Кани бона «Бәрнама Щьвине, Бьжин у Хьзмәт кьн»
5-11 ИЛОНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 9-10
«Пәсьне Йаһоԝа Бьдә бона Биланийа Ԝи»
ԝ99 1/7 30 ¶6
Сәрледана кӧ Һатә Хәлаткьрьне
Чахе жьн-пʹадша Шәбайе рʹасти Сьлеман һат, әԝе дәстпекьр «бь пьрсед гьран» ԝи бьщерʹьбинә (1 Пʹадшати 10:1, ИМ). Хәбәра Ибрани «пьрсед гьран», ӧса жи те ԝәлгәрʹандьне ча «сӧрʹ» йан жи мәтʹәлок. Ле бь рʹасти әв найе һʹәсабе ԝәки жьн-пʹадшайе дьхԝәст бь ван пьрса ча бежи тʹәви ԝи листька бьлизә. Мәсәлә, чахе Зәбур 49:4 бәʹса пьрсед фәрз дькә, йед ӧса ча гӧнә, мьрьн у хьлазбун, диса жи ве хәбәра Ибрани дьдә хәбате. Ча те кʹьфше жьн-пʹадша Шәбайе тʹәви Сьлеман дәрһәԛа тʹемед фәрз хәбәр дьда, у бь ве йәке ча бежи «бь пьрсед гьран» ԝи дьщерʹьбанд. Кʹьтеба Пироз дьбежә кӧ жьн-пʹадша Шәбайе «чь дьле ԝеда һәбу жерʹа гот». Ле Сьлеман жь алийе хԝәда щаба һʹәму пьрсед ԝе дьда, у тʹӧ тьшт жь ԝе вәнәшарт (1 Пʹадшати 10:2б, 3, ИМ).
ԝ99 1/11 20 ¶6
Чахе Мәрʹданийе Дьди Кʹьфше
Чахе жьн-пʹадша Шәбайе мәтʹал ма сәр ԝе йәке чь кӧ дит у бьһист, әԝе бь мьлукти гот: «Хԝәзи бь зьламед тә у бь ԝан хӧламед тә! Чьмки һәрдәм ль бәр тә дьсәкьньн у шәһрәзайийа [биланийа] тә дьбьһен» (1 Пʹадшати 10:4-8, ИМ). Әԝе сәр хӧламед Сьлеман гот кӧ әԝана бәхтәԝар ьн, нә кӧ чьмки әԝана бь жийинәкә дәԝләти дьжитьн, ле чьмки ԝана дькарьбу һәр рʹож жь ԝи биланийа хәбәред Хԝәде бьбьһен. Бь рʹасти жи жьн-пʹадша Шәбайе мәсәләкә гәләк баш хьзмәткʹаред Хԝәдерʹа һиштийә, йед кӧ жь биланийа Әʹфьрандаре хԝә у Кӧрʹе ԝи Иса Мәсиһ, мәтʹал дьминьн у кʹаре дьстиньн!
ԝ99 1/7 30-31
Сәрледана кӧ Һатә Хәлаткьрьне
Чахе жьн-пʹадша Шәбайе биланийа Сьлеман у дәԝләмәндтийа ԝи дит, жь «мәтʹалбуне дәве ԝе вәкьри ма» (1 Пʹадшати 10:4, 5, ИМ). Һьнә мәрьв дьбежьн ԝәки әв те һʹәсабе кӧ жь әʹщебмайибуне әԝе нькарьбу «бина хԝә жи бькʹьшинә». Леколинкʹарәк һәла һе дьбежә кӧ дьԛәԝьмә жьн-пʹадша жь ве йәке хәрьԛи жи! Чь жи һәбу, жьн-пʹадша чь дит у бьһист, әԝ жь ве йәке зәндәгьрти ма. Әԝе гот кӧ мәщала хӧламед Сьлеман һәйә кӧ гӧһ бьдьнә биланийа пʹадша, у әԝе пәсьне Йаһоԝа да, кӧ Әԝи тʹәхте пʹадшатийе да Сьлеман. Паше әԝе пʹешкʹешед бьһа да пʹадше, тʹәне зерʹ һәрге бь баһе иройин һʹәсаб кьн, ԛаси 40 000 000 долари бу. Сьлеман жи гәләк пʹешкʹеш данә ԝе, «һәр тьштед кӧ хԝәст дайе» (1 Пʹадшати 10:6-13, ИМ).
Хьзна Кʹьтеба Пироз
ԝ08 1/11 22 ¶4-6
Ԝә Заньбу?
Сьлеман Пʹадша хԝәйе чьԛас зерʹа бу?
Кʹьтеба Пирозда те готьне кӧ Һирам, пʹадше Суре, чар тон зерʹ Сьлеман Пʹадшарʹа шандьбу. Жьн-пʹадша Шәбайе жи һаԛас зерʹ пʹешкʹеши ԝи кьрьбу. Хенщи ве йәке, Сьлеман жь Офире пе гәмийед хԝә 15 тон зерʹ анибу. «Гьранийа зерʹед кӧ саләкеда Сьлеманрʹа һатьбу, 666 тәлант бу», демәк 25 тон зедәтьр (1 Пʹадшати 9:14, 28; 10:10, 14, ИМ). Ле гәло әԝ йәк рʹасти ӧса бу? Гәло пʹадшед бәре хԝәйе чьԛас зерʹа бун?
Ньвисарәкә кәвьнда, йа кӧ зандар итʹбарийа хԝә ле тиньн, те готьне кӧ Фьрәԝьне Мьсьре, Тутумосе III, йе кӧ ԝәкә 3 500 сал пешда сәрԝерти дькьр, пʹарьстгәһа Амон-Ра Карнакеда, ԝәкә 13.5 тон зерʹ пʹешкʹеш кьрьбу. Ԛьрʹна VIII Б.Д.М., пʹадше Асуре Тиглат-Пиләсәре III, жь Суре ԝәкә 4 тон зедәтьр зерʹ, ча хәрщ станд, ле Саргоне II хут һаԛас зерʹ хӧданед Бабилонерʹа пʹешкʹеш кьрьбу. Фракйайеда, сәр територийа Пангейайе кʹидәре кӧ зерʹ дәстдьхьстьн, бона пʹадше Макәдони, Филипойе II (359-336 Б.Д.М.) һәр сал 28 тон зедәтьр зерʹ дәстдьхьстьн.
Чахе кӧрʹе Филипо, Искәндәре Мәзьн (336-323 Б.Д.М.) шәһәрәки Фарьса, Суса зәфт кьр, әԝи жь ԝедәре ԝәкә 1 180 тон зерʹ зәфти хԝә кьр, ле жь тʹәмамийа Фарьсе ԝәкә 7 000 тон зерʹ дәрхьст. Һәрге әм ве йәке бәрамбәри әʹламәтийа жь Кʹьтеба Пироз дәрһәԛа зерʹед Сьлеман Пʹадша бькьн, әме бьвиньн кӧ әв әʹламәти рʹаст ә.
(1 Пʹадшати 10:10, ИМ) Шаһбануйа [жьн-пʹадша] Сәбайе, сәд у бист тәлант зерʹ, гәләк бьһарат у кәвьред һежа да пʹадша. Ԝе һаԛас пʹьрʹ бьһарат дабу Сьлемане Пʹадша кӧ щарәкә дьн һаԛас бьһарат нәһат.
(1 Пʹадшати 10:14, ИМ) Гьранийа зерʹе саләкеда Сьлеманрʹа һатьбу 666 тәлант бу.
(Мәтта 25:1-15) Һьнге Пʹадшатийа Әʹзмана ԝе мина ве йәке бә: Дәһә ԛизед бькʹьр чʹьред хԝә һьлдан пешийа зәʹведа чун. 2 Жь ԝан пенщ сәрԝахт бун, ле пенщ бефәʹм. 3 Бефәʹма чʹьред хԝә һьлдан, ле рʹун хԝәрʹа һьлнәдан, 4 ле сәрԝахта тʹәви чʹьра рʹун жи дәрданада хԝәрʹа һьлдан. 5 Гава зәʹва дәрәнги кʹәт, һʹәму жи һеньжин у хәԝрʹа чун. 6 Ниве шәве дәнгәк һат: ‹Ва йә зәʹва те! Пешийа ԝида һәрʹьн!› 7 Һьнге һʹәму бькʹьр рʹабун чʹьред хԝә саз кьрьн. 8 Бефәʹма готә сәрԝахта: ‹Жь ԝи рʹуне хԝә бьдьнә мә жи, чьмки чʹьред мә ведьсьн›. 9 Ле сәрԝахта щаба ԝан да у готьн: ‹На хер, әв рʹун ԝе тʹера мә у ԝә нәкә. Ԛәнщ ә кӧ һун һәрʹьнә щәм йед кӧ дьфьрошьн хԝәрʹа бькʹьрʹьн›. 10 Гава әԝ чун бькʹьрʹьн, зәʹва һат у әԝед һазьр тʹәв ԝи кʹәтьнә дәʹԝате у дәри һатә гьртьне. 11 Паше бькʹьред дьн һатьн у готьн: ‹Әм хӧлам, Әм хӧлам! Дәри ль мә вәкә!› 12 Ле әԝи щаба ԝан да гот: ‹Әз рʹаст ԝәрʹа дьбежьм, әз ԝә нас накьм›. 13 Аԝа һʹьшйар бьминьн, чьмки һун нә рʹожа һатьна Кӧрʹе Инсан заньн, нә жи сьһʹәте. 14 Ԝи чахи Пʹадшатийа Әʹзмана ԝе мина ве йәке бә: Мәрьвәк кӧ ԝе дәркʹәта рʹеԝитийе, гази хӧламед хԝә кьр у һәбука хԝә спартә ԝан. 15 Пенщ тәлант данә йәки, дӧ тәлант данә йәки у тәлантәк жи да йәки, һәр кәсирʹа ԝәкә ԛәԝата ԝи у зу рʹекʹәт чу.
12-18 ИЛОНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 11-12
«Бь Билани Хԝәрʹа Һәвалзәԝащ Бьжберә»
ԝ18.07 18 ¶7
«Кʹе Алийе Йаһоԝа йә?»
7 Әм жь сәрһатийа Сьлеман Пʹадша дькарьн дәрсе хԝәрʹа һьлдьн. Щаһьлтийеда, Сьлеман тʹьме рʹебәрийа Йаһоԝа дьгәрʹийа. Йаһоԝа билани да ԝи у шьхӧл да, ԝәки әԝ пʹарьстгәһа мәзьн Оршәлимеда ава кә. Ле ԝәʹдә дәрбаз бу, Сьлеман достийа хԝә тʹәви Йаһоԝа ӧнда кьр (1 Пʹадш. 3:12; 11:1, 2). Ԛануна Хԝәде ԛәдәхә дькьр кӧ пʹадша хԝәрʹа «кʹӧлфәт зедә кә», чьмки «дьле ԝи» дькарьбу бьхальфийа (Ԛан. Дщр. 17:17). Ле Сьлеман әԝ ԛанун пьшт гӧһе хԝәва авит, у ахьрийеда 700 жьнед ԝи у 300 щарийед ԝи һәбун (1 Пʹадш. 11:3). Гәләк жьнед ԝи жь мьләте Исраели нибун, у хӧданед ԛәлп дьһʹәбандьн. У Сьлеман бь ве йәке жи гӧрʹа ԛануна Хԝәде нәкьр кӧ жьнед хәриб станд (Ԛан. Дщр. 7:3, 4).
