрʹә, ле рʹожа щәза әзе бона гӧне ԝан, ԝан щәза кьм». 35 У Хӧдан щьмәʹте хьст бона ԝе голька ԝанә чекьри, йа кӧ Һарун чекьр.
12-18 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 33-34
«Хәйсәт-Һʹӧнӧред Йаһоԝайи Пʹьрʹ Баш»
(Дәркʹәтьн 34:5) У Хӧдан пе әʹԝр пәйа бу, ль ԝьр щәм ԝи сәкьни у наве Хӧдан әʹлам кьр.
it-2 466-467
Нав
Әʹфрин избат дькьн, кӧ Хԝәде һәйә, ле наве ԝи әʹйан накьн (Зб. 19:1; Рʹм. 1:20). Занәбуна наве Хԝәде һе зедә тьшт те һʹәсабе, нә кӧ тʹәне бьзаньби наве ԝи чь йә (2 Др. 6:33). Бь рʹасти әв те һʹәсабе бьзаньби, ԝәки Хԝәде Йәки чаԝа нә, ԛьрара ԝи чь йә у чь хәйсәт-һʹӧнӧред ԝи һәнә, демәк чь кӧ Кʹьтеба Пироз әʹйан дькә (Бәрамбәр кә тʹәви 1 Пʹд. 8:41-43; 9:3, 7; Нм. 9:10). Әв йәк рʹьнд те кʹьфше жь мәсәла Муса, чахе Йаһоԝа готә ԝи: «Әз тә пе наве тә нас дькьм». Әв дьһатә һʹәсабе, ԝәки һәләԛәтийа ԝан незик бу (Дркʹ. 33:12). Ԛәдьрәки мәзьн бу, кӧ Муса карьбу бь чʹәʹве хԝә рʹумәта Йаһоԝа бьвинә у бьбьһе Әԝ ча наве хԝә әʹлам дькә (Дркʹ. 34:5). Йаһоԝа нә тʹәне наве хԝә ԝәкʹьланд, ле ӧса жи дәрһәԛа хәйсәт-һʹӧнӧр у кьред хԝә гьли кьр. «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һʹӧб у амьнийеда хьнейо, кӧ бона һʹәзара хԝәйе һʹӧба амьн ә, нәһәԛийе, нәрʹастийе у гӧна дьбахшинә, ле сущдара бе щәза наһелә, нәһәԛийа бава тинә сәре кӧрʹа у кӧрʹе-кӧрʹа, һʹәта ньсьле сьсийа у чара» (Дркʹ. 34:6, 7). Анәгори ве йәке кʹьлама Мусада, кʹидәре кӧ те готьне: «Әзе наве Хӧдан бькьм дәнги», һәләԛәтийа Йаһоԝа тʹәви щьмәʹта Исраеле у һʹӧнӧред Ԝи әʹйан дьбьн (Ԛн.Дщ. 32:3-44).
(Дәркʹәтьн 34:6) Хӧдан ль бәр ԝирʹа дәрбаз бу у әʹлам кьр: «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һʹӧб у амьнийеда хьнейо,
ԝ09 1/5 18 ¶3-5
Йаһоԝа Дәрһәԛа Хԝә Гьли Дькә
Сәрида Йаһоԝа гот, ԝәки әԝ Хԝәдайе «рʹәʹм у кʹәрәме» йә (Рʹеза 6). Ль гора леколинкʹарәки хәбәра «рʹәʹм» жь зьмане Ибрани те ԝәлгәрʹандьне ча «дьлшәԝати, кʹижан кӧ бав һьндава зарʹед хԝәда дьдә кʹьфше». Ле хәбәра «кʹәрәм» те шьровәкьрьне ча «хԝәстьна бь дьл, кӧ али ԝан бьки, йед кӧ һʹәԝщә нә». Демәк Йаһоԝа дьхԝазә хьзмәткʹаред хԝә бьдә баԝәркьрьне, кӧ әԝ мина де-бав бь һʹьзкьрьн у дьлшәԝатийе бона һʹәԝщед ԝан хәм дькә (Зәбур 103:8, 13).
Паше Йаһоԝа дьбежә, ԝәки әԝ Хԝәдайе «сәбьр-ськʹане» йә (Рʹеза 6). Әԝ ләз накʹәвә, кӧ сәр хьзмәткʹаред хԝә һерс кʹәвә. Әԝ сәбьра хԝә һьндава ԝанда дьдә кʹьфше, дина хԝә надә кемасийед ԝан у ԝәʹдә дьдә кӧ бенә гӧһастьне (2 Пәтрус 3:9).
Хԝәде диса гот ԝәки әԝ «бь һʹӧб у амьнийеда» хьне йә (Рʹеза 6). Һʹӧб у амьнийа Йаһоԝа, йане һʹьзкьрьна ԝийә амьн, һʹӧнӧрәкә ԛимәт ә. Әв һʹӧнӧр, һәләԛәтийа Йаһоԝа тʹәви щьмәʹта ԝи незик дькә (Ԛануна Дӧщари 7:9). Хенщи ԝе йәке Йаһоԝа канийа рʹастийе йә. Әԝ найе хапандьне у хԝәха жи тʹӧ кәси нахапинә. Әм дькарьн бь тʹәмами итʹбарийа хԝә һʹәму созед ԝи биньн, чьмки әԝ Хԝәдайе рʹастийе у «амьнийе» йә (Зәбур 31:5).
(Дәркʹәтьн 34:7) кӧ бона һʹәзара хԝәйе һʹӧба амьн ә, нәһәԛийе, нәрʹастийе у гӧна дьбахшинә, ле сущдара бе щәза наһелә, нәһәԛийа бава тинә сәре кӧрʹа у кӧрʹе-кӧрʹа, һʹәта ньсьле сьсийа у чара».
ԝ09 1/5 18 ¶6
Йаһоԝа Дәрһәԛа Хԝә Гьли Дькә
Йаһоԝа дәрһәԛа хԝә диса тьштәки фәрз мәрʹа әʹйан дькә. Әԝ дьбежә, ԝәки әԝ «нәһәԛийе, нәрʹастийе у гӧна дьбахшинә» (Рʹеза 7). Әԝ һазьр ә бьбахшинә ԝан, йед кӧ гӧнед хԝә тиньн рʹуйе хԝә (Зәбур 86:5). Ле диса жи, Йаһоԝа чʹәʹве хԝә сәр хьрабийе у нәһәԛийе данадә. Әԝ дьбежә, кӧ «сущдара бе щәза наһелә» (Рʹеза 7). Хԝәдайе пироз у һәԛ ԝе нәһелә, ԝәки мәрьвед кӧ нахԝазьн бенә гӧһастьне у гӧна дькьн, бе щәза бьминьн. Ахьрийа-ахьрийе әԝ мәрьв ԝе бәред кьред хԝәйә хьраб бьчьньн.
Хьзна Кʹьтеба Пироз Бьгәрʹьн
(Дәркʹәтьн 33:11) Хӧдан рʹу бь рʹу тʹәви Муса хәбәр дьда, чаԝа кӧ мәрьвәк тʹәви һәвале хԝә хәбәр дьдә. Муса вәдьгәрʹийа зоме, ле хорте бәрдәстийе ԝи Йешуйе кӧрʹе Нун жь Кон дур нәдькʹәт.
(Дәркʹәтьн 33:20) Гот: «Тӧ рʹуйе мьн нькари бьбини, чьмки мәрьв нькарә мьн бьбинә у сах бьминә».
ԝ04 15/3 27 ¶5
Фькьред Сәрәкә жь Кʹьтеба Дәркʹәтьн
33:11, 20: Чь щурʹәйи Хԝәде «рʹу бь рʹу» тʹәви Муса хәбәр дьда? Әв гьли-готьн дьдә кʹьфше хәбәрдана ортʹа дӧ кәса, кʹижан кӧ һәврʹа незик ьн. Муса ԝәкʹиле Хԝәдерʹа хәбәр дьда у бь сайа ԝи рʹебәрийа жь Йаһоԝа дьстанд. Ле Муса Йаһоԝа нәдьдит, чьмки «мәрьв нькарә . . . [Хԝәде] бьбинә у сах бьминә». Бь рʹасти Йаһоԝа шәхси тʹәви Муса хәбәр нәдьда. Галати 3:19-да те готьне: «Ԛанун жь алийе мьлйакʹәтада, бь дәсте навчетийа йәки һатә дайине».
(Дәркʹәтьн 34:23, 24) Сале се щара һʹәму ԛьсьме тәйә нерин бьра ль бәр Хӧдан Хԝәде, Хԝәдейе Исраел бьсәкьньн. 24 Чьмки әзе ль бәр тә мьләта рʹаԛәтиньм у синоре тә бәрфьрә кьм. Ԝәʹде кӧ тӧ сале се щара ль бәр Хӧдан Хԝәдейе хԝә бьсәкьни, тʹӧ кәсе чʹәʹв нәвежә ԝәлате тә.
ԝ98 1/9 20 ¶5
Тьштед Сәрәкә Дайнә Щийе Пешьн!
Һʹәму меред Исраели у прозелит, сале се щара гәрәке ль бәр Йаһоԝа бьсәкьнийана. Гәләк малхед мале фәʹм дькьрьн, ԝәки әв йәк ԝе алийе рʹӧһʹанида кʹарәкә мәзьн бьдә тʹәмамийа малбәта ԝан. Ләма жи әԝана жьн-зарʹед хԝә тʹәви хԝә һьлдьдан. Ле ԝе кʹе мьԛати дәшт у малед ԝан буйа у жь ԛачаха хԝәй кьра? Йаһоԝа соз дабу: «Ԝәʹде кӧ тӧ сале се щара ль бәр Хӧдан Хԝәдейе хԝә бьсәкьни, тʹӧ кәсе чʹәʹв нәвежә ԝәлате тә» (Дәркʹәтьн 34:24). Исраелийа гәрәке баԝәр кьрана, кӧ һәрге тьштед рʹӧһʹани бона ԝан дьһа фәрз буна, һәбуна ԝан жи ԝе зьраре нәкʹәта. Гәло, Йаһоԝа созе хԝә дьани сери? Һәмьки!
Хԝәндьна Кʹьтеба Пироз
(Дәркʹәтьн 33:1-16) Хӧдан готә Муса: «Рʹабә жь вьра тӧ у әԝ щьмәʹта кӧ тә жь ԝәлате Мьсьре дәрхьст һәвраз ани, һьлдә һәрʹә ԝи әʹрде бона кʹижани мьн Бьраһим, Исһаԛ у Аԛубрʹа сонд хԝар у гот: ‹Әзе ԝи бьдьмә зӧрʹәта тә›. 2 Әзе пешийа тәва мьлйакʹәтәки бьшиньм у әԝе кәнанийа, әморийа, һʹитийа, пьриззийа, һʹиԝийа у йәбусийа рʹаԛәтинә. 3 Те һәрʹи әʹрде шир у һьнгьв же дькʹьшә, ле әзе хԝәха тʹәви тә һәвраз нәйем, чьмки тӧ мьләтәки сәрһʹьшки кӧ нәбә әз рʹева ԛьрʹа тә биньм». 3 Те һәрʹи әʹрде шир у һьнгьв же дькʹьшә, ле әзе хԝәха тʹәви тә һәвраз нәйем, чьмки тӧ мьләтәки сәрһʹьшки кӧ нәбә әз рʹева ԛьрʹа тә биньм». 4 Гава щьмәʹте әв готьна гьран бьһист, шин кьрьн у ԛәт кәсәки хьшьре хԝә хава нәкьр. 5 Чьмки Хӧдан готьбу Муса: «Бежә зарʹед Исраел, һун мьләтәки сәрһʹьшк ьн, һәгәр әз дәԛәке тʹәви тә һәвраз бем әзе ԛьрʹа тә биньм. Ле ньһа хьшьред ль сәр хԝә дәрхьн, кӧ әз дина хԝә бьдьме кʹа әз ԝә чаԝа бькьм». 6 Зарʹед Исраел хьшьред хԝә һьнда чʹийайе Һʹоребе жь сәр хԝә дәрхьстьн. 7 Муса Кон һьлда, жь зоме дәр һьнәки жь зоме дур вәгьрт у наве ԝи дани Коне Щьвине. У һәр кәсе кӧ газ Хӧдан дькьр, жь зоме дәрдькʹәт дьчу Коне Щьвине, кӧ жь зоме дәр бу. 8 Гава Муса дәрдькʹәт дьчу бәрбь Кон, һьнге һʹәму щьмәʹт рʹадьбу у һәр йәк ль бәр дәре коне хԝә дьсәкьни у дина хԝә дьданә Муса, һʹәта кӧ әԝ бькʹәта Кон. 9 Чаԝа кӧ Муса дькʹәтә Кон, стуна әʹԝр пәйа дьбу ль бәр дәре Кон дьсәкьни у Хӧдан тʹәви Муса хәбәр дьда. 10 Гава тʹәмамийа щьмәʹте стуна әʹԝрә ль бәр дәре Кон сәкьни дьдит, тʹәмамийа щьмәʹте рʹадьбу у һәр йәк ль бәр дәре коне хԝә дәвәрʹуйа дьчу. 11 Хӧдан рʹу бь рʹу тʹәви Муса хәбәр дьда, чаԝа кӧ мәрьвәк тʹәви һәвале хԝә хәбәр дьдә. Муса вәдьгәрʹийа зоме, ле хорте бәрдәстийе ԝи Йешуйе кӧрʹе Нун жь Кон дур нәдькʹәт. 12 Муса готә Хӧдан: «Бәле тә готә мьн: ‹Ве щьмәʹте дәрхә›, ле бәле тә мьнва әʹйан нәкьр, те кʹе тʹәви мьн бьшини, тә гот: ‹Әз тә пе наве тә нас дькьм у тә ль бәр чʹәʹвед мьн кʹәрәм дит›. 13 Ле ньһа һиви дькьм, һәгәр мьн ль бәр чʹәʹвед тә кʹәрәм дитийә, рʹийед хԝә ль бәр мьн вәкә ԝәки әз тә нас бькьм у ль бәр тә кʹәрәме бьбиньм, дина хԝә бьде кӧ әв мьләт щьмәʹта тә йә». 14 У Хԝәде гот: «Әзе тʹәв тә бем у тә бьбьмә рʹьһʹәтийе». 15 Муса готә ԝи: «Һәгәр тӧ нәйейи, мә жь вьра дәрнәхә. 16 Ԝе чаԝа бе кʹьфше ԝәки мьн у щьмәʹта тә ль бәр чʹәʹвед тә кʹәрәм дитийә, һәгәр тӧ тʹәви мә нәйейи? Бь ви аԝайи әз у щьмәʹта тәйе ль рʹубари дьне жь һʹәму мьләта бенә башԛәкьрьне».
19-25 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 35-36
«Бона Шьхӧле Йаһоԝа Һазьр ьн»
(Дәркʹәтьн 35:25, 26) Һʹәму кʹӧлфәтед хԝәйифьрасәт бь дәстәʹмәлийа хԝә рʹисе шин, ширк, соре гәвәз у кʹьтане зьрав рʹьстьн у анин. 26 Һʹәму кʹӧлфәтед кӧ дьле ԝан дьхԝәст бь дәстәʹмәлийа хԝә пʹьрʹчʹа бьзьне рʹьстьн.
ԝ14 15/12 4 ¶4
Йаһоԝа бь Мәрʹдани Рʹӧһʹе Һазьрбуне Кʹәрәм Дькә
Йаһоԝа дьһа хԝәш дьһат рʹӧһʹе һазьрбуне, кӧ пьштгьрийа һʹәбандьна тʹәмьз бькьн, нә кӧ ԛӧрбана бьдьн. Дьле Исраелийа әԝ һелан дькьрьн, ԝәки ԝәʹдә у ԛәԝата хԝә Хԝәдерʹа ԛӧрбан кьн. Кʹьтеба Пирозда те готьне: «Һʹәму кʹӧлфәтед хԝәйифьрасәт бь дәстәʹмәлийа хԝә рʹисе шин . . . рʹьстьн». Ӧса жи зедә дькә: «Һʹәму кʹӧлфәтед кӧ дьле ԝан дьхԝәст бь дәстәʹмәлийа хԝә пʹьрʹчʹа бьзьне рʹьстьн». Хенщи ԝе йәке, Йаһоԝа Бьсалел бь «сәрԝахтийе, билантийе, дәстәʹмәлийе у фьрасәта һәр пʹешәкʹарийева дагьрт». Демәк Хԝәде Бьсалел у Оһолиабрʹа фәрәсәтед ӧса дабу, ԝәки бькарьбьн һʹәму хәбатед, кӧ ԝанарʹа һатьбун дайине, бькьн (Дркʹ. 35:25, 26, 30-35).
(Дәркʹәтьн 35:30-35) Муса готә зарʹед Исраел: «Дина хԝә бьдьне, Хӧдан бь нав гази Бьсалеле кӧрʹе Урийе Һур кьр, жь ԛәбила Щьһуда. 31 Әԝ Рʹӧһʹе Хԝәдева, бь сәрԝахтийе, билантийе, дәстәʹмәлийе у фьрасәта һәр пʹешәкʹарийева дагьрт, 32 ԝәки бь зерʹ, зив у сьфьр тьшта бьһʹӧньринә 33 у кәвьра бькʹолә ԛаш кә, дара бькʹолә у һәр щурʹә шьхӧли бь һостатийе бькә. 34 Дьле ԝида жи дани кӧ һин бькә, дьле ԝи у дьле Оһолиабе кӧрʹе Аһисамахе жь ԛәбила Дан. 35 Хԝәде әԝ фьрасәтийева дагьртьн, ԝәки һәр шьхӧле һостатийе, һʹӧнӧрмәндитийе, нәԛьшандитийе бь рʹисе шин, ширк, соре гәвәз ль сәр кʹьтане зьрав, шьхӧле ньтьрандьне у һәр щурʹә шьхӧли бькьн.
ԝ11 15/12 18 ¶6
Хьзмәткʹаред Амьнә Бәре, кӧ бь Рʹӧһʹе Пироз Рʹебәри Дьбун
6 Жь мәсәла Бьсалел, кʹижан кӧ ԝәʹде Мусада дьжит, әм дькарьн гәләк тьшт пебьһʹәсьн кӧ рʹӧһʹе Хԝәде чаԝа һʹӧкӧм дьбә (Бьхунә Дәркʹәтьн 35:30-35.) Бьсалел һатьбу кʹьфшкьрьне, ԝәки рʹебәрийа чекьрьна һʹәму тьшта бькә, кʹижан кӧ гәрәке коне пирозда бьһатана хәбьтандьне. Ле гәло, әԝи әв пʹешә заньбун, ԝәки һʹәму тьшта чекә? Дьбәкә әре. Ле дьԛәԝьмә пешийа ве йәке, шьхӧле ԝийи пашьн әԝ бу, кӧ әԝи кʹәлпичʹ бона Мьсьрийа чедькьрьн (Дркʹ. 1:13, 14). Бьсалел чаԝа карьбу әԝ шьхӧла чәтьн бькьра? Йаһоԝа «әԝ Рʹӧһʹе Хԝәдева, бь сәрԝахтийе, билантийе, дәстәʹмәлийе у фьрасәта һәр пʹешәкʹарийева дагьрт, . . . һәр щурʹә шьхӧли бь һостатийе бькә». Чь жи һәбә бь сайа рʹӧһʹе пироз, фәрәсәтед Бьсалел дьһа баш дьбун. Дәрһәԛа Оһолиаб жи дькарьн әве йәке бежьн. Ча те кʹьфше Бьсалел у Оһолиаб пʹеше хԝәда бунә һостә, чьмки әԝана нә тʹәне хԝәха хәбат дькьрьн, ле мәрьвед дьн жи һин дькьрьн. Бәле, Хԝәде кьрә дьле ԝан, ԝәки әԝана йед дьнена жи һин кьн.
(Дәркʹәтьн 36:1, 2) Һьнге Бьсалел, Оһолиаб у һәр кәсед хԝәйифьрасәтә йе кӧ Хӧдан фьрасәти у биланти дабу ԝан, бона һәр щурʹә шьхӧлед пирозгәһе бьзаньбьн у анәгори тʹәмийа Хӧдан бькьн. 2 Муса гази Бьсалел, Оһолиаб у һʹәмуйед хԝәйифьрасәт кьр, дьле кʹижанада Хӧдан фьрасәти данибу, аԝа готи гази ԝан, дьле кʹижани дькʹьшандә ԝи кʹари, кӧ ԝе хәбате бькә.
ԝ11 15/12 19 ¶7
Хьзмәткʹаред Амьнә Бәре бь Рʹӧһʹе Пироз Рʹебәри Дьбун
7 Диса избаткьрьнәк һәйә, кӧ рʹӧһʹе пироз рʹебәрийа Бьсалел у Оһолиаб дькьр. Чекьрьна дәстед ԝан гәләк ԝәхт дьһатә хәбьтандьне. Паши ԝәкә 500 сала жи әԝ тьшт дьданә хәбате (2 Дир. 1:2-6). Бьсалел у Оһолиаб нә мина ԝан мәрийа бун, кʹижан кӧ чахе тьштәки чедькьн, наве хԝә сәр дьньвисьн, сәва кӧ хԝә бьльнд кьн. Һʹәму һӧрмәт-рʹумәт бона чекьрьна ԝан Йаһоԝарʹа дькʹәт (Дркʹ. 36:1, 2).
Хьзна Кʹьтеба Пироз Бьгәрʹьн
(Дәркʹәтьн 35:1-3) Муса тʹәмамийа щьвина зарʹед Исраел щьванд у готә ԝан: «Әв ьн әԝ тьштед кӧ Хӧдан тʹами да кӧ ԝан бьԛәдиньн: 2 шәш рʹожа хәбата хԝә бькьн, ле рʹожа һʹәфта ԝәрʹа бьбә шәмийа рʹьһʹәтийейә пироз бона Хӧдан. Кʹе ԝе рʹоже шьхӧләки бькә ԝе бе кӧштьне. 3 Рʹожа шәмийе һʹәму щи-ԝаред хԝәда агьр венәхьн».
ԝ05 15/5 23 ¶14
Рʹейед Йаһоԝа Педьһʹәсьн
14 Шьхӧлед рʹӧһʹани дайнә сәр щийе пешьн. Исраелийа гәрәке нәһиштана кӧ һʹәԝщед ԝанә физики әԝана жь шьхӧлед рʹӧһʹани дур хьстана. Ԝана гәрәке дина хԝә нәда тʹәне сәр шьхӧлед һәррʹожи. Йаһоԝа гот, ԝәки ԝе һәр һʹәфти рʹожәкә ԝанә пироз һәбә, бона шьхӧлед рʹӧһʹани (Дәркʹәтьн 35:1-3; Жьмар 15:32-36). Хенщи ԝе йәке, Йаһоԝа щьвинед пироз кʹьфш кьр, кӧ һәр сал бенә дәрбазкьрьне (Ԛануна Кʹаһинтийе 23:4-44). Ӧса әԝана дькарьбун биньнә бира хԝә һʹәму кьред Йаһоԝайи мәхсус, рʹейед ԝи пебьһʹәсийана у рʹазибуна хԝә бона ԛәнщийа ԝи бьдана кʹьфше. Бь ԝе йәке щьмәʹте дькарьбу амьнийа хԝә Йаһоԝарʹа бьда кʹьфше у хофа бәр ԝи дьле хԝәда хԝәйи кьра, һʹьзкьрьна хԝә һьндава ԝида дьһа ԛәԝи кьра у бәрдәԝам кьра хԝә һʹәбандьна рʹаст бьгьрта (Ԛануна Дӧщари 10:12, 13). Принсипед кӧ ве тʹәмийеда һәнә бона хьзмәткʹаред Йаһоԝайә рʹожа иройин жи кʹаре тиньн (Ибрани 10:24, 25).
(Дәркʹәтьн 35:21) Һʹәму бь рʹәзәдьлийа хԝә у бь дьл-щан һатьн, бона шьхӧлед Коне Щьвине у бона тʹәмамийа хьзмәткʹарийа ԝи у бона кʹьнщед пироз Хӧданрʹа һʹәди анин.
ԝ00 1/11 29 ¶1
Мәрьвед Мәрʹд Шабуне Дьстиньн
Бьдьнә бәр чʹәʹве хԝә, ԝәки ԝи чахи Исраелийа чь тʹәхмин дькьр. Чәнд ньсьлед ԝан жь бо дилтийе дьчәрчьрин у зәʹмәт дькʹьшандьн. Ле ньһа әԝана аза у дәԝләти нә. Гәло ԝанарʹа ԝе һеса бә пʹарәкә һәбуна хԝә Йаһоԝарʹа бькьнә ԛӧрбан? Әԝана дькарьбун дьшьрмиш буна, ԝәки әԝ һәбун ԝана ԛазанщ кьрийә у изьна ԝан һәйә бона кʹара хԝә бьдьнә хәбате. Ле чахе әԝана һатьнә һеланкьрьне ԝәки ԛӧрбанед материали биньн бона пьштгьрийа һʹәбандьна рʹаст, ԝана бь һазьрбун у шабуне ԛӧрбан анин! Ԝана бир нәкьр, ԝәки әԝана бь сайа Йаһоԝа бунә хԝәйиһәбук. Ләма жи щьмәʹте бь мәрʹдани зерʹ, зив у һʹәйԝан кьрьнә ԛӧрбан. Ԝана бь «рʹәзәдьли» у «бь дьл у щан» әԝ йәк дькьрьн. Кʹьтеба Пироз дьбежә, ԝәки «дьле ԝан дьхԝәст» кӧ Йаһоԝарʹа һʹәдийа биньн. Әԝ йәк дьдә кʹьфше, ԝәки бь рʹасти жи ԛӧрбанед ԝан бь рʹәзәдьли бун (Дәркʹәтьн 25:1-9; 35:4-9, 20-29; 36:3-7).
Хԝәндьна Кʹьтеба Пироз
(Дәркʹәтьн 35:1-24) Муса тʹәмамийа щьвина зарʹед Исраел щьванд у готә ԝан: «Әв ьн әԝ тьштед кӧ Хӧдан тʹами да кӧ ԝан бьԛәдиньн: 2 шәш рʹожа хәбата хԝә бькьн, ле рʹожа һʹәфта ԝәрʹа бьбә шәмийа рʹьһʹәтийейә пироз бона Хӧдан. Кʹе ԝе рʹоже шьхӧләки бькә ԝе бе кӧштьне. 3 Рʹожа шәмийе һʹәму щи-ԝаред хԝәда агьр венәхьн». 4 Муса тʹәви тʹәмамийа щьвина зарʹед Исраел хәбәр да у гот: «Әв ә чь кӧ Хӧдан тʹәми да у гот: 5 ‹Жь нав һәбука хԝә һʹәдийе бона Хӧдан дәрхьн. Бьра һәр кәсе рʹәзәдьли Хӧданрʹа һʹәдийе бинә: Зерʹ, зив у сьфьр, 6 рʹисе шин, ширк, соре гәвәз, кʹьтане зьрав у пʹьрʹчʹа бьзьне, 7 чʹәрмед бәранайә сор рʹәнгкьри, чʹәрмед га-мәʹсийа, даред дарщеԝийе, 8 бьзьре бона рʹонайийе, бьһарәтед бона рʹуне рʹункьрьне у бона бьхура бинхԝәш, 9 кәвьред оникс кәвьред ԛимәтә бона ԛашкьрьна ефод у рʹәхтсинг. 10 Һәр хԝәйифьрасәтед ль нав ԝәда бьра бен у һʹәму тьштед кӧ Хӧдан тʹәми данә чекьн: 11 Коне Шәʹдәтийе, сәргьра сәр гьртьна ԝе у сәркʹеша ԝе, ԛәмьтокед ԝе, читед ԝе, дәстуйед ԝе, стунед ԝе у бьнгәһед ԝе, 12 сьндоԛ у дәстуйед ԝе, ԛалпʹахе бахшандьне у пʹәрʹда навбьрʹийе, 13 тʹәхт дәстуйава у һʹәму дәрданед ԝе, нане Хԝәдерʹа дайи, 14 шәмдана рʹонайе у һащәтед ԝе, чʹьред ԝе у рʹуне рʹонайе, 15 горигәһа бьхуре у дәстуйед ԝе, рʹуне рʹункьрьне, бьхура бинхԝәш у пʹәрʹда бәр дәре Коне Шәʹдәтийе, 16 горигәһа дийарийа тʹәвайишәԝате у чита ԝейә сьфьрин, дәстуйед ԝе у һʹәму һащәтед ԝе, тʹәшт у бьнгәһа ԝе, 17 пʹәрʹдед һʹәԝше, стунед ԝе бьнгәһава у пʹәрʹда бәр дәре һʹәԝше, 18 сьнгед кон у сьнгед һʹәԝше һәбьнед ԝанва, 19 кʹьнщед ԛӧльхкьрьнейә бона хьзмәткʹарийа Щийе Пирозда, кʹьнщед пирозә кʹаһин Һарунрʹа, ӧса жи кʹьнщед кӧрʹед ԝи кӧ кʹаһинтийе бькьн›». 20 Тʹәмамийа щьвина зарʹед Исраел жь щәм Муса чу. 21 Һʹәму бь рʹәзәдьлийа хԝә у бь дьл-щан һатьн, бона шьхӧлед Коне Щьвине у бона тʹәмамийа хьзмәткʹарийа ԝи у бона кʹьнщед пироз Хӧданрʹа һʹәди анин. 22 Жьне у меред мәрʹд һатьн, мәнгьк, гӧһар, гӧстил, хьшьр у һәр щурʹә нәхшед зерʹин анин, һәр кәси һьндава хԝәда һʹәдийед зерʹин данә Хӧдан. 23 У щәм кʹе рʹисе шин, ширк, соре гәвәз, кʹьтане зьрав, пʹьрʹчʹа бьзьне у чʹәрмед бәранайә сор рʹәнгкьри у чʹәрмед га-мәʹсийа һәбун анин. 24 Һәр кәсе кӧ зив, сьфьр һʹәди дьда, чаԝа һʹәди Хӧданрʹа анин у щәм кʹе кӧ даре дарщеԝийе бона чекьрьна һʹәму тьшта һәбун анин.
26 ЩОТМӘҺЕ-1 МЬЖДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 37-38
«Горигәһед Коне Пироз у Рола Ԝан Һʹәбандьна Рʹастда»
(Дәркʹәтьн 37:25) Горигәһа бьхуре жь дара дарщеԝийе чекьр, дьрежайийа ԝе зәндәк, бәрайийа ԝе зәндәк, әԝ чар гошә бу, бьльндайийа ԝе дӧ зәнд, стьруйед ԝе жи жь ԝе бун.
it-1 82 ¶3
Горигәһ
Горигәһа бьхуре. Горигәһа бьхуре (ӧса жи дьһатә навкьрьне ча «горигәһа зерʹин» [Дркʹ. 39:38]) пе дара дарщеԝийе (акасийайе) һатьбу чекьрьне. Жора ԝе у дора ԝе зерʹкьри бу. Дора лева ԝе бь зерʹ тʹоԛкьри бу. Дьрежайа у бәрайа ԝе 44,5 см бу, бьльндайа ԝе жи 89 см бу. Жь чар әʹнишкед жорьнва стьруйед ԝе һәбун. Дӧ хәлаԛед зерʹин бьне тʹоԛва һәр дӧ кʹеләкава һатьбун чекьрьне (Дркʹ. 30:1-5; 37:25-28). Рʹоже дӧ щара, шәбәԛе у еваре, сәр ве горигәһе бьхура мәхсус дьшәԝьтандьн (Дркʹ. 30:7-9, 34-38). Чахе хәбәрдан дәрһәԛа шәԝьтандьна бьхуре дьчә, тʹьме дәрһәԛа агьрданге йане бьхурданге те готьне. Дьԛәԝьмә әв агьрданг ӧса жи дьһатә хәбьтандьне ԝәʹде шәԝьтандьна бьхуре ль сәр ве горигәһе (Ԛн.Кʹһ. 16:12, 13; Ибр. 9:4; Әʹнт. 8:5; бәрамбәр кә тʹәви 2 Др. 26:16, 19). Горигәһа бона шәԝьтандьна бьхуре һьндӧрʹе коне пирозда бу, пешбәри пʹәрде, йа кӧ Щийе Һәри Пироз башԛә дькьр. Ләма жи дәрһәԛа ве те готьне, ԝәки әԝ «пешбәри Сьндоԛа Шәʹдәтийе» бу (Дркʹ. 30:1, 6; 40:5, 26, 27).
(Дәркʹәтьн 37:29) Рʹуне рʹункьрьнейи пироз у бьхура хальсә бинхԝәш бь пьспорти тʹәвдайи чекьр.
it-1 1195
Бьхур
Бьхура пироз, кʹижан кӧ коне пирозда дьһатә хәбьтандьне, жь ԝан тьштед ԛимәт чедькьрьн, йед кӧ щьмәʹте ԛӧрбан дькьрьн (Дркʹ. 25:1, 2, 6; 35:4, 5, 8, 27-29). Йаһоԝа готә Муса кӧ әве бьхуре жь чар тьшта чекә: «Хԝәрʹа бьһарәтед бинхԝәш һьлди, аԝа готи ширеза даре, ԛахькед бәʹре, тузька мәлһʹәме у бьхура әʹрәбийә хальс, бьра кʹаше һʹәмуйа йәк бә. Вана бь пьспорти тʹәвдайи бьхурәкә ледайийә хальс у пироз чеки. Жь ве һьнәки һьлди һур-һур бькʹӧти у ль бәр Шәʹдәтийе, Коне Щьвинеда дайни, ԝе дәра кӧ әзе рʹасти тә бем. Әв бьхуре бона ԝә йа һәрә пироз бә». Сәва кӧ бе кʹьфше, ԝәки әв бьхур чьԛас пироз у мәхсус ә, Йаһоԝа гот: «Кʹе кӧ бона бинһьлдане анәгори ԝе хԝәрʹа тʹәвдайнә чекә, әԝ жь нав щьмәʹта хԝә бе рʹаԛәтандьне» (Дркʹ. 30:34-38; 37:29).
(Дәркʹәтьн 38:1) Жь дара дарщеԝийе горигәһа дийарийа тʹәвайишәԝате чекьр, дьрежайийа ԝе пенщ зәнд, бәрайийа ԝе пенщ зәнд әԝ чар гошә бу, бьльндайийа ԝе жи се зәнд.
it-1 82 ¶1
Горигәһ
Горигәһа Коне Пироз. Гава Коне Пироз һатә чекьрьне, ӧса жи дӧ горигәһ бь нәхше кӧ Хԝәде дабу, һатьнә чекьрьне. Горигәһа бона шәԝьтандьне (ӧса жи те навкьрьне ча «горигәһа сьфьр» [Дркʹ. 39:39]) пе дара дарщеԝийе (акасийайе) һатьбу чекьрьне. Әв «һьндӧрʹ вала» бу, демәк дьԛәԝьмә сәр у бьнива вәкьри бу. Әԝ чаргошә бу, дьрежайа ве у бәрайа ве жи 2,2 м бу, ле бьльндайа ве 1,3 м бу. Сәр һәр чар әʹнишкед ԝе стьру һәбун. Горигәһ бь тʹәмами сьфьркьри бу. Һьндӧрʹе горигәһе бьн кәвийа ԝе жь сьфьр читәкә мина тʹорʹ дани бун, ӧса кӧ чит «ниве горигәһеда» бу. Сәр һәр чар әʹнишкед горигәһе бәр чит хәлаԛа жь сьфьр һәбун. Дьԛәԝьмә ԝан хәлаԛава дӧ дәстуйед жь дара дарщеԝийе кӧ сьфьркьри бун, дәрбаз дькьрьн, ԝәки горигәһе щигӧһасти кьн. Дьԛәԝьмә дӧ алийед горигәһева ԛәрш һәбун у чит ԝан ԛәршава певакьри бу. Ле сәр һәр чар әʹнишкед горигәһе, незики чит, рʹува хәлаԛ һәбун. Ньһерʹандьна зандара дәрһәԛа ԝе йәке жь һәв щӧдә дьбә. Гәләк жь ԝан дьфькьрьн, ԝәки хенщи ԝан хәлаԛа диса ве горигәһева щики дьн жи алийе рʹува хәлаԛ певакьри бун, кʹижанава дәсту дәрбаз дькьрьн. Ӧса жи гәләк щурʹә һащәт бона горигәһе жь сьфьр чекьри бун. Мәсәлә тʹәбах, мәрʹьк бона кʹозийе, тʹәшт бона тʹопкьрьна хуна һʹәйԝана, гоштгьр у сьни бона агьр (Дркʹ. 27:1-8; 38:1-7, 30; Жм. 4:14).
Хьзна Кʹьтеба Пироз Бьгәрʹьн
(Дәркʹәтьн 37:1) Бьсалел жь дара дарщеԝийе сьндоԛ чекьр, дьрежайийа ԝе дӧ зәнд у нив, бәрайийа ԝе зәнд у нив, зәнд у нив жи бьльндайийа ԝе бу.
(Дәркʹәтьн 37:10) Жь дара дарщеԝийе тʹәхт чекьр, дьрежайийа ԝе дӧ зәнд, бәрайийа ԝе зәндәк у бьльндайийа ԝе зәнд у нив бу.
(Дәркʹәтьн 37:25) Горигәһа бьхуре жь дара дарщеԝийе чекьр, дьрежайийа ԝе зәндәк, бәрайийа ԝе зәндәк, әԝ чар гошә бу, бьльндайийа ԝе дӧ зәнд, стьруйед ԝе жи жь ԝе бун.
it-1 36
Дарщеԝи (Акасийа)
Гәләк чʹьԛьлед баха дарщеԝийе һәнә у әԝ бь стьруйа тʹьжә нә. Гәләк щар чʹьԛьлед дарщеԝийе тʹәви чʹьԛьлед бахе дарщеԝийейә дьн тʹәви һәв дьбьн у һәвва дьбьн кʹӧртан; ләма жи фәʹмдари йә кӧ чьма Кʹьтеба Пирозда хәбәра дарщеԝи (шиттим) гәләканида те хәбьтандьне. Бьльндайа дарщеԝийе дькарә 6-8 м бә, ле әв ча тʹум те хане. Бәлге ԝе зьрав у дьреж ьн, кӧлиркед ԝе ԛичʹьк ьн у бина хԝәш ԝан те, жь гӧпькед ԝан бәред мина лобийед дьреж дәртен. Бах рʹува рʹәнге тәʹри йә, һьм жи гәләк һʹьшк у ԛайим ә, жь бо чь жи кʹезьк нькарьн зийане бьдьне. Әв бах бәрʹийеда рʹьнд шин дьбә, жь бо чь жи әԝ матерйаләкә баш бу бона чекьрьна коне пироз у тьштед кӧ теда дьданә хәбате. Жь ве даре ӧса жи һатьбун чекьрьне сьндоԛа пәймане (Дркʹ. 25:10; 37:1), тʹәхте бона нане Хԝәдерʹа дайи (Дркʹ. 25:23; 37:10), горигәһ (Дркʹ. 27:1; 37:25; 38:1), дәсту бона щигӧһәстьна тьштед кон (Дркʹ. 25:13, 28; 27:6; 30:5; 37:4, 15, 28; 38:6), стунед бона пʹәрʹда (Дркʹ. 26:32, 37; 36:36), читед сәкьнанди (Дркʹ. 26:15; 36:20) у дәстуйед бона ԝан (Дркʹ. 26:26; 36:31).
(Дәркʹәтьн 38:8) Тʹәшта сьфьр у бьнгәһа ԝейә сьфьр жь ԝан нәйнькед кʹӧлфәтед кӧ бәр дәре Коне Щьвине хӧламти дькьрьн чекьр.
ԝ15 1/4 15 ¶4
Ԝә Заньбу?
Ԝәʹде бәре нәйник пе шушә ченәдькьрьн, чаԝа кӧ иро дькьн. Нәйник һʹәчʹи зәʹф жь һʹәсьнед һьлу чедькьрьн, гәләк щар жь бронз. Нәйник ӧса жи чедькьрьн пе сьфьр, зерʹ, зив у зерʹ-зив тʹәвайи һʹәланди. Щара пешийе Кʹьтеба Пирозда дәрһәԛа нәйнике те готьне, чахе әм дәрһәԛа чекьрьна коне пироз дьхуньн, йе кӧ щийе сәрәкә бу бона һʹәбандьне. Кʹӧлфәта нәйник дькьрьнә ԛӧрбан, сәва кӧ тʹәшта пирозә сьфьр у бьнгәһед ԝе чекьн (Дәркʹәтьн 38:8). Ча те кʹьфше нәйник дьһʹәландьн, сәва кӧ ԝан тьшта чекьн.
Хԝәндьна Кʹьтеба Пироз
(Дәркʹәтьн 37:1-24) Бьсалел жь дара дарщеԝийе сьндоԛ чекьр, дьрежайийа ԝе дӧ зәнд у нив, бәрайийа ԝе зәнд у нив, зәнд у нив жи бьльндайийа ԝе бу. 2 Дәр у һьндӧрʹе ԝе бь зерʹе хальс зерʹ кьр у дора лева ԝе тʹоԛәки зерʹин авите. 3 Бона һәр чар ньгед ԝе чар хәлаԛед зерʹин рʹо кьрьн, дӧ хәлаԛ аликива, дӧ хәлаԛ жи алийе дьнва. 4 Жь дара дарщеԝийе дәсту чекьрьн у әԝ зерʹ кьрьн. 5 Дәсту хәлаԛед кʹеләкед сьндоԛерʹа дәрбаз кьрьн, ԝәки сьндоԛ бе һьлдане. 6 Ԛалпʹахе бахшандьне жь зерʹе хальс чекьр, дьрежайийа ԝе дӧ зәнд у нив, бәрайийа ԝе жи зәнд у нив бу. 7 У сәр һәр дӧ сәрийед ԛалпʹахе бахшандьне пе зерʹ дӧ херубед кʹоланди чекьрьн. 8 Херубәк сәрикива дәрхьст, херубәки жи сәре дьнва, херуб жь ԛалпʹахе бахшандьне сәр һәр дӧ сәрийава дәрхьстьн. 9 Пʹәрʹед херуба бәрбь жор вәкьри бун у бь пʹәрʹед хԝә ԛалпʹахе бахшандьне дьньхамтьн. Бәре ԝан һәвдӧда бу у дина ԝан ԛалпʹахе бахшандьнеда бу. 10 Жь дара дарщеԝийе тʹәхт чекьр, дьрежайийа ԝе дӧ зәнд, бәрайийа ԝе зәндәк у бьльндайийа ԝе зәнд у нив бу. 11 Әԝ бь зерʹе хальс зерʹ кьр у дора ԝе тʹоԛәки зерʹин авите. 12 У дора ԝе бьльндайийа чар тʹьлийа кәви чекьр, дора кәвийа ԝе жи тʹоԛәки зерʹин авите 13 Бона ԝе чар хәлаԛед зерʹин рʹокьрьн у әԝ хәлаԛана бәр һәр чар ньга, сәр һәр чар әʹнишкава кьрьн, 14 Хәлаԛ кәвийава бун, ԝәки щийед дәстуйа һәбьн кӧ тʹәхт бе һьлдане. 15 Дәсту жь дара дарщеԝийе чекьрьн, әԝ зерʹ кьрьн кӧ бь ԝан тʹәхт бе һьлдане. 16 Дәрданед ль сәр тʹәхт сьни, тʹас, кʹас у щерʹ пе зерʹе хальс чекьрьн, ԝәки бь ԝан дийарийа сәрдакьрьне бе дайине. 17 Жь пʹарчʹәки зерʹе хальс шәмдан кʹоланди чекьр, бьнгәһа ԝе, стуна ԝе, тʹаськ, гӧл у севькед ԝе һʹәму жь ԝе дәрдькʹәтьн. 18 Кʹеләкава шәш чʹьԛьл дәрдькʹәтьн, се чʹьԛьл алики шәмданева бун у се чʹьԛьл жи алийе шәмданейи дьнва бун. 19 Се тʹаськед мина гӧлед бәһиве, севьк у гӧлава ль сәр чʹьԛьләки бун. Се тʹаськед мина гӧлед бәһиве, севьк у гӧлава жи сәр чʹьԛьле дьн бун, һәр шәш чʹьԛьлед кӧ жь шәмдане дәрдькʹәтьн аԝа бун. 20 Чар тʹаськед мина гӧлед бәһиве, севьк у гӧлава стуна шәмданева бун. 21 Севькәк бьн һәр дӧ чʹьԛьлед шәмданейе жерьнва, севькәк бьн һәр дӧ чʹьԛьлед ортʹева, севькәк жи бьн һәр дӧ чʹьԛьлед жорьнва бу. Ӧса бона һәр шәш чʹьԛьлед стуна шәмдане һәбун. 22 Севьк у чʹьԛьлед ԝе жь ԝе дәрдькʹәтьн. Һʹәму жь пʹарчʹәки зерʹе хальс кʹоланди һатьбу чекьрьне. 23 Һʹәфт чʹьра, дәстьк у сьнийед ԝе жь зерʹе хальс жерʹа чекьрьн. 24 Әԝ у һʹәму һащәтед ԝе, жь тәлантәк зерʹе хальс чекьр.