Кани бона «Бәрнама Щьвине, Бьжин у Хьзмәт кьн»
3-9 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ЖЬМАР 27-29
«Чʹәʹв Бьдьнә Хԝәде у Фьрԛийе Нәкьнә Нава Мәрьва»
ԝ13 15/6 10 ¶14
Бь Тʹәмамийа Дьле Хԝә Һʹӧнӧред Йаһоԝа Ԛимәт кьн
14 Пенщ хушк һатьн бал Муса у готьнә ԝи: «Чьма наве баве мә жь нава малбәта ԝи гәрә бе һьлдане, ԝәки кӧрʹед ԝи тʹӧнәнә? Жь нава бьрайед баве мә, мьлкʹ бьдә мә». Дьбәкә Муса ԝанарʹа гот: «Ԛанун бона һәр кәси йәк ә у бона ԝә тʹӧ гӧһастьн ԝе нәйе кьрьне»? На, ле дәԝсе «Муса шьхӧле ԝан дани ль бәр Хӧдан» (Жьмар 27:2-5). Гәло щаба пьрса ԝан чь бу? Йаһоԝа готә Муса: «Ԛизед Сьлофһʹад рʹаст дьбежьн. Мьлкʹ бьдә ԝан жь нава бьрайед баве ԝанда кӧ ԝар бьн, аԝа готи ԝаре баве ԝан дәрбази сәр ԝан кә». Йаһоԝа жь ве зедәтьр жи кьр. Әԝи ԛануна ну дәрхьст у готә Муса: «Гава йәк бьмьрә у кӧрʹе ԝи тʹӧнә бә, һьнге ԝаре ԝи бьра дәрбази ԛиза ԝи бә» (Жьмар 27:6-8; Йешу 17:1-6). Жь ԝи чахи һʹәму кʹӧлфәтед Исраели, дәрәща кʹижана мина йа ԝан бу, бь ԛануне дьһатьнә парастьне.
ԝ13 15/6 11 ¶15
Бь Тʹәмамийа Дьле Хԝә Һʹӧнӧред Йаһоԝа Ԛимәт кьн
15 Жь ве дәрәще те кʹьфше, ԝәки Йаһоԝа чьԛас ԛәнщ ә у фьрԛийе накә нава мәрьва! Йаһоԝа һьндава ԝан пенщ кʹӧлфәта хԝә ӧса да кʹьфше ча һьндава Исраелийед дьн, дәрәща кʹижана жь дәрәща ԝан кʹӧлфәта четьр бун у бь ԝе йәке әԝи һьндава ԝан кʹӧлфәтед фәԛир ԛәдьр да кʹьфше (Зәб. 68:5). Әԝа тʹәне дәрәщәкә жь гәләк дәрәщед кӧ Кʹьтеба Пирозда ньвисар ьн, жь кʹижана те кʹьфше, ԝәки Йаһоԝа һьндава һʹәму хьзмәткʹаред хԝә һʹәлал ә у фьрԛийе накә нава ԝан. Занәбуна ԝе йәке дьле мә гәрм дькә (1 Сам. 16:1-13; Кʹар. Шанд. 10:30-35, 44-48).
ԝ13 15/6 11 ¶16
Бь Тʹәмамийа Дьле Хԝә Һʹӧнӧред Йаһоԝа Ԛимәт кьн
16 Ча әм дькарьн чʹәʹв бьдьнә Йаһоԝа у фьрԛийе нәкьнә нава мәрьва? Дӧ тьшт дькʹәвә нава ԝе йәке. Һәрге әм дьле хԝәда фьрԛийе накьнә нава мәрьва, тʹәне ԝи чахи әме бькарьбьн һьндава ԝанда хԝә һʹәлал бьдьнә кʹьфше. Һәр кәс дькарә бьфькьрә, кӧ әԝ фьрԛийе накә нава мәрьва. Ле дьԛәԝьмә тӧйе ԛайил би, ԝәки нә һәртʹьм һеса йә дәрһәԛа ньһерʹандьна хԝә рʹаст бежьн. Гәло әм чь дькарьн бькьн, сәва кӧ тедәрхьн һәла әм бь рʹасти фьрԛийе накьнә нава мәрьва? Чахе Иса дьхԝәст пебьһʹәсә һәла мәрьв чь дәрһәԛа ԝи дьфькьрьн, әԝи жь һәвалед хԝәйә бь итʹбар пьрси: «Бь тʹәхмина мәрьва Кӧрʹе Инсан кʹи йә?» (Мәт. 16:13, 14). Ԝе йәкеда әм дькарьн чʹәʹв бьдьнә Иса. Әм дькарьн һәвале хԝәйә бь итʹбар бьпьрсьн, ԝәки әԝ мәрʹа һʹәлал бежә, һәла әм фьрԛийе дькьн нава мәрьва, йан на. Һәрге әԝ мәрʹа бежә, ԝәки щарна ӧса дьбә кӧ әм жь бо мьләт, навдарийе йан һәбуке фьрԛийе дькьн нава мәрьва, ԝи чахи әм чь гәрәке бькьн? Бь дьл у щан Йаһоԝарʹа дӧа бькьн у һәстед хԝә ԝирʹа вәкьн, жь ԝи лава бькьн, ԝәки әԝ али ԝә бькә ньһерʹандьна хԝә бьгӧһезьн у бькарьбьн бь тʹәмами чʹәʹв бьдьнә ԝи у фьрԛийе нәкьнә нава мәрьва (Мәт. 7:7; Колс. 3:10, 11).
Хьзна Кʹьтеба Пироз
(Жьмар 28:7) Әв ә дийарийа сәрдакьрьна ԝе: Пʹарәкә жь чар пʹаре һине шәрав бона һәр бәрхи ль щийе пироз чаԝа дийарийа сәрдакьрьне бьра Хӧданрʹа бе рʹетьне.
(Жьмар 28:14) Әва дийарийа сәрдакьрьна ԝе йә: Нив һин шәрав бона щанәге, пʹарәкә һине жь сьсийа йәк бона бәрен у пʹарәкә һине жь чара йәк бона бәрхе бьдьн. Әва дийарийа тʹәвайишәԝатейә мәһе йә бона һәр мәһе сале.
it-2 528 ¶5
Дийари
Дийарийа сәрдакьрьне. Дийарийа сәрдакьрьне тʹәви дийарийед дьн танин, хут паши ԝе йәке, ча щьмәʹта Исраеле дь Әʹрде Создайида щиԝар бун (Жм. 15:2, 5, 8-10). Әԝ шәрав бу йа кӧ сәр горигәһе дьһатә рʹетьне (Жм. 28:7, 14; бәрамбәр кә Дркʹ. 30:9; Жм. 15:10). Паԝлосе шанди мәсиһийед Филиперʹа ньвиси «һәгәр щи бе кӧ хуна мьн сәр ԝе баԝәрийа ԝәда бе рʹетьне, йа кӧ хьзмәткʹарийа ԝәда чаԝа ԛӧрбан Хԝәдерʹа те дайине, әзе ша бьм». Бь мәсәла дийарийа сәрдакьрьне, Паԝлос дьдә кʹьфше ԝәки һазьр ә бона һʹалхԝәшийа мәрийа, ча бежи хԝә бьрʹежинә (Флп. 2:17). Пешийа мьрьна хԝә әԝи Тимотʹейорʹа ньвиси: «Әз хԝәха ԛӧрбанбунерʹа иди сәр рʹож-рʹожа мә у ԝәхте чуйина мьн перʹа гьһиштийә» (2 Тим. 4:6).
(Жьмар 28:11-31) Сәре һәр мәһед хԝә Хӧданрʹа чаԝа дийарийа тʹәвайишәԝате: Дӧ щанәга, бәранәки, һʹәфт бәрхед йәксалийә бе ԛӧсур бьдьн. 12 Пʹарәкә чапейә жь дәһа сьсе аре хаси рʹунда стьрайи бона һәр щанәгаки, чаԝа дийарийа нани у пʹарәкә чапейә жь дәһа дӧдӧ аре хаси рʹунда стьрайи бона бәрен чаԝа дийарийа нани бьдьн. 13 Пʹарәкә чапейә жь дәһа йәк аре хаси рʹунда стьрайи бона һәр бәрхи чаԝа дийарийа нани бьдьн. Әва дийарийа тʹәвайишәԝатейә бинхԝәшә, дийарийа шәԝате йә Хӧданрʹа. 14 Әва дийарийа сәрдакьрьна ԝе йә: Нив һин шәрав бона щанәге, пʹарәкә һине жь йәк бона бәрен у пʹарәкә һине жь чара йәк бона бәрхе бьдьн. Әва дийарийа тʹәвайишәԝатейә мәһе йә бона һәр мәһе сале. 15 Нерики бона дийарийа паԛьжбуне Хӧданрʹа бьдьн, ль сәр дийарийа тʹәвайишәԝатейә һәр тʹьмрʹа у дийарийа ԝейә сәрдакьрьнерʹа. 16 Чардәһе мәһа йәке рʹожа Щәжьна Дәрбазбуне йә бона сьсийа Хӧдан. 17 У панздәһе ԝе мәһе жи щәжьн ә. Һʹәфт рʹожа һун гәрә нане шкәва бьхԝьн. 18 Рʹожа әʹԝльн щьвата пироз ә, тʹӧ шьхӧли нәкьн. 19 Дийарийа шәԝате, дийарийа тʹәвайишәԝате Хӧданрʹа бьдьн, аԝа готи, дӧ щанәга, бәранәки у һʹәфт бәрхед йәксали. Әԝ гәрә бе ԛӧсур бьн. 20 У ӧса жи дийарийа ԝанә нани жь аре хаси рʹунда тʹәвдайи. Пʹарәкә чапейә жь дәһа сьсе бона щанәга у пʹарәкә чапейә жь дәһа дӧдӧ бона бәрен, 21 пʹарәкә чапейә жь дәһа йәк бона ԝан һәр һʹәфт бәрхи бьдьн. 22 Ӧса жи нерики чаԝа дийарийа паԛьжбуне бона афукьрьна хԝә бьдьн. 23 Ве гәрә ль сәр дийарийа тʹәвайишәԝатейә сьбәһерʹа, аԝа готи дийарийа тʹәвайишәԝатейә һәр тʹьмрʹа бьдьн. 24 Һәр рʹож жь ԝан һʹәфт рʹожа һа бькьн. Әв нане дийарийа шәԝатейи бинхԝәш ә Хӧданрʹа. Ԝе ль сәр дийарийа тʹәвайишәԝатейә һәр тʹьмрʹа у дийарийа ԝейә сәрдакьрьнерʹа бьдьн. 25 У рʹожа һʹәфта диса ԝәрʹа щьвата пироз бә. Тʹӧ шьхӧли нәкьн. 26 Ль рʹожа дәрәмәтед пешьн жи гава һун дийарийа нане әʹԝльн Хӧданрʹа ԝәхте Щәжьна Һʹәфтийа биньн, бьра ԝәрʹа диса щьвата пироз бә, тʹӧ шьхӧли нәкьн. 27 Һун гәрә дийарийа тʹәвайишәԝате чаԝа дийарийа бинхԝәш Хӧданрʹа бьдьн, аԝа готи: Дӧ щанәга, бәранәки у һʹәфт бәрхед йәк сали. 28 У ӧса жи дийарийа ԝанә нанийә жь аре хаси рʹунда стьрайи: Пʹарәкә чапейә жь дәһа сьсе бона һәр щанәгайи, пʹарәкә чапейә жь дәһа дӧдӧ жи бона бәрен, 29 пʹарәкә чапейә жь дәһа йәк жи бона һәр һʹәфт бәрха бьдьн. 30 Нерики жи бона кʹәԝандьна хԝә бьдьн. 31 Ве у дийарийа ԝейә сәрдакьрьне ль сәр дийарийа тʹәвайишәԝатейә һәр тʹьмрʹа у дийарийа ԝейә нанирʹа бьдьн. Әԝ гәрә бе ԛӧсур бьн.
10-16 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ЖЬМАР 30-31
«Созе Хԝә ль Бәр Хӧдан Бинә Сери»
it-2 1162
Соз
Бь Рʹәзәдьлийе, ле Әʹсәйи Гәрәке Бе Сери. Соз бь рʹәзәдьли дьдан. Ль гора ԛануна Хԝәде, һәрге мәрьв соз дьда, әԝи әʹсәйи гәрәке әв созе хԝә бьанийа сери. Чахе мәрьв соз дьда, әԝи әʹмьре хԝә жи ве созева гьредьда, демәк һәрге мәрьв созе хԝә нәанийа сери, әԝи дькарьбу әʹмьре хԝә жи ӧнда кьра (Жм. 30:2; ӧса жи бьньһерʹә Рʹм. 1:31, 32). Кʹьтеба Пироз мәрьва һелан дькә фәсал бьн у кʹур бьфькьрьн сәр ԝан щабдарийа, йед кӧ һьлдьдьн сәр хԝә гава соза дьдьн, чьмки ԝе йәкева әʹмьр гьредайи йә. Ԛанунеда дьһатә готьне: «Һәгәр тӧ Хӧдан Хԝәдейе хԝәрʹа ад-ԛьрар ки, . . . Хӧдан Хԝәдейе тә ԝе жь тә әʹсә бьхԝазә у гӧнәйе ль сәр тә бә. Ле һәгәр тә ад-ԛьрар нә кьрийә, һьнге гӧнәйе ль сәр тә тʹӧнәбә» (Ԛн.Дщ. 23:21, 22).
it-2 1162
Соз
Созе кӧ әм Хԝәдерʹа дьдьн, те һʹәсабе әԝе йәке бькьн, чь кӧ мә ԛьрар кьрийә, мәсәлә ԛӧрбан йан һʹәди биньн, хьзмәткьрьна мәхсус дәстпекьн, йан жи инкʹар кьн тьштед кӧ хԝәха бь хԝә хьраб ниньн. Мәрьва соз бь рʹәзәдьлийе дьдан. Ԛәԝата создайине мина ԛәԝата сондхԝарьне бу у щарна әԝ һәрдӧ хәбәр Кʹьтеба Пирозда контекстәкида тенә хәбьтандьне (Жм. 30:2; Мт. 5:33). «Соз» те һʹәсабе тьштәки ԛьрар ки у әԝе ԛьраре әʹсәйи бини сери, ле «сонд» те һʹәсабе кәсе хԝәйиһʹӧкӧмрʹа әʹлам ки, кӧ созе тә рʹаст ә у тӧйе ви сози әʹсәйи бини сери. Гәләк щар бь сайа сонда пәйман дьһатьнә дәстуркьрьне (Дсп. 26:28; 31:44, 53).
ԝ04 1/8 27 ¶3
Фькьред Сәрәкә жь Кʹьтеба Жьмар
30:6-8: Гәло мере Мәсиһи дькарә созе жьна хԝә бәтал кә? Рʹожа иройин Йаһоԝа созе һәр хьзмәткʹарәки хԝә башԛә-башԛә һьлдьдә һʹәсаб. Мәсәлә һәр кәс шәхси созе тʹәсмилбуйине Йаһоԝарʹа дьдә (Галати 6:5). Изьна мер тʹӧнәйә әԝе созе бәтал кә. Алийе хԝәда жьн гәрәке созе ӧса нәдә, кӧ мьԛабьли Хәбәра Хԝәде нә йан жи мьԛабьли щабдарийед ԝе һьндава мере хԝә.
Хьзна Кʹьтеба Пироз
(Жьмар 30:10-12) Ле һәгәр жьнәк ль мала мере хԝәда ад-ԛьрар кьрийә йан борщ бь сонд һьлда йә ль сәр хԝә, 11 мере ԝе бьбьһе, дәнге хԝә нәкә у изьна ԝе бьдә, һьнге һʹәму ад-ԛьраред ԝе у һʹәму борщед ԝе ль сәр ԝе бьминьн. 12 Ле гава мере ԝе ль рʹожа кӧ бьбьһе, ԝан рʹәсит кә, һьнге һʹәму тьшт чь кӧ жь дәве ԝе дәркʹәтийә, аԝа готи ад-ԛьраред ԝе у борщед ԝейә ль сәр ԝе, һʹӧкӧме ԝан тʹӧнә. Мере ԝе әԝ рʹәсит кьрьн у Хӧдан ԝе бьбахшинә ԝе.
it-2 28 ¶1
Йәфтаһ
Мәрьв дькарьбун Йаһоԝарʹа бона хьзмәткьрьна коне пирозда бьһатана тʹәсмилкьрьне. Изьна де-бава һәбу, ԝәки зарʹед хԝә тʹәсмили ԝи щурʹә хьзмәтийе кьн. Дәрәща Самуйел жи һәма ӧса бу. Пешийа буйина ԝи, дийа ԝи Һаннайе соз дабу, кӧ әԝе кӧрʹе хԝә тʹәсмили Хԝәде бькә бона хьзмәткьрьна коне пирозда. Мере ԝе Әлкана созе ԝерʹа ԛайил бу. Жь ԝи чахи, гава Самуйел жь шире де һатә ԛәтандьне, Һаннайе ԝи ани коне пироз. Ӧса жи Һаннайе һʹәйԝан ԛӧрбан кьр (1 См. 1:11, 22-28; 2:11). Хенщи Самуйел ӧса жи Шьмшон жь зарʹотийа хԝә һатьбу тʹәсмилкьрьне, сәва кӧ ча Нәзир хьзмәт кә (Һʹкм. 13:2-5, 11-14; бәрамбәр кә Жм. 30:3-5, 16, кʹидәре кӧ те готьне дәрһәԛа һʹӧкӧме бав сәр ԛизе).
(Жьмар 30:1-16) Муса сәрԝеред ԛәбилед зарʹед Исраелрʹа хәбәрда у гот: «Әв ә хәбәра кӧ Хӧдан әʹмьр кьр: 2 ‹Гава мерәк ль бәр Хӧдан ад-ԛьрар бькә йан сонд бьхԝә кӧ борщәки һьлдә ль сәр хԝә, әԝ гәрә иди хәбәра хԝә нәтʹәрʹьбинә, ле һәр тьшт чь кӧ жь дәве ԝи дәркʹәтийә, гәрәке бинә сери. 3 Ле гава жьнәк ль мала баве хԝә, щаһьлтийа хԝәда ль бәр Хӧдан ад-ԛьрар кә кӧ борщәки һьлдә ль сәр хԝә 4 у баве ԝе жи бона ад-ԛьрар у борще ԝейи һьлдайи ль сәр хԝә бьбьһе, дәнге хԝә нәкә, һьнге һʹәму ад-ԛьраред ԝе у һʹәму борще һьлдайийә ль сәр хԝә, дьминьн. 5 Ле һәгәр баве ԝе ль ԝе рʹожа кӧ бьбьһе изьна ԝе нәдә, һьнге һʹәму ад-ԛьраред ԝе у борщед ԝейә ль сәр, рʹәсит дьбьн. Хӧдан ԝе бьбахшинә ԝе, чьмки баве ԝе изьн нә дайә ԝе. 6 Ле һәгәр әԝ мер кә у ад-ԛьраред ԝе у хәбәред дәве ԝейә бе һʹәмде хԝә готи, ль сәр ԝе нә, 7 ль ԝе рʹожа кӧ мәрә ԝе бьбьһе у дәнге хԝә нәкә, һьнге ад-ԛьраред ԝе у борще ԝейә һьлдайи ль сәр хԝә, дьминьн. 8 Ле һәгәр мәрә ԝе бьбьһе у хут ԝе рʹоже изьна ԝе нәдә, һьнге әԝ рʹәсит дькә ад-ԛьраре ль сәр ԝе у хәбәред дәве ԝейә бе һʹәмде хԝә готи. Хӧдан ԝе бьбахшинә ԝе. 9 Ле ад-ԛьраре жьнәбийе йан мербәрдайе, һәр борще кӧ ԝе һьлда йә ль сәр хԝә, ль сәр ԝе бьминә. 10 Ле һәгәр жьнәк ль мала мере хԝәда ад-ԛьрар кьрийә йан борщ бь сонд һьлда йә ль сәр хԝә, 11 мере ԝе бьбьһе, дәнге хԝә нәкә у изьна ԝе бьдә, һьнге һʹәму ад-ԛьраред ԝе у һʹәму борщед ԝе ль сәр ԝе бьминьн. 12 Ле гава мере ԝе ль рʹожа кӧ бьбьһе, ԝан рʹәсит кә, һьнге һʹәму тьшт чь кӧ жь дәве ԝе дәркʹәтийә, аԝа готи ад-ԛьраред ԝе у борщед ԝейә ль сәр ԝе, һʹӧкӧме ԝан тʹӧнә. Мере ԝе әԝ рʹәсит кьрьн у Хӧдан ԝе бьбахшинә ԝе. 13 Мер дькарә мак кә йан жи рʹәсит кә ԝан һʹәму ад-ԛьрар у борщед сондхԝарийә кӧ бона нәфса хԝә шкенандьне кьрийә. 14 Ле һәгәр мере ԝе, ԝе рʹоже дәнге хԝә нәкә, бь ԝе йәке әԝ һʹәму ад-ԛьраред ԝе у һʹәму борщед ль сәр ԝе мак дькә. Чьмки ль рʹожа кӧ ԝи бьһистийә дәнге хԝә нәкьрийә. 15 Ле һәгәр әԝ паши бьһистьна хԝә рʹәсит кә, һьнге әԝе дәԝса ԝе сущдар бә›». 16 Әв ьн ԛәйдә-ԛанунед кӧ Хӧдан әʹмьри ль Муса кьрьн, бона мер у жьна ԝи, бона бав у ԛиза ԝи, щаһьлтийа ԝеда ль мала баве хԝәда.
17-23 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ЖЬМАР 32-33
«Жь Бәр Хԝә Бәри Һʹәму Бьнәлийед Ԝи Әʹрди Дьн»
ԝ10 1/8 23
Ԝә Заньбу?
«Һеланед жорьн», дәрһәԛа кʹижана кӧ Ньвисаред Ибранида те готьне, чь бун?
Пешийа кӧ Исраели бькʹәтана Әʹрде Создайи, Йаһоԝа тʹәми да ԝан, ԝәки һʹәму тьштед, кӧ Кәнанийа бона һʹәбандьна ԛәлп дьданә хәбате, ԝеран кьн. Хԝәде готә ԝан: «Һʹәму шькьлед һʹәйкәлед ԝан у һʹәму һʹәйкәлед ԝани рʹокьри һурдәхԝәши кьн, һʹәму һеланед ԝанә жорьн ԝеран кьн» (Жьмар 33:52). «Һеланед ԝанә жорьн», кʹидәре кӧ хӧданед ԛәлп дьһʹәбандьн, сәр мәйданед бьльндщийа бун, йан жи щийед майин, мәсәлә, бьн бахада йан нав шәһәрада (1 Пʹадшати 14:23; 2 Пʹадшати 17:29; Һәзәԛел 6:3). Ԝедәре горигәһ, һәйкәл, шькьл, бьхурданг у тьштед дьнә һʹәбандьнева гьредайи һәбун.
ԝ08 15/2 27 ¶5-6
Жь Шашийед Исраелийа Дәрса Һин бьн
Иро әм рʹасти гәләк чәтьнайед ӧса тен, рʹасти кʹижана Исраели жи дьһатьн. Рʹожед мәйә модернда бона мәрьва гәләк тьшт дькарьн бьбьнә пʹут, мәсәлә пʹәрә, мәрьвед нав-дәнг, спорстмен, партийед политике, сәрԝеред религийа у һәла һе нәфәред мале жи. Әԝ тьшт дькарьн әʹмьре мәда щийе пешьн бьгьрьн. Ләма жи һәләԛәтийа незик тʹәви ԝан, кʹи кӧ Йаһоԝа һʹьз накә, дькарә рʹӧһʹанийа мә сьст кә.
Һʹәбандьна Баәʹлрʹа бенамусийева гьредайи бу. Әԝе йәке жь щьмәʹта Исраел гәләка кʹьшандә бәрбь хԝә у бона ԝан бу тʹәльк. Иро жи һьнәк жь хьзмәткʹаред Йаһоԝа дькʹәвьнә тʹәлька бенамусийе. Мәсәлә мәрьв гәләк һеса дькарә исафа хԝә бьһʹәрʹьминә, гава малда бәр компӧтәре рʹуньштийә у бе һʹәмде хԝә щурʹә-щурʹә малпәра дьтькинә. Сәд һʹәйф кӧ Мәсиһи жи Интернетеда дькʹәвьнә тʹәлька порногьрафийайе!
it-1 404 ¶2
Кәнан
Йешу билани да кʹьфше у «жь һʹәму тьштед кӧ Хӧдан бь әʹмьри дабу Муса, тʹӧ тьштәки кем нәкьр» чь кӧ ԛьркьрьна Кәнанийава гьредайи бу (Йеш. 11:15). Ле Исраелийа чʹәʹв нәданә Йешу у һәр тьшт чь кӧ әʹрд дьһʹәрʹьмандьн, ԝеран нәкьрьн. Кәнани тʹәви Исраелийа дьман, у әв йәк сәр Исраелийа хьраб һʹӧкӧм кьр. Ахьрийа ве йәке әв бу кӧ ԛачахти, бенамуси у пʹутпʹарьсти бәла бу у рʹуйе ве йәкеда дьһа зәʹф Исраели мьрьн, нә кӧ һәрге ԝана гӧрʹа Хԝәде бькьра у ԛьрʹа Кәнанийа банийана (Жм. 33:55, 56; Һʹкм. 2:1-3, 11-23; Зб. 106:34-43). Йаһоԝа Исраелийарʹа готьбу, кӧ әԝе диԝана ԝан бькә, һәрге әԝана һәләԛәтийа незик тʹәви Кәнанийа пешда биньн. Мәсәлә һәрге әԝана тʹәви ԝан бькʹәвьнә зәԝаще, әʹдәтед религийа ԝанва бенә гьредане у әʹйд-ԛәйдед ԝанә һʹәрам бькьнә ԛәйде хԝә, ԝи чахи Йаһоԝа ԝе диԝана ԝан ԝәк һәв бькә, демәк ԝе ԛьрʹа ԝан бинә (Дркʹ. 23:32, 33; 34:12-17; Ԛн.Кʹһ. 18:26-30; Ԛн.Дщ. 7:2-5, 25, 26).
Хьзна Кʹьтеба Пироз
(Жьмар 33:54) Бь пʹәшк авитьне һуне жь ԝи әʹрди, анәгори малбәтед хԝә, пʹар бьстиньн. Малбәта мәзьн ԝе зәʹф бьстинә, йа бьчʹук ԝе һьндьк бьстинә, кʹерʹа кʹидәре бькʹәвә әԝе жи бьбә пʹара ԝи. Анәгори ԛәбилед бавед хԝә хԝәрʹа ԝар һьлдьн.
it-1 359 ¶2
Синор
Чахе бь сайа пʹәшк дьһатә сафикьрьне кӧ кʹижан бәрәк ве кʹидәре щи-ԝар бә, гәрәке чапед ԝи әʹрди сәр һʹиме һәжмара ви бәрәки бьһата пʹарәвәкьрьне. «Бь пʹәшк авитьне һуне жь ԝи әʹрди, анәгори малбәтед хԝә, пʹар бьстиньн. Малбәта мәзьн ԝе зәʹф бьстинә, йа бьчʹук ԝе һьндьк бьстинә, кʹерʹа кʹидәре бькʹәвә әԝе жи бьбә пʹара ԝи» (Жм. 33:54). Гава бь сайа пʹәшк дьһатә сафикьрьне, ԝәки кʹижан әʹрд ԝе кʹерʹа бькʹәвә, әв йәк ида нә дьһатә гӧһастьне, ле чапа ви әʹрди дькарьбун бьгӧһастана. Чахе пеһʹәсийан, ԝәки әʹрде Щьһуда гәләк мәзьн ә, әв кем кьрьн у һьнә пʹаред ви әʹрди данә бәрәка Шьмһʹун (Йеш. 19:9).
(Жьмар 32:28-42) Муса бона ԝан әʹмьри Елазаре кʹаһин, Йешуйе кӧрʹе Нун у сәрԝеред малбәтед ԛәбилед зарʹед Исраел кьр 29 у Муса готә ԝан: «Һәгәр зарʹед Гад у зарʹед Рʹубен тʹәви ԝә Урдӧнерʹа дәрбаз бьн, һʹәму ль бәр Хӧдан шерʹрʹа һазьр бьн у әԝ әʹрд дәстед ԝәда бә, һьнге әʹрде Гиләʹд чаԝа мьлкʹ бьдьнә ԝан. 30 Ле һәгәр әԝ тʹәви ԝә чʹәкед хԝә гьредайи дәрбаз нәбьн, һьнге әԝе мьлкʹ тʹәви ԝә ль әʹрде Кәнанеда бьстиньн». 31 Зарʹед Гад у зарʹед Рʹубен вәгәрʹандьн у готьн: «Чаԝа кӧ Хӧдан готә әʹвдед тә әме ӧса жи бькьн. 32 Әме ль бәр Хӧдан чʹәк гьредайи дәрбаз бьнә ль әʹрде Кәнане, тʹәне бьра ԝаре мьлкʹе мә ви алийе Урдӧне бә». 33 Муса пʹадшатийа Сихоне пʹадше әморийа, пʹадшатийа Оге пʹадше Башане, әʹрд, бажаред ԝе синоре ԝанва аԝа готи һʹәму әʹрд бажарава данә зарʹед Гад, зарʹед Рʹубен у ниве ԛәбила Мьнашәйе кӧрʹе Усьв. 34 Зарʹед Гад Дибон, Әʹтʹәрот, Әʹроһер, 35 Әʹтʹрот-Шофан, Йазер, Йогбоһа, 36 Бетʹ-Нимра, Бетʹ-Һаран, бажаред суркьри чекьрьн, ӧса жи ахьлед пез. 37 Зарʹед Рʹубен Һʹәшбон, Әлале, Ԛирйатайим 38 ӧса жи Нәбо у Баәʹл-Мьһон, навед кʹижана һатьбунә гӧһастьне у Сивма чекьрьн. Навед ну данинә ль сәр бажаред кӧ чекьрьбун. 39 Зарʹед Махире кӧрʹе Мьнашә жи чунә Гиләʹде, әԝ зәфт кьрьн у бәри әморийе кӧ ль ԝьр дьман, дан. 40 Һьнге Муса Гиләʹд да Махире кӧрʹе Мьнашә у әԝ ль ԝьр щи-ԝар бу. 41 Йаире кӧрʹе Мьнашә жи чу гӧндед ԝе зәфт кьрьн у навед ԝан дани Һʹавот Йаир. 42 Новаһʹ чу Ԛьнат гӧндед ԝева зәфт кьр у наве хԝә, Новаһʹ, дани сәр.
24-30 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ЖЬМАР 34-36
«Сьтʹара Ԝә Йаһоԝа йә»
Гәло Сьтʹара Ԝә Йаһоԝа йә?
4 Ле чь дьԛәԝьми тʹәви ԝи мәрьви, йе кӧ бе һʹәмде хԝә хуна кәсәки бьрʹета? Рʹаст ә әԝи нәдьхԝәст мьрьна ԝи мәрьви, ле әԝ диса жи нәһәԛ бу кӧ хуна мәрьве бесущ һатә рʹетьне (Дәстп. 9:5). Ве дәрәщеда, әԝе кӧ бе һʹәмде хԝә кӧшт, дькарьбу бьрʹәвийа бажарәки сьтʹарбуне, сәва кӧ хԝә жь дәсте ԝи хьлаз кьра, йе кӧ гәрәке һʹәйфа хуне һьлда. Ԝедәре әԝ хԝәйкьри бу. Әԝ гәрәке ԝи шәһәре сьтʹарбунеда бьма, һʹәта мьрьна сәрәккʹаһин (Жьмар 35:15, 28).
Гәло Сьтʹара Ԝә Йаһоԝа йә?
6 Һәрге Исраелики бе һʹәмде хԝә кәсәк бькӧшта, әԝ гәрәке бьрʹәвийа шәһәре сьтʹарбуне, у бәр дәргәһ «рʹуспийарʹа» гьли кьра кӧ «чь ԛәԝьми». Рʹуспийа гәрәке ԝи бь дьл у щан ԛәбул кьрана (Йешу 20:4, ДТʹ). Һьнә ԝәʹдә шунда, ԝана ԝи дьшандьнә бал рʹуспийед ԝи шәһәри, кʹидәре кӧ кӧштьн ԛәԝьми бу, сәва әԝана диԝане бькьн кӧ ча у чьрʹа кӧштьн ԛәԝьми. (Бьхунә Жьмар 35:24, 25.) Һәрге әван рʹуспийа әʹлам кьрана кӧ әԝи бь рʹастийе нәхԝәстьбу у бе һʹәмде хԝә кӧштьбу, әԝ дькарьбу диса вәгәрʹийа шәһәре сьтʹарбуне.
Гәло Сьтʹара Ԝә Йаһоԝа йә?
Гава кӧ йе рʹәви дькʹәтә бажаре сьтʹарбуне, ԝедәре әԝ хԝәйкьри бу. Дәрһәԛа ван бажара Йаһоԝа гот: «Әԝ бона ԝә ԝе бьбьн щи-сьтʹар» (Йешу 20:2, 3, ДТʹ). Йаһоԝа дәʹԝа нәдькьр ԝәки әԝе кӧ бе һʹәмде хԝә кӧштьбу, диса бона ве йәке бе диԝанкьрьне. У әԝ мәрьве кӧ дькарьбу һʹәйфе һьлдә, изьна ԝи тʹӧнә бу бькʹәта бажаре сьтʹарбуне. Демәк, әв мәрьв тʹӧ щар ԝе нәтьрсийа кӧ кәсәке ԝи щәза бькә. Ԝи шәһәрида әԝ бьн хԝәйкьрьна Йаһоԝада бу. Әԝ кәледа нибу. Ви шәһәрида әԝ дькарьбу бьхәбьтийа, али мәрьва бькьра, у әʹдьлайеда Йаһоԝарʹа хьзмәт кьра. Бәле, әԝи дькарьбу бь әʹмьре бәхтәԝар бьжита!
Хьзна Кʹьтеба Пироз
(Жьмар 35:31) Жь бәр әʹмьре меркӧжва, йе кӧ гәрә бе кӧштьне һәԛ нәстиньн. Чьмки әԝ гәрә бе кӧштьне.
ԝ91 15/2 13 ¶13
Кʹьрʹин Бона Һәр Кәси
13 Ле Адәм у Һеԝа жь ве кʹьрʹине кʹаре настиньн. Ԛануна Мусада принсипа ӧса һәйә: «Жь бәр әʹмьре меркӧжва, йе кӧ гәрә бе кӧштьне һәԛ нәстиньн» (Жьмар 35:31). Адәм нәһатә хапандьне. Әԝи бь һʹәмде хԝә гӧнә кьр (1 Тимотʹейо 2:14). Кьред ԝи бәрамбәри меркӧжийе бу, чьмки ԛьсуртийа ԝи дәрбази сәр зӧрʹәта ԝи бу у әԝана кʹәтьнә бәр суще мьрьне. Фәʹмдари йә, ԝәки Адәм һежайи мьрьне бу, чьмки ча мәрьве беԛьсур әԝи хԝәха сафи кьр, кӧ гӧрʹа Хԝәде нәкә. Һәрге кʹьрʹин Адәмрʹа жи кʹар бьанийа, әв йәк ԝе мьԛабьли принсипед Йаһоԝайи һәԛ буйа. Ле зӧрʹәта Адәм бь сайа кʹьрʹине жь суще мьрьне аза бу (Рʹомайи 5:16). У ԛәԝата гӧнә йа кӧ мьрьне пәй хԝә тинә, кʹокева һатә бьрʹине. Әԝе кӧ гӧне мә кʹьрʹи «бона һʹәмуйа мьрьн» дит (Ибрани 2:9; 2 Корьнтʹи 5:21; 1 Пәтрус 2:24).
(Жьмар 34:1-15) Хӧдан Мусарʹа хәбәрда у гот: 2 «Әʹмьр ль зарʹед Исраел кә у бежә ԝан: ‹Әв ә әʹрде Кәнане кӧ синоред хԝәва ԝе пʹара ԝә кʹәвә. Гава һун бькʹәвьнә әʹрде Кәнане, 3 пʹара ԝәйә башуре ԝе жь бәрʹийа Сине рʹәх Әдомева һәрʹә. Алийе рʹоһьлата синоре ԝәйи башуре ԝе жь хьлазийа Бәʹра Мьри дәстпекә. 4 У синор ԝе жь башуре дагәрʹә һәвразе Әкрабиме, Синерʹа дәрбаз бә у ԝе ль башура Ԛадеш-Барнеайева дәркʹәвә у бьгьһижә Һʹасар-Аддаре у ԝе дәрбази Әсмоне бә. 5 Синор ԝе жь Әсмоне дагәрʹә һʹәта селафа Мьсьре у бьгьһижә бәʹре. 6 Синоре рʹоавайе ԝе Бәʹра Навбәре бә. Әԝе бьбә синоре ԝәйи рʹоавайе. 7 Әве жи бьбә синоре ԝәйи бакӧре: Жь Бәʹра Навбәре һʹәта чʹийайе Һор кʹьфш кьн. 8 Жь чʹийайе Һор һʹәта Льбо-Һамате кʹьфш кьн у жь ԝьр синоре бьгьһижә Сьдаде. 9 Синор ԝе һʹәта Зифроне һәрʹә у ль Һʹасар-Әйнане хьлаз бә. Әԝе бьбә синоре ԝәйи бакӧре. 10 Синоре хԝәйи рʹоһьлате жь Һʹасар-Әйнане һʹәта Шьфаме кʹьфш кьн, 11 жь Шьфаме ԝе бәржер һәрʹә һʹәта Рибьлаһе кӧ алийе рʹоһьлата Әʹйине йә, паше ԝе бәржер һәрʹә у бьгьһижә дәве Бәʹра Хьннерете, алийе рʹоһьлатева, 12 паше синоре бәржер һәрʹә Урдӧне у Бәʹра Мьрида хьлаз бә. Әве бьбә синоре дора әʹрде ԝә›». 13 Муса әʹмьри зарʹед Исраел кьр у гот: «Әв ә, әԝ әʹрде кӧ һуне бь пʹәшкавитьне ԝар бьн кʹижан кӧ Хӧдан әʹмьр кьр ԝәки нәһә у нив ԛәбиларʹа бе дайине. 14 Чьмки ԛәбила зарʹед Рʹубен малбәтед хԝәва у ԛәбила зарʹед Гад малбәтед хԝәва у ӧса жи ниве ԛәбила Мьнашә, ԝаре хԝә стандьнә. 15 Әԝ һәр дӧ ԛәбил у нив ԝи али Урдӧне, пешбәри Әриһайе, алийе рʹоһьлате, ԝаре хԝә стандьн».
31 ГӦЛАНЕ-6 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ԚАНУНА ДӦЩАРИ 1-2
«Диԝан Шьхӧле Хԝәде йә»
ԝ96 15/3 23 ¶1
Йаһоԝа Һәԛийе у Рʹастийе Һʹьз Дькә
Рʹуспийед кʹьфшкьри щабдар ьн, ԝәки комитейа диԝанкьрьне дәрбаз кьн бона ԝан хьзмәткʹара, кӧ гӧне гьран кьрьнә (1 Корьнтʹи 5:12, 13). Әԝана бира хԝәда хԝәйи дькьн, ԝәки гәрәке чʹәʹв бьдьнә һәԛийа Хԝәде у һʹәму дәрәщада кʹидәре кӧ мәщал чедьбә, дьлшәԝатийе бьдьнә кʹьфше. Һәрге хьзмәткʹар гӧне хԝә надә рʹуйе хԝә, ԝи чахи һʹим бона әʹйанкьрьна дьлшәԝатийе тʹӧнә. Ле рʹуспи тʹӧ хьзмәткʹари жь щьвате дәрнахьн жь бо ԝе йәке кӧ әв ԝан хԝәш найе. Рʹуспи баԝәр ьн, ԝәки дәрхьстьна жь щьвате ԝе али ԝан бькә сәр һʹьше хԝәда бен у вәгәрʹьнә щьвате (Бәрамбәр кә Һәзәԛел 18:23). Бьн сәрԝертийа Иса Мәсиһда рʹуспи бона һәԛийе кʹар дькьн у дьбьн «мина щиһе кӧ жь баһе» вәдьшерә (Ишайа 32:1, 2). Ләма жи әԝана гәрәке сәрԝахт бьн у фьрԛийе нәкьнә нава мәрьва (Ԛануна Дӧщари 1:16, 17).
ԝ02 1/8 9 ¶4
Сәрԝертийа кӧ Хԝәде Кʹьфш Кьрийә, Ԛәбул кьн
4 Жь һʹакьма дьһатә дәʹԝакьрьне нә кӧ тʹәне Ԛануне бьзаньбьн. Жь бо кӧ әԝ рʹуспи мәрьвед гӧнәкʹар бун, ԝана гәрәке сәр хәйсәт-һʹӧнӧред хԝәйә хьраб бьхәбьтийана. Мәсәлә, ԝана гәрәке фьрԛи нәкьра нава мәрьва, хԝәһʹьзи у тьмайи нәдана кʹьфше, чьмки әԝ һʹӧнӧр дькарьбун рʹийа ԝан бьгьрта кӧ бь һәԛийе диԝана мәрьва бькьн. Муса готә ԝан: «Диԝанеда фьрԛийе нәкьн, чаԝа гӧһ дьдьнә йе мәзьн ӧса жи гӧһ бьдьнә йе бьчʹук. Жь мәрьва нәтьрсьн чьмки диԝан шьхӧле Хԝәде йә». Бәле, һʹакьмед Исраеле жь наве Хԝәде диԝан дькьрьн. Дә бьдьнә бәр чʹәʹве хԝә әԝ шьхӧл ԛәдьр у щабдарикә чьԛас мәзьн бу! (Ԛануна Дӧщари 1:16, 17)
Хьзна Кʹьтеба Пироз
(Ԛануна Дӧщари 1:19) Чаԝа кӧ Хӧдан Хԝәдейе мә ль мә әʹмьр кьр ӧса әм жь Һʹоребе рʹекʹәтьн, нава ԝе ԛумьстана мәзьн у хофрʹа дәрбаз бун, кʹижан кӧ ԝә дит ль сәр рʹийа бәрбь чʹийа йед әморийа. Ӧса әм һатьнә Ԛадеш-Барнеайе.
(Ԛануна Дӧщари 2:7) Чьмки Хӧдан Хԝәдейе тә һʹәму шьхӧлед дәстед тә бьмбарәк кьр. Әԝ һаш рʹеԝитийа тә һәйә ль ве бәрʹийа мәзьнда. Әва чьл сал ә кӧ Хӧдан Хԝәдейе тә тʹәви тәйә у кемасийа тʹӧ тьшти тә нәдит»›.
ԝ13 15/9 9 ¶9
Тʹәмийед Йаһоԝа бь Итʹбар ьн
9 Чахе Исраели кʹәтьнә рʹеԝитийе, йа кӧ 40 сал кʹьшанд у нава ԛумьстана «мәзьн у хофрʹа дәрбаз бун», Йаһоԝа ԝанарʹа һур бь һур шьровәнәкьр, кӧ чаԝа әԝ ԝе рʹебәрийа ԝан бькә, ԝана бьпарезә у бона һʹәԝщед ԝан хәм бькә. Ле диса жи әԝи гәләк щар ԝанарʹа избат дькьр, кӧ әԝана дькарьн итʹбарийа хԝә ԝи у рʹебәрийа ԝи биньн. Йаһоԝа рʹож бь стунәкә әʹԝьр, ле шәв бь стунәкә агьр рʹебәрийа щьмәʹта хԝә дькьр у бь ԝе йәке избат дькьр, кӧ пьштгьрийа ԝан дькә (Ԛан. Дщр. 1:19; Дәркʹ. 40:36-38). Әԝи ӧса жи бона һʹәԝщед ԝанә һәррʹожи хәм дькьр, «кʹьнщед ԝан кәвьн нәбун у льнгед ԝан нәԝәрьмин». Бь рʹасти жи «ԛәт кемасийед ԝан тʹӧнә бун» (Нәһәм. 9:19-21).
(Qануна Дöщари 1:1-18) Әв ьн әw хәбәред кö Муса алийе рʹоһьлата Урдöне, бәрʹ Ийа Әʹрабайеда, Пешбәри Суфе, нава Паране у Тʹофәле, Лабане, Һʹасероте, Ди-Заһабеда готьбу тʹәмамийа Исраел. 2 Жь Һʹоребе һʹәта Qадеш-Барнеайе ль чʹийайе Сеһирерʹа рʹийа йанздәһ рʹожи бу. 3 Йәке мәһа йанздәһайә сала чьли, Муса һәр тьште кö Хöдан ль wи әʹмьр кьрьбу бона зарʹед Исраел готә wан. 4 Пәй wе йәкерʹа кö Сихон пʹадше әморийа кö Һʹәшбоне дьма, öса жи Оге пʹадше Башане кö Әʹштәротʹе у Едрәйе дьма һатьнә ледане. 5 Алийе рʹоһьлата Урдöне, әʹрде Моwабеда, Муса дәст бь шьровәкьрьна ве qануне кьр гот: 6 «Хöдан Хwәдейе мә, ль Һʹоребе мәрʹа хәбәр да гот: ‹Бәс ә һун ль ви чʹийайи бьминьн, 7 рʹабьн рʹекәвьн һәрʹьнә ль чʹийайед әморийа у һʹәму дор-бәред wанә дәшта Әʹрабайеда, ль чʹийа-банийа, Нәщәфе, дәве бәʹра, әʹрде кәнанийе у Лöбнане, һʹәта Фьрате чʹәме мәзьн. 8 Бьньһерʹә! Әз ви әʹрди дьдьмә бәр wә, һәрʹьн wи әʹрди бькьнә мьлкʹе хwә. Чьмки Хöдан кал-бавед wә, Бьраһим, Исһаq у Аqубрʹа сонд хwар кö wи әʹрди бьдә wан у пәй wанрʹа жи зöрʹәта wан›. 9 Wе һьнге мьн, Муса, готә wә: ‹Әз тʹәне qәwат накьм бькʹәвьмә бьн баре wә. 10 Хöдан Хwәдейе wә һун ль һәв зедә кьрьнә, иро һун бе һʹәсаб ьн мина стәйркед әʹзмен. 11 Бьра Хöдан Хwәдейе кал-бавед wә, wә һʹәзар щари жь ви һʹәсабе wә зедәтьр бькә у wә бьмбарәк бькә чаwа кö wи готьбу wә! 12 Ле әз тʹәне чаwа дькарьм баред wә, ниред wә у шәрʹ-дәʹwед wә һьлгьрьм? 13 Һун хwәрʹа жь qәбилед хwә мәрьвнә сәрwахт, аqьл у щерʹьбанди бьбьжерьн у әзе wан бькьмә сәрwеред wә›. 14 Wә щаба мьн да у гот: ‹Тә тьштәки qәнщ гот кö әм бькьн›. 15 Мьн сәрwеред qәбилед wә, мәрьвнә сәрwахт у щерʹьбанди һьлдан, әw ль сәр wә чаwа сәрһʹәзар, сәрсәд, сәрпенщи, сәрдәһә у бәрпьрсийар нава qәбилед wәда кʹьфш кьрьн. 16 Wе һьнге мьн ль һʹакьмед wә әʹмьр кьр у готә wан: ‹Гöһ бьдьнә бьрайед хwә у рʹаст һʹакьмтийе бькьн чаwа нава исраелийа, öса жи нава исраелики у хәрибәки. 17 Диwанеда фьрqийе нәкьн, чаwа гöһ дьдьнә йе мәзьн öса жи гöһ бьдьнә йе бьчʹук. Жь мәрьва нәтьрсьн чьмки диwан шьхöле Хwәде йә, ле һәр тьште кö wәрʹа зәʹмәт бә биньнә щәм мьн әзе гöһ бьдьме›. 18 Wе һьнге мьн бона һәр тьшти ль wә әʹмьр кьр кö һун гәрә чь бькьн.
7-13 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ԚАНУНА ДӦЩАРИ 3-4
«Ԛанунед Йаһоԝа Билан у Һәԛ ьн»
it-2 1140 ¶5
Фәʹмкьрьн
Чахе мәрьв Хәбәра Хԝәде кʹур леколин дькә у әʹмьре хԝәда дьдә хәбате, әԝ дькарә жь дәрсдар у каләмера билантьр бә (Зб. 119:99, 100, 130; бәрамбәр кә Лԛ. 2:46, 47). Һʹәму тʹәми у ԛанунед Хԝәде зәлал ьн у бь биланийе тʹьжә нә. Һәрге щьмәʹта Исраел ван ԛанун у тʹәмийед Хԝәде банийана сери, ԝи чахи мьләтед дәр-доре ԝан ԝе ԝана һʹәсаб кьрана ча «щьмәʹта билан у сәрԝахт» (Ԛн.Дщ. 4:5-8; Зб. 111:7, 8, 10; бәрамбәр кә 1 Пʹд. 2:3). Мәрьве сәрԝахт рʹастийа Хәбәра Хԝәде ԛәбул дькә, дьхԝазә ль гора ве бьжи у жь Хԝәде лава дькә кӧ али ԝи бькә (Зб. 119:169). Әԝ изьне дьдә ԝәки Хәбәра Хԝәде сәр һʹьш-аԛьле ԝи һʹӧкӧм кә (Мт. 13:19-23), дьле хԝәда хԝәй дькә (Мтʹл. 3:3-6; 7:1-4), у һʹәму «рʹийа дәрәԝ» нәфрʹәт дькә (Зб. 119:104). Гава Кӧрʹе Хԝәде сәр әʹрде бу әԝи биланийа ви щурʹәйи дьда кʹьфше. Әԝ һазьр бу сәр стуна щәфайе бе кӧштьне, чьмки заньбу кӧ бь ве йәке пʹехәмбәртийед жь Ньвисаред Пироз ԝе бенә сери (Мт. 26:51-54).
ԝ99 1/11 20 ¶6-7
Чахе бь Мәрʹданийе Дьди
Чахе жьн-пʹадша Шәбайе һәр тьшт дит у бьһист әԝ зәндәгьрти ма у бь мьлукти гот: «Зьламед тә чьԛас кʹефхԝәш, әԝ ԛулед тә чьԛас кʹефхԝәш һәр тʹьм ль бәр тә дьсәкьньн у һикмәта тә дьбьһизьн» (1 Пʹадшати 10:4-8). Әԝе дәрһәԛа хӧламед Сьлеман гот кӧ әԝана кʹефхԝәш ьн, демәк бәхтәԝар ьн, нә сәва ве йәке кӧ хер-хьзнеда дьжитьн, ле чьмки ԝана тʹьме дькарьбу жь зар-зьмане Сьлеман биланийа Хԝәде бьбьһистана. Бь рʹасти жьн-пʹадша Шәбайе мәсәләкә баш һишт бона хьзмәткʹаред Йаһоԝа йед рʹожа иройинрʹа жи, чьмки әԝана гӧһ дьдьнә биланийа Әʹфьрандар у кӧрʹе ԝи Иса Мәсиһ!
Әв хәбәред ве жи дина мә дькʹьшиньн сәр хԝә: «Хԝәдайе тә . . . бьла пироз бә!» (1 Пʹадшати 10:9). Ча те кʹьфше әԝе фәʹм дькьр, ԝәки билани у һәбуна Сьлеман жь Йаһоԝа бу. Әв йәк ль гора созе Йаһоԝа бу, кӧ әԝи щьмәʹта Исраелийарʹа готьбу: «Хԝәйи кьн у бьԛәдиньн [ԛәйдә-ԛанунед мьн], чьмки әв ә биланти у сәрԝахтийа ԝәйә ль бәр чʹәʹве мьләта. Әԝе кӧ ван һʹәму ԛәйдә-ԛануна бьбьһед ԝе бежьн: ‹Рʹасти әв щьмәʹта билан у сәрԝахт ә, мьләтәки мәзьн ә›» (Ԛануна Дӧщари 4:5-7).
ԝ07 1/8 29 ¶13
Тӧ ль Бәр Хԝәде Дәԝләмәнд и?
13 Чахе Хԝәде кʹәрәма хԝә сәр щьмәʹта хԝәда дьбаринә, әԝ тʹьме йа лапә баш дьдә ԝан (Аԛуб 1:17). Мәсәлә, чахе Йаһоԝа әʹрд бона жийине дьда Исраелийа әԝи әʹрде «кӧ шир у һьнгьв же дькʹьшийа», да ԝан. Рʹаст ә дәрһәԛа әʹрде Мьсьре жи ӧса те готьне, ле тьштәкида Мьсьр жь әʹрде Создайи щӧдә дьбу. Муса дәрһәԛа ви әʹрди Исраелийарʹа готьбу, ԝәки «кӧ Хӧдан Хԝәдейе тә бона ԝе хәм дькә». Бь хәбәред дьн бежьн, әԝ дьһатә һʹәсабе, ԝәки әԝана ԝе бь сайа ԛәԝат у кʹәрәма Йаһоԝа бәрәкʹәт буна. Һʹәта кӧ әԝана Йаһоԝарʹа амьн бун, әԝи ԝана кʹәрәм дькьр у әԝана жь һʹәму мьләтед дәр-дор баштьр дьжитьн. Бь рʹасти жи кʹәрәма Йаһоԝа «һәбуке дьдә»! (Жьмар 16:13; Ԛануна Дӧщари 4:5-8; 11:8-15)
Хьзна Кʹьтеба Пироз
(Ԛануна Дӧщари 4:23) Һаш жь хԝә һәбьн, ԝәки һун пәймана кӧ Хӧдан Хԝәдейе ԝә тʹәви ԝә гьреда, бир нәкьн. Хԝәрʹа пʹута дьлԛе тʹӧ тьштида ченәкьн, чь кӧ Хӧдан Хԝәдейе тә изьн нә да тә.
ԝ04 15/9 25 ¶3
Фькьред Сәрәкә жь Кʹьтеба Ԛануна Дӧщари
4:15-20, 23, 24: Ԛәдәхәкьрьна кӧ пʹута чекьн гәло те һʹәсабе, ԝәки изьн тʹӧнә кәсәки йан тьштәки бь нетәкә дьн нәԛьш кьн? На. Әԝ ԛәдәхәкьрьн тʹәне ԝан щурʹә нәԛьшкьрьна дькʹәт, кӧ бона һʹәбандьна ԛәлп чедькьрьн, у әԝ ԛәдәхәкьрьн щьмәʹте жь пʹутпʹарьстийе хԝәйи дькьр. Ньвисаред Пироз ԛәдәхә накьн кӧ бона һʹәԝаса хԝә тьштәки йан кәсәки бьнәԛьшиньн (1 Пʹадшати 7:18, 25).
(Ԛануна Дӧщари 3:1-13) Әм вәгәрʹийан у рʹийа Башанеда һәвраз чун. Оге пʹадше Башане тʹәмамийа мьләте хԝәва Едрәйеда дәркʹәтә мьԛабьли мә шерʹ. 2 Хӧдан готә мьн: ‹Жь ԝи нәтьрсә, чьмки әз әԝи тʹәви һʹәму мьләте ԝи, әʹрде ԝи дьдьмә дәсте тә. Те ӧса бини сәре ԝи, чаԝа кӧ тә ани сәре Сихоне пʹадше әморийа кӧ Һʹәшбоне дьма›. 3 Хӧдан Хԝәдейе мә, Оге пʹадше Башане у һʹәму мьләте ԝи данә дәсте мә. Мә ӧса ԝи хьст кӧ тʹӧ кәс жь ԝан сах нәма. 4 Ԝе һьнге мә һʹәму бажаред ԝан зәфт кьрьн, бажар нәмабу кӧ мә һьлнәдабуйа, аԝа готи шест бажар, тʹәмамийа ԛәза Аргове, пʹадшатийа Оге Башане. 5 Һʹәму әв бажар бь суред бьльнд, щот дәргәһа у зәрʹзава ԛәԝаткьри бун, хенщи гәләк гӧндед бе сур. 6 Мә әԝ ԝеран кьрьн, әԝ тʹам дийари Хӧдан кьрьн, чаԝа кӧ мә ани сәре Сихон пʹадше Һʹәшбоне, һәр бажар тʹәви жьн, мера у зарʹа ԝеран кьрьн. 7 Ле һʹәму һʹәйԝан у тʹалан жь ԝан бажара мә хԝәрʹа һьлдан. 8 Ԝи чахи мә әʹрде алийе рʹоһьлата Урдӧне жь селафа Арноне һʹәта чʹийайе Һәрмоне жь дәсте дӧ пʹадшед әморийа станд. 9 (сайдани Һәрмонерʹа Сирйон дьбежьн, әмори жи Сәнир дьбежьн.) 10 Һʹәму бажаред дәшта чʹийе у тʹәмамийа Гиләʹд, тʹәмамийа Башане һʹәта Салкʹайе у Едрәйе, бажаред пʹадшатийа Ог ль Башане мә һьлда. 11 (Чьмки жь рʹьфайийа тʹәне Оге пʹадше Башане мабу. Ва йә дарбәста ԝийә һʹәсьни ньһа Рʹаббайеда щәм зарʹед амонийа йә, дьрежайа ԝе нәһә зәнд ә, бәрайа ԝе чар зәнд ә, зәнде гьһиштийа.) 12 Ԝе һьнге мә әԝ әʹрд хԝәрʹа кьрә мьлкʹ. Әʹроһер незики селафа Арноне у ниве чʹийайед Гиләʹде тʹәви бажаред ԝи мьн да рʹубенийа у гадийа. 13 Чь кӧ жь Гиләʹде мабу у тʹәмамийа Башана пʹадшатийа Ог мьн да ниве ԛәбила Мьнашә. (Тʹәмамийа ԛәза Аргове ль тʹәмамийа Башанеда дьһатә навкьрьне чаԝа әʹрде рʹьфайийа.
14-20 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ԚАНУНА ДӦЩАРИ 5-6
«Де-Бавно Зарʹед Хԝә Һин кьн, ԝәки Йаһоԝа Һʹьз Бькьн»
ԝ05 15/6 20 ¶11
Де-Бавно бона Һʹәԝщед Зарʹед Хԝә Хәм Бькьн
11 Чахе хәбәрдан дәрһәԛа ԝе йәке дьчә, тʹӧ рʹез жь Кʹьтеба Пирозда ӧса гәләк щар найнә хәбьтандьне ча кʹьтеба Ԛануна Дӧщари 6:5-7. Жь кʹәрәма хԝә вәкьн әԝе кʹьтебе у ԝан рʹеза бьхуньн. Дина хԝә бьдьне, ԝәки де-баварʹа те готьне кӧ йа әʹԝльн рʹӧһʹанийа хԝә ԛәԝи кьн, һʹьзкьрьна хԝә һьндава Йаһоԝа пешда биньн у бь дьл хәбәра ԝи ԛәбул кьн. Бәле, сәва кӧ әм занәбуна рʹастийа Йаһоԝа бьстиньн у һʹьзкьрьне һьндава принсип у ԛанунед ԝи пешда биньн, лазьм ә Хәбәра ԝи кʹур леколин бькьн, һәр рʹож бьхуньн у сәр бьфькьрьн. Ԝи чахи рʹастийа Хәбәра Хԝәде ԝе дьле ԝәда бә, чь кӧ дьле ԝе ԝә бь шабуне, хԝәдехофийе у һʹьзкьрьне һьндава Йаһоԝа тʹьжә кә. Һьнге әме бь мәрʹдани бькарьбьн рʹастийед жь Хәбәра Хԝәде тʹәви зарʹед хԝә пʹарәвәкьн (Луԛа 6:45).
ԝ07 15/5 15-16
Чаԝа Әз Дькарьм Али Зарʹед Хԝә Бькьм Һинкьрьна Баш Бьстиньн?
Нет-Мәрәм, тьштед ԛимәт у хԝәстьнед тә, нә кӧ тʹәне хәбәрданеда, ле кьред тәда жи әʹйан дьбьн (Рʹомайи 2:21, 22). Жь зарʹотийе зарʹ дина хԝә дьдьнә де-баве хԝә у әԝана ԝан тьшта һин дьбьн, чь кӧ бона де-бава фәрз ә. Һәрге тӧ бь рʹасти Йаһоԝа һʹьз дьки, әԝ йәк ԝе зарʹед тәрʹа жи әʹйан бә. Мәсәлә, зарʹед тә ԝе тʹәхмин кьн, кӧ һинбун у хԝәндьна Кʹьтеба Пироз бона тә гәләк фәрз ә. Әԝана ԝе фәʹм бькьн, кӧ тӧ шьхӧлед Пʹадшатийе әʹмьре хԝәда датини сәр щийе пешьн (Мәтта 6:33). Әԝ йәк кӧ тӧ тʹьме сәр щьвата йи, шьхӧле мьзгинийеда хԝә паш нахи, ԝе зарʹед тәрʹа бьдә кʹьфше, кӧ бона тә дьһа фәрз ә Йаһоԝарʹа хьзмәт ки (Мәтта 28:19, 20; Ибрани 10:24, 25).
ԝ05 15/6 21 ¶14
Де-Бавно бона Һʹәԝщед Зарʹед Хԝә Хәм Бькьн
14 Чаԝа жь Ԛануна Дӧщари 6:7 те кʹьфше пʹьрʹ мәщалед де-бава һәнә тʹәви зарʹед хԝә пьрсед рʹӧһʹани шеԝьр кьн. Гава рʹеда ньн, шьхӧлед малева мьжул дьбьн, йан жи тʹәвайи һеса дьбьн, ԝи чахи де-бав дькарьн мәщале бьвиньн, ԝәки бона рʹӧһʹанийа зарʹед хԝә хәм бькьн. Һьлбәт әʹсәйи нинә тʹәне дәрһәԛа рʹастийа жь Кʹьтеба Пироз тʹәви зарʹед хԝә хәбәр дьн. Бьхәбьтьн сәр ԝе йәке, кӧ хәбәрдана тʹәви нәфәра керһати бә у тьштед рʹӧһʹанива гьредайи бә. Мәсәлә, дь журнала «Һʹьшйар Бьн!» гәләк готар дәрһәԛа щурʹә-щурʹә тʹема һәнә. Готаред ӧса дькарьн бьбьнә һʹиме хәбәрдана дәрһәԛа һʹәйԝана, дәрһәԛа бәдәԝийа тʹәбийәте сәр тʹәмамийа планете, ӧса жи дәрһәԛа култур у әʹйд-ԛәйдед щурʹә-щурʹә мьләта. Хәбәрданед ԝи щурʹәйи дькарьн зарʹа һелан кьн һе зедә әʹдәбйәтед жь хӧламе амьн у сәрԝахт бьхуньн (Мәтта 24:45-47).
Хьзна Кʹьтеба Пироз
(Ԛануна Дӧщари 5:21) Дьлһавьжийа кʹӧлфәта тʹӧ кәси нәки. Нә дьлһавьжийа мала тʹӧ кәси, нә әʹрде ԝи, нә хӧламе ԝи, нә щарийа ԝи, нә гайе ԝи, нә кʹәра ԝи, ӧса жи тʹӧ тьште тʹӧ кәси›.
ԝ19.02 22 ¶11
Ԛануна Муса Ча Һʹьзкьрьн у Һәԛийа Йаһоԝа Әʹйан Дькә
11 Дәрс: Йаһоԝа мәрьва тʹәне рʹува наньһерʹә, әԝ дьвинә дьле мә, демәк әм бь рʹасти чь щурʹәйи нә (1 Сам. 16:7). Әм нькарьн тʹӧ фькьр, емосийа у шьхӧләки жь ԝи вәшерьн. Әԝ нав мәда һʹӧнӧред баш дьгәрʹә у дьхԝазә әм ԝан һʹӧнӧра бал хԝә зедә кьн. Ле әԝ ӧса жи дьхԝазә, ԝәки әм контрол кьн у тедәрхьн ԝан фькьред нәрʹаст, кʹижан кӧ дькарьн мә бьвьн бәрбь кьред хьраб (2 Дир. 16:9; Мәт. 5:27-30).
(Ԛануна Дӧщари 5:1-21) Муса гази тʹәмамийа Исраел кьр у готә ԝан: «Бьбьһе Исраел, ԛәйдә-ԛанун у ԛьраред кӧ әз иро ԝәрʹа дьбежьм. Һун жи ԝан һин бьн у бькьн кӧ ԝан бьԛәдиньн. 2 Хӧдан Хԝәдейе мә ль бәр Һʹоребе пәйман тʹәви мә гьреда. 3 Хӧдан тʹәви кал-бавед мә әва пәймана гьренәда, ле хут тʹәви мә һʹәмуйа, йед кӧ иро сах-сьламәт ль вьр ьн. 4 Хӧдан ль сәре чʹийе жь нава егьрда рʹу бь рʹу тʹәви ԝә хәбәрда. 5 Әз жи ԝи чахи навбәра ԝә у Хӧданда сәкьнибум, ԝәки хәбәра Хӧдан ԝәрʹа бежьм, чьмки һун жь агьр дьтьрсийан у һьлнәдькʹьшийанә сәре чʹийе, һьнге Хӧдан гот: 6 ‹Әз Хӧдан Хԝәдейе тә мә, йе кӧ тӧ жь ԝәлате Мьсьре, жь мала хӧламтийе дәрхьсти. 7 Пештьри мьн хԝәдейе тәйә майин тʹӧнә бьн. 8 Тʹӧ пʹути мина дьлԛе тьштәкида хԝәрʹа че нәки, нә жор ль әʹзмен, нә жер ль сәр әʹрде, нә жи нава авед бьн әʹрдеда. 9 Бәр ԝана та нәби у хӧламтийа ԝан нәки, чьмки әз Хӧдан Хԝәдейе тә Хԝәдеки кʹӧмрʹәш ьм, кӧ бона нәһәԛийед бава тиньмә сәре зарʹа һʹәта ньсьле сьсийа у чара йед кӧ дьжәньнә мьн, 10 ле әԝед кӧ мьн һʹьз дькьн у әʹмьред мьн дьԛәдиньн, әзе һʹәта һʹәзар ньсьли бь һʹӧба амьн тʹәви ԝан бьм. 11 Наве Хӧдан Хԝәдейе хԝә бадиһәԝа нәди сәр заре хԝә, чьмки Хӧдан ԝе йе кӧ наве ԝи бадиһәԝа дьдә сәр заре хԝә бе щәза нәһелә. 12 Рʹожа шәмийе хԝәй кә у пироз кә, чаԝа кӧ Хӧдан Хԝәдейе тә ль тә әʹмьр кьр. 13 Шәш рʹожа бьхәбьтә у һʹәму шьхӧле хԝә бькә, 14 ле рʹожа һʹәфта, шәмийа рʹьһʹәтийа бона Хӧдан Хԝәдейе тә йә, тʹӧ шьхӧли нәки, нә тӧ, нә кӧрʹе тә, нә ԛиза тә, нә хӧламе тә, нә щарийа тә, нә гайе тә, нә кʹәра тә, нә һʹәйԝанәки тә, нә жи хәрибе нава тәда, ԝәки хӧлам у щарийа тә мина тә рʹьһʹәт бә. 15 Бир бинә ԝәки тӧ хӧлам буйи ль әʹрде Мьсьреда у Хӧдан Хԝәдейе тә, тӧ жь ԝьр дәрхьсти, бь дәсте зор у зәнда дьрежкьри, ләма жи Хӧдан Хԝәдейе тә ль тә әʹмьр кьр кӧ шәмийа рʹьһʹәтийе хԝәй ки. 16 Ԛәдьре де у баве хԝә бьгьри, чаԝа кӧ Хӧдан Хԝәдейе тә ль тә әʹмьр кьр, ԝәки әʹмьре тә дьреж бә, ԝәки тәрʹа ԛәнщ бә ль сәр әʹрде кӧ Хӧдан Хԝәдейе тә дьдә тә. 17 Нәкӧжи. 18 Зьнийе нәки. 19 Нәдьзи. 20 Мьԛабьли тʹӧ кәси шәʹдәтийа дәрәԝ нәди. 21 Дьлһавьжийа кʹӧлфәта тʹӧ кәси нәки. Нә дьлһавьжийа мала тʹӧ кәси, нә әʹрде ԝи, нә хӧламе ԝи, нә щарийа ԝи, нә гайе ԝи, нә кʹәра ԝи, ӧса жи тʹӧ тьште тʹӧ кәси›.
21-27 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ԚАНУНА ДӦЩАРИ 7-8
«Пьсмамтийе Ԝанрʹа Нәкә»
ԝ12 1/7 29 ¶2
Чьма Хԝәде Дәʹԝа Дькьр, ԝәки Хьзмәткʹаред Ԝи Тʹәне Тʹәви Баԝәрмәндед Хԝә Бьзәԝьщьн?
Йаһоԝа заньбу, ԝәки Мире-щьна дьхԝазә щьмәʹта ԝи бьхальфинә у ԝана бәрбь һʹәбандьна ԛәлп бьвә. Хԝәде дәрһәԛа пʹутпʹарьста щьмәʹта хԝәрʹа гот, ԝәки «әԝе кӧрʹед тә жь мьн бьхальфиньн у ԝе пʹутед башԛәрʹа ԛӧльх кьн». Гәләк фәрз бу гӧһ бьдьнә ве тʹәмийе. Һәрге щьмәʹта Исраели дәстпекьра хӧданед ԛәлп бьһʹәбандана, ӧса ԝана ԝе ԛәбулкьрьн у парастьна жь Йаһоԝа ӧнда кьрана у һеса бькʹәтана дәсте дьжмьнед хԝә. Ле гәло ԝи чахи Мәсиһе создайи ԝе чаԝа жь мьләте ԝан пешда бьһата? Фәʹмдари йә чьма Мире-щьна бь һʹәму щурʹәйи щьмәʹта Исраели һелан дькьр, кӧ тʹәви щьмәʹтед пʹутпʹарьст бьзәԝьщьн.
ԝ15 3/1 30-31
Бьзәԝьщьн Тʹәне Тʹәви «Баԝәрмәнде Хӧдан» Гәло Әԝ Реали йә?
Ле ԝәки ӧса нә пьрс пешда те: Гәло чьрʹа Йаһоԝа әԝа тʹәми да щьмәʹта хԝә ԝәки бьзәԝьщьн тʹәне тʹәви баԝәрмәнде Хӧдан? Чьмки Йаһоԝа жь һʹәмушка баштьр занә чь щьмәʹта ԝирʹа ԛәнщ ә. Йаһоԝа нә кӧ тʹәне ԝе йәке дьхԝазә кӧ әм жь бо жьбартьна нәрʹаст нәчәрчьрьн, ле әԝ ӧса жи дьхԝазә кӧ әм бәхтәԝар бьн. Ԝәʹде Нәһәмийада гәләк мәрьвед щьһу дьзәԝьщин тʹәви нә щьһуйа, йед кӧ Йаһоԝарʹа ԛӧльх нәдькьрьн. Нәһәмийа дина ԝана да сәр мәсәла Сьлеман Пʹадша у ԝанарʹа гот, кӧ рʹаст ә Хԝәде Сьлеман һʹьз дькьр ле «жьнед бийан [хәриб] һʹәта ԝирʹа жи сущ дан кьрьн» (Нәһәмийа 13:23-26). Ләма иро жи Хԝәде тʹәмийе дьдә ԛӧльхкʹаред хԝә ԝәки бьзәԝьщьн тʹәне тʹәви ԝан, йед кӧ нава баԝәрийа рʹастда ньн (Зәбур 19:7-10; Ишайа 48:17, 18). Мәсиһийед рʹаст бь дьл у щан дьшекьриньн һʹьзкьрьн у хәмкьрьна Хԝәде у итʹбарийа хԝә рʹебәрийа ԝи тиньн. Бь ԝе йәке әԝана гӧрʹа Хԝәде дькьн, у ԛәбул дькьн кӧ әԝ ә Сәркʹаре лапи мәзьн (Мәтʹәлок 1:5).
ԝ15 8/1 26 ¶12
Дь ԝан Рʹожед Ахьрийеда жь Һәвалтийа Хьраб Дур бә
12 Мәсиһийед азәпрʹа, йед кӧ дьхԝазьн бьзәԝьщьн йан жи мер кьн, лазьм ә фәсал хԝәрʹа һәвала бьжберьн. Кʹьтеба Пироз пешда мәрʹа дьбежә: «Тʹәви нәбаԝәра нәкʹәвьнә бьне нирәки. Чь кʹаре һәԛийе тʹәви нәһәԛийе һәйә? Йан чь һәләԛәтийа рʹонайе тʹәви тәʹрийе?» (2 Корьнтʹи 6:14). Кʹьтеба Пироз ԛӧльхкʹаред Хԝәдерʹа әʹйан дьбежә, кӧ әԝана гәрәке бьзәԝьщьн тʹәне тʹәви «баԝәрмәнде Хӧдан», демәк бьзәԝьщьн тʹәви ԝи йан ԝе йе кӧ хԝә тʹәсмили Хԝәде кьрийә у ньхӧманди йә, у ӧса жи йе кӧ дьжи бь принсипед Йаһоԝа (1 Корьнтʹи 7:39). Чахе тӧ бьзәԝьщи тʹәви ԝе йан жи мер ки тʹәви ԝи кʹе кӧ Йаһоԝа һʹьз дькә, әԝ ԝе тәрʹа әԝ һәвал бә, кʹижан кӧ али тә бькә Хԝәдерʹа амьн бьмини.
Хьзна Кʹьтеба Пироз
(Ԛануна Дӧщари 8:3) Әԝи тӧ та кьри, бьрʹчи һьшти у мана тӧ дайи хԝарьне, кʹижан нә тә заньбу чийә нә жи кал-бавед тә. Ԝәки тәва әʹйан кә кӧ инсан тʹәне бь нен нажи, ле бь һәр тьште кӧ жь дәве Хӧдан дәрдькʹәвә дьжи.
ԝ04 1/2 13 ¶4
Йаһоԝа Бона Һʹәԝщед Мәйә Һәррʹожи Хәм Дькә
4 Чахе әм бона нане һәррʹожи дӧа дькьн, әԝ йәк дькә бира мә, ԝәки әм гәрәке ӧса жи һʹәԝщед хԝәйә рʹӧһʹани рʹази кьн. Паши ԝе йәке ча Иса гәләк рʹож рʹожи гьрт, әԝ гәләк бьрʹчи бу, ле диса жи әԝи готьна Мире-щьна инкʹар кьр, кӧ кәвьра бькә нан. Иса готә Мире-щьна: «Ньвисар ә: ‹Инсан тʹәне бь нен нажи, ле бь һәр хәбәра кӧ жь дәве Хԝәде дәрдькʹәвә›» (Мәтта 4:4). Бь ԝан гьлийа Иса хәбәред Муса пʹехәмбәр ԝәкʹьланд, кʹижан кӧ әԝи Исраелийарʹа готьбу: «Әԝи [Йаһоԝа] тӧ та кьри, бьрʹчи һьшти у мана тӧ дайи хԝарьне, кʹижан нә тә заньбу чийә нә жи кал-бавед тә. Ԝәки тәва әʹйан кә кӧ инсан тʹәне бь нен нажи, ле бь һәр тьште кӧ жь дәве Хӧдан дәрдькʹәвә дьжи» (Ԛануна Дӧщари 8:3). Гава Йаһоԝа мана дьда Исраелийа, бь ԝе йәке әԝи нә кӧ тʹәне ԝана тʹер дькьр, ле ӧса жи дәрсед фәрз ԝана һин дькьр. Мәсәлә әԝана гәрәке «чьԛас лазьмә тʹера ԝе рʹоже бәрәв» кьрана. Һәрге ԝана жь ԝе зедәтьр һьлдьдан, хԝарьна кӧ дьма, рʹожа дьн бин дькʹәте у кӧрми дьбу (Дәркʹәтьн 16:4, 20). Ле чахе рʹожа шәша ԝанарʹа лазьм бу бона дӧ рʹожа хԝарьн бәрәв кьрана, демәк бона рʹожа Шәмийе, ԝи чахи хԝарьн хьраб нәдьбу (Дәркʹәтьн 16:5, 23, 24). Бь сайа ԝе дәрәще Исраели дәрс һин бун, кӧ әԝана гәрәке гӧһдар бьн, чьмки әʹмьре ԝан нә кӧ тʹәне нанва гьредайи бу, ле «бь һәр тьште кӧ жь дәве Хӧдан дәрдькʹәвә».
(Ԛануна Дӧщари 7:1-16) Гава Хӧдан Хԝәдейе тә тә бьбә ԝи әʹрде кӧ тӧ дьчуйи ле ԝар би, әԝе гәләк мьләт жь бәр тә рʹаԛәтинә: Һʹитийа, гиргашийа, әморийа, кәнанийа, пьриззийа, һʹиԝийа, йәбусийа, һʹәфт мьләтед жь тә гәләктьр у зортьр. 2 Кʹәнге Хӧдан Хԝәдейе тә ԝан бьдә дәсте тә, тӧ ԝан хи, һьнге тʹам ԛьрʹа ԝан бинә ньфьрʹе Хӧдан бинә сери, тʹәви ԝан пәймане гьренәдә у һʹәйфа тә ль ԝан нәйе. 3 Пьсмамтийе ԝанрʹа нәкә, ԛизед хԝә нәдьнә кӧрʹед ԝан у нә жи ԛизед ԝан кӧрʹед хԝәрʹа бьхԝазьн, 4 чьмки әԝе кӧрʹед тә жь мьн бьхальфиньн у ԝе пʹутед башԛәрʹа ԛӧльх кьн, һьнге һерса Хӧдан ԝе ль сәр ԝә рʹабә, әԝе тә зутьрәке ӧнда кә. 5 Ле аһа сәре ԝан бькьн: горигәһед ԝан ԝеран кьн, һʹәйкәлед ԝан һурдәхԝәши кьн, Ашераһед ԝан бьбьрʹьн у пʹутед ԝан бьшәԝьтиньн. 6 Чьмки тӧ Хӧдан Хԝәдейе хԝәрʹа мьләтәки бӧһӧрти-жьбарә йи. Хӧдан Хԝәдейе тә тӧ бьжарти, ԝәки жь нав һʹәму мьләтед ль сәр тʹопа дьне, тӧ бьби мьләт ԝийи мьлкʹе ԝи. 7 Хӧдан һун нә бона пʹьрʹанийа ԝәйә жь һʹәму мьләта бәгәм кьрьн у бьжартьн, чьмки һун жь һʹәму мьләта һьндьктьр ьн. 8 Ле чьмки Хӧдан һун һʹьз кьрьн у ӧса жи бона ԛәдандьна сонде хԝә, кʹижан кӧ ԝи кал-бавед ԝәрʹа сонд хԝар, һун бь дәсте зор дәрхьстьн у тӧ жь мала хӧламтийе, жь дәсте Фьрәԝьн пʹадше Мьсьре азакьри. 9 Бьзаньбә кӧ Хӧдан Хԝәдейе тә, әԝ ә Хԝәде, Хԝәдейе амьн, кӧ пәйман у һʹӧба хԝәйә амьн һʹәта һʹәзар ньсьли хԝәй дькә, бона ԝан, йед кӧ ԝи һʹьз дькьн у әʹмьред ԝи дьԛәдиньн. 10 Ле хут ԝан кӧ дьжәньнә ԝи ԝәкә әʹмәлед ԝан ԝе ԝан ӧнда кә, әԝ дәрәнги найехә ԝе зутьрәки ԝәкә әʹмәлед ԝан хут бьдә ԝан. 11 Тӧ ван әʹмьр, ԛәйдә-ԛанун у ԛьрара хԝәй кә, кʹижана кӧ әз иро ль тә әʹмьр дькьм кӧ бьԛәдини. 12 Һәгәр һун ван ԛьрара бьбьһен, хԝәй кьн у бьԛәдиньн, һьнге Хӧдан Хԝәдейе тә ԝе бона тә пәйман у амьнийа хԝә хԝәй кә, бона кʹижана кӧ ԝи кал-бавед тәрʹа сонд хԝар. 13 Әԝе тә һʹьз бькә, ԝе дӧа ль тә бькә, тә ль һәв зедә кә. Ԝе дӧа бәре зьке тә у бәре әʹрде тә, гәньм у шәрава тә, бьзьре тә, зайина пәз-дәԝаред тә бькә, ль сәр әʹрде кӧ ԝи кал-бавед тәрʹа сонд хԝар бьдә тә. 14 Жь һʹәму мьләта зедәтьр дӧайе ль тә бә, нә нава тәда нә жи нава һʹәйԝанед тәда бебәр ԝе тʹӧнә бьн. 15 Хӧдан ԝе һәр нәхԝәшийе дури тә хә, тʹӧ ешәкә хьрабә Мьсьре кʹижан кӧ тӧ зани, ԝе нәйнә сәре тә. Ле ԝан ԝе бинә ль сәре ԝан һʹәмуйед кӧ дьжәньнә тә. 16 Те һʹәму мьләтед кӧ Хӧдан Хԝәде дьдә дәсте тә, ӧндаки, бьра һʹәйфа тә ль ԝан нәйе, хԝәдейед ԝанрʹа ԛӧльх нәки, чьмки әԝ йәк бона тә тʹәлә йә.
28 ҺʹӘЗИРАНЕ-4 ТИРМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ԚАНУНА ДӦЩАРИ 9-10
«Хӧдан Хԝәдейе Тә Ньһа Чь жь Тә Дьхԝазә»?
ԝ09 1/10 10 ¶3-4
Гәло Йаһоԝа Чь жь Мә Дьхԝазә?
Гәло чь мә һелан дькә бь дьл у щан гӧһ бьдьнә Хԝәде? Дәрһәԛа тьрса бәр Хԝәде Муса гот: «Жь Хӧдан Хԝәдейе хԝә бьтьрси» (Рʹеза 12). Әв нә тьрса щәзакьрьне йә, ле әв ә кӧ тӧ һазьр и ԛәдьр һьндава Хԝәде бьди кʹьфше у рʹийа ԝида һәрʹи. Һәрге әм ԛәдьр у һӧрмәте һьндава Хԝәде дьдьнә кʹьфше, ԝи чахи әме бьхәбьтьн, кӧ дьле ԝи нәешиньн.
Ле йа әʹԝльн чь гәрәке мә һелан кә гӧһ бьдьнә Хԝәде? Щаба ве пьрсе әме жь хәбәред Муса бьстиньн: «Ԝи [Йаһоԝа] һʹьз бьки у ԝирʹа ԛӧльх ки, бь тʹәмамийа дьле хԝә у бь тʹәмамийа нәфса хԝә» (Рʹеза 12). Демәк һʹьзкьрьн һьндава Хԝәде әԝ найе һʹәсабе тʹәне һәст. Фәрһәнгәкеда дьһатә готьне: «Лекәред сәр зьмане Йунани, йед кӧ һәст тенә һʹәсабе, дьдьнә кʹьфше кьред бәрбь кʹижани әԝ һәст һелан дькьн». Ве Фәрһәнгеда ӧса жи те готьне, кӧ һʹьзкьрьна һьндава Хԝәде те һʹәсабе «кьред бь һʹьзкьрьне» һьндава ԝи. Бь гьлийед дьн готи, һәрге әм бь рʹасти Хԝәде һʹьз дькьн, демәк әме ван тьшта бькьн, чь кӧ ԝи хԝәш тед (Мәтʹәлок 27:11).
ԝ09 1/10 10 ¶6
Гәло Йаһоԝа Чь жь Мә Дьхԝазә?
Гӧһдарикьрьна бь һазьрбуне те кʹәрәмкьрьне. Муса гот: «Әʹмьр у ԛәйдә-ԛанунед Хӧдан хԝәйи ки, кʹижан кӧ әз ньһа бона ԛәнщийа тә ль тә әʹмьр дькьм» (Рʹеза 13). Бәле, һәр ԛанунед Йаһоԝа у әԝ чь кӧ әԝ жь мә дьхԝазә, бона кʹара мә нә. Кʹьтеба Пирозда те готьне, кӧ «Хԝәде һʹьзкьрьн ә» (1 Йуһʹәнна 4:8). Ләма жи әԝи ԛанунед ӧса данә мә, йед кӧ ԝе һʹәта-һʹәтайе мә бәхтәԝар кьн (Ишайа 48:17). Һәрге әм ида ньһа ԝан тьшта бькьн, чь кӧ Йаһоԝа жь мә дәʹԝа дькә, ԝи чахи әме жь дьлшкәстибуне бенә хԝәйкьрьне, у бьн сәрԝертийа Пʹадшатийа Хԝәде жийинәкә баш бьстиньн.
cl 16 ¶2
Гәло әԝ йәк дьбә кӧ «Хԝә ль Хԝәде бьгьрьн»?
2 Ԝәʹде бәре һәләԛәтийа ӧса незик тʹәви Хԝәде, бал Бьраһим һәбу. Йаһоԝа ԝи нав кьр ча «досте» хԝә (Ишайа 41:8). Йаһоԝа бь рʹасти Бьраһим һʹәсаб дькьр досте хԝә. Бьраһим бь достийа ԝи щурʹәйи һатә кʹәрәмкьрьне, чьмки «баԝәрийа хԝә Хԝәде ани» (Аԛуб 2:23). Иро жи Йаһоԝа мәщале дьгәрʹә кӧ ԝан мәрьва ԛәбул кә, йед кӧ бь һʹьзкьрьне ԝирʹа хьзмәт дькьн (Ԛануна Дӧщари 10:15). Хәбәра Хԝәде мә һелан дькә: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8). Әԝ готьн те һʹәсабе чаԝа тʹәглифкьрьн ӧса жи созе Хԝәде.
Хьзна Кʹьтеба Пироз
(Ԛануна Дӧщари 9:1-3) Бьбьһе Исраел! Иро тӧ Урдӧнерʹа дәрбаз дьби кӧ һәрʹи у мьләтед тә мәстьр, тә ԛәԝаттьр, бажаред мәзьнә һʹәта әʹзмен суркьри ԝар би. 2 Мьләте мәзьн у бьльнд, зарʹед әнаԛийа, тә әԝ нас дькьрьн у бона ԝан тә бьһистьбу, кӧ те готьн: ‹Кʹе ԝе бәр зарʹед Әнаԛийа тәйах кә?› 3 Ле тӧ иро бьзаньбә кӧ Хӧдан Хԝәдейе тә чаԝа агьре пʹәрʹьтандьне пешийа тәва дьчә. Әԝе ԝан ӧнда кә, ль бәр тә та кә, те бәри ԝан ди у зутьрәки ԝан ԛьрʹ ки, чаԝа кӧ Хӧдан готьбу тә.
it-1 103
Әнаԛ
Бәрәка мәрьвед бәжьн-бьльнд, чʹийед Кәнанеда дьжитьн, ӧса жи әԝана мьһалед бәр дәве бәʹре у башуре ԝәлатда гәләк бун. Ԝәʹдәки Һебронеда се Әнаԛийед нав-дәнг дьжитьн, демәк Ахиман, Шешай у Тʹалмай (Жм. 13:22). Донздәһ щәʹсусед Исраели щара пешьн ԝедәре Әнаԛийа дитьн у паше 10 жь ԝан бь тьрс дәрһәԛа ԝан дьготьн, йан чь әԝана зарʹед Нәфила нә, йед кӧ пешийа Селаве дьжитьн, у ԝәки бәрамбәри ԝан Исраели «мина кӧлийа бун» (Жм. 13:28-33; Ԛн.Дщ. 1:28). Ӧса жи жь бо бәжьна ԝанә бьльнд, ԝана бәрамбәри мәрьвед ӧса дькьрьн ча Рʹьфайи у Емийи, йед кӧ гәләк бьльнд бун. Жь бо ԛәԝата ԝанә мәзьн мәрьва гьли-готьнәкә ӧса дәрһәԛа ԝан дьготьн: «Кʹе ԝе бәр зарʹед Әнаԛийа тәйах кә?» (Ԛн.Дщ. 2:10, 11, 20, 21; 9:1-3).
(Ԛануна Дӧщари 10:1-22) Ԝе һьнге Хӧдан готә мьн: ‹Хԝәрʹа дӧ сәлед кәвьри мина йе бәре бьтʹәрʹьшинә у һьлкʹьшә сәре чʹийе щәм мьн, ӧса жи сьндоԛәкә дарин чекә. 2 У әзе ль сәр сәла, ԝан хәбәред кӧ ль сәр сәлед пешийейә кӧ тә шкенандьн бьньвисьм у ԝан бькә һьндӧрʹ е сьндоԛе›. 3 Һьнге мьн сьндоԛ жь дара дарщеԝийе чекьр, дӧ сәлед кәвьри мина йе бәре тʹәрʹьшандьн у әԝ һәр дӧ сәл дәстед мьнда һьлкʹьшийамә сәре чʹийе. 4 Әԝ дәһә тʹәмийед кӧ Хӧдан ль сәре чʹийе жь нава егьрда рʹожа щьвате готә ԝә, әԝи әԝ ль сәр сәла ньвисин, чаԝа кӧ бәре ньвисибу. Хӧдан әԝ данә мьн 5 у әз вәгәрʹийам жь чʹийе һатьмә харе. Сәл кьрьнә һьндӧрʹе сьндоԛа мьнә чекьри, әԝ ль ԝьр ман чаԝа кӧ Хӧдан ль мьн әʹмьр кьр. 6 (Һьнге зарʹед Исраел жь Беротʹ-Бьне-Йаһакане чунә Мосерайе. Ль ԝьр Һарун мьр у ԝьр һатә дәфьнкьрьне, дәԝса ԝи Елазаре кӧрʹе ԝи бу кʹаһин. 7 Жь вьр чунә Гудгодаһе, жь Гудгодаһе чунә Йотбатʹайе әʹрде ньхалед ава. 8 Ԝи чахи Хӧдан ԛәбила Леԝи башԛә кьр кӧ Сьндоԛа Пәймана Хӧдан бьбьн, ль бәр Хӧдан бьсәкьньн, ԝирʹа ԛӧльх кьн у бь наве ԝи бьмбарәк кьн, һʹәта рʹожа ироин. 9 Ләма пʹар у мьлкʹе Леԝи тʹәви бьрайед ԝи тʹӧнә. Хӧдан хԝәха йә мьлкʹе ԝи, чаԝа кӧ Хӧдан Хԝәдейе тә готьбу ԝи.) 10 Әз жи мина бәре чьл рʹож у чьл шәви ль сәре чʹийе бум. Ве щаре жи Хӧдан дәнге мьн бьһист у Хӧдан нәхԝәст ԛьрʹа тә бинә. 11 У Хӧдан готә мьн: ‹Рʹабә рʹекʹәвә пешийа мьләтва һәрʹә, бьра әԝ һәрʹьн әʹрде кӧ мьн кал-бавед ԝанрʹа сонд хԝар бьдьмә ԝан, хԝәрʹа бькьнә мьлкʹ›. 12 Хӧдан Хԝәдейе тә ньһа чь жь тә дьхԝазә Исраел? Әԝ тʹәне дьхԝазә кӧ тӧ жь Хӧдан Хԝәдейе хԝә бьтьрси, һʹәму рʹийед ԝида һәрʹи, ԝи һʹьз бьки у ԝирʹа ԛӧльх ки, бь тʹәмамийа дьле хԝә у бь тʹәмамийа нәфса хԝә, 13 әʹмьр у ԛәйдә-ԛанунед Хӧдан хԝәйи ки, кʹижан кӧ әз ньһа бона ԛәнщийа тә ль тә әʹмьр дькьм. 14 Әʹзман у әʹзмане әʹзмана, әʹрд у һʹәму чь ль сәр ә йе Хӧдан Хԝәдейе тә йә, 15 ле Хӧдан тʹәне калбавед тә бәгәм кьрьн, әԝ һʹьз кьрьн, пәй ԝанрʹа жи зӧрʹәтед ԝан бьжартьн аԝа готи һун, жь нава һʹәму мьләта, мина рʹожа иройин. 16 Ньһа гӧрʹа Хӧдан бькьн у вьр шунда сәр һʹьшк нибьн. 17 Чьмки Хӧдан Хԝәдейе ԝә, әԝ Хԝәдейе хԝәдейа йә, Хԝәйе хԝәйа йә, Хԝәдейе мәзьн, ԛәԝат у саԝ ә. Фьрԛийе накә у рʹӧшәте жи һьлнадә. 18 Әԝ һәԛийе ль сеԝи у жьнәбийа дькә, йе хәриб һʹьз дькә у ԝан нан у кʹьнщ дькә. 19 Ӧса жи һун хәриба һʹьз бькьн, чьмки һун хԝәха жи хәриб бун ԝәлате Мьсьреда. 20 Жь Хӧдан Хԝәдейе хԝә бьтьрсә, хӧламтийе ԝирʹа бькә, хԝә ԝи бьгьрә у бь наве ԝи сонд бьхԝә. 21 Пәсьна бьдә ԝи, әԝ ә Хԝәдейе тә, кʹижани бона тә әԝ кьред мәзьн у һʹәйрә-һʹӧжмәкʹар кьрьн, кʹижан кӧ тә бь чʹәʹвед хԝә дитьн. 22 Бь һʹәфте нәфси кал-бавед тә бәржери Мьсьре бун, ле ньһа Хӧдан Хԝәдейе тә, тӧ мина стәйркед әʹзмен бе һʹәсаб кьри.