ԝ19.01 15 ¶6
Чаԝа Мьԛати Дьле Хԝә бьн?
6 Шәйтʹан дьхԝазә ԝәки әм бьбьнә мина ԝи, демәк бьбьнә рʹабәр, йед кӧ принсипед Йаһоԝа пьшт гӧһе хԝәва давежьн у пәй хԝәстьнед хԝә дькʹәвьн. Рʹаст ә Шәйтʹан нькарә зоре мә бькә, ԝәки әм мина ԝи бьфькьрьн йан жи мина ԝи бькьн, ле әԝ дьхԝазә щурʹәки майин мә бәрбь ве йәке бьвә. Бәʹса хәбәре, әԝ мә дькә нава ԝан мәрьва, дьле кʹижана жи әԝи ида хьраб кьрийә (1 Йуһʹн. 5:19). Әԝ һивийе йә, ԝәки әм ԝәʹде хԝә тʹәви ԝан мәрьва дәрбаз кьн, у пьшт гӧһе хԝәва бавежьн ве принсипе, кʹидәре те готьне ԝәки һәвалтийа хьраб фькьр у кьред мә «хьраб дькә» (1 Корн. 15:33). Сьлеман Пʹадша кʹәтә һәма тʹәлькәкә ӧса. Әԝи гәләк жьнед пʹутпʹарьст станд, у әԝана ӧса ԛайим сәр ԝи һʹӧкӧм бун, кӧ һеди-һеди дьле ԝи жь Йаһоԝа дур хьстьн (1 Пʹадш. 11:3).
ԝ18.07 19 ¶9
«Кʹе Алийе Йаһоԝа йә?»
9 Ле Йаһоԝа тʹӧ щар сәр хьрабийе чʹәʹве хԝә данадә. Кʹьтеба Пироз дьбежә: «Һерса Йаһоԝа рʹабу сәр Сьлеман, чьмки дьле ԝи жь Йаһоԝа дур кʹәтьбу . . . , йе кӧ дӧ щара хԝә ԝирʹа әʹйан кьрьбу у ԝи ширәт кьрьбу, ԝәки әԝ пәй хӧданед дьн нәчә. Ле Сьлеман тʹәмийа Йаһоԝа хԝәй нәкьр». Ахьрийеда, әԝи ԛәбулкьрьн у кʹәрәма Хԝәде ӧнда кьр. Зӧрʹәтед Сьлеман һʹӧкӧмтийа сәр тʹәмамийа Исраеле ӧнда кьрьн, у бь сәда сала гәләк хәзәб дьдитьн (1 Пʹадш. 11:9-13, ДТʹ).
Хьзна Кʹьтеба Пироз
ԝ18.06 14 ¶1-4
Әԝи Дькарьбу Кʹәрәмед Хԝәде Бьстанда
Рʹәһобоԝам ордийа хԝә һазьр кьр, ԝәки мьԛабьли щьмәʹта рʹабәр дәркʹәвә. Ле Йаһоԝа кʹәтә нава ԝи шьхӧли у бь Шәмайа пʹехәмбәр жерʹа гот: «Һуне дәрнәкʹәвьн у ль дьжи бьрайед хԝә лаԝед Исраелрʹа щәнге [шәрʹ] нәкьн; вәгәрʹьн, бьра һәр кәс һәрʹә мала хԝә! Жь бәр кӧ әв тьшт жь мьн бу!» (1 Пʹадш. 12:21-24).
Бьдьнә бәр чʹәʹве хԝә, Рʹәһобоԝам дьбәкә чьԛас бәрхԝә кʹәт, чахе әԝ йәк бьһист. Дьԛәԝьмә әԝ хԝәрʹа дьфькьри кӧ щьмәʹт ԝе чь бежә, нә әԝи әԝана данә тьрсандьне кӧ ԝе ԝана пе ԛамчийа щәза кә, ле ньһа жи тьштәки нькарә бькә (Бәрамбәр кьн 2 Дирок 13:7.) Йәкә Рʹәһобоԝам ордийа хԝәва «готьна Хӧдан гӧһдари кьрьн у ль гор готьна Хӧдан вәгәрʹийан у рʹийа хԝәва чун».
Әм жь ве йәке чь дәрсе һин дьбьн? Ԝе аԛьлайи бә, ԝәки әм тʹьме гӧрʹа Хԝәде бькьн, һьнге жи һәрге бона ве йәке мәрьв ԝе ԛәрфа мә бькьн. Чахе әм гӧрʹа Хԝәде дькьн, әм ԛәбулкьрьн у кʹәрәмед ԝи дьстиньн (Ԛан. Дщр. 28:2).
Ле Рʹәһобоԝам чь кʹәрәм сьтанд кӧ гӧрʹа Хԝәде кьр? Әԝи диса жи пʹадшатийа хԝә бәрдәԝам кьр сәр бәрәка Щьһуда у Бьнйамина. Хенщи ве йәке, әԝи дәстпекьр територийа хԝәда шәһәред тʹәзә ава кә. Әԝи әԝ шәһәр «бь зедәйи зәхьманд [ԛәԝи кьр]» (2 Дир. 11:5-12). Йа лапә фәрз әԝ бу, кӧ һьнге әԝи гӧрʹа ԛанунед Йаһоԝа дькьр. Чахе пʹадшатийа дәһ бәрәки дәстпекьр хӧданед ԛәлп бьһʹәбинә, жь ԝедәре гәләк мәрьв чунә Оршәлиме, сәва һʹәбандьна рʹастда пьштгьрийа Рʹәһобоԝам бькьн (2 Дир. 11:16, 17). Рʹәһобоԝам гӧрʹа Йаһоԝа кьр у ләма жи пʹадшатийа ԝи ԛәԝи бу.
(1 Пʹадшати 12:21-24, ИМ) Гава Рәһовам һат Оршәлиме, жь тʹәмамийа Мала Щьһуда у Әшира Бьнйамин сәд у һʹәйште һʹәзар ләшкәред бьжарә дан һәв кӧ ль дьжи [мьԛабьли] Мала Исраил шәрʹ бькьн у пʹадшайе ль Рәһоваме кӧрʹе Сьлеман вәгәрʹиньн. 22 Ле пәйва Хԝәде зьламе Хԝәде Шәмайарʹа һат у гот: 23 «Рәһоваме кӧрʹе Сьлемане Пʹадше Щьһудайе у тʹәмамийа Мала Щьһуда у Бьнйамин у йед майин йед дьнрʹа бежә: 24 ‹Хӧдан аһа дьбежә: Һуне рʹанәбьн у ль дьжи бьрайед хԝә Исраилийа шәрʹ нәкьн. Вәгәрʹьн, бьра һәркәс һәрʹә мала хԝә! Чьмки әв кʹаре мьн бу›». Ԝан гӧһ да готьна Хӧдан. Әԝ ль гори готьна Хӧдан вәгәрʹийан.
(Мәтта 25:16-34) Әԝе кӧ пенщ тәлант стандьбун, перʹа-перʹа чу бь ԝан кʹьрʹи у фьрот, пенщед дьн жи ԛазьнщ кьрьн. 17 Ӧса жи әԝе кӧ дӧ тәлант стандьбун, дӧдӧйед дьн жи ԛазьнщ кьрьн. 18 Ле әԝе кӧ тәлантәк стандьбу, чу әʹрд кʹола у зиве ахайе хԝә теда вәшарт. 19 Пәй гәләк ԝәхтрʹа ахайе ԝан хӧлама һат у хԝәст һәԛһʹәсабе хԝә тʹәви ԝан рʹаст кә. 20 Әԝе кӧ пенщ тәлант стандьбун пешда һат, пенщ тәлантед майин жи анин у гот: ‹Ахайе мьн, тә пенщ тәлант дабунә мьн. Мьн сәр ԝанда пенщед дьн жи ԛазьнщ кьрьн›. 21 Ахайе ԝи готеда: ‹Әʹфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта. Бькʹәвә шайийа ахайе хԝә!› 22 Әԝе кӧ дӧ тәлант стандьбун жи һат у гот: ‹Әз хӧлам! Тә дӧ тәлант дабунә мьн. Мьн дӧдӧйед дьн жи ль сәр ԝанда ԛазьнщ кьрьн›. 23 Ахайе ԝи готе: ‹Әʹфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта. Бькʹәвә шайийа ахайе хԝә!› 24 Ле әԝе кӧ тәлантәк стандьбу һат у гот: ‹Ахайе мьн, мьн заньбу кӧ тӧ мәрьвәки һʹьшк и. Жь ԝи щийе тә нәчандийә дьдьруйи у щийе кӧ тә нә рʹәшандийә бәрәв дьки. 25 Әз жи тьрсийам у чум тәланте тә әʹрдеда вәшарт. Һане мале тә тәрʹа бә›. 26 Ахайе ԝи ле вәгәрʹанд у готе: ‹Хӧламе хьраб у хԝәрʹанәдити! Тә заньбу әз жь ԝи щийе кӧ мьн нәчандийә дьдьрум у жь ԝи щийе кӧ мьн нәрʹәшандийә бәрәв дькьм, 27 тә чьма зиве мьн нәда сәрафа у әз бьһатама мьн мале хԝә бь сәләф бьстанда? 28 Ньһа тәлант жь ԝи бьстиньн у бьдьнә әԝе кӧ дәһә тәлантед ԝи һәнә. 29 Чьмки йе кʹе кӧ һәйә, ԝирʹа ԝе бе дайине у сәрда зедә бә, ле йе кʹе кӧ тʹӧнә, чь һәйә жи ԝе же бе стандьне. 30 Ле әԝ хӧламе бекер бавежьнә тәʹрийа дәрва. Ль ԝьр ԝе бьбә гьри у чʹьркә-чʹьрка дьрана›. 31 Гава Кӧрʹе Инсан тʹәви һʹәму мьлйакʹәта у рʹумәта хԝәва бе, һьнге ԝе сәр тʹәхте хԝәйи рʹумәте рʹуне 32 һʹәму мьләт ԝе ль бәр ԝи бьщьвьн. Әԝе ԝана жь һәв башԛә кә, чаԝа шьван пез жь бьзьна вәдьԛәтинә. 33 Әԝе пез ль мьле хԝәйи рʹасте бьдә сәкьнандьне, ле бьзьна ль мьле хԝәйи чʹәпе. 34 Һьнге Пʹадша ԝе йед ль мьле хԝәйи рʹастерʹа бежә: ‹Ԝәрьн бьмбарәкбуйийед алийе Баве мьнда! Әԝ Пʹадшатийа кӧ бона ԝә жь ԝәхте әʹфьрандьна дьнйайеда һазьр буйә ԝар бьн.
19-25 ИЛОНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 13-14
«Чьрʹа Гәрәке Рʹази бьн у Мьлук бьн?»
ԝ08 15/8 8 ¶4
Бьра Дьле Тә бь Тʹәмами Йаһоԝарʹа Амьн бә
4 Паши ве йәке Йәровам дьбежә пʹехәмбәре Хԝәдейе рʹастрʹа: «Ԝәрә әм һәрʹьн мале тьштәки бьхԝьн. Әзе дийарийәке жи бьдьмә тә» (1 Пʹадш. 13:7, ИМ). Гәло әԝ пʹехәмбәр ԝе чь бькә? Гәло әԝ гәрәке ве тʹәглифа пʹадше ԛәбул кә, кʹижанирʹа әԝи диԝана Йаһоԝа әʹлам кьрьбу? (Зәб. 119:113) Йан әԝ гәрәке тʹәглифа ԝи инкʹар кә у дина хԝә нәдә сәр ве йәке кӧ те бежи пʹадша тʹобә кьрийә? Һәмьки Йәровам дькарьбу ԝи мәрьви хәлат кә, йе кӧ дьле ԝи дьһат. Һәрге дьле пʹехәмбәрда һʹьзкьрьн һьндава һәбуке һәбуйа, әв тʹәглифа пʹадше ԝе жерʹа бьбуйа тʹәльк. Чь жи һәбу, Йаһоԝа тʹәми да пʹехәмбәре хԝә: «Нә нен бьхԝи, нә аве вәхԝи у жь рʹийа кӧ чуйи жи вәнәгәрʹи». Ләма жи пʹехәмбәр пʹадшарʹа дьбежә: «Тӧ ниве мале хԝә жи бьди мьн, әз бь тәрʹа найем. Ль вьр әзе нә нен бьхԝьм, нә жи аве вәхԝьм». У паше әԝ жь Бәйтʹәле рʹекә дьнрʹа дьчә (1 Пʹадш. 13:8-10, ИМ). Әԝ кьре ви пʹехәмбәри, дәрһәԛа амьнийа бь дьле тʹам чь дьбежә? (Рʹом. 15:4)
ԝ08 15/8 11 ¶15
Бьра Дьле Тә бь Тʹәмами Йаһоԝарʹа Амьн бә
15 Әм жь шашийа ви пʹехәмбәре жь Щьһудайе чь һин дьбьн? Мәтʹәлок 3:5-да те готьне: «Бь тʹәмамийа дьле хԝә хԝә бьсперә Хӧдан, гӧмана хԝә нәдә ль сәр һʹьше хԝә». Дәԝса кӧ хԝә бьсперә Йаһоԝа чаԝа бәре, ви пʹехәмбәри итʹбарийа хԝә да сәр һʹьше хԝә. Әв шаши гьран сәр ԝи рʹуньшт, әԝи әʹмьре хԝә у наве ԛәнщ бәр Хԝәде ӧнда кьр. Әва бона мә дәрсәкә мәзьн ә! Әԝ сәрһати мә һин дькә, ԝәки хԝәсәри хԝә нибьн у бь амьни Йаһоԝарʹа хьзмәт кьн.
ԝ08 15/8 9 ¶10
Бьра Дьле Тә бь Тʹәмами Йаһоԝарʹа Амьн бә
10 Пʹехәмбәре жь Щьһудайе гәрәке фәʹм кьра, ԝәки әԝ пʹехәмбәре кал ле дьхапинә. Әԝи дькарьбу пьрсе бьдә хԝә: «Һәрге Йаһоԝа дьхԝәст тʹәмикә тʹәзә бьдә мьн, чьрʹа әԝи мәләке хԝә шандә щәм кәсәки дьн?» Пʹехәмбәр дькарьбу жь Йаһоԝа бьпьрсә һәла чь бькә, ле жь Кʹьтеба Пироз найе кʹьфше ԝәки әԝи бона рʹебәри дӧа кьрьбу. Дәԝса ве йәке, әԝ тʹәви ви пʹехәмбәре ԛәлп «вәгәрʹийа, ль мала ԝи нан хԝар у ав вәхԝар». Әԝ йәк Йаһоԝа хԝәш нәһат. Гава әв пʹехәмбәре кӧ һатә хапандьне дәркʹәт сәр рʹийа бәрбь Щьһудайе, рʹева әԝ рʹасти шерәки һат у шер әԝ ль ԝьр кӧшт. Рʹасти жи ахьрийа чьԛас хьраб ә! (1 Пʹадш. 13:19-25)
Хьзна Кʹьтеба Пироз
ԝ10 1/7 29 ¶5
Әԝ Дьле Мәрьвада Тьштед Баш Дьгәрʹә
Ле йа лапә фәрз, гьлийед жь 1 Пʹадшати 14:13 мәрʹа дәрһәԛа хәйсәтәкә Йаһоԝа гәләк бәдәԝ әʹйан дькьн, у нишан дькьн ԝәки әԝ дьле мәрьвада дина хԝә дьдә сәр чь. Биньн бира хԝә кӧ Йаһоԝа дьле Әбийада тьштәки баш дит. Ча те кʹьфше Йаһоԝа дьле Әбийа леколин дькьр, һʹәта кӧ тьштәки баш теда дит. Зандарәки гот ԝәки әԝ нава малбәта хԝәда, ча бежи «нава ԛучʹа кәвьрада» мина дӧрʹәки бу. Йаһоԝа тьштәки баш кӧ дьле Әбийада һәбу, ԛимәт кьр, у бона ве йәке ԝи хәлат кьр. Жь тʹәмамийа малбәта ԝийә хьраб у нәпʹакда, Йаһоԝа рʹәʹма хԝә тʹәне һьндава ԝи да кʹьфше.
(1 Пʹадшати 14:13, ИМ) Ԝе тʹәмамийа Исраиле шина ԝи бькә у ԝи вәшерә. Жь Мала Йаровам ԝе тʹәне әԝ бькʹәвә горʹе. Чьмки жь Мала Йаровам кәсе кӧ дьле Хԝәдайе Исраил Хӧдан пе хԝәш бу, әԝ бу.
(Мәтта 25:35-46) Чьмки әз бьрʹчи бум ԝә хԝарьн да мьн, әз тʹи бум ԝә ав да мьн, әз хәриб бум ԝә әз ԛәбул кьрьм, 36 әз тәʹзи бум ԝә әз кʹьнщ кьрьм, әз нәхԝәш бум һун сәр мьнда һатьн, әз кәледа бум һун һатьнә щәм мьн›. 37 Һьнге йед рʹаст ԝе ԝирʹа бежьн: ‹Хӧдан, мә кʹәнге тӧ бьрʹчи дити у хԝарьн дайә тә? Йан мә тӧ тʹи дити у ав дайә тә? 38 Мә кʹәнге тӧ хәриб дити у тӧ ԛәбул кьри, йан жи тӧ тәʹзи дити у тӧ кʹьнщ кьри? 39 Кʹәнге мә тӧ нәхԝәш йан кәледа дити у әм һатьнә щәм тә?› 40 Пʹадшайе жи ԝанрʹа бежә: ‹Әз рʹаст ԝәрʹа дьбежьм, һәгәр ԝә ԛәнщи жь ван хушк-бьред мьнә йе һәри бьчʹук йәкирʹа кьр, ԝә мьнрʹа кьр›. 41 Һьнге әԝе йед мьле хԝәйи чʹәперʹа бежә: ‹Ньфьрʹлебуйино! Дури мьн һәрʹьн нава агьре һʹәтаһʹәтайе, кӧ бона Мирещьн у мьлйакʹәтед ԝи һазьр буйә. 42 Чьмки әз бьрʹчи бум ԝә хԝарьн нәда мьн, әз тʹи бум ԝә ав нәда мьн, 43 әз хәриб бум ԝә әз ԛәбул нәкьрьм, әз тәʹзи бум ԝә әз кʹьнщ нәкьрьм, әз нәхԝәш у кәледа бум һун сәр мьнда нәһатьн›. 44 Һьнге әԝе ԝирʹа бежьн: ‹Хӧдан! Мә кʹәнге тӧ бьрʹчи йан тʹи, йан хәриб, йан бе сьтʹар, йан нәхԝәш, йан кәледа дити у мә аликʹари нәда тә?› 45 Ԝи чахи әԝе щаба ԝан бьдә у бежә: ‹Әз рʹаст ԝәрʹа дьбежьм, һәгәр ԝә ԛәнщи жь әвед һәри бьчʹук йәкирʹа нәкьр, ԝә мьнрʹа жи нәкьр›. 46 У әве һәрʹьнә щәфе һʹәта-һʹәтайе, ле йед рʹаст ԝе һәрʹьнә жийина һʹәта-һʹәтайе».
26 ИЛОНЕ–2 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 15-16
«Аса Мерхаси Да Кʹьфше, ле Тӧйе Чь Бьки?»
ԝ12 15/8 8 ¶4
«Бона Кьред Хԝә Һуне Бенә Хәлаткьрьне»
Чахе пʹадшатийа Исраеле сәр дӧ пʹадшати пʹарәвәбу, нава 20 салада Щьһуда кʹәтә нава пʹутпʹарьстийе. Гава Аса сала 977 Б.Д.М., бу пʹадша, һьнге һʹәбандьна хӧданед бәрдайине йед Кәнанийа, кʹәтә нава пʹадшатийе жи. Ле Кʹьтеба Пирозда дәрһәԛа сәрԝертийа Аса те готьне, ԝәки әԝи чь кӧ «чʹәʹве Хԝәдайе хԝә Хӧданда ԛәнщ у рʹаст ә кьр». Әԝи «пʹешкʹешед бийан у щийед бьльнд рʹакьр у кәвьред чʹьканди шкенандьн у Ашера жекьр» (2 Дир. 14:2, 3). Хенщи ве йәке, әԝи жь пʹадшатийа Щьһудайе бәри меред ԛав да, йед кӧ һомосексуали кьрьбунә пʹара һʹәбандьне. Ле Аса сәр ве йәке нәсәкьни. Әԝи щьмәʹт һелан кьр, ԝәки Хԝәдейе кал-бавед хԝә, Йаһоԝа бьгәрʹьн, у ԛанун у тʹәмийед Ԝи биньн сери (1 Пʹадш. 15:12, 13; 2 Дир. 14:4).
Бь Һʹәмуйа Дьле Хԝә Йаһоԝарʹа Хьзмәт кьн
7 Һәр кәс жь мә дькарә хԝә бьщерʹьбинә, һәла дьле мә бь тʹәмами Йаһоԝарʹа амьн ә йан на. Мәсәлә, пьрсед ӧса бьдьнә хԝә: «Гәло әз тʹьме гӧрʹа Йаһоԝа дькьм? Гәло әз чь дькьм сәва һʹәбандьна рʹаст у рʹӧһʹанийа щьвате тʹәмьз хԝәй кьм?» Бьфькьрьн дәрһәԛа сәрһатийа Аса. Әԝи мерхасийа гәләк мәзьн да кʹьфше чахе мьԛабьли пирька хԝә Маака дәркʹәт, йа кӧ дийа пʹадша бу! Щара дьбәкә тӧ жи мина Аса рʹасти дәрәщед ӧса бейи кӧ тәрʹа мерхаси лазьм бе. Мәсәлә, бьдә бәр чʹәʹве хԝә, мәрьве тәйи незик йан жи һәвале тә гӧнә кьрийә, ле гӧне хԝә найнә рʹуйе хԝә у гәрәке жь щьвате бе дәрхьстьне. Тӧйе чь бьки, гәло тӧйе диса тʹәви ԝи мәрьви һәвалтийе бьки? Гәло һьнге дьле тә ԝе тә бәрбь чь һелан кә?
it-1 184-185
Аса
Рʹаст ә щара билани у сәрԝахтийа Аса алийе рʹӧһʹанида кем бу, ле әшкәрә йә ԝәки һʹӧнӧред ԝийә баш у әв йәк кӧ әԝи пьштгьрийа пʹутпʹарьстийе нәдькьр, сәр шашийед ԝирʹа бун. Ләма жи ԝи һʹәсаб дькьрьн ча йәк жь пʹадшед Щьһудайейә амьн (2 Др. 15:17). Ԝәʹде пʹадшатийа ԝи, кӧ 41 сала кʹьшанд, бь тʹәмами йан жи нивида 8 пʹадшед Исраели сәрԝерти дькьрьн: Йәровам, Надаб, Бааша, Әла, Зимри, Омри, Тибни, (йе кӧ мьԛабьли Омри дәркʹәт, у сәр пʹарәкә Исраели сәрԝерти дькьр) у Аһаб (1 Пʹд. 15:9, 25, 33; 16:8, 15, 16, 21, 23, 29). Паши мьрьна Аса, кӧрʹе ԝи Йәһошәфат бу пʹадша (1 Пʹд. 15:24).
Хьзна Кʹьтеба Пироз
ԝ98 15/9 21-22
Хԝәде бона Тә Реали йә?
Мәсәлә, бьхунә пʹехәмбәртийа дәрһәԛа щәзайа бона авакьрьна Әриһайе, у дина хԝә бьдә чаԝа әԝ һатә сери. Кʹьтеба Йешу 6:26-да те готьне: «У паше вейа Йешу бь ви авайи сонде хԝар: Йе кӧ жь нува бьхԝазә ви бажари, Әриһайе ава бькә, бьра рʹасти наләта [ньфьрʹа] Хӧдан ԝәрә! Йе кӧ хԝә ль вейа рʹакʹьшинә, ԝе бәрдела лаԝе хԝәйи мәзьнда бьнгәһе бавежә, ԝе бәрдела лаԝе хԝәйи һәри бьчʹукда жи дәрийа техә щийе ԝан!» Әԝ пʹехәмбәрти ԝәкә 500 сал шунда һатә сери, чаԝа кӧ Кʹьтеба Пирозда әм дьхуньн: «Пʹадшатийа Аһавда Һийеле Бет-Ели бажаре Әриһайе жь нува ава кьр. Ль гори готьна Хӧдан кӧ бь рʹийа Йешуйе кӧрʹе Нун готьбу, гава әԝи бьнгәһа бажер дани, кӧрʹе ԝийе мәзьн Авирам у гава дәргәһед бажер дани, кӧрʹе ԝийе бьчʹук Сәгув мьр» (1 Пʹадш. 16:34, ИМ). Тʹәне Хԝәдайе рʹаст дькарьбу әве пʹехәмбәртийе бьда ньвисаре у һьн жи ӧса бькьра ԝәки әв бе сери.
(1 Пʹадшати 16:34, ИМ) Пʹадшатийа Аһавда Һийеле Бет-Ели бажаре Әриһайе жь нува ава кьр. Ль гори готьна Хӧдан кӧ бь рʹийа Йешуйе кӧрʹе Нун готьбу, гава әԝи бьнгәһа бажер дани, кӧрʹе ԝи йе мәзьн Авирам у гава дәргәһед бажер дани, кӧрʹе ԝи йе бьчʹук Сәгув мьр.
(Мәтта 26:1-16) Гава Иса әв һʹәму хәбәр хьлаз кьрьн, шагьртед хԝәрʹа гот: 2 «Һун заньн кӧ ԝе дӧ рʹожа шунда Щәжьна Дәрбазбуне бә. У Кӧрʹе Инсан ԝе бе дайине кӧ бе хачкьрьне». 3 Һьнге сәрәкед кʹаһина у рʹуспийед щьмәʹте сәрайа сәрәккʹаһинда кӧ наве ԝи Ԛәйафа бу щьвийан 4 у ль һәв шеԝьрин кӧ Иса дьзива бь фелбазийе бьгьрьн, бькӧжьн. 5 Ле ԝана дьгот: «Бьра әв йәк щәжьнеда нибә, ԝәки щьмәʹт рʹанәбә сәр ньга». 6 Чахе Иса ль Бәйтанйайе мала Шьмһʹуне кʹотида бу, 7 кʹӧлфәтәкә кӧ дәрданәкә ԝейә алабастьрейи рʹуне бинхԝәш һәбу, һатә щәм ԝи у чахе әԝ ль сәр сьфре рʹуньштьбу, әԝе әԝ рʹун рʹетә сәр сәре ԝи. 8 Гава шагьрта әв йәк дит, ль ԝан хԝәш нәһат у готьне: «Чьма әва зийана бу? 9 Әва рʹуна ԝе ԛимәтәки бьһа бьһата фьротане у фәԛирарʹа бьһата бәлакьрьне». 10 Ле әԝ йәк Исава әʹйан бу у ԝанарʹа гот: «Чьма һун хатьре ԝе кʹӧлфәте дькʹәвьн? Әԝе тьштәки ԛәнщ бона мьн кьр. 11 Фәԛире һәр гав тʹәви ԝә бьн, ле әзе һәр гав тʹәви ԝә нибьм. 12 Әԝе бона дәфьнкьрьна мьн әԝ рʹун рʹетә сәр бәдәна мьн. 13 Әз рʹаст ԝәрʹа дьбежьм, дьнйайеда кʹидәре әва Мьзгинийа бе даннасинкьрьне, ԝе кьрьна ве кʹӧлфәте жи бона биранина ԝе бе готьне». 14 Һьнге йәк жь һәр донздәһа кӧ Щьһудайе Исхәрйоти дьһатә готьне, чу щәм сәрәкед кʹаһина 15 у гот: «Һуне чь бьдьнә мьн, ԝәки әз ԝи бьдьмә дәсте ԝә?» У ԝана си зив жерʹа соз дан. 16 Жь ԝьр шунда әԝ мәщаләке дьгәрʹийа кӧ чаԝа Иса бьдә дәсте ԝан.
3-9 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 17-18
«Һʹәта Кʹәнге Һуне Бькӧльн?»
Баԝәрийа Хԝә Хԝәде Биньн бь Билани Сафикьрьна Бькьн!
6 Чахе Исраели Әʹрде Создайида щиԝар бун, ԝана гәрәке бьжартьна гәләк фәрз бькьрана: Йан Йаһоԝарʹа хьзмәт кьн йан хӧданед дьнрʹа (Бьхунә Йешу 24:15). Дькарә бе кʹьфше кӧ әԝ сафикьрьнәкә һеса бу, ле бь рʹастийе әʹмьре ԝан ве сафикьрьнева гьредайи бу. Исраелийа ԝәʹде Һʹакьма гәләк щар бьжартьнед нәаԛьлайи дькьрьн. Ԝана пьшта хԝә дьданә Йаһоԝа у хӧданед ԛәлп дьһʹәбандьн (Һʹакьм. 2:3, 11-23). Паше, ԝәʹде Елйас пʹехәмбәр, щьмәʹта Хԝәде диса бәр бьжартьне бу. Ԝана гәрәке сафи кьра: Йан Йаһоԝа бьһʹәбиньн йан жи хӧдане ԛәлп Баәл (1 Пʹадш. 18:21). Ле Исраели дӧдьли дьбун кӧ кʹерʹа хьзмәт кьн у ләма жи Елйас әԝана сущдар кьрьн. Аликива бьньһерʹи, әԝ бьжартьна һеса бу, чьмки хьзмәткьрьн Йаһоԝарʹа тʹьме кʹаре тинә. Һьн жи мәрьве билан ԝе тʹӧ щар хԝә ль хӧдане бекер нәгьрә. Ле Исраели «һәрдӧ алива» дькӧлийан у нькарьбун бьжартьн бькьрана. Елйас әԝана ширәт кьрьн ԝәки Хԝәдайе рʹаст бьһʹәбиньн, демәк Йаһоԝа.
ia 88 ¶15
Әԝи Ԛайим Хԝә Баԝәрийа Рʹаст Гьртьбу
15 Кʹаһинед Баәл дәстпекьрьн дьһа ԛайим бькьнә ԛирʹин у «ль гора әʹдәта һʹәта кӧ жь ԝан хун бьрʹьжә бь шур у рʹьма хԝә бьриндар кьрьн». Ле әв йәк бадиһәԝа бу, чьмки «нә дәнг һәбу, нә бәрсьвәк [щабәк]. Кәси гӧһдарийа ԝан нәдькьр» (1 Пʹадш. 18:28, 29, ИМ). Баәл реали нибу. Мире-щьна хԝәха әԝ жь бәр хԝә дәрхьст, ԝәки щьмәʹте дури Йаһоԝа хә. Иро жи ӧса нә, һәрге мәрьв Йаһоԝа накьнә Хԝәдайе хԝә, әԝана ԝе әʹсәйи пʹошман бьн у шәрми бьминьн (Зәбур 25:3; 115:4-8 бьхунә).
ia 90 ¶18
Әԝи Ԛайим Хԝә Баԝәрийа Рʹаст Гьртьбу
18 Пешийа ве йәке һʹәта Елйас дӧа кьр, мәрьв һе дькарьбун бьфькьрьн, ԝәки ортʹа Йаһоԝа у Баәлда фьрԛи тʹӧнә, ле паши дӧа һәр тьшт зәлал бу. Кʹьтеба Пирозда те готьне: «Агьре Хӧдан дакʹәт у ԛӧрбана шәԝьтандьне, езьнга, кәвьра у ахе хԝар. Әԝи әԝ ԛәдандьн у ава чʹәʹледа жи зьһа кьр» (1 Пʹадш. 18:38, ИМ). Рʹасти жи әԝ щаб кʹәрәмәтәкә мәзьн бу! Ле гәло щьмәʹт паши ве йәке хԝә ча да кʹьфше?
Хьзна Кʹьтеба Пироз
ԝ08 1/4 19, чаргошә
Әԝ Һʹьшйар Дьма у Һивийе бу
Ԝәʹде Елйас Һʹьшкайи Чьԛас Ԝәхт Дькʹьшанд?
Елйас пʹехәмбәр Аһаб пʹадшарʹа әʹлам кьр, ԝәки һʹьшкайи кӧ гәләк ԝәхт кʹьшандийә, ԝе зутьрәке хьлаз бә. Һәрге әм һʹәсаб кьн жь рʹожа гава Елйас щара пешьн дәрһәԛа һʹьшкайе әʹлам кьр, әԝ йәк сала сьсийада ԛәԝьми (1 Пʹадш. 18:1). Чахе Елйас дәрһәԛа ве йәке гот, Йаһоԝа паши ве йәке баран баранд. Һьнәк дькарьн бьфькьрьн, ԝәки һʹьшкайи сала сьсийада хьлаз бу у ләма жи се сала кемтьр кʹьшанд. Ле Иса Мәсиһ у Аԛуб дьготьн кӧ һʹьшкайи «се сал у шәш мәһа» кʹьшандьбу (Луԛа 4:25; Аԛуб 5:17). Гәло ԝьра шаши һәйә?
На. Һʹьшкайи ԝәʹде Исраела бәре гәләк ԝәхт дькʹьшанд, ԝәкә 6 мәһа. Гава Елйас дәрһәԛа һʹьшкайе Аһабрʹа әʹлам кьр, әԝ һʹьшкайи ида гәләк ԝәхт кʹьшандьбу у ида зьрарәки мәзьн анибу. Демәк, жь дәстпека һʹьшкайе ида ԝәкә шәш мәһ дәрбаз бьбу. Ләма жи гава Елйас әʹлам кьр ԝәки һʹьшкайи ԝе кʹӧта бә, әԝ ида се сал у нива кʹьшандьбу. «Се сал у шәш мәһ» хьлаз бун, гава щьмәʹт сәр чʹийайе Кармәле тʹоп бьбу, у ԝедәре әԝана бунә шәʹдед щерʹьбандьнәкә мәзьн.
Ӧса жи ԝәрә бьфькьрьн кӧ кʹәнге Елйас дәрһәԛа һʹьшкайе Аһабрʹа әʹлам кьр. Щьмәʹте баԝәр дькьр ԝәки Баәл, әԝ һәйә хӧдане «сийаре сәр әʹԝьра», йе кӧ баран дьбаринә у һʹьшкайе кʹӧта дькә. Һәрге һʹьшкайи һе зедә дькʹьшанд нә кӧ чьԛас әԝ гәрәке бькʹьшанда, ԝана дьпьрси: «Кʹӧ йә Баәл? Кʹәнге әԝе баран бьбаринә?» Елйас гот ԝәки нә ави, нә жи баране бьбарә, һʹәта кӧ әԝ хԝәха әʹлам нәкә дәрһәԛа хьлазийа һʹьшкайе. Бь ве әʹламәтийе ча бежи авәкә кʹәл сәр сәре хьзмәткʹаред Баәлда кьрьн (1 Пʹадш. 17:1).
(1 Пʹадшати 18:1, ИМ) Пьшти дәмәкә дьреж, се салийа хәлайеда готьна Хӧдан Елйасрʹа һат у гот: «Һәрә хԝә нишани Аһав бьдә. Әзе баране бьбариньм сәр ахе».
(Мәтта 26:17-32) Ль рʹожа пешьнә Щәжьна Нане Шкәва, шагьрт һатьнә щәм Иса у жерʹа готьн: «Тӧ ль кʹӧ дьхԝази Шива Щәжьна Дәрбазбуне бьхԝи, ԝәки әм тәрʹа һазьр кьн?» 18 Әԝи жи гот: «Һәрʹьнә бажер, щәм фьлан мәрьви у бежьнә ԝи: ‹Дәрсдар дьбежә: Рʹожа мьн незик ә. Әзе тʹәви шагьртед хԝә мала тәда Щәжьна Дәрбазбуне дәрбаз кьм›». 19 У шагьрта ӧса кьр, чаԝа кӧ Иса ԝанарʹа әʹмьр кьрьбу у шива Щәжьна Дәрбазбуне һазьр кьрьн. 20 Еваре тʹәв һәр донздәһа сәр сьфре рʹуньшт. 21 Гава ԝана һе дьхԝар, Иса гот: «Әз рʹаст ԝәрʹа дьбежьм, йәки жь ԝә ԝе нәмамийа мьн бькә». 22 Шагьрт гәләки бәр хԝә кʹәтьн у һәр йәки жь ԝан готә ԝи: «Хӧдан, дьбә кӧ әз ьм?» 23 Әԝи ль ԝан вәгәрʹанд у гот: «Әԝе кӧ пәʹрийе хԝә тʹәви мьн тʹаседа кьр, әԝе нәмамийа мьн бькә. 24 Рʹаст Кӧрʹе Инсан ԝе ӧса һәрʹә чаԝа кӧ бона ԝи һатийә ньвисаре, ле ԝәй ль ԝи мәрьве кӧ нәмамийа Кӧрʹе Инсан бькә! Ԝирʹа һе ԛәнщ бу кӧ әԝ ԛәт дьне нәкʹәта». 25 Щьһудайе кӧ ԝе нәмамийа ԝи бькьра, ле вәгәрʹанд у готе: «Дәрсдар, дьбә кӧ әз ьм?» Иса ԝирʹа гот: «Тә бь дәве хԝә гот». 26 Аԝа гава ԝана һе нан дьхԝар, Иса нан һьлда шькьри да, кәркьр да шагьрта у гот: «Һан һьлдьн бьхԝьн. Әва бәдәна мьн ә». 27 Пәйрʹа кʹас һьлда шькьри да, да ԝан у ԝанарʹа гот: «Һун һʹәму жи жь ве вәхԝьн, 28 әва хуна мьн ә бона пәймане, кӧ бона бахшандьна гӧнед гәләка те рʹетьне. 29 Ле әз ԝәрʹа дьбежьм, иди әз жь вьр шунда жь бәре ве меԝе вәнахԝьм, һʹәта ԝе рʹожа кӧ әзе тʹәви ԝә Пʹадшатийа Баве хԝәда жь йа ну вәхԝьм». 30 Паше ԝана зәбурәк стьра, дәркʹәтьн чунә чʹийайе Зәйтʹуне. 31 Һьнге Иса ԝанарʹа гот: «Ишәв һун һʹәмуйе жи жь мьн пʹьшк бьн һәрʹьн, чьмки ньвисар ә: ‹Әзе ль шьвед хьм у пәзе жи бәла-бәлайи бә›. 32 Ле гава кӧ әз жь мьрьне рʹабьм, әзе бәри ԝә һәрʹьмә Щәлиле».
10-16 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 19-20
«Дьлбинийе жь Йаһоԝа Бьстинә»
ԝ19.06 15 ¶5
Тәнгасийада Итʹбарийа Хԝә Йаһоԝа Биньн
5 Бьхунә 1 Пʹадшати 19:1-4. Елйас тьрсийа, чахе Жьн-пʹадша Изабел, гот кӧ ԝе ԝи бькӧжә. Ләма әԝ рʹәвийа Бәәр-шәбайе. Әԝ ӧса дьлтәнг бу, ԝәки «бона щане хԝә мьрьне дьхԝәст». Ле чьрʹа әԝи хԝә ӧса тʹәхмин дькьр? Елйас мәрьвәки гӧнәкʹар бу, «хут мәрьвәки мина мә бу» (Аԛуб 5:17). Әԝ стресәкә мәзьнда бу у ԛьдум кʹәтьбу, дьԛәԝьмә әԝи тʹьре чʹарә тʹӧнә. Ча те кʹьфше Елйас дьфькьри, ԝәки һʹәму щәфе ԝи, кӧ әԝи бона һʹәбандьна рʹаст дькьр, пʹучʹ бу, у кӧ Исраеледа ԝе һʹал баш нәбә, у әԝи тʹьре тʹәне әԝ майә жь ԝан, йед кӧ Йаһоԝарʹа хьзмәт дькьрьн (1 Пʹадш. 18:3, 4, 13; 19:10, 14). Дьбәкә әм әʹщебмайи дьминьн, кӧ әԝ пʹехәмбәре амьн хԝә ӧса тʹәхмин дькьр. Ле Йаһоԝа һʹале ԝи рʹьнд фәʹм дькьр.
ia 103 ¶13
Әԝи Дьлбини щәм Хԝәдейе Хԝә Станд
13 Бь дитьна ԝә Йаһоԝа чь тʹәхмин дькьр, гава сәр пʹехәмбәре хԝәйи дәлал дьньһерʹи, йе кӧ бәрʹийеда бьн даре вәләзийайи бу у хԝәрʹа мьрьне дьхԝәст? Әԝ йәк зәлал ә. Чахе Елйас хәԝрʹа чу, мәләк дәсте хԝә да ԝи, ле һʹьшйар кьр у готе: «Рʹабә, хԝарьн бьхԝә». Елйас рʹабу у нане гәрм хԝар у щерʹәкә аве кӧ бәр ԝи бу, вәхԝар. Дьԛәԝьмә Елйас мәләкрʹа рʹазибуна хԝә нә жи да кʹьфше. Кʹьтеба Пирозда тʹәне те готьне кӧ әԝи нан ава хԝә хԝар у диса чу рʹаза. Дьбәкә әԝ ӧса ԛьдум кʹәтьбу кӧ нькарьбу хәбәр да жи. Ле чь жи һәбу, мәләк диса ԝи һʹьшйар кьр, дьԛәԝьмә бәрбанге у готе: «Рʹабә, хԝарьн бьхԝә. Чьмки рʹийа кӧ те һәрʹи, жь бо тә пʹьрʹ дьреж ә» (1 Пʹадш. 19:5-7, ИМ).
ia 106 ¶21
Әԝи Дьлбини щәм Хԝәдейе Хԝә Станд
21 Ве сәрһатийеда те готьне ԝәки Йаһоԝа тʹӧ тʹәшԛәләкә тʹәбийәтеда нибу. Елйас заньбу кӧ Йаһоԝа хӧданәки ԛәԝата тʹәбийәте нибу, мәсәлә ча Баәл, кʹижани кӧ һʹәсаб дькьрьн «сийаре сәр әʹԝьра», йе кӧ баран дьбаранд. Йаһоԝа һʹәму ԛәԝатед тʹәбийәте әʹфьрандийә у әшкәрә йә, кӧ ԛәԝата ԝи жь ԛәԝата һʹәму әʹфринед ԝи зедәтьр ә. Кʹьтеба Пирозда те готьне кӧ һәла һе әʹзман у әʹзманед әʹзмана жи тʹера ԝи накьн (1 Пʹадш. 8:27). Гәло әԝ йәк ча сәр Елйас һʹӧкӧм кьр? Йаһоԝа Хԝәде кʹеләка ԝи бу, ԛәԝата кʹижани бе синор ә. Ләма жи ԛә нәлазьм бу ԝәки Елйас жь Аһаб у Изабеле бьтьрсә! (Зәбур 118:6 бьхунә)
ia 106 ¶22
Әԝи Дьлбини щәм Хԝәдейе Хԝә Станд
22 Паши агьр, һәр тьшт сәԛьрʹи у Елйас дәнгәки рʹьһʹәт у нәрм бьһист. Әви дәнги диса щарәк пьрс да Елйас у Елйас щара дӧда дьле хԝә ԝирʹа вәкьр. Бешьк, паши ве йәке дьле Елйас гәләк рʹьһʹәт бу. Ле чь кӧ әԝ дәнге рʹьһʹәт паши ве йәке жерʹа гот, дьһа зедә дьлбини да Елйас. Йаһоԝа Елйас да баԝәркьрьне, ԝәки әԝ ле гәләк ԛимәт дькә. Ле чь щурʹәйи? Хԝәде пʹехәмбәре хԝәрʹа әʹйан кьр кӧ Исраеледа ԝе тʹәви хӧдане ԛәлп, Баәл, чь бьԛәԝьмә. Бешьк, хьзмәтийа Елйас бадиһәԝа нибу, чьмки Йаһоԝа бәрдәԝам дькьр ԛьрара хԝә бинә сери. Хенщи ве йәке кӧ әԝи рʹебәрийед зәлал да пʹехәмбәре хԝә, ӧса жи Йаһоԝа ԝи да фәʹмкьрьне кӧ әԝ ԛьрара ԝида роләкә фәрз дьлизә (1 Пʹадш. 19:12-17).
Хьзна Кʹьтеба Пироз
ԝ97 1/11 31 ¶2
Мәсәла Һʹьзкьрьна Мәзьн у Амьнийе
Гәләк хьзмәткʹаред Хԝәде һʹьзкьрьна ԝи щурʹәйи дьдьнә кʹьфше. Һьнәк жь ԝан «әʹрдед хԝә» дьһельн, демәк пе чь жи әʹбура хԝә дькьн, сәва кӧ ван щийа мьзгини бәла кьн, кʹидәре һʹәԝщәти һәйә йан жи Бәйтʹәледа хьзмәт кьн. Һьнәк жи дәрбази ԝәлатәки дьн дьбьн, сәва кӧ аликʹарийе бьдьнә авакьрьна авайед тʹәшкиләте. Гәләк жи һазьр ьн шьхӧлед ньмьз бькьн. Ле шьхӧле һәр хьзмәткʹарәки Йаһоԝа гәләк ԛимәт ә. Йаһоԝа һʹәмуйа ԛимәт дькә, йед кӧ бь дьл у щан ԝирʹа хьзмәт дькьн у бона шьхӧлед ԝи алийе хԝәда тьштәки ԛӧрбан дькьн (Марԛ. 10:29, 30).
(1 Пʹадшати 19:19-21, ИМ) Елйас рʹабу, жь ԝьр чу у Елишайе кӧрʹе Шафат дит. Елиша ль бәр ԝи, бь донздәһ щотед га щот дькьр. Әԝ бь щоте донздәһрʹа бу. Елйас дәрбази алийе ԝи бу у әбайе хԝә авет сәр ԝи. 20 Елиша га һиштьн, ләзанд да пәй Елйас у жерʹа гот: «Һиви дькьм дәстуре бьдә әз де у баве хԝә рʹамусьм. Ԝе гаве әзе ль пәй тә бем». Әԝи жерʹа гот: «Һәрʹә у вәгәрʹә, ма мьн рʹе ль бәр тә гьртийә?» 21 Чу, щотәки га һьлда у әԝ сәрже кьрьн. Бь нире щот агьр дада, гошт кʹәланд у да гәл [щьмәʹте]. Гәл жи хԝар. Пьштрә Елиша һат бал Елйас у хьзмәта ԝи кьр.
(Мәтта 26:33-47) Пәтрус ле вәгәрʹанд у готе: «Һәгәр һʹәму жи жь тә пʹьшк бьн һәрʹьн, ле әз тʹӧ щар жь тә начьм». 34 Иса ԝирʹа гот: «Әз рʹаст тәрʹа дьбежьм, һәма ишәв һе бәри бангдана дик, те се щара мьн инкʹар ки». 35 Пәтрус ԝирʹа гот: «Һәгәр щи бе, әзе тʹәви тә бьмьрьм жи, ле тʹӧ щар тә инкʹар накьм». Һʹәму шагьрта жи ӧса дьгот. 36 Һьнге Иса тʹәви ԝан чу ԝи щийе кӧ жерʹа Гетшәмани дьбежьн у шагьртарʹа гот: «Вьра рʹунен, һʹәта әз һәрʹьм дәра һан дӧа бькьм». 37 Әԝи тʹәви хԝә Пәтрус у һәр дӧ кӧрʹед Зәбәди һьлдан, кʹәсәр һате у бәр хԝә кʹәт. 38 Һьнге Иса ԝанарʹа гот: «Дьле мьн һаԛас дәрд у кʹәдәр ә, мина бәр мьрьне. Вьра бьминьн у тʹәви мьн һʹьшйар бьн». 39 Һьнәки пешда чу хԝә дәвәрʹуйа авит дӧа кьр у гот: «Баве мьн! Һәгәр дьбә, бьра әв кʹаса щәфе сәр мьнрʹа дәрбаз бә. Ле нә кӧ чаԝа әз дьхԝазьм, ле бьра хԝәстьна тә бә». 40 Паше һатә щәм шагьрта, әԝ рʹазайи дитьн у готә Пәтрус: «Ԝә нькарьбу кӧ сьһʹәтәке һун тʹәви мьн һʹьшйар бьмана? 41 Һʹьшйар бьминьн у дӧа бькьн, ԝәки һун нәкʹәвьнә нава щерʹьбандьне. Бәле рʹӧһʹ рʹази йә, ле бәдән сьст ә». 42 Щарәкә дьн жи Иса чу дӧа кьр у гот: «Баве мьн! Һәгәр набә кӧ әва кʹаса щәфе жь мьн дәрбаз бә һʹәта кӧ әз ԝе вәхԝьм, бьра әʹмьре тә бә». 43 Иса һат, әԝ диса хәԝеда дитьн, чʹәʹвед ԝан жь хәԝе вәнәдьбун. 44 У әԝ һьштьн чу, щара сьсийа дӧа кьр, диса әԝ хәбәр готьн. 45 Һьнге һатә щәм шагьрта у ԝанарʹа гот: «Һун һәла һе рʹазайи нә у рʹьһʹәт дьбьн? Ԝәхт перʹа гьһишт кӧ Кӧрʹе Инсан бькʹәвә дәсте гӧнәкʹара. 46 Рʹабьн әм һәрʹьн. Ва йә әԝе кӧ нәмамийа мьн дькә незик бу». 47 Әԝи һе хәбәр дьда, Щьһудайе кӧ йәк жь ԝан донздәһа бу һат. Әԝи тʹәви хԝә жь алийе сәрәкед кʹаһина у рʹуспийед щьмәʹтеда әʹлаләтәкә гьран анибу, бь дара у шура.
17-23 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 ПʹАДШАТИ 21-22
«Чʹәʹв Бьдьнә Йаһоԝа кӧ Әԝ Чаԝа Һʹӧкӧме Хԝә Дьдә Хәбате»
it-2 21
Йаһоԝа Хԝәдейе Ордийа
Гава Йешу незики Әриһайе мәләк дит, у ле пьрси кӧ әԝ алийе кʹе дьгьрә, алийе Исраеле йан алийе дьжмьнед ԝи, мәләк ӧса щаба ԝи да: «Нә йәк жи. Әз фәрмандаре артеша [ордийа] Хӧдан ьм» (Йеш. 5:13-15). Микайа пʹехәмбәр Аһаб у Йәһошәфат пʹадшарʹа гот: «Мьн Хӧдан ль сәр тʹәхте хԝә рʹуньшти дит у мьн тʹәмамийа артеша [ордийед] әʹзмана ль бал ԝи, ль чʹәп у рʹаста ԝи дит». Ԝьра хәбәрдан дәрһәԛа кӧрʹед Йаһоԝайи рʹӧһʹани дьчә (1 Пʹд. 22:19-21, ИМ). Әв йәк кӧ ԝьра хәбәра «артеша» гәләканида те хәбьтандьне, зәлал дькә кӧ ордийед әʹзмана нә тʹәне сәр хәруба, сәрафа у мәләка пʹаравәдьбә (Иш. 6:2, 3; Дсп. 3:24; Әʹнт. 5:11), ле ӧса жи кʹом бь кʹом сазкьри нә. Ләма жи Иса дькарьбу бьгота ԝәки һәрге әԝ бьхԝазә ԝе «донздәһ ордийа зедәтьр мьлйакʹәт» бенә һәԝара ԝи (Мт. 26:53). Чахе Һьзԛийа лавайа Йаһоԝа дькьр ԝәки али ԝи бькә, әԝи гот кӧ Йаһоԝа Хԝәдайе ордийа, «Хԝәдайе Исраел кӧ ль сәр хәруба рʹуньшти йә». Ча те кʹьфше бь ван гьлийа әԝи бәʹса сьндоԛа пәймане кӧ хәруб сәр ьн, дькьр, кӧ бь симболик тʹәхте Йаһоԝайи әʹзмани бу (Иш. 37:16; бәрамбәр кьн 1 См. 4:4; 2 См. 6:2). Чахе тьрс кʹәтьбу сәр хӧламе Елиша, әԝи мерхаси станд гава хәԝн-хәйал дит. Әԝи дит кӧ сәр чʹийайед дәр-дора шәһәре зәфткьри, кʹидәре Елиша бу, пе «һәспед агьри у әʹрәбәйед агьри тʹьжә буйә», демәк әв һәбун пʹарәкә ордикә Йаһоԝа (2 Пʹд. 6:15-17, ИМ).
ԝ21.02 4 ¶9
«Сәре Һәр Мери Мәсиһ ә»
9 Мьлукти. Тʹӧ кәс мина Йаһоԝа билан нинә. Ле диса жи, әԝ гӧһ дьдә ньһерʹандьнед хьзмәткʹаред хԝә (Дәстпебун 18:23, 24, 32). Әԝ изне дьдә ԝан кӧ әԝана фькред хԝә бежьн (1 Пʹадшати 22:19-22). Йаһоԝа йәки беԛьсур ә, ле әԝ беԛьсуртийе жь мә дәʹԝа накә, ле сәрда жи али мә дькә ԝәки әм пешдачуйи бьн (Зәбур 113:6, 7). Кʹьтеба Пирозда те готьне ԝәки Йаһоԝа «аликʹар» ә (Зәбур 27:9; Ибрани 13:6). Даԝьд Пʹадша заньбу кӧ әԝи тʹәне бь сайа мьлукти у аликʹарийа Йаһоԝа дькарьбу щабдарийед хԝәйә мәзьн бинә сери (2 Самуйел 22:36).
it-2 245
Дәрәԝи
Йаһоԝа Хԝәде дьһелә, ԝәки хальфандьн һʹӧкӧм кә сәр ԝан мәрьва, кʹе кӧ дәрәԝийе һʹьз дькьн, ԝәки әԝана «баԝәрийа хԝә дәрәԝийе биньн», нә кӧ мьзгинийа хере дәрһәԛа Иса Мәсиһ (2 Тʹс. 2:9-12). Әва әшкәрә те кʹьфше сәр мәсәле, йа кӧ гәләк ԛьрʹнә пешда сәре Аһаб, Пʹадше Исраеле ԛәԝьми. Пʹехәмбәред дәрәԝ дьготьнә пʹадше, ԝәки әԝе Рамот-гиләд алт кә, ле Микайа пʹехәмбәре Йаһоԝа гот, ԝәки ԛәзийа мәзьн һивийа Аһаб ә. Микайарʹа бь хәԝн-хәйале һатә әʹйанкьрьне, ԝәки Йаһоԝа изьн да әʹфринәки хԝәйи рʹӧһʹани, ԝәки әԝ бьбә рʹӧһʹе дәрәԝийе сәр заре пʹехәмбәред Аһаб. Әԝ әʹфьрине рʹӧһʹани ӧса сәр ԝан һʹӧкӧм кьр, ԝәки ԝана дәстпекьр нә кӧ рʹастийе пʹадшерʹа бежьн, ле әв йәк чь кӧ хԝәха дьхԝәстьн бьготана у чь кӧ пʹадша дьхԝәст жь ԝан бьбьһе. Рʹаст ә Аһабрʹа готьн ԝәки әв йәк тʹәльк ә, йәкә әԝи итʹбарийа хԝә дәрәԝийе ани у әʹмьре хԝә ӧнда кьр (1 Пʹд. 22:1-38; 2 Др. 18).
Хьзна Кʹьтеба Пироз
ԝ21.10 3 ¶4-6
Чь йә бь Рʹасти Тʹобәкьрьн?
4 Рʹожәке, сәбра Йаһоԝа ида хьлаз бу. Ләма, әԝи Елйас шанд ԝәки фәрмана хԝә Аһаб у Изабелерʹа әʹлам бькә. Мала Аһаб гәрәке кʹокева бьһата ԛьрʹкьрьне. Аһаб сәва готьнед Елйас гәләк хәмгин бу. Ләма, Аһабе бабах хԝә бәр Хԝәде шкенанд (1 Пʹадшати 21:19-29).
5 Рʹаст ә Аһаб хԝә бәр Хԝәде ньмьз кьр, йәкә кьред ԝи нишан дькьрьн кӧ әԝи жь дьл тʹобә нәкьрьбу. Мәсәлә, әԝи тьштәки нәдькьр ԝәки ԝәлате хԝә жь пʹутпʹарьстийе паԛьж кә. Ӧса жи, әԝи пьштгьрийа һʹәбандьна Йаһоԝа нәдькьр. Хенщи ве йәке, Аһаб бь щурʹәки майин жи нишан дькьр ԝәки әԝи жь дьл гӧне хԝә нәани рʹуйе хԝә.
6 Рʹожәке, Аһаб гази Йәһошәфат Пʹадша кьр, ԝәки тʹәви ԝи мьԛабьли Сурйайе шәрʹ бькә. Йәһошәфат пʹадшаки баш бу, йе кӧ хԝә дьспарт Йаһоԝа, ләма әԝи Аһабрʹа гот кӧ бьра әԝ пешийе жь пʹехәмбәрәки Йаһоԝа рʹебәрийе бьхԝазә. Серида, Аһаб әв йәк ԛәбул нәкьр. Әԝи гот: «Йәки дьн жи һәйә. Әм дькарьн жь Микайа кӧрʹе Йимла, бь рʹийа ԝи жи жь Хӧдан бьпьрсьн. Ле әз же һʹьз накьм, чьмки ль сәр мьн ԛәт пʹехәмбәртийа хере накә, ле пʹехәмбәртийа хьраб дькә». Диса жи, ԝана жь Микайа пьрси у әԝи бь рʹасти жи пʹехәмбәртийа хьраб Аһабрʹа гот. Дәԝса кӧ бахшандьна Йаһоԝа бьхԝазә, Аһаб Пʹадша Микайа пʹехәмбәр авитә кәле (1 Пʹадшати 22:7-9, 23, 27, ИМ). Ле Аһаб нькарьбу жь щәзайа Йаһоԝа бьрʹәвийа, кӧ жерʹа пешда һатьбу готьне, у Аһаб шәрʹда һатә кӧштьне (1 Пʹадшати 22:34-38).
(1 Пʹадшати 21:27-29, ИМ) Пьшти готьнед Елйас, Аһав щьле хԝә вәчьранд, чух ль хԝә кьр у рʹожи гьрт. Нав чухеда рʹаза у да сәр рʹийа нәфсбьчʹукийе. 28 Пәйва Хӧдан Елйасе Тишбәйирʹа һат у гот: 29 «Аһав чаԝа ль бәр мьн ньмьз бу тә дит? Мадәм ль бәр мьн ньмьз бу, әзе рʹожед ԝида хьрабийе нәшиньм. Ле әзе рʹожед кӧрʹе ԝида хьрабийе бьшиньм сәр мала ԝи».
(Мәтта 26:48-62) Аԝа нәмаме ԝи әʹшәрәт дабу ԝан у готьбу: «Әз кʹижани кӧ рʹамусьм, әԝ ә, ԝи бьгьрьн». 49 Һьнге Щьһуда незики Иса бу у готе: «Сьлав ль тә, дәрсдар!» у рʹамуса. 50 Иса ԝирʹа гот: «Һәвал, те чь бьки зу бькә!» Ԝе гаве әԝ пешда һатьн, дәст авитьнә Иса у әԝ гьртьн. 51 Йәки жь әԝед кӧ тʹәви Иса бу, рʹабу шуре хԝә кʹьшанд ль хӧламе сәрәккʹаһин хьст у гӧһе ԝи пәканд. 52 Ԝе гаве Иса ԝирʹа гот: «Шуре хԝә бькә щи. Кʹи кӧ шур һьлтинә, әԝе бь шур һәрʹә. 53 Тә тʹьре әз нькарьм жь Баве хԝә бьхԝазьм ԝәки перʹа-перʹа донздәһ ордийа зедәтьр мьлйакʹәт бьгьһинә мьн? 54 Ле ньвисар ԝе чаԝа бенә сери кӧ дьбежьн, гәрәке һʹәму аһа бьн?» 55 Ԝе гаве Иса әʹлаләтерʹа гот: «Те бежи ԝә сәр ԛачахәкида гьртийә, кӧ һун бь дара у шура һатьнә мьн бьгьрьн? Нә әз һәр рʹож тʹәви ԝә пʹарьстгәһеда рʹудьньштьм мьн һун һин дькьрьн, ле ԝә әз нәдьгьртьм. 56 Ле әв һʹәму тьшт ԛәԝьмин, кӧ ньвисаред пʹехәмбәра бенә сери». Ԝе дәме һʹәму шагьрта әԝ һьштьн у рʹәвин. 57 Йед кӧ Иса гьртьн, әԝ бьрьнә щәм Ԛәйафайе сәрәккʹаһин, ль ԝи щийе кӧ ԛанунзан у рʹуспи щьвийабун. 58 Пәтрус жи дурва һʹәта һʹәԝша сәрәккʹаһин пʹе-пʹе пәй ԝи чу кʹәтә һьндӧрʹ у ль нав нобәдара рʹуньшт, кӧ бьзаньбә ахьри ԝе чаԝа бә. 59 Сәрәкед кʹаһина у тʹәмамийа щьвина гьрәгьра жи мьԛабьли Иса шәʹдәтикә дәрәԝ дьгәрʹийан кӧ ԝи бькӧжьн, 60 ле нәдитьн. Гәләк шәʹдед дәрәԝ жи һатьн, диса нәдитьн. Паше дӧ шәʹдед дәрәԝ пешда һатьн 61 у готьн: «Әви гот: ‹Әз дькарьм пʹарьстгәһа Хԝәде һьлшиньм у нава се рʹожада диса ԝе чекьм›». 62 Сәрәккʹаһин рʹабу сәр пʹийа у ԝирʹа гот: «Бона ван шәʹдәтийа кӧ әвана мьԛабьли тә дьдьн тӧ чьма щабәке нади?»
24-30 ЩОТМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 ПʹАДШАТИ 1-2
«Мәсәла Баш Һинкьрьнеда»
ԝ15 15/4 13 ¶15
Рʹуспи Ча Бьред Дьн Һин Дькьн ԝәки Әԝана Һинкьри бьн
15 Мәсәла Елиша ӧса жи нишан дькә, ԝәки фәрз ә иро бьра ԛәдьре рʹуспийед щерʹьбанди бьгьрьн. Паши ԝе йәке чахе Елиша у Елйас рʹасти кʹомәкә пʹехәмбәред жь Әриһайе һатьн, әԝана чунә бәр чʹәме Урдӧне. Паше «Елйас щӧбба [кʹьнще] хԝә рʹаһьшт у ԝе ль һәв да у ль аве хьст у ав бь ви али у ль ԝи али бун дӧ пʹари». Әԝана һәр дӧ жи дәрбази щийе зьһа бун, тʹәвайи «дьмәшийан у дьахьфин [хәбәрдьдан]». Елиша рʹьнд гӧһе хԝә дьда һинкʹаре хԝә, у бәрдәԝам дькьр жь ԝи һин дьбу. Елиша тʹӧ щар дьшьрмиш нәдьбу кӧ чьԛаси занә бәс ә. Паше Елйас бь фьртоне һьлкʹьшийа ль әʹзмен, ле Елиша вәгәрʹийа бәрбь чʹәме Урдӧне. Ль ԝе дәре әԝи кʹьнща Елйас һьлда у аве хьст у гот: «Хӧдане Елйас Хԝәде [Йаһоԝа] ль кʹӧ дәре йә?» Диса жи ав бу дӧ пʹара (2 Пʹадшати 2:8-14).
ԝ15 15/4 13 ¶16
Рʹуспи Ча Бьред Дьн Һин Дькьн ԝәки Әԝана Һинкьри бьн
16 Ԝә дина хԝә дайе кӧ кʹәрәмәта Елишайә әʹԝльн һәма ӧса жи бу чаԝа кʹәрәмәта Елйасә пашьн? Жь ԝе йәке әм чь һин дьбьн? Елиша тʹӧ щар дьшьрмиш нәбу ԝәки чьмки борщдари ида сәр ԝи йә, әԝ дькарә бь щурʹе хԝә бькә нә кӧ ча Елйас дькьр. Дәԝсе, әԝи метода Елйас дьда хәбате, у бь ԝе йәке әԝи да кʹьфше ԛәдьр һьндава һинкʹаре хԝә, у әве йәке али пʹехәмбәред дьн кьр кӧ итʹбарийа хԝә Елиша биньн (2 Пʹадшати 2:15). Елиша ԝәкә 60 сала чаԝа пʹехәмбәр ԛӧльх кьр, у Йаһоԝа ԛәԝат да ԝи кӧ әԝ һе зедә кʹәрәмәт бькә нә кӧ Елйас. Жь ԝе йәке әм чь дәрсе һин дьбьн?
Хьзна Кʹьтеба Пироз
ԝ05 1/8 9 ¶1
Фькьред Сәрәкә жь Кʹьтеба 2 Пʹадшати
2:11: Гәло кʹижан бу әԝ әʹзман, кʹижанирʹа «Елйас бь багәрерʹа дәркʹәт», ИМ? Әва гәрдунеда щики башԛә нибу, нә жи щийе кӧ әʹфринед рʹӧһʹани дьжин, мәсәлә Хԝәде у мәләк (Ԛануна Дӧщари 4:19; Зәбур 11:4; Мәтта 6:9; 18:10). «Әʹзман», сәр кʹижани Елйас чу, әв һәбу атмосфера әʹрде (Зәбур 78:26; Мәтта 6:26). Ча те кʹьфше әв әʹрәба агьри кӧ сәр ви әʹзманирʹа дәрбаз бу, Елйас бьрә щики дьнә сәр әʹрде, кʹидәре әԝ һьнә ԝәʹдә дьжит. Чәнд сал шунда, Елйас нәʹмә Йорам пʹадше Щьһудайерʹа ньвиси (2 Дирок 21:1, 12-15).
(2 Пʹадшати 2:11, ИМ) Гава әԝ дьмәшийан у дьпәйьвин, әʹрәбәйәкә жь агьр у һәспед агьрин хӧйа бун у һәрдӧйа жь һәв вәԛәтандьн. Елйас бь багәрерʹа дәркʹәт әʹзмана.
(Мәтта 26:63-75) Ле Иса дәнге хԝә нәкьр. Сәрәккʹаһин диса ԝирʹа гот: «Әз тә бь Хԝәдейе сах дьдьмә сонде. Мәрʹа бежә, тӧ йи Мәсиһ, Кӧрʹе Хԝәде?» 64 Иса готә ԝи: «Тә бь дәве хԝә гот. Ле әз ԝәрʹа дьбежьм, жь вьр шунда һуне Кӧрʹе Инсан ль кʹеләка Йе Һәри Зор, ль мьле ԝийи рʹасте рʹуньшти у ль сәр әʹԝред әʹзмен те бьбиньн». 65 Һьнге сәрәккʹаһин кʹьнщед хԝә ԛәлаштьн у гот: «Әви кʹьфьри кьр! Иди шәʹдә чи мәрʹа нә? Ва йә ԝә ньһа кʹьфьрийе ԝи бьһист? 66 Ԝәва чаԝа хӧйа дькә?» Ԝана жи ле вәгәрʹанд у готьн: «Ԝирʹа кӧштьн дькʹәвә». 67 Ԝе гаве тʹуйи рʹуйе ԝи кьрьн, бь кʹӧлма лехьстьн, һьнәка жи шәмаԛ ле дьдан 68 у дьготьне: «Мәсиһ, пʹехәмбәртийе мәрʹа бькә, кʹа кʹи бу кӧ тә хьст?» 69 Ԝи чахи Пәтрус дәрва ль һʹәԝшеда рʹуньштьбу. Щарик һатә щәм ԝи у готе: «Тӧ жи тʹәви Исайе Щәлиле буйи». 70 Ле әԝи ль бәр һʹәмуйа инкʹар кьр у гот: «Әз ньзаньм тӧ чь дьбежи». 71 Чахе әԝ чу бәр дәргәһ, йәкә дьн әԝ дит у готә әԝед кӧ ль ԝьр бун: «Әве һан жи тʹәви Исайе Ньсрәте бу». 72 Әԝи диса бь сонд инкʹар кьр гот: «Әз ԝи мәрьви нас накьм». 73 Хеләке шунда әԝед кӧ ль ԝьр бун чунә щәм Пәтрус у готьне: «Һәбә-тʹӧнәбә тӧ жи жь ԝан и, чьмки хәбәрдана тә шәʹдәтийа тә дьдә». 74 Һьнге әԝи ньфьрʹ хԝә кьр, сонд хԝар у гот: «Әз ԝи мәрьви нас накьм». Ԝе гаве дик банг да 75 у Пәтрус әԝ готьна Иса ани бира хԝә кӧ ԝирʹа готьбу: «Бәри бангдана дик, те се щара мьн инкʹар ки». Дәркʹәтә дәрва у кʹәлә-кʹәл гьрийа.
31 ЩОТМӘҺЕ–6 МЬЖДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 ПʹАДШАТИ 3-4
«Кӧрʹе Хԝә Бьвә»
«Әз Заньм . . . Әԝе Рʹабә»
7 Сәрһатийа дӧда дәрһәԛа сахкьрьне кӧ Кʹьтеба Пирозда ньвисар ә, дәрһәԛа Елиша пʹехәмбәр ә. Шунәмеда жьнәк дьжит, йе кӧ безӧрʹәт бу у мере ԝе ида әʹмьрда мәзьн бу. Әԝе меванһʹьзийа мәзьн Елишарʹа да кʹьфше, у бона ве йәке Йаһоԝа ле кʹәрәм кьр у кӧрʹ жерʹа бу. Чәнд сал дәрбаз бу, әԝ кӧрʹе ԝе мьр. Бьдьнә бәр чʹәʹве хԝә кӧ бона ве жьньке әԝ йәк дәрдәки чьԛас гьран бу. Дьле ԝе ӧса дешийа кӧ кʹәрба әԝ 30 км рʹе чу, сәва кӧ сәр чʹийайе Кармәл Елиша бьвинә. Елиша пʹехәмбәр бәрдәстийе хԝә Гәһази пешийа хԝә у ве жьньке, шандә Шунәме. Гәһази нькарьбу әԝ гәдә жь мьрьне рʹакьра. Паше дийа гәдә кӧ дьлшькәсти бу, тʹәви Елиша һатә мал (2 Пʹадш. 4:8-31).
«Әз Заньм . . . Әԝе Рʹабә»
8 Малда кʹидәре кӧ щьнйазе ԝи гәдәйи бу, Елиша дӧа кьр. Йаһоԝа дӧайе ԝи бьһист, у гәдә сах бу. Жь шабуне ньге де әʹрд нәдьгьрт кӧ кӧрʹе ԝе диса тʹәви ԝе бу! (Бьхунә 2 Пʹадшати 4:32-37) Һьнге дьбәкә әԝе дайике гьлийед Һаннайе ани бира хԝә, чахе жерʹа кӧрʹ һатә буйине. Һаннайе чахе кӧрʹе хԝә Самуйел бьрә коне пироз, Йаһоԝарʹа дӧада гот: «Хӧдан . . . дадьхә ԝаре мьрийа у һьлдькʹьшинә» (1 Сам. 2:6). Хԝәде әԝ гәде Шунәме һьлкʹьшанд, у избат кьр кӧ ԛәԝата ԝи һәйә мьрийа жь мьрьне рʹакә.
Хьзна Кʹьтеба Пироз
it-2 697 ¶2
Пʹехәмбәр
«Лаԝед Пʹехәмбәр». Чаԝа кӧ кʹьтебәкеда те готьне, хәбәра Ибрани «бен» (лаԝе) у «бене» (лаԝед) дькарә кʹомәкә мәрьва, щьвак йан жи бәрәк бе һʹәсабе (As Gesenius’ Hebrew Grammar explains Oxford, 1952, p. 418). (Бәрамбәр кьн Нм. 3:8, кʹидәре те хәбьтандьне гьли-готьн ‹чекәре мәлһʹәма› кӧ рʹастә-рʹаст те һʹәсабе ‹кӧрʹе чекәред мәлһʹәма›). Жь ве йәке те кʹьфше кӧ хәбәра «лаԝед пʹехәмбәра», дьбәкә дьһатә һʹәсабе мәкʹтәб, кʹидәреда һин дьбун әԝед кӧ гәрәке ча пʹехәмбәр хьзмәт кьрана, йан жи щьвака пʹехәмбәра. Кʹьтеба Пирозда те готьне кӧ кʹомед ӧса Бәйтʹәледа, Әриһайеда у Гилгаледа һәбун (2 Пʹд. 2:3, 5; 4:38; бәрамбәр кьн 1 См. 10:5, 10). Рамайеда Самуйел сәркʹаре кʹомәкә ӧса бу (1 См. 19:19, 20), у ча те кʹьфше рола Елиша жи әԝ бу (2 Пʹд. 4:38; 6:1-3; бәрамбәр кьн 1 Пʹд. 18:13). Ль гора Кʹьтеба Пироз ԝана хԝәрʹа авайи ава дькьр у һащәт дәйни һьлдьдан, чь кӧ дьбәкә дьдә кʹьфше ԝәки әԝана дәԝләти нибун. Гәләк пʹехәмбәр тʹәвайи дьжитьн у хԝарьн дьхԝарьн, ле дьбәкә щар-щара кәсәк жь ԝан дьчу ԝәки шьхӧле хԝәйә пʹехәмбәртийе бинә сери (1 Пʹд. 20:35-42; 2 Пʹд. 4:1, 2, 39; 6:1-7; 9:1, 2).
(2 Пʹадшати 4:38) У Елиша диса һат Гилгале. У ль ԝәлет хәла һәбу у лаԝед пʹехәмбәр ль бәр ԝи рʹуньштьбун у хӧламе хԝәрʹа гот: Бәроша мәзьн дайнә у лаԝед пʹехәмбәррʹа шорбе чекә.
(Мәтта 27:1-15) Гава сьбәһ сафи бу, тʹәмамийа сәрәкед кʹаһина у рʹуспийед щьмәʹте ль һәв шеԝьрин кӧ Иса чаԝа бьдьнә кӧштьне. 2 Әԝ гьредан, бьрьн данә дәсте Пилатойе ԝәли. 3 Һьнге Щьһудайе кӧ нәмамийа ԝи кьр, дит кӧ Иса һатә гьртьне, пʹошман бу, әԝ си зив вәгәрʹандә сәрәкед кʹаһина у рʹуспийа 4 у гот: «Мьн гӧнә кьр. Әз бумә сәбәбе хуна бесущ». Ԝана жи готә ԝи: «Чи мәрʹа нә? Тӧ зани». 5 Әԝи жи әԝ зив авитьнә нав пʹарьстгәһе, дәркʹәт чу хԝә хәньԛанд. 6 Сәрәкед кʹаһина зив һьлдан у готьн: «Нә рʹаст ә кӧ әм ван бькьнә нав хьзна пʹарьстгәһе, чьмки әԝ һәԛе хуне йә». 7 Һьнге әԝ ль һәв шеԝьрин у бь ԝан зива Әʹрде Ахинкәр кʹьрʹин, бона тʹьрбед хәриба. 8 Ләма әԝ әʹрд һʹәта иро жи «Әʹрде Хуне» те готьне. 9 Һьнге әԝ готьна бь заре Йерәмийа пʹехәмбәр һатә сери: «Си зив ԛимәт дан, ԝәкә ԝи ԛимәте кӧ зарʹед Исраеле ԛайл бун 10 у әԝ данә Әʹрде Ахинкәр, чаԝа кӧ Хӧдан мьнрʹа әʹмьр кьр». 11 Иса бәр ԝәли сәкьни, ԝәли жь ԝи пьрси у гот: «Тӧ йи Пʹадше щьһуйа?» Иса ԝирʹа гот: «Тә бь дәве хԝә гот». 12 Ле чахе сәрәкед кʹаһина у рʹуспийа давитьнә ԝи, әԝи ԛәт щаба кәсәки нәда. 13 Һьнге Пилато ԝирʹа гот: «Тӧ набьһейи чьԛас шькийате тә дькьн?» 14 Әԝи диса щаба кәсәки нәда, һʹәта ԝәли жи шаш ма. 15 Әʹдәте ԝәли бу кӧ ль щәжьнеда бь хԝәстьна әʹлаләте гьртик ԝанрʹа бәрʹда